Chapter 1

nārāyaṇaṃ namaskṛtya naraṃ caiva narottamam |
devīṃ sarasvatīṃ caiva tato jayamudīrayet || 0 ||
[Analyze grammar]

lomaharṣaṇaputra ugraśravāḥ sūtaḥ paurāṇiko naimiṣāraṇye śaunakasya kulapaterdvādaśavārṣike satre || 1 ||
[Analyze grammar]

samāsīnānabhyagacchadbrahmarṣīnsaṃśitavratān |
vinayāvanato bhūtvā kadācitsūtanandanaḥ || 2 ||
[Analyze grammar]

tamāśramamanuprāptaṃ naimiṣāraṇyavāsinaḥ |
citrāḥ śrotuṃ kathāstatra parivavrustapasvinaḥ || 3 ||
[Analyze grammar]

abhivādya munīṃstāṃstu sarvāneva kṛtāñjaliḥ |
apṛcchatsa tapovṛddhiṃ sadbhiścaivābhinanditaḥ || 4 ||
[Analyze grammar]

atha teṣūpaviṣṭeṣu sarveṣveva tapasviṣu |
nirdiṣṭamāsanaṃ bheje vinayāllomaharṣaṇiḥ || 5 ||
[Analyze grammar]

sukhāsīnaṃ tatastaṃ tu viśrāntamupalakṣya ca |
athāpṛcchadṛṣistatra kaścitprastāvayankathāḥ || 6 ||
[Analyze grammar]

kuta āgamyate saute kva cāyaṃ vihṛtastvayā |
kālaḥ kamalapatrākṣa śaṃsaitatpṛcchato mama || 7 ||
[Analyze grammar]

sūta uvāca |
janamejayasya rājarṣeḥ sarpasatre mahātmanaḥ |
samīpe pārthivendrasya samyakpārikṣitasya ca || 8 ||
[Analyze grammar]

kṛṣṇadvaipāyanaproktāḥ supuṇyā vividhāḥ kathāḥ |
kathitāścāpi vidhivadyā vaiśaṃpāyanena vai || 9 ||
[Analyze grammar]

śrutvāhaṃ tā vicitrārthā mahābhāratasaṃśritāḥ |
bahūni saṃparikramya tīrthānyāyatanāni ca || 10 ||
[Analyze grammar]

samantapañcakaṃ nāma puṇyaṃ dvijaniṣevitam |
gatavānasmi taṃ deśaṃ yuddhaṃ yatrābhavatpurā |
pāṇḍavānāṃ kurūṇāṃ ca sarveṣāṃ ca mahīkṣitām || 11 ||
[Analyze grammar]

didṛkṣurāgatastasmātsamīpaṃ bhavatāmiha |
āyuṣmantaḥ sarva eva brahmabhūtā hi me matāḥ || 12 ||
[Analyze grammar]

asminyajñe mahābhāgāḥ sūryapāvakavarcasaḥ |
kṛtābhiṣekāḥ śucayaḥ kṛtajapyā hutāgnayaḥ |
bhavanta āsate svasthā bravīmi kimahaṃ dvijāḥ || 13 ||
[Analyze grammar]

purāṇasaṃśritāḥ puṇyāḥ kathā vā dharmasaṃśritāḥ |
itivṛttaṃ narendrāṇāmṛṣīṇāṃ ca mahātmanām || 14 ||
[Analyze grammar]

ṛṣaya ūcuḥ |
dvaipāyanena yatproktaṃ purāṇaṃ paramarṣiṇā |
surairbrahmarṣibhiścaiva śrutvā yadabhipūjitam || 15 ||
[Analyze grammar]

tasyākhyānavariṣṭhasya vicitrapadaparvaṇaḥ |
sūkṣmārthanyāyayuktasya vedārthairbhūṣitasya ca || 16 ||
[Analyze grammar]

bhāratasyetihāsasya puṇyāṃ granthārthasaṃyutām |
saṃskāropagatāṃ brāhmīṃ nānāśāstropabṛṃhitām || 17 ||
[Analyze grammar]

janamejayasya yāṃ rājño vaiśaṃpāyana uktavān |
yathāvatsa ṛṣistuṣṭyā satre dvaipāyanājñayā || 18 ||
[Analyze grammar]

vedaiścaturbhiḥ samitāṃ vyāsasyādbhutakarmaṇaḥ |
saṃhitāṃ śrotumicchāmo dharmyāṃ pāpabhayāpahām || 19 ||
[Analyze grammar]

sūta uvāca |
ādyaṃ puruṣamīśānaṃ puruhūtaṃ puruṣṭutam |
ṛtamekākṣaraṃ brahma vyaktāvyaktaṃ sanātanam || 20 ||
[Analyze grammar]

asacca saccaiva ca yadviśvaṃ sadasataḥ param |
parāvarāṇāṃ sraṣṭāraṃ purāṇaṃ paramavyayam || 21 ||
[Analyze grammar]

maṅgalyaṃ maṅgalaṃ viṣṇuṃ vareṇyamanaghaṃ śucim |
namaskṛtya hṛṣīkeśaṃ carācaraguruṃ harim || 22 ||
[Analyze grammar]

maharṣeḥ pūjitasyeha sarvaloke mahātmanaḥ |
pravakṣyāmi mataṃ kṛtsnaṃ vyāsasyāmitatejasaḥ || 23 ||
[Analyze grammar]

ācakhyuḥ kavayaḥ kecitsaṃpratyācakṣate pare |
ākhyāsyanti tathaivānye itihāsamimaṃ bhuvi || 24 ||
[Analyze grammar]

idaṃ tu triṣu lokeṣu mahajjñānaṃ pratiṣṭhitam |
vistaraiśca samāsaiśca dhāryate yaddvijātibhiḥ || 25 ||
[Analyze grammar]

alaṃkṛtaṃ śubhaiḥ śabdaiḥ samayairdivyamānuṣaiḥ |
chandovṛttaiśca vividhairanvitaṃ viduṣāṃ priyam || 26 ||
[Analyze grammar]

niṣprabhe'sminnirāloke sarvatastamasāvṛte |
bṛhadaṇḍamabhūdekaṃ prajānāṃ bījamakṣayam || 27 ||
[Analyze grammar]

yugasyādau nimittaṃ tanmahaddivyaṃ pracakṣate |
yasmiṃstacchrūyate satyaṃ jyotirbrahma sanātanam || 28 ||
[Analyze grammar]

adbhutaṃ cāpyacintyaṃ ca sarvatra samatāṃ gatam |
avyaktaṃ kāraṇaṃ sūkṣmaṃ yattatsadasadātmakam || 29 ||
[Analyze grammar]

yasmātpitāmaho jajñe prabhurekaḥ prajāpatiḥ |
brahmā suraguruḥ sthāṇurmanuḥ kaḥ parameṣṭhyatha || 30 ||
[Analyze grammar]

prācetasastathā dakṣo dakṣaputrāśca sapta ye |
tataḥ prajānāṃ patayaḥ prābhavannekaviṃśatiḥ || 31 ||
[Analyze grammar]

puruṣaścāprameyātmā yaṃ sarvamṛṣayo viduḥ |
viśvedevāstathādityā vasavo'thāśvināvapi || 32 ||
[Analyze grammar]

yakṣāḥ sādhyāḥ piśācāśca guhyakāḥ pitarastathā |
tataḥ prasūtā vidvāṃsaḥ śiṣṭā brahmarṣayo'malāḥ || 33 ||
[Analyze grammar]

rājarṣayaśca bahavaḥ sarvaiḥ samuditā guṇaiḥ |
āpo dyauḥ pṛthivī vāyurantarikṣaṃ diśastathā || 34 ||
[Analyze grammar]

saṃvatsarartavo māsāḥ pakṣāhorātrayaḥ kramāt |
yaccānyadapi tatsarvaṃ saṃbhūtaṃ lokasākṣikam || 35 ||
[Analyze grammar]

yadidaṃ dṛśyate kiṃcidbhūtaṃ sthāvarajaṅgamam |
punaḥ saṃkṣipyate sarvaṃ jagatprāpte yugakṣaye || 36 ||
[Analyze grammar]

yathartāvṛtuliṅgāni nānārūpāṇi paryaye |
dṛśyante tāni tānyeva tathā bhāvā yugādiṣu || 37 ||
[Analyze grammar]

evametadanādyantaṃ bhūtasaṃhārakārakam |
anādinidhanaṃ loke cakraṃ saṃparivartate || 38 ||
[Analyze grammar]

trayastriṃśatsahasrāṇi trayastriṃśacchatāni ca |
trayastriṃśacca devānāṃ sṛṣṭiḥ saṃkṣepalakṣaṇā || 39 ||
[Analyze grammar]

divasputro bṛhadbhānuścakṣurātmā vibhāvasuḥ |
savitā ca ṛcīko'rko bhānurāśāvaho raviḥ || 40 ||
[Analyze grammar]

putrā vivasvataḥ sarve mahyasteṣāṃ tathāvaraḥ |
devabhrāṭtanayastasya tasmātsubhrāḍiti smṛtaḥ || 41 ||
[Analyze grammar]

subhrājastu trayaḥ putrāḥ prajāvanto bahuśrutāḥ |
daśajyotiḥ śatajyotiḥ sahasrajyotirātmavān || 42 ||
[Analyze grammar]

daśa putrasahasrāṇi daśajyotermahātmanaḥ |
tato daśaguṇāścānye śatajyoterihātmajāḥ || 43 ||
[Analyze grammar]

bhūyastato daśaguṇāḥ sahasrajyotiṣaḥ sutāḥ |
tebhyo'yaṃ kuruvaṃśaśca yadūnāṃ bharatasya ca || 44 ||
[Analyze grammar]

yayātīkṣvākuvaṃśaśca rājarṣīṇāṃ ca sarvaśaḥ |
saṃbhūtā bahavo vaṃśā bhūtasargāḥ savistarāḥ || 45 ||
[Analyze grammar]

bhūtasthānāni sarvāṇi rahasyaṃ trividhaṃ ca yat |
vedayogaṃ savijñānaṃ dharmo'rthaḥ kāma eva ca || 46 ||
[Analyze grammar]

dharmakāmārthaśāstrāṇi śāstrāṇi vividhāni ca |
lokayātrāvidhānaṃ ca saṃbhūtaṃ dṛṣṭavānṛṣiḥ || 47 ||
[Analyze grammar]

itihāsāḥ savaiyākhyā vividhāḥ śrutayo'pi ca |
iha sarvamanukrāntamuktaṃ granthasya lakṣaṇam || 48 ||
[Analyze grammar]

vistīryaitanmahajjñānamṛṣiḥ saṃkṣepamabravīt |
iṣṭaṃ hi viduṣāṃ loke samāsavyāsadhāraṇam || 49 ||
[Analyze grammar]

manvādi bhārataṃ kecidāstīkādi tathāpare |
tathoparicarādyanye viprāḥ samyagadhīyate || 50 ||
[Analyze grammar]

vividhaṃ saṃhitājñānaṃ dīpayanti manīṣiṇaḥ |
vyākhyātuṃ kuśalāḥ kecidgranthaṃ dhārayituṃ pare || 51 ||
[Analyze grammar]

tapasā brahmacaryeṇa vyasya vedaṃ sanātanam |
itihāsamimaṃ cakre puṇyaṃ satyavatīsutaḥ || 52 ||
[Analyze grammar]

parāśarātmajo vidvānbrahmarṣiḥ saṃśitavrataḥ |
māturniyogāddharmātmā gāṅgeyasya ca dhīmataḥ || 53 ||
[Analyze grammar]

kṣetre vicitravīryasya kṛṣṇadvaipāyanaḥ purā |
trīnagnīniva kauravyāñjanayāmāsa vīryavān || 54 ||
[Analyze grammar]

utpādya dhṛtarāṣṭraṃ ca pāṇḍuṃ vidurameva ca |
jagāma tapase dhīmānpunarevāśramaṃ prati || 55 ||
[Analyze grammar]

teṣu jāteṣu vṛddheṣu gateṣu paramāṃ gatim |
abravīdbhārataṃ loke mānuṣe'sminmahānṛṣiḥ || 56 ||
[Analyze grammar]

janamejayena pṛṣṭaḥ sanbrāhmaṇaiśca sahasraśaḥ |
śaśāsa śiṣyamāsīnaṃ vaiśaṃpāyanamantike || 57 ||
[Analyze grammar]

sa sadasyaiḥ sahāsīnaḥ śrāvayāmāsa bhāratam |
karmāntareṣu yajñasya codyamānaḥ punaḥ punaḥ || 58 ||
[Analyze grammar]

vistaraṃ kuruvaṃśasya gāndhāryā dharmaśīlatām |
kṣattuḥ prajñāṃ dhṛtiṃ kuntyāḥ samyagdvaipāyano'bravīt || 59 ||
[Analyze grammar]

vāsudevasya māhātmyaṃ pāṇḍavānāṃ ca satyatām |
durvṛttaṃ dhārtarāṣṭrāṇāmuktavānbhagavānṛṣiḥ || 60 ||
[Analyze grammar]

caturviṃśatisāhasrīṃ cakre bhāratasaṃhitām |
upākhyānairvinā tāvadbhārataṃ procyate budhaiḥ || 61 ||
[Analyze grammar]

tato'dhyardhaśataṃ bhūyaḥ saṃkṣepaṃ kṛtavānṛṣiḥ |
anukramaṇimadhyāyaṃ vṛttāntānāṃ saparvaṇām || 62 ||
[Analyze grammar]

idaṃ dvaipāyanaḥ pūrvaṃ putramadhyāpayacchukam |
tato'nyebhyo'nurūpebhyaḥ śiṣyebhyaḥ pradadau prabhuḥ || 63 ||
[Analyze grammar]

nārado'śrāvayaddevānasito devalaḥ pitṝn |
gandharvayakṣarakṣāṃsi śrāvayāmāsa vai śukaḥ || 64 ||
[Analyze grammar]

duryodhano manyumayo mahādrumaḥ skandhaḥ karṇaḥ śakunistasya śākhāḥ |
duḥśāsanaḥ puṣpaphale samṛddhe mūlaṃ rājā dhṛtarāṣṭro'manīṣī || 65 ||
[Analyze grammar]

yudhiṣṭhiro dharmamayo mahādrumaḥ skandho'rjuno bhīmaseno'sya śākhāḥ |
mādrīsutau puṣpaphale samṛddhe mūlaṃ kṛṣṇo brahma ca brāhmaṇāśca || 66 ||
[Analyze grammar]

pāṇḍurjitvā bahūndeśānyudhā vikramaṇena ca |
araṇye mṛgayāśīlo nyavasatsajanastadā || 67 ||
[Analyze grammar]

mṛgavyavāyanidhane kṛcchrāṃ prāpa sa āpadam |
janmaprabhṛti pārthānāṃ tatrācāravidhikramaḥ || 68 ||
[Analyze grammar]

mātrorabhyupapattiśca dharmopaniṣadaṃ prati |
dharmasya vāyoḥ śakrasya devayośca tathāśvinoḥ || 69 ||
[Analyze grammar]

tāpasaiḥ saha saṃvṛddhā mātṛbhyāṃ parirakṣitāḥ |
medhyāraṇyeṣu puṇyeṣu mahatāmāśrameṣu ca || 70 ||
[Analyze grammar]

ṛṣibhiśca tadānītā dhārtarāṣṭrānprati svayam |
śiśavaścābhirūpāśca jaṭilā brahmacāriṇaḥ || 71 ||
[Analyze grammar]

putrāśca bhrātaraśceme śiṣyāśca suhṛdaśca vaḥ |
pāṇḍavā eta ityuktvā munayo'ntarhitāstataḥ || 72 ||
[Analyze grammar]

tāṃstairniveditāndṛṣṭvā pāṇḍavānkauravāstadā |
śiṣṭāśca varṇāḥ paurā ye te harṣāccukruśurbhṛśam || 73 ||
[Analyze grammar]

āhuḥ kecinna tasyaite tasyaita iti cāpare |
yadā ciramṛtaḥ pāṇḍuḥ kathaṃ tasyeti cāpare || 74 ||
[Analyze grammar]

svāgataṃ sarvathā diṣṭyā pāṇḍoḥ paśyāma saṃtatim |
ucyatāṃ svāgatamiti vāco'śrūyanta sarvaśaḥ || 75 ||
[Analyze grammar]

tasminnuparate śabde diśaḥ sarvā vinādayan |
antarhitānāṃ bhūtānāṃ nisvanastumulo'bhavat || 76 ||
[Analyze grammar]

puṣpavṛṣṭiḥ śubhā gandhāḥ śaṅkhadundubhinisvanāḥ |
āsanpraveśe pārthānāṃ tadadbhutamivābhavat || 77 ||
[Analyze grammar]

tatprītyā caiva sarveṣāṃ paurāṇāṃ harṣasaṃbhavaḥ |
śabda āsīnmahāṃstatra divaspṛkkīrtivardhanaḥ || 78 ||
[Analyze grammar]

te'pyadhītyākhilānvedāñśāstrāṇi vividhāni ca |
nyavasanpāṇḍavāstatra pūjitā akutobhayāḥ || 79 ||
[Analyze grammar]

yudhiṣṭhirasya śaucena prītāḥ prakṛtayo'bhavan |
dhṛtyā ca bhīmasenasya vikrameṇārjunasya ca || 80 ||
[Analyze grammar]

guruśuśrūṣayā kuntyā yamayorvinayena ca |
tutoṣa lokaḥ sakalasteṣāṃ śauryaguṇena ca || 81 ||
[Analyze grammar]

samavāye tato rājñāṃ kanyāṃ bhartṛsvayaṃvarām |
prāptavānarjunaḥ kṛṣṇāṃ kṛtvā karma suduṣkaram || 82 ||
[Analyze grammar]

tataḥ prabhṛti loke'sminpūjyaḥ sarvadhanuṣmatām |
āditya iva duṣprekṣyaḥ samareṣvapi cābhavat || 83 ||
[Analyze grammar]

sa sarvānpārthivāñjitvā sarvāṃśca mahato gaṇān |
ājahārārjuno rājñe rājasūyaṃ mahākratum || 84 ||
[Analyze grammar]

annavāndakṣiṇāvāṃśca sarvaiḥ samudito guṇaiḥ |
yudhiṣṭhireṇa saṃprāpto rājasūyo mahākratuḥ || 85 ||
[Analyze grammar]

sunayādvāsudevasya bhīmārjunabalena ca |
ghātayitvā jarāsaṃdhaṃ caidyaṃ ca balagarvitam || 86 ||
[Analyze grammar]

duryodhanamupāgacchannarhaṇāni tatastataḥ |
maṇikāñcanaratnāni gohastyaśvadhanāni ca || 87 ||
[Analyze grammar]

samṛddhāṃ tāṃ tathā dṛṣṭvā pāṇḍavānāṃ tadā śriyam |
īrṣyāsamutthaḥ sumahāṃstasya manyurajāyata || 88 ||
[Analyze grammar]

vimānapratimāṃ cāpi mayena sukṛtāṃ sabhām |
pāṇḍavānāmupahṛtāṃ sa dṛṣṭvā paryatapyata || 89 ||
[Analyze grammar]

yatrāvahasitaścāsītpraskandanniva saṃbhramāt |
pratyakṣaṃ vāsudevasya bhīmenānabhijātavat || 90 ||
[Analyze grammar]

sa bhogānvividhānbhuñjanratnāni vividhāni ca |
kathito dhṛtarāṣṭrasya vivarṇo hariṇaḥ kṛśaḥ || 91 ||
[Analyze grammar]

anvajānāttato dyūtaṃ dhṛtarāṣṭraḥ sutapriyaḥ |
tacchrutvā vāsudevasya kopaḥ samabhavanmahān || 92 ||
[Analyze grammar]

nātiprītamanāścāsīdvivādāṃścānvamodata |
dyūtādīnanayānghorānpravṛddhāṃścāpyupaikṣata || 93 ||
[Analyze grammar]

nirasya viduraṃ droṇaṃ bhīṣmaṃ śāradvataṃ kṛpam |
vigrahe tumule tasminnahankṣatraṃ parasparam || 94 ||
[Analyze grammar]

jayatsu pāṇḍuputreṣu śrutvā sumahadapriyam |
duryodhanamataṃ jñātvā karṇasya śakunestathā |
dhṛtarāṣṭraściraṃ dhyātvā saṃjayaṃ vākyamabravīt || 95 ||
[Analyze grammar]

śṛṇu saṃjaya me sarvaṃ na me'sūyitumarhasi |
śrutavānasi medhāvī buddhimānprājñasaṃmataḥ || 96 ||
[Analyze grammar]

na vigrahe mama matirna ca prīye kurukṣaye |
na me viśeṣaḥ putreṣu sveṣu pāṇḍusuteṣu ca || 97 ||
[Analyze grammar]

vṛddhaṃ māmabhyasūyanti putrā manyuparāyaṇāḥ |
ahaṃ tvacakṣuḥ kārpaṇyātputraprītyā sahāmi tat |
muhyantaṃ cānumuhyāmi duryodhanamacetanam || 98 ||
[Analyze grammar]

rājasūye śriyaṃ dṛṣṭvā pāṇḍavasya mahaujasaḥ |
taccāvahasanaṃ prāpya sabhārohaṇadarśane || 99 ||
[Analyze grammar]

amarṣitaḥ svayaṃ jetumaśaktaḥ pāṇḍavānraṇe |
nirutsāhaśca saṃprāptuṃ śriyamakṣatriyo yathā |
gāndhārarājasahitaśchadmadyūtamamantrayat || 100 ||
[Analyze grammar]

tatra yadyadyathā jñātaṃ mayā saṃjaya tacchṛṇu |
śrutvā hi mama vākyāni buddhyā yuktāni tattvataḥ |
tato jñāsyasi māṃ saute prajñācakṣuṣamityuta || 101 ||
[Analyze grammar]

yadāśrauṣaṃ dhanurāyamya citraṃ viddhaṃ lakṣyaṃ pātitaṃ vai pṛthivyām |
kṛṣṇāṃ hṛtāṃ paśyatāṃ sarvarājñāṃ tadā nāśaṃse vijayāya saṃjaya || 102 ||
[Analyze grammar]

yadāśrauṣaṃ dvārakāyāṃ subhadrāṃ prasahyoḍhāṃ mādhavīmarjunena |
indraprasthaṃ vṛṣṇivīrau ca yātau tadā nāśaṃse vijayāya saṃjaya || 103 ||
[Analyze grammar]

yadāśrauṣaṃ devarājaṃ pravṛṣṭaṃ śarairdivyairvāritaṃ cārjunena |
agniṃ tathā tarpitaṃ khāṇḍave ca tadā nāśaṃse vijayāya saṃjaya || 104 ||
[Analyze grammar]

yadāśrauṣaṃ hṛtarājyaṃ yudhiṣṭhiraṃ parājitaṃ saubalenākṣavatyām |
anvāgataṃ bhrātṛbhiraprameyaistadā nāśaṃse vijayāya saṃjaya || 105 ||
[Analyze grammar]

yadāśrauṣaṃ draupadīmaśrukaṇṭhīṃ sabhāṃ nītāṃ duḥkhitāmekavastrām |
rajasvalāṃ nāthavatīmanāthavattadā nāśaṃse vijayāya saṃjaya || 106 ||
[Analyze grammar]

yadāśrauṣaṃ vividhāstāta ceṣṭā dharmātmanāṃ prasthitānāṃ vanāya |
jyeṣṭhaprītyā kliśyatāṃ pāṇḍavānāṃ tadā nāśaṃse vijayāya saṃjaya || 107 ||
[Analyze grammar]

yadāśrauṣaṃ snātakānāṃ sahasrairanvāgataṃ dharmarājaṃ vanastham |
bhikṣābhujāṃ brāhmaṇānāṃ mahātmanāṃ tadā nāśaṃse vijayāya saṃjaya || 108 ||
[Analyze grammar]

yadāśrauṣamarjuno devadevaṃ kirātarūpaṃ tryambakaṃ toṣya yuddhe |
avāpa tatpāśupataṃ mahāstraṃ tadā nāśaṃse vijayāya saṃjaya || 109 ||
[Analyze grammar]

yadāśrauṣaṃ tridivasthaṃ dhanaṃjayaṃ śakrātsākṣāddivyamastraṃ yathāvat |
adhīyānaṃ śaṃsitaṃ satyasaṃdhaṃ tadā nāśaṃse vijayāya saṃjaya || 110 ||
[Analyze grammar]

yadāśrauṣaṃ vaiśravaṇena sārdhaṃ samāgataṃ bhīmamanyāṃśca pārthān |
tasmindeśe mānuṣāṇāmagamye tadā nāśaṃse vijayāya saṃjaya || 111 ||
[Analyze grammar]

yadāśrauṣaṃ ghoṣayātrāgatānāṃ bandhaṃ gandharvairmokṣaṇaṃ cārjunena |
sveṣāṃ sutānāṃ karṇabuddhau ratānāṃ tadā nāśaṃse vijayāya saṃjaya || 112 ||
[Analyze grammar]

yadāśrauṣaṃ yakṣarūpeṇa dharmaṃ samāgataṃ dharmarājena sūta |
praśnānuktānvibruvantaṃ ca samyaktadā nāśaṃse vijayāya saṃjaya || 113 ||
[Analyze grammar]

yadāśrauṣaṃ māmakānāṃ variṣṭhāndhanaṃjayenaikarathena bhagnān |
virāṭarāṣṭre vasatā mahātmanā tadā nāśaṃse vijayāya saṃjaya || 114 ||
[Analyze grammar]

yadāśrauṣaṃ satkṛtāṃ matsyarājñā sutāṃ dattāmuttarāmarjunāya |
tāṃ cārjunaḥ pratyagṛhṇātsutārthe tadā nāśaṃse vijayāya saṃjaya || 115 ||
[Analyze grammar]

yadāśrauṣaṃ nirjitasyādhanasya pravrājitasya svajanātpracyutasya |
akṣauhiṇīḥ sapta yudhiṣṭhirasya tadā nāśaṃse vijayāya saṃjaya || 116 ||
[Analyze grammar]

yadāśrauṣaṃ naranārāyaṇau tau kṛṣṇārjunau vadato nāradasya |
ahaṃ draṣṭā brahmaloke sadeti tadā nāśaṃse vijayāya saṃjaya || 117 ||
[Analyze grammar]

yadāśrauṣaṃ mādhavaṃ vāsudevaṃ sarvātmanā pāṇḍavārthe niviṣṭam |
yasyemāṃ gāṃ vikramamekamāhustadā nāśaṃse vijayāya saṃjaya || 118 ||
[Analyze grammar]

yadāśrauṣaṃ karṇaduryodhanābhyāṃ buddhiṃ kṛtāṃ nigrahe keśavasya |
taṃ cātmānaṃ bahudhā darśayānaṃ tadā nāśaṃse vijayāya saṃjaya || 119 ||
[Analyze grammar]

yadāśrauṣaṃ vāsudeve prayāte rathasyaikāmagratastiṣṭhamānām |
ārtāṃ pṛthāṃ sāntvitāṃ keśavena tadā nāśaṃse vijayāya saṃjaya || 120 ||
[Analyze grammar]

yadāśrauṣaṃ mantriṇaṃ vāsudevaṃ tathā bhīṣmaṃ śāṃtanavaṃ ca teṣām |
bhāradvājaṃ cāśiṣo'nubruvāṇaṃ tadā nāśaṃse vijayāya saṃjaya || 121 ||
[Analyze grammar]

yadāśrauṣaṃ karṇa uvāca bhīṣmaṃ nāhaṃ yotsye yudhyamāne tvayīti |
hitvā senāmapacakrāma caiva tadā nāśaṃse vijayāya saṃjaya || 122 ||
[Analyze grammar]

yadāśrauṣaṃ vāsudevārjunau tau tathā dhanurgāṇḍivamaprameyam |
trīṇyugravīryāṇi samāgatāni tadā nāśaṃse vijayāya saṃjaya || 123 ||
[Analyze grammar]

yadāśrauṣaṃ kaśmalenābhipanne rathopasthe sīdamāne'rjune vai |
kṛṣṇaṃ lokāndarśayānaṃ śarīre tadā nāśaṃse vijayāya saṃjaya || 124 ||
[Analyze grammar]

yadāśrauṣaṃ bhīṣmamamitrakarśanaṃ nighnantamājāvayutaṃ rathānām |
naiṣāṃ kaścidvadhyate dṛśyarūpastadā nāśaṃse vijayāya saṃjaya || 125 ||
[Analyze grammar]

yadāśrauṣaṃ bhīṣmamatyantaśūraṃ hataṃ pārthenāhaveṣvapradhṛṣyam |
śikhaṇḍinaṃ purataḥ sthāpayitvā tadā nāśaṃse vijayāya saṃjaya || 126 ||
[Analyze grammar]

yadāśrauṣaṃ śaratalpe śayānaṃ vṛddhaṃ vīraṃ sāditaṃ citrapuṅkhaiḥ |
bhīṣmaṃ kṛtvā somakānalpaśeṣāṃstadā nāśaṃse vijayāya saṃjaya || 127 ||
[Analyze grammar]

yadāśrauṣaṃ śāṃtanave śayāne pānīyārthe coditenārjunena |
bhūmiṃ bhittvā tarpitaṃ tatra bhīṣmaṃ tadā nāśaṃse vijayāya saṃjaya || 128 ||
[Analyze grammar]

yadāśrauṣaṃ śukrasūryau ca yuktau kaunteyānāmanulomau jayāya |
nityaṃ cāsmāñśvāpadā vyābhaṣantastadā nāśaṃse vijayāya saṃjaya || 129 ||
[Analyze grammar]

yadā droṇo vividhānastramārgānvidarśayansamare citrayodhī |
na pāṇḍavāñśreṣṭhatamānnihanti tadā nāśaṃse vijayāya saṃjaya || 130 ||
[Analyze grammar]

yadāśrauṣaṃ cāsmadīyānmahārathānvyavasthitānarjunasyāntakāya |
saṃśaptakānnihatānarjunena tadā nāśaṃse vijayāya saṃjaya || 131 ||
[Analyze grammar]

yadāśrauṣaṃ vyūhamabhedyamanyairbhāradvājenāttaśastreṇa guptam |
bhittvā saubhadraṃ vīramekaṃ praviṣṭaṃ tadā nāśaṃse vijayāya saṃjaya || 132 ||
[Analyze grammar]

yadābhimanyuṃ parivārya bālaṃ sarve hatvā hṛṣṭarūpā babhūvuḥ |
mahārathāḥ pārthamaśaknuvantastadā nāśaṃse vijayāya saṃjaya || 133 ||
[Analyze grammar]

yadāśrauṣamabhimanyuṃ nihatya harṣānmūḍhānkrośato dhārtarāṣṭrān |
krodhaṃ muktaṃ saindhave cārjunena tadā nāśaṃse vijayāya saṃjaya || 134 ||
[Analyze grammar]

yadāśrauṣaṃ saindhavārthe pratijñāṃ pratijñātāṃ tadvadhāyārjunena |
satyāṃ nistīrṇāṃ śatrumadhye ca tena tadā nāśaṃse vijayāya saṃjaya || 135 ||
[Analyze grammar]

yadāśrauṣaṃ śrāntahaye dhanaṃjaye muktvā hayānpāyayitvopavṛttān |
punaryuktvā vāsudevaṃ prayātaṃ tadā nāśaṃse vijayāya saṃjaya || 136 ||
[Analyze grammar]

yadāśrauṣaṃ vāhaneṣvāśvasatsu rathopasthe tiṣṭhatā gāṇḍivena |
sarvānyodhānvāritānarjunena tadā nāśaṃse vijayāya saṃjaya || 137 ||
[Analyze grammar]

yadāśrauṣaṃ nāgabalairdurutsahaṃ droṇānīkaṃ yuyudhānaṃ pramathya |
yātaṃ vārṣṇeyaṃ yatra tau kṛṣṇapārthau tadā nāśaṃse vijayāya saṃjaya || 138 ||
[Analyze grammar]

yadāśrauṣaṃ karṇamāsādya muktaṃ vadhādbhīmaṃ kutsayitvā vacobhiḥ |
dhanuṣkoṭyā tudya karṇena vīraṃ tadā nāśaṃse vijayāya saṃjaya || 139 ||
[Analyze grammar]

yadā droṇaḥ kṛtavarmā kṛpaśca karṇo drauṇirmadrarājaśca śūraḥ |
amarṣayansaindhavaṃ vadhyamānaṃ tadā nāśaṃse vijayāya saṃjaya || 140 ||
[Analyze grammar]

yadāśrauṣaṃ devarājena dattāṃ divyāṃ śaktiṃ vyaṃsitāṃ mādhavena |
ghaṭotkace rākṣase ghorarūpe tadā nāśaṃse vijayāya saṃjaya || 141 ||
[Analyze grammar]

yadāśrauṣaṃ karṇaghaṭotkacābhyāṃ yuddhe muktāṃ sūtaputreṇa śaktim |
yayā vadhyaḥ samare savyasācī tadā nāśaṃse vijayāya saṃjaya || 142 ||
[Analyze grammar]

yadāśrauṣaṃ droṇamācāryamekaṃ dhṛṣṭadyumnenābhyatikramya dharmam |
rathopasthe prāyagataṃ viśastaṃ tadā nāśaṃse vijayāya saṃjaya || 143 ||
[Analyze grammar]

yadāśrauṣaṃ drauṇinā dvairathasthaṃ mādrīputraṃ nakulaṃ lokamadhye |
samaṃ yuddhe pāṇḍavaṃ yudhyamānaṃ tadā nāśaṃse vijayāya saṃjaya || 144 ||
[Analyze grammar]

yadā droṇe nihate droṇaputro nārāyaṇaṃ divyamastraṃ vikurvan |
naiṣāmantaṃ gatavānpāṇḍavānāṃ tadā nāśaṃse vijayāya saṃjaya || 145 ||
[Analyze grammar]

yadāśrauṣaṃ karṇamatyantaśūraṃ hataṃ pārthenāhaveṣvapradhṛṣyam |
tasminbhrātṝṇāṃ vigrahe devaguhye tadā nāśaṃse vijayāya saṃjaya || 146 ||
[Analyze grammar]

yadāśrauṣaṃ droṇaputraṃ kṛpaṃ ca duḥśāsanaṃ kṛtavarmāṇamugram |
yudhiṣṭhiraṃ śūnyamadharṣayantaṃ tadā nāśaṃse vijayāya saṃjaya || 147 ||
[Analyze grammar]

yadāśrauṣaṃ nihataṃ madrarājaṃ raṇe śūraṃ dharmarājena sūta |
sadā saṃgrāme spardhate yaḥ sa kṛṣṇaṃ tadā nāśaṃse vijayāya saṃjaya || 148 ||
[Analyze grammar]

yadāśrauṣaṃ kalahadyūtamūlaṃ māyābalaṃ saubalaṃ pāṇḍavena |
hataṃ saṃgrāme sahadevena pāpaṃ tadā nāśaṃse vijayāya saṃjaya || 149 ||
[Analyze grammar]

yadāśrauṣaṃ śrāntamekaṃ śayānaṃ hradaṃ gatvā stambhayitvā tadambhaḥ |
duryodhanaṃ virathaṃ bhagnadarpaṃ tadā nāśaṃse vijayāya saṃjaya || 150 ||
[Analyze grammar]

yadāśrauṣaṃ pāṇḍavāṃstiṣṭhamānāngaṅgāhrade vāsudevena sārdham |
amarṣaṇaṃ dharṣayataḥ sutaṃ me tadā nāśaṃse vijayāya saṃjaya || 151 ||
[Analyze grammar]

yadāśrauṣaṃ vividhāṃstāta mārgāngadāyuddhe maṇḍalaṃ saṃcarantam |
mithyā hataṃ vāsudevasya buddhyā tadā nāśaṃse vijayāya saṃjaya || 152 ||
[Analyze grammar]

yadāśrauṣaṃ droṇaputrādibhistairhatānpāñcālāndraupadeyāṃśca suptān |
kṛtaṃ bībhatsamayaśasyaṃ ca karma tadā nāśaṃse vijayāya saṃjaya || 153 ||
[Analyze grammar]

yadāśrauṣaṃ bhīmasenānuyātena aśvatthāmnā paramāstraṃ prayuktam |
kruddhenaiṣīkamavadhīdyena garbhaṃ tadā nāśaṃse vijayāya saṃjaya || 154 ||
[Analyze grammar]

yadāśrauṣaṃ brahmaśiro'rjunena muktaṃ svastītyastramastreṇa śāntam |
aśvatthāmnā maṇiratnaṃ ca dattaṃ tadā nāśaṃse vijayāya saṃjaya || 155 ||
[Analyze grammar]

yadāśrauṣaṃ droṇaputreṇa garbhe vairāṭyā vai pātyamāne mahāstre |
dvaipāyanaḥ keśavo droṇaputraṃ paraspareṇābhiśāpaiḥ śaśāpa || 156 ||
[Analyze grammar]

śocyā gāndhārī putrapautrairvihīnā tathā vadhvaḥ pitṛbhirbhrātṛbhiśca |
kṛtaṃ kāryaṃ duṣkaraṃ pāṇḍaveyaiḥ prāptaṃ rājyamasapatnaṃ punastaiḥ || 157 ||
[Analyze grammar]

kaṣṭaṃ yuddhe daśa śeṣāḥ śrutā me trayo'smākaṃ pāṇḍavānāṃ ca sapta |
dvyūnā viṃśatirāhatākṣauhiṇīnāṃ tasminsaṃgrāme vigrahe kṣatriyāṇām || 158 ||
[Analyze grammar]

tamasā tvabhyavastīrṇo moha āviśatīva mām |
saṃjñāṃ nopalabhe sūta mano vihvalatīva me || 159 ||
[Analyze grammar]

ityuktvā dhṛtarāṣṭro'tha vilapya bahuduḥkhitaḥ |
mūrcchitaḥ punarāśvastaḥ saṃjayaṃ vākyamabravīt || 160 ||
[Analyze grammar]

saṃjayaivaṃgate prāṇāṃstyaktumicchāmi māciram |
stokaṃ hyapi na paśyāmi phalaṃ jīvitadhāraṇe || 161 ||
[Analyze grammar]

taṃ tathāvādinaṃ dīnaṃ vilapantaṃ mahīpatim |
gāvalgaṇiridaṃ dhīmānmahārthaṃ vākyamabravīt || 162 ||
[Analyze grammar]

śrutavānasi vai rājño mahotsāhānmahābalān |
dvaipāyanasya vadato nāradasya ca dhīmataḥ || 163 ||
[Analyze grammar]

mahatsu rājavaṃśeṣu guṇaiḥ samuditeṣu ca |
jātāndivyāstraviduṣaḥ śakrapratimatejasaḥ || 164 ||
[Analyze grammar]

dharmeṇa pṛthivīṃ jitvā yajñairiṣṭvāptadakṣiṇaiḥ |
asmiṃlloke yaśaḥ prāpya tataḥ kālavaśaṃ gatāḥ || 165 ||
[Analyze grammar]

vainyaṃ mahārathaṃ vīraṃ sṛñjayaṃ jayatāṃ varam |
suhotraṃ rantidevaṃ ca kakṣīvantaṃ tathauśijam || 166 ||
[Analyze grammar]

bāhlīkaṃ damanaṃ śaibyaṃ śaryātimajitaṃ jitam |
viśvāmitramamitraghnamambarīṣaṃ mahābalam || 167 ||
[Analyze grammar]

maruttaṃ manumikṣvākuṃ gayaṃ bharatameva ca |
rāmaṃ dāśarathiṃ caiva śaśabinduṃ bhagīratham || 168 ||
[Analyze grammar]

yayātiṃ śubhakarmāṇaṃ devairyo yājitaḥ svayam |
caityayūpāṅkitā bhūmiryasyeyaṃ savanākarā || 169 ||
[Analyze grammar]

iti rājñāṃ caturviṃśannāradena surarṣiṇā |
putraśokābhitaptāya purā śaibyāya kīrtitāḥ || 170 ||
[Analyze grammar]

tebhyaścānye gatāḥ pūrvaṃ rājāno balavattarāḥ |
mahārathā mahātmānaḥ sarvaiḥ samuditā guṇaiḥ || 171 ||
[Analyze grammar]

pūruḥ kururyaduḥ śūro viṣvagaśvo mahādhṛtiḥ |
anenā yuvanāśvaśca kakutstho vikramī raghuḥ || 172 ||
[Analyze grammar]

vijitī vītihotraśca bhavaḥ śveto bṛhadguruḥ |
uśīnaraḥ śatarathaḥ kaṅko duliduho drumaḥ || 173 ||
[Analyze grammar]

dambhodbhavaḥ paro venaḥ sagaraḥ saṃkṛtirnimiḥ |
ajeyaḥ paraśuḥ puṇḍraḥ śaṃbhurdevāvṛdho'naghaḥ || 174 ||
[Analyze grammar]

devāhvayaḥ supratimaḥ supratīko bṛhadrathaḥ |
mahotsāho vinītātmā sukraturnaiṣadho nalaḥ || 175 ||
[Analyze grammar]

satyavrataḥ śāntabhayaḥ sumitraḥ subalaḥ prabhuḥ |
jānujaṅgho'naraṇyo'rkaḥ priyabhṛtyaḥ śubhavrataḥ || 176 ||
[Analyze grammar]

balabandhurnirāmardaḥ ketuśṛṅgo bṛhadbalaḥ |
dhṛṣṭaketurbṛhatketurdīptaketurnirāmayaḥ || 177 ||
[Analyze grammar]

avikṣitprabalo dhūrtaḥ kṛtabandhurdṛḍheṣudhiḥ |
mahāpurāṇaḥ saṃbhāvyaḥ pratyaṅgaḥ parahā śrutiḥ || 178 ||
[Analyze grammar]

ete cānye ca bahavaḥ śataśo'tha sahasraśaḥ |
śrūyante'yutaśaścānye saṃkhyātāścāpi padmaśaḥ || 179 ||
[Analyze grammar]

hitvā suvipulānbhogānbuddhimanto mahābalāḥ |
rājāno nidhanaṃ prāptāstava putrairmahattamāḥ || 180 ||
[Analyze grammar]

yeṣāṃ divyāni karmāṇi vikramastyāga eva ca |
māhātmyamapi cāstikyaṃ satyatā śaucamārjavam || 181 ||
[Analyze grammar]

vidvadbhiḥ kathyate loke purāṇaiḥ kavisattamaiḥ |
sarvarddhiguṇasaṃpannāste cāpi nidhanaṃ gatāḥ || 182 ||
[Analyze grammar]

tava putrā durātmānaḥ prataptāścaiva manyunā |
lubdhā durvṛttabhūyiṣṭhā na tāñśocitumarhasi || 183 ||
[Analyze grammar]

śrutavānasi medhāvī buddhimānprājñasaṃmataḥ |
yeṣāṃ śāstrānugā buddhirna te muhyanti bhārata || 184 ||
[Analyze grammar]

nigrahānugrahau cāpi viditau te narādhipa |
nātyantamevānuvṛttiḥ śrūyate putrarakṣaṇe || 185 ||
[Analyze grammar]

bhavitavyaṃ tathā tacca nātaḥ śocitumarhasi |
daivaṃ prajñāviśeṣeṇa ko nivartitumarhati || 186 ||
[Analyze grammar]

vidhātṛvihitaṃ mārgaṃ na kaścidativartate |
kālamūlamidaṃ sarvaṃ bhāvābhāvau sukhāsukhe || 187 ||
[Analyze grammar]

kālaḥ pacati bhūtāni kālaḥ saṃharati prajāḥ |
nirdahantaṃ prajāḥ kālaṃ kālaḥ śamayate punaḥ || 188 ||
[Analyze grammar]

kālo vikurute bhāvānsarvāṃlloke śubhāśubhān |
kālaḥ saṃkṣipate sarvāḥ prajā visṛjate punaḥ |
kālaḥ sarveṣu bhūteṣu caratyavidhṛtaḥ samaḥ || 189 ||
[Analyze grammar]

atītānāgatā bhāvā ye ca vartanti sāṃpratam |
tānkālanirmitānbuddhvā na saṃjñāṃ hātumarhasi || 190 ||
[Analyze grammar]

sūta uvāca |
atropaniṣadaṃ puṇyāṃ kṛṣṇadvaipāyano'bravīt |
bhāratādhyayanātpuṇyādapi pādamadhīyataḥ |
śraddadhānasya pūyante sarvapāpānyaśeṣataḥ || 191 ||
[Analyze grammar]

devarṣayo hyatra puṇyā brahmarājarṣayastathā |
kīrtyante śubhakarmāṇastathā yakṣamahoragāḥ || 192 ||
[Analyze grammar]

bhagavānvāsudevaśca kīrtyate'tra sanātanaḥ |
sa hi satyamṛtaṃ caiva pavitraṃ puṇyameva ca || 193 ||
[Analyze grammar]

śāśvataṃ brahma paramaṃ dhruvaṃ jyotiḥ sanātanam |
yasya divyāni karmāṇi kathayanti manīṣiṇaḥ || 194 ||
[Analyze grammar]

asatsatsadasaccaiva yasmāddevātpravartate |
saṃtatiśca pravṛttiśca janma mṛtyuḥ punarbhavaḥ || 195 ||
[Analyze grammar]

adhyātmaṃ śrūyate yacca pañcabhūtaguṇātmakam |
avyaktādi paraṃ yacca sa eva parigīyate || 196 ||
[Analyze grammar]

yattadyativarā yuktā dhyānayogabalānvitāḥ |
pratibimbamivādarśe paśyantyātmanyavasthitam || 197 ||
[Analyze grammar]

śraddadhānaḥ sadodyuktaḥ satyadharmaparāyaṇaḥ |
āsevannimamadhyāyaṃ naraḥ pāpātpramucyate || 198 ||
[Analyze grammar]

anukramaṇimadhyāyaṃ bhāratasyemamāditaḥ |
āstikaḥ satataṃ śṛṇvanna kṛcchreṣvavasīdati || 199 ||
[Analyze grammar]

ubhe saṃdhye japankiṃcitsadyo mucyeta kilbiṣāt |
anukramaṇyā yāvatsyādahnā rātryā ca saṃcitam || 200 ||
[Analyze grammar]

bhāratasya vapurhyetatsatyaṃ cāmṛtameva ca |
navanītaṃ yathā dadhno dvipadāṃ brāhmaṇo yathā || 201 ||
[Analyze grammar]

hradānāmudadhiḥ śreṣṭho gaurvariṣṭhā catuṣpadām |
yathaitāni variṣṭhāni tathā bhāratamucyate || 202 ||
[Analyze grammar]

yaścainaṃ śrāvayecchrāddhe brāhmaṇānpādamantataḥ |
akṣayyamannapānaṃ tatpitṝṃstasyopatiṣṭhati || 203 ||
[Analyze grammar]

itihāsapurāṇābhyāṃ vedaṃ samupabṛṃhayet |
bibhetyalpaśrutādvedo māmayaṃ pratariṣyati || 204 ||
[Analyze grammar]

kārṣṇaṃ vedamimaṃ vidvāñśrāvayitvārthamaśnute |
bhrūṇahatyākṛtaṃ cāpi pāpaṃ jahyānna saṃśayaḥ || 205 ||
[Analyze grammar]

ya imaṃ śuciradhyāyaṃ paṭhetparvaṇi parvaṇi |
adhītaṃ bhārataṃ tena kṛtsnaṃ syāditi me matiḥ || 206 ||
[Analyze grammar]

yaścemaṃ śṛṇuyānnityamārṣaṃ śraddhāsamanvitaḥ |
sa dīrghamāyuḥ kīrtiṃ ca svargatiṃ cāpnuyānnaraḥ || 207 ||
[Analyze grammar]

catvāra ekato vedā bhārataṃ caikamekataḥ |
samāgataiḥ surarṣibhistulāmāropitaṃ purā |
mahattve ca gurutve ca dhriyamāṇaṃ tato'dhikam || 208 ||
[Analyze grammar]

mahattvādbhāravattvācca mahābhāratamucyate |
niruktamasya yo veda sarvapāpaiḥ pramucyate || 209 ||
[Analyze grammar]

tapo na kalko'dhyayanaṃ na kalkaḥ svābhāviko vedavidhirna kalkaḥ |
prasahya vittāharaṇaṃ na kalkastānyeva bhāvopahatāni kalkaḥ || 210 ||
[Analyze grammar]