Chapter 3

|| tṛtīyo'dhyāyaḥ ||

śrīḥ-
bhagavan yogatattvākhyaṃ jñānapūrvaṃ vadasva me|
bhagavān-
sarve (1)devā maharṣayo manuṣyāḥ paśavastathā|| 3.1 ||
(1.gra. devāśca ṛṣayo)
manmāyayā nibaddhāste tannikṛntanamadbhutam|
yogasāraṃ pravakṣyāmi jñānatattvasamanvitam|| 3.2 ||
janmamṛtyujarāvyādhināśanaṃ mṛtyutārakam|
nānāmārgaiśca duṣprāpaṃ kaivalyaṃ paramaṃ padam|| 3.3 ||
anirdeśyamagamyaṃ yat sarvagaṃ sarvasākṣimat|
niṣkalaṃ nirmalaṃ śāntaṃ sarvātītaṃ nirañjanam|| 3.4 ||
paraṃ brahmeti yatproktaṃ tadyogaireva gamyate|
jīvasya guṇasaṅgena kāmakrodhādayo'rayaḥ|| 3.5 ||
badhnanti nityadā muktaṃ pāśaiḥ saṃsārarūpibhiḥ|
tasmātpāśādvinirmukterupāyaṃ kathayāmi te|| 3.6 ||
yogahīnaṃ kathaṃ jñānaṃ mokṣadaṃ syādvarānane|
yogo'pi jñānahīnastu na kṣamaḥ syāt pradarśitum|| 3.7 ||
tasmānmumukṣurjñānena dhārayedyogamadbhutam|
ajñānādeva saṃsāro jñānādeva hi mucyate|| 3.8 ||
jñānaprayojanaṃ kiṃ tat jñeyavastupradarśanam|
sarvākāraṃ nirākāraṃ śuddhasphaṭikasaṃnibham|| 3.9 ||
caturbhujaṃ vāsudevaṃ śaṅkhacakragadādharam|
ānandajaladhiṃ śuddhaṃ nirguṇaṃ pītavāsasam|| 3.10 ||
brahmādisarvadevānāmutpatteḥ kāraṇaṃ param|
kiṃcit smitamukhaṃ devaṃ puṇḍarīkāyatekṣaṇam|| 3.11 ||
gurormukhādadhītena pathā yogena mānavaḥ|
dhyāyan bhagavato rūpaṃ yogaṃ kuryādvicakṣaṇaḥ|| 3.12 ||
etajjñānamiti proktaṃ yogasāramathocyate|
mantrayogo layaścaiva tathā paricayaḥ smṛtaḥ|| 3.13 ||
niṣpattiścetyavasthā ca yogeṣu parikīrtitāḥ|
eteṣāṃ lakṣaṇaṃ vakṣye śṛṇuṣva kamalekṣaṇe|| 3.14 ||
mātṛkādiyutaṃ mantraṃ dvādaśābdaṃ japecchuciḥ|
krameṇa labhate jñāmamaṇimādiguṇānvitam|| 3.15 ||
alpabuddhirimaṃ yogaṃ sevate sādhakādhamaḥ|
layayogaścittalayaḥ koṭiśaḥ parikīrtitaḥ|| 3.16 ||
gacchaṃstiṣṭhan svapan bhuñjan dhyāyanniṣkalamīśvaram|
sa eva layayogākhyo (2)haṭhayogamataḥ śṛṇu|| 3.17 ||
(2.gra. haṃsayoga)
yamaśca niyamaścobhāvāsanaṃ prāṇasaṃyamaḥ|
pratyāhāro dhāraṇā ca dhyānaṃ bhrūmadhyame hareḥ|| 3.18 ||
samādhiḥ samatāvasthā sāṣṭāṅgo yoga ucyate|
mahāmudrā mahābandho mahāvedhaśca khecarī|| 3.19 ||
jālandharoḍḍiyāṇaśca mūlabandhastathaiva ca|
dīrghapraṇavasandhānaṃ siddhāntaśravaṇaṃ (3)tathā|| 3.20 ||
(3.gra. param)
vajrolī cāmarolī ca sahajolī tridhā matā|
eteṣāṃ lakṣaṇaṃ devi pratyekaṃ śṛṇu tattvataḥ|| 3.21 ||
laghvāhāro yameṣveko mukhyo bhavati tattvataḥ|
ahiṃsā niyameṣvekā mukhyā padmasamudbhave|| 3.22 ||
siddhaṃ padmaṃ tathā siṃhaṃ bhadraṃ ceti catuṣṭayam|
prathamābhyāsakāle tu vighnaḥ syādbahudhā rame|| 3.23 ||
ālasyaṃ katthanaṃ dhūrtagoṣṭhīmantrādisādhanam|
dhātustrī laulyakādīni mṛgatṛṣṇāmayāni vai|| 3.24 ||
jñātvā sudhīstyajetsarvān vighnān puṇyaprabhāvataḥ|
prāṇāyāmaṃ tataḥ kurvan padmasanagataḥ svayam|| 3.25 ||
suśobhanaṃ maṭhaṃ kuryāt sūkṣmadvāraṃ tu nirvraṇam|
suṣṭhu liptaṃ gomayena sudhayā vā prayatnataḥ|| 3.26 ||
dine dine ca saṃmṛṣṭaṃ saṃmārjanyā viśeṣataḥ|
vāsitaṃ ca sugandhena dhūpitaṃ guggulādibhiḥ|| 3.27 ||
tatropaviśya medhāvī padmāsanamathāsthitaḥ|
ṛjukāyaḥ prāñjaliśca praṇamediṣṭadevatām|| 3.28 ||
tato dakṣiṇahastasya tvaṅguṣṭhenaiva piṅgalām|
nirudhya pūrayedvāyumiḍayā tu śanaiḥ śanaiḥ|| 3.29 ||
yathāśaktyanurodhena tataḥ kuryācca kumbhakam|
punastyajet piṅgalayā śanaireva na vegataḥ|| 3.30 ||
punaḥ piṅgalayāpūrya pūrayedudaraṃ śanaiḥ|
dhārayitvā yathāśakti recayediḍayā śanaiḥ|| 3.31 ||
yayā tyajettayāpūrya dhārayedavirodhataḥ|
jānū pradakṣiṇīkṛtya na drutaṃ na vilambitam|| 3.32 ||
aṅguliśphoṭanaṃ kuryāt sā mātrā parikīrtitā|
iḍayā vāyumāpūrya śanaiḥ ṣoḍaśamātrayā|| 3.33 ||
kumbhayet pūritaṃ paścāccatuḥṣaṣṭyā tu mātrayā|
recayet piṅgalānāḍyā dvātriṃśanmātrayā punaḥ|| 3.34 ||
punaḥ piṅgalayā''pūrya pūrvavatsusamāhitaḥ|
prātarmadhyandine sāyamardharātre ca kumbhakān|| 3.35 ||
śanairaśītiparyantaṃ caturvāraṃ samabhyaset|
evaṃ māsatrayābhyāsānnāḍīśuddhirbhaviṣyati|| 3.36 ||
yadā tu nāḍīśuddhiḥ syāt tadā cihnāni bāhyataḥ|
jāyante yogino dehe tāni vakṣyāmyaśeṣataḥ|| 3.37 ||
śarīralaghutā dīptirjāṭharāgnivivardhanam|
kṛśatvaṃ ca śarīrasya tadā jāyeta niścalam|| 3.38 ||
yogavighnakarāhāraṃ varjayedyogisattamaḥ|
lavaṇaṃ sarṣapaṃ cāmlamuṣṇaṃ tīkṣṇaṃ ca rūkṣakam|| 3.39 ||
śākajātaṃ rāmaṭhādi vahni(4)strīpathasevanam|
prātaḥsnānopavāsādikāyakleśāṃśca varjayet|| 3.40 ||
(4.gra. stri)
abhyāsakāle prathamaṃ śastaṃ (5)kṣīrājyabhojanam|
godhūmamudgaśālyannaṃ yogavṛddhikaraṃ viduḥ|| 3.41 ||
(5.gra. kṣīrānna)
tataḥ paraṃ yatheṣṭaṃ tu śaktaḥ syādvāyudhāraṇe|
yatheṣṭadhāraṇādvāyoḥ sidhyet kevalakumbhakam|| 3.42 ||
kevale kumbhake siddhe recapūravivarjite|
na tasya durlabhaṃ kiṃcit triṣu lokeṣu vidyate|| 3.43 ||
prasvedo jāyate pūrvaṃ mardaṃ tena ca kārayet|
tato'tidhāraṇādvāyoḥ krameṇaiva śanaiḥ śanaiḥ|| 3.44 ||
kapho bhavati dehasya āsanasthasya yoginaḥ|
tato'dhikatarābhyāsād dāruṇātsveda udbhavet|| 3.45 ||
tadā ca dārduro bhāva utplutyotplutya gacchati|
padmāsanasthito yogī tadā gacchati bhūtalam|| 3.46 ||
tato'dhikatarābhyāsād bhūmityāgaśca jāyate|
padmāsanastha evāsau bhūmimutsṛjya vartate|| 3.47 ||
atimānuṣaceṣṭādi tadā sāmarthyamudbhavet|
na darśayecca sāmarthyaṃ yadi kuryāttapovyayaḥ|| 3.48 ||
sukhaṃ vā yadi vā duḥkhaṃ prāptaṃ na vyathayettadā|
alpamūtrapurīṣaśca svalpanidrā ca jāyate|| 3.49 ||
kīlavo dūṣikā lālā svedadurgandhatānane|
etāni (6)sarvathā tasya na jāyante tataḥ param|| 3.50 ||
(6.sarvadhā)
tato'dhikatarābhyāsād balamutpadyate bahu|
yena bhūcarasiddhaḥ syād bhūcarāṇāṃ (7)jale kṣamaḥ|| 3.51 ||
(7.gra. jaye)
vyāghrādisaṃhaśarabhān bāhubhyāṃ hanti yogavit|
abhyaset plutamoṃkāraṃ tena pāpo vinaśyati|| 3.52 ||
sarvavighnaharo mantraḥ praṇavaḥ sarvadoṣahā|
evamabhyāsayogena ghaṭāvasthā samudbhavet|| 3.53 ||
prāṇo'pāno mano buddhirjīvātmaparamātmanoḥ|
anyonyasyāvirodhena ghaṭate jñānamadbhutam|| 3.54 ||
ghaṭāvastheti sā proktā taccihnāni vadāmi te|
pūrvaṃ yaḥ kathito'bhyāsaścaturthāṃśaṃ parityajet|| 3.55 ||
divā vā yadi vā kuryāt sāyaṃ vā yāmamātrakam|
ekavāraṃ pratidinaṃ kuryāt kevalamumbhakam|| 3.56 ||
indriyāṇindriyārthebhyo yat pratyāharaṇaṃ sphuṭam|
yogī kumbhakamāsthāya pratyāhāraḥ sa ucyate|| 3.57 ||
yadyatpaśyati cakṣurbhyāṃ tattadātmeti bhāvayet|
[yadyacchṛṇoti karṇābhyāṃ tattadātmeti bhāvayet]|| 3.58 ||
labhate nāsayā yadyattattadātmeti bhāvayet|
jihvayā yadrasaṃ hyatti tattadātmeti bhāvayet|| 3.59 ||
tvacā yadyat spṛśedyogī tattadātmeti bhāvayet|
evaṃ bhāvayatastasya sāmarthyamatimānuṣam|| 3.60 ||
dūraśrutirdūradṛṣṭiḥ kṣaṇād dūragatistathā|
vāk‌siddhiḥ kāmarūpatvamadṛśyatvaṃ tato bhavet|| 3.61 ||
malamūtravilepena lohādeḥ svarṇatā bhavet|
khe gatistasya jāyeta pañcatābhyāsayogataḥ|| 3.62 ||
tadā buddhimatā bhāvyaṃ yogino yogasiddhaye|
ete vighnā mahāsiddherna rametteṣu buddhimān|| 3.63 ||
na darśayet svasāmarthyaṃ yasya kasyāpi yogirāṭ|
yathā mūḍho yathā mūrkho yathā badhira eva ca|| 3.64 ||
tathā varteta lokasya svasāmarthyasya guptaye|
śiṣyāśca svasvakāryeṣu prārthayanti na saṃśayaḥ|| 3.65 ||
tattatkāryeṣu saktaḥ syādabhyāso vismṛto bhavet|
avismṛtya gurorvākyamabhyasettadaharniśam|| 3.66 ||
evaṃ bhaved ghaṭāvasthā saṃtatābhyāsayogataḥ|
anabhyāsavatastasya vṛthā goṣṭhyā na sidhyati|| 3.67 ||
tasmāt sarvaprayatnena yogameva sadābhyaset|
tataḥ paricayāvasthā jāyate'bhyāsayogataḥ|| 3.68 ||
vāyuḥ paricito yatnādbhāvayitvā tu kuṇḍalīm|
agninā ca suṣumnāyāṃ praviśedanirodhataḥ|| 3.69 ||
vāyunā saha cittaṃ ca praviśecca mahāpadam|
yasya cittaṃ svapavanaḥ suṣumnāṃ praviśediha|| 3.70 ||
bhūmirāpo'nalo vāyurākāśaṃ ceti pañcakam|
eṣu pañcasu dehānāṃ dhāraṇaṃ pañcadhocyate|| 3.71 ||
ā pādājjānuparyantaṃ pṛthivīsthānamucyate|
pṛthivī caturaśraṃ ca pītavarṇaṃ lavarṇakam|| 3.72 ||
pārthive vāyumāropya lakāreṇa samanvitam|
dhyāyaṃścaturmukhākāraṃ caturvaktraṃ hiraṇmayam|| 3.73 ||
dhārayet pañca ghaṭikāḥ pṛthivījayamāpnuyāt|
pṛthivīyogato mṛtyurna bhavettasya yoginaḥ|| 3.74 ||
ā jānoḥ pāyuparyantamapāṃ sthānamudāhṛtam|
[āpo'rdhacandraṃ śuklaṃ ca vaṃ bījaṃ parikīrtitam|| 3.75 ||]
vāruṇe vāyumāropya vakāreṇa samanvitam|
smarannārāyaṇaṃ devaṃ caturbāhuṃ kirīṭinam|| 3.76 ||
nīlameghanibhaṃ śāntaṃ pītavāsasamacyutam|
dhārayet pañca ghaṭikāḥ sarvapāpaiḥ pramucyate|| 3.77 ||
tato jalād bhayaṃ nāsti jale mṛtyurna vidyate|
ā pāyorhṛdayāntaṃ ca vahnisthānaṃ prakīrtitam|| 3.78 ||
vahnistrikoṇaṃ raktaṃ ca rephākṣarasamanvitam|
saṃkarṣaṇaṃ caturbāhuṃ balajñānaguṇānavitam|| 3.79 ||
śaṅkhacakragadāpāṇiṃ suprasannamanusmaran|
dhārayet pañca ghaṭikāḥ vahnināsau na dahyate|| 3.80 ||
tanmaṇḍalaṃ praviṣṭasya nāgnirdahati vai tanum|
hṛdayādābhruvormadhyaṃ vāyusthānaṃ prakīrtitam|| 3.81 ||
vāyuḥ ṣaṭkoṇakaṃ kṛṣṇaṃ yakārākṣarabhāsuram|
vāyoḥ sthāne brahmarūpamaniruddhaṃ caturbhujam|| 3.82 ||
dhārayet pañca ghaṭikā vāyuvad vyomago bhavet|
vāyorbhayaṃ tathā mṛtyurna bhavedyogino rame|| 3.83 ||
ā bhrūmadhyāttu mūrdhāntamākāśasthānamucyate|
vyomavṛttaṃ ca dhūmraṃ ca hakārākṣaradīptimt|| 3.84 ||
ākāśe vāyumāropya vāsudevaṃ caturbhujam|
śuddhasphaṭikasaṃkāśaṃ śaṅkhacakragadādharam|| 3.85 ||
ramāpatiṃ caturbāhuṃ ṣāḍguṇyaparikarmitam|
ākāśe dhāraṇāttasya khecaratvaṃ bhaved dhruvam|| 3.86 ||
yatra kutra sthito vāpi sukhamatyantamaśnute|
evaṃ ca dhāraṇāḥ pañca kuryādyogī vicakṣaṇaḥ|| 3.87 ||
tato dṛḍhaśarīraḥ syānmṛtyustasya na vidyate|
brahmaṇaḥ pralaye cāpi na naśyati sa yogirāṭ|| 3.88 ||
samabhyased tathā yogaṃ ghaṭikāḥ (8)ṣaṣṭhimeva ca|
vāyuṃ nirudhya cākāśe devatāmiṣṭadāmiti|| 3.89 ||
(8.gra. ṣaṣṭhīṃ)
evaṃ pratidinaṃ kurvan kāmakrodhavivarjitaḥ|
bhagavantaṃ vāsudevaṃ toṣayed yogisattamaḥ|| 3.90 ||
abhikāṅkṣati devādiśarīraṃ sukhalipsayā|
taccharīramavāpnoti tatra tatrāpi modate|| 3.91 ||
aṇimādiguṇecchā cet smaraṇenaiva jāyate|
evaṃ bahuvidhā yogā yoginaśceṣṭa(9)sādhanam|| 3.92 ||
(9.gra. sādhanāḥ)
yoge pravartamānasya śarīrakleśasaṃbhavāḥ|
buddhikleśaśca bahudhā jāyate nātra saṃśayaḥ|| 3.93 ||
mokṣaṃ yadā prārthayate tadā māṃ manasā smaran|
(10)mūrdhnyādhāyātmanaḥ prāṇamāsthito yogadhāraṇām|| 3.94 ||
(10.bhagavadgītā, 8.12)
brahmarandhreṇa visṛjet dīrtvā ca virajāṃ nadīm|
mallokaṃ samanuprāpya madrūpaṃ pratipadyate|| 3.95 ||
sūribhiḥ saha modena nityaṃ maddarśanād budhaḥ|

|| iti śrīśrīpraśnasaṃhitāyāṃ tṛtīyo'dhyāyaḥ ||