Chapter 9

|| navamo'dhyāyaḥ ||

śrīḥ-
bhagavan puṇḍarīkākṣa sarvaśāstrārthavittama|
prāsādabhedamadhunā mahyaṃ tvaṃ vaktumarhasi|| 9.1 ||
bhagavān-
prabhedamadhunā vakṣye vimānānāṃ salakṣaṇam|
(1)bhedān vaktumaśakyatvāt kiṃcidevopapādyate|| 9.2 ||
(1.pā. ānantyāt tacca bhedānāṃ kiñcideva pradarśyate|)
(2)talādhiṣṭhānabhedena vimānā bahudhā rame|
caturaśrā vartulāśca tathāṣṭāśraṣaḍaśrakāḥ|| 9.3 ||
(2.pā. vimānāni ca bhidyante talādhiṣṭhānabhedataḥ|)
caturaśrāyatāścaiva vṛttāyatavibhedataḥ|
mastakagrīvayorvṛttaṃ vaijayantaṃ pracakṣate|| 9.4 ||
mūle mūle yadi sthūlamagre'gre (3)sūkṣmakaṃ bhavet||
purobhāge mahāghoṇaṃ tridikṣu svalpanāsikam|| 9.5 ||
(3.pā. sūkṣmamadbhutam|)
stūpīcatuṣkaṃ nāsāyāṃ vimāne cobhayorapi|
vṛttāyatavimānaṃ (4)tadrathadhāmābhipūjitam|| 9.6 ||
(4.pā. tad‌dṛḍhadhāmābhipūjitam|)
(5)sakarṇakūṭaśṛṅgāgraṃ madhye bhadraṃ tathāvidham|
śrīviśālamiti (6)proktamaṣṭāśraṃ svastibandhanam|| 9.7 ||
(5.pā. sakarṇakūṭaṃ śrībhogaṃ)
(6.pā. proktaṃ vasvaśraṃ)
śrīkaraṃ caturaśraṃ tu (7)ṣoḍaśāśraṃ tu puṣpakam|
bhadreṇa sahitaṃ madhye mastake karṇa(8)bandhanam|| 9.8 ||
(7.pā. ṣoḍaśāśrayutaṃ punaḥ|)
(8.pā. kandharam|)
koṣṭhakaṃ bhadranāsyaṅgaṃ suvṛttaṃ galamastakam|
vimānaṃ kesaraṃ nāma sarvālaṃkāraśobhitam|| 9.9 ||
mukhe mukhe samāvṛttaṃ śirastu dvitrinetrakam|
saumukhyaṃ karkarībhūtaṃ vṛttagarbhagṛhānvitam|| 9.10 ||
mukhe tasya mahāghoṇaṃ vimānaṃ cobhayorapi|
stūpīyugmamayugmaṃ vā nāsikālpaṃ tridikṣu ca|| 9.11 ||
vṛttāyataṃ suvṛttaṃ vā nāmnaitat syātsudarśanam|
caturaśramadhiṣṭhānaṃ (9)tadvatkarṇaṃ ca mastakam|| 9.12 ||
(9.pā. tadvatkaṇṭhaṃ)
(10)catuṣkūṭena saṃyuktaṃ catuṣkoṣṭhasamanvitam|
śikharaṃ ca mahaddikṣu mahānāsābhiranvitam|| 9.13 ||
(10.pā. catuṣkūṭasamāyuktaṃ)
toraṇairvedibhadraiśca nānācitrairvicitritam|
nāmnaitat svastikaṃ proktaṃ (11)vimāneṣūttamaṃ smṛtam|| 9.14 ||
(11.pā. vimāneṣu supūjitam|)
tadeva sauṣṭhikaṃ nimnamunnataṃ koṣṭhakaṃ yadi|
antaḥ prastarasaṃyuktametadvipulasundaram|| 9.15 ||
aṃśamaṃśadvayaṃ satripādāṃśaṃ sāṅghribhāgakam|
bhāgadvayaṃ vibhaktāṅghriṃ prastaragrīvamastakam|| 9.16 ||
pādodaye navāṃśe tu dvitalādivimānake|
antaraprastaropetaṃ kūṭaśālābhiranvitam|| 9.17 ||
nānālaṃkārasaṃyuktaṃ nānāpādairalaṃkṛtam|
[vimānaṃ parvataṃ proktaṃ vimāneṣu supūjitam|| 9.18 ||
tadeva vartulaṃ vedikaṃdaraṃ śikharaṃ ghaṭam|
aṣṭakūṭaṃ catuḥśālāyuktaṃ saptāṣṭanāsikam|| 9.19 ||]
[koṣṭhakaṃ nirmalaṃ madhye dvitridaṇḍena soṣṭakam|
samagrīvaśiropetaṃ kūṭakoṣṭhasamanvitam|| 9.20 ||
nānādhiṣṭhānasaṃyuktaṃ nānāpādairalaṃkṛtam|]
caturaśraṃ suvṛttaṃ vā (12)(13)nābhibhirbahubhiryutam|| 9.21 ||
(12.gra. nāsābhiḥ)
(13.pā. nābhibhiḥ)
nāmnaitanmandaraṃ proktaṃ vimānaṃ (14)kamalālaye|
tadeva śikhare sārdha(15)koṇakaṃ tu catuṣṭayam|| 9.22 ||
(14.pā. kamalāsana)
(15.pā. koṣṭhakam)
caturaśraśiroyuktaṃ catuṣkūṭasamanvitam|
(16)anekatalasaṃyuktaṃ nānādhiṣṭhānamadbhutam|| 9.23 ||
(16.pā. nānādhiṣṭhānasaṃyuktamanekatalasaṃyutam|)
(17)sahasranāsīsahitaṃ tadardhaṃ pādameva vā|
nāmnaitatsvastibandhaṃ (18)syādanekāṅgopaśobhitam|| 9.24 ||
(17.pā. nāsībhiśca sahasraistu)
(18.pā. syānnānāvayavaśobhitam|)
tadeva (19)pauṣṭikaṃ koṣṭhamantarāprastarairyutam|
hārālpaṃ (20)bandhuraṃ nimnaṃ (21)navālpairalpanāsikam|| 9.25 ||
(19.pā. sauṣṭhikaṃ)
(20.pā. kandharaṃ)
(21.navāṣṭaivalpināsikam|)
(22)nānācitrasamākīrṇametat (23)kalyāṇakaṃ smṛtam|
caturaśramadhiṣṭhānaṃ vṛttagarbhagṛhānvitam|| 9.26 ||
(22.pā. nānālaṅkārasaṃyuktam)
(23.pā. kalyāṇamiṣyate|
      atra kalyāṇānantaraṃ pāñcālaṃ viṣṇukāntaṃ, sumaṅgalaṃ, kāntāraṃ, puṣkaram iti pañca vimānāni pādme adhikatayā varṇitāni|)
sarvālaṃkārasaṃyuktametat (24)kauberakāntakam|
tadeva caturaśraṃ syād garbhagehamasūrakam|| 9.27 ||
(24.gra. nāmnā manoharam|)
vartulaṃ janmatastūpikāntaṃ ced‌vṛttaharmyakam|
āyatāśramadhiṣṭhānaṃ ṣaḍaśraṃ kaṃdharaṃ śiraḥ|| 9.28 ||
nānālaṃkārasaṃyuktametat (25)nāmnā manoharam|
nānādhiṣṭhānasaṃyuktaṃ nānāpādairalaṃkṛtam|| 9.29 ||
(25.gra.kauberakāntakam|)
pādoparisamāsīnasvastikābandhaśobhitam|
anekatalasaṃyuktaṃ nānālaṃkārasaṃyutam|| 9.30 ||
(26)bahunāsīsamāyuktaṃ stūṣibhirbahubhiryutam|
bhadrakoṣṭhamidaṃ nāmnā cāyataṃ caturaśrakam|| 9.31 ||
(26.pā. nāsībhirbahumiryuktaṃ|)
tadeva vartulaṃ (27)karṇakūṭaṃ karṇaśirastathā|
caturnāsīsamāyuktaṃ vṛttakūṭamidaṃ bhavet|| 9.32 ||
(27.gra kaṇṭha)
tadevāṣṭāṃśamādhikyamāyataṃ (28)caturaśravat|
karṇakūṭaṃ tathā karṇamāyataṃ vṛttamastakam|| 9.33 ||
(28.pā. caturaśrakam|)
śeṣaṃ pūrvavaduddiṣṭaṃ nāmnā śrībhogasaṃjñitam|
vṛtte vṛttāyate caiva nāsībhirbahubhiryutam|| 9.34 ||
anekatalasaṃyuktaṃ (29)nānācitravirājitam|
vimānādārakairyuktametatpuṣkaramiṣyate|| 9.35 ||
(29.pā. nānālaṅkārasaṃyutam|)
jalasthalaṃ vihāyordhve āyataṃ caturaśrakam|
karṇaṃ ca śikharaṃ tadvat caturnāsīsamāyutam|| 9.36 ||
(30)nānāśobhānvitaṃ tatsyāllambapañjaramīritam|
nānā masūrakastambhavedikādyairadhiṣṭhitam|| 9.37 ||
(31)
(30.pā. nānālaṅkārasaṃyuktaṃ|)
(31.gra. jālatoraṇam|)
(32)vicitrapādasaṃyuktam (33)jayākhyaṃ paricakṣate|
[tadevānyairalaṃkārairvedāśraṃ kaṃdharaṃ śiraḥ|| 9.38 ||
(32.pā. nānānāṭakasaṃyuktaṃ|)
(33.gra. etannāmnā jayāvaham)
nānāmasūrakastambhavedikādyai(34)radhiṣṭhitam|(35)]
evamādivimānāni kārayitvā ca śilpibhiḥ|| 9.39 ||
(34.pā. ralaṃkṛtam|)
(35.idaṃ vedikākhyavimānavarṇanam; atra nāmanirdeśaparau ślokārdhau luptau bhātaḥ| tataḥ paraṃ padme pañcaviṃśatiḥ vimānāntarāṇi adhikatayā varṇitāni|)
tato mūrdheṣṭakādhānaṃ kuryāddeśikasattamaḥ|
mūrdheṣṭakāvidhiścāpi mūleṣṭakasamo bhavet|| 9.40 ||
kumbhādipūjanaṃ kṛtvā yajamānena deśikaḥ|
tatraiva rātriṃ ninayejjāgareṇa hariṃ smaran|| 9.41 ||
prātarnityāhnikaṃ kṛtvā dhyāyannārāyaṇaṃ harim|
śaṅkhatūryaninādena vedaghoṣeṇa saṃyutaḥ|| 9.42 ||
śilā ādāya cartvigbhiḥ prādakṣiṇyena mandiram|
(36)āropayecca tāḥ sarvā vimānasyoparisthale|| 9.43 ||
(36.pā. āropayeyuḥ|)
vimānāgramathāruhya prāṅmukhaḥ puṇyavāriṇā|
prokṣya nārāyaṇaṃ dhyātvā sthāpayettacchilā rame|| 9.44 ||
stūpyādhāraṃ tataḥ kuryuḥ śilpino'ṇḍasamaṃ dṛḍham|
bahvyīścet‌stūpikāḥ kuryurnīlotpaladalākṛtīḥ|| 9.45 ||
dīrghapīṭhāmanaśraṃ vā ṣoḍaśāśramathāpi vā|
caturaśraṃ vartulaṃ vāpyaṣṭāśraṃ vā prakalpya ca|| 9.46 ||
kumbhādhārasya deśe tu dalān padmasya kalpayet|
saṃsthāpayet tadupari stūpikāstu yathecchayā|| 9.47 ||
ekā vā dve ca tisro vā catasro vā varānane|
aṣṭau vā dvādaśā vāpi ṣoḍaśā vāpi viṃśatiḥ|| 9.48 ||
vimānakaṇṭhatulitaṃ lohajaṃ dārujaṃ tu vā|
saṃsthāpyā stūpikā kīlamekaṃ vā bahu vā rame|| 9.49 ||
vṛttāyate vimāne tu caturaśrāyate'pi vā|
yugmaṃ syāt stūpikākīlamapunarbhavakāṅkṣiṇām|| 9.50 ||
itareṣāmayugmaṃ syāt stūpikā kila kalpanam|
yugmaṃ viṃśatisaṃkhyākamayugmaṃ tvekahīnakam|| 9.51 ||
caturaśre ṣaḍaśre cāpyaṣṭāśre (37)tvekakīlakam|
stūpikā kīlamekaṃ syāt sarvakāmaphalapradam|| 9.52 ||
(37.gra. samavṛttake)
kīlāntamitthaṃ nirmāya vimānasya ca sarvataḥ|
mūrtīḥ saṃsthāpyedvidvān śilpaśāstravicakṣaṇaiḥ|| 9.53 ||
indramaindryāṃ (38)vimānasya kumāraṃ vāpi potriṇam|
vāsudevaṃ śrīdharaṃ vā dakṣiṇasyāmumāpatim|| 9.54 ||
(38.pā. kumāraṃ vā dakṣiṇasyāmumāpatim|)
dakṣiṇāmūrtimathavā (39)saṃkarṣaṇamathāpi vā||
satyaṃ vāpi varāhaṃ vā pratīcyāmacyutaṃ tu vā|| 9.55 ||
(39.pā. pratīcyāṃ nṛhariṃ harim|)
pradyumnaṃ vā nṛsiṃhaṃ vā tathodīcyāṃ dhanādhipam|
brahmāṇaṃ vāniruddhaṃ vāpyanantaṃ vā prakalpayet|| 9.56 ||
talādhike tu pūrvoktān krameṇa parikalpayet|
dhruvaberasamā ete bhaveyuḥ śayanādiṣu|| 9.57 ||
indrādayastu digdevā āsīnā eva sarvadā|
caturaśre ca vai dhāmni caturaśrāyate'pi vā|| 9.58 ||
vṛtte vṛttāyate vāpi bhaveyuḥ sadmadhāriṇaḥ|
vīrasenaḥ suṣeṇaśca vīranāthaḥ subhadrakaḥ|| 9.59 ||
pūrṇaśca puṣkarākṣaśca ānando nandanastathā|
viṣṇupāriṣadāḥ sthāpyāḥ karālavadanānvitāḥ|| 9.60 ||
tale tale vimānasya surā vidyādharāstathā|
nṛtyanto bahudhā veṇuvīṇāpaṇavadhāriṇaḥ|| 9.61 ||
mamāvatārāḥ sarvatra kalpyāstacceṣṭitāni ca|
bhūtamālāstathā kalpyā nṛtyanto vikṛtānanāḥ|| 9.62 ||
garuḍaḥ śaṅkhacakrādilācchanīyāstale tale|
evaṃ mūrtīḥ purākalpya varṇalepaṃ prakalpayet|| 9.63 ||
(40)avaśyaṃ varṇalepaḥ syāditi śāstravido viduḥ|
śvetaṃ pītaṃ tathā raktaṃ haritaṃ kṛṣṇameva ca|| 9.64 ||
(40.pā. varṇalepaṃ tataḥ kuryācchilpi(pī)śāstravicakṣaṇaḥ|)
(41)pañcavarṇāḥ pṛthivyādyāḥ varṇānāmadhidevatāḥ|
mūrtīnāṃ yugabhedena varṇabhedā (42)bhavedrame|| 9.65 ||
(41.pā. pañcavarṇaṃ pṛthivyādi)
(42.pā. vidhīyate|)
kṛte valarkṣastretāyāmaruṇo dvāpare punaḥ|
pītaḥ kalau (43)vāsudevo ghanaśyāmaḥ paraḥpumān|| 9.66 ||
(43.pā. dhanaśyāmo vāsudevaḥ)
raktaḥ saṃkarṣaṇo devaḥ pradyumnaḥ kanakaprabhaḥ|
śyāmo'niruddhaḥ saṃproktaḥ keśavaḥ kanakaprabhaḥ|| 9.67 ||
(44)nārāyaṇaḥ śvetavarṇo mādhavaḥ śyāmavarṇakaḥ|
govindaḥ sphaṭikābhaḥ syādviṣṇuḥ kiñjalkasaṃnibhaḥ|| 9.68 ||
(44.pā. nārāyaṇaḥ śyāmavarṇaḥ mādhavaḥ sphaṭikaprabhaḥ|)
madhuhantā raktavarṇaḥ śikhivarṇastrivikramaḥ|
vāmano bālasūryābhaḥ śrīdharaḥ śvetapadma(45)bhāḥ|| 9.69 ||
(45.gra. bhaḥ)
hṛṣīkeśastaṭidvarṇaḥ padmanābhastu nīla(46)bhāḥ|
bandhūkakusumasyeva varṇo dāmodaraḥ smṛtaḥ|| 9.70 ||
(46.gra. bhaḥ)
puruṣottamaḥ sphaṭikavarṇaḥ śyāmavarṇastvadhokṣajaḥ|
nṛsiṃho hemavarṇaḥ syādacyutaḥ pītavarṇakaḥ|| 9.71 ||
janārdanastu raktaḥ syādupendraḥ śyāmalaḥ smṛtaḥ|
hariḥsyātpītavarṇastu kṛṣṇaḥ kṛṣṇaghanaprabhaḥ|| 9.72 ||
śrīḥ suvarmasamā bhūmirdharā śyāmārjunāthavā|
sarasvatī śvetavarṇā prītiḥ syā(47)cchvetaraktimā|| 9.73 ||
(47.gra. śyāmarakṣikā)
kīrtiḥ raktā(48)sphaṭikavarṇā śāntistuṣṭistu pītakā|
puṣṭiḥ śyāmā tvaṣṭavarṇāstvaṣṭānāṃ kārayedguruḥ|| 9.74 ||
(48.sphaṭikābhā)
matsyaḥ sphaṭikasaṃkāśaḥ kūrmaḥ kāñcanavarṇabhāk|
varāhaḥ śyāmalo varṇo nṛsiṃhaścandravarṇakaḥ|| 9.75 ||
jāmadagnyaḥ suvarṇābho (49)rāmaḥ śyāmalavarṇabhāk|
(50)bharatasya tathā varṇo lakṣmaṇaḥ kanakaprabhaḥ|| 9.76 ||
(49.pā. rāghavaḥ śyāmalākṛtiḥ|)
(50.pā. bharataḥ śyāmalo varṇaḥ)
śatrughno (51)raktavarṇaḥ syāt sītā hemanibhā bhavet|
māṇḍavī (52)raktavarṇā syādūrmilā śyāmalākṛtiḥ|| 9.77 ||
(51.pā. raktavarṇābhaḥ sītā hemanibhākṛtiḥ|)
(52.pā. raktavarṇābhā ūrmilā śyāmalaprabhā|)
śrutakīrtiḥ sitāṅgīṃ syāddhanūmān kāñcanaprabhaḥ|
(53)aṅgo raktavarṇaḥ syātsugrīvo hemapiṅgalaḥ|
guho vibhīṣaṇaścaiva nīlo nīlasamaprabhaḥ|
jāmbavān svarṇavarṇaḥ syādrāmāśrayagaṇastvayam|| 9.78 ||
(53.ayaṃ ślokaḥ gra. pustake nāsti)
kṛṣṇadeho nīlavarṇo rāmaḥ pāṇḍuravarṇabhāk|
kanakābhā rukmiṇī syātsatyā śyāmalavarṇinī|| 9.79 ||
revatī raktavarṇā syātsātyakī nīlavarṇabhāḥ(54)|
yaśodā svarṇavarṇā syād devakī kanakaprabhā|| 9.80 ||
(54.gra. bhāk)
arjunaḥ śvetavarṇaḥ syāt kṛṣṇasevāparā ime|
(55)kalkī ca śvetavarṇaḥ syād (56)(57)brahmā ca kanakākṛtiḥ|| 9.81 ||
(55.pā. kalkī raktanibhaḥ smṛtaḥ|)
(56.gra. syādanantaḥ kṣīrasaṃnibhaḥ)
(57.pā. kanakaprakhyo brahmā)
(58)ananto kṣīravarṇaḥ syāddha (59)garuḍaḥ kāñcanaprabhaḥ|
rudraḥ śoṇitavarṇaḥ syāddhayagrīvo valarkṣabhāḥ|| 9.82 ||
(58.gra. guruḍaḥ kāñcanābhaḥ syāt|)
(59.gra. brahmā ca kanakākṛtiḥ)
senānī śyāmalaḥ proktaḥ śvetavarṇo vināyakaḥ|
brāhmī nīlā raktavarṇā maheśvaryaparā tathā|| 9.83 ||
kaumārī vaiṣṇavī śyāmā vārāhī śyāmalaprabhā|
indrāṇī śyāmalā proktā cāmuṇḍā raktavarṇakā|| 9.84 ||
indraḥ śyāmo'gniraruṇo yamaḥ kālastathāparaḥ|
nirṛtirnīlavarṇaḥ syād varuṇaḥ śyāmalākṛtiḥ|| 9.85 ||
vāyurdhūmraḥ sitaḥ somo rudro rakto'ṣṭadiggatāḥ|
vijayaḥ śyāmavarṇaḥ syāt padmī padmanibho bhavet|| 9.86 ||
gadādharo hemavarṇaḥ kṛṣṇaḥ khaḍgī tathā paraḥ|
śārṅgī hemanibho (60)vajrī musalī śvetavarṇakau|| 9.87 ||
(60.pā. śveto vajradharo mataḥ| śyāmo musaladhārī)
kanakaḥ pāśadhārī syādaṅkuśī kṛṣṇavarṇakaḥ|
(61)caṇḍo raktaḥ pracaṇḍaśca śvetaḥ pīto jayastathā|| 9.88 ||
(61.gra. idamardhaṃ 85-ślokottarārdhānantaraṃ dṛśyate|)
raktapītanibho dhātā vidhātā śvetavarṇakaḥ|
subhadrabhadrāvaruṇo kṛtāntaḥ śyāmalaprabhaḥ|| 9.89 ||
asuradhvaṃsano raktaḥ kuberākṣastu pītakaḥ|
kubero raktavarṇaḥ syād durjayaḥ kṛṣṇavarṇakaḥ|| 9.90 ||
prabalaḥ śvetavarṇastu raktaḥ syādviśvabhāvanaḥ|
puṣkaraḥ śvetavarṇaḥ syāt saṃbhavaḥ śyāmalākṛtiḥ|| 9.91 ||
suśobhanaḥ śyāmavarṇaḥ prabhavo (62)raktavarṇabhāk|
subhadraḥ kumudaḥ śvetaḥ kumudākṣo'gnikāntimān|| 9.92 ||
(62.gra. raktavarṇakaḥ)
puṇḍarīkaḥ sitaḥ prokto vāmanaḥ śyāmalākṛtiḥ|
(63)śaṅkukarṇo raktavarṇaḥ sarvanetro'sitaprabhaḥ|| 9.93 ||
(63.pā. rakto bhavecchaṅ‌kukarṇo)
sumukhaḥ śyāmalo (64)varṇo raktābhaḥ supratiṣṭhitaḥ|
evaṃ vimānamūrtīnāṃ dvārapānāṃ ca pārṣadām|| 9.94 ||
(64.pā. laḥ proktaḥ)
varṇalepaṃ kārayitvā maṇḍapān kārayettataḥ|| 9.95 ||

|| iti śrīśrīpraśnasaṃhitāyāṃ navamo'dhyāyaḥ ||