Chapter 41

|| ekacatvāriṃśo'dhyāyaḥ ||

lakṣmīstvaṃ śṛṇu vakṣyāmi kṛṣṇajanmamahotsavam|
nakṣatraṃ tithivāraṃ ca yogaṃ karaṇameva ca|| 41.1 ||
pakṣamāsau vatsaraṃ ca yadāvataradacyutaḥ|
dvāparasya kaleḥ saṃdhau śubhakṛdvātsare śubhe|| 41.2 ||
siṃhamāse kṛṣṇapakṣe tvaṣṭamyāṃ rohiṇīyute|
harṣakaulavasaṃyukte budhavāre śubhe dine|| 41.3 ||
kanyāṃ gate budhe śukre lagnage ca bṛhaspatau|
makare bhūmipūtre ca tulāyāṃ ca śanau sthite|| 41.4 ||
kaṭake ca sthite rāhau ketau ca makare sthite|
vṛṣabhe tu mṛgāṅke ca āditye siṃhage sati|| 41.5 ||
niśīthe vṛṣabhe lagne sarvalokahito hariḥ|
vasudevasya devakyāṃ jātaḥ kṛṣṇo bhṛgadbhave|| 41.6 ||
tatkāle tu viśeṣeṇa kṛṣṇarūpi janārdanaḥ|
pūjanīyo dīkṣitena bhāṭṭācāryeṇa bhārgavi|| 41.7 ||
tadvidhānaṃ pravakṣyāmi sāyāhne deśikottamaḥ|
snātvā saṃdhyādikaṃ karma kṛtvā garbhagṛhaṃ vrajet|| 41.8 ||
nityapūjādikaṃ sṛtvā mūlārcāṃ prārthayet tataḥ|
śaṅkhacakragadāśārṅgin tūṇakhaṭgadhara prabho|| 41.9 ||
vāsudeva jagadyone sṛṣṭisthityantakāraka|
avātaraḥ pūrvakāle yo hariḥ kṛṣṇarūpadhṛt|| 41.10 ||
tasyotsavasya te kālo jayantyākhyasya vai hare|
tamutsavaṃ kartumicchan prārthaye surasattama|| 41.11 ||
bhaktavatsala bhaktānāṃ prītaye kṛṣṇavigrahe|
saṃnidhatsva ciraṃ deva yāvat pūjāvasānakm|| 41.12 ||
iti saṃprārthya deveśaṃ kṛṣṇe śaktiṃ niyojayet|
yānamāropya taṃ kṛṣṇaṃ prāsādapurato bhuvi|| 41.13 ||
kalpite maṇḍapasyātha ratnasiṃhāsane rame|
sthāpayitvā ca kṛṣṇārcāṃ dvārapūjāmataścaret|| 41.14 ||
kṛṣṇasya purato bhūmau dhānyapīṭhaṃ prakalpayet|
kumbhān saṃsthāpya vidhivat pratiṣṭhāpya hutāśanam|| 41.15 ||
madhyakumbhe kṛṣṇamūrtiṃ karake ca sudarśanam|
prācyādi ca kumbheṣu vāsudevādikān yajet|| 41.16 ||
vahnyādiṣu ca koṇeṣu puruṣādīn yajedrame|
cakrābjamaṇḍalaṃ vedyāṃ kalpayitvā yathāvidhi|| 41.17 ||
kṛṣṇaṃ yajet karṇikāyāṃ dvādaśeṣu daleṣvapi|
keśavādīn samāvāhya pūrvādiṣu yatākramam|| 41.18 ||
parivāragaṇān devān maṇḍale pūrvavadyajet|
āsanasthaṃ kṛṣṇabimbamaṅganyāsādipūrvakam|| 41.19 ||
abhyarcyārghyapādyādyaiḥ snāpayet snānaviṣṭare|
saṃsnāpya vidhivat kṛṣṇaṃ pañcaviṃśatibhirghaṭaiḥ|| 41.20 ||
alaṃkārāsanaṃ nītvā kirīṭādivibhūṣaṇaiḥ|
alaṃkṛtyāravindākṣaṃ tato bhojanaviṣṭare|| 41.21 ||
nītvā lakṣmīpatiṃ devaṃ bhakṣyapānīyasaṃmitam|
caturvidhaṃ cānnarāśiṃ śaṣkulīṃ phalamiśritām|| 41.22 ||
nivedya pascādācāryaḥ pīṭhamagnau tu saṃsṛjet|
tanmadhye kṛṣṇamāvāhya sakalīkṛtya mantravit|| 41.23 ||
mātrāsanādibhojyāntaṃ sarpiṣā juhuyāttataḥ|
caturvidhānnaṃ bhakṣyādi juhuyājjvalite'nale|| 41.24 ||
kṛtvā sapta samiddhomaṃ tataḥ pūrṇāhutiṃ caret|
ācāryaḥ kṛṣṇarūpāya kṛtvā homasamarpaṇam|| 41.25 ||
arghyadānaṃ viśeṣeṇa kuryāt sarvaphalapradam|
kṛṣṇasya purato bhūmau piṣṭenālipya padmavat|| 41.26 ||
aṣṭabhiśca dalairyuktaṃ madhye vipulakarṇikam|
tasmin kṛṣṇaṃ samāvāhya delaṣvaṣṭasu vai kramāt|| 41.27 ||
vasudevaṃ devakīṃ ca nandagopaṃ tataḥ param|
yaśodāṃ rohiṇīṃ caiva balabhadraṃ niśākaram|| 41.28 ||
subhadraṃ pūjayed devi parivārānivābjaje|
hastābhyāṃ śaṅkhamādāya gokṣīreṇābhipūritam|| 41.29 ||
jānubhyāmavanau sthitvā yadvā tiṣṭhan gurūttamaḥ|
jagaddhitāvatīrṇāya kṛṣṇāyārghyaṃ nivedayet|| 41.30 ||
jātaḥ kesavadhārthāya bhūbhāroddharaṇāya ca|
pāṇḍavānāṃ hitārthāya dharmasaṃrakṣaṇāya ca|| 41.31 ||
kauravāṇāṃ vināśāya daityānāṃ nidhanāya ca|
gṛhāṇārghyaṃ mayā dattaṃ devakyā sahito hare|| 41.32 ||
yajamāno'pyarghyadānamevaṃ dadyājjagatpateḥ|
tataḥ piṣṭābjamadhyasthaṃ kṛṣṇaṃ bimbe niyojayet|| 41.33 ||
tato ratnamayīṃ ḍolāṃ puṣpādibiralaṃkṛtām|
suvarṇaśṛṅkhalālambāṃ kiṃkaṇībhirvirājitām|| 41.34 ||
vitānakṣaumasaṃvītāṃ muktājālavibhūṣitām|
kuṃkumādyairmṛgamadaiścandanaiścādhivāsitām|| 41.35 ||
gāndhikairvastubhirdhūpairdhūpitāṃ sarvato rame|
kṣaumāstaraṇasaṃvītāṃ tūlikāstaraṇāmapi|| 41.36 ||
evaṃ kṛtvā tatastasyāṃ śeṣamāvāhayed guruḥ|
śāyayitvā kṛṣṇamūrtiṃ paṭaṃ cāpanayet tataḥ|| 41.37 ||
ḍolāgānairnṛttavādyaistoṣayet kṛṣṇamabjaje|
gāthāśca vaiṣṇavīścānyā gāyeyurvaiṣṇavottamāḥ|| 41.38 ||
pāñcarātravido viprāsstuvīraṃstatkṛtaiḥ stavaiḥ|
paṭheyuragre devasya sarvamanyacca maṅgalam|| 41.39 ||
arghyādibhistato'bhyarcya nīrājanasamanvitam|
madhuparkaṃ nivedyātha navanītaṃ ca śarkarām|| 41.40 ||
sitaśarkarayā yuktaṃ gokṣīraṃ pṛthukaṃ tathā|
vividhāni ca bhakṣyāṇi goghṛtaiḥ pācitāni ca|| 41.41 ||
kramādaṣṭavidhānnāni śarkarādyairyutāni ca|
nivedya devadevāya nīrājanamathācaret|| 41.42 ||
mukhavāsasamopetaṃ tāmbūlaṃ vinivedayet|
kṛtvā japaṃ yathāśakti bhagavatsaṃnidhau guruḥ|| 41.43 ||
kumbhamaṇḍalavahnisthaṃ devaṃ bimbe niyojayet|
dvāratoraṇakumbhasthān hareḥ pīṭhe tathaiva ca|| 41.44 ||
niveditānnabhakṣyādi caturdhā vibhajet tataḥ|
ācāryaḥ svayamādadyādekāṃśamaparaistribhiḥ|| 41.45 ||
mūrtipān vaiṣṇavānanyān grāhayet paricārakaiḥ|
garbhagehaṃ tato nītvā kṛṣṇamūrtiṃ sanātanam|| 41.46 ||
tadbimbācchaktimudvāsya mūle tāṃ viniyojayet|
tataḥ praṇamya deveśaṃ kṛtāñjalipuṭo guruḥ|| 41.47 ||
pītāmbara jaganmūrte jayantyutsavamadya te|
akārṣaṃ tatra śāstrīyaṃ śāstramārgāt cyutaṃ tu vā|| 41.48 ||
vettuṃ samartho nābhūvaṃ tatra śāstrapathaścyutim|
bhaktasya tava me deva kṣantumarhasi māmikām|| 41.49 ||
iti vijñāpya deveśaṃ śiṣṭāṃ pūjāṃ samāpayet|
mumukṣūṇāmakāmānāmutsavānte tu pāraṇam|| 41.50 ||
putrādiphalakāmānāṃ prātareva hi pāraṇam|
tataḥ prabhāte tvācāryaḥ kṛtasnānaḥ kṛtāhnikaḥ|| 41.51 ||
garbhagehaṃ praviśyātha devaṃ saṃbodhya vai rame|
homāntamutsavāntaṃ vā prāpaṇāntamathāpi vā|| 41.52 ||
nityārcanāṃ samāpyātha devamutsavakāmyayā|
āvāhanapadaṃ pātraṃ hastābhyāṃ dhārayan guruḥ|| 41.53 ||
devadeva jagannātha sarvalokapriyaṃkara|
śikyotsavārthaṃ bimbe'smin saṃnidhatsva śriyaḥpate|| 41.54 ||
iti saṃprārthya deveśaṃ karmārcāyāṃ jagad‌gurum|
āvāhya tasmādānīya deveśaṃ nṛttamaṇḍapam|| 41.55 ||
pūjayitvā tato yānamāropya harimavyayam|
vastrabhūṣaṇamālyaiśca bhūṣayitvā gurūttamaḥ|| 41.56 ||
gopurasya purobhāge catuḥstambhasamanvitam|
citravastravitānāḍhyaṃ phalapallavaśobhitam|| 41.57 ||
madhyalambikṣīraghaṭaṃ dadhibhāṇḍoparisthitam|
haridrājalasaṃyuktaṃ maṇḍapaṃ parikalpayet|| 41.58 ||
evaṃ vīthīṣu sarvatra kalpayenmaṇḍapān bahūn|
tatastu devadeveśaṃ nayedvīthīṣu sarvataḥ|| 41.59 ||
tūryaghoṣairnṛttagītavedagoṣapuraḥsaram|
anyairmaṅgalavādyaiśca maṇḍapasya puro nayet|| 41.60 ||
tato gopālabālānāṃ daṇḍaṃ datvā niyojayet|
te daṇḍaiḥ śikyabhāṇḍāni tāḍayeyurhareḥ priyāḥ|| 41.61 ||
tāḍitebhyaśca bhāṇḍebhyo dadhikṣīrāṇi bālakāḥ|
pibeyurnavanītāni rūṣayeyurdadhīnyapi|| 41.62 ||
yantraiḥ kṣipeyuḥ sarvatra haridrājalasecanam|
evaṃ vīthīṣu sarvāsu kuryurgopālabālakāḥ|| 41.63 ||
gopyaśca navanītāni kṣipeyuḥ kṛṣṇavigrahe|
itthaṃ vīthīṣu paritaḥ prādakṣiṇyena vai harim|| 41.64 ||
bhrāmayitvā tato devamālayāntarnayed‌guruḥ|
balipīṭhasya purato devamarghyādinā yajan|| 41.65 ||
ghaṭadīpaṃ pradarśyātha garbhagehaṃ nayet tataḥ|
mūle śaktiṃ niyojyātha devaṃ saṃśamayeddharim|| 41.66 ||
yanmayānuṣṭhito deva śikyotsava iti smṛtaḥ|
tasminnajñānatastyaktaṃ kṣantumarhasi mādhava|| 41.67 ||
iti vijñāpya deveśaṃ śayanāntaṃ ca pūjayet|
jayantyāmitthamārādhya sarvakāmānavāpnuyāt|| 41.68 ||
atra kiṃcidviśeṣo'sti vadāmi kamalekṣaṇe|
viddhādidoṣe saṃprāpte bhidyate bahudhotsavaḥ|| 41.69 ||
aṣṭamī rohiṇī pūrṇā budhavāreṇa saṃyutā|
tābhyāṃ tu vṛṣabhe lagne bṛhaspatyudite tathā|| 41.70 ||
uttamaṃ pūjanaṃ tasyāṃ kṛṣṇarūpasya vai hareḥ|
budhavāraviyuktā sā madhyamā tu prakīrtitā|| 41.71 ||
saṃpūrṇā rohiṇī yasyāmaṣṭamī kalayā yutā|
saṃpūrṇāyāṃ tatāṣṭamyāṃ rohiṇīkalayā yutā|| 41.72 ||
pūjanaṃ tattithau kāryaṃ mahatpātakanāśanam|
kṛttikākalayā vāpi saptamīkalayāpi vā|| 41.73 ||
yuktāṣṭamī tu na grāhyā tasyāṃ pūjā tu niṣphalā|
aṣṭamīrahitā vāpi rohiṇīrahitāpi vā|| 41.74 ||
tārakāyāṃ tathā tithyāṃ pratyekaṃ votsavaṃ caret|
kṛttikākalayā yuktā saptamīkalayā yutā|| 41.75 ||
aṣṭamyāṃ vāpi rohiṇyāṃ pūjanaṃ niṣphalaṃ bhavet|
evaṃ sarvaṃ samālokya māṃ pūjayati yo rame|| 41.76 ||
bhogānapyuttamānatra hyanubhūya tathāntime|
modate sa tu malloke nityasūrigaṇaiḥ saha|| 41.77 ||

|| iti śrīśrīpraśnasaṃhitāyāṃ (1)catvāriṃśo'dhyāyaḥ ||
(1.`ekacatvāriṃśo'dhyāya' iti bhāvyam|
     `mahotsave' dvicatvāriṃśo'dhyāya iti gra. pustake dṛśyate|)