Chapter 2

ṛṣaya ūcuḥ |
samantapañcakamiti yaduktaṃ sūtanandana |
etatsarvaṃ yathānyāyaṃ śrotumicchāmahe vayam || 1 ||
[Analyze grammar]

sūta uvāca |
śuśrūṣā yadi vo viprā bruvataśca kathāḥ śubhāḥ |
samantapañcakākhyaṃ ca śrotumarhatha sattamāḥ || 2 ||
[Analyze grammar]

tretādvāparayoḥ saṃdhau rāmaḥ śastrabhṛtāṃ varaḥ |
asakṛtpārthivaṃ kṣatraṃ jaghānāmarṣacoditaḥ || 3 ||
[Analyze grammar]

sa sarvaṃ kṣatramutsādya svavīryeṇānaladyutiḥ |
samantapañcake pañca cakāra rudhirahradān || 4 ||
[Analyze grammar]

sa teṣu rudhirāmbhassu hradeṣu krodhamūrcchitaḥ |
pitṝnsaṃtarpayāmāsa rudhireṇeti naḥ śrutam || 5 ||
[Analyze grammar]

atharcīkādayo'bhyetya pitaro brāhmaṇarṣabham |
taṃ kṣamasveti siṣidhustataḥ sa virarāma ha || 6 ||
[Analyze grammar]

teṣāṃ samīpe yo deśo hradānāṃ rudhirāmbhasām |
samantapañcakamiti puṇyaṃ tatparikīrtitam || 7 ||
[Analyze grammar]

yena liṅgena yo deśo yuktaḥ samupalakṣyate |
tenaiva nāmnā taṃ deśaṃ vācyamāhurmanīṣiṇaḥ || 8 ||
[Analyze grammar]

antare caiva saṃprāpte kalidvāparayorabhūt |
samantapañcake yuddhaṃ kurupāṇḍavasenayoḥ || 9 ||
[Analyze grammar]

tasminparamadharmiṣṭhe deśe bhūdoṣavarjite |
aṣṭādaśa samājagmurakṣauhiṇyo yuyutsayā || 10 ||
[Analyze grammar]

evaṃ nāmābhinirvṛttaṃ tasya deśasya vai dvijāḥ |
puṇyaśca ramaṇīyaśca sa deśo vaḥ prakīrtitaḥ || 11 ||
[Analyze grammar]

tadetatkathitaṃ sarvaṃ mayā vo munisattamāḥ |
yathā deśaḥ sa vikhyātastriṣu lokeṣu viśrutaḥ || 12 ||
[Analyze grammar]

ṛṣaya ūcuḥ |
akṣauhiṇya iti proktaṃ yattvayā sūtanandana |
etadicchāmahe śrotuṃ sarvameva yathātatham || 13 ||
[Analyze grammar]

akṣauhiṇyāḥ parīmāṇaṃ rathāśvanaradantinām |
yathāvaccaiva no brūhi sarvaṃ hi viditaṃ tava || 14 ||
[Analyze grammar]

sūta uvāca |
eko ratho gajaścaiko narāḥ pañca padātayaḥ |
trayaśca turagāstajjñaiḥ pattirityabhidhīyate || 15 ||
[Analyze grammar]

pattiṃ tu triguṇāmetāmāhuḥ senāmukhaṃ budhāḥ |
trīṇi senāmukhānyeko gulma ityabhidhīyate || 16 ||
[Analyze grammar]

trayo gulmā gaṇo nāma vāhinī tu gaṇāstrayaḥ |
smṛtāstisrastu vāhinyaḥ pṛtaneti vicakṣaṇaiḥ || 17 ||
[Analyze grammar]

camūstu pṛtanāstisrastisraścamvastvanīkinī |
anīkinīṃ daśaguṇāṃ prāhurakṣauhiṇīṃ budhāḥ || 18 ||
[Analyze grammar]

akṣauhiṇyāḥ prasaṃkhyānaṃ rathānāṃ dvijasattamāḥ |
saṃkhyāgaṇitatattvajñaiḥ sahasrāṇyekaviṃśatiḥ || 19 ||
[Analyze grammar]

śatānyupari caivāṣṭau tathā bhūyaśca saptatiḥ |
gajānāṃ tu parīmāṇametadevātra nirdiśet || 20 ||
[Analyze grammar]

jñeyaṃ śatasahasraṃ tu sahasrāṇi tathā nava |
narāṇāmapi pañcāśacchatāni trīṇi cānaghāḥ || 21 ||
[Analyze grammar]

pañcaṣaṣṭisahasrāṇi tathāśvānāṃ śatāni ca |
daśottarāṇi ṣaṭprāhuryathāvadiha saṃkhyayā || 22 ||
[Analyze grammar]

etāmakṣauhiṇīṃ prāhuḥ saṃkhyātattvavido janāḥ |
yāṃ vaḥ kathitavānasmi vistareṇa dvijottamāḥ || 23 ||
[Analyze grammar]

etayā saṃkhyayā hyāsankurupāṇḍavasenayoḥ |
akṣauhiṇyo dvijaśreṣṭhāḥ piṇḍenāṣṭādaśaiva tāḥ || 24 ||
[Analyze grammar]

sametāstatra vai deśe tatraiva nidhanaṃ gatāḥ |
kauravānkāraṇaṃ kṛtvā kālenādbhutakarmaṇā || 25 ||
[Analyze grammar]

ahāni yuyudhe bhīṣmo daśaiva paramāstravit |
ahāni pañca droṇastu rarakṣa kuruvāhinīm || 26 ||
[Analyze grammar]

ahanī yuyudhe dve tu karṇaḥ parabalārdanaḥ |
śalyo'rdhadivasaṃ tvāsīdgadāyuddhamataḥ param || 27 ||
[Analyze grammar]

tasyaiva tu dinasyānte hārdikyadrauṇigautamāḥ |
prasuptaṃ niśi viśvastaṃ jaghnuryaudhiṣṭhiraṃ balam || 28 ||
[Analyze grammar]

yattu śaunakasatre te bhāratākhyānavistaram |
ākhyāsye tatra paulomamākhyānaṃ cāditaḥ param || 29 ||
[Analyze grammar]

vicitrārthapadākhyānamanekasamayānvitam |
abhipannaṃ naraiḥ prājñairvairāgyamiva mokṣibhiḥ || 30 ||
[Analyze grammar]

ātmeva veditavyeṣu priyeṣviva ca jīvitam |
itihāsaḥ pradhānārthaḥ śreṣṭhaḥ sarvāgameṣvayam || 31 ||
[Analyze grammar]

itihāsottame hyasminnarpitā buddhiruttamā |
svaravyañjanayoḥ kṛtsnā lokavedāśrayeva vāk || 32 ||
[Analyze grammar]

asya prajñābhipannasya vicitrapadaparvaṇaḥ |
bhāratasyetihāsasya śrūyatāṃ parvasaṃgrahaḥ || 33 ||
[Analyze grammar]

parvānukramaṇī pūrvaṃ dvitīyaṃ parvasaṃgrahaḥ |
pauṣyaṃ paulomamāstīkamādivaṃśāvatāraṇam || 34 ||
[Analyze grammar]

tataḥ saṃbhavaparvoktamadbhutaṃ devanirmitam |
dāho jatugṛhasyātra haiḍimbaṃ parva cocyate || 35 ||
[Analyze grammar]

tato bakavadhaḥ parva parva caitrarathaṃ tataḥ |
tataḥ svayaṃvaraṃ devyāḥ pāñcālyāḥ parva cocyate || 36 ||
[Analyze grammar]

kṣatradharmeṇa nirjitya tato vaivāhikaṃ smṛtam |
vidurāgamanaṃ parva rājyalambhastathaiva ca || 37 ||
[Analyze grammar]

arjunasya vane vāsaḥ subhadrāharaṇaṃ tataḥ |
subhadrāharaṇādūrdhvaṃ jñeyaṃ haraṇahārikam || 38 ||
[Analyze grammar]

tataḥ khāṇḍavadāhākhyaṃ tatraiva mayadarśanam |
sabhāparva tataḥ proktaṃ mantraparva tataḥ param || 39 ||
[Analyze grammar]

jarāsaṃdhavadhaḥ parva parva digvijayastathā |
parva digvijayādūrdhvaṃ rājasūyikamucyate || 40 ||
[Analyze grammar]

tataścārghābhiharaṇaṃ śiśupālavadhastataḥ |
dyūtaparva tataḥ proktamanudyūtamataḥ param || 41 ||
[Analyze grammar]

tata āraṇyakaṃ parva kirmīravadha eva ca |
īśvarārjunayoryuddhaṃ parva kairātasaṃjñitam || 42 ||
[Analyze grammar]

indralokābhigamanaṃ parva jñeyamataḥ param |
tīrthayātrā tataḥ parva kururājasya dhīmataḥ || 43 ||
[Analyze grammar]

jaṭāsuravadhaḥ parva yakṣayuddhamataḥ param |
tathaivājagaraṃ parva vijñeyaṃ tadanantaram || 44 ||
[Analyze grammar]

mārkaṇḍeyasamasyā ca parvoktaṃ tadanantaram |
saṃvādaśca tataḥ parva draupadīsatyabhāmayoḥ || 45 ||
[Analyze grammar]

ghoṣayātrā tataḥ parva mṛgasvapnabhayaṃ tataḥ |
vrīhidrauṇikamākhyānaṃ tato'nantaramucyate || 46 ||
[Analyze grammar]

draupadīharaṇaṃ parva saindhavena vanāttataḥ |
kuṇḍalāharaṇaṃ parva tataḥ paramihocyate || 47 ||
[Analyze grammar]

āraṇeyaṃ tataḥ parva vairāṭaṃ tadanantaram |
kīcakānāṃ vadhaḥ parva parva gograhaṇaṃ tataḥ || 48 ||
[Analyze grammar]

abhimanyunā ca vairāṭyāḥ parva vaivāhikaṃ smṛtam |
udyogaparva vijñeyamata ūrdhvaṃ mahādbhutam || 49 ||
[Analyze grammar]

tataḥ saṃjayayānākhyaṃ parva jñeyamataḥ param |
prajāgaraṃ tataḥ parva dhṛtarāṣṭrasya cintayā || 50 ||
[Analyze grammar]

parva sānatsujātaṃ ca guhyamadhyātmadarśanam |
yānasaṃdhistataḥ parva bhagavadyānameva ca || 51 ||
[Analyze grammar]

jñeyaṃ vivādaparvātra karṇasyāpi mahātmanaḥ |
niryāṇaṃ parva ca tataḥ kurupāṇḍavasenayoḥ || 52 ||
[Analyze grammar]

rathātirathasaṃkhyā ca parvoktaṃ tadanantaram |
ulūkadūtāgamanaṃ parvāmarṣavivardhanam || 53 ||
[Analyze grammar]

ambopākhyānamapi ca parva jñeyamataḥ param |
bhīṣmābhiṣecanaṃ parva jñeyamadbhutakāraṇam || 54 ||
[Analyze grammar]

jambūkhaṇḍavinirmāṇaṃ parvoktaṃ tadanantaram |
bhūmiparva tato jñeyaṃ dvīpavistarakīrtanam || 55 ||
[Analyze grammar]

parvoktaṃ bhagavadgītā parva bhīṣmavadhastataḥ |
droṇābhiṣekaḥ parvoktaṃ saṃśaptakavadhastataḥ || 56 ||
[Analyze grammar]

abhimanyuvadhaḥ parva pratijñāparva cocyate |
jayadrathavadhaḥ parva ghaṭotkacavadhastataḥ || 57 ||
[Analyze grammar]

tato droṇavadhaḥ parva vijñeyaṃ lomaharṣaṇam |
mokṣo nārāyaṇāstrasya parvānantaramucyate || 58 ||
[Analyze grammar]

karṇaparva tato jñeyaṃ śalyaparva tataḥ param |
hradapraveśanaṃ parva gadāyuddhamataḥ param || 59 ||
[Analyze grammar]

sārasvataṃ tataḥ parva tīrthavaṃśaguṇānvitam |
ata ūrdhvaṃ tu bībhatsaṃ parva sauptikamucyate || 60 ||
[Analyze grammar]

aiṣīkaṃ parva nirdiṣṭamata ūrdhvaṃ sudāruṇam |
jalapradānikaṃ parva strīparva ca tataḥ param || 61 ||
[Analyze grammar]

śrāddhaparva tato jñeyaṃ kurūṇāmaurdhvadehikam |
ābhiṣecanikaṃ parva dharmarājasya dhīmataḥ || 62 ||
[Analyze grammar]

cārvākanigrahaḥ parva rakṣaso brahmarūpiṇaḥ |
pravibhāgo gṛhāṇāṃ ca parvoktaṃ tadanantaram || 63 ||
[Analyze grammar]

śāntiparva tato yatra rājadharmānukīrtanam |
āpaddharmaśca parvoktaṃ mokṣadharmastataḥ param || 64 ||
[Analyze grammar]

tataḥ parva parijñeyamānuśāsanikaṃ param |
svargārohaṇikaṃ parva tato bhīṣmasya dhīmataḥ || 65 ||
[Analyze grammar]

tato'śvamedhikaṃ parva sarvapāpapraṇāśanam |
anugītā tataḥ parva jñeyamadhyātmavācakam || 66 ||
[Analyze grammar]

parva cāśramavāsākhyaṃ putradarśanameva ca |
nāradāgamanaṃ parva tataḥ paramihocyate || 67 ||
[Analyze grammar]

mausalaṃ parva ca tato ghoraṃ samanuvarṇyate |
mahāprasthānikaṃ parva svargārohaṇikaṃ tataḥ || 68 ||
[Analyze grammar]

harivaṃśastataḥ parva purāṇaṃ khilasaṃjñitam |
bhaviṣyatparva cāpyuktaṃ khileṣvevādbhutaṃ mahat || 69 ||
[Analyze grammar]

etatparvaśataṃ pūrṇaṃ vyāsenoktaṃ mahātmanā |
yathāvatsūtaputreṇa lomaharṣaṇinā punaḥ || 70 ||
[Analyze grammar]

kathitaṃ naimiṣāraṇye parvāṇyaṣṭādaśaiva tu |
samāso bhāratasyāyaṃ tatroktaḥ parvasaṃgrahaḥ || 71 ||
[Analyze grammar]

pauṣye parvaṇi māhātmyamuttaṅkasyopavarṇitam |
paulome bhṛguvaṃśasya vistāraḥ parikīrtitaḥ || 72 ||
[Analyze grammar]

āstīke sarvanāgānāṃ garuḍasya ca saṃbhavaḥ |
kṣīrodamathanaṃ caiva janmocchaiḥśravasastathā || 73 ||
[Analyze grammar]

yajataḥ sarpasatreṇa rājñaḥ pārikṣitasya ca |
katheyamabhinirvṛttā bhāratānāṃ mahātmanām || 74 ||
[Analyze grammar]

vividhāḥ saṃbhavā rājñāmuktāḥ saṃbhavaparvaṇi |
anyeṣāṃ caiva viprāṇāmṛṣerdvaipāyanasya ca || 75 ||
[Analyze grammar]

aṃśāvataraṇaṃ cātra devānāṃ parikīrtitam |
daityānāṃ dānavānāṃ ca yakṣāṇāṃ ca mahaujasām || 76 ||
[Analyze grammar]

nāgānāmatha sarpāṇāṃ gandharvāṇāṃ patatriṇām |
anyeṣāṃ caiva bhūtānāṃ vividhānāṃ samudbhavaḥ || 77 ||
[Analyze grammar]

vasūnāṃ punarutpattirbhāgīrathyāṃ mahātmanām |
śaṃtanorveśmani punasteṣāṃ cārohaṇaṃ divi || 78 ||
[Analyze grammar]

tejoṃśānāṃ ca saṃghātādbhīṣmasyāpyatra saṃbhavaḥ |
rājyānnivartanaṃ caiva brahmacaryavrate sthitiḥ || 79 ||
[Analyze grammar]

pratijñāpālanaṃ caiva rakṣā citrāṅgadasya ca |
hate citrāṅgade caiva rakṣā bhrāturyavīyasaḥ || 80 ||
[Analyze grammar]

vicitravīryasya tathā rājye saṃpratipādanam |
dharmasya nṛṣu saṃbhūtiraṇīmāṇḍavyaśāpajā || 81 ||
[Analyze grammar]

kṛṣṇadvaipāyanāccaiva prasūtirvaradānajā |
dhṛtarāṣṭrasya pāṇḍośca pāṇḍavānāṃ ca saṃbhavaḥ || 82 ||
[Analyze grammar]

vāraṇāvatayātrā ca mantro duryodhanasya ca |
vidurasya ca vākyena suruṅgopakramakriyā || 83 ||
[Analyze grammar]

pāṇḍavānāṃ vane ghore hiḍimbāyāśca darśanam |
ghaṭotkacasya cotpattiratraiva parikīrtitā || 84 ||
[Analyze grammar]

ajñātacaryā pāṇḍūnāṃ vāso brāhmaṇaveśmani |
bakasya nidhanaṃ caiva nāgarāṇāṃ ca vismayaḥ || 85 ||
[Analyze grammar]

aṅgāraparṇaṃ nirjitya gaṅgākūle'rjunastadā |
bhrātṛbhiḥ sahitaḥ sarvaiḥ pāñcālānabhito yayau || 86 ||
[Analyze grammar]

tāpatyamatha vāsiṣṭhamaurvaṃ cākhyānamuttamam |
pañcendrāṇāmupākhyānamatraivādbhutamucyate || 87 ||
[Analyze grammar]

pañcānāmekapatnītve vimarśo drupadasya ca |
draupadyā devavihito vivāhaścāpyamānuṣaḥ || 88 ||
[Analyze grammar]

vidurasya ca saṃprāptirdarśanaṃ keśavasya ca |
khāṇḍavaprasthavāsaśca tathā rājyārdhaśāsanam || 89 ||
[Analyze grammar]

nāradasyājñayā caiva draupadyāḥ samayakriyā |
sundopasundayostatra upākhyānaṃ prakīrtitam || 90 ||
[Analyze grammar]

pārthasya vanavāsaśca ulūpyā pathi saṃgamaḥ |
puṇyatīrthānusaṃyānaṃ babhruvāhanajanma ca || 91 ||
[Analyze grammar]

dvārakāyāṃ subhadrā ca kāmayānena kāminī |
vāsudevasyānumate prāptā caiva kirīṭinā || 92 ||
[Analyze grammar]

haraṇaṃ gṛhya saṃprāpte kṛṣṇe devakinandane |
saṃprāptiścakradhanuṣoḥ khāṇḍavasya ca dāhanam || 93 ||
[Analyze grammar]

abhimanyoḥ subhadrāyāṃ janma cottamatejasaḥ |
mayasya mokṣo jvalanādbhujaṃgasya ca mokṣaṇam |
maharṣermandapālasya śārṅgyaṃ tanayasaṃbhavaḥ || 94 ||
[Analyze grammar]

ityetadādiparvoktaṃ prathamaṃ bahuvistaram |
adhyāyānāṃ śate dve tu saṃkhyāte paramarṣiṇā |
aṣṭādaśaiva cādhyāyā vyāsenottamatejasā || 95 ||
[Analyze grammar]

sapta ślokasahasrāṇi tathā nava śatāni ca |
ślokāśca caturāśītirdṛṣṭo grantho mahātmanā || 96 ||
[Analyze grammar]

dvitīyaṃ tu sabhāparva bahuvṛttāntamucyate |
sabhākriyā pāṇḍavānāṃ kiṃkarāṇāṃ ca darśanam || 97 ||
[Analyze grammar]

lokapālasabhākhyānaṃ nāradāddevadarśanāt |
rājasūyasya cārambho jarāsaṃdhavadhastathā || 98 ||
[Analyze grammar]

girivraje niruddhānāṃ rājñāṃ kṛṣṇena mokṣaṇam |
rājasūye'rghasaṃvāde śiśupālavadhastathā || 99 ||
[Analyze grammar]

yajñe vibhūtiṃ tāṃ dṛṣṭvā duḥkhāmarṣānvitasya ca |
duryodhanasyāvahāso bhīmena ca sabhātale || 100 ||
[Analyze grammar]

yatrāsya manyurudbhūto yena dyūtamakārayat |
yatra dharmasutaṃ dyūte śakuniḥ kitavo'jayat || 101 ||
[Analyze grammar]

yatra dyūtārṇave magnāndraupadī naurivārṇavāt |
tārayāmāsa tāṃstīrṇāñjñātvā duryodhano nṛpaḥ |
punareva tato dyūte samāhvayata pāṇḍavān || 102 ||
[Analyze grammar]

etatsarvaṃ sabhāparva samākhyātaṃ mahātmanā |
adhyāyāḥ saptatirjñeyāstathā dvau cātra saṃkhyayā || 103 ||
[Analyze grammar]

ślokānāṃ dve sahasre tu pañca ślokaśatāni ca |
ślokāścaikādaśa jñeyāḥ parvaṇyasminprakīrtitāḥ || 104 ||
[Analyze grammar]

ataḥ paraṃ tṛtīyaṃ tu jñeyamāraṇyakaṃ mahat |
paurānugamanaṃ caiva dharmaputrasya dhīmataḥ || 105 ||
[Analyze grammar]

vṛṣṇīnāmāgamo yatra pāñcālānāṃ ca sarvaśaḥ |
yatra saubhavadhākhyānaṃ kirmīravadha eva ca |
astrahetorvivāsaśca pārthasyāmitatejasaḥ || 106 ||
[Analyze grammar]

mahādevena yuddhaṃ ca kirātavapuṣā saha |
darśanaṃ lokapālānāṃ svargārohaṇameva ca || 107 ||
[Analyze grammar]

darśanaṃ bṛhadaśvasya maharṣerbhāvitātmanaḥ |
yudhiṣṭhirasya cārtasya vyasane paridevanam || 108 ||
[Analyze grammar]

nalopākhyānamatraiva dharmiṣṭhaṃ karuṇodayam |
damayantyāḥ sthitiryatra nalasya vyasanāgame || 109 ||
[Analyze grammar]

vanavāsagatānāṃ ca pāṇḍavānāṃ mahātmanām |
svarge pravṛttirākhyātā lomaśenārjunasya vai || 110 ||
[Analyze grammar]

tīrthayātrā tathaivātra pāṇḍavānāṃ mahātmanām |
jaṭāsurasya tatraiva vadhaḥ samupavarṇyate || 111 ||
[Analyze grammar]

niyukto bhīmasenaśca draupadyā gandhamādane |
yatra mandārapuṣpārthaṃ nalinīṃ tāmadharṣayat || 112 ||
[Analyze grammar]

yatrāsya sumahadyuddhamabhavatsaha rākṣasaiḥ |
yakṣaiścāpi mahāvīryairmaṇimatpramukhaistathā || 113 ||
[Analyze grammar]

āgastyamapi cākhyānaṃ yatra vātāpibhakṣaṇam |
lopāmudrābhigamanamapatyārthamṛṣerapi || 114 ||
[Analyze grammar]

tataḥ śyenakapotīyamupākhyānamanantaram |
indro'gniryatra dharmaśca ajijñāsañśibiṃ nṛpam || 115 ||
[Analyze grammar]

ṛśyaśṛṅgasya caritaṃ kaumārabrahmacāriṇaḥ |
jāmadagnyasya rāmasya caritaṃ bhūritejasaḥ || 116 ||
[Analyze grammar]

kārtavīryavadho yatra haihayānāṃ ca varṇyate |
saukanyamapi cākhyānaṃ cyavano yatra bhārgavaḥ || 117 ||
[Analyze grammar]

śaryātiyajñe nāsatyau kṛtavānsomapīthinau |
tābhyāṃ ca yatra sa muniryauvanaṃ pratipāditaḥ || 118 ||
[Analyze grammar]

jantūpākhyānamatraiva yatra putreṇa somakaḥ |
putrārthamayajadrājā lebhe putraśataṃ ca saḥ || 119 ||
[Analyze grammar]

aṣṭāvakrīyamatraiva vivāde yatra bandinam |
vijitya sāgaraṃ prāptaṃ pitaraṃ labdhavānṛṣiḥ || 120 ||
[Analyze grammar]

avāpya divyānyastrāṇi gurvarthe savyasācinā |
nivātakavacairyuddhaṃ hiraṇyapuravāsibhiḥ || 121 ||
[Analyze grammar]

samāgamaśca pārthasya bhrātṛbhirgandhamādane |
ghoṣayātrā ca gandharvairyatra yuddhaṃ kirīṭinaḥ || 122 ||
[Analyze grammar]

punarāgamanaṃ caiva teṣāṃ dvaitavanaṃ saraḥ |
jayadrathenāpahāro draupadyāścāśramāntarāt || 123 ||
[Analyze grammar]

yatrainamanvayādbhīmo vāyuvegasamo jave |
mārkaṇḍeyasamasyāyāmupākhyānāni bhāgaśaḥ || 124 ||
[Analyze grammar]

saṃdarśanaṃ ca kṛṣṇasya saṃvādaścaiva satyayā |
vrīhidrauṇikamākhyānamaindradyumnaṃ tathaiva ca || 125 ||
[Analyze grammar]

sāvitryauddālakīyaṃ ca vainyopākhyānameva ca |
rāmāyaṇamupākhyānamatraiva bahuvistaram || 126 ||
[Analyze grammar]

karṇasya parimoṣo'tra kuṇḍalābhyāṃ puraṃdarāt |
āraṇeyamupākhyānaṃ yatra dharmo'nvaśātsutam |
jagmurlabdhavarā yatra pāṇḍavāḥ paścimāṃ diśam || 127 ||
[Analyze grammar]

etadāraṇyakaṃ parva tṛtīyaṃ parikīrtitam |
atrādhyāyaśate dve tu saṃkhyāte paramarṣiṇā |
ekonasaptatiścaiva tathādhyāyāḥ prakīrtitāḥ || 128 ||
[Analyze grammar]

ekādaśa sahasrāṇi ślokānāṃ ṣaṭśatāni ca |
catuḥṣaṣṭistathā ślokāḥ parvaitatparikīrtitam || 129 ||
[Analyze grammar]

ataḥ paraṃ nibodhedaṃ vairāṭaṃ parvavistaram |
virāṭanagaraṃ gatvā śmaśāne vipulāṃ śamīm |
dṛṣṭvā saṃnidadhustatra pāṇḍavā āyudhānyuta || 130 ||
[Analyze grammar]

yatra praviśya nagaraṃ chadmabhirnyavasanta te |
durātmano vadho yatra kīcakasya vṛkodarāt || 131 ||
[Analyze grammar]

gograhe yatra pārthena nirjitāḥ kuravo yudhi |
godhanaṃ ca virāṭasya mokṣitaṃ yatra pāṇḍavaiḥ || 132 ||
[Analyze grammar]

virāṭenottarā dattā snuṣā yatra kirīṭinaḥ |
abhimanyuṃ samuddiśya saubhadramarighātinam || 133 ||
[Analyze grammar]

caturthametadvipulaṃ vairāṭaṃ parva varṇitam |
atrāpi parisaṃkhyātamadhyāyānāṃ mahātmanā || 134 ||
[Analyze grammar]

saptaṣaṣṭiratho pūrṇā ślokāgramapi me śṛṇu |
ślokānāṃ dve sahasre tu ślokāḥ pañcāśadeva tu |
parvaṇyasminsamākhyātāḥ saṃkhyayā paramarṣiṇā || 135 ||
[Analyze grammar]

udyogaparva vijñeyaṃ pañcamaṃ śṛṇvataḥ param |
upaplavye niviṣṭeṣu pāṇḍaveṣu jigīṣayā |
duryodhano'rjunaścaiva vāsudevamupasthitau || 136 ||
[Analyze grammar]

sāhāyyamasminsamare bhavānnau kartumarhati |
ityukte vacane kṛṣṇo yatrovāca mahāmatiḥ || 137 ||
[Analyze grammar]

ayudhyamānamātmānaṃ mantriṇaṃ puruṣarṣabhau |
akṣauhiṇīṃ vā sainyasya kasya vā kiṃ dadāmyaham || 138 ||
[Analyze grammar]

vavre duryodhanaḥ sainyaṃ mandātmā yatra durmatiḥ |
ayudhyamānaṃ sacivaṃ vavre kṛṣṇaṃ dhanaṃjayaḥ || 139 ||
[Analyze grammar]

saṃjayaṃ preṣayāmāsa śamārthaṃ pāṇḍavānprati |
yatra dūtaṃ mahārājo dhṛtarāṣṭraḥ pratāpavān || 140 ||
[Analyze grammar]

śrutvā ca pāṇḍavānyatra vāsudevapurogamān |
prajāgaraḥ saṃprajajñe dhṛtarāṣṭrasya cintayā || 141 ||
[Analyze grammar]

viduro yatra vākyāni vicitrāṇi hitāni ca |
śrāvayāmāsa rājānaṃ dhṛtarāṣṭraṃ manīṣiṇam || 142 ||
[Analyze grammar]

tathā sanatsujātena yatrādhyātmamanuttamam |
manastāpānvito rājā śrāvitaḥ śokalālasaḥ || 143 ||
[Analyze grammar]

prabhāte rājasamitau saṃjayo yatra cābhibhoḥ |
aikātmyaṃ vāsudevasya proktavānarjunasya ca || 144 ||
[Analyze grammar]

yatra kṛṣṇo dayāpannaḥ saṃdhimicchanmahāyaśāḥ |
svayamāgācchamaṃ kartuṃ nagaraṃ nāgasāhvayam || 145 ||
[Analyze grammar]

pratyākhyānaṃ ca kṛṣṇasya rājñā duryodhanena vai |
śamārthaṃ yācamānasya pakṣayorubhayorhitam || 146 ||
[Analyze grammar]

karṇaduryodhanādīnāṃ duṣṭaṃ vijñāya mantritam |
yogeśvaratvaṃ kṛṣṇena yatra rājasu darśitam || 147 ||
[Analyze grammar]

rathamāropya kṛṣṇena yatra karṇo'numantritaḥ |
upāyapūrvaṃ śauṇḍīryātpratyākhyātaśca tena saḥ || 148 ||
[Analyze grammar]

tataścāpyabhiniryātrā rathāśvanaradantinām |
nagarāddhāstinapurādbalasaṃkhyānameva ca || 149 ||
[Analyze grammar]

yatra rājñā ulūkasya preṣaṇaṃ pāṇḍavānprati |
śvobhāvini mahāyuddhe dūtyena krūravādinā |
rathātirathasaṃkhyānamambopākhyānameva ca || 150 ||
[Analyze grammar]

etatsubahuvṛttāntaṃ pañcamaṃ parva bhārate |
udyogaparva nirdiṣṭaṃ saṃdhivigrahasaṃśritam || 151 ||
[Analyze grammar]

adhyāyāḥ saṃkhyayā tvatra ṣaḍaśītiśataṃ smṛtam |
ślokānāṃ ṣaṭsahasrāṇi tāvantyeva śatāni ca || 152 ||
[Analyze grammar]

ślokāśca navatiḥ proktāstathaivāṣṭau mahātmanā |
vyāsenodāramatinā parvaṇyasmiṃstapodhanāḥ || 153 ||
[Analyze grammar]

ata ūrdhvaṃ vicitrārthaṃ bhīṣmaparva pracakṣate |
jambūkhaṇḍavinirmāṇaṃ yatroktaṃ saṃjayena ha || 154 ||
[Analyze grammar]

yatra yuddhamabhūdghoraṃ daśāhānyatidāruṇam |
yatra yaudhiṣṭhiraṃ sainyaṃ viṣādamagamatparam || 155 ||
[Analyze grammar]

kaśmalaṃ yatra pārthasya vāsudevo mahāmatiḥ |
mohajaṃ nāśayāmāsa hetubhirmokṣadarśanaiḥ || 156 ||
[Analyze grammar]

śikhaṇḍinaṃ puraskṛtya yatra pārtho mahādhanuḥ |
vinighnanniśitairbāṇai rathādbhīṣmamapātayat || 157 ||
[Analyze grammar]

ṣaṣṭhametanmahāparva bhārate parikīrtitam |
adhyāyānāṃ śataṃ proktaṃ saptadaśa tathāpare || 158 ||
[Analyze grammar]

pañca ślokasahasrāṇi saṃkhyayāṣṭau śatāni ca |
ślokāśca caturāśītiḥ parvaṇyasminprakīrtitāḥ |
vyāsena vedaviduṣā saṃkhyātā bhīṣmaparvaṇi || 159 ||
[Analyze grammar]

droṇaparva tataścitraṃ bahuvṛttāntamucyate |
yatra saṃśaptakāḥ pārthamapaninyū raṇājirāt || 160 ||
[Analyze grammar]

bhagadatto mahārājo yatra śakrasamo yudhi |
supratīkena nāgena saha śastaḥ kirīṭinā || 161 ||
[Analyze grammar]

yatrābhimanyuṃ bahavo jaghnurlokamahārathāḥ |
jayadrathamukhā bālaṃ śūramaprāptayauvanam || 162 ||
[Analyze grammar]

hate'bhimanyau kruddhena yatra pārthena saṃyuge |
akṣauhiṇīḥ sapta hatvā hato rājā jayadrathaḥ |
saṃśaptakāvaśeṣaṃ ca kṛtaṃ niḥśeṣamāhave || 163 ||
[Analyze grammar]

alambusaḥ śrutāyuśca jalasaṃdhaśca vīryavān |
saumadattirvirāṭaśca drupadaśca mahārathaḥ |
ghaṭotkacādayaścānye nihatā droṇaparvaṇi || 164 ||
[Analyze grammar]

aśvatthāmāpi cātraiva droṇe yudhi nipātite |
astraṃ prāduścakārograṃ nārāyaṇamamarṣitaḥ || 165 ||
[Analyze grammar]

saptamaṃ bhārate parva mahadetadudāhṛtam |
atra te pṛthivīpālāḥ prāyaśo nidhanaṃ gatāḥ |
droṇaparvaṇi ye śūrā nirdiṣṭāḥ puruṣarṣabhāḥ || 166 ||
[Analyze grammar]

adhyāyānāṃ śataṃ proktamadhyāyāḥ saptatistathā |
aṣṭau ślokasahasrāṇi tathā nava śatāni ca || 167 ||
[Analyze grammar]

ślokā nava tathaivātra saṃkhyātāstattvadarśinā |
pārāśaryeṇa muninā saṃcintya droṇaparvaṇi || 168 ||
[Analyze grammar]

ataḥ paraṃ karṇaparva procyate paramādbhutam |
sārathye viniyogaśca madrarājasya dhīmataḥ |
ākhyātaṃ yatra paurāṇaṃ tripurasya nipātanam || 169 ||
[Analyze grammar]

prayāṇe paruṣaścātra saṃvādaḥ karṇaśalyayoḥ |
haṃsakākīyamākhyānamatraivākṣepasaṃhitam || 170 ||
[Analyze grammar]

anyonyaṃ prati ca krodho yudhiṣṭhirakirīṭinoḥ |
dvairathe yatra pārthena hataḥ karṇo mahārathaḥ || 171 ||
[Analyze grammar]

aṣṭamaṃ parva nirdiṣṭametadbhāratacintakaiḥ |
ekonasaptatiḥ proktā adhyāyāḥ karṇaparvaṇi |
catvāryeva sahasrāṇi nava ślokaśatāni ca || 172 ||
[Analyze grammar]

ataḥ paraṃ vicitrārthaṃ śalyaparva prakīrtitam |
hatapravīre sainye tu netā madreśvaro'bhavat || 173 ||
[Analyze grammar]

vṛttāni rathayuddhāni kīrtyante yatra bhāgaśaḥ |
vināśaḥ kurumukhyānāṃ śalyaparvaṇi kīrtyate || 174 ||
[Analyze grammar]

śalyasya nidhanaṃ cātra dharmarājānmahārathāt |
gadāyuddhaṃ tu tumulamatraiva parikīrtitam |
sarasvatyāśca tīrthānāṃ puṇyatā parikīrtitā || 175 ||
[Analyze grammar]

navamaṃ parva nirdiṣṭametadadbhutamarthavat |
ekonaṣaṣṭiradhyāyāstatra saṃkhyāviśāradaiḥ || 176 ||
[Analyze grammar]

saṃkhyātā bahuvṛttāntāḥ ślokāgraṃ cātra śasyate |
trīṇi ślokasahasrāṇi dve śate viṃśatistathā |
muninā saṃpraṇītāni kauravāṇāṃ yaśobhṛtām || 177 ||
[Analyze grammar]

ataḥ paraṃ pravakṣyāmi sauptikaṃ parva dāruṇam |
bhagnoruṃ yatra rājānaṃ duryodhanamamarṣaṇam || 178 ||
[Analyze grammar]

vyapayāteṣu pārtheṣu trayaste'bhyāyayū rathāḥ |
kṛtavarmā kṛpo drauṇiḥ sāyāhne rudhirokṣitāḥ || 179 ||
[Analyze grammar]

pratijajñe dṛḍhakrodho drauṇiryatra mahārathaḥ |
ahatvā sarvapāñcālāndhṛṣṭadyumnapurogamān |
pāṇḍavāṃśca sahāmātyānna vimokṣyāmi daṃśanam || 180 ||
[Analyze grammar]

prasuptānniśi viśvastānyatra te puruṣarṣabhāḥ |
pāñcālānsaparīvārāñjaghnurdrauṇipurogamāḥ || 181 ||
[Analyze grammar]

yatrāmucyanta pārthāste pañca kṛṣṇabalāśrayāt |
sātyakiśca maheṣvāsaḥ śeṣāśca nidhanaṃ gatāḥ || 182 ||
[Analyze grammar]

draupadī putraśokārtā pitṛbhrātṛvadhārditā |
kṛtānaśanasaṃkalpā yatra bhartṝnupāviśat || 183 ||
[Analyze grammar]

draupadīvacanādyatra bhīmo bhīmaparākramaḥ |
anvadhāvata saṃkruddho bhāradvājaṃ guroḥ sutam || 184 ||
[Analyze grammar]

bhīmasenabhayādyatra daivenābhipracoditaḥ |
apāṇḍavāyeti ruṣā drauṇirastramavāsṛjat || 185 ||
[Analyze grammar]

maivamityabravītkṛṣṇaḥ śamayaṃstasya tadvacaḥ |
yatrāstramastreṇa ca tacchamayāmāsa phālgunaḥ || 186 ||
[Analyze grammar]

drauṇidvaipāyanādīnāṃ śāpāścānyonyakāritāḥ |
toyakarmaṇi sarveṣāṃ rājñāmudakadānike || 187 ||
[Analyze grammar]

gūḍhotpannasya cākhyānaṃ karṇasya pṛthayātmanaḥ |
sutasyaitadiha proktaṃ daśamaṃ parva sauptikam || 188 ||
[Analyze grammar]

aṣṭādaśāsminnadhyāyāḥ parvaṇyuktā mahātmanā |
ślokāgramatra kathitaṃ śatānyaṣṭau tathaiva ca || 189 ||
[Analyze grammar]

ślokāśca saptatiḥ proktā yathāvadabhisaṃkhyayā |
sauptikaiṣīkasaṃbandhe parvaṇyamitabuddhinā || 190 ||
[Analyze grammar]

ata ūrdhvamidaṃ prāhuḥ strīparva karuṇodayam |
vilāpo vīrapatnīnāṃ yatrātikaruṇaḥ smṛtaḥ |
krodhāveśaḥ prasādaśca gāndhārīdhṛtarāṣṭrayoḥ || 191 ||
[Analyze grammar]

yatra tānkṣatriyāñśūrāndiṣṭāntānanivartinaḥ |
putrānbhrātṝnpitṝṃścaiva dadṛśurnihatānraṇe || 192 ||
[Analyze grammar]

yatra rājā mahāprājñaḥ sarvadharmabhṛtāṃ varaḥ |
rājñāṃ tāni śarīrāṇi dāhayāmāsa śāstrataḥ || 193 ||
[Analyze grammar]

etadekādaśaṃ proktaṃ parvātikaruṇaṃ mahat |
saptaviṃśatiradhyāyāḥ parvaṇyasminnudāhṛtāḥ || 194 ||
[Analyze grammar]

ślokāḥ saptaśataṃ cātra pañcasaptatirucyate |
saṃkhyayā bhāratākhyānaṃ kartrā hyatra mahātmanā |
praṇītaṃ sajjanamanovaiklavyāśrupravartakam || 195 ||
[Analyze grammar]

ataḥ paraṃ śāntiparva dvādaśaṃ buddhivardhanam |
yatra nirvedamāpanno dharmarājo yudhiṣṭhiraḥ |
ghātayitvā pitṝnbhrātṝnputrānsaṃbandhibāndhavān || 196 ||
[Analyze grammar]

śāntiparvaṇi dharmāśca vyākhyātāḥ śaratalpikāḥ |
rājabhirveditavyā ye samyaṅnayabubhutsubhiḥ || 197 ||
[Analyze grammar]

āpaddharmāśca tatraiva kālahetupradarśakāḥ |
yānbuddhvā puruṣaḥ samyaksarvajñatvamavāpnuyāt |
mokṣadharmāśca kathitā vicitrā bahuvistarāḥ || 198 ||
[Analyze grammar]

dvādaśaṃ parva nirdiṣṭametatprājñajanapriyam |
parvaṇyatra parijñeyamadhyāyānāṃ śatatrayam |
triṃśaccaiva tathādhyāyā nava caiva tapodhanāḥ || 199 ||
[Analyze grammar]

ślokānāṃ tu sahasrāṇi kīrtitāni caturdaśa |
pañca caiva śatānyāhuḥ pañcaviṃśatisaṃkhyayā || 200 ||
[Analyze grammar]

ata ūrdhvaṃ tu vijñeyamānuśāsanamuttamam |
yatra prakṛtimāpannaḥ śrutvā dharmaviniścayam |
bhīṣmādbhāgīrathīputrātkururājo yudhiṣṭhiraḥ || 201 ||
[Analyze grammar]

vyavahāro'tra kārtsnyena dharmārthīyo nidarśitaḥ |
vividhānāṃ ca dānānāṃ phalayogāḥ pṛthagvidhāḥ || 202 ||
[Analyze grammar]

tathā pātraviśeṣāśca dānānāṃ ca paro vidhiḥ |
ācāravidhiyogaśca satyasya ca parā gatiḥ || 203 ||
[Analyze grammar]

etatsubahuvṛttāntamuttamaṃ cānuśāsanam |
bhīṣmasyātraiva saṃprāptiḥ svargasya parikīrtitā || 204 ||
[Analyze grammar]

etattrayodaśaṃ parva dharmaniścayakārakam |
adhyāyānāṃ śataṃ cātra ṣaṭcatvāriṃśadeva ca |
ślokānāṃ tu sahasrāṇi ṣaṭsaptaiva śatāni ca || 205 ||
[Analyze grammar]

tato'śvamedhikaṃ nāma parva proktaṃ caturdaśam |
tatsaṃvartamaruttīyaṃ yatrākhyānamanuttamam || 206 ||
[Analyze grammar]

suvarṇakośasaṃprāptirjanma coktaṃ parikṣitaḥ |
dagdhasyāstrāgninā pūrvaṃ kṛṣṇātsaṃjīvanaṃ punaḥ || 207 ||
[Analyze grammar]

caryāyāṃ hayamutsṛṣṭaṃ pāṇḍavasyānugacchataḥ |
tatra tatra ca yuddhāni rājaputrairamarṣaṇaiḥ || 208 ||
[Analyze grammar]

citrāṅgadāyāḥ putreṇa putrikāyā dhanaṃjayaḥ |
saṃgrāme babhruvāhena saṃśayaṃ cātra darśitaḥ |
aśvamedhe mahāyajñe nakulākhyānameva ca || 209 ||
[Analyze grammar]

ityāśvamedhikaṃ parva proktametanmahādbhutam |
atrādhyāyaśataṃ triṃśattrayo'dhyāyāśca śabditāḥ || 210 ||
[Analyze grammar]

trīṇi ślokasahasrāṇi tāvantyeva śatāni ca |
viṃśatiśca tathā ślokāḥ saṃkhyātāstattvadarśinā || 211 ||
[Analyze grammar]

tata āśramavāsākyaṃ parva pañcadaśaṃ smṛtam |
yatra rājyaṃ parityajya gāndhārīsahito nṛpaḥ |
dhṛtarāṣṭrāśramapadaṃ viduraśca jagāma ha || 212 ||
[Analyze grammar]

yaṃ dṛṣṭvā prasthitaṃ sādhvī pṛthāpyanuyayau tadā |
putrarājyaṃ parityajya guruśuśrūṣaṇe ratā || 213 ||
[Analyze grammar]

yatra rājā hatānputrānpautrānanyāṃśca pārthivān |
lokāntaragatānvīrānapaśyatpunarāgatān || 214 ||
[Analyze grammar]

ṛṣeḥ prasādātkṛṣṇasya dṛṣṭvāścaryamanuttamam |
tyaktvā śokaṃ sadāraśca siddhiṃ paramikāṃ gataḥ || 215 ||
[Analyze grammar]

yatra dharmaṃ samāśritya viduraḥ sugatiṃ gataḥ |
saṃjayaśca mahāmātro vidvāngāvalgaṇirvaśī || 216 ||
[Analyze grammar]

dadarśa nāradaṃ yatra dharmarājo yudhiṣṭhiraḥ |
nāradāccaiva śuśrāva vṛṣṇīnāṃ kadanaṃ mahat || 217 ||
[Analyze grammar]

etadāśramavāsākhyaṃ pūrvoktaṃ sumahādbhutam |
dvicatvāriṃśadadhyāyāḥ parvaitadabhisaṃkhyayā || 218 ||
[Analyze grammar]

sahasramekaṃ ślokānāṃ pañca ślokaśatāni ca |
ṣaḍeva ca tathā ślokāḥ saṃkhyātāstattvadarśinā || 219 ||
[Analyze grammar]

ataḥ paraṃ nibodhedaṃ mausalaṃ parva dāruṇam |
yatra te puruṣavyāghrāḥ śastrasparśasahā yudhi |
brahmadaṇḍaviniṣpiṣṭāḥ samīpe lavaṇāmbhasaḥ || 220 ||
[Analyze grammar]

āpāne pānagalitā daivenābhipracoditāḥ |
erakārūpibhirvajrairnijaghnuritaretaram || 221 ||
[Analyze grammar]

yatra sarvakṣayaṃ kṛtvā tāvubhau rāmakeśavau |
nāticakramatuḥ kālaṃ prāptaṃ sarvaharaṃ samam || 222 ||
[Analyze grammar]

yatrārjuno dvāravatīmetya vṛṣṇivinākṛtām |
dṛṣṭvā viṣādamagamatparāṃ cārtiṃ nararṣabhaḥ || 223 ||
[Analyze grammar]

sa satkṛtya yaduśreṣṭhaṃ mātulaṃ śaurimātmanaḥ |
dadarśa yaduvīrāṇāmāpāne vaiśasaṃ mahat || 224 ||
[Analyze grammar]

śarīraṃ vāsudevasya rāmasya ca mahātmanaḥ |
saṃskāraṃ lambhayāmāsa vṛṣṇīnāṃ ca pradhānataḥ || 225 ||
[Analyze grammar]

sa vṛddhabālamādāya dvāravatyāstato janam |
dadarśāpadi kaṣṭāyāṃ gāṇḍīvasya parābhavam || 226 ||
[Analyze grammar]

sarveṣāṃ caiva divyānāmastrāṇāmaprasannatām |
nāśaṃ vṛṣṇikalatrāṇāṃ prabhāvānāmanityatām || 227 ||
[Analyze grammar]

dṛṣṭvā nirvedamāpanno vyāsavākyapracoditaḥ |
dharmarājaṃ samāsādya saṃnyāsaṃ samarocayet || 228 ||
[Analyze grammar]

ityetanmausalaṃ parva ṣoḍaśaṃ parikīrtitam |
adhyāyāṣṭau samākhyātāḥ ślokānāṃ ca śatatrayam || 229 ||
[Analyze grammar]

mahāprasthānikaṃ tasmādūrdhvaṃ saptadaśaṃ smṛtam |
yatra rājyaṃ parityajya pāṇḍavāḥ puruṣarṣabhāḥ |
draupadyā sahitā devyā siddhiṃ paramikāṃ gatāḥ || 230 ||
[Analyze grammar]

atrādhyāyāstrayaḥ proktāḥ ślokānāṃ ca śataṃ tathā |
viṃśatiśca tathā ślokāḥ saṃkhyātāstattvadarśinā || 231 ||
[Analyze grammar]

svargaparva tato jñeyaṃ divyaṃ yattadamānuṣam |
adhyāyāḥ pañca saṃkhyātāḥ parvaitadabhisaṃkhyayā |
ślokānāṃ dve śate caiva prasaṃkhyāte tapodhanāḥ || 232 ||
[Analyze grammar]

aṣṭādaśaivametāni parvāṇyuktānyaśeṣataḥ |
khileṣu harivaṃśaśca bhaviṣyacca prakīrtitam || 233 ||
[Analyze grammar]

etadakhilamākhyātaṃ bhārataṃ parvasaṃgrahāt |
aṣṭādaśa samājagmurakṣauhiṇyo yuyutsayā |
tanmahaddāruṇaṃ yuddhamahānyaṣṭādaśābhavat || 234 ||
[Analyze grammar]

yo vidyāccaturo vedānsāṅgopaniṣadāndvijaḥ |
na cākhyānamidaṃ vidyānnaiva sa syādvicakṣaṇaḥ || 235 ||
[Analyze grammar]

śrutvā tvidamupākhyānaṃ śrāvyamanyanna rocate |
puṃskokilarutaṃ śrutvā rūkṣā dhvāṅkṣasya vāgiva || 236 ||
[Analyze grammar]

itihāsottamādasmājjāyante kavibuddhayaḥ |
pañcabhya iva bhūtebhyo lokasaṃvidhayastrayaḥ || 237 ||
[Analyze grammar]

asyākhyānasya viṣaye purāṇaṃ vartate dvijāḥ |
antarikṣasya viṣaye prajā iva caturvidhāḥ || 238 ||
[Analyze grammar]

kriyāguṇānāṃ sarveṣāmidamākhyānamāśrayaḥ |
indriyāṇāṃ samastānāṃ citrā iva manaḥkriyāḥ || 239 ||
[Analyze grammar]

anāśrityaitadākhyānaṃ kathā bhuvi na vidyate |
āhāramanapāśritya śarīrasyeva dhāraṇam || 240 ||
[Analyze grammar]

idaṃ sarvaiḥ kavivarairākhyānamupajīvyate |
udayaprepsubhirbhṛtyairabhijāta iveśvaraḥ || 241 ||
[Analyze grammar]

dvaipāyanauṣṭhapuṭaniḥsṛtamaprameyaṃ puṇyaṃ pavitramatha pāpaharaṃ śivaṃ ca |
yo bhārataṃ samadhigacchati vācyamānaṃ kiṃ tasya puṣkarajalairabhiṣecanena || 242 ||
[Analyze grammar]

ākhyānaṃ tadidamanuttamaṃ mahārthaṃ vinyastaṃ mahadiha parvasaṃgraheṇa |
śrutvādau bhavati nṛṇāṃ sukhāvagāhaṃ vistīrṇaṃ lavaṇajalaṃ yathā plavena || 243 ||
[Analyze grammar]