Chapter 23

|| trayoviṃśodhyāyaḥ ||

tato ghaṭān sakarakān dvārakuṃmbhāṃstathaiva ca|
snānayogyānapi ghaṭān maṇḍape tvadhivāsayet|| 23.1 ||
śodhayet salilaiḥ śuddhai randhrādiparivarjitān|
sūtreṇa veṣṭayedyatnādaṅgulāṅgulamantaram|| 23.2 ||
upayuṅkte yadi ghaṭān svarṇādīn lohanirmitān|
sūtreṇa veṣṭanaṃ teṣāṃ na kartavyaṃ jalodbhave|| 23.3 ||
paścime yāgasadanād vrīhibhiśchādayaid(1)bhuvam|
pūrvāgrānuttarāgrāṃśca kuśāṃstatra paristaret|| 23.4 ||
(1.gra. bhuvaḥ|)
adhomukhān ghaṭān sarvān nyasetpaṅktikrameṇa(2)vai|
kuśānupari saṃstīrya prāṅmukhaṃ parameṣṭhinā|| 23.5 ||
(2.gra. tu|)
darbhamudrāṃ pradarśyātha gandhatoyena sarvetaḥ|
saṃprokṣya puṃsā viśvena vikiredakṣatān rame|| 23.6 ||
kumbhavedyāṃ purā devi pratyekaṃ vrīhibhirguruḥ|
pīṭhamaṣṭāṅgulaṃ kuryāt tadardhaṃ taṇḍulena ca|| 23.7 ||
tilena ca tadardhena padmaṃ vā cakrameva vā|
likhitvā teṣu vai kumbhān karakaṃ cāpi vinyaset|| 23.8 ||
tathā dvārādikumbhānāṃ ghaṭānāmabhiṣecane|
ṣaḍaṅgulaṃ vrīhipīṭhaṃ tadardhena ca taṇḍulam|| 23.9 ||
tilena pīṭhaṃ tasyārdhaṃ palpayitvā ca teṣu vai|
ghaṭādayaḥ sthāpanīyā no cetkarma nirarthakam|| 23.10 ||
cakrābjāya ca vedyāṃ tu vrīhyādyaiḥ pīṭhakalpane|
tilaṃ vinā tu kartavyaṃ tasminnabjaṃ likhed‌guruḥ|| 23.11 ||
pañcavarṇaistaṇḍulaiśca taddalāni ca kalpayet|
karṇikāṃ pītavarṇena raktaśvetaiśca kesarān|| 23.12 ||
tataḥ prabhāte snānādi nityakarma samāpya ca|
ṛtvigbhirālayaṃ gatvā pālikābālabimbayoḥ|| 23.13 ||
pūjāṃ prakalpayeddhīmān tathā dvārādipūjanam|
pratiṣṭhāntaṃ tvitthameva kālayoḥ pūjanaṃ caret|| 23.14 ||
purādhivāsitān kumbhāṃstantubhiḥ pariveṣṭitān|
vidikṣu madhyame cāpi vinyaset pañca vai rame|| 23.15 ||
pañcagavyāni mantraistu melayedabhiṣecane|
pañcagavyaistataḥ pañca kalaśān pūrayet guruḥ|| 23.16 ||
ekaikasmin ghaṭe kūrcaṃ nālikeraphalaṃ tathā|
āmrapallavagucchaiśca kalaśānapidhāpayet|| 23.17 ||
mahāmaṇḍapabhūbhāge vinyaset snānaviṣṭaram|
karmādilohabimbāni pīṭhe tasminni(3)yojayet|| 23.18 ||
(3.gra. dhāpayet|)
pīṭhasya tasya purataḥ sthāpitāṃ(n) dhānyaviṣṭare|
śodhayet kalaśān pūjādravyāṇyapi(ca) śoṣayet|| 23.19 ||
puṇyāhavāriṇā prokṣya saurabheyīṃ pradarśayet|
taddugdhairamṛtīkṛtya sarvavastūni deśikaḥ|| 23.20 ||
kumbheṣu pūjayeddevān pañcabhūtādhi(4)devatāḥ|
mūlādisarvadevānāṃ snānaśāṭīṃ samarpayet|| 23.21 ||
(4.gra. daivatān|)
arghyādibhiḥ samabhyarcya madhuparkaṃ nivedayet|
mūlabimbāni (5)kumbhena madhyenaivābhiṣecayet|| 23.22 ||
(5.gra. madhyena kumbhe)
karmādisarvabimbāni vahnisthena tato rame|
nairṛtena vimānaṃ ca bhaktabimbāni mārutāt|| 23.23 ||
kumbhenaiśena sarvatra prokṣayedālayaṃ tataḥ|
sudhāmayādibimbānāṃ prokṣaṇaṃ pañcagavyataḥ|| 23.24 ||
śuddhatoyaistato bimbānyabhyaṣiñced‌gurūttamaḥ|
śilpidoṣanirāsārthaṃ snānametat prakīrtitam|| 23.25 ||
punardevasya purato dhānyapīṭhaṃ prakalpya ca|
goghṛtaiḥ pūritaṃ kumbhaṃ nikṣipet tatra deśikaḥ|| 23.26 ||
tasminnārāyaṇaṃ devamāvāhyābhyarcayedrame|
ghṛtasnāteti mantreṇa sarvabimbāni lepayet|| 23.27 ||
gandhacūrṇaiḥ śodhayitvā hyuṣṇodairabhiṣecayet|
mūlādīnāṃ ca (6)bimbānāṃ sarveṣāṃ darbhasaṃmitam|| 23.28 ||
(6.gra. sarveṣāṃ bimbānāṃ)
yuvāsuvāsāmantreṇa vastrayugmaṃ samarpayet|
arghyaṃ pādyaṃ tathācāmaṃ gandhaṃ mālyaṃ ca dhūpakam|| 23.29 ||
dīpaṃ naivedyamapi ca viṣṇugāyatriyā tataḥ|
dadyācchriyādidevīnāṃ tattanmantreṇa deśikaḥ|| 23.30 ||
vāstuśāntiṃ tataḥ kuryāt taddaivaṃ pūjayetpurā|
purā daivāsure yuddhe daityān bhṛgurarakṣayat|| 23.31 ||
tatpatnyapyasurān sarvānudare nyasya nityaśaḥ|
tataḥ kopasamāviṣṭaḥ patnyāstasya śiro'cchinam|| 23.32 ||
kopena mahatāviṣṭe bhṛgau tadgātrasaṃbhavaḥ|
svedo'pataddharāpṛṣṭhe tatsvedād daityasattamaḥ|| 23.33 ||
bhūmerajani so devān hantumudyatavāṃstadā|
sarve devā militvā taṃ pātayantaśca tadvapum(7)|| 23.34 ||
(7.gra. tadvapuḥ|)
ākramya ravimukhyāste śiraḥprabhṛti susthitāḥ|
tataḥ kranditumārabdhaḥ paṅkajāsanamabjaje|| 23.35 ||
caturmukhastatastasmai varaṃ prādāttu vāstave|
tava bhūmeḥ samutpattiryasmājjātā bhuvaḥ suta|| 23.36 ||
tasmāt tvāṃ mānavā bhūmau gṛhaṃ vā grāmameva vā|
pattanaṃ vātha (8)devasya dhāma vā kalpayedyadā|| 23.37 ||
(8.gra. yajñasya)
itthaṃ devairupārūḍhaṃ pūjayiṣyanti madvarāt|
tava tṛptistena bhavedyadi nārcanti helayā|| 23.38 ||
putrādīnāṃ ca nāśaḥ syāt saṃpaddhīno bhaviṣyati|
ataḥ (9)saṃprārthayed vidvān sarveṣāṃ kṣemahetave|| 23.39 ||
(9.gra. saṃpūjayet)
prapāyā dakṣiṇe pārśve tilabhāraiḥ prasārite|
adhomukhaṃ prāk‌śirasaṃ koṇeṣu caturṣu kramāt|| 23.40 ||
prasāritaṃ pāṇipādaṃ vilikhedyatnamāsthitaḥ|
devānāvāhya tasmiṃstu pūjayettadvadāmi te|| 23.41 ||
mastake sūryamāvāhya bāhumūle ca manmatham|
subrahmaṇyaṃ kūrpare'sya vāmahaste vināyakam|| 23.42 ||
pādadvaye'śvinīdevai madhye pūrṇaniśākaram|
pāṇau durgāṃ kūrpare tu mātṝrmūle bhujasya ca|| 23.43 ||
umāpatiṃ nābhideśe brahmāṇaṃ hṛdaye harim|
parito'ṣṭasu lokeśānuttare kṣetrarakṣakam|| 23.44 ||
saptadarbhakṛtaṃ kūrcaṃ vāstunāthasya vai hṛdi|
nidhāya manasā dhyāyannācāryastvṛtvijo'pi vā|| 23.45 ||
pūjayedvāstunāthasya paścime laukike'nale|
pañcopaniṣadā mantrī sahasraṃ juhuyād‌ghṛtaiḥ|| 23.46 ||
śamyapāmārgakhadirasamidbhistadanantaram|
mūlamantreṇa tanmantravarṇamekaikamuccaran|| 23.47 ||
aṣṭottaraśataṃ vāpi hyaṣṭaviṃśatimeva vā|
aṣṭau vā juhuyāddevi sūktena puruṣātmanā|| 23.48 ||
caruṃ ca juhuyādbhadre ṣaḍ‌daśāhutibhirguruḥ|
sakṛtaṃ(10)sakṛccaruṇā vāstunāthaśarīragān|| 23.49 ||
(10.gra. sakṛcca caruṇā)
nāmānyuccārya hutvā ca tebhya eva baliṃ kṣipet|
visṛjettadgatān devān sūryādīn gurusattamaḥ|| 23.50 ||
tatsthānaṃ gomayāmbhobhirlepayettadanantaram|
vācayitvā ca puṇyāhaṃ tajjalaiḥ prokṣayedbhuvam|| 23.51 ||
tatastu darbhapuñjena vāstuvajjanayettanum|
tasmin (11)tilaiḥ samāvāhya prokṣya puṇyāha(12)vāriṇā|| 23.52 ||
(11.gra. tilān)
(12.gra. pūrvakam|)
jvalayitvā tu taṃ vāstuṃ paricāraistu vīthiṣu|
ākarṣayedaṣṭadikṣu pratiṣṭhārthaṃ hareḥ priye|| 23.53 ||
āhūtānāṃ dikpatīnāṃ baliṃ dadyāttu padmaje|
athālayaṃ samāgatya pāṇipādaṃ ca śodhayet|| 23.54 ||
ācamya ca yathāśāstraṃ mūlādīnāṃ ca vai guruḥ|
bandhayet kautukaṃ teṣāṃ bimbānāmānupūrvaśaḥ|| 23.55 ||
tāmbūlaphalapuṣpādyairhemasūtrādisaṃmitān|
paṭalādīn samādāya brāhmaṇairvedapāragaiḥ|| 23.56 ||
ṛtvigbhirdīkṣitaiścāpi yajamānena vai guruḥ|
dhāma pradakṣiṇīkṛtya vādyaghoṣapuraḥsaram|| 23.57 ||
garbhamandiramāsādya dhānyapīṭhe niveśayet|
(13)muhurmuhuḥ praṇamyātha stutvā nānāvidhaiḥ stavaiḥ|| 23.58 ||
(13.gra. caturvāraṃ)
puṇyāhaṃ vācayitvātha sūtrāṇi prokṣayettataḥ|
mahārajatasūtrādi śodhayecchoṣaṇādibhiḥ|| 23.59 ||
aparājitamantreṇa rakṣāsūtrāṇi mantrayet|
teṣu śriyaṃ samāvāhya kṣīrasāgaramadhyataḥ|| 23.60 ||
saṃpūjya vidhivaddevīṃ tato bimbāni pūjayet|
kautukaṃ mūlabimbānāma badhvā deśikasattamaḥ|| 23.61 ||
mahāmaṇḍapamāsādya karmārcādyāḥ supūjya ca|
rakṣābandhaṃ ca vidhivat kṛtvā svasya kare tathā|| 23.62 ||
ṛtvijāṃ cāpi badhnīyāt paścānnīrājayedvibhum|
tato vimānamāsādya saṃpūjya vidhivattataḥ|| 23.63 ||
prāsādapaṭṭikāyāṃ tu pañcaviṃśatitantubhiḥ|
badhvā pratisaraṃ pūrvaṃ paścāt taddeśikasya ca|| 23.64 ||
tataśchāyādhivāsaṃ tu kuryāt deśikasattamaḥ|
chāyādhivāsasid‌dhyarthaṃ mūlārcāyāḥ puro bhuviḥ|| 23.65 ||
svarṇādinirmitāṃ vāpi dārujāṃ mṛṇmayīṃ tu vā|
jaladroṇīṃ kaṭāhaṃ vā sthāpayed dhānyaviṣṭare|| 23.66 ||
parito'ṣṭau nālikerasūtrakūrcādibhiryutān|
ghaṭāṃstattadvidhinyastānaśvatthāmradalairyutān|| 23.67 ||
karakaṃ ca nidhāyādau śirobhāge gurūttamaḥ|
droṇyādīn (14)puṣpasalilaiḥ pūrayet kamalāsane|| 23.68 ||
(14.gra. gandha)
tataḥ puṇyajalaiḥ prokṣya pīṭhaṃ teṣu prakalpayet|
indrādīnupakumbheṣu karake ca sudarśanam|| 23.69 ||
aṣṭāviṃśatidarbhaiśca kṛte kūrce hariṃ smaret|
ekaviṃśatidarbhaiśca kṛtakūrceṣu vai rame|| 23.70 ||
śriyādidevīrāvāhya pūjayecca yathākramam|
mantraistu pāvamānībhiḥ pañcopaniṣadādibhiḥ|| 23.71 ||
śuddhīkṛte jale tasmin bhagavāniti mantrataḥ|
śāyayet tatra kūrcasthaṃ harimaṣṭākṣareṇa vai|| 23.72 ||
pūjayecca nivedyāntaṃ śriyādīnāmayaṃ kramaḥ|
cakramudrāṃ pradarśyātha jaladroṇīḥ pidhāpayet|| 23.73 ||
arcābhimāninaṃ jīvaṃ mantrajño deśikottamaḥ|
ākṛṣya hṛdaye svasya nayet saṃhāramārgataḥ|| 23.74 ||
pare brahmaṇi taṃ cāpi yojayet kamalekṣaṇe|
tatastu mūlabimbāni śoṣaṇaplāvanādibhiḥ|| 23.75 ||
śodhayitvātha bimbāni vastrairācchādayed guruḥ|
evaṃ vimānamūrtīnāṃ vimānasya ca kārayet|| 23.76 ||
pratyekaṃ vā vimānārthaṃ jaladroṇyāṃ gurūttamaḥ|
jalādhivāsaṃ kurvīta vimānasya puro bhuvi|| 23.77 ||
kṛteṣu saptadarbhaistu kūrceṣvāvāhya vai rame|
chāyādhivāsaṃ devasya savimānasya vai guruḥ|| 23.78 ||
kṛtvaivaṃ maṇḍapaṃ gatvā kumbhasthāpanaṃ(15)karmaṇi|
susnātā dhautavasanāḥ svacchamṛtsnordhvapuṇḍrakāḥ|| 23.79 ||
(15.gra. mācaret|)
candanādyanuliptāṅgāḥ puṣpamālādibhūṣitāḥ|
paricāravarāḥ sarve kumbhān pūrvādhivāsitān|| 23.80 ||
gṛhītvā gurūṇājñaptā prādakṣiṇyena mandiram|
yātropakaraṇaiścaiva vādyaghoṣādibhiḥ saha|| 23.81 ||
nadyāditīramāsādya gālitaiḥ salilairghaṭān|
saṃpūrya samalaṃkṛtya nālikerā(16)dibhirghaṭān|| 23.82 ||
(16.gra. phalādibhiḥ|)
gajaskandheṣu vā viprā mūrdhniṣvāropya bhaktitaḥ|
gatvā pradakṣiṇaṃ dhāma praviśedyāgamaṇḍapam|| 23.83 ||
vedimadhye mahākumbhaṃ karakaṃ tasya dakṣiṇe|
aindrādīśānaparyantaṃ samān kumbhān vinikṣipet|| 23.84 ||
madhye madhye tu kumbhānāṃ (17)śaṅkhādīnaṣṭamaṅgalān|
padmarāgaṃ pravālaṃ ca vajraṃ vaiḍūryameva ca|| 23.85 ||
(17.pā-1. śrīvatsādyaṣṭamaṅgalam|)
(18)puṣyarāgaṃ cendranīlaṃ gāruḍaṃ mauktikaṃ tathā|
(19)gomedakaṃ ceti navaratnāni kamalekṣaṇe|| 23.86 ||
(18.puṣyarāgaṃ tathā nīlamaṇiṃ marakataṃ tathā|)
(19.muktāsphaṭikamuddiṣṭaṃ sarvaṃ maṃtreṇa nikṣipet|)
vāsudevaṃ śaṅkhacakraṃ gadāṃ padmaṃ dhvajaṃ tathā|
śrīvatsaṃ vainateyaṃ ca kūrmarājaṃ tathaiva ca|| 23.87 ||
svarṇādinirmitānetān ratnaiḥ saha gurūttamaḥ|
madhyakumbhādikumbheṣu nikṣipettadanantaram|| 23.88 ||
kālacakraṃ cāgnimaṇiṃ karake tu vinikṣipet|
itthameva vimānasya kalaśān sthāpayedrame|| 23.89 ||
pratimāmaniruddhasya mahākumbhe nidhāpayet|
padmarāgādiratnāni dvārakumbheṣu vai nyaset|| 23.90 ||
mṛganābhiṃ candanaṃ ca ghanasāraṃ ca kuṅkumam|
uśīramagaruṃ cāpi ghaṭatīrtheṣu nikṣipet|| 23.91 ||
nāstikān bhinnamaryādān devabrāhmaṇanindakān|
pratilomān pāpavṛttīn kuṣṭhādivyādhipīḍitān|| 23.92 ||
hīnāṅgān badhirānandhān nityakarmavivarjitān|
niṣkāsyaitān bahiḥ puṇyaiḥ salilaiḥ prokṣayed guruḥ|| 23.93 ||
ṛgvedinastu prāgdvāre dakṣiṇasyāṃ yajurmayān|
pratīcyāṃ sāmavedajñānuttare'tharvaśākhinaḥ|| 23.94 ||
tattadvedānupakramya pāṭhayettān gurūttamaḥ|
vedāntādipurāṇāni gāthāstotrāṇi vahniṣu|| 23.95 ||
eteṣāmavirodhena tūryāṇyanyāni gāpayet|
ṛtvijo guruṇādiṣṭāḥ prāgdvārādīṃstato yajet|| 23.96 ||
prāgdvāratoraṇasyetthaṃ dakṣiṇottaraśākhayoḥ|
suśobhanaṃ gotrabhidamupariṣṭācca pārśvayoḥ|| 23.97 ||
vainateyau madhyame tu pūjayecca sudarśanam|
dhvajayo raktatayordevi kumudaṃ kumudākṣakam|| 23.98 ||
kumbhayoḥ pūjayedvidvānarghyādyaiḥ pūrṇapuṣkarau|
ṛgvedaṃ dvāramadhye tu dakṣiṇadvāraśākhayoḥ|| 23.99 ||
subhadraṃ dharmarājaṃ ca dhvajayoḥ pītavarṇayoḥ|
puṇḍarīkaṃ vāmanaṃ ca kumbhayostu śubhānane|| 23.100 ||
ānandanandanau devau yajurvedaṃ tu madhyame|
sugandhavaruṇau pūjyau pratīcīdvāraśākhayoḥ|| 23.101 ||
dhvajayornīlayordhyāyet śaṅkukarṇaṃ tathāparam|
sarvanetraṃ kumbhayostu vīrasenasuṣeṇakau|| 23.102 ||
madhyadeśe sāmavedamudīcīdvāraśākhayoḥ|
sugotradhanadau caiva dhvajayoḥ śuklayo rame|| 23.103 ||
sumukhaṃ supratiṣṭhaṃ ca kumbhayoḥ saṃbhavaṃ tathā|
prabhavaṃ madhyame sthāne atharvāṇaṃ (20)ca pūjayet|| 23.104 ||
(20.gra. samarcayet|)
(21)dvārāṇāmitareṣāṃ ca vainateyādipūjanam|
prāgdvāravat prakurvīta yamādīnāṃ kramāt guruḥ|| 23.105 ||
(21.gra. ayaṃ ślokaḥ 112, ślokādanantaraṃ dṛśyate|)
bālabimbasya pīṭhāttu pūrvoktāneṣu vallabhe|
āvāhya cākṣatairdevānarghyādyaiḥ pūjayet kramāt|| 23.106 ||
śaṅkhacakragadāpāṇīn karaṇḍimakuṭānvitān|
kṛtāñjalīn bhaktitanamrān dhyāyetpārṣadavallabhān|| 23.107 ||
pāṭhayed dvārapālīyaṃ sāma sāmavidastadā|
paścimasyāṃ cakrakuṇḍapratīcyāṃ prāṅmukhasthitaḥ|| 23.108 ||
kūrmāsane hariṃ dhyāyan sapavitro gurūttamaḥ|
asurāntakacakrāya svāheti manumuccaran|| 23.109 ||
tribhirdarbhaiḥ kuṇḍaśuddhiṃ kṛtvā tadanu vai rame|
candanādyairlepayitvā vikirecca tato'kṣatān|| 23.110 ||
kuṇḍadevaṃ purā dhyāyet tatsvarūpaṃ nibodha me|
śiraḥ prācyāmīśakoṇe vahnau bāhū prasāritau|| 23.111 ||
nairṛte mārute pādau kuṇḍa(22)madhyastathodaram|
itthameva hi sarveṣāṃ kuṇḍānāṃ dhyānamabjaje|| 23.112 ||
(22.gra. madhyaṃ)
gandhādibhiḥ kuṇḍarūpaṃ puruṣaṃ pūjayettataḥ|
astramantraṃ samuccārya gṛhṇīyāddarbhayugmakam|| 23.113 ||
tābhyāṃ prāgāyatā rekhāstisrodagrāstathā rame|
samuccaranmūlamantraṃ tisro nāḍīstu lekhayet|| 23.114 ||
guṇamantreṇa tau darbhau visṛjet kuṇḍamadhyamam|
mṛdudarbhasamūhaṃ ca śuṣkagomayacūrṇavat|| 23.115 ||
gandhadvāreti mantreṇa pūrayet satuṣaṃ guruḥ|
paristṛṇīyāt kuṇḍasya paritaḥ ṣoḍaśān kuśān|| 23.116 ||
āstīrya kuṇḍamadhye'pi yogapīṭhaṃ prakalpayet|
tatpīṭhe tu ramānāthaṃ vāsudevaṃ vicintayet|| 23.117 ||
arghyādinā tamabhyarcya prārthayenmudrayā saha|
virāḍ‌rūpa jagadyone brahmarudrādisevita|| 23.118 ||
pratiṣṭhārthaṃ tava mukhādagniṃ saṃprārthayāmi bho|
iti saṃprārthya deveśamaraṇeḥ sūryakāntataḥ|| 23.119 ||
athavā śrotriyā(23)gārāt gṛhṇīyāttāmrabhājane|
vahniṃ nidhāya kuṇḍasya (24)īśāne śoṣaṇādibhiḥ|| 23.120 ||
(23.gra. gṛhāt)
(24.gra. madhyame)
śodhayeccāstramantreṇa tāḍayet prokṣayecca tam|
sahasrādityasaṃkāśaṃ dviśīrṣaṃ saptahastakam|| 23.121 ||
saptajihvaṃ trinayanaṃ tripādaṃ pāṭalaprabham|
añjaliṃ mukhyahastābhyāmitarairbāhubhī rame|| 23.122 ||
śaṅkhaṃ cakraṃ sruk‌sruvau ca dadhānaṃ śaktimāyudham|
kuṇḍapadme sthitaṃ dhyāyedagnīṃ svāhāpatiṃ guruḥ|| 23.123 ||
āvāhanādiṣaṇmudrāṃ darśayecca yathākramam|
ṣaḍarṇenāgnibījena nyāsaṃ kuryādvicakṣaṇaḥ|| 23.124 ||
arghyādinā nivedyāntamājyenārādhayedrame|
lājapūritahastābhyāṃ vahniṃ saṃprārthayed guruḥ|| 23.125 ||
vāsudevasya devasya pratiṣṭhāmārabhe'nala|
gārhapatyādirūpeṇa tvaṃ sthitvā karma pūraya|| 23.126 ||
iti lājaiḥ pāvakaṃ taṃ toṣayed gururātmavān|
itareṣāṃ tu kuṇḍānāṃ paryagniṃ darbhamuṣṭinā|| 23.127 ||
kṛtvā teṣu purā pīṭhaṃ kalpayitvā yathāvidhi|
pratyak kuṇḍātteṣu vahniṃ ninayecca tataḥparam|| 23.128 ||
sarveṣāmapi vahnīnāmājyenārghyādikān yajet|
catasro dhenavaḥ sthāpyā dakṣiṇasyāmudaṅmukhāḥ|| 23.129 ||
gaṅgāsarasvatī godā yamunā (25)saṃjñikāstataḥ|
dhenūḥ saṃpūjya tadanu duhettā gurusattamaḥ|| 23.130 ||
(25.pā. rūpadhāriṇī|)
dugdhaiścarūṇāṃ śrapaṇaṃ tadīyairāhutirbhavet|
viṣṇugāyatriyā sthālīṃ saṃkṣālya vrīhitaṇḍulān|| 23.131 ||
nikṣipya cakramantreṇa vicakrākhyeṇa vāribhiḥ|
āpūryātha sucakreṇa śodhayitvā ca taṇḍulān|| 23.132 ||
kuṇḍe tripādukāṃ lohanirmitāṃ vinyasettataḥ|
sūryacakrākhyamantreṇa tasyāṃ sthālīṃ niveśya ca|| 23.133 ||
jvālācakrākhyamantreṇa vahniṃ prajvālayedrame|
mahāsudarśanākhyena caruśrapaṇamācaret|| 23.134 ||
pāyasānnaṃ pūrvakuṇḍe kṛsarānnaṃ tu dakṣiṇe|
paścime guḍamiśrānnaṃ śuddhānnamuttare pacet|| 23.135 ||
caruśrapaṇakāle tu jvālācakrākhyamantrataḥ|
samidhāṣṭottaraśataṃ juhuyādvahnivṛddhaye|| 23.136 ||
prāgādīnāṃ tu kuṇḍānāṃ pālāśaplakṣakhādirāḥ|
bailvaśca samidho devi vijñeyāḥ sarvakarmasu|| 23.137 ||
yadvā prācyādikuṇḍānāṃ pālāśyāḥ samidho matāḥ|
mahānase vā vacyaṃ syācchālitaṇḍulamāḍhakam|| 23.138 ||
kuṇḍasyottarapārśveṣu nidadhyāddarbhaviṣṭare|
agneḥ praśamanārthāya saptajihvāsu ṛtvijaḥ|| 23.139 ||
juhuyāt tadvidhiṃ vakṣye tāsāṃ dravyaṃ ca varṇakam|
mūlena kālyāṃ samidhaḥ ghṛtaṃ ca nigamādinā|| 23.140 ||
manojavāyāmannena vāsudevākhyavidyayā|
lohitāyāṃ tu dhūmrāyāṃ lājaiḥ saṃkarṣaṇākhyayā|| 23.141 ||
tilaiḥ pradyumnamantreṇa sphuliṅginyāṃ tu dugdhataḥ|
aniruddhākhyamantreṇa viśvarūpyāṃ tu mākṣikam|| 23.142 ||
karālikāyāṃ havanaṃ puṃsūktena caruṃ hunet|
kālyāstu madhyamaṃ sthānaṃ karālyāḥ pūrvadigbhavet|| 23.143 ||
manojavāyāścāgneyaṃ(26) lohitāyāstu vāruṇam|
sudhūmrā somanilayā sphuliṅginyanilāśrayā|| 23.144 ||
(26.mātṛkāyāṃ. gneyāṃ)
aiśānyāṃ viśvarūpiṇyā(:) sthāna(27)metadudāhṛtam|
savye mukhe tu jihvānāṃ catasṝṇāṃ tu dakṣiṇe|| 23.145 ||
(27.gra. mevaṃ kramādbhavet|)
tisṝṇāṃ varṇabhedastu procyate śṛṇu vallabhe|
kṛṣṇo nīlaḥ kokanado vidyudābhastathāpare|| 23.146 ||
raktaśvetastathā nīla evaṃ dhyāyed gurūttamaḥ|
bhaṭṭācāryaniyogena yājakā hotumudyatāḥ|| 23.147 ||
bhūtaśūddhyādikaṃ sarvaṃ mantranyasanameva ca|
kṛtvā prācyādikuṇḍeṣu vimānasya tathaiva ca|| 23.148 ||
yogapīṭhaṃ purā kṛtvā vāsudevādikān kramāt|
ānandākhyādilokebhyo dhyātvā cāvāhayedrame|| 23.149 ||
mantranyāsādibhojyāntaṃ juhuyānmantrapūrvakam|
paramānandavaikuṇṭhād vāsudevaṃ tu cinmayam|| 23.150 ||
mahākumbhe samāvāhya pūjayed gurusattamaḥ|
tatkramaṃ tviha vakṣyāmi kṣīrābdhitanaye tava|| 23.151 ||
mānuṣādyaiḥ samāyuktaṃ bhūlokaṃ viṣṇurakṣitam|
dhyāyed bhuvopari vyomni gandharvādyaiḥ samanvitam|| 23.152 ||
dāśārharakṣitaṃ dhyāyet tadūrdhve keśavādibhiḥ|
pālitaṃ dvādaśātmānamaṇḍalaṃ maṇḍalopari|| 23.153 ||
himāṃśumaṇḍalaṃ dhyāyed(28)yacchrīśenābhirakṣitam|
tata ūrdhve mukundena pālitaṃ siddhasevitam|| 23.154 ||
(28.gra. hayagrīveṇa)
svargalokamupendreṇa rakṣitaṃ svargisevitam|
dikpālānāṃ tatra tatra puryaṣṭakasamanvitam|| 23.155 ||
vasvādidevabṛndānāṃ yatra prāsādapaṅktayaḥ|
smṛtvā tanmahaso lokaṃ tadūrdhve sanakādibhiḥ|| 23.156 ||
anyairmaharṣibhirnityairjanolokaṃ susevitam|
tasmin janārdano devastaiśca nityaṃ supūjyate|| 23.157 ||
tapolokaṃ tadūrdhve tu (29)vairājādibhiranvitam|
puruṣottamarūpeṇa mayā saṃrakṣitaṃ smaret|| 23.158 ||
(29.gra. vairājakyādibhiryutam|)
brahmādidevaiḥ saṃsevyaṃ padmanābhena rakṣitam|
satyalokaṃ hṛdi dhyātvā tato'ṇḍaṃ manasā smaret|| 23.159 ||
aṇḍasyāpi bahistoyaṃ vyāptaṃ tattejasā rame|
vāyunā veṣṭitaṃ tejo vyāptaṃ tadbahirambarāt|| 23.160 ||
tasmād bahirahaṃkāraṃ tato buddhiṃ tataḥ param|
avyaktaṃ ca tato dhyāyet pramodanamudāhṛtam|| 23.161 ||
tattu sālokyavaikuṇṭhaṃ vimānaiḥ svarṇanirmitaiḥ|
nānāratnamayaiścitraiḥ prāsādairgopurairapi|| 23.162 ||
aprākṛtairmanohāryaiḥ kalpavṛkṣaiśca saṃvṛtam|
maṇikuṭṭimasopānamahārhamaṇivedikam|| 23.163 ||
śatayojanavistāram (30)anekaśatamāyatam|
tasmin lokottare divye prathame devapūjite|| 23.164 ||
(30.gra. tāvadyojanamāyatam|)
āste'niruddho bhagavān māyādevīsamanvitaḥ|
smaret sāmīpyavaikuṇṭhamāmodanamathopari|| 23.165 ||
pūrvavattu vimānādyairgopurādyaiḥ suśobhitam|
sūryāyutasamaprakhyaiḥ śatayojanamucchritaiḥ|| 23.166 ||
prākāraiḥ pañcabhirdivyaiḥ śobhitaṃ paramād‌bhutaiḥ|
yojanānāṃ sahasraistadāyāmaṃ (31)cāpi tatsamam|| 23.167 ||
(31.gra. cātha vistṛtam|)
itastataśca dhāvadbhirbhagavatkarmatatparaiḥ|
alaṃkṛtaṃ viṣṇubhaktaiḥ śataśo'tha sahasraśaḥ|| 23.168 ||
tasmin lokavare divye bhagavān bhaktavatsalaḥ|
sukhamāste hi lokeśaḥ pradyumno jayayā saha|| 23.169 ||
dhyāyet sārūpyavaikuṇṭhaṃ saṃmodanamudāhṛtam|
virajāparighopetaṃ saptāvaraṇaśobhitam|| 23.170 ||
ayutairyojanānāṃ ca vistārāyāmasaṃmitam|
sūryalakṣasamaprakhyaiḥ prāsādādibhirujjvalam|| 23.171 ||
śaṅkhacakradharairdivyaiścaturbhujasamanvitaiḥ|
pītāmbaraiḥ pṛthūraskaiḥ padmapatranibhekṣaṇaiḥ|| 23.172 ||
stuvadbhiścaiva nṛtyadbhirgāyadbhiścaiva bhaktitaḥ|
taiḥ saṃvṛto jagannāthastasmin loke jagad‌guruḥ|| 23.173 ||
[āste saṃkarṣaṇo devaḥ kīrtyā saha sukhāsane|]
ūrdhve sāyujyavaikuṇṭhamānandākhyaṃ suvistaram|| 23.174 ||
lakṣayojanavistāraṃ tāvadbhiścāyataṃ śubham|
navāvaraṇasaṃyuktaṃ sūryakoṭisamaprabham|| 23.175 ||
vimānādyaiḥ śobhamānaṃ toraṇādyairalaṃkṛtam|
svayaṃprabhairviṣṇubhūtaiḥ śaraccandrāṃśunirmalaiḥ|| 23.176 ||
nānāvidhairasaṃkhyeyairnakṣatrāṇāṃ gaṇairiva|
śrīmadbhiḥ śyāmalāṅgaiśca viṣṇutulyaparākramaiḥ|| 23.177 ||
taiḥ saṃvṛto vāsudevo (32)lakṣmyā bhogyāsane sthitaḥ|
[sthityai sudarśanaṃ pāñcajanyaṃ mokṣapradāya ca|| 23.178 ||
(32.gra. sṛṣṭye sarasīruham|)
kaumodakīṃ saṃhṛtaye dharmasaṃsthāpanāya ca|
dadhāno nandakaṃ śārṅgaṃ lakṣmyā bhogyāsane sthitaḥ]|| 23.179 ||
(33)upariṣṭācca tataḥ koṭiyojanāt kamalekṣaṇe|
paramānandanāmānaṃ vaikuṇṭhaṃ paramaṃ padam|| 23.180 ||
(33.gra. upariṣṭā)
koṭiyojanavistīrṇaṃ tāvadāyāmamucchritam|
divyaratnamayaiścitraiḥ prākārairgopurairyutam|| 23.181 ||
divyairnānāmaṇimayairgṛhapaṅ‌ktivirājitam|
śakracāpaughasaṃkāśaiḥ proccaiḥ saudhairalaṃkṛtam|| 23.182 ||
sudhākarasahasrābhaiḥ puruṣairupaśobhitam|
sarve caturbhujāḥ śuddhāḥ svātmeśasamavigrahāḥ|| 23.183 ||
śaṅkhacakradharāḥ sarve sragviṇaḥ pītavāsasaḥ|
aprākṛtamayā nityāḥ punarāvartivarjitāḥ|| 23.184 ||
ekāyanākhyavedena jitantādistavairapi|
śaraccandrasahasrāṇāṃ koṭitulyatanuprabhāḥ|| 23.185 ||
puṇḍarīkekṣaṇāḥ sarvā nityayauvanaśobhitāḥ|
sarvalakṣaṇasaṃpannā lakṣmītulyāśca yoṣitaḥ|| 23.186 ||
modante parame vyomni nityānandamaye'kṣaye|
etā api ramānāthaṃ pūjayanti stuvanti ca|| 23.187 ||
tejomayaṃ tadantaḥsthaṃ caturdvārasamanvitam|
prākārairdivyasopānagopurairupaśobhitam|| 23.188 ||
caṇḍādidvārapālādyaiḥ kumudādyaiḥ surakṣitam|
divyacandanakastūrikarpūrāmodavāsitam|| 23.189 ||
nānāmaṇimayaiḥ klṛptatoraṇairupaśobhitam|
ratnasthūṇāsahasreṇa savitānaṃ savedikam|| 23.190 ||
paritaḥ kalpavṛkṣādyaiḥ pārijātādibhiryutam|
paritaḥ klṛptasopānaṃ paramānandamaṇḍapam|| 23.191 ||
[tanmadhye'malasaṃsthāne dvādaśastambhasaṃyutam|
pārśvayordvādasaṃyuktamuktimaṇḍapaśobhitam|| 23.192 ||
somacchandavyomayānaṃ śṛṅgatrayavirājitam|]
madhye siṃhāsanaṃ divyaṃ dharmādyaiḥ sūribhirdhṛtam|| 23.193 ||
caturvedamayaṃ divyaṃ sāṅgopāṅgaparicchadam|
tanmadhye'ṣṭadalaṃ padmamaṣṭākṣaramayaṃ śubham|| 23.194 ||
tasminnanantaparyaṅke phaṇāratnavicitrite|
dvihastamekavaktraṃ ca śuddhasphaṭikasaṃnibham|| 23.195 ||
[vīrabhūṣaṇamañjīrapariṣkṛtapadāmbujam|
bālātapahasatkāntikāntakārtasvarāmbaram|| 23.196 ||
urovirājiśrīvatsakaustubhodbhāsidiktaṭam|
ratnakāñcanasanmuktāyuktayā vanamālayā|| 23.197 ||
sabrahmasūtrayā caiva saṃvirājaduraḥsthalam|
māṇikyavalayodāramahārhāṅgulibhūṣaṇam|| 23.198 ||
ājānūruparikṣiptavāmabāhuṃ tathetaram|
upadhāya dayāsindhorudyaccandranibhānanam|| 23.199 ||]
[vilasadgaṇḍasaṃlagnaśravaṇojjvalakuṇḍalam|
mandasmitarucidyotsnāvilasanmukhamaṇḍalam|| 23.200 ||
kiṃcidāraktagokṣīraśuddhanīlābjalocanam|
bālacandrapratīkāśaphālodyattilakojjvalam|| 23.201 ||
anargharatnamakuṭacchāyāvilasitākṛtim|
paryaṅkaphaṇamāṇikyarocirnīrājitāṅgakam|| 23.202 ||
sadbhiktisulabhaṃ sarvairāgamaiśca durāsadam|
adṛśyaṃ sarvabhūtānāṃ dayayā dṛśyatāṃ gatam|| 23.203 ||
aparyāptāmṛtaṃ rūpamārtarakṣaṇadīkṣitam|]
uttānaśayanaṃ devaṃ vāsudevaṃ parātparam|| 23.204 ||
dvādaśākṣaravidyādyairupāsyaṃ jagatāṃ gurum|
sa eva bhagavān devaḥ kūṭastho hyacalo dhruvaḥ|| 23.205 ||
acintyaḥ sarvabhūtānāmagrāhyo'kṣara eva ca|
sanātanaḥ satyamamṛtamavyaktastamasaḥ paraḥ|| 23.206 ||
nirañjano nirguṇaśca nityaṃ svātmanyavasthitaḥ|
saccāsacceti yaḥ prokta ādyaṃ brahma parātparam|| 23.207 ||
sa eva bhagavān devaḥ śaṅkacakradisevitaḥ|
tasyaiva sadṛśī devī śīlarūpaguṇādibhiḥ|| 23.208 ||
udyaccampāsahasrasya prabhāpuñjanibhā sthirā|
sarvalakṣaṇasaṃpannā sarvābharaṇabhūṣitā|| 23.209 ||
kṣīrābdhiphenadhavaladivyavastreṇa śobhitā|
susnigdhanīlasacchāyakeśabhāropalakṣitā|| 23.210 ||
caturbhujairvirājantī keyūrāṅgabhūṣitā|
mukhyābhyāṃ caiva hastābhyāṃ baddhāñjalipuṭā sadā|| 23.211 ||
itarābhyāṃ bhagavataḥ pāṇibhyāṃ pādapaṅkajam|
spṛśantī śrīḥ sadā bhaktvā āste divyavapurdharā|| 23.212 ||
taṃ vāsudevaṃ manasā dhyātvā saṃprārthayedrame|
matsyādivibhavārcānāṃ pratiṣṭhāsu gurūttamaḥ|| 23.213 ||
rākācandrāyutasvacchakṣīrārṇavasamāvṛte|
dharmānandākhyavaikuṇṭhai śatayojanavistṛte|| 23.214 ||
taptahāṭakasaṃsiddhasaptaprākāraśobhite|
navaratnollasa(34)ddivye gopurādibhirāvṛte|| 23.215 ||
(34.gra. divya)
jayādidvārapālādyaiḥ sūribhiśca niṣevite|
tanmadhyamaṇḍape śeṣaparyaṅkaśayane śubhe|| 23.216 ||
vyūhāṃśajaḥ padmanābhaḥ śrībhūmibhyāṃ samanvitaḥ|
caturbhujaḥ śaṅkhacakragadācāpavibhūṣitaḥ|| 23.217 ||
śayānamitthaṃ deveśaṃ vibhavasyādikāraṇam|
dhyātvaivaṃ puṇḍarīkākṣaṃ tataḥ kumbhe samarcayet|| 23.218 ||
yasmin yasmiṃstu bhuvane vāsudevādayaḥ sthitāḥ|
tattalloke jagannāthaṃ manasā pūjayetpurā|| 23.219 ||
tataḥ puṣpāñjalidharaḥ saṃstuvīta jagatpatim|
(35)jitaṃ te puṇḍarīkākṣa namaste viśvabhāvana|| 23.220 ||
(35.śrī jitantestotram Sarga 3 Sl. 1 a, b, c, d.)
namaste'stu hṛṣīkeśa mahāpuruṣa pūrvaja|
(36)namaste vāsudevāya śāntānantajitā(cidā?)tmane|| 23.221 ||
(36. śrī jitantestotram Sarga 4 Sl. l c, d.)
(37)adhyakṣāya svatantrāya nirapekṣāya śāśvate|
acyutāyāvikārāya tejasāṃ nidhaye namaḥ|| 23.222 ||
(37.śrī jitantestotram Sarga 4 Sl. 2 a, b, c, d.)
(38)kleśakarmādyasaṃspṛṣṭapūrṇaṣāḍguṇyamūrtaye|
(39)tribhirjñānabalaiśvaryavīryaśaktyantarātmane|| 23.223 ||
(38. śrī jitantestotram Sarga 4 Sl. 3 c, d.)
(39. " " 4 Sl. 4 a, b.)
(40)triyugāya namastubhyaṃ namaste caturātmane|
(41)pradhānapuruṣeśāya namaste puruṣottama|| 23.224 ||
(40.śrī jitantestrotram Sarga 4 Sl. 4 c, d.)
(41 " " 4 Sl. 3 a, b.)
(42)catuḥ pañcanavavyūhadaśadvādaśamūrtaye|
anekamūrtaye tubhyamamūrtāyaikamūrtaye|| 23.225 ||
(42.śrī jitantestotram Sarga 4 Sl. 5 a, b, c, d.)
(43)nārāyaṇa namaste'stu puṇḍarīkāyatekṣaṇa|
subhrūlalāṭa sunasa susmitādharapallava|| 23.226 ||
(43.śrī jitantestotram Sarga 4 Sl. 6 a, b, c, d.)
(44)pīnavṛttāyatabhuja śrītsakṛtalakṣaṇa|
tanumadhya viśālākṣa padmanābha namo'stu te|| 23.227 ||
(44.śrī jītantestotram Sarga 4 Sl. 7 a, b, c, d.)
(45)vilāsavikramākrāntatrailokyacaraṇāmbuja|
namaste pītavasana sphuranmakarakuṇḍala|| 23.228 ||
(45.jitantestotram Sarga 4 Sl. 8 a, b, c, d.)
(46)lasatkirīṭakeyūra kaustubhāṅgadabhūṣaṇa|
pañcāyudha namaste'stu namaste pāñcakālika|| 23.229 ||
(46.jitantestrotram Sarga 4 Sl. 9 a, b, c, d.)
(47)pañcakālaparaikāntiyogakṣemavaha! prabho|
nityajñānabalaiśvaryabhogopakaraṇācyuta|| 23.230 ||
(47.jītantestotram Sarga 4 Sl. 10 a, b, c, d. )
(48)namaste brahmarudrādilokayātrāpravartaka|
janmaprabhṛti dāso'smi śiṣyo'smi tanayo'smi te|| 23.231 ||
(48.jītantestotram Sarga 4 Sl. 11 a, b, c, d.)
(49)tvaṃ ca svāmī gururmātā pitā ca mama mādhava|
api tvāṃ bhagavan brahman śarvaśśakro maharṣayaḥ|| 23.232 ||
(49. jītantestotram Sarga 4 Sl. 12-a, b, c, d.)
(50)draṣṭuṃ yaṣṭumapi stotumadyāpi na ca śaknumaḥ(51)|
(52)tāpatrayamahāgrāhabhīṣaṇe bhavasāgare|| 23.233 ||
(50.jitantestotram Sarga 4 Sl. 13 a, b, na hi smarttumapīśate|)
(51.gra. yuḥ)
(52.jitantestotram Sarga 4 Sl. 13 c, d)
(53)majjatāṃ nātha naureṣā praṇatistvatpadārpitā|
(54)anāthāya jagannātha śaraṇya śaraṇārthine|| 23.234 ||
(53.jitantestotram Sarga 4 Sl. 14 a, b)
(54. " " " 14 c, d )
(55)prasīda sīdate mahyaṃ namaste bhaktavatsala|
(56)mantrahīnaṃ kriyāhīnaṃ bhaktihīnaṃ yadarcanam||
(57)tatkṣantavyaṃ prapannānāmaparādhasaho hyasi|| 23.235 ||
(55.jitantestotram Sarga 4 Sl. 15 a, b)
(56. " " " 15 c, d)
(57. " " " 16 a, b )
(58)aparādhasahasrabhājanaṃ patitaṃ bhīmabhavārṇavodare|
agatiṃ śaraṇāgataṃ hare kṛpayā kevalamātmasātkuru|| 23.236 ||
(58.yāmunācāryāṇāṃ stotraratne Sl. 48)
(59)upacārāpadeśena kṛtānaharaharmayā|
apacārānimān sarvān kṣamasva puruṣottama|| 23.237 ||
(59.jitantestotram Sarga 1 Sl. 20.)
pāñcarātroktavidhinā tvaduktena jagatpate|
(60)nirmāya gopurādīni vimānāni yathāvidhi|| 23.238 ||
(60.gra. vimānagopurādīni nirmāya ca yathāvidhi|)
tasminnarcārūpadharaṃ śrībhūmisahitaṃ vibhum|
ārādhayitumicchāmi tvāṃ bhaktyāhaṃ janārdana|| 23.239 ||
viṣvaksenādibhiḥ sārdhaṃ parivārairgarutmatā|
vimānena sahāgatya mantramūrte jaganmaya|| 23.240 ||
atrārcāyāṃ saṃpraviśya lokānugrahakāmyayā|
kriyamāṇaṃ mayā nityaṃ gṛhāṇārādhanaṃ vibho|| 23.241 ||
āgacchatu jagannātha madanugrahakāmyayā|
evaṃ dhyātvā tato lokādāgataṃ sūryamaṇḍalam|| 23.242 ||
sūryalokasthitasyātha vāsudevasya padmaje|
pādayoḥ pāduke ratnakhacite dhārayet purā|| 23.243 ||
śriyaścāpi tathā datvā viṣṇavādīnāṃ tu dhārayet|
evaṃ dhyātvā dīkṣitendro vāsudevaṃ jaganmayam|| 23.244 ||
sakalīkṛtya viṣṇvādimūrtibhiścāṣṭabhiḥ saha|
mahākumbhādikumbheṣu dhyāyīta prārthayettataḥ|| 23.245 ||
ānandalakṣaṇaṃ rūpamādirūpamavikriyam|
susūkṣmaṃ svavaśaṃ svairaṃ paraṃ jyotiranāmayam|| 23.246 ||
dhruvamekaṃ cidānandaṃ cidrūpaṃ sarvagaṃ param|
svabhāvanirmalaṃ nityaṃ nistaraṅgaṃ nirākulam|| 23.247 ||
nirmaryādaṃ guṇātītaṃ saguṇaṃ sarvakāmadam|
adhyeyādhyeyamāścaryamavāṅmanasagocaram|| 23.248 ||
ṣāḍguṇyavigrahaṃ devaṃ vāsudevāhvayaṃ vibhum|
sahasraphaṇasaṃvīta-ratnakānti-vicitrite|| 23.249 ||
śeṣāsane sukhāsīnaṃ savyaṃ pādaṃ prasāritam|
dakṣiṇaṃ kuñcitaṃ pādaṃ tajjānunyastatad‌bhujam|| 23.250 ||
vāmabāhuṃ śeṣapīṭhe nyastaṃ vakṣasi ca śriyam|
kirīṭakuṇḍalopetaṃ vanamālāvirājitam|| 23.251 ||
pītāmbaradharaṃ saumyaṃ kaṭakādyairalaṃkṛtam|
parivāraiḥ sevyamānaṃ madhyakumbhe smared guruḥ|| 23.252 ||
vāsudeva jagadyone saccidānandavigraha|
yāvadbimbe prārthayāmi tāvat kumbhe sthiro bhava|| 23.253 ||
atra pūjāṃ mayā dattāṃ gṛhāṇa puruṣottama|
iti saṃprārthya lakṣmīśaṃ prārthanāmudrayā guruḥ|| 23.254 ||
saṃprārthya kalaśe devaṃ yathāvatpūjayet purā|
tataḥ prācyādikumbheṣu padmaviṣṭarasaṃsthitān|| 23.255 ||
vāsudevasyābhimukhān pītanirmalavāsasaḥ|
caturbhujān saumyavaktrān kirīṭādivibhūṣitān|| 23.256 ||
śaṅkhacakragadāpadmadhāriṇo vanamālinaḥ|
evaṃ lakṣaṇasaṃyuktān viṣṇvādīṃstu yathākramam|| 23.257 ||
āvāhya pūjayet sarvān deśiko mantravittamaḥ|
sahasrāraṃ jvalattejorūpiṇaṃ cakramuttamam|| 23.258 ||
karake ca samāvāhya sarvavighnanivṛttaye|
sarveṣāṃ śramaśāntyarthaṃ (61)itthamarghyādibhiryajet|| 23.259 ||
(61.gra. gurura)
prāsādasya pratiṣṭhārthaṃ niyukto yo guruḥ sa ca|
sūryamaṇḍalamadhyasthaṃ vāsudevena cāgatam|| 23.260 ||
sapakṣaṃ tadvimānaṃ ca tadadhiṣṭhānadaivatam|
aniruddhaṃ madhyakumbhe dhyātvā saṃprārthayettataḥ|| 23.261 ||
sahasraśīrṣacaraṇahastanetrād‌bhutākṛte|
vimānarūpin kumbhe'smin yāvadgarbhagṛhe mayā|| 23.262 ||
āvāhyate vyomayāna(ne?) tāvadatra sthiro bhava|
tasya prāgādikumbheṣu narottamamadhokṣajam|| 23.263 ||
nṛsiṃhamacyutaṃ paścājjanārdanamupendrakam|
hariṃ kṛṣṇaṃ ca karake cakrarājaṃ smared budhaḥ|| 23.264 ||
cakrābjamaṇḍale devānitthamāvāhayed (62)rame|
bahirāvaraṇe devān puruhūtādikān (63)yajet|| 23.265 ||
(62.gra. guruḥ)
(63.gra. smaret|)
madhyamāvaraṇadvārṣu prācyādiṣu yathākramam|
caṇḍādīn yugmato devān prāgdvārasya puraḥsthale|| 23.266 ||
maṇḍalābhimukhaṃ devaṃ dhyāyecca vinatāsutam|
prāgādidvāramadhyeṣu śaṅkhacakragadāmbujam|| 23.267 ||
aiśānye senapaṃ dhyāyedantarāvaraṇe tataḥ|
āgneyādiṣu koṇeṣu varāhanarakesarī|| 23.268 ||
anantaśca hayagrīva etān viṣṭarasaṃsthitān|
cakrābjakarṇikāmadhye sahasraphaṇamaṇḍite|| 23.269 ||
śeṣāhibhogipīṭhe tu sṛṣṭisthityantamuktidam|
mayūrakaṇṭhavacchyāmamekavaktraṃ caturbhujam|| 23.270 ||
śaṅkhacakragadāśārṅganandakādibhirujjvalam|
śrīvatsasphuritoraskaṃ vanamālāvibhūṣitam|| 23.271 ||
kirīṭahārakeyūravalayādivirājitam|
pītāmbaradharaṃ saumyaṃ jagatāmādikāraṇam|| 23.272 ||
paravāsudevādud‌bhūtaṃ śrībhūmisahitaṃ vibhum|
vāsudevaṃ sukhāsīnaṃ dhyāyedādityamaṇḍalāt|| 23.273 ||
kesareṣu dvādaśārṇamaṣṭāreṣvaṣṭavarṇakam|
dhyāyet dviṣaṭ‌kapatreṣu prāgādiṣu yathākramam|| 23.274 ||
viṣṇvādivat keśavādīn śrīvatsādyairalaṃkṛtān|
āvāhya pūjayedvidvānardhyādyaiḥ śramaśāntaye|| 23.275 ||
kumbhamaṇḍalavahnisthān vāsudevādidevatāḥ|
itthamāvāhya tadanu mantrāsanapuraḥsaram|| 23.276 ||
snānāsanaṃ vinā devi prāpaṇāntaṃ samarcayet|
vāsudevādidevānāṃ (64)pañcārṇāṃ viṃśaterapi|| 23.277 ||
(64.gra. caturṇāṃ)
mantraviṣṭarakāle tu caturhasteṣu deśikāḥ|
pradākṣiṇyena divyāni smaret praharaṇānyatha|| 23.278 ||
darśayeyustasya tasya mudrāṃ mantravido rame|
dvitīyo vāsudevaśca tadutpannau ca tāvubhau|| 23.279 ||
vāsudevastathānyo'pi nārāyaṇa iti smṛtaḥ|
saṃkarṣaṇādidevāśca teṣāṃ hasteṣu vai kramāt|| 23.280 ||
padmaṃ cakraṃ tathā śaṅkhaṃ gadāṃ śārṅgaṃ ca saṃsmaret|
caturviṃśatimūrtīnāṃ mudrānyāsamathocyate|| 23.281 ||
vāsudevaṃ gadāśaṅkhacakrapadmadharaṃ vibhum|
saṃkarṣaṇaṃ gadāśaṅkhapadmacakrasamanvitam|| 23.282 ||
pradyumnaṃ cakrajalajagadāpadmavibhūṣitam|
aniruddhaṃ cakradaṇḍapadmaśaṅkhadharaṃ smaret|| 23.283 ||
keśavaṃ padmaśaṅkhārigadāśobhitapāṇikam|
nārāyaṇaṃ śaṅkhapadmagadācakrasamujjvalam|| 23.284 ||
mādhavaṃ divyadaṇḍāriśaṅkhāmbujadharaṃ vibhum|
govindaṃ cakradaṇḍābjapāñcajanyavibhūṣitam|| 23.285 ||
viṣṇuṃ gadābjaśaṅkhāridhāriṇaṃ vanamālinam|
madhudviṣaṃ cakraśaṅkhapadmadaṇḍasamanvitam|| 23.286 ||
trivikramaṃ padmadaṇḍacakraśaṅkhadharaṃ vibhum|
vāmanaṃ pāñcajanyārigadājalajadhāriṇam|| 23.287 ||
śrīdharaṃ padmahetīśagadāśaṅkhadharaṃ prabhum|
hṛṣīkeśaṃ gadācakrapadmaśaṅkhabhujānvitam|| 23.288 ||
padmanābhaṃ padmacakraśaṅkhakaumodakīyutam|
dāmodaraṃ padmaśaṅkhagadācakradharaṃ smaret|| 23.289 ||
narottamaṃ cakrapadmaśaṅkhakaumodakīyutam|
adhokṣajaṃ padmadaṇḍaśaṅkhahetīśamaṇḍitam|| 23.290 ||
nṛsiṃhaṃ cakrajalajagadāśaṅkhacaturbhujam|
acyutaṃ daṇḍanalinacakraśaṅkhasamujjvalam|| 23.291 ||
janārdanaṃ padmacakraśaṅkhakaumodakīdhṛtam|
upendraṃ padmadaṇḍāripāñcajanyena śobhitam|| 23.292 ||
hariṃ śaṅkhārijalajagadābhūṣitavigraham|
kṛṣṇaṃ śaṅkhagadāpadmacakrayuktaṃ smared guruḥ|| 23.293 ||
evaṃ smṛtvā (65)ca mudrāśca darśayet kamalodbhave|
saptame pañcame (66)vāpi (67)tṛtīyādivase'pi vā|| 23.294 ||
(65.gra. tha)
(66.gra. yaddā)
(67.gra. tṛtīye)
kuryāt pratiṣṭhāṃ devasya nānyathā kalpayedvibhoḥ|
pratiṣṭhādivasaṃ tyaktvā dvādaśasvaṣṭasu kramāt|| 23.295 ||
caturṣvapi ca kāleṣu sahasraṃ tvaṣṭasaṃmitam|
śataṃ vā pūjanaṃ kuryād vāsudevasya śārṅgiṇaḥ|| 23.296 ||
pūrvoktapūjanaṃ bhadre kumbhamaṇḍalavahniṣu|
pratyekaṃ teṣu kāleṣu kuryādyadvā gurūttamaḥ|| 23.297 ||
kumbhe pūjāṃ tu kṛtvaiva pratiṣṭhāṃ pūrayettataḥ|
tattatkāleṣu vidhivat tattatsaṃkhyāsamarcanam|| 23.298 ||
kumbhādiṣu triṣu tataḥ kṛtvānnaṃ ca caturvidham|
nivedya pūrṇahavanaṃ kuryurmantravido rame|| 23.299 ||

|| iti śrīśrīpraśnasaṃhitāyāṃ(68)(69)trayoviṃśo'dhyāyaḥ ||
(68.gra. pratiṣṭhākarmaṇi)
(69.mā. dvāviṃśo'dhyāyaḥ)