Chapter 114

[English text for this chapter is available]

rāma uvāca |
ka eṣa dṛśyate vyomni sarvābharaṇabhūṣitaḥ |
vimānastho mahādīpta madhyāhnārka ivāparaḥ || 1 ||
[Analyze grammar]

duṣprekṣyaḥ sarvamartyānāṃ tasyāṃke cāruhāsinī |
aparā śrīriva brahmaṃstathā paṃcasuyoṣitaḥ || 2 ||
[Analyze grammar]

gāyaṃti madhurāṃ gītiṃ subhrūbhaṃganirīkṣaṇaiḥ |
maṃdasmitaiḥ karatalaśabdāsphoṭikayā tathā || 3 ||
[Analyze grammar]

kvacidgalakṛtairgītairanyonya karatāḍanaiḥ |
anyonya mukhamālokya pralobhairgītapūrvakaiḥ || 4 ||
[Analyze grammar]

krīḍannāste mahāyogī padmakiṃjalkasannibhaḥ |
evaṃ caritapuṇyena kena vā tadvadasva me || 5 ||
[Analyze grammar]

śaṃbhuruvāca |
eṣa vipraḥ purā rāma sarvasaṃpatsamanvitaḥ |
nānāvidhasukhopeto bhāryyāpoṣaṇatatparaḥ || 6 ||
[Analyze grammar]

aputro dānahīnaśca devatārcanavarjitaḥ |
paṃcayajñavihīnaśca svādhyāyaparivarjitaḥ || 7 ||
[Analyze grammar]

prātarmmadhyāhnasāyāhnabhojanapravaṇo'śuciḥ |
kadācidagamadgehaṃ gautamasya mahātmanaḥ || 8 ||
[Analyze grammar]

tryaṃbakasya girau puṇye nānāmunigaṇāśrite |
tatrāpi śobhitagṛhaṃ sphaṭikastaṃbhakalpitam || 9 ||
[Analyze grammar]

agurudravakastūrīcaṃdra kuṃkumacarcitā |
bhittiryasya ca saṃtānakusumāmodasauṣṭhavam || 10 ||
[Analyze grammar]

kastūrikā puṣparasa samutsecitabhūtalam |
sūkṣma suśvetavividhavitānapariśobhitam || 11 ||
[Analyze grammar]

aṃgaṇaṃ śobhita mahākadalīpūgaśobhitam |
samīpasarasījāta maṃjukūjanmadhuvratam || 12 ||
[Analyze grammar]

pāṭīratarusaṃbhūta gaṃdhapūritadiṅmukham |
śikṣāgītakṛtālhāda gītapūritadiṅmukham || 13 ||
[Analyze grammar]

nidāghajanitātāpa nāśayaṃtravinirmitam |
kadalīdalasaṃcchādi pāvakākalpitacchadam || 14 ||
[Analyze grammar]

pāṭīratarususnigdha sāṃdra dvārakapāṭakam |
saugaṃdhikamahāmodi kalpitāṃtara bhittikam || 15 ||
[Analyze grammar]

īśānabhāgasubhaga ratikalpita vedikam |
hāṭikākalpitapadaṃ vicitravedikāyutam || 16 ||
[Analyze grammar]

susnigdhani biḍacchāyaṃ vaṭamūlopakalpitam |
prasūnakadalīkhaṃḍa sarobhiḥ prāṃtaśobhitam || 17 ||
[Analyze grammar]

mahāvaṭāgrasaṃlagna tuṣāritapayodharam |
nākopavanasaṃpanna vicitrārāma śobhitam || 18 ||
[Analyze grammar]

vāpīkūpataḍāgādyamanekavanaśobhitam |
maṃdaṃ maṃdaṃ vavau vāyuryatra gehe sukhapradaḥ || 19 ||
[Analyze grammar]

vādinyaścārusarvāṃgyo vādyāni smarasaṃpadaḥ |
vīṇāṃ veṇuṃ triveṇuṃ ca vādayaṃti varāṃganāḥ || 20 ||
[Analyze grammar]

tauryyatrikakṛto nāryyaścaturdikṣu tathorddhvataḥ |
suvarṇādikapātreṣu vaṭakā bhasmanaḥ śubhāḥ || 21 ||
[Analyze grammar]

vāsitāḥ sarvagaṃdhaiśca sudhūpairapi dhūpitāḥ |
kuśagrathitasaṃghāśca akṣamālāśca koṭiśaḥ || 22 ||
[Analyze grammar]

kṛṣṇājinasahasrāṇi bahiḥ prāṃte sthitāni ca |
etādṛśe gṛhavare devavaṃdyo munīśvaraḥ || 23 ||
[Analyze grammar]

karpūrādīṃśca saṃsthāpya caturdikṣu munīśvaraḥ |
pāṭīrapīṭhe karpūrasiṃhāsanamakalpayat || 24 ||
[Analyze grammar]

sūkṣmaṃ śvetaṃ ca susrigdhamāvṛttaṃ ghanasārakaiḥ |
sugaṃdhavāsitajalaiḥ snāpya kṣīreṇa śaṃkaram || 25 ||
[Analyze grammar]

anyaiśca vaidikairmaṃtraiḥ snāpayitvā sadāśivam |
dārucaṃdropapīṭhe tu vastrapīṭhaṃ nidhāya ca |
pātrikāmagrataḥ sthāpya sthāpayitvā daleṣvamūn || 26 ||
[Analyze grammar]

ekasminnakṣatāḥ pātre anyasminsatilākṣatāḥ |
paṃcagaṃdhakamekasminnanyasminnaṣṭagaṃdhakam || 27 ||
[Analyze grammar]

kāśmīraṃ mṛganābhiṃ tu karpūraṃ caṃdanaṃ tathā |
pātreṣvanyeṣu vinyasya pūjāsthāne prakalpya ca || 28 ||
[Analyze grammar]

nānāvaraṇamārgeṇa pūjā tatra vidhīyate |
liṃgamadhye sthito devaḥ paṃcavaktraḥ sadāśivaḥ || 29 ||
[Analyze grammar]

tasya prāvaraṇaṃ liṃgaṃ śaktistasya vidhīyate |
śakterāvaraṇaṃ viṣṇurviṣṇorāvaraṇaṃ vidhiḥ || 30 ||
[Analyze grammar]

brahmaprāvaraṇaṃ caṃdrastasya sūryastataḥ śrutiḥ |
digdevatāsu tadguptistāsāmāvaraṇaṃ diśaḥ || 31 ||
[Analyze grammar]

diśāmāvaraṇaṃ śaṃbhustasya cāvaraṇaṃ guṇāḥ |
daśaprāvaraṇaṃ hyetacchivaliṃgārcanaṃ śubham || 32 ||
[Analyze grammar]

keṣāṃcinmatametatsyādatha prāvaraṇāṃtaram |
vidyāvaraṇamākhyātaṃ tadumāvaraṇaṃ smṛtam || 33 ||
[Analyze grammar]

viṣṇurāvaraṇaṃ tasyā viṣṇoścāvaraṇaṃ vidhiḥ |
brahmaprāvaraṇaṃcaṃdrastasya bhānurathāvṛtiḥ || 34 ||
[Analyze grammar]

bhānorāvaraṇaṃ ceśa iti ṣoḍhāvṛtiḥ smṛtā |
vidhiṃ vinā samākhyātaṃ paṃcāvaraṇamuttamam || 35 ||
[Analyze grammar]

śaśāṃkaviṣṇuśaktīnāmetadāvaraṇatrayam |
aṃbikāvaraṇaṃ proktamekāvaraṇamuttamam || 36 ||
[Analyze grammar]

athavā lokapālāḥ syurāvṛtiḥ somapūjane |
anāvaraṇamathavā pūjanaṃ śasyate śive || 37 ||
[Analyze grammar]

patrikāṣṭadaleṣveva sthitadravyairyajecchivam |
patrikālakṣaṇaṃ vakṣye sarvakarmopayogitam || 38 ||
[Analyze grammar]

svarṇena rājatenātha tāmreṇātha prakalpitam |
muktāśuktinibhaṃ kuryātpatrikāṣṭadalaṃ śubham || 39 ||
[Analyze grammar]

padmapatrasamānāṣṭakoṇākāraṃ prakalpayet |
palamātraṃ tataḥ śastaṃ nirvṛtaṃ vistṛtaṃ padam || 40 ||
[Analyze grammar]

asthūlamadhyamupari padmākṛtidalāṣṭakam |
athavā śaktimārgeṇa paṃcapatraṃ prakalpayet || 41 ||
[Analyze grammar]

tripatramathavā kuryācchaktibhāve matena ca |
yathā syācchobhanaṃ pātraṃ tathā kuryyādvicakṣaṇaḥ || 42 ||
[Analyze grammar]

śaktyāṃtaritarudrākṣaiḥ kalpitāṣṭaśataiḥ śubhā |
mālopavītaṃ triṃśatyā aṣṭakena prakalpitam || 43 ||
[Analyze grammar]

pragaṃḍayorathaikaikaṃ baddhā tu dve prakoṣṭhayoḥ |
śirasyekā dhṛtā tena kaṃṭhe ca paramarṣiṇā || 44 ||
[Analyze grammar]

rudrākṣaiḥ sphaṭikai ratnaiḥ kalpitā hyakṣamālikā |
vyāghracarmāsanaṃ kṛtvā padmāsanagato muniḥ || 45 ||
[Analyze grammar]

āvāhanāsanaṃ cārghyaṃ pādyaṃ vācamanīyakam |
nirvartya gaṃgāsalilaiḥ snāpayāmāsa śaṃkaram || 46 ||
[Analyze grammar]

aṣṭagaṃdhakasaṃyuktaiḥ puṣpairbakulapāṭalaiḥ |
svarṇabhāṃḍasthitairvastraśodhitairvāsitairdṛḍham || 47 ||
[Analyze grammar]

dvāre tāmrakaṭāhaśca prabaṃdhadroṇinā śubham |
gośṛṃgeṇa viṣāṇena gavayasya tathā kvacit || 48 ||
[Analyze grammar]

dakṣiṇāvartaśaṃkhena ratnapātrairathāpi vā |
svarṇairvā rājatairvāpi tāmraiḥ kāṃsyairathāpi vā || 49 ||
[Analyze grammar]

svarṇaiśca sūkṣmakalaśaiḥ snāpayāmāsa cecchayā |
athavā mṛṇmayaiḥ kuryyātpadmapatrairathāpi vā || 50 ||
[Analyze grammar]

pālāśaiścūtajaṃbvādyaiḥ pātraiḥ saṃsnāpayedvibhum |
snānānāmatha sarveṣāṃ dhārāsnānaṃ viśiṣyate || 51 ||
[Analyze grammar]

namastetyādimaṃtreṇa śatarudriyasaṃjñinā |
śaṃ cetyādyanuvākena śāṃtirūpeṇa ceśvaram || 52 ||
[Analyze grammar]

āvṛtya ca yathāśakti paścādgaṃdhādi vinyaset |
tataśca śobhanaiḥ puṣpaiḥ patrairbilvaiḥ samarcayet || 53 ||
[Analyze grammar]

tulasīmāruvadalaiḥ kalhāraiśca mahotpalaiḥ |
nīlotpalairutpalaiśca śeṣaiśca karavīrakaiḥ || 54 ||
[Analyze grammar]

karṇikāraiḥ sitāṃbhojairaparājitayā tathā |
tilākṣatairakṣataiśca śrīpatraistilamiśrakaiḥ || 55 ||
[Analyze grammar]

evaṃ maheśamīśānaṃ pūjayāmāsa gautamaḥ |
karpūrāgarukastūrī sarjjāgarukacaṃdanaiḥ || 56 ||
[Analyze grammar]

anyaiśca dhūpayāmāsa ṣoḍaśātha pradīpikāḥ |
karpūravarttisaṃyuktā dīpayaṃtroparisthitāḥ || 57 ||
[Analyze grammar]

niveditaṃ maheśāya atha naivedyamuttamam |
supakvaśālipiṣṭānnaṃ bhakṣyaṃ lehyaṃ ca coṣyakam || 58 ||
[Analyze grammar]

madhurādisamopetaṃ paṃcabhakṣyasamanvitam |
anekapakvaśākāḍhyamaneka pakvamiśritam || 59 ||
[Analyze grammar]

pānaṃ viṃśatisaṃyuktaṃ drākṣāraṃbhāphalānvitam |
sūpāṣṭakādisaṃyuktaṃ yuktaṃ mūlaphalādinā || 60 ||
[Analyze grammar]

yathāsaṃbhavasaṃyuktairanyairapyupakalpitam |
agrapuṣpasamopetaṃ naivedyaṃ pradadau muniḥ || 61 ||
[Analyze grammar]

sauvarṇapātrikā nyastanīrājanasahasrakam |
sopahārāya devāya datvā caiva namasya ca || 62 ||
[Analyze grammar]

pūgakhaṃḍānatho ghṛṣṭānpatrāṇi kṣālitāni ca |
apṛṣṭhāgrāṇi suśvetacchadayāvṛtikāni ca || 63 ||
[Analyze grammar]

ghanasārakacūrṇaṃ ca nyastapatratrayaṃ śubham |
sauvarṇapātravinyastamidaṃ tāṃbūlamīśvare || 64 ||
[Analyze grammar]

atha pradakṣiṇaṃ kṛtvā namaskārānanaṃtaram |
aṣṭayoṣāstataḥ prāptāstaṃtrīveṇvādidhārikāḥ || 65 ||
[Analyze grammar]

vicitravādyavādinyaḥ saṃprāptā munisannidhim |
kṣudratālayugaṃ gṛhya svayaṃ gātuṃ pracakrame || 66 ||
[Analyze grammar]

gautame gātumudyukte tānaṃ kuryurathāṃganāḥ |
maṃdaṃ maṃdaṃ ca vādyāni vādayaṃti tathāparāḥ || 67 ||
[Analyze grammar]

madhuraṃ gāyati munau svarāmūrtibhṛtastathā |
prānṛtyaṃta maheśāgre tadadbhutamivābhavat || 68 ||
[Analyze grammar]

etasminnaṃtare prāpto bhagavānnārado muniḥ |
tamāgataṃ gautamopi saṃpūjya praṇipatya ca || 69 ||
[Analyze grammar]

āhacainaṃkṛtārthosminacakaścinmayāsamaḥ |
tavāgamanakṛtyaṃ kiṃ kuta āgamanaṃ tathā || 70 ||
[Analyze grammar]

śrīnārada uvāca |
pātālādāgatosmīha bhuktvā vai bāṇamaṃdire |
āyāsyaṃti mahātmāno bāṇaśukrādayo gṛham || 71 ||
[Analyze grammar]

atha kṣaṇādabhyagācca bāṇaḥ parapuraṃjayaḥ |
viṃśatyakṣauhiṇīyukto gajamāruhya sosuraḥ || 72 ||
[Analyze grammar]

aparaṃ hi gajaṃ śukraḥ prahlādo rathamuttamam |
vṛṣaparvā rathavaraṃ balisturagamuttamam || 73 ||
[Analyze grammar]

āgatānatha tānsarvānājñāya sa tu gautamaḥ |
saśiṣyo nirjagāmātha hyādāyārghyādikaṃ tvarā || 74 ||
[Analyze grammar]

gautamaṃ cāpi te vīkṣyāvaruhya ca gajādikāt |
namaścakruratho daityāstaṃ namaskṛtya bhārgavam || 75 ||
[Analyze grammar]

āliṃgya rākṣasānsarvānpūjayitvā yathāvidhi |
senāyāḥ sanniveśaṃ ca cakāra munipuṃgavaḥ || 76 ||
[Analyze grammar]

pādau prakṣālya śukrasya jalaṃ mūrdhni dhṛtaṃ tathā |
vicitraphalasaṃyuktaṃ dattavānarhaṇaṃ muniḥ || 77 ||
[Analyze grammar]

vāpītaḍāgasarasī snānapūrvakṛta kriyāḥ |
saṃgame vartamāne tu gautamasyāśrame śubhe || 78 ||
[Analyze grammar]

tadgehaṃ tu praviśyātha rākṣasāssapurohitāḥ |
devapūjāprapattiṃ ca cakruḥ sarve dvijālaye || 79 ||
[Analyze grammar]

sadyaḥ prakalpitāyāṃ ca vedyāṃ śukro'yajacchivam |
tasyaiva vāmabhāge tu prahlādoyajadacyutam || 80 ||
[Analyze grammar]

somaṃ ca balirapyevamanye cāsurapuṃgavāḥ |
atha bāṇo'yajaddevamekameva triyaṃbakam || 81 ||
[Analyze grammar]

śukropi bhagavantantamumānāthamapūjayat |
gautamopyatha madhyāhne pūjayāmāsa śaṃkaram || 82 ||
[Analyze grammar]

sarve śuklāṃbaradharā bhasmoddhūlitavigrahāḥ |
sitena bhasmanā kṛtvā sarvasthāne tripuṃḍrakam || 83 ||
[Analyze grammar]

natvā tu bhārgavaṃ sarve bhūtaśuddhiṃ pracakramuḥ |
hṛtpadmamadhye suṣiraṃ tatraiva bhūtapaṃcakam || 84 ||
[Analyze grammar]

teṣāṃ madhye mahākāśamākāśe nirmalānalam |
tanmadhye ca maheśānaṃ dhyāyeddīptimayaṃ śubham || 85 ||
[Analyze grammar]

ajñānasaṃyutaṃ bhūtaṃ śamalaṃ sarvasaṃgatam |
taddehamākāśadīpe pradahejjñānavahninā || 86 ||
[Analyze grammar]

ākāśasyāvṛtaṃ cāhaṃ dagdhvā''kāśamatho dahet |
dagdhvākāśamayo vāyumagnibhūtaṃ tadā dahet || 87 ||
[Analyze grammar]

abbhūtaṃ ca tato dagdhvā pṛthivībhūtameva ca |
tadāśritānguṇāndagdhvā tato dehaṃ pradāhayet || 88 ||
[Analyze grammar]

evaṃ dahitvā bhūtāni dehī tajjñānavahninā |
śikhāmadhyasthitaṃ viṣṇumānaṃdarasanirbharam || 89 ||
[Analyze grammar]

niṣpannacaṃdrakiraṇasaṃkāśakiraṇaṃ śivam |
śivāṃgotpannakiraṇairamṛtadravasaṃyutaiḥ || 90 ||
[Analyze grammar]

suśītalā tato jvālā praśāṃtā candraraśmivat |
prasāritasudhārugbhiḥ sāṃdrībhūtaśca saṃplavaḥ || 91 ||
[Analyze grammar]

krameṇa plāvitaṃ bhūtagrāmaṃ saṃciṃtayetparam || 92 ||
[Analyze grammar]

itthaṃ kṛtvā bhūtaśuddhiṃ kriyārho martyaḥ śuddho jāyate eva śuddhaḥ |
pūjāṃ kartuṃ jāpyakarmmāpi paścāddevadhyāne brahmahatyādi hāniḥ || 93 ||
[Analyze grammar]

evaṃ dhyātvā caṃdradīptiprakāśaṃ dhyānenāropyāśu liṃge śivasya |
sadāśivaṃ dīpamadhye viciṃtya paṃcākṣareṇārcanamavyayaṃ tu || 94 ||
[Analyze grammar]

āvāhanādīnupacārāṃstathāpi kṛtvā snānaṃ pūrvavacchaṃkarasya |
uduṃbaraṃ rājataṃ svarṇapīṭhaṃ vastrādichannaṃ sarvameveha pīṭham || 95 ||
[Analyze grammar]

aṃte kṛtvā budbudānāṃ ca vṛṣṭiṃ pīṭhe pīṭhe nāgamekaṃ purastāt |
kuryātpīṭhe cordhvake nāgayugmaṃ devābhyāśe dakṣiṇe vāmataśca || 96 ||
[Analyze grammar]

japāpuṣpaṃ nāgamadhye nidhāya madhye vastraṃ dvādaśa prātiguṇye |
suśvetena tasya madhye maheśaṃ liṃgākāraṃ pīṭhayuktaṃ prapūjyam || 97 ||
[Analyze grammar]

evaṃ kṛtvā bāṇamukhyā ditīśā dattvā dattvā paṃcagaṃdhāṣṭagaṃdham |
puṣpaiḥ patraiḥ śrī tilairakṣataiśca tilonmiśraiḥ kevalaiśca prapūjya || 98 ||
[Analyze grammar]

dhūpaṃ dattvā vidhivatsaṃprayuktaṃ dīpaṃ dattvā coktamevopahāram |
pūjāśeṣaṃ te samāpyātha sarve gītaṃ nṛtyaṃ tatratatrāpi cakruḥ || 99 ||
[Analyze grammar]

athāsminnaṃtare gautamasyaprāptaḥ śiṣyaḥ śaṃkarātmeti nāmnā || 100 ||
[Analyze grammar]

unmattaveśo digvāsā anekāvṛtimāśritaḥ |
kvaciddvijātipravaraḥ kvaciccaṃḍālasannibhaḥ || 101 ||
[Analyze grammar]

kvacicchūdra samo yogī tāpasaḥ kvacidapyuta |
garjatyutpatate caiva nṛtyati stauti gāyati || 102 ||
[Analyze grammar]

roditi śṛṇute vyaktaṃ patatyuttiṣṭhati kvacit |
śivajñānaikasaṃpannaḥ paramānaṃdanirbharaḥ || 103 ||
[Analyze grammar]

saṃprāpto bhojyavelāyāṃ gautamasyāṃtikaṃ yayau |
bubhuje guruṇā sākaṃ kvaciducchiṣṭameva ca || 104 ||
[Analyze grammar]

kvacillehati tatpātraṃ tūṣṇīmevābhyagātkvacit |
hastaṃ gṛhītvaiva guroḥ svayamevābhunakkvacit || 105 ||
[Analyze grammar]

kvacidgṛhāṃtare mūtraṃ kvacitkardamalepanam |
sarvadā taṃ gururdṛṣṭvā karamālaṃbya maṃdiram || 106 ||
[Analyze grammar]

praveśya svīyapīṭhe tamupaveśyābhyabhojayat |
svayaṃ tadasya pātreṇa bubhuje gautamo muniḥ || 107 ||
[Analyze grammar]

tasya cittaṃ parijñātuṃ kadācidatha suṃdarī |
ahalyā śiṣyamāhūya bhuṃkṣvetyuktvātha sā śubhā || 108 ||
[Analyze grammar]

sauvarṇe bhājane cānnaṃ nidhāya caṣakāṃtare |
pānādikamatho datvā ekasminpāvakaṃ punaḥ || 109 ||
[Analyze grammar]

nidhāyāṃgāranicayaṃ kaṃṭakānāṃ cayaṃ pare |
nidhāya bhuṃkṣva bhuṃkṣveti sa cāpi bubhuje muniḥ || 110 ||
[Analyze grammar]

yathā papau hi pānīyaṃ tathā vahnimapi dvijaḥ |
kaṃṭakānapi bhuktvā sa yathāpūrvamatiṣṭhata || 111 ||
[Analyze grammar]

purā hi munikanyābhirāhūto bhojanāya ca |
dinedine tatpradattaṃ loṣṭhamaṃbu ca gomayam || 112 ||
[Analyze grammar]

kardamaṃ kāṣṭhadaṃḍaṃ ca bhuktvā prītyātha harṣitaḥ |
etādṛśo munirasau caṃḍālasadṛśākṛtiḥ || 113 ||
[Analyze grammar]

sujīrṇopānahau haste gṛhītvā tu tathā kare |
aṃtyajocitabhāṣābhirvṛṣaparvāṇamabhyagāt || 114 ||
[Analyze grammar]

vṛṣaparveśayormadhye digvāsāḥ samatiṣṭhata |
vṛṣaparvā tamajñātvā pīḍayitvā śiro'cchinat || 115 ||
[Analyze grammar]

hate tasmindvijaśreṣṭhe jagadetaccarācaram |
atīva kaluṣamabhavattatrasthā munayastathā || 116 ||
[Analyze grammar]

gautamasya mahāśokaḥ saṃjātaḥ sumahātmanaḥ |
niryayau cakṣuṣorvāri śokaṃ saṃdarśayanniva || 117 ||
[Analyze grammar]

gautamaḥ sarvadaityānāṃ saṃnidhau vākyamuktavān |
kimanena kṛtaṃ pāpaṃ yena cchinnamidaṃ śiraḥ || 118 ||
[Analyze grammar]

mama prāṇādhikasyeha sarvadā śivayoginaḥ |
mamāpi maraṇaṃ satyaṃ śiṣyarūpī yato guruḥ || 119 ||
[Analyze grammar]

śaivānāṃ dharmayuktānāṃ sarvadā śivavartinām |
maraṇaṃ yatra dṛṣṭaṃ syāttatra no maraṇaṃ dhruvam || 120 ||
[Analyze grammar]

śukra uvāca |
enaṃ saṃjīvayiṣyāmi mama gotraṃ śivapriyam |
kimasau mriyate brahmanpaśya me tapaso balam || 121 ||
[Analyze grammar]

iti vādini vipreṃdre gautamo'pi mamāra ha |
tasminmṛte'tha śukro'pi prāṇāṃstatyāja yogataḥ || 122 ||
[Analyze grammar]

tasyāpi hatamājñāya prahlādā ddānaveśvarāḥ |
sarve mṛtāḥ kṣaṇenaiva tadadbhutamivābhavat || 123 ||
[Analyze grammar]

mṛtamāsīdatha balaṃ tasya bāṇasya dhīmataḥ |
ahalyā śokasaṃtaptā rurodoccaiḥ punaḥ punaḥ || 124 ||
[Analyze grammar]

gautamena maheśasya pūjayā pūjito vibhuḥ |
vīrabhadro mahāyogī sarvaṃ dṛṣṭvā cukopa ha || 125 ||
[Analyze grammar]

aho kaṣṭamahokaṣṭaṃ māheśā bahavo mṛtāḥ |
śivaṃ vijñāpayiṣyāmi tenoktaṃ karavāṇyaham || 126 ||
[Analyze grammar]

iti niścitya gatavānmaṃdarācalamavyayam |
namaskṛtvā virūpākṣamidaṃ sarvamathoktavān || 127 ||
[Analyze grammar]

brahma harī sthitau tatra dṛṣṭvā prāha śivo vacaḥ |
madbhaktaiḥ sāhasaṃ karma kṛtaṃ dṛṣṭvā varapradaḥ || 128 ||
[Analyze grammar]

gatvā paśyāmahe viṣṇo yuvāmapyāgamiṣyatha |
atheśo vṛṣamāruhya vāyunā dhūtacāmaraḥ || 129 ||
[Analyze grammar]

naṃdikena suveṣeṇa dhṛte chatreti śobhane |
suśvetahemadaṃḍe ca nānyayoge dhṛte vibhoḥ || 130 ||
[Analyze grammar]

maheśānumatiṃ labdhvā harirnāgāṃtake sthitaḥ |
āraktanīlachatrābhyāṃ śuśubhe lakṣyakaustubhaḥ || 131 ||
[Analyze grammar]

śivānumatyā brahmāpi haṃsārūḍho'bhavattadā |
iṃdragopaprabhākāracchatrābhyāṃ śuśubhe vidhiḥ || 132 ||
[Analyze grammar]

iṃdrādisarvadevāśca svasvavāhanasaṃyutāḥ |
atha te niryayuḥ sarve nānāvādyānumoditāḥ || 133 ||
[Analyze grammar]

koṭikoṭigaṇākīrṇā gautamasyāśramaṃ gatāḥ |
brahmaviṣṇumaheśānā dṛṣṭvā tatparamādbhutam || 134 ||
[Analyze grammar]

svabhaktaṃ jīvayāmāsa vāmakoṇanirīkṣaṇāt |
śaṃkaro gautamaṃ prāha tuṣṭo'haṃ te varaṃ vṛṇu || 135 ||
[Analyze grammar]

gautama uvāca |
yadi prasanno deveśa yadi deyo varo mama |
tvalliṃgārcanasāmarthyaṃ nityamastu maheśvara || 136 ||
[Analyze grammar]

vṛtametanmayā deva śṛṇuṣvaitattrilocana |
mama śiṣyo mahābhāgo heyāheyādivarjitaḥ || 137 ||
[Analyze grammar]

prekṣaṇīyaṃ mamatvena na ca paśyati cakṣuṣā |
na ca ghrāṇena ghrātavyaṃ na dātavyaṃ na cetarat || 138 ||
[Analyze grammar]

iti budghvā tathā kurvansa hi yogī mahāyaśāḥ |
unmattavikṛtākāraḥ śaṃkarātmeti kīrtitaḥ || 139 ||
[Analyze grammar]

na kaścittaṃ pratidviṣyānna ca taṃ hiṃsayediti |
etanme dīyatāṃ deva eteṣāmamṛtistathā || 140 ||
[Analyze grammar]

śrībhagavānuvāca |
ākalpamete jīvaṃtu tato muktiṃ bhajaṃtu ca |
tvayā kṛtamidaṃ veśma vistṛtaṃ vikṛtaṃ śubham || 141 ||
[Analyze grammar]

tiṣṭhāmaḥ kṣaṇamātraṃ tu tato yāsyāma maṃdiram |
gautama uvāca |
ayogyaṃ prārthayāmīśa hyarthī doṣaṃ na paśyati || 142 ||
[Analyze grammar]

brahmādyalabhyaṃ deveśa dīyatāṃ yadi rocate |
atheśo viṣṇumālokya gṛhītvā tu karaṃ hareḥ || 143 ||
[Analyze grammar]

prahasannaṃbujābhākṣamityuvāca sadāśivaḥ |
mlānodarosi goviṃda deyaṃ te bhojanaṃ kimu || 144 ||
[Analyze grammar]

svayaṃ praviśya yadi vā svayaṃ bhuṃkṣva svagehavat |
gaccha vā pārvatīgehaṃ yā kukṣiṃ pūrayiṣyati || 145 ||
[Analyze grammar]

ityuktvā tatkarālaṃbī ekāṃtamagamadvibhuḥ |
ādiśya naṃdinaṃ devo dvārādhyakṣaṃ yathoktavat || 146 ||
[Analyze grammar]

gautamaṃ samuvācāyamuttaraṃ viṣṇubhāṣaṇam |
sadāśiva uvāca |
saṃpādayānnaṃ sarveṣāṃ bhoktukāmā vayaṃ mune || 147 ||
[Analyze grammar]

ityuktvaikāṃtamagamadvāsudevena śaṃkaraḥ |
mṛduśayyāṃ samāruhya śayitau devatottamau || 148 ||
[Analyze grammar]

anyonyaṃ bhāṣaṇaṃ kṛttvā prottasthaturubhāvapi |
gatvā taṭākaṃ gaṃbhīraṃ snāsyaṃtau devasattamau || 149 ||
[Analyze grammar]

karāṃbupānamanyonyaṃ pṛthakkṛtvobhayatra ca |
munayo rākṣasāścaiva jalakrīḍāṃ pracakrire || 150 ||
[Analyze grammar]

atha viṣṇurmaheśaśca jalapātāni śīghrataḥ |
cakratuḥ śaṃkaraḥ padmakiṃjalkāṃjalinā hareḥ || 151 ||
[Analyze grammar]

avākiranmukhe tasya padmotphullavilocane |
netre keśarasaṃpātānnyamīlayata keśavaḥ || 152 ||
[Analyze grammar]

atrāṃtare hareḥ skaṃdhamāruroha maheśvaraḥ |
haryuttamāṃgaṃ bāhubhyāṃ gṛhītvā saṃnyamajjayat || 153 ||
[Analyze grammar]

unmajjayitvā ca punaḥ punaścāpi punaḥ punaḥ |
pīḍitaḥ sa hariḥ sūkṣmaṃ pātayāmāsa śaṃkaram || 154 ||
[Analyze grammar]

atha pādau gṛhītvā tu ācakarṣa ca bhrāmayat |
atāḍayaddharervakṣaḥ pātayāmāsa cācyutam || 155 ||
[Analyze grammar]

athotthito haristoyamādāyaṃjalinā tataḥ |
avākiradatho śaṃbhumatha viṣṇumatho haraḥ || 156 ||
[Analyze grammar]

jalakrīḍaivamabhavadatha carṣigaṇāṃtare |
jalakrīḍāsaṃbhrameṇa visrastajaṭabaṃdhanāḥ || 157 ||
[Analyze grammar]

atha saṃbhramatasteṣāmanyonyajaṭabaṃdhanam |
itaretarabaddhāsu jaṭāsu ca munīśvarāḥ || 158 ||
[Analyze grammar]

śaktimaṃto'śaktimataḥ ākarṣaṃti ca savyatham |
pātayaṃtonyataścāpi krośato rudatastathā || 159 ||
[Analyze grammar]

evaṃ pravṛtte tumule saṃbhūte toyakarmmaṇi |
ākāśe nārado hṛṣṭo nanarta ca nanāda ca || 160 ||
[Analyze grammar]

vipaṃcīṃ nādayanvādyaṃ lalitāṃ gītimujjagau |
sugītyā lalitāyāstu agāyata vidhā daśa || 161 ||
[Analyze grammar]

śuśrāva gītaṃ madhuraṃ śaṃkaro lokabhāvanaḥ |
svayaṃ gātuṃ hi lalitaṃ maṃdaṃ maṃdaṃ pracakrame || 162 ||
[Analyze grammar]

svayaṃ gāyati deveśe miśrā maṃgalakaiśikī |
nārade nṛtyamāne tu gāyati svarabhedini || 163 ||
[Analyze grammar]

svaraṃ dhruvaṃ samādāya sarvalakṣaṇasaṃyutam |
svadhārāmṛtasaṃyuktaṃ gānenaivamatho jayat || 164 ||
[Analyze grammar]

vāsudevo mardalaṃ ca karābhyāmidamāhanat |
avagāhaṃścaturvaktrastuṃbururmukharo babhau || 165 ||
[Analyze grammar]

tānakā gautamādyāstu tūṣṇīṃ gātuṃ ca vāyutaḥ |
gāyake madhuraṃ gītaṃ hanūmati kapīśvare || 166 ||
[Analyze grammar]

mlānamamlānamabhavatkṛśāḥ puṣṭāstadā'bhavan |
svāṃ svāṃ gītimataḥ sarve tiraskṛtyaiva mūrcchitāḥ || 167 ||
[Analyze grammar]

tūṣṇīṃ sarve samabhavandevarṣigaṇadānavāḥ |
ekaḥ sa hanumāngātā śrotāraḥ sarva eva te || 168 ||
[Analyze grammar]

madhyāhnakālavitate bhojanāvasare sati |
dukūlayugamādhatta śṛṇvangītiṃ maheśvaraḥ || 169 ||
[Analyze grammar]

pītavastradvayaṃ viṣṇurāraktaṃ caturānanaḥ |
svasvārhāṇyatha sarve'pi kṛtyaṃ kṛtvāpi kālikam || 170 ||
[Analyze grammar]

svaṃ svaṃ vāhanamāruhya nirgatāḥ sarvadevatāḥ |
gānapriyo maheśastu jagāda plavageśvaram || 171 ||
[Analyze grammar]

plavagatvaṃ mayājñapto niḥśaṃkaṃ vṛṣamāruha |
mama cābhimukho bhūtvā gāyasvāśeṣagāyanam || 172 ||
[Analyze grammar]

athāha kapiśārdūlo bhagavaṃtaṃ maheśvaram |
vṛṣabhārohasāmarthyaṃ tava nānyasya vidyate || 173 ||
[Analyze grammar]

tava vāhanamāruhya pātakī syāmahaṃ vibho |
māmevāruha deveśa vihaṃgaḥ śivavāhanaḥ || 174 ||
[Analyze grammar]

tava cābhimukhaṃ gānaṃ kariṣyāmi vilokaya |
atheśvaro hanūmaṃtamāruroha vṛṣaṃ yathā || 175 ||
[Analyze grammar]

ārūḍhe śaṃkare deve hanūmānkaṃdharāśiraḥ |
chittvā tvacaṃ parāvṛtya mukhaṃ gāyati pūrvavat || 176 ||
[Analyze grammar]

śṛṇvangītisudhāṃ śaṃbhurgautamasya gṛhaṃ gataḥ |
sarve cāpyāgatāstatra devarṣigaṇadānavāḥ || 177 ||
[Analyze grammar]

pūjitā gautamenātha bhojanāvasare sati |
yacchuṣkadārusaṃbhūtaṃ gṛhopakaraṇādikam || 178 ||
[Analyze grammar]

prarūḍhamabhavatsarvaṃ gāyamāne hanūmati |
tasmingāne samastānāṃ citradṛṣṭiratiṣṭhata || 179 ||
[Analyze grammar]

dvibāhurīśasya padābhivaṃdanaḥ samastagātrābharaṇopapannaḥ |
prasannamūrtistaruṇaḥ sumadhye vinyastamūrddhāṃjalibhiḥ suraiḥ stutaḥ || 180 ||
[Analyze grammar]

śiraḥ karābhyāṃ parigṛhya śaṃkaro hanūmataḥ pūrvamukhaṃ cakāra |
padmāsanāsīna hanūmatāṃjalau nidhāya pādaṃ tvaparaṃ mukhe ca || 181 ||
[Analyze grammar]

pādāṃgulībhyāmatha nāsikāṃ vibhuḥ snehena jagrāha ca maṃdamaṃdam |
skaṃdhe mukhe tvaṃsatale ca kaṃṭhe vakṣaḥsthale ca stanamadhyame hṛdi || 182 ||
[Analyze grammar]

tataśca kukṣāvatha nābhimaṃḍale tato dvitīyaṃ nidadhāti cāṃjalau |
śiro gṛhītvāvanamayya śaṃkaraḥ pasparśa pṛṣṭhaṃ cibukena sadhvani || 183 ||
[Analyze grammar]

hāraṃ ca muktāparikalpitaṃ śivo hanūmataḥ kaṃṭhagataṃ cakāra ha |
atha viṣṇurmaheśānamidaṃ vacanamuktavān || 184 ||
[Analyze grammar]

hanūmatā samo nāsti kṛtsnabrahmāṃḍamaṃḍale |
śruti devādyagamyaṃ hi padaṃ tava kilasthitam || 185 ||
[Analyze grammar]

sarvopaniṣadavyaktaṃ tvatpadaṃ kapi sarvayuk |
yamādisādhanairyogairna kṣaṇaṃ te padaṃ sthitam || 186 ||
[Analyze grammar]

mahāyogihṛdaṃbhoje balaṃ svacchaṃ hanūmati |
varṣakoṭisahasreṣu tapaḥ kṛtvā tu duṣkaram || 187 ||
[Analyze grammar]

tvadrūpaṃ nābhijānāti kutaḥ pādaṃ munīśvarāḥ |
aho bhāgyaṃ vicitraṃ hi capalo vā naro mṛgaḥ || 188 ||
[Analyze grammar]

dhatte pādayugaṃ cāṃge yogihṛdyapi na kṣamam |
mayā varṣasahasraṃ tu sahasrābdaṃ tathānvaham || 189 ||
[Analyze grammar]

bhaktyā saṃpūjito'pīśa pādo no darśitastvayā |
loke vādo hi sumahāñchuṃbhurnārāyaṇapriyaḥ || 190 ||
[Analyze grammar]

hariḥ priyastathā śaṃbhorna tādṛgbhāgyamasti me |
sadāśiva uvāca |
na tvayā sadṛśo mahyaṃ priyosti bhagavanhare || 191 ||
[Analyze grammar]

pārvatī vā tvayā tulyā na cānyo vidyate mama |
atha devāya mahate gautamaḥ praṇipatya ca || 192 ||
[Analyze grammar]

vyajñāpayadameyātmandevaihi karuṇānidhe |
madhyāhno'yaṃ vyatikrāṃto bhuktivelā'khilasya ca || 193 ||
[Analyze grammar]

athācamya mahādevo viṣṇunā sahito vibhuḥ |
praviśya gautamagṛhaṃ bhojanāyopacakrame || 194 ||
[Analyze grammar]

ratnāṃgulīyairatha nūpurābhyāṃ dukūlabaṃdhena taḍitsu kāṃcyā |
hārairanekairatha kaṃṭhaniṣka yajñopavītottaravāsasī ca || 195 ||
[Analyze grammar]

vilaṃbicaṃcanmaṇikuṃḍalena supuṣpidhammillavareṇa devaḥ |
paṃcāṃgagaṃdhasya vilepanena bāhvaṃgadaiḥ kaṃkaṇakāṃgulīyakaiḥ || 196 ||
[Analyze grammar]

itthaṃ vibhūṣitaḥ śivo niviṣṭauttamāsane svasaṃmukhaṃ hariṃ tathā nyaveśayadvarāsane |
anyonyasaṃmukhau sthitau harīśau devasattamau suvarṇabhājanānyatho dadau sa cāpi gautamaḥ || 197 ||
[Analyze grammar]

triṃśatprabhedabhakṣyakaṃ supāyasaṃ caturvidhaṃ supakvapākajātakaṃ śatadvayaṃ prakalpitam |
apakvapakvamiśrakaṃ śatatrayaṃ prakalpitaṃ śataṃśataṃ tathā sukaṃdaśākakaṃ tathā muniḥ || 198 ||
[Analyze grammar]

śākādi sarpiṣānvitaṃ dadau ca paṃcaviṃśatiṃ suśarkarādikaṃ tathā sucūnadāḍimādikam |
mocāphalaṃ tu gostanīṃ sukharjunāgaraṃgakaṃ jaṃbūphalaṃ priyālukaṃ vikaṃkataṃ phalaṃ tathā || 199 ||
[Analyze grammar]

evamādīni cānyāni dravyāṇyarpya yathāvidhi |
datvā cāpośanaṃ vipro bhuṃjadhvamiti cābravīt || 200 ||
[Analyze grammar]

bhuṃjāneṣu ca sarveṣu vyajanaṃ sūkṣmavastrajam |
gautamaḥ svayamādāya śivaviṣṇū avījayat || 201 ||
[Analyze grammar]

parihāsamathokartumiyeṣa parameśvaraḥ |
paśya viṣṇo hanūmaṃtaṃ kathaṃ bhuṃkte sa vānaraḥ || 202 ||
[Analyze grammar]

vānaraṃ paśyati harau maṃḍakaṃ viṣṇubhājane |
cikṣepa munisaṃgheṣu paśyatsvapi maheśvaraḥ || 203 ||
[Analyze grammar]

hanūmate dattavāṃśca svocchiṣṭaṃ pāyasādikam |
tvaducchiṣṭamabhojyaṃ tu tavaiva vacanādvibho || 204 ||
[Analyze grammar]

anarhaṃ mama naivedyaṃ patraṃ puṣpaṃ phalaṃ tathā |
mahyaṃ nivedya sakalaṃ kūpa eva vinikṣipet || 205 ||
[Analyze grammar]

abhukte tvadvaco nūnaṃ bhukte cāpi kṛpā tava |
sadāśiva uvāca |
bāṇaliṃge svayaṃbhūte caṃdrakāṃte hyavasthite || 206 ||
[Analyze grammar]

cāṃdrāyaṇasamaṃ jñeyaṃ śaṃbhornaivedyabhakṣaṇam |
bhuktiveleyamadhunā tadvairasyaṃ kathāṃtarāt || 207 ||
[Analyze grammar]

bhuktvā tu kathayiṣyāmi nirviśaṃkaṃ vibhuṃkṣva tat |
athāsau jalasaṃskāraṃ kṛtavāngautamo muniḥ || 208 ||
[Analyze grammar]

āraktasusnigdhasusūkṣma gātrānanekadhā dhauta suśoṣitāṃgān |
taḍāgatoyaiḥ kṛtavījagharṣitairviśodhitaistaiḥ karakānapūrayat || 209 ||
[Analyze grammar]

nadyāḥ saikatavedikāṃ navatarāṃ saṃcchādya sūkṣmāṃbaraiḥ śuddhaiḥ śvetatarairathoparighaṭāṃstoyena pūrṇānkṣipet |
kṣiptvā nālakajātimāstapuṭakaṃ kaṃkolakastūrikācūrṇaṃ candanacaṃdraraśmiviśadāṃ mālāṃ puṭāṃ taṃ kṣipet || 210 ||
[Analyze grammar]

yāmasyāpi punaśca vārivasanenāśodhya kuṃbhe kṣipeccaṃdra graṃthimatho nidhāya bakulaṃ kṣiptvā tathā pāṭalām || 211 ||
[Analyze grammar]

śephālīstabakamatho jalaṃ ca tatra vinyasya prathamata eva toyaśuddhim |
kṛtvātho mṛdutarasūkṣmavastrakhaṃḍenāveṣṭetsṛṇikamukhaṃ ca sūkṣmacaṃdram || 212 ||
[Analyze grammar]

anātapapradeśe tu nidhāya karakānatha |
maṃdavātasamopete sūkṣmavyajanavījite || 213 ||
[Analyze grammar]

atha urvīśasalilaiḥ siṃcayetsṛṇikāmapi |
saṃskṛtvā svāyatāstatra narā nāryotha vā nṛpa || 214 ||
[Analyze grammar]

tatkanyā vā kṣālitāṃgā dhautavastrāśca vā saha |
madhupiṃgalaniryyāsamasāṃdramagurudravam || 215 ||
[Analyze grammar]

bāhumūle ca kaṃṭhe ca vilipya sāṃdrameva ca |
mastake jāpyakaṃ nyasya paṃcagaṃdhavilepanam || 216 ||
[Analyze grammar]

puṣpanaddhasukeśāstu tāḥ śubhāsyāḥ sunirmalāḥ |
evamevocitānārya āttakuṃkumavigrahāḥ || 217 ||
[Analyze grammar]

yuvatyaścārusarvāṃgyo nitarāṃ bhūṣaṇairapi |
etādṛgvanitābhirvānarairvādāpayejjalam || 218 ||
[Analyze grammar]

te'pi pradānasamaye sūkṣmavastrālpaveṣṭanam |
athavā makare nyasya karakaṃ tatra paśya hi || 219 ||
[Analyze grammar]

dorikānyastamunmucya tatastoyaṃ pradāpayet |
evaṃ satkārayāmāsa gautamo bhagavānmuniḥ || 220 ||
[Analyze grammar]

maheśādiṣu sarveṣu bhuktavatsu mahātmasu |
prakṣālitāṃghrihasteṣu gaṃdhodvartitapāṇiṣu || 221 ||
[Analyze grammar]

tadāsanasamāsīne devadeve maheśvare |
atha nīcasamāsīnā devāḥ sarṣigaṇāstathā || 222 ||
[Analyze grammar]

maṇipātreṣu saṃveṣṭya pūgakhaṃḍānsudhūpitān |
akoṇavartulānsthūlānasūkṣmānakṛśānapi || 223 ||
[Analyze grammar]

śvetapatrāṇi saṃśodhya kṣiptvā karpūrakhaṃḍakam |
cūrṇaṃ ca śaṃkarāyātha nivedayati gautame || 224 ||
[Analyze grammar]

gṛhāṇa deva tāṃbūlamityuktavacane munau |
kape gṛhāṇa tāṃbūlaṃ prayaccha mama khaṃḍakān || 225 ||
[Analyze grammar]

uvāca vānaro nāsti mama śuddhirmaheśvara |
anekaphalabhuktatvādvānarastu śuciḥ katham || 226 ||
[Analyze grammar]

sadāśiva uvāca |
madvākyādakhilaṃ śuddhyenmadvākyādamṛtaṃ viṣam |
madvākyādakhilā vedā madvākyāddevatādayaḥ || 227 ||
[Analyze grammar]

madvākyāddharmavijñānaṃ madvākyānmokṣa ucyate |
purāṇānyāgamāścaiva smṛtayo mama vākyataḥ || 228 ||
[Analyze grammar]

ato gṛhāṇa tāṃbūlaṃ mama dadyāḥ sukhaṃḍakān |
harirvāmakareṇādāttāṃbūlaṃ pūgakhaṃḍakam || 229 ||
[Analyze grammar]

tataḥ patrāṇi saṃgṛhya tataḥ khaṃḍānsamarpayat |
karpūramagrato dattaṃ gṛhītvā'bhakṣayacchivaḥ || 230 ||
[Analyze grammar]

deve tu kṛtatāṃbūle pārvatī maṃdarācalāt |
jayā vijayayorhastaṃ gṛhītvā''yānmunergṛham || 231 ||
[Analyze grammar]

devapādau tato natvā vinamravadanā''bhavat |
unnamayya mukhaṃ tasyā idamāha trilocanaḥ || 232 ||
[Analyze grammar]

tvadarthaṃ devadeveśi aparādhaḥ kṛto mayā |
yattvāṃ vihāya bhuktaṃ hi tathānyacchṛṇu suṃdari || 233 ||
[Analyze grammar]

atha svamaṃdire sthāpya devadevavivarjite |
sarvabaṃdhavimukte ca mahadeno mayā kṛtam || 234 ||
[Analyze grammar]

kṣaṃtumarhasi deveśi tyaktakopā vilokaya |
na babhāṣaivamuktvā sā aruṃdhatyā hi niryayau || 235 ||
[Analyze grammar]

nirgacchaṃtīṃ munirjñātvā daṃḍavatpraṇanāma ca |
tadārabhya maheśāya daṃḍapraṇati saṃstutim || 236 ||
[Analyze grammar]

kuryāduvāca ca śivā gautama tvaṃ kimicchasi |
gautama uvāca |
kṛtakṛtyosmi deveśi yadi deyo varo mama || 237 ||
[Analyze grammar]

manmaṃdire mahābhāge bhoktumarhasi sāṃpratam |
devyuvāca |
bhokṣyāmi tava gehehaṃ śaṃkarānumatā mune || 238 ||
[Analyze grammar]

gatveśaṃ gautamo vipro labdhānujñaḥ punargataḥ |
bhojayāmāsa girijāṃ devīṃ cāruṃdhatīṃ tathā || 239 ||
[Analyze grammar]

bhuktvātha pārvatī sarvaṃ gaṃdhapuṣpasabhūṣaṇā |
sahānucarakanyābhiḥ sahasrābhirharaṃ yayau || 240 ||
[Analyze grammar]

athāha śaṃkaro devīṃ gaccha gautamamaṃdiram |
saṃdhyopāstimahaṃ kṛtvā āgacchāmi punargṛham || 241 ||
[Analyze grammar]

ityuktā prayayau devī gautamasyaiva maṃdiram |
saṃdhyāvaṃdanakāmāśca sarvaeva vinirgatāḥ || 242 ||
[Analyze grammar]

kṛtasaṃdhyāstaṭāke tu maheśādyāstu kṛtsnaśaḥ |
athottaramukhaḥ śaṃbhurnyāsaṃ kṛtvā jajāpa ha || 243 ||
[Analyze grammar]

athaviṣṇurmahātejā maheśamidamabravīt |
sarvairnamasyate yastu sarvaireva samarcyate || 244 ||
[Analyze grammar]

hūyate sarvayajñeṣu sa bhavānkiṃ japiṣyati |
racitāṃjalayaḥ sarve tvāmevaikamupāsate || 245 ||
[Analyze grammar]

sa bhavāndevadeveśa kasmai vā racitāṃjali |
namaskārādi puṇyānāṃ phaladastvaṃ maheśvara || 246 ||
[Analyze grammar]

tava kaḥ phalado vaṃdyaḥ ko vā tvattodhiko vada |
śaṃkara uvāca |
dhyāye na kiṃcidgoviṃda na namasyeha kiṃcana || 247 ||
[Analyze grammar]

nopāsye kaṃcana hare na japiṣyeha kiṃcana |
kiṃtu nāstikajaṃtūnāṃ pravṛttyarthamidaṃ mayā || 248 ||
[Analyze grammar]

darśanīyaṃ hare te syuranyathā pāpakāriṇaḥ |
tasmāllokopakārārthamidaṃ sarvaṃ kṛtaṃ mayā || 249 ||
[Analyze grammar]

omityuktvā hariratha taṃ natvā samatiṣṭhata |
atha te gautamagṛhaṃ prāptā devagaṇarṣayaḥ || 250 ||
[Analyze grammar]

sarve pūjāmatho cakrurdevadeve pinākine |
devo hanūmatā sārddhaṃ gāyannāste raghūttama || 251 ||
[Analyze grammar]

pañcākṣarīṃ mahāvidyāṃ sarva eva tadā japan |
hanūmatkaramālaṃbya devyabhyāśaṃ gato haraḥ || 252 ||
[Analyze grammar]

ekaśayyāsamāsīnau tāvubhau devadaṃpatī |
gāyannāste sa hanumāṃstuṃbururnāradastathā || 253 ||
[Analyze grammar]

nānāvidhivilāsāṃśca cakāra parameśvaraḥ |
āhūya pārvatīmīśa idaṃ vākyamuvāca ha || 254 ||
[Analyze grammar]

śrīsadāśiva uvāca |
racayiṣyāmi dhammillamehi matpurataḥ śubhe |
devyāha na ca yuktaṃ tadbhartrāśuśrūṣaṇaṃ striyaḥ || 255 ||
[Analyze grammar]

keśaprasādhanakṛtāvanarthāṃtaramāpatet |
keśaprasādhane deva tatvaṃ sarvaṃ na cepsitam || 256 ||
[Analyze grammar]

atha baṃdhe kṛte paścādaṃsaprāṃtapramārjanam |
tanoścaramasaṃlagna keśapuṣpādimārjanam || 257 ||
[Analyze grammar]

etasminvartamāne tu mahātmāno yadāgaman |
tadā kimuttaraṃ vācyaṃ tava devādivaṃdinaḥ || 258 ||
[Analyze grammar]

nāyāṃti cedatha vibho bhītirnāśamupeṣyati |
evaṃ hi bhāṣamāṇāṃ tāṃ kareṇākṛṣya śaṃkaraḥ || 259 ||
[Analyze grammar]

svorvostāṃ sthāpayitvaiva visrasya kacabaṃdhanam |
vibhajya ca karābhyāṃ sa prasasāra nakhairapi || 260 ||
[Analyze grammar]

viṣṇudattāṃ pārijātasrajaṃ kacagatāmapi |
kṛtvā dhammillamakarodatha mālāṃ karāgatām || 261 ||
[Analyze grammar]

mallikāsrajamādāya babaṃdha kacabaṃdhane |
kalpaprasūnamālāṃ ca brahmadattāṃ maheśvaraḥ || 262 ||
[Analyze grammar]

pārvatīvasane gūḍhagaṃdhāḍhye ca samādadhāt |
athāṃsapṛṣṭhasaṃlagnamārjanaṃ kṛtavānvibhuḥ || 263 ||
[Analyze grammar]

ślathanīveradho devyā vastraveṣṭeradhogataḥ |
devaḥ kimidamityuktvā nīvībaṃdhaṃ cakāra ha || 264 ||
[Analyze grammar]

nāsābhūṣaṇametatte paśyāmi sa madāttataḥ |
ityuktvā svayamādāya vicchāyaṃ mauktikaṃ satī || 265 ||
[Analyze grammar]

haridrāyāḥ samāyoge muktāphalamadīptimat |
idaṃ hi dhriyatāṃ muktāphalaṃ mama tava priyam || 266 ||
[Analyze grammar]

pārvatyuvāca |
aho tvanmaṃdiraṃ śaṃbho sarvavastusamṛddhimat |
pūrvameva mayā sarvaṃ vastujñātaṃ vibhūṣaṇaiḥ || 267 ||
[Analyze grammar]

aho draviṇasaṃpattirbhūṣaṇairavagamyate |
śirovibhūṣitaṃ deva brahmaśīrṣasya mālayā || 268 ||
[Analyze grammar]

narakasya tathā mālā vakṣaḥsthalavibhūṣaṇam |
śeṣaśca vāsukiścaiva saviṣau tava kaṃkaṇe || 269 ||
[Analyze grammar]

diśoṃ'bare jaṭā keśā bhasitaṃ cāṃgarāgakam |
mahokṣo vāhanaṃ gotraṃ kulaṃ cājñātameva ca || 270 ||
[Analyze grammar]

jñāyete pitarau naiva virūpākṣaṃ tathā vapuḥ |
evaṃ vadaṃtīṃ girijāṃ viṣṇuḥ prāhāti kopanaḥ || 271 ||
[Analyze grammar]

kimarthaṃ niṃdase devi devadevaṃ jagatpatim |
tyakṣye prāṇānpriyānbhadre tava nūnamasaṃyamam || 272 ||
[Analyze grammar]

yatreśaniṃdanaṃ bhadre tatra no maraṇaṃ vratam |
ityuktvātha nakhābhyāṃ hi hariśchettuṃ śirogataḥ || 273 ||
[Analyze grammar]

maheśastu karaṃ gṛhya prāha mā sāhasaṃ kṛthāḥ |
pārvatīvacanaṃ sarvaṃ priyaṃ mama tavāpriyam || 274 ||
[Analyze grammar]

mamāpriyaṃ hṛṣīkeśa kartuṃ yatkiṃcidiṣyate |
omityuktvātha bhagavāṃstūṣṇīṃbhūto'bhavaddhariḥ || 275 ||
[Analyze grammar]

hanumānatha devāya vyajñāpayadidaṃ vacaḥ |
arthayāmi viniṣkāmaṃ mama pūjāvrataṃ tathā || 276 ||
[Analyze grammar]

pūjārthamapyahaṃ gacche mamānujñātumarhasi |
śaṃkara uvāca |
kasya pūjā kva vā pūjā kiṃ puṣpaṃ kiṃ dalaṃ vada || 277 ||
[Analyze grammar]

ko guruḥ kaśca maṃtraste kīdṛśaṃ pūjanaṃ tathā |
evaṃ vadati deveśe hanūmānatikaṃpitaḥ || 278 ||
[Analyze grammar]

vepamānasamastāṃgaḥ stotumeva pracakrame |
hanūmānuvāca |
namo devāya mahate śaṃkarāyāmitātmane || 279 ||
[Analyze grammar]

yogine yogadhātre ca yogināṃ gurave namaḥ |
yogigamyāya devāya jñānināṃ pataye namaḥ || 280 ||
[Analyze grammar]

vedānāṃ pataye tubhyaṃ devānāṃ pataye namaḥ |
dhyānāyadhyanagamyāya dhātṝṇāṃ gurave namaḥ || 281 ||
[Analyze grammar]

śiṣṭāyaśiṣṭagamyāya bhūmyādi pataye namaḥ |
namastetyādinā vedavākyānāṃ nidhaye namaḥ || 282 ||
[Analyze grammar]

ātanuṣvetivākyaiśca pratipādyāya te namaḥ |
aṣṭamūrte namastubhyaṃ paśūnāṃpataye namaḥ || 283 ||
[Analyze grammar]

tryaṃbakāya trinetrāya somasūryāgnilocana |
subhṛṃgarājadhattūradroṇapuṣpapriyāya te || 284 ||
[Analyze grammar]

bṛhatīpūgapuṃnāga caṃpakādipriyāya ca |
namastestu namastestu bhūya eva namonamaḥ || 285 ||
[Analyze grammar]

śivo harimatha prāha mā bhaiṣīrvada me'khilam |
hanumānuvāca |
śivaligārcanaṃ kāryaṃ bhasmoddhūlitadehinā || 286 ||
[Analyze grammar]

divāsaṃpāditaistoyaiḥ puṣpādyairapi tādṛśaiḥ |
deva vijñāpayiṣyāmi śivapūjāvidhiṃ śubham || 287 ||
[Analyze grammar]

sāyaṃkāle tu saṃprāpte aśiraḥ snānamācaret |
kṣālitaṃ vasanaṃ śuṣkaṃ dhṛtvācamya dviragradhīḥ || 288 ||
[Analyze grammar]

atha bhasma samādāya āgneyaṃ snānamācaret |
praṇavena samāmaṃtryāpyaṣṭavāramathāpi vā || 289 ||
[Analyze grammar]

paṃcākṣareṇa maṃtreṇa nāmnā vā yenakenacit |
saptābhimaṃtritaṃ bhasma darbhapāṇiḥ samāharet || 290 ||
[Analyze grammar]

īśānaḥ sarvavidyānāmuktvā śirasi pātayet |
tatpuruṣāya vidmahe mukhe bhasma prasecayet || 291 ||
[Analyze grammar]

aghorebhyo'tha ghorebhyo bhasma vakṣasi nikṣipet |
vāmadevāya nama iti guhyasthāne vinikṣipet || 292 ||
[Analyze grammar]

sadyojātaṃ prapadyāmi nikṣipedatha pādayoḥ |
uddhūlayetsamastāṃge praṇavena vicakṣaṇaḥ || 293 ||
[Analyze grammar]

traivarṇikānāmuditaḥ snānādividhiruttamaḥ |
śūdrādīnāṃ pravakṣyāmi yaduktaṃ guruṇā tathā || 294 ||
[Analyze grammar]

śiveti padamuccārya bhasmasaṃmaṃtrayetsudhīḥ |
saptavāramathādāya śivāyeti śiraḥ kṣipet || 295 ||
[Analyze grammar]

śaṃkarāya mukhe proktaṃ sarvajñāya hṛdi kṣipet |
sthāṇave nama ityuktvā guhye cāpi svayaṃbhuve || 298 ||
[Analyze grammar]

uccārya pādayoḥ kṣiptvā bhasmaśuddhamataḥ param |
namaḥ śivāyetyuccārya sarvāṃgoddhūlanaṃ smṛtam || 297 ||
[Analyze grammar]

prakṣālya hastāvācamya darbhapāṇiḥ samāhitaḥ |
darbhābhāve suvarṇaṃ syāttadabhāve gavālakaḥ || 298 ||
[Analyze grammar]

tadabhāve tu dūrvāḥ syustadabhāve tu rājatam |
saṃdhyopāstiṃ japaṃ devyāḥ kṛtvā devagṛhaṃ vrajet || 299 ||
[Analyze grammar]

devavedimatho vāpi kalpitaṃ sthaṃḍilaṃ tu vā |
mṛṇmayaṃ kalpitaṃ śuddhaṃ padmādiracanāyutam || 300 ||
[Analyze grammar]

cāturvarṇaka raṃgaiśca śvetenaikena vā punaḥ |
vicitrāṇi ca padmāni svastikādi tathaiva ca || 301 ||
[Analyze grammar]

utpalādi gadā śaṃkha triśūlaṃ ḍamaruṃ tathā |
saroktapaṃcaprāsādaṃ śivaliṃgamathaiva ca || 302 ||
[Analyze grammar]

sarvakāmaphalaṃ vṛkṣaṃ kulakaṃ kolakaṃ tathā |
ṣaṭkoṇaṃcatrikoṇaṃcanavakoṇamathāpivā || 303 ||
[Analyze grammar]

koṇadvādaśakāṃdolāṃ pādukāvyajanāni ca |
cāmaracchatrayugalaṃ viṣṇubrahmādikaṃ tathā || 304 ||
[Analyze grammar]

cūrṇairviracayedvedyāṃ dhīmāndevālaye'pi vā |
yatrāpi devapūjā syāttatraivaṃ kalpayedbudhaḥ || 305 ||
[Analyze grammar]

svahastaracitaṃ mukhyaṃ krītaṃ caiva tu madhyamam |
yācitaṃ tu kaniṣṭhaṃ syādbalātkāramathādhamam || 306 ||
[Analyze grammar]

arheṣu yattvanarheṣu balātkārāttu niṣphalam |
raktaśāli japā sthāṇa kalamāsita raktakaiḥ || 307 ||
[Analyze grammar]

taṃdulairvrīhimātrotthaiḥ karṇaiścaiva yathākramam |
uttamairmadhyamaiścaiva kathitairadhamaistathā || 308 ||
[Analyze grammar]

padmādisthāpanaireva tatsamyagyāgamācaret |
prāguttaramukho vāpi yadi vā prāṅmukho bhavet || 309 ||
[Analyze grammar]

āsanaṃ ca pravakṣyāmi yathādṛṣṭaṃ yathāśrutam |
kauśaṃ cārmmaṃ cailatulyaṃ dāravaṃ tāḍapatrakam || 310 ||
[Analyze grammar]

kāṃbalaṃ kāṃcanaṃ caiva rājataṃ tāmrameva ca |
gokarīṣārkajairvāpi āsanaṃ parikalpayet || 311 ||
[Analyze grammar]

vaiyāghraṃ rauravaṃ caiva hāriṇaṃ mārgameva ca |
cārmaṃ caturvidhaṃ jñeyamatha baṃdhukameva ca || 312 ||
[Analyze grammar]

yathāsaṃbhavameteṣu hyāsanaṃ parikalpayet |
kṛtapadmāsano vāpi svāstikāsana eva ca || 313 ||
[Analyze grammar]

darbhabhasmasamāsīnaḥ prāṇānāyamya vāgyataḥ |
tāvatsa devatārūpo dhyānaṃ cāntaḥ samācaret || 314 ||
[Analyze grammar]

śikhāṃte dvādaśāṃgulye sthitaṃ sūkṣmatanuṃ śivam |
aṃtaścaraṃtaṃ bhūteṣu guhāyāṃ viśvamūrtiṣu || 315 ||
[Analyze grammar]

sarvābharaṇasaṃyuktamaṇimādi guṇānvitam |
dhyātvā taṃ dhārayeccitte tadvyāptyā pūrayettanūm || 316 ||
[Analyze grammar]

tayā dīptyā śarīrasthaṃ pāpaṃ nāśamupāgatam |
svarṇaṃ pāradasaṃparkādraktaṃ śvetaṃ yathā bhavet || 317 ||
[Analyze grammar]

taddvādaśadalāvṛttamaṣṭapaṃcatrireva vā |
parikalpyāsanaṃ śuddhaṃ tatra liṃgaṃ nidhāya ca || 318 ||
[Analyze grammar]

guhāsthitaṃ maheśānaṃ liṃge saṃciṃtayettathā |
śodhite kalaśe toyaṃ śodhitaṃ gaṃdhavāsitam || 319 ||
[Analyze grammar]

sugaṃdhapuṣpaṃ nikṣipya praṇavenābhimaṃtritam |
prāṇāyāmaśca praṇavaḥ śūdreṣu na vidhīyate || 320 ||
[Analyze grammar]

prāṇāyāmapade dhyānaṃ śivetyoṅkāramaṃtraṇam |
gaṃdhapuṣpākṣatādīni pūjādravyāṇi yāni ca || 321 ||
[Analyze grammar]

tāni sthāpya samīpe tu tataḥ saṃkalpayiṣyate |
śivapūjāṃ kariṣyāmi śivatuṣṭyarthameva ca || 322 ||
[Analyze grammar]

iti saṃkalpayitvā tu tata āvāhanādikam |
kṛtvā tu snānaparyaṃtaṃ tataḥ snānaṃ prakalpayet || 323 ||
[Analyze grammar]

namastetyādimaṃtreṇa śatarudriyavidhānataḥ |
avicchinnā tu yā dhārā muktidhāreti kīrtitā || 324 ||
[Analyze grammar]

tayā yaḥ snāpayenmāsaṃ japanrudramupāṃśu vā |
ekavāraṃ trivāraṃ ca paṃca sapta navāpi vā || 325 ||
[Analyze grammar]

ekādaśamatho vāramathaikādaśacānvitam |
muktisnānamidaṃ jñeyaṃ māsaṃ mokṣapradāyakam || 326 ||
[Analyze grammar]

śaivayā vidyayā snānaṃ kevalaṃ praṇavena ca |
mṛṇmayairnālikerasya śakalaiścormibhistathā || 327 ||
[Analyze grammar]

kāṃsyena muktā bhuktyā ca puṣpādika sareṇavā |
snāpayeddevadeveśaṃ yathāsaṃbhavamīritaiḥ || 328 ||
[Analyze grammar]

śṛṃgasya ca vidhiṃ vakṣye snānayogyaṃ yathā bhavet |
pūrvamaṃtastu saṃśodhya bahiraṃtastu śodhayet || 329 ||
[Analyze grammar]

susnigdhaṃ laghukṛtvātha nāgaṃ chiṃdyātkathaṃcana |
nīcaikadeśavinyastadvāradroṇyā suvṛttayoḥ || 330 ||
[Analyze grammar]

kuśānuyutayā snānaṃ devāya parikalpayet |
evaṃ gavayaśṛṃgasya jalamūrtirathocyate || 331 ||
[Analyze grammar]

dvāre niṣiddhalohārddhaṃ saṃdhidvārā samanvite |
yogavaktraṃ nāgadaṃḍaṃ nāgākāraṃ prakalpayet || 332 ||
[Analyze grammar]

phalasthāne tu caṣakaṃ daṃḍena samaraṃdhrakam |
tatraiva pātayettoyamūrddhvayaṃtraghaṭe sthitam || 333 ||
[Analyze grammar]

pātayedatha cānyena vāmenaiva kareṇa vā |
muktidhārākṛtā tena pavitraṃ pāpanāśanam || 334 ||
[Analyze grammar]

evaṃ saṃsthāpya deveśaṃ paṃcagavyaistathaiva ca |
paṃcāmṛtairatha snāpya madhuratritayena ca || 335 ||
[Analyze grammar]

vibhūṣya bhūṣakairdevaṃ punaḥ snāpya maheśvaram |
śītopacāraṃ kṛtvātha tata ācamanādikam || 336 ||
[Analyze grammar]

vastraṃ tathopavītaṃ ca paṃcagaṃdhakameva ca |
karpūramaruvaṃ cāpi pāṭīramatha vā bhavet || 337 ||
[Analyze grammar]

ubhayaṃ miśritaṃ vāpi śivaliṃgaṃ prapūjayet |
kṛtsnapīṭhaṃ gaṃdhapūrṇaṃ yadvā vibhavasārataḥ || 338 ||
[Analyze grammar]

tūṣṇīmathopacāraṃ vā kāliyaṃ puṣpamarpayet |
śrīpatramarucityājaṃ yathāśaktyākhilaṃ yathā || 339 ||
[Analyze grammar]

anekadravyadhūpaṃ ca guggulaṃ kevalaṃ tathā |
kapilāghṛtasaṃyuktaṃ sarvadhūpāya śasyate || 340 ||
[Analyze grammar]

dhūpaṃ datvā yathāśakti kapilāghṛtadīpakān |
athavāpyājyamātreṇa dīpāndatvopahārakam || 341 ||
[Analyze grammar]

yathāśaktyupapannaṃ ca datvā puṣpasamanvitam |
mukhaśuddhiṃ tato datvā datvā tāṃbūlamādarāt || 342 ||
[Analyze grammar]

pradakṣiṇanamaskārau pūjaivaṃ hi samāpyate |
gītāṃgapaṃcakaṃ paścāttāni vijñāpayāmi te || 343 ||
[Analyze grammar]

gītaṃ vādyaṃ purāṇaṃ ca nṛtyaṃ hāsoktireva ca |
nīrājanaṃ ca puṣpāṇāmaṃjaliścākhilārpaṇam || 344 ||
[Analyze grammar]

kṣamā codvāsanaṃ caiva kīrtitaṃ copacārakam |
bhūṣaṇaṃ ca tathā chatraṃ cāmaraṃ vyajanaṃ tathā || 345 ||
[Analyze grammar]

śivopavītaṃ kaiṅkaryaṃ ṣaḍīśānopacārakam |
dvātriṃśadupacāraistu yaḥ samārādhayecchivam || 346 ||
[Analyze grammar]

ekenāhnā samastānāṃ pāpānāṃ nāśanaṃ dhruvam |
dvātriṃśadupacāraṃ syātpūjanaṃ tūttamottamam || 347 ||
[Analyze grammar]

sadāśiva uvāca |
evametatkapiśreṣṭha tava pūjāṃ vadāmyaham |
matpādayugalaṃ pūjya sarvapūjākaro bhava || 348 ||
[Analyze grammar]

ārādhyetthaṃ yathāliṃge tanmamārādhanaṃ kuru |
hanūmānuvāca |
guruṇā liṃgapūjaiva niyatā kalpitā mama || 349 ||
[Analyze grammar]

tāṃ karomi purā deva paścāttvatpādapūjanam |
ityuktvaiva namasyeśaṃ śivaligārcane'bhavat || 350 ||
[Analyze grammar]

sarastīramatho gatvā kṛtvā saikatavedikām |
tālapatrairviracitamāsanaṃ parikalpayet || 351 ||
[Analyze grammar]

prakṣālya pādahastau tu samācamya samāhitaḥ |
bhasmasnānamatho cakre punarācamya vāgyataḥ || 352 ||
[Analyze grammar]

devavedyāmatho cakre padmāni sumanoharam |
anaṃtaraṃ tālapatraṃ padmāsanagataḥ kapiḥ || 353 ||
[Analyze grammar]

prāṇānāyamya sanyāsaṃ śukladhyānasamanvitaḥ |
praṇamya gurumīśānaṃ japannāsīdataḥ param || 354 ||
[Analyze grammar]

atha devārcanaṃ kartuṃ yatnamāsthitavānapi |
palāśapatrapuṭakadvayānīta jalaṃ śuci || 355 ||
[Analyze grammar]

śiraḥkamaṃḍalugataṃ nidhāyāgniṃ trimaṃtritam |
āvāhanādi kṛtvātha snānaparyantameva ca || 356 ||
[Analyze grammar]

atha snāpayituṃ devamādāya karasaṃpuṭe |
kṛtvā nirīkṣaṇaṃ devaṃ pīṭhaṃ no dṛṣṭavānkapiḥ || 357 ||
[Analyze grammar]

liṃgamātraṃ karagataṃ dṛṣṭvā bhītisamanvitaḥ |
idamāha mahāyogī kiṃ vā pāpaṃ mayā kṛtam || 358 ||
[Analyze grammar]

yadetatpīṭharahitaṃ śivaliṃgaṃ karasthitam |
mamādya maraṇaṃ siddhaṃ pīṭhaṃ cennāgamiṣyati || 359 ||
[Analyze grammar]

atha rudraṃ japiṣyāmi tadāyāti maheśvaraḥ |
iti niścitya manasā jajāpa śatarudriyam || 360 ||
[Analyze grammar]

athāpi na samāyāto maheśo'tha kapīśvaraḥ |
rudraṃ nyapātayadbhūmyāṃ vīrabhadraḥ samāgataḥ || 361 ||
[Analyze grammar]

kimarthaṃ rudyate bhakta rudihetuṃ vadasva me |
hanūmānuvāca |
pīṭhahīnamidaṃ liṃgaṃ paśya me pāpasaṃcayam || 362 ||
[Analyze grammar]

vīrabhadra uvāca |
yadi nāyāti pīṭhaṃ te liṃge mā sāhasaṃ kṛthāḥ |
dāhayiṣyāmyahaṃ lokaṃ yadi nāyāti pīṭhakam || 363 ||
[Analyze grammar]

paśya darśaya me liṃgaṃ pīṭhaṃ yadyāgataṃ na vā |
atha dṛṣṭvā vīrabhadro liṃgaṃ pīṭhamanāgatam || 364 ||
[Analyze grammar]

dagdhukāmo'khilāṃllokānvīrabhadraḥ pratāpavān |
analaṃ bhuvi cikṣepa kṣaṇāddagdhā mahī tadā || 365 ||
[Analyze grammar]

atha saptatalāndagdhvā punarūrddhvamavartata |
paṃcorddhvalokānadahajjanalokanivāsinaḥ || 366 ||
[Analyze grammar]

lalāṭanetrasaṃbhūtaṃ nakhenādāya cānalam |
jaṃbīraphalasaṃkāśaṃ kṛtvā karatale vibhuḥ || 367 ||
[Analyze grammar]

yadi nāyāti pīṭhaṃ te dagdhā lokā na saṃśayaḥ |
anāyātamatho dṛṣṭvā vīrabhadraḥ pratāpavān || 368 ||
[Analyze grammar]

sanakādayo mahātmāno jñātvā yogena cāgaman |
gautamasyāśramavaraṃ samāgamya maheśvaram || 369 ||
[Analyze grammar]

na dṛṣṭavaṃto devādiṃ vidyamānamapi dvijāḥ |
astuvannatha ca stotraiḥ sarvavedasamudbhavaiḥ || 370 ||
[Analyze grammar]

oṃnamo devadevāya tasmai śuddhaprabhāciṃtyarūpāya tasmai |
namaḥ surāṇāmadhīśāya tasmai namo vedaguhyāya śuddhāya tasmai || 371 ||
[Analyze grammar]

namaḥ śivāyādidevāya tasmai namo vyālayajñopavītāya tasmai |
namaḥ surānaṃdasaṃdoha varṣatrayī biṃduviśvaṃbharāya tasmai || 372 ||
[Analyze grammar]

pṛthivyatho vāyurākāśamāpaḥ punaḥ śaśī vahnisūryyau tathātmā |
yasyāṣṭaitā mūrtayaḥ śaṃkarasya tasmai namo jñānagamyāya śaśvat || 373 ||
[Analyze grammar]

etāṃ stutimathākarṇya bhaganetrapradaḥ śivaḥ |
viṣṇumāha ca gaccha tvaṃ samānaya ca tāndvijān || 374 ||
[Analyze grammar]

ānītāstena hariṇā devāya praṇatāstu te |
tānāha śaṃkaro vākyaṃ kimarthaṃ yūyamāgatāḥ || 375 ||
[Analyze grammar]

munaya ūcuḥ |
deva dvādaśalokānāṃ dṛśyaṃte bhasmarāśayaḥ |
sthitamekaṃ vanamidaṃ paśya tvaṃ lokasaṃkṣayam || 376 ||
[Analyze grammar]

sadāśiva uvāca |
ūrddhvasthapaṃcalokānāṃ dāhe saṃdeha eva naḥ |
kathamaṃgāravṛṣṭiśca kathaṃ no vā mahādhvaniḥ || 377 ||
[Analyze grammar]

munaya ūcuḥ |
bhītirasmākamadhunā vartate vīrabhadrataḥ |
sa evāṃgāravṛṣṭiṃ ca pipāsuriva tāmapāt || 378 ||
[Analyze grammar]

devotha vīramāhūya kiṃ vīretyabravīdbhavaḥ |
vīro hanūmato liṃgapīṭhābhāvādidaṃ kṛtam || 379 ||
[Analyze grammar]

kapeścittaṃ parijñātuṃ mayā kṛtamidaṃ bṛhat |
kṛpānidhiratho devo yathāpūrvamakalpayat || 380 ||
[Analyze grammar]

dagdhānapyakhilāṃllokānpūrvataḥ śobhanānvibhuḥ |
kalpayāmāsa viśvātmā vīrabhadramathābravīt || 381 ||
[Analyze grammar]

āliṃgyāghrāya śirasi tāṃbūlaṃ dattavānharaḥ |
athāsau hanumānīśa pūjanaṃ kṛtavānatha || 382 ||
[Analyze grammar]

ekaṃ vanacaraṃ tatra gaṃdharvaṃ savipaṃcikam |
idamāha mahāvīṇā mama vai dīyatāmiti || 383 ||
[Analyze grammar]

gaṃdharvo na mayā tyājyā vīṇā prāṇasamā mama |
mamāpi prāṇasadṛśī vīṇetyāha kapīśvaraḥ || 384 ||
[Analyze grammar]

atha muṣṭinipātena gaṃdharve patite kapiḥ |
ādāya vīṇāṃ mahatīṃ svarataṃtusamanvitām || 385 ||
[Analyze grammar]

alābusaṃyutāṃ kṛtvā rājavṛkṣaphalākṛtim |
tasyorasi vinikṣipya gāyannāgācchivāṃtikam || 386 ||
[Analyze grammar]

bṛhatīkusumaiḥ śuddhairdevapādāvapūjayat |
tasmai varamatha prādādākalpaṃ jīvitaṃ punaḥ || 387 ||
[Analyze grammar]

samudralaṃghane śaktiṃ varaṃ prādādathāparam || 388 ||
[Analyze grammar]

samastabhūṣāsuvibhūṣitāṃgaḥ svadīptimaṃdīkṛtadevadīptiḥ |
prasannamūrtistaruṇaḥ śivāṅgakaḥ saṃbhāvayāmāsa samastadevān || 389 ||
[Analyze grammar]

pītamudgamanīyaṃ ca samādāya maheśvaraḥ |
pītavastramidaṃ deva tvaṃ gṛhāṇa hare śubham || 390 ||
[Analyze grammar]

brahmaṇe raktavasanaṃ sarveṣāṃ vasudastathā |
devarṣidānavādīnāṃ dattavānvasuyugmakam || 391 ||
[Analyze grammar]

rāmopi caitadākarṇya śaṃbhave yugmamarpayat |
susūkṣmaṃ bahumūlyaṃ ca svarṇabhūṣaṇameva ca || 392 ||
[Analyze grammar]

atha bhuktvā sukhāsīnaḥ sāmātyaḥ sapurohitaḥ |
nānāmunigaṇairbhūpairvānarairgautamī taṭe || 393 ||
[Analyze grammar]

śaṃbhuṃ purāṇatattvajñaṃ rāghavo vākyamabravīt |
tvameva sarvaṃ jānīṣe sarvadharmaguhāśayam || 394 ||
[Analyze grammar]

kasminkasminyuge brahmankiṃviśiṣṭaṃ vadasva me |
śaṃbhuruvāca |
dhyānameva kṛte śreṣṭhaṃ tretāyāṃ yajña eva ca || 395 ||
[Analyze grammar]

dvāpare cārcanaṃ tiṣye dānaṃ ca harikīrtanam |
sarvaṃ ca śastaṃ sarvatra dhyānaṃ na ca kalau yuge || 396 ||
[Analyze grammar]

narāṇāṃ mugdhacittatvātkṛcchrasthānāṃ viśāṃpate |
na dharme niyatābuddhirna vede naiva ca smṛtau || 397 ||
[Analyze grammar]

na kratau na svadhākāre purāṇānāṃ ca na śrutau |
na yajñena ca tīrtheṣu na ca śuśrūṣaṇe satām || 398 ||
[Analyze grammar]

nejyāyāṃ devatānāṃ ca na svajātīyakarmmaṇi |
na devasmaraṇenāpi na ca kvāpi vṛṣe nṛpa || 399 ||
[Analyze grammar]

ataśca dīrghakālānāṃ puṇyānāmakṣamā narāḥ |
dānaṃ tu svalpakālatvātkartuṃ śaknoti mānavaḥ || 400 ||
[Analyze grammar]

ataśca kaliduṣṭānāṃ prāyaścitaṃ na vidyate |
keṣāṃcitpāpanāśaḥ syātprāyaścittaistu nānyathā || 401 ||
[Analyze grammar]

brahmajñānī gayāśrāddhī kāśīgaṃtā śrutau rataḥ |
purāṇajñāvamāścaite śrotā tasya ca rāghava || 402 ||
[Analyze grammar]

yugānāmanusāreṇa tathārthasya vivecanāt |
sva para pratyayotpādātparabrahmaprakāśanāt || 403 ||
[Analyze grammar]

purāṇavaktā sarvasmādbrāhmaṇastu viśiṣyate |
tenāpi ca kṛtaṃ pāpaṃ na sajyetkimutānyataḥ || 404 ||
[Analyze grammar]

anyeṣāmapi keṣāṃcitpurāṇaṃ pāpanāśanam |
yaḥ purāṇeṣu viśvāsī vaktāraṃ manyate gurum || 405 ||
[Analyze grammar]

brahmavidyāpradātāraṃ viśeṣaṃ jñātibaṃdhutaḥ |
tasya pāpāni sarvāṇi vilayaṃ yāntyasaṃśayam || 406 ||
[Analyze grammar]

atha śrīśailagamanaṃ pūjakasya maheśituḥ |
ataḥ kalau manuṣyāṇāṃ purāṇaṃ pāpanāśanam || 407 ||
[Analyze grammar]

purā kaliyuge rāma vṛttaṃ saṃkīrtaye śṛṇu |
āsīttu gautamo nāma brāhmaṇo vedavarjitaḥ || 408 ||
[Analyze grammar]

tasya puṣṭiḥ paśuścāstāṃ bhrātarau vedavarjitau |
tābhyāṃ saha kṛṣiṃ cakre tatra vṛddhimavāpa ca || 409 ||
[Analyze grammar]

dhanadhānyādikaṃ kiṃcidrājānaṃ dattavānatha |
uvāca vacanaṃ kiṃcidadhikāraṃ nirūpaya || 410 ||
[Analyze grammar]

arthaṃ na gamayiṣyāmi tau śaktau bhrātarau mama |
rājovāca |
brāhmaṇasyādhikāro hi vaidike dharmakarmaṇi || 411 ||
[Analyze grammar]

tadanyatra niyuktasya brāhmaṇyaṃ vipraṇaśyati |
gautama uvāca |
yugeṣvanyeṣu dharmoyaṃ kalidharmo na tādṛśaḥ || 412 ||
[Analyze grammar]

bhūpati tvaṃ hi bhūpāla nṛpāṇāṃ dharma ucyate |
brāhmaṇaśca parikṣīṇastaṃ kurvannaiva duṣyati || 413 ||
[Analyze grammar]

śūdrāṇāṃ tu kṛṣirddharmo nāpadyapyagrajanmanaḥ |
tasmātkṣattreṇa vartiṣye grāmānmama samādiśa || 414 ||
[Analyze grammar]

anyatra cātra kṣattreṇa vartanaṃ mama rocate |
anyanna tu tathetyukto dadau grāmāndvijanmanaḥ || 415 ||
[Analyze grammar]

grāmādhikāraduṣṭasya vartanaṃ tvanyathābhavat |
abhakṣi māṃsaṃ cāpāyi surā cābhāṣi durvacaḥ || 416 ||
[Analyze grammar]

parayoṣā tathā gāmi parasvaṃ pratyahāri ca |
akrīḍi dyūtamasakṛtkalaṃjaṃ cādi durbhujā || 417 ||
[Analyze grammar]

nāpūji jagatāmīśaḥ śivo vā viṣṇureva vā |
evaṃ kālena durvṛttaṃ rājā vākyamabhāṣata || 418 ||
[Analyze grammar]

vipra vipratvamutsṛjya śūdratvaṃ prāptavānasi |
tasmānniyogadharmeṇa bhavaṃtaṃ bhraṃśayāmi ca || 419 ||
[Analyze grammar]

māstu vipratvamadyaiva śūdrataiva varaṃ mama |
tadṛte yadi viprāste na bhokṣyaṃti varaṃ mama || 420 ||
[Analyze grammar]

na hi sarvamidaṃ tyaktuṃ śaktohaṃ pṛthivīpate |
śaṃbhuruvāca |
evaṃ vadati durvipre rājā tūṣṇīmatiṣṭhata || 421 ||
[Analyze grammar]

sa tu vai śūdratulyaśca bubhujennaṃ sahāmiṣam |
kadācidatha durvṛttaḥ pratolīmaṃḍapasthitaḥ || 422 ||
[Analyze grammar]

dvijena paṭhyamānaṃ tu padyaṃ tu śrutavānidam |
hṛdaye padyametattu dvijeritamatiṣṭhata || 423 ||
[Analyze grammar]

parātparataraṃ yāṃti nārāyaṇaparāyaṇāḥ |
na te tatra gamiṣyaṃti ye dviṣaṃti maheśvaram || 424 ||
[Analyze grammar]

vyākhyānamapi ca śrutvā paurāṇikamabhāṣata |
kīdṛṅnārāyaṇaḥ proktaḥ kīdṛśopi maheśvaraḥ || 425 ||
[Analyze grammar]

kiṃ paraṃ tvayanaṃ proktaṃ dveṣaḥ kīdṛgudāhṛtaḥ |
kiṃ tatparamiti khyātaṃ tataḥ parataraṃ ca kim || 426 ||
[Analyze grammar]

paurāṇika uvāca |
paraṃ tadbrahmaṇaḥ sthānaṃ sukhavyaktaikalakṣaṇam |
tataḥ parataraṃ viṣṇorddhāma tadbrahmaṇodhikam || 427 ||
[Analyze grammar]

avināśitayā tattu kīrtitaṃ paramaṃ padam |
tanmadhye puruṣo viṣṇustadaṃga paramaṃ vibhuḥ || 428 ||
[Analyze grammar]

āpo hi narajanmatvānnārāḥ proktā manīṣibhiḥ |
nārāścāsyāyanaṃ yasmāttena nārāyaṇaḥ smṛtaḥ || 429 ||
[Analyze grammar]

tatparaṃ vartanaṃ yeṣāṃ te proktāstatparāyaṇāḥ |
mahadādīni tatvāni yāni teṣāṃ ya īśvaraḥ || 430 ||
[Analyze grammar]

sūryāgniśaśinetro'sau maheśaḥ syādumāpatiḥ |
dveṣo hi vairaṃ vijñeyamīśvare paramātmani || 431 ||
[Analyze grammar]

śaṃbhuruvāca |
evaṃ purāṇabhaṭṭena samīritamidaṃ vacaḥ |
ciṃtayanpunarapyāha mādṛśasya kathaṃ gatiḥ || 432 ||
[Analyze grammar]

paurāṇiko'tha taṃ prāha śṛṇu vakṣyāmi te gatim |
kuru sarveṇa yatnena prāyaścittaṃ yathāvidhi || 433 ||
[Analyze grammar]

dharmaṃ cara yathāśakti yathākālaṃ yathāvidhi |
vimuktapāpaḥ paścāttvamuttamāṃ gatimeṣyasi || 434 ||
[Analyze grammar]

purāṇamathavā nityaṃ śṛṇuṣvāvahitaśca san |
nirāśo vā maheśānaṃ pūjayasva pinākinam || 435 ||
[Analyze grammar]

devaṃ vā puṃḍarīkākṣaṃ keśavaṃ kleśanāśanam |
saṃnyāsamathavā nityaṃ brahmajñānaparo bhava || 436 ||
[Analyze grammar]

athavā gaccha kāśīśaṃ muktau vā mṛtimāpnuhi |
gayāṃ vā gaccha tatra tvaṃ śrāddhaṃ kartuṃ prayatnataḥ || 437 ||
[Analyze grammar]

athavā sarvavedānāṃ sāraṃ pātakanāśanam |
rudraṃ rudrapriyakaraṃ japa pratyahamādarāt || 438 ||
[Analyze grammar]

śrīśailamathavā gaccha kedāramathavecchayā |
athavā prativarṣe tu māghasnānaṃ pravartaya || 439 ||
[Analyze grammar]

kimatra bahunoktena dharmabhaktaḥ sadā bhava |
naivaṃ narakavāsaste bhavitā tu dvijādhama || 440 ||
[Analyze grammar]

gautama uvāca |
śrutvā sarvaṃ kariṣyāmi purāṇaṃ bhavato mukhāt |
śāstraṃ viśvāsahetuṃ ca varjaṃ cāpi vadasva me || 441 ||
[Analyze grammar]

paurāṇika uvāca |
varjyaṃ māṃsaṃ surā'nyastrī bhogo dyūtaṃ vikatthanam |
pāruṣyamanṛtaṃ māyā devadevaviniṃdanam || 442 ||
[Analyze grammar]

gurūṇāṃ suravṛddhānāṃ purāṇasmṛtibhāṣiṇām |
niṃdanaṃ śvetavṛṃtākaṃ kṛtakālābuvartanam || 443 ||
[Analyze grammar]

bījapūraṃ kusuṃbhaṃ ca lohitaṃ śṛṃgameva ca |
araruṃ nālikeraṃ ca kūṣmāṃḍakaṃ tathaiva ca || 444 ||
[Analyze grammar]

kovidāraphalaṃ tailapakvaṃ mānavajaṃ payaḥ |
vārdhrīṇasa kharī dugdhaṃ sūtikā kṣīramāvikam || 445 ||
[Analyze grammar]

auṣṭramekaśaphakṣīraṃ mārgamājaṃ nṛsaṃbhavam |
vivatsāsaṃdhinīkṣīraṃ lavaṇaṃ caiva yogi yat || 446 ||
[Analyze grammar]

nālikerarasaṃ kāṃsye tāmre madhu ca sīsake |
kāce takraṃ karaṃbhāṃśca ghṛtāktānnaiva kārayet || 447 ||
[Analyze grammar]

homaṃ tu mṛṇmaye pātre puroḍāśaṃ tu rājate |
na seveta paraṃ loke śubhārthī tu vicakṣaṇaḥ || 448 ||
[Analyze grammar]

pātrāṃtaścūrṇalepo'pi tatra bhakṣaṇameva ca |
kramukasya tathā bhakṣaścūrṇapatrasya caiva hi || 449 ||
[Analyze grammar]

kramukasyāpi pakvasya bhakṣaṇaṃ kramiyoginaḥ |
pāyase lavaṇaṃ caiva kevalaṃ ca karārpitam || 450 ||
[Analyze grammar]

siṃdhusaurāṣṭrakāṃbojamāgadheṣu ca siṃhale |
na doṣāya bhavettatra kṣīraṃ ca lavaṇānvitam || 451 ||
[Analyze grammar]

kṣīrāṇi ca samastāni lavaṇāni ca yogataḥ |
deśeṣvanyeṣu doṣāya pāne caiveha saṃśayaḥ || 452 ||
[Analyze grammar]

kimatra bahunoktena sadbhirniṃdyaṃ vivarjayet |
śaṃbhuruvāca |
evaṃ tasya vacaḥ śrutvā brāhmaṇasya mahātmanaḥ || 453 ||
[Analyze grammar]

svameva bhavanaṃ gatvā ciṃtayāmāsa duḥkhitaḥ |
rātrau mṛtyurdivā ceti na jānāti mahānapi || 454 ||
[Analyze grammar]

paraloke sukhaṃ duḥkhamiha bhogavinodanam |
krimikīṭamanuṣyādyaiḥ sukha duḥkhaiḥ pṛthakpṛthak || 455 ||
[Analyze grammar]

pratijīvaṃtu hetūnāṃ bhedo'pi suviniścayaḥ |
ekasyāpi hi jīvasya nāsti caikavidhā sthitiḥ || 456 ||
[Analyze grammar]

janmakāle mahā'jñānaṃ śaiśavetyalpabodhanam |
skhalatpadelpavijñānaṃ bālye cālpaṃ tathaiva ca || 457 ||
[Analyze grammar]

kaumāre krīḍanaratiryauvane viṣayoṣitam |
yauvane vinivṛtte tu dravyasaṃpādaneṣaṇā || 458 ||
[Analyze grammar]

vārddhake bhogalipsā ca na bhoktuṃ kṣamatepi ca |
dūṣikā śleṣmalālābhirvalīpalitakaṃpanaiḥ || 459 ||
[Analyze grammar]

śvāsakāsānilākṣiptairhṛṣīkairvikalairyutaḥ |
kiṃciddhartuṃ na śaknoti na ca jānāti kiṃcana || 460 ||
[Analyze grammar]

tiṣṭhaṃtīṣu parastrīṣu guhyasthānaṃ pradarśayet |
kośakaṃḍūyanaparaḥ krūro jīvitalakṣaṇaiḥ || 461 ||
[Analyze grammar]

kaṃḍūyate sphicau vastramuddhṛtya ca vicālayan |
bhuṃjānaḥ śleṣmaṇā grāsaṃ grasituṃ na ca śaknuyāt || 462 ||
[Analyze grammar]

yadā kāsastadā jajñe pāyuvāyuśca śabdavān |
niḥsṛtiśca malasyāpi śleṣmanirgama eva ca || 463 ||
[Analyze grammar]

snuṣādibhartsanaṃ bāla tālahāsyanidarśanam |
gurunirgamanādīni saṃciṃtya ca punaḥ punaḥ || 464 ||
[Analyze grammar]

āhūto bhojanādyarthaṃ bhojyānnādi viniṃdayan |
ciramuṣṇaṃ ca nirbhartsya punaściṃtāmavāpa saḥ || 465 ||
[Analyze grammar]

atiduṣkṛtikarmmāhaṃ kathaṃ bhokṣye kathaṃ svape |
kathaṃ tiṣṭhe kathaṃ gacche paralokaḥ kathaṃ bhavet || 466 ||
[Analyze grammar]

iti ciṃtākulo nityaṃ na namatyaparānvitaḥ |
dvijasya sadanaṃ gatvā purāṇajñasya rāghava || 467 ||
[Analyze grammar]

lajjāvākkṛtavaktraśca kiṃkaromītyabhāṣata |
na kiṃcidapyuvācāsau dvijaḥ paurāṇikastadā || 468 ||
[Analyze grammar]

pāpoyamiti vijñāya śiṣyeṇa niragāmayat |
gautamopi vinirgamya dvāryeva ca bahiḥ sthitaḥ || 469 ||
[Analyze grammar]

bhuvyāsīnaṃ tu vijñāya purāṇārthavicārakam |
kathaṃ kathamapi prāpya pīṭhaṃ dattaṃ ca nābhajat || 470 ||
[Analyze grammar]

niṣaṇṇo bhūtale rāma purāṇajñamabhāṣata |
prāyaścittaṃ kariṣyāmi tadatraiva vidhīyatām || 471 ||
[Analyze grammar]

brāhmaṇa uvāca |
pāpāni kīrtayasva tvaṃ sarvathaiva kṛtāni tu |
sa cāpi nā'kṛtaṃ kiṃcinmayā pāpamitīrayan || 472 ||
[Analyze grammar]

rudanpapāta bhūmyāṃ ca kathaṃ tāteti pīḍitaḥ |
brāhmaṇastamatha prāha prāyaścittaṃ na vidyate || 473 ||
[Analyze grammar]

mahāpāpaṃ trirāvṛtte punaśca yadi cetkṛtam |
gautama uvāca |
paurāṇika mahābhāga prāpyāpi tvāmahaṃ katham || 474 ||
[Analyze grammar]

pāpayukto dvijaśreṣṭha saṃgatirviphalā bhavet |
paurāṇika uvāca |
śāstraṃ pramāṇaṃ sarveṣāṃ prāyaścittavinirṇaye || 475 ||
[Analyze grammar]

tadvinā yo hi taṃ brūyātprāyāścittaṃ na tadbhavet |
sakṛtkṛte sakṛtproktaṃ dvitīye dviguṇaṃ bhavet || 476 ||
[Analyze grammar]

tṛtīye triguṇaṃ proktaṃ caturthe nāsti niṣkṛtiḥ |
tvayā kṛtaṃ tu bahudhā caturvidhamapīcchayā || 477 ||
[Analyze grammar]

kathaṃ vaktumahaṃ śaktaḥ prāyaścittaṃ bhavādṛśe |
gautamo'pi punaḥ prāha kva gaṃtavyaṃ mayeti ca |
upavāsatrayaṃ kṛtvā śivarātrimaviṃdata || 480 ||
[Analyze grammar]

caturthamupavāsaṃ ca cakārātīva duḥkhitaḥ |
pāraṇaṃ cāpyamāyāṃ sa kṛtavānphalavalkalaiḥ || 481 ||
[Analyze grammar]

atha pradakṣiṇaṃ cakre śrīśailasya ca sa dvijaḥ |
gatavānmaṃdiraṃ paścācciṃtayātikṛśaḥ śvasan || 482 ||
[Analyze grammar]

kathaṃ pāpanivṛttirme tūṣṇīṃbhūtasya setsyati |
anaṃtamavicāryaṃ kiṃ pāpaṃ ca sumahattaram || 483 ||
[Analyze grammar]

śrutvā na kopi me brūyātprāyaścittaṃ vidhīyatām |
kiṃtu kasminpurāṇe tu śrute jñātaṃ bhaviṣyati || 484 ||
[Analyze grammar]

iti kṛtvā matiṃ sotha purāṇajñamabhāṣata |
purāṇamekaṃ me tāta vyākhyātu bhagavāniti || 485 ||
[Analyze grammar]

jātakarmādisaṃskārānkārayasva mamāśu vai |
dvijo bhūtvā śṛṇomyadya prāyaścittaṃ karomyataḥ || 486 ||
[Analyze grammar]

vidhāyakaṃ purāṇaṃ me bhaviṣyati ca kīrtitam |
ataḥ śakyaṃ kariṣyāmi purāṇārthaṃ viniścayan || 487 ||
[Analyze grammar]

paurāṇika uvāca |
yathāvatkīrtayiṣyāmi purāṇaṃ pāpanāśanam |
yathājñānaṃ yathāśakti yathāśuddhaṃ yathāvidhi || 488 ||
[Analyze grammar]

kiṃ vāṃcchasi purāṇaṃ tu kīrtayiṣye tadeva tu |
gautama uvāca |
sarvaṃ ruci purāṇaṃ me vaktavyaṃ kiṃ hitaṃ vada || 489 ||
[Analyze grammar]

śrute yasminbhidā naiva jāyate tu harīśayoḥ |
paurāṇika uvāca |
kaurmoktaṃ yatpurāṇaṃ taddevayorabhidābhidham || 490 ||
[Analyze grammar]

śṛṇoti yastatprathamaṃ tasya pāpaṃ vinaśyati |
tasya vaktā tu yo viprastasya vighnāṃtaraṃ bhavet || 491 ||
[Analyze grammar]

śrotavyaṃ manyate pāpo yadi bhāryā vinaśyati |
kiṃcaikaṃ duṣkaraṃ vakṣye śroturvakturaniṃdakam || 492 ||
[Analyze grammar]

vyākhyātari yadi prītirddharmādeva prakāśinī |
ācāradarśane puṇye karmamokṣādidarśake || 493 ||
[Analyze grammar]

tadā tuṣṭo maheśaḥ syādviṣṇuriṣṭaphalapradaḥ |
pitarastāritāstena yāṃti te paramāṃ gatim || 494 ||
[Analyze grammar]

iti śrīpadmapurāṇe pātālakhaṃḍe śivarāghavasaṃvāde |
caturdaśottaraśatatamo'dhyāyaḥ || 114 ||
[Analyze grammar]