Book 3 - Kākolūkīyam

na viśvaset pūrva-virodhitasya śatroś ca mitratvam upāgatasya |
dagdhāṃ guhāṃ paśya ulūka-pūrṇāṃ kāka-praṇītena hutāśanena || 1 ||
[Analyze grammar]

ya upekṣeta śatruṃ svaṃ prasarantaṃ yadṛcchayā |
rogaṃ cālasya-saṃyuktaḥ sa śanais tena hanyate || 2 ||
[Analyze grammar]

jāta-mātraṃ na yaḥ śatruṃ vyādhiṃ ca praśamaṃ nayet |
mahābalo 'pi tenaiva vṛddhiṃ prāpya sa hanyate || 3 ||
[Analyze grammar]

apṛṣṭenāpi vaktavyaṃ sacivenātra kiṃcana |
pṛṣṭena tu viśeṣeṇa vācyaṃ pathyaṃ mahīpateḥ || 4 ||
[Analyze grammar]

yo na pṛṣṭo hitaṃ brūte pariṇāme sukhāvaham |
mantro na priya-vaktā ca kevalaṃ sa ripuḥ smṛtam || 5 ||
[Analyze grammar]

tasmād ekāntam āsādya kāryo mantro mahīpate |
yena tasya vayaṃ kurmo niyamaṃ kāraṇaṃ tathā || 6 ||
[Analyze grammar]

balīyasi praṇamatāṃ kāle praharatām api |
sampado nāvagacchanti pratīpam iva nimnagāḥ || 7 ||
[Analyze grammar]

satyāḍhyo dhārmikaś cāryo bhrātṛ-saṅghātavān balī |
aneka-vijayī caiva sandheyaḥ sa ripur bhavet || 8 ||
[Analyze grammar]

sandhiḥ kāryo 'py anāryeṇa vijñāya prāṇa-saṃśayam |
prāṇaiḥ saṃrakṣitaiḥ sarvaṃ yato bhavati rakṣitam || 9 ||
[Analyze grammar]

aneka-yuddha-vijayī sandhānaṃ yasya gacchati |
tat-prabhāveṇa tasyāśu vaśaṃ gacchanty arātayaḥ || 10 ||
[Analyze grammar]

sandhim icchet samenāpi sandigdho vijayī yudhi |
na hi sāṃśayikaṃ kuryād ity uvāca bṛhaspatiḥ || 11 ||
[Analyze grammar]

sandigdho vijayo yuddhe janānām iha yuddhyatām |
upāya-tritayād ūrdhvaṃ tasmād yuddhaṃ samācaret || 12 ||
[Analyze grammar]

asandadhāno mānāndhaḥ samenāpi hato bhṛśam |
āmakumbham ivābhittvā nāvatiṣṭheta śaktimān || 13 ||
[Analyze grammar]

samaṃ śaktimatā yuddham aśaktasya hi mṛtyave |
vṛṣatkumbhaṃ yathā bhittvā tāvat tiṣṭhati śaktimān || 14 ||
[Analyze grammar]

bhūmir mitraṃ hiraṇyaṃ vā vigrahasya phala-trayam |
nāsty ekam api yady eṣāṃ vigrahaṃ na samācaret || 15 ||
[Analyze grammar]

khanann ākhu-bilaṃ siṃhaḥ pāṣāṇa-śakalākulam |
prāpnoti nakha-bhaṅgaṃ hi phalaṃ vā mūṣako bhavet || 16 ||
[Analyze grammar]

tasmān na syāt phalaṃ yatra puṣṭaṃ yuddhaṃ tu kevalam |
na hi tat svayam utpādyaṃ kartavyaṃ na kathañcana || 17 ||
[Analyze grammar]

balīyasā samākrānto vaitasīṃ vṛttim āśrayet |
vāñchann abhraṃśinīṃ lakṣmīṃ na bhaujaṅgī kadācana || 18 ||
[Analyze grammar]

kurvan hi vaitasīṃ vṛttiṃ prāpnoti mahatīṃ śriyam |
bhujaṅga-vṛttim āpanno vadham arhati kevalam || 19 ||
[Analyze grammar]

kaurmaṃ saṅkocam āsthāya prahārān api marṣayet |
kāle kāle ca matimān uttiṣṭhet kṛṣṇa-sarpavat || 20 ||
[Analyze grammar]

āgataṃ vigrahaṃ vidvān upāyaiḥ praśamaṃ nayet |
vijayasya hy anityatvād rabhasena na sampatet || 21 ||
[Analyze grammar]

balinā saha yoddhavyam iti nāsti nidarśanam |
prativātaṃ na hi ghanaḥ kadācid upasarpati || 22 ||
[Analyze grammar]

śatruṇā na hi sandadhyāt suśliṣṭenāpi sandhinā |
sutaptam api pānīyaṃ śamayaty eva pāvakam || 23 ||
[Analyze grammar]

satya-dharma-vihīnena na sandadhyāt kathañcana |
sugandhito 'py asādhutvād acirād yāti vikriyām || 24 ||
[Analyze grammar]

krūro lubdho 'laso 'satyaḥ pramādī bhīrur asthiraḥ |
mūḍho yodhāvamantā ca sukhocchedyo bhaved ripuḥ || 25 ||
[Analyze grammar]

caturthopāya-sādhye tu ripau sāntvam apakriyā |
svedyam āma-jvaraṃ prājñaḥ ko 'mbhasā pariṣiñcati || 26 ||
[Analyze grammar]

sāmavādāḥ sakopasya śatroḥ pratyuta dīpikāḥ |
prataptasyeva sahasā sarpiṣas toya-bindavaḥ || 27 ||
[Analyze grammar]

pramāṇābhyadhikasyāpi mahat-sattvam adhiṣṭhitaḥ |
padaṃ mūrdhni samādhatte kesarī matta-dantinaḥ || 28 ||
[Analyze grammar]

utsāha-śakti-sampanno hanyāc chatruṃ laghur gurum |
yathā kaṇṭhīravo nāgaṃ bhāradvājaḥ pracakṣate || 29 ||
[Analyze grammar]

māyayā śatravo vadhyā avadhyāḥ syur balena ye |
yathā strī-rūpam āsthāya hato bhīmena kīcakaḥ || 30 ||
[Analyze grammar]

mṛtyor ivogra-daṇḍasya rājño yānti vaśaṃ dviṣaḥ |
sarvaṃsahaṃ tu manyante tṛṇāya ripavaś ca tam || 31 ||
[Analyze grammar]

na jātu śamanaṃ yasya tejas tejasvi-tejasām |
vṛthā jātena kiṃ tena mātur yauvana-hāriṇā || 32 ||
[Analyze grammar]

yā lakṣmīr nānuliptāṅgī vair-śoṇita-kuṅkumaiḥ |
kāntāpi manasaḥ prītiṃ na sā dhatte manasvinām || 33 ||
[Analyze grammar]

ripu-raktena saṃsiktā tat-strī-netrāmbubhis tathā |
na bhūmir yasya bhūpasya kā ślāghā tasya jīvite || 34 ||
[Analyze grammar]

balotkaṭena duṣṭena maryādā-rahitena ca |
na sandhi-vigrahau naiva vinā yānaṃ praśasyate || 35 ||
[Analyze grammar]

dvidhākāraṃ bhaved yānaṃ bhavet prāṇārtha-rakṣaṇam |
ekam anyaj jigīṣoś ca yātrālakṣaṇam ucyate || 36 ||
[Analyze grammar]

kārttike vātha caitre vā vijigīṣoḥ praśasyate |
yānam utkṛṣṭa-vīryasya śatru-deśe na cānyadā || 37 ||
[Analyze grammar]

avaskanda-pradānasya sarve kālāḥ prakīrtitāḥ |
vyasane vartamānasya śatrocchidrānvitasya ca || 38 ||
[Analyze grammar]

svasthānaṃ sudṛḍhaṃ kṛtvā śūraiś cātair mahābalaiḥ |
para-deśaṃ tato gacchet praṇidhi-vyāptam agrataḥ || 39 ||
[Analyze grammar]

ajñātavī-vadhāsāra-toya-śasyo vrajet tu yaḥ |
para-rāṣṭraṃ na bhūyaḥ sa sva-rāṣṭram adhigacchati || 40 ||
[Analyze grammar]

tan na yuktaṃ prabho kartuṃ dvitīyaṃ yānam eva ca |
na vigraho na sandhānaṃ balinā tena pāpinā || 41 ||
[Analyze grammar]

yad apasarati meṣaḥ kāraṇaṃ tat prahartuṃ mṛga-patir api kopāt saṅkucaty utpatiṣṇuḥ |
hṛdaya-nihita-bhāvā gūḍha-mantra-pracārāḥ kim api vigaṇayanto buddhimantaḥ sahante || 42 ||
[Analyze grammar]

balavantaṃ ripuṃ dṛṣṭvā deśa-tyāgaṃ karoti yaḥ |
yudhiṣṭhira ivāpnoti punar jīvan sa medinīm || 43 ||
[Analyze grammar]

yudhyate'haṅkṛtiṃ kṛtvā durbalo yo balīyasā |
sa tasya vāñchitaṃ kuryād ātmanaś ca kula-kṣayam || 44 ||
[Analyze grammar]

nakraḥ sva-sthānam āsādya gajendram api karṣati |
sa eva pracyutaḥ sthānāc chunāpi paribhūyate || 45 ||
[Analyze grammar]

abhiyukto balavatā tiṣṭhan durge prayatnavān |
tatrasthaḥ suhṛdāhvānaṃ kurvītātma-vimuktaye || 46 ||
[Analyze grammar]

yo ripor āgamaṃ śrutvā bhaya-santrasta-mānasaḥ |
sva-sthānaṃ hi tyajet tatra na tu bhūyo viśec ca saḥ || 47 ||
[Analyze grammar]

daṃṣṭrā-virahitaḥ sarpo mada-hīno yathā gajaḥ |
sthāna-hīnas tathā rājā gamyaḥ syāt sarva-jantuṣu || 48 ||
[Analyze grammar]

nija-sthāna-sthito 'py ekaḥ śataṃ yoddhuṃ sahen naraḥ |
śaktānām api śatrūṇāṃ tasmāt sthānaṃ na santyajet || 49 ||
[Analyze grammar]

tasmād durgaṃ dṛḍhaṃ kṛtvā subhaṭāsāra-saṃyutam |
prākāra-parikhā-yuktaṃ śastrādibhir alaṅkṛtam || 50 ||
[Analyze grammar]

tiṣṭhen madhya-gato nityaṃ yuddhāya kṛta-niścayaḥ |
jīvan samprāptsyati rājyaṃ mṛto vā svargam eṣyati || 51 || (yugmakam)
[Analyze grammar]

balināpi na bādhyante laghavo 'py eka-saṃśrayāḥ |
vipakṣeṇāpi marutā yathaika-sthāna-vīrudhāḥ || 52 ||
[Analyze grammar]

mahān apy ekajo vṛkṣaḥ balavān supratiṣṭhitaḥ |
prasahya iva vātena śakyo dharṣayituṃ yataḥ || 53 ||
[Analyze grammar]

atha ye saṃhatā vṛkṣā sarvataḥ supratiṣṭhitāḥ |
te na raudrānilenāpi hanyante hy eka-saṃśrayāt || 54 ||
[Analyze grammar]

evaṃ manuṣyam apy ekaṃ śauryeṇāpi samanvitam |
śakyaṃ dviṣanto manyante hiṃsanti ca tataḥ param || 55 ||
[Analyze grammar]

asahāyaḥ samartho 'pi tejasvī kiṃ kariṣyati |
nirvāte jvalito vahniḥ svayam eva praśāmyati || 56 ||
[Analyze grammar]

saṅgatiḥ śreyasī puṃsāṃ sva-pakṣe ca viśeṣataḥ |
tuṣair api paribhraṣṭā na prarohanti taṇḍulāḥ || 57 ||
[Analyze grammar]

vanāni dahato vahneḥ sakhī bhavati mārutaḥ |
sa eva dīpa-nāśāya kṛśe kasyāsti sauhṛdam || 58 ||
[Analyze grammar]

saṅghātavān yathā veṇur niviḍair veṇubhir vṛtaḥ |
na śakyeta samucchettuṃ durbalo 'pi yathā nṛpaḥ || 59 ||
[Analyze grammar]

mahājanasya samparkaḥ kasya nonnati-kārakaḥ |
padma-patra-sthitaṃ toyaṃ dhatte muktā-phala-śriyam || 60 ||
[Analyze grammar]

aviśvāsaṃ sadā tiṣṭhet sandhinā vigraheṇa ca |
dvaidhī-bhāvaṃ samāśritya pāpe śatrau balīyasi || 61 ||
[Analyze grammar]

ucchedyam api vidvāṃso vardhayanty arim ekadā |
guḍena vardhitaḥ śleṣmā yato niḥśeṣatāṃ vrajet || 62 ||
[Analyze grammar]

strīṇāṃ śatroḥ kumitrasya paṇya-strīṇāṃ viśeṣataḥ |
yo bhaved eka-bhāvo 'tra na sa jīvati mānavaḥ || 63 ||
[Analyze grammar]

kṛtyaṃ deva-dvijātīnām ātmanaś ca guros tathā |
eka-bhāvena kartavyaṃ śeṣaṃ dvaidha-samāśritam || 64 ||
[Analyze grammar]

eko bhāvaḥ sadā śasto yatīnāṃ bhāvitātmanām |
śrī-lubdhānāṃ na lokānāṃ viśeṣeṇa mahī-bhujām || 65 ||
[Analyze grammar]

gāvo gandhena paśyanti vedaiḥ paśyanti vai dvijāḥ |
cārai paśyanti rājānaś cakṣurbhyām itare janāḥ || 66 ||
[Analyze grammar]

yas tīrthāni nije pakṣe para-pakṣe viśeṣataḥ |
guptaiś cārair nṛpo vetti na sa durgatim āpnuyāt || 67 ||
[Analyze grammar]

kaccid aṣṭadaśāny eṣu sva-pakṣe daśa pañca ca |
tribhis tribhir avijñātair vetsi tīrthāni cārakaiḥ || 68 ||
[Analyze grammar]

vaidya-sāṃvatsarācāryāḥ sva-pakṣe'dhikṛtāś carāḥ |
tathāhi-tuṇḍikonmattāḥ sarvaṃ jānanti śatruṣu || 69 ||
[Analyze grammar]

kṛtvā kṛtya-vidas tīrtheṣv antaḥ praṇidhayaḥ padam |
vidāṅkurvantu mahatas talaṃ vidviṣad-ambhasaḥ || 70 ||
[Analyze grammar]

yo na rakṣati vitrastān pīḍyamānān paraiḥ sadā |
jantūn pārthiva-rūpeṇa sa kṛtānto na saṃśayaḥ || 71 ||
[Analyze grammar]

yadi na syān narapatiḥ samyaṅ netāḥ tataḥ prajāḥ |
akarṇadhārā jaladhau viplaveteha naur iva || 72 ||
[Analyze grammar]

ṣaḍ imān puruṣo jahyād bhinnāṃ nāvam ivārṇave |
apravaktāram ācāryam anadhīyānam ṛtvijam || 73 ||
[Analyze grammar]

arakṣitāraṃ rājānaṃ bhāryāṃ cāpirya-vādinīm |
grāma-kāmaṃ ca gopālaṃ vana-kāmaṃ ca nāpitam || 74 || (yugmam)
[Analyze grammar]

narāṇāṃ nāpito dhūrtaḥ pakṣiṇāṃ caiva vāyasaḥ |
daṃṣṭriṇāṃ ca śṛgālas tu śvebhikṣus tapasvinām || 75 ||
[Analyze grammar]

bahudhā bahubhiḥ sārdhaṃ cintitāḥ sunirūpitāḥ |
kathañcin na vilīyante vidvadbhiś cintitā nayāḥ || 76 ||
[Analyze grammar]

vakra-nāsaṃ sujihmākṣaṃ krūram apriya-darśanam |
akruddhasyedṛśaṃ vaktraṃ bhavet kruddhasya kīdṛśam || 77 ||
[Analyze grammar]

svabhāva-raudram atyugraṃ krūram apriya-vādinam |
ulūkaṃ nṛpatiṃ kṛtvā kā naḥ siddhir bhaviṣyati || 78 ||
[Analyze grammar]

eka eva hitārthāya tejasvī pārthivo bhuvaḥ |
yugānta iva bhāsvanto bahavo 'tra vipattaye || 79 ||
[Analyze grammar]

gurūṇāṃ nāma-mātre'pi gṛhīte svāmi-sambhave |
duṣṭānāṃ purataḥ kṣemaṃ tat-kṣaṇād eva jāyate || 80 ||
[Analyze grammar]

vyapadeśena mahatāṃ siddiḥ sañjāyate parā |
śaśino vyapadeśena vasanti śaśakāḥ sukham || 81 ||
[Analyze grammar]

spṛśann api gajo hanti jighrann api bhujaṅgamaḥ |
hasann api nṛpo hanti mānayann api durjanaḥ || 82 ||
[Analyze grammar]

tyajed ekaṃ kulasyārthe grāmasyārthe kulaṃ tyajet |
grāmaṃ janapadasyārthe ātmārthe pṛthivīṃ tyajet || 83 ||
[Analyze grammar]

kṣemyāṃ śasya-pradāṃ nityaṃ paśu-vṛddhi-karīm api |
parityajen nṛpo bhūmim ātmārtham avicārayan || 84 ||
[Analyze grammar]

āpad-arthe dhanaṃ rakṣed dārān rakṣed dhanair api |
ātmānaṃ satataṃ rakṣed dārair api dhanair api || 85 ||
[Analyze grammar]

nirviṣeṇāpi sarpeṇa kartavyā mahatī phaṭā |
viṣaṃ bhavatu mā vāstu phaṭāṭopo bhayaṅkaraḥ || 86 ||
[Analyze grammar]

sākāro niḥspṛho vāgmī nānā-śāstra-vicakṣaṇaḥ |
para-cittāvagantā ca rājño dūtaḥ sa iṣyate || 87 ||
[Analyze grammar]

yo mūrkhaṃ laulya-sampannaṃ rāja-dvārikam ācaret |
mithyā-vādaṃ viśeṣeṇa tasya kāryaṃ na sidhyati || 88 ||
[Analyze grammar]

udyateṣv api śastreṣu bandhu-varga-vadheṣv api |
puruṣāṇy api jalpanto vadhyā dūtā na bhūbhujā || 89 ||
[Analyze grammar]

kṣudram alasaṃ kāpuruṣaṃ vyasaninam akṛtajñaṃ jīvita-kāmaḥ |
pṛṣṭha-pralapana-śīlaṃ svāmitve nābhiyojayet || 90 ||
[Analyze grammar]

kṣudram arthapatiṃ prāpya nyāyānveṣaṇa-tat-parau |
ubhāv api kṣayaṃ prāptau purā śaśaka-piñjalau || 91 ||
[Analyze grammar]

na tādṛg jāyate saukhyam api svarge śarīriṇām |
dāridrye'pi hi yādṛk syāt sva-deśe sva-pure gṛhe || 92 ||
[Analyze grammar]

vāpī-kūpa-taḍāgānāṃ devālaya-kujanmanām |
utsargāt parataḥ svāmyam api kartuṃ na śakyate || 93 ||
[Analyze grammar]

pratyakṣaṃ yasya yad bhuktaṃ kṣetrādyaṃ daśa vatsarān |
tatra bhuktiḥ pramāṇaṃ syād na sākṣī nākṣarāṇi vā || 94 ||
[Analyze grammar]

mānuṣāṇām ayaṃ nyāyo munibhiḥ parikīrtitaḥ |
tiraścāṃ ca vihaṅgānāṃ yāvad eva samāśrayaḥ || 95 ||
[Analyze grammar]

anityāni śarīrāṇi vibhavo naiva śāśvataḥ |
nityaṃ saṃnihito mṛtyuḥ kartavyo dharma-saṃgrahaḥ || 96 ||
[Analyze grammar]

yasya dharma-vihīnāni dināny āyānti yānti ca |
sa lohakāra-bhastreva śvasann api na jīvati || 97 ||
[Analyze grammar]

nācchādayati kaupīnaṃ na daṃśa-maśakāpaham |
śunaḥ-puccham iva vyarthaṃ pāṇḍityaṃ dharma-varjitam || 98 ||
[Analyze grammar]

pulākā iva dhānyeṣu pūtikā iv pakṣiṣu |
maśakā iva martyeṣu yeṣāṃ dharmo na kāraṇam || 99 ||
[Analyze grammar]

śreyaḥ puṣpa-phalaṃ vṛkṣād dadhnaḥ śreyo ghṛtaṃ smṛtam |
śreyas tailaṃ ca puṇyākāc chreyān dharmas tu mānuṣāt || 100 ||
[Analyze grammar]

sṛṣṭā mūtra-purīṣārtham āhārāya ca kevalam |
dharma-hīnāḥ parārthāya puruṣāḥ paśavo yathā || 101 ||
[Analyze grammar]

sthairyaṃ sarveṣu kṛtyeṣu śaṃsanti naya-paṇḍitāḥ |
bahv-antarāya-yuktasya dharmasya tvaritā gatiḥ || 102 ||
[Analyze grammar]

saṅkṣepāt kathyate dharmo janāḥ kiṃ vistareṇa vaḥ |
paropakāraḥ puṇyāya pāpāya para-pīḍanam || 103 ||
[Analyze grammar]

śrūyatāṃ dharma-sarvasvaṃ śrutvā caivāvadhāryatām |
ātmanaḥ pratikūlāni pareṣāṃ na samācaret || 104 ||
[Analyze grammar]

ahiṃsā-pūrvako dharmo yasmāt sarva-hite rataḥ |
yūkā-mat-kuṇa-daṃśādīṃs tasmāt tān api rakṣayet || 105 ||
[Analyze grammar]

hiṃsakāny api bhūtāni yo hiṃsati sa nirghṛṇaḥ |
sa yāti narakaṃ ghoraṃ kiṃ punar yaḥ śubhāni ca || 106 ||
[Analyze grammar]

vṛkṣāṃś chittvā paśūn hatvā kṛtvā rudhira-kardamam |
yady evaṃ gamyate svargaṃ narakaṃ kena gamyate || 107 ||
[Analyze grammar]

mānād vā yadi vā lobhāt krodhād vā yadi vā bhayāt |
yo nyāyam anyathā brūte sa yāti narakaṃ naraḥ || 108 ||
[Analyze grammar]

pañca paśv-anṛte hanti daśa hanti gavānṛte |
śataṃ kanyānṛte hanti sahasraṃ puruṣānṛte || 109 ||
[Analyze grammar]

upaviṣṭaḥ sabhā-madhye yo na vakti sphuṭaṃ vacaḥ |
tasmād dūreṇa sa tyājyo na yo vā kīrtayed ṛtam || 110 ||
[Analyze grammar]

rohate sāyakair viddhaṃ chinnaṃ rohati cāsinā |
vaco duruktaṃ bībhatsaṃ na prarohati vāk-kṣatam || 111 ||
[Analyze grammar]

adeśa-kālajñam anāyati-kṣamaṃ yad apriyaṃ lāghava-kāri cātmanaḥ |
yo 'trābravīt kāraṇa-varjitaṃ vaco na tad vacaḥ syād viṣam eva tad bhavet || 112 ||
[Analyze grammar]

balopapanno 'pi hi buddhimān naraḥ pare nayen na svayam eva vairitām |
bhiṣaṅ mamāstīti vicintya bhakṣayed akāraṇāt ko hi vicakṣaṇo viṣam || 113 ||
[Analyze grammar]

parivādaḥ pariṣadi na kathañcit paṇḍitena vaktavyaḥ |
satyam api tan na vācyaṃ yad uktam asukhāvahaṃ bhavati || 114 ||
[Analyze grammar]

suhṛdbhir āptair asakṛd-vicāritaṃ svayaṃ hi buddhyā pravicāritāśrayam |
karoti kāryaṃ khalu yaḥ sa buddhimān sa eva lakṣmyā yaśasāṃ ca bhājanam || 115 ||
[Analyze grammar]

bahu-buddhi-samāyuktāḥ suvijñānā balotkaṭān |
śaktā vañcayituṃ dhūrtā brāhmaṇaṃ chāgalad iva || 116 ||
[Analyze grammar]

śvāna-kukkuṭa-cāṇḍālāḥ sama-sparśāḥ prakīrtitāḥ |
rāsabhoṣṭrau viśeṣeṇa tasmāt tān naiva saṃspṛśet || 117 ||
[Analyze grammar]

tiryañcaṃ mānuṣaṃ vāpi yo mṛtaṃ saṃspṛśet kudhīḥ |
pañca-gavyena śuddhiḥ syāt tasya cāndrāyaṇena vā || 118 ||
[Analyze grammar]

yaḥ spṛśed rāsabhaṃ martyo jñānād ajñānato 'pi vā |
sa-cailaṃ snānam uddiṣṭaṃ tasya pāpa-praśāntaye || 119 ||
[Analyze grammar]

abhinava-sevaka-vinayaiḥ prāghuṇakoktair vilāsinīr uditaiḥ |
dhūrta-jana-vacana-nikarair iha kaścid avañcito nāsti || 120 ||
[Analyze grammar]

bahavo na viroddhavyā durjayā hi mahājanāḥ |
sphurantam api nāgendraṃ bhakṣayanti pipīlikāḥ || 121 ||
[Analyze grammar]

apasāra-samāyuktaṃ na yajñair durgam ucyate |
apasāra-parityaktaṃ durga-vyājena bandhanam || 122 ||
[Analyze grammar]

api prāṇa-samān iṣṭān pālitān lālitān api |
bhṛtyān yuddhe samutpanne paśyec chuṣkam ivendhanam || 123 ||
[Analyze grammar]

prāṇavad rakṣayed bhṛtyān svakāyam iva poṣayet |
sadaika-divasasyārthe yatra syād ripu-saṅgamaḥ || 124 ||
[Analyze grammar]

śatroḥ pracalane chidram ekam anyaṃ ca saṃśrayam |
kurvāṇo jāyate vaśyo vyagratve rāja-sevinām || 125 ||
[Analyze grammar]

vṛttim apy āśritaḥ śatrur avadhyaḥ syāj jigīṣuṇā |
kiṃ punaḥ saṃśrito durgaṃ sāmagryā parayā yutam || 126 ||
[Analyze grammar]

anārambho hi kāryāṇāṃ prathamaṃ buddhi-lakṣaṇam |
ārabdhasyānta-gamanaṃ dvitīyaṃ buddhi-lakṣaṇam || 127 ||
[Analyze grammar]

balīyasā hīna-balo virodhaṃ na bhūti-kāmo manasāpi vāñchet |
na vadhyate vetasa-vṛttir atra vyaktaṃ praṇāśo 'sti pataṅga-vṛtteḥ || 128 ||
[Analyze grammar]

balavantaṃ ripuṃ dṛṣṭvā sarvasvam api buddhimān |
dattvā hi rakṣayet prāṇān rakṣitais tair dhanaṃ punaḥ || 129 ||
[Analyze grammar]

hīnaḥ śatrur nihantavyo yāvan na balavān bhavet |
prāpta-sva-pauruṣa-balaḥ paścād bhavati durjayaḥ || 130 ||
[Analyze grammar]

kālo hi sakṛd abhyeti yan naraṃ kāla-kāṅkṣiṇam |
durlabhaḥ sa punas tena kāla-karmācikīrṣatā || 131 ||
[Analyze grammar]

kaścit kṣudra-samācāraḥ prāṇināṃ kāla-sannibhaḥ |
vicacāra mahāraṇye ghoraḥ śuni-lubdhakaḥ || 132 ||
[Analyze grammar]

bhūtān yo nānugṛhṇāti hy ātmanaḥ śaraṇāgatān |
bhūtārthās tasya naśyanti haṃsāḥ padma-vane yathā || 133 ||
[Analyze grammar]

śrūyate hi kapotena śatruḥ śaraṇam āgataḥ |
pūjitaś ca yathā-nyāyaṃ svaiś ca māṃsair nimantritaḥ || 134 ||
[Analyze grammar]

kaścid kṣudra-samācāraḥ prāṇināṃ kāla-sannibhaḥ |
vicacāra mahāraṇye ghoraḥ śakuni-lubdhakaḥ || 135 ||
[Analyze grammar]

naiva kaścit suhṛt tasya na sambandhī na bāndhavaḥ |
sa taiḥ sarvaiḥ parityaktas tena raudreṇa karmaṇā || 136 ||
[Analyze grammar]

ye nṛśaṃsā durātmanaḥ prāṇināṃ prāṇa-nāśakāḥ |
udvejanīyā bhūtānāṃ vyālā iva bhavanti te || 137 ||
[Analyze grammar]

sa pañjarakam ādāya pāśaṃ ca laguḍaṃ tathā |
nityam eva vanaṃ yāti sarva-prāṇi-vihiṃsakaḥ || 138 ||
[Analyze grammar]

anyedyur bhramatas tasya vane kāpi kapotikā |
jātā hasta-gatā tāṃ sa prākṣipat pañjcarāntare || 139 ||
[Analyze grammar]

tataḥ sa trasta-hṛdayaḥ kampamāno muhur muhuḥ |
anveṣayan paritrāṇam āsasāda vanaspatim || 141 ||
[Analyze grammar]

muhūrtaṃ paśyate yāvad viyad vimala-tārakam |
prāpya vṛkṣaṃ vadaty evaṃ yo 'tra tiṣṭhati kaścana || 142 ||
[Analyze grammar]

tasyāhaṃ śaraṇaṃ prāptaḥ sa paritrātu mām iti |
śītena bhidyamānaṃ ca kṣudhayā gata-cetanam || 143 ||
[Analyze grammar]

atha tasya taroḥ skandhe kapotaḥ suciroṣitaḥ |
bhāryā-virahitas tiṣṭhan vilalāpa suduḥkhitaḥ || 144 ||
[Analyze grammar]

vāta-varṣo mahān āsīn na cāgacchati me priyā |
tayā virahitaṃ hy etac chūnyam adya gṛhaṃ mama || 145 ||
[Analyze grammar]

pativratā pati-prāṇā patyuḥ priya-hite ratā |
yasya syād īdṛśī bhāryā dhanyaḥ sa puruṣo bhuvi || 146 ||
[Analyze grammar]

na gṛhaṃ gṛham ity āhur gṛhiṇī gṛham ucyate |
gṛhaṃ tu gṛhiṇī-hīnam araṇya-sadṛśaṃ matam || 147 ||
[Analyze grammar]

pañjara-sthā tataḥ śrutvā bhartur duḥkhānvitaṃ vacaḥ |
kapotikā susantuṣṭā vākyaṃ cedam athāha sā || 148 ||
[Analyze grammar]

na sā strīty abhimantavyā yasyāṃ bhartā na tuṣyati |
tuṣṭe bhartari nārīṇāṃ tuṣṭāḥ syuḥ sarva-devatāḥ || 149 ||
[Analyze grammar]

dāvāgninā vidagdheva sa-puṣpa-stavakā latā |
bhasmībhavatu sā nārī yasyāṃ bhartā na tuṣyati || 150 ||
[Analyze grammar]

mitaṃ dadāti hi pitā mitaṃ bhrātā mitaṃ sutaḥ |
amitasya hi dātāraṃ bhartāraṃ kā na pūjayet || 151 ||
[Analyze grammar]

śṛṇuṣvāvahitaḥ kānta yat te vakṣyāmy ahaṃ hitam |
prāṇair api tvayā nityaṃ saṃrakṣyaḥ śaraṇāgataḥ || 152 ||
[Analyze grammar]

eṣa śākunikaḥ śete tavāvāsaṃ samāśritaḥ |
śītārtaś ca kṣudhārtaś ca pūjām asmai samācara || 153 ||
[Analyze grammar]

yaḥ sāyam atithiṃ prāptaṃ yathā-śakti na pūjayet |
tasyāsau duṣkṛtaṃ dattvā sukṛtaṃ cāpakarṣati || 154 ||
[Analyze grammar]

mā cāsmai tvaṃ kṛthā dvaiṣaṃ baddhāneneti mat-priyā |
sva-kṛtair eva baddhāhaṃ prāktanaiḥ karma-bandhanaiḥ || 155 ||
[Analyze grammar]

dāridrya-roga-duḥkhāni bandhana-vyasanāni ca |
ātmāparādha-vṛkṣasya phalāny etāni dehinām || 156 ||
[Analyze grammar]

tasmāt tvaṃ dveṣam utsṛjya mad-bandhana-samudbhavam |
dharme manaḥ samādhāya pūjayainaṃ yathā-vidhi || 157 ||
[Analyze grammar]

tasyās tad-vacanaṃ śrutvā dharma-yukti-samanvitam |
upagamya tato 'dhṛṣṭaḥ kapotaḥ prāha lubdhakam || 158 ||
[Analyze grammar]

bhadra susvāgataṃ te'stu brūhi kiṃ karavāṇi te |
santāpaś ca na kartavyaḥ sva-gṛhe vartate bhavān || 159 ||
[Analyze grammar]

tasya tad-vacanaṃ śrutvā pratyuvāca vihaṅgamam |
kapota khalu śītaṃ me hima-trāṇaṃ vidhīyatām || 160 ||
[Analyze grammar]

sa gatvāṅgārakaṃ nītvā pātayāmāsa pāvakam |
tataḥ śuṣkeṣu parṇeṣu tam āśu samadīpayat || 161 ||
[Analyze grammar]

susandīptaṃ tataḥ kṛtvā tam āha śaraṇāgatam |
pratāpayasva viśrabdhaṃ sva-gātrāṇy atra nirbhayaḥ || 162 ||
[Analyze grammar]

udgatena ca jīvāmo vayaṃ sarve vanaukasaḥ |
na cāsti vibhavaḥ kaścin nāśaye yena te kṣudham || 163 ||
[Analyze grammar]

sahasraṃ bharate kaścic chatamanyo daśāparaḥ |
mama tv akṛta-puṇyasya kṣudrasyātmāpi durbharaḥ || 164 ||
[Analyze grammar]

ekasyāpy atither annaṃ yaḥ pradātuṃ na śaktimān |
tasyāneka-parikleśe gṛhe kiṃ vasataḥ phalam || 165 ||
[Analyze grammar]

tat tathā sādhayāmy etac charīraṃ duḥkha-jīvitam |
yathā bhūyo na vakṣyāmi nāstīty arthi-samāgame || 166 ||
[Analyze grammar]

sa ninindi kilātmānaṃ na tu taṃ lubdhakaṃ punaḥ |
uvāca tarpayiṣye tvāṃ muhūrtaṃ pratipālaya || 167 ||
[Analyze grammar]

evam uktvā sa dharmātmā prahṛṣṭenāntarātmanā |
tam agniṃ samparikramya praviveśa sva-veśmavat || 168 ||
[Analyze grammar]

tatas taṃ lubdhako dṛṣṭvā kṛpayā pīḍito bhṛśam |
kapotam agnau patitaṃ vākyam etad abhāṣata || 169 ||
[Analyze grammar]

yaḥ karoti naraḥ pāpaṃ na tasyātmā dhruvaṃ priyaḥ |
ātmanā hi kṛtaṃ pāpam ātmanaiva hi bhujyate || 170 ||
[Analyze grammar]

so 'haṃ pāpa-matiś caiva pāpa-karma-rataḥ sadā |
patiṣyāmi mahā-ghore narake nātra saṃśayaḥ || 171 ||
[Analyze grammar]

nūnaṃ mama nṛśaṃsasya pratyādarśaḥ sudarśitaḥ |
prayacchatā sva-māṃsāni kapotena mahātmanā || 172 ||
[Analyze grammar]

adya-prabhṛti dehaṃ svaṃ sarva-bhoga-vivarjitam |
toyaṃ svalpaṃ yathā grīṣmaḥ śoṣayiṣyāmy ahaṃ punaḥ || 173 ||
[Analyze grammar]

śīta-vātātapa-sahaḥ kṛśāṅgo malinas tathā |
upavāsair bahuvidhaiś cariṣye dharmam uttamam || 174 || tato yaṣṭiṃ śalākāṃ ca jālakaṃ pañjaraṃ tathā |
[Analyze grammar]

lubdhakena tato muktā dṛṣṭvāgnau patitaṃ patim |
kapotī vilalāpārtā śoka-santapta-mānasā || 176 ||
[Analyze grammar]

na kāryam adya me nātha jīvitena tvayā vinā |
dīnāyāḥ pati-hīnāyāḥ kiṃ nāryā jīvite phalam || 177 ||
[Analyze grammar]

māno darpas tv ahaṅkāraḥ kulaṃ pūjā ca bandhuṣu |
dāsa-bhṛtya-janeṣv ājñā vaidhavyena praṇaśyati || 178 ||
[Analyze grammar]

evaṃ vilapya bahuśaḥ kṛpaṇaṃ bhṛśa-duḥkhitā |
pativratā susandīptaṃ tam evāgniṃ viveśa sā || 179 ||
[Analyze grammar]

tato divyāmbara-dharā divyābharaṇa-bhūṣitā |
bhartāraṃ sā vimānasthaṃ dadarśa svaṃ kapotikā || 180 ||
[Analyze grammar]

so 'pi divya-tanur bhūtvā yathārtham idam abravīt |
aho mām anugacchantyā kṛtaṃ sādhu śubhe tvayā || 181 ||
[Analyze grammar]

tisraḥ koṭyo 'rdha-koṭī ca yāni romāṇi mānuṣe |
tāvat kālaṃ vaset svarge bhartāraṃ yānugacchati || 182 ||
[Analyze grammar]

kapota-dehaḥ sūryāste pratyahaṃ sukham anvabhūt |
kapota-dehavatsāsīt prāk puṇya-prabhavaṃ hitam || 183 ||
[Analyze grammar]

harṣāviṣṭas tato vyādho viveśa ca vanaṃ dhanam |
prāṇi-hiṃsāṃ parityajya bahu-nirvedavān bhṛśam || 184 ||
[Analyze grammar]

tatra dāvānalaṃ dṛṣṭvā viveśa viratāśayaḥ |
nirdagdha-kalmaṣo bhūtvā svarga-saukhyam avāptavān || 185 ||
[Analyze grammar]

yā mamodvijate nityaṃ sā mamādyāvagūhate |
priya-kāraka bhadraṃ te yan mamāsti harasva tat || 186 ||
[Analyze grammar]

hartavyaṃ te na paśyāmi hartavyaṃ ced bhaviṣyati |
punar apy āgamiṣyāmi yadīyaṃ nāvagūhate || 187 ||
[Analyze grammar]

śvetaṃ padaṃ śirasi yat tu śiroruhāṇāṃ sthānaṃ paraṃ paribhavasya tad eva puṃsām |
āropitāsthi-śakalaṃ parihṛtya yānti cāṇḍāla-kūpam iva dūrataraṃ taruṇyaḥ || 188 ||
[Analyze grammar]

gātraṃ saṅkucitaṃ gatir vigalitā dantāś ca nāśaṅgatā dṛṣṭir bhrāmyati rūpam apy upahataṃ vaktraṃ ca lālāyate |
vākyaṃ naiva karoti bāndhava-janaḥ patnī na śuśrūṣate dhik kaṣṭaṃ jarayābhibhūta-pūruṣaṃ putro 'py avajñāyate || 189 ||
[Analyze grammar]

śatravo 'pi hitārthaiva vivadantaḥ parasparam |
caureṇa jīvitaṃ dattaṃ rākṣasena tu go-yugam || 190 ||
[Analyze grammar]

parasparasya marmāṇi ye na rakṣanti jantavaḥ |
ta eva nidhanaṃ yānti valmīkodara-sarpavat || 191 ||
[Analyze grammar]

apūjyā yatra pūjyante pūjyānāṃ tu vimānanā |
trīṇi tatra pravartante durbhikṣaṃ maraṇaṃ bhayam || 192 ||
[Analyze grammar]

pratyakṣe'pi kṛte pāpe mūrkhaḥ sāmnā praśāmyati |
ratha-kāraḥ svakāṃ bhāryāṃ sajārāṃ śirasāvahat || 193 ||
[Analyze grammar]

yadi syāt pāvakaḥ śītaḥ proṣṇī vā śaśa-lāñchanaḥ |
strīṇāṃ tadā satītvaṃ syād yadi syād durjano hitaḥ || 194 ||
[Analyze grammar]

yac ca vedeṣu śāstreṣu na dṛṣṭaṃ na ca saṃśrutam |
tat sarvaṃ vetti loko 'yaṃ yat syād brahmāṇḍa-madhyagam || 195 ||
[Analyze grammar]

durdivase ghana-timire varṣati jalade mahāṭavī-prabhṛtau |
patyur videśa-gamane parama-sukhaṃ jaghana-capalāyāḥ || 196 ||
[Analyze grammar]

mitra-rūpā hi ripavaḥ sambhāvyante vicakṣaṇaiḥ |
ye hitaṃ vākyam utsṛjya viparītopasevinaḥ || 197 ||
[Analyze grammar]

santo 'py arthā vinaśyanti deśa-kāla-virodhinaḥ |
aprājñān mantriṇaḥ prāpya tamaḥ sūryodaye yathā || 198 ||
[Analyze grammar]

sūryaṃ bhartāram utsṛjya parjanyaṃ mārutaṃ girim |
sva-jātiṃ mūṣikā prāptā svajātir duratikramā || 199 ||
[Analyze grammar]

yady asya vihitaṃ bhojyaṃ na tat tasya praduṣyati |
abhakṣye bahu-doṣaḥ syāt tasmāt kāryo na vyatyayaḥ || 200 ||
[Analyze grammar]

bhakṣyaṃ yathā dvijātīnāṃ madyapānāṃ yathā haviḥ |
abhakṣyaṃ bhakṣyatām eti tathānyeṣām api dvija || 201 ||
[Analyze grammar]

bhakṣyaṃ bhakṣyatāṃ śreya abhakṣyaṃ tu mahad agham |
tat kathaṃ māṃ vṛthācāra tvaṃ daṇḍayitum arhasi || 202 ||
[Analyze grammar]

samaḥ śatrau ca mitre ca sama-loṣṭāśma-kāñcanaḥ |
suhṛn-mitre hy udāsīno madhyastho dveṣya-bandhuṣu |
sādhuṣv api ca pāpeṣu sama-buddhir viśiṣyate || 203 ||
[Analyze grammar]

sādhūnāṃ niravadyānāṃ sadācāra-vicāriṇām |
yogī yuñjīta satataṃ satatam ātmānaṃ rahasi sthitaḥ || 204 ||
[Analyze grammar]

muñca muñca pataty eko mā muñceti dvitīyakaḥ |
ubhayoḥ patanaṃ dṛṣṭvā maunaṃ sarvārtha-sādhanam || 205 ||
[Analyze grammar]

sañcarantīha pāpāni yugeṣv anyeṣu dehinām |
kalau tu pāpa-saṃyukte yaḥ karoti sa lipyate || 206 ||
[Analyze grammar]

āsanāc chayanād yānāt saṃgateś cāpi bhojanāt |
kṛte sañcarate pāpaṃ taila-bindur ivāmbhasi || 207 ||
[Analyze grammar]

janitā copanetā ca yas tu vidyāṃ prayacchati |
anna-dātā bhaya-trātā pañcaite pitaraḥ smṛtāḥ || 208 ||
[Analyze grammar]

anūḍhā mandire yasya rajaḥ prāpnoti kanyakā |
patanti pitaras tasya svarga-sthā api tair guṇaiḥ || 209 ||
[Analyze grammar]

varaṃ varayate kanyā mātā vittaṃ pitā śrutam |
bāndhavāḥ kulam icchanti miṣṭānnam itare janāḥ || 210 ||
[Analyze grammar]

yāvan na lajjate kanyā yāvat krīḍati pāṃsunā |
yāvat tiṣṭhati go-mārge tāvat kanyāṃ vivāhayet || 211 ||
[Analyze grammar]

mātā caiva pitā caiva jyeṣṭha-bhrātā tathaiva ca |
trayas te narakaṃ yānti dṛṣṭvā kanyāṃ rajasvalām || 212 ||
[Analyze grammar]

kulaṃ ca śīlaṃ ca sanāthatāṃ ca vidyāṃ ca vittaṃ ca vapur vayaś ca |
etān guṇān saptān sapta parīkṣya deyā kanyā budhaiḥ śeṣam acintanīyam || 213 ||
[Analyze grammar]

aniṣṭaḥ kanyakāyā yo varo rūpānvito 'pi yaḥ |
yadi syāt tasya no deyā kanyā śreyo 'bhivāñchatā || 214 ||
[Analyze grammar]

hanyatām iti yenoktaṃ svāmino hita-vādinā |
sa evaiko 'tra sarveṣāṃ nīti-śāstrārtha-tattva-vit || 215 ||
[Analyze grammar]

pūrvaṃ tāvad ahaṃ mūrkho dvitīyaḥ paśu-bandhakaḥ |
tato rājā ca mantrī ca sarvaṃ vai mūrkha-maṇḍalam || 216 ||
[Analyze grammar]

anāgataṃ yaḥ kurute sa śobhate sa śocate yo na karoty anāgatam |
vane vasann eva jarām upāgato bilasya vācā na kadāpi hi śrutā || 217 ||
[Analyze grammar]

bhaya-santrasta-manasāṃ hasta-pādādikāḥ kriyāḥ |
pravartante na vāṇī ca vepathuś cādhiko bhavet || 218 ||
[Analyze grammar]

na dīrgha-darśino yasya mantriṇaḥ syur mahīpateḥ |
kramāyātā dhruvaṃ tasya na cirāt syāt parikṣayaḥ || 219 ||
[Analyze grammar]

mantri-rūpā hi ripavaḥ sambhāvyās te vicakṣaṇaiḥ |
ye santaṃ nayam utsṛjya sevante pratilomataḥ || 220 ||
[Analyze grammar]

amitraṃ kurute mitraṃ mitraṃ dveṣṭi hinasti ca |
śubhaṃ vetty aśubhaṃ pāpaṃ bhadraṃ daiva-hato naraḥ || 221 ||
[Analyze grammar]

śīghra-kṛtyeṣu kāryeṣu vilambayati yo naraḥ |
tat kṛtyaṃ devatās tasya kopād vighnanty asaṃśayam || 222 ||
[Analyze grammar]

yasya yasya hi kāryasya phalitasya viśeṣataḥ |
kṣipram akriyamāṇasya kālaḥ pibati tat-phalam || 223 ||
[Analyze grammar]

vara-magnau pradīpte tu prapātaḥ puṇya-karmaṇām |
na cārijana-saṃsargo muhūrtam api sevitaḥ || 224 ||
[Analyze grammar]

kāryasyāpekṣayā bhuktaṃ viṣam apy amṛtāyate |
sarveṣāṃ prāṇināṃ yatra nātra kāryā vicāraṇā || 225 ||
[Analyze grammar]

upanata-bhaye yo yo mārgo hitārtha-karo bhavet- sa sa nipuṇayā buddhyā sevyo mahān kṛpaṇo 'pi vā |
karikara-nibhau jyāghātā kau mahāstra-viśāradau valaya-racitau strīvad bāhū kṛtau na kirīṭinā || 226 ||
[Analyze grammar]

śaktenāpi satā janena viduṣā kālāntarāpekṣiṇā vastavyaṃ khalu vākya-vajra-viṣame kṣudre'pi pāpe jane |
darvī-vyagra-kareṇa dhūma-malinenāyāsa-yukte ca bhīmenātibalena matsya-bhavane kiṃ noṣitaṃ sūdavat || 227 ||
[Analyze grammar]

yad vā tad vā viṣama-patitaḥ sādhu vā garhitaṃ vā kālāpekṣī hṛdaya-nihitaṃ buddhimān karma kuryāt |
kiṃ gāṇḍīva-sphurad-uru-guṇāsphālana-krūra-pāṇir nāsīl līlā-naṭana-vilasan mekhalī savyasācī || 228 ||
[Analyze grammar]

siddhiṃ prārthayatā janena viduṣā tejo nigṛhya svakaṃ sattvotsāhavatāpi daiva-vidhiṣu sthairyaṃ prakārya kramāt |
devendra-draviṇeśvarāntaka-samair apy anvito bhrātṛbhiḥ kiṃ kliṣṭaḥ suciraṃ virāṭa-bhavane śrīmān na dharmātmajaḥ || 229 ||
[Analyze grammar]

rūpābhijana-sampanno mādrī-putrau balānvitau |
gokarma-rakṣā-vyāpāre virāṭa-preṣyatāṃ gatau || 230 ||
[Analyze grammar]

rūpeṇāpratimena yauvana-guṇaiḥ śreṣṭhe kule janmanā kāntyā śrīr iva yātra sāpi vidaśāṃ kāla-kramād āgatā |
sairandhrīti sa-garvitaṃ yuvatibhiḥ sākṣepam ākhyātayā draupadyā nanu matsya-rāja-bhavane dhṛṣṭaṃ na kiṃ candanam || 231 ||
[Analyze grammar]

arito 'bhyāgato bhṛtyo duṣṭas tat-saṅga-tat-paraḥ |
apasarpa-sadharmatvān nityodvegī ca dūṣitaḥ || 232 ||
[Analyze grammar]

āsane śayane yāne pāna-bhojana-vastuṣu |
dṛṣṭvāntaraṃ pramatteṣu praharanty arayo 'riṣu || 233 ||
[Analyze grammar]

tasmāt sarva-prayatnena trivarga-nilayaṃ budhaḥ |
ātmānam ādṛto rakṣet pramādād dhi vinaśyati || 234 ||
[Analyze grammar]

santāpayanti kam apathya-bhujaṃ na rogā durmantriṇaṃ kam upayānti na nīti-doṣāḥ |
kaṃ śrīr na darpayati kaṃ na nihanti mṛtyuḥ kaṃ svīkṛtā na viṣayā paripīḍayanti || 235 ||
[Analyze grammar]

lubdhasya naśyati yaśaḥ piśunasya maitrī naṣṭa-kriyasya kula artha-parasya dharmaḥ |
vidyā-phalaṃ vyasaninaḥ kṛpaṇasya saukhyaṃ rājyaṃ pramatta-sacivasya narādhipasya || 236 ||
[Analyze grammar]

apamānaṃ puraskṛtya mānaṃ kṛtvā tu pṛṣṭhataḥ |
svārtham abhyuddharet prājñaḥ kārya-dhvaṃso hi mūrkhatā || 237 ||
[Analyze grammar]

skandhenāpi vahec chatruṃ kālam āsādya buddhimān |
mahatā kṛṣṇa-sarpeṇa maṇḍūkā bahavo hatāḥ || 238 ||
[Analyze grammar]

na tathā kariṇā yānaṃ turageṇa rathena vā |
nara-yānena vā yānaṃ yathā mandaviṣeṇa me || 239 ||
[Analyze grammar]

maṇḍūkā vividhā hy ete chala-pūrvopasādhitāḥ |
kiyantaṃ kālam akṣīṇā bhaveyuḥ khāditā mama || 240 ||
[Analyze grammar]

sarvam etad vijānāmi yathā vāhyo 'smi darduraiḥ |
kiñcit kālaṃ pratīkṣe'haṃ ghṛtāndho brāhmaṇo yathā || 241 ||
[Analyze grammar]

vane prajvalito vahnir dahan mūlāni rakṣati |
samūlonmūlanaṃ kuryād vāyur yo mṛdu-śītalaḥ || 242 ||
[Analyze grammar]

mahattvam etan mahatāṃ nayālaṅkāra-dhāriṇām |
na muñcanti yad ārabdhaṃ kṛcchre'pi vyasanodaye || 243 ||
[Analyze grammar]

prārabhyate na khalu vighna-bhayena nīcaiḥ prārabhya vighna-vihatā viramanti madhyāḥ |
vighnaiḥ sahasra-guṇitair api hanyamānāḥ prārabdham uttama-guṇā na parityajanti || 244 ||
[Analyze grammar]

ṛṇa-śeṣaṃ cāgni-śeṣaṃ ca śatru-śeṣaṃ tathaiva ca |
vyādhi-śeṣaṃ ca niḥśeṣaṃ kṛtvā prājño na sīdati || 245 ||
[Analyze grammar]

śastrair hatā na hi hatā ripavo bhavanti prajñā-hatās tu ripavaḥ suhatā bhavanti |
śastaṃ nihanti puruṣasya śarīram ekaṃ prajñā kulaṃ ca vibhavaś ca yaśaś ca hanti || 246 ||
[Analyze grammar]

prasarati matiḥ kāryārambhe dṛḍhībhavati smṛtiḥ svayam upanayann arthān mantro na gacchati viplavam |
sphurati saphalas tarkaś cittaṃ samunnatim aśnute bhavati ca ratiḥ ślāghye kṛtye narasya bhaviṣyataḥ || 247 ||
[Analyze grammar]

tyāgini śūre viduṣi ca saṃsarga-rucir jano guṇī bhavati |
guṇavati dhanaṃ dhanāc chrīḥ śrīmaty ājñā tato rājyam || 248 ||
[Analyze grammar]

tīkṣṇopāya-prāpti-gamyo 'pi yo 'rthas tasyāpy ādau saṃśrayaḥ sādhu yuktaḥ |
uttuṅgāgraḥ sāra-bhūto vanānāṃ mānyābhyarcya cchidyate pādapendraḥ || 249 ||
[Analyze grammar]

aniścitair adhyavasāya-bhīrubhir yatheṣṭa-saṃlāpa-rati-prayojanaiḥ |
phale visaṃvādam upāgatā giraḥ prayānti loke parihāsa-vastutām || 250 ||
[Analyze grammar]

śakṣyāmi kartum idam alpam ayatna-sādhyam anādaraḥ ka iti kṛtyam upekṣamāṇāḥ |
kecit pramatta-manasaḥ paritāpa-duḥkham āpat-prasaṅga-sulabhaṃ puruṣā prayānti || 251 ||
[Analyze grammar]

niḥsarpe baddha-sarpe vā bhavane suṣyate sukham |
sadā dṛṣṭa-bhujaṅge tu nidrā duḥkhena labhyate || 252 ||
[Analyze grammar]

vistīrṇa-vyavasāya-sādhya-mahatāṃ snighdopayuktāśiṣāṃ kāryāṇāṃ naya-sāhasonnati-matām icchāpad-ārohiṇām |
mānotseka-parākrama-vyasaninaḥ pāraṃ na yāvad-gatāḥ sāmarṣe hṛdaye'vakāśa-viṣayā tāvat kathaṃ nirvṛtiḥ || 253 ||
[Analyze grammar]

prajā na rañjayed yas tu rājā rakṣādibhir guṇaiḥ |
ajāgala-stanasyeva tasya rājyaṃ nirarthakam || 254 ||
[Analyze grammar]

guṇeṣu rāgo vyasaneṣv anādaro ratiḥ subhṛtyeṣu ca yasya bhūpateḥ |
ciraṃ sa bhuṅkte cala-cāmarāṃśukāṃ sitātapatrābharaṇāṃ nṛpa-śriyam || 255 ||
[Analyze grammar]

yadaiva rājye kriyate'bhiṣekas tadaiva buddhir vyasaneṣu yojyā |
ghaṭā hi rājñām abhiṣeka-kāle sahāmbhasaivāpadam udgiranti || 256 ||
[Analyze grammar]

rāmasya vrajanaṃ vane nivasanaṃ pāṇḍoḥ sutānāṃ vane vṛṣṇīnāṃ nidhanaṃ nalasya nṛpate rājyāt paribhraṃśanam |
nāṭyācāryakam arjunasya patanaṃ sañcintya laṅkeśvare sarve kāla-vaśāj jano 'tra sahate kaḥ kaṃ paritrāyate || 257 ||
[Analyze grammar]

kva sa daśarathaḥ svarge bhūtvā mahendra-suhṛd gataḥ kva sa jalanidher velāṃ baddhvā nṛpaḥ sagaras tathā |
kva sa karatalāj jāto vainyaḥ kva sūrya-tanur manuḥ nanu balavatā kālenaite prabodhya nimīlitāḥ || 258 ||
[Analyze grammar]

māndhātā kva gatas triloka-vijayī rājā kva satyavrataḥ devānāṃ nṛpatir gataḥ kva nahuṣaḥ sac-chāstravān keśavaḥ |
manyante sarathāḥ sa-kuñjara-varāḥ śakrāsanādhyāsinaḥ kālenaiva mahātmanā tv anukṛtāḥ kālena nirvāsitāḥ || 259 ||
[Analyze grammar]

sa ca nṛpatis te sacivās tāḥ pramadās tāni kānana-vanāni |
sa ca te ca tāś ca tāni ca kṛtānta-dṛṣṭāni naṣṭāni || 260 ||
[Analyze grammar]