Chapter 40

|| catvāriṃśo'dhyāyaḥ ||

atha lakṣmīḥ pravakṣyāmi jyeṣṭhasnapanamutsavam|
mithunajyeṣṭhaṛkṣe vā paurṇamāsyāmathāpi vā|| 40.1 ||
kaṭake śuklapakṣasya hyekādaśyāmathāpi vā|
nakṣatreṇa viyuktāyāṃ yuktāyāmapi vai rame|| 40.2 ||
avaśyamabhiṣekaḥ syādekādaśyāṃ harestithau|
nityārcanaṃ purā kṛtvā tataḥ saṃprārthayeddharim|| 40.3 ||
bhagavan puṇḍarīkākṣa lakṣmīkantā dayānidhe|
mahābhiṣekaṃ bhavataḥ kartuṃ saṃprārthayāmyaham|| 40.4 ||
anugṛhṇātu matpūjāṃ karmārcāyāṃ praviśya ca|
iti saṃprārthya deveśaṃ mūlāt saṃprārthya karmaṇi|| 40.5 ||
bahirmaṇḍapamānīya karmabimbaṃ tu deśikaḥ|
purā kavacamuddhāṭya harestasya puro rame|| 40.6 ||
ekāśītighaṭān sthāpya teṣu kumbheṣu deśikaḥ|
ghṛtādisarvavastūni tattanmantraistu pūrayet|| 40.7 ||
aṅkurānarpayet pūrvaṃ kautukaṃ cāpi bandhayet|
dvāratoraṇakumbhādipūjāṃ kṛtvā yathāvidhi|| 40.8 ||
abhiṣekaṃ mantrayuktaṃ kuryād bhagavatota hareḥ|
śrībhūmivīralakṣmībiḥ saṃmitasya gurūttamaḥ|| 40.9 ||
nivedya bhakṣyabhojyādi bhaktebhyo dāpayetkramāt|
śilpinā kavacaṃ śuddhaṃ kṛtvā saṃprokṣyaṃ deśikaḥ|| 40.10 ||
navabhiḥ kalaśaistoyaiḥ pañcagavyena padmaje|
niyojya kavacaṃ bimbe pūrvavattadanantaram|| 40.11 ||
vastrādibhiralaṃkṛtya prāpaṇāntaṃ ca pūjayet|
garbhagehamathānāyya sthāpayet siṃhaviṣṭare|| 40.12 ||
mūle niyojayecchakitaṃ prārthayeddharimavyayam|
jyeṣṭhatārābhiṣeko'yaṃ tvatpriyārthaṃ mayā kṛtam|| 40.13 ||
yatkiṃcid viparītaṃ cet tatra tatkṣantumarhasi|
iti vijñāpya lakṣmīśaṃ kuryānnityārcanaṃ hare|| 40.14 ||
śṛṇu vakṣyāmyahaṃ sādhvi śayyotsavamatho hareḥ|
āṣāḍhyāṃ śuklapakṣasya dvādaśyāṃ śayanotsavam|| 40.15 ||
mama prītikaraṃ kuryāt sarvalokasukhāvaham|
garbhagehapurobhāge yadvā garbhagṛhe rame|| 40.16 ||
suvarṇaśṛṅkhalābhiśca saṃbaddhamupari sthale|
tūlikāstaraṇopetaṃ navaratnavicitritam|| 40.17 ||
muktājālābhirābaddhaṃ vāsitaṃ gandhavastubhiḥ|
vitānakṣaumasaṃvītaṃ puṣpamālyairalaṃkṛtam|| 40.18 ||
gandhatailairghṛtairvāpi pūritairjvalitairapi|
anirvāṇairdīpavaraiścaturbhiḥ śobhitaṃ rame|| 40.19 ||
evaṃ śayanamākalpya prokṣayet puṇyavāriṇā|
ḍolotsave tu ḍolāyāṃ pūjitāyāstu devatāḥ|| 40.20 ||
śayane'pi ca tā devāḥ pūjayed deśikottamaḥ|
niśāmukhe pravṛtte tu yātrāntaṃ pūjayed vibhum|| 40.21 ||
tato mūlasya purataḥ sthitvācāryaḥ kṛtāñjaliḥ|
bhagavan yoganidrāyāḥ kālo'yaṃ samupāgataḥ|| 40.22 ||
tasmādutthānaparyantaṃ bimbe'smin saṃnidhiṃ kuru|
iti saṃprārthya deveśaṃ mūlācchayanakautuke|| 40.23 ||
āvāhayed bimbahīne kūrce saṃprārthayeddharim|
saṃsnāpya navabhiḥ kumbhaiścatuḥsthānaṃ ca pūjayet|| 40.24 ||
vahnimaṇḍalakumbhasthaṃ devaṃ bimbe niyojayet|
mahākumbhajalenaiva prokṣayet svāpavigraham|| 40.25 ||
tato mūlādidevānāṃ havirantaṃ ca pūjayet|
sāyayitvā tu paryaṅke śrībhūmisahitaṃ vibhum|| 40.26 ||
śrībhūmirahite bimbe kūrcayoste tu pūjayet|
saṃkalpya caturo māsān pakṣāṃścatura eva vā|| 40.27 ||
śayanasthaṃ devadevaṃ pratyahaṃ śayanārthakaiḥ|
dravyaiḥ saṃpūjayed vidvān bhaktitanmreṇa cetasā|| 40.28 ||
nityaṃ naimittikaṃ kāmyamutsavaṃ nācarettadā|
kṛṣṇajanmotsavaṃ kuryāt tasmin kāle'pi deśikaḥ|| 40.29 ||
nāsti kālāntaraṃ tasya tasmāt tatraiva kārayet|
bhādrapadyāstu śuklasya dvādaśyāṃ parivartanam|| 40.30 ||
utsavaṃ prātarārabhya viśeṣayajanādikam|
kuryād devasya rātryantamṛtvigbhiḥ saha deśikaḥ|| 40.31 ||
yadi pakṣacatuṣkeṇa kuryācchayanamaṃgalam|
[yadi pakṣatraye kuryādutsavaṃ śayanaṃ rame|]
parivartanaṃ tadā na syādutthānaṃ māsi kārtike|| 40.32 ||
tadā tu śuklapakṣasya dvādaśyāmaruṇodaye|
kṣīrābdhitaṭamāsādya puṣkaradvīpavāsinaḥ|| 40.33 ||
divyadraviḍagāthābhiḥ rāgatālasvarānvitaiḥ|
gāyanti kecidapare sāmabhistoṣayanti ca|| 40.34 ||
brahmarudrādidevāśca devāntairbodhayantyamum|
bhaktaiḥ kṛtena tenāhaṃ toṣayāmyamṛtodbhave|| 40.35 ||
mayi tuṣṭe jagattuṣṭaṃ bhavedatra na saṃśayaḥ|
tamutsavaṃ mama prītyai yajamānena deśikaḥ|| 40.36 ||
ekādaśyāṃ kārtikasya śuklapakṣe jagaddhite|
upoṣya bhajanaṃ kuryāt bhaktairbhāgavataiḥ saha|| 40.37 ||
mārgaśīrṣaṃ tu devānāmudayaḥ parikīrtitaḥ|
tatpūrvaḥ kārtiko māsa uṣaḥkālaḥ prakīrtitaḥ|| 40.38 ||
snānādiniyamān brāhme kṛtvā bhāgavataissaha|
tasmin stavīti yo devaṃ hariṃ sarvaphalapradam|| 40.39 ||
mahāpātakayukto'pi sa tu mokṣaṃ vrajed rame|
tatprakāraṃ pravakṣyāmi śṛṇṛtvaṃ kamalodbhave|| 40.40 ||
praviśya bhagavadgehaṃ caturvedaistathā guruḥ|
ekāyanaiśca gāthābhiḥ stutvā pannagaśāyinam|| 40.41 ||
gānairnṛttairvādyabhedairvāsudevaṃ prabodhayet|
yojayecchayanācchaktiṃ dhruvamūrtyāṃ tato guruḥ|| 40.42 ||
darśayed darpaṇaṃ pūrṇakumbhaṃ dantāvalaṃ tathā|
gavāṃ pṛṣṭhaṃ vājimukhaṃ kanyāṃ sarvāṅgasobhanām|| 40.43 ||
devamarghyādinābhyārya kṣīraṃ ca sitaśarkarām|
nivedayecca dadhyannaṃ nīrājanamataḥ param|| 40.44 ||
homāntaṃ nityapūjāṃ ca kṛtvā saṃprārthayeddharim|
tvaddarśanaṃ pratīkṣanto brahmādyā devatāgaṇāḥ|| 40.45 ||
apsarobhiśca gandharvā nṛtyante nṛtyamaṇḍape|
ṛgyajuḥsāmabhirvedaiḥ stuvanti tvāṃ dvijottamāḥ|| 40.46 ||
teṣāmanugrahaṃ kartuṃ bimbe'smin saṃnidhiṃ kuru|
ityāvāhya ca deveśaṃ nayennṛttākhyamaṇḍapam|| 40.47 ||
saṃsthāpya devamarghyādyaiḥ pūjayet puṣkarekṣaṇam|
caturvidhānnabhakṣyāṇi nivedya ca tataḥ param|| 40.48 ||
paurāṇikaṃ samāhūya deśikaḥ pāñcarātravit|
paurāṇikena daityārikaiṃkaryāṇāṃ phalāni ca|| 40.49 ||
apacāraṃ kṛtavatāṃ duḥkhadāni phalānyapi|
vācayitvā dhanaistaṃ tu toṣayet kamalekṣaṇe|| 40.50 ||
nivedya bhakṣyabhojyāni vaiṣṇavebhyaḥ pradāpayet|
prāsādaṃ devamānīya mūle śaktiṃ niyojayet|| 40.51 ||
tava saṃprītaye viṣṇo utthānotsavasaṃjñitam|
ārādhanaṃ gṛhāṇa tvaṃ yathānuṣṭhitamacyuta|| 40.52 ||
iti vijñāpya deveśaṃ kautukaṃ tu visarjayet|

iti śrīśrīpraśnasaṃhitāyāṃ (1)ekonacatvāriṃśo'dhyāyaḥ ||
(1.mātṛkārītyā catvāriṃśo'dhyāya iti bhāvyam|
     `ekacatvāriṃśo'dhyāya' iti gra. pustake dṛśyate|)