Chapter 34

[English text for this chapter is available]

| bhīṣma uvāca |
kasminkāle bhagavatā brahmaṇā lokakāriṇā |
yajñiyairyaṣṭumārabdhaṃ tadbhavānvaktumarhati || 1 ||
[Analyze grammar]

kiṃ nāmāna ṛtvijaste brahmaṇā ye prakalpitāḥ |
kā ca vai dakṣiṇā teṣāṃ dattā tena mahātmanā || 2 ||
[Analyze grammar]

yathābhūtaṃ yathāvṛttaṃ tathā tvaṃ me prakīrtaya |
sumahatkautukaṃ jātaṃ yajñaṃ paitāmahaṃ prati || 3 ||
[Analyze grammar]

pulastya uvāca |
pūrvameva mayā khyātaṃ yadā svāyaṃbhuvo manuḥ |
sṛṣṭvā prajāpatīnsarvānuktaḥ sṛṣṭiṃ kuruṣva vai || 4 ||
[Analyze grammar]

svayaṃ tu puṣkaraṃ gatvā yajñasyāhṛtya vistaram |
sasaṃbhārānsamānāyya vahnyagāre sthitobhavat || 5 ||
[Analyze grammar]

gāyaṃti nityaṃ gaṃdharvā nṛtyaṃtyapsarasāṃ gaṇāḥ |
brahmodgātā hotādhvaryuścatvāro yajñavāhakāḥ || 6 ||
[Analyze grammar]

ekaikasya trayaścānye parivārāḥ svayaṃkṛtāḥ |
brahmā ca brahmaṇācchaṃsī potā cāgnīdhra eva ca || 7 ||
[Analyze grammar]

ānvīkṣikī sarvavidyā brāhmī hyeṣā catuṣṭayī |
udgātā ca pratyudgātā pratihartā subrahmaṇyaḥ || 8 ||
[Analyze grammar]

catuṣṭayī dvitīyaiṣā tūdgātuśca prakīrtitā |
hotā ca maitrāvaruṇastathā'cchāvāka eva ca || 9 ||
[Analyze grammar]

grāvastucca caturthotra tṛtīyā ca catuṣṭayī |
adhvaryuśca pratiṣṭhātā neṣṭonnetā tathaiva ca || 10 ||
[Analyze grammar]

catuṣṭayī caturthyeṣā proktā śaṃtanunaṃdana |
ete vai ṣoḍaśa proktā ṛtvijo vedaciṃtakaiḥ || 11 ||
[Analyze grammar]

śatāni trīṇi ṣaṣṭiśca yajñāḥ sṛṣṭāḥ svayaṃbhuvā |
etāṃścaiteṣu sarveṣu pravadaṃti sadā dvijān || 12 ||
[Analyze grammar]

sadasyaṃ kecidicchaṃti trisāmādhvaryumeva ca |
brahmāṇaṃ nāradaṃ cakre brāhmaṇācchaṃsi gautamam || 13 ||
[Analyze grammar]

devagarbhaṃ ca potāramāgnīdhraṃ caiva devalam |
udgātāṃgirasaḥ pratyudgātā ca pulahastathā || 14 ||
[Analyze grammar]

nārāyaṇaḥ pratihartā subrahmaṇyotrirucyate |
tasminyajñe bhṛgurhotā vasiṣṭho maitra eva ca || 15 ||
[Analyze grammar]

acchāvākaḥ kratuḥ prokto grāvastuccyavanastathā |
pulastyoddhvaryurevāsītpratiṣṭhātā ca vai śibiḥ || 16 ||
[Analyze grammar]

bṛhaspatistatra neṣṭā unnetā śāṃśapāyanaḥ |
dharmaḥ sadasyastatrāsītputrapautrasahāyavān || 17 ||
[Analyze grammar]

bharadvājaḥ śamīkaśca purukutso yugaṃdharaḥ |
enakastīrṇakaścaiva keśaḥ kutapa eva ca || 18 ||
[Analyze grammar]

gargo vedaśirāścaiva trisāmāddhvaryavaḥ kṛtāḥ |
kaṇvādayastathā cānye mārkaṃḍo gaṃḍireva ca || 19 ||
[Analyze grammar]

putrapautrasametāśca saśiṣyāḥ sahabāṃdhavāḥ |
karmāṇi tatra kurvāṇā divāniśamataṃdritāḥ || 20 ||
[Analyze grammar]

manvaṃtare vyatīte tu yajñasyāvabhṛthobhavat |
dakṣiṇā brahmaṇe dattā prācī hotustu dakṣiṇā || 21 ||
[Analyze grammar]

addhvaryave pratīcī tu udgātuścottarā tathā |
trailokyaṃ sakalaṃ brahmā dadau teṣāṃ tu dakṣiṇām || 22 ||
[Analyze grammar]

dhenūnāṃ ca śataṃ prājñairdātavyaṃ yajñasiddhaye |
aṣṭau tu yajñavāhānāṃ catvāriṃśādhikāstathā || 23 ||
[Analyze grammar]

dvitīyasthānināṃ caiva caturviṃśatprakīrtitāḥ |
ṣoḍaśaiva tṛtīyānāṃ deyā vai dhenavaḥ śubhāḥ || 24 ||
[Analyze grammar]

dvādaśaiva tathā cānyā āgnīdhrādiṣu dāpayet |
anayā saṃkhyayā caiva grāmāndāsīrajāvikaṃ || 25 ||
[Analyze grammar]

sahasrabhojyaṃ dātavyaṃ snātvā cāvabhṛthe kratau |
yajamānena sarvasvaṃ deyaṃ svāyaṃbhuvobravīt || 26 ||
[Analyze grammar]

addhvaryūṇāṃ sadasyānāṃ svecchayā dānamiṣyate |
viṣṇuṃ cāhūya vai brahmā vākyamāha mudānvitaḥ || 27 ||
[Analyze grammar]

abhiprasādya sāvitrīṃ tvamihānaya suvrata |
tvayi dṛṣṭe na sā kopaṃ kariṣyati śubhānanā || 28 ||
[Analyze grammar]

snigdhaiḥ sānunayairvākyairhetuyuktairviśeṣataḥ |
tvaṃ sadā madhurābhāṣī jihvā te sravatemṛtam || 29 ||
[Analyze grammar]

yaḥ karoti na te vākyaṃ trailokye na sa dṛśyate |
gaṃdharvaiḥ sahito gatvā priyāṃ mama samānaya || 30 ||
[Analyze grammar]

tvayā prasāditā sāddhvī tuṣṭā sā tveṣyati dhruvam |
vilaṃbo na tvayā kāryo vraja mādhava māciram || 31 ||
[Analyze grammar]

lakṣmīste purato yātu sāvitryāḥ sadanaṃ śubhā |
tasyāstvaṃ padavīṃ gaccha sāṃtvayasva priyāṃ mama || 32 ||
[Analyze grammar]

na ca te vipriyaṃ devi viviktaṃ kartumīhate |
mukhaṃ prekṣya sadā kālaṃ vartate tava suṃdari || 33 ||
[Analyze grammar]

evaṃvidhāni vākyāni madhurāṇi bahūni ca |
devī śrāvayitavyā sā yathātuṣṭā'cirādbhavet || 34 ||
[Analyze grammar]

evamuktastadā viṣṇurbrahmaṇā lokakāriṇā |
jagāma tvarito bhūtvā sāvitrī yatra tiṣṭhati || 35 ||
[Analyze grammar]

dūrādevāgacchamānaṃ patnyā saha ca keśavam |
uttasthau satvarā bhūtvā viṣṇunā cābhivaṃditā || 36 ||
[Analyze grammar]

namaste devadeveśi brahmapatni namostu te |
tvāṃ namaskṛtya sarvo hi janaḥ pāpātpramucyate || 37 ||
[Analyze grammar]

pativratā mahābhāgā brahmaṇastvaṃ hṛdi sthitā |
aharniśaṃ ciṃtayaṃstvāṃ prasādaṃ tebhikāṃkṣati || 38 ||
[Analyze grammar]

sakhīṃ caināṃ priyāṃ pṛccha lakṣmīṃ bhṛgusutāṃ satīm |
yadi ca śraddadhā nāsi vākyādasmātsulocane || 39 ||
[Analyze grammar]

evamuktvā tataḥ śauriḥ sāvitryāścaraṇadvayam |
ubhābhyāṃ caiva hastābhyāṃ kṣama devi namostu te || 40 ||
[Analyze grammar]

jagadvaṃdye jaganmātariti spṛṣṭvā'bhyavandata |
saṃkocya pādau sā devī svakareṇa karau hareḥ || 41 ||
[Analyze grammar]

gṛhītvovāca taṃ viṣṇuṃ sarvaṃ kṣāntaṃ mayācyuta |
iyaṃ lakṣmīḥ sadā vatsa hṛdaye te nivatsyati || 42 ||
[Analyze grammar]

vinā tvayā na cānyatra ratiṃ yāsyati karhicit |
bhṛgoḥ patnyāṃ samutpannā patnyeṣā tava suvratā || 43 ||
[Analyze grammar]

devadānavayatnena saṃbhūtā codadhau punaḥ |
bhagavānyatra tatraiṣā avatāraṃ ca kurvatī || 44 ||
[Analyze grammar]

devatve devadehā vai mānuṣatve ca mānuṣī |
tvatsahāyā na saṃdeho dāṃpatyavratinī ciram || 45 ||
[Analyze grammar]

yanmayā cātra karttavyaṃ prabhotanmāṃ vadasva vai |
viṣṇuruvāca |
yajñāvasānaṃ saṃjātaṃ preṣitohaṃ tavāṃtikaṃ || 46 ||
[Analyze grammar]

sāvitrīmānaya kṣipraṃ mayā snānaṃ samācaret |
āgaccha tvaritā devi yāhi tatra mudānvitā || 47 ||
[Analyze grammar]

paśyasva svapatiṃ gatvā devaiḥ sarvaissamanvitam |
lakṣmīruvāca |
ārye uttiṣṭha śīghraṃ tvaṃ yāhi yatra pitāmahaḥ || 48 ||
[Analyze grammar]

vinā tvayā na yāsyāmi spṛṣṭau pādau mayā tava |
utthāpya sāgrahīddhastaṃ dakṣiṇā dakṣiṇe kare || 49 ||
[Analyze grammar]

cirāyamāṇāṃ sāvitrīṃ jñātvā devaḥ pitāmahaḥ |
samīpasthaṃ mahādevamidamāha tadā vacaḥ || 50 ||
[Analyze grammar]

gaccha tvamanayā sārddhaṃ pārvatyā'suradūṣaṇa |
gaurī tvadagrato yātu paścāttvaṃ gaccha śaṃkara || 51 ||
[Analyze grammar]

pratibodhyānaya yathā śīghramāyāti tatkuru |
evamuktau tadā tau tu pārvatīparameśvarau || 52 ||
[Analyze grammar]

gatvādiṣṭau daṃpatī tāṃ procaturbrahmaṇaḥ priyām |
bṛhatkṛtyaṃ tvayā tatra karaṇīyaṃ pativrate || 53 ||
[Analyze grammar]

pṛcchasvemāṃ varārohāṃ gaurīṃ parvatanaṃdinīm |
lakṣmīṃ caitāṃ viśālākṣīmiṃdrāṇīṃ vā śubhānane || 54 ||
[Analyze grammar]

yāsāṃ vā śraddhadhāsi tvaṃ pṛccha devi namostu te |
āśīrvādastayā datto devadevasya śūlinaḥ || 55 ||
[Analyze grammar]

śarīrārdhe ca te gaurī sadā sthāsyati śaṃkara |
anayā śobhase deva tvayā trailokyasuṃdara || 56 ||
[Analyze grammar]

sukhabhāgi jagatsarvaṃ tvayā nāthena śatruhan |
evaṃ bruvaṃtī sāvitrī gṛhītā brahmaṇaḥ priyā || 57 ||
[Analyze grammar]

gauryyā ca vāmahaste tu lakṣmyā vai dakṣiṇe kare |
abhivaṃdya tu tāṃ devīṃ śaṃkaro vākyamabravīt || 58 ||
[Analyze grammar]

ehyāgaccha mahābhāge yatra tiṣṭhati te patiḥ |
tatra gaccha varārohe strīṇāṃ bhartā parāgatiḥ || 59 ||
[Analyze grammar]

bṛhadāgrahaṇe devi praṇayādgaṃtumarhasi |
lakṣmīścaiṣā pārvatī ca sthitā devi tavāgrataḥ || 60 ||
[Analyze grammar]

etayorvacasā devi āvayośca śubhānane |
mānabhaṃgo na te kartuṃ yajyate brahmaṇaḥ priye || 61 ||
[Analyze grammar]

asmadabhyarthitā devi tatra yāhi mudānvitā |
gauryuvāca |
ahaṃ ca te priyā devi sarvadā vadasi svayam || 62 ||
[Analyze grammar]

lakṣmīśca te kare lagnā dakṣiṇe ca mayā dhṛtā |
ehyāgaccha mahābhāge yatra tiṣṭhati te patiḥ || 63 ||
[Analyze grammar]

nītā sā tu tadā tābhyāṃ devī sā madhyataḥ kṛtā |
purassarau viṣṇurudrau śakrādyāśca tathā surāḥ || 64 ||
[Analyze grammar]

gaṃdharvāpsarasaścaiva trailokyaṃ sacarācam |
tatrāyātā ca sā devī sāvitrī brahmaṇaḥ priyā || 65 ||
[Analyze grammar]

sāvitrīṃ sumukhīṃ dṛṣṭvā sarvalokapitāmahaḥ |
gāyatryā sahito brahmā idaṃ vacanamabravīt || 66 ||
[Analyze grammar]

eṣā devī karmakarī ahaṃ te vaśagasthitaḥ |
samādiśa varārohe yatte kāryaṃ mayā tviha || 67 ||
[Analyze grammar]

evamuktā ca sā devī svayaṃ devena brahmaṇā |
trapayādhomukhī devī na ca kiṃcidavocata || 68 ||
[Analyze grammar]

pādayoḥ patitā devī gāyatrī brahmacoditā |
kṛtavatyaparādhaṃ te kṣama devi namostu te || 69 ||
[Analyze grammar]

āliṃgya sādaraṃ kaṃṭhe sā pariṣvajya pīḍitāṃ |
gāyatrīṃ sāṃtvayāmāsa mānyaścaiṣa patirmama || 70 ||
[Analyze grammar]

karttavyaṃ vacanaṃ tasya strīṇāṃ prāṇeśvaraḥ patiḥ |
uktaṃ bhagavatā pūrvaṃ sṛṣṭikāle viriṃcinā || 71 ||
[Analyze grammar]

na ca strīṇāṃ pṛthagyajño na vrataṃ nāpyupoṣaṇam |
bhartā yadvadate vākyaṃ tattu kuryādakutsayā || 72 ||
[Analyze grammar]

bhartṛniṃdāṃ yā kurute svasṛniṃdāṃ tathaiva ca |
parivādaṃ pralāpaṃ vā narakaṃ sā tu gacchati || 73 ||
[Analyze grammar]

patyau jīvati yā nārī upavāsavrataṃ caret |
āyuṣyaṃ harate bharturmṛtā narakamicchati || 74 ||
[Analyze grammar]

evaṃ jñātvā tvayā bharturna kāryaṃ vipriyaṃ sati |
na cāsya dakṣiṇaṃ tvaṃgaṃ tvayā sevyaṃ kathaṃcana || 75 ||
[Analyze grammar]

sarvakārye tvahaṃ cāsya dakṣiṇaṃ pakṣamāśritā |
savyaṃ tvamāyessādhvi pārśve nāradapuṣkarau || 76 ||
[Analyze grammar]

brahmasthānāni cānyāni sthitānyāyatanāni ca |
labhe vai śobhamāneha yāvatsṛṣṭiḥ prajāyate || 77 ||
[Analyze grammar]

bhavatyā ca mayā caiva sthātavyaṃ ca na saṃśayaḥ |
puṣkare brahmaṇaḥ pārśve vāmaṃ ca tvaṃ samāśraya || 78 ||
[Analyze grammar]

anena copadeśena sukhaṃ tiṣṭha mayānvitā |
gāyatryuvāca |
evametatkariṣyāmi tava nirdeśakārikā || 79 ||
[Analyze grammar]

tavaivājñā mayā kāryā tvaṃ me prāṇasamā sakhī |
ahaṃ te tvanujā devi sadā māṃ pātumarhasi || 80 ||
[Analyze grammar]

devadevastadā brahmā puṣkare viṣṇunā saha |
snānāvasāne devānāṃ sarveṣāṃ pradadau varān || 81 ||
[Analyze grammar]

devānāṃ ca patiṃ śakraṃ jyotiṣāṃ ca divākaraṃ |
nakṣatrāṇāṃ tathā somaṃ rasānāṃ varuṇaṃ tathā || 82 ||
[Analyze grammar]

prajāpatīnāṃ dakṣaṃ ca nadīnāṃ caiva sāgaraṃ |
kuberaṃ ca dhanādhyakṣaṃ tathā cakre ca rakṣasāṃ || 83 ||
[Analyze grammar]

bhūtānāṃ caiva sarveṣāṃ gaṇānāṃ ca pinākinam |
mānavānāṃ manuṃ caiva pakṣiṇāṃ garuḍaṃ tathā || 84 ||
[Analyze grammar]

ṛṣīṇāṃ ca vasiṣṭhaṃ ca grahāṇāṃ ca prabhākaraṃ |
evamādīni vai datvā devadevaḥ pitāmahaḥ || 85 ||
[Analyze grammar]

viṣṇuṃ ca śaṃkaraṃ caiva brahmā provāca sādaram |
pṛthivyāḥ sarvatīrtheṣu bhavaṃtau pūjyasattamau || 86 ||
[Analyze grammar]

bhavadbhyāṃ na vinā tīrthaṃ puṇyatāmeti karhicit |
liṃgaṃ vā pratimā vāpi dṛśyate yatrakutracit || 87 ||
[Analyze grammar]

tattīrthaṃ puṇyatāṃ yāti sarvameva phalapradaṃ |
mānavā hyupahāraiśca ye kariṣyaṃti pūjanaṃ || 88 ||
[Analyze grammar]

yuṣmākaṃ māṃ puraskṛtya teṣāṃ rogabhayaṃ kutaḥ |
yeṣu rāṣṭreṣu yuṣmākamutsavāḥ pūjanādikāḥ || 89 ||
[Analyze grammar]

pravartsyaṃti kriyāḥ sarvā yatphalaṃ teṣu tacchṛṇu |
nādhayo vyādhayaścaiva nopasargā na kṣudbhayaṃ || 90 ||
[Analyze grammar]

viprayogo na cāpīṣṭairaniṣṭairnāpi saṃgatiḥ |
nākṣirogaḥ śirārtirvā pittaśūla bhagaṃdarāḥ || 91 ||
[Analyze grammar]

nābhicāraṃ bhayaṃ tatrāpasmāro na viṣūcikā |
vṛddhirnikāmatastasminsamyagbuddhiranuttamā || 92 ||
[Analyze grammar]

ārogyaṃ sarvataścaiva dīrghāyuśca prajādhanaṃ |
nākāle bhavitā mṛtyurgāvo nālpapayomucaḥ || 93 ||
[Analyze grammar]

nākālaphalitā vṛkṣā notpātabhayamaṇvapi |
etacchrutvā tato viṣṇurbrahmāṇaṃ stotumudyataḥ || 94 ||
[Analyze grammar]

viṣṇuruvāca |
namostvanaṃtāya viśuddhacetase svarūparūpāya sahasrabāhave |
sahasraraśmiprabhavāya vedhase viśāladehāya viśuddhakarmaṇe || 95 ||
[Analyze grammar]

samastaviśvārtiharāya śaṃbhave samastasūryānalatigmatejase |
namostu vidyāvitatāya cakriṇe samastadhīsthānakṛte sadā namaḥ || 96 ||
[Analyze grammar]

anādidevācyuta śekharaprabho bhāvyudbhavadbhūtapate maheśvara |
mahatpate sarvapate jagatpate bhuvaspate bhuvanapate sadā namaḥ || 97 ||
[Analyze grammar]

yajñeśa nārāyaṇa jiṣṇu śaṃkara kṣitīśa viśveśvara viśvalocana |
śaśāṃkasūryācyutavīraviśvapravṛttamūrtemṛtamūrta avyaya || 98 ||
[Analyze grammar]

jvaladdhutāśārci niruddhamaṃḍala pradeśanārāyaṇa viśvatomukha |
samastadevārtiharāmṛtāvyaya prapāhi māṃ śaraṇagataṃ tathā vibho || 99 ||
[Analyze grammar]

vaktrāṇyanekāni vibho tavāhaṃ paśyāmi yajñasya gatiṃ purāṇam |
brahmāṇamīśaṃ jagatāṃ prasūtiṃ namostu tubhyaṃ prapitāmahāya || 100 ||
[Analyze grammar]

saṃsāracakrakramaṇairanekaiḥ kvacidbhavāndevavarādhidevaḥ |
tatsarvavijñānaviśuddhasatvairupāsyase kiṃ praṇamāmyahaṃ tvām || 101 ||
[Analyze grammar]

evaṃ bhavaṃtaṃ prakṛteḥ purastādyo vettyasau sarvavidāṃ variṣṭhaḥ |
guṇānviteṣu prasabhaṃ vivedyo viśālamūrtistviha sūkṣmarūpaḥ || 102 ||
[Analyze grammar]

vākpāṇipādairvigatendriyopi kathaṃ bhavānvai sugatissukarmā |
saṃsārabaṃdhe nihiteṃdriyopi punaḥ kathaṃ devavarosi vedyaḥ || 103 ||
[Analyze grammar]

mūrttādamūrttaṃ na tu labhyate paraṃ paraṃ vapurdevaviśuddhabhāvaiḥ |
saṃsāravicchittikarairyajadbhiratovasīyeta caturmukha tvam || 104 ||
[Analyze grammar]

paraṃ na jānaṃti yato vapuste devādayopyadbhutarūpadhārin |
vibhovatāregrataraṃ purāṇamārādhayedyatkamalāsanastham || 105 ||
[Analyze grammar]

na te tattvaṃ viśvasṛjopi yonimekāṃtato vetti viśuddhabhāvaḥ |
paraṃ tvahaṃ vedmi kathaṃ purāṇaṃ bhavaṃtamādyaṃ tapasā viśuddham || 106 ||
[Analyze grammar]

padmāsano vai janakaḥ prasiddha evaṃ prasiddhirhyasakṛtpurāṇāt |
saṃciṃtya te nātha vibhuṃ bhavaṃtaṃ jānāti naivaṃ tapasāvihīnaḥ || 107 ||
[Analyze grammar]

asmādṛśaiśca pravarairvibodhyaṃ tvāṃ devamūrkhāḥ svamatiṃ vibhajya |
praboddhumicchanti na teṣu buddhirudārakīrtiṣvapi vedahīnāḥ || 108 ||
[Analyze grammar]

janmāṃtarairveda vivekabuddhibhirbhavedyathā vā yadi vā prakāśaḥ |
tallābhalubdhasya na mānuṣatvaṃ na devagaṃdharvapatiḥ śivaḥ syāt || 109 ||
[Analyze grammar]

na viṣṇurūpo bhagavānsusūkṣmaḥ sthūlosi devaḥ kṛtakṛtyatāyāḥ |
sthūlopi sūkṣmaḥ sulabhosi deva tvadbāhyakṛtyā narakepataṃti || 110 ||
[Analyze grammar]

vimucyate vā bhavati sthitesmindasrenduvahnyarkamarunmahībhiḥ |
tatvaiḥ svarūpaiḥ samarūpadhāribhirātmasvarūpe vitata svabhāvaḥ || 111 ||
[Analyze grammar]

iti stutiṃ me bhagavanhyanaṃta juṣasva bhaktasya viśeṣataśca |
samādhiyuktasya viśuddhacetasastvadbhāvabhāvaikamanonugasya || 112 ||
[Analyze grammar]

sadā hṛdistho bhagavannamaste namāmi nityaṃ bhagavanpurāṇa |
iti prakāśaṃ tava me tadīśastavaṃ mayā sarvagatiprabuddha || 113 ||
[Analyze grammar]

saṃsāracakre bhramaṇādiyuktā bhītiṃ punarnaḥ pratipālayasva || 114 ||
[Analyze grammar]

brahmovāca |
sarvajñastvaṃ na saṃdeho prajñārāśiśca keśava |
devānāṃ prathamaḥ pūjyaḥ sarvadā tvaṃ bhaviṣyasi || 115 ||
[Analyze grammar]

nārāyaṇādanaṃtaraṃ rudro bhaktyā viriṃcanam |
tuṣṭāva praṇato bhūtvā brahmāṇaṃ kamalodbhavam || 116 ||
[Analyze grammar]

namaḥ kamalapatrākṣa namaste padmajanmane |
namaḥ surāsuraguro kāriṇe paramātmane || 117 ||
[Analyze grammar]

namaste sarvadeveśa namo vai mohanāśana |
viṣṇornābhisthitavate kamalāsana janmane || 118 ||
[Analyze grammar]

namo vidrumaraktāṃga pāṇipallavaśobhine |
śaraṇaṃ tvāṃ prapannosmi trāhi māṃ bhavasaṃsṛteḥ || 119 ||
[Analyze grammar]

pūrvaṃ nīlāṃbudākāraṃ kuḍmalaṃ te pitāmaha |
dṛṣṭvā raktamukhaṃ bhūyaḥ patrakesarasaṃyutam || 120 ||
[Analyze grammar]

padmaṃ cānekapatrāntamasaṃkhyātaṃ niraṃjanam |
tatra sthitena tvayaiṣā sṛṣṭiścaiva pravartitā || 121 ||
[Analyze grammar]

tvāṃ muktvā nānyatastrāṇaṃ jagadvaṃdya namostu te |
sāvitrīśāpadagdhohaṃ liṃgaṃ me patitaṃ kṣitau || 122 ||
[Analyze grammar]

idānīṃ kuru me śāṃtiṃ trāhi māṃ saha bhāryayā |
brahmā vai pātu me pādau jaṃghe vai kamalāsanaḥ || 123 ||
[Analyze grammar]

viriṃco me kaṭiṃ pātu sṛṣṭikṛdguhyameva ca |
nābhiṃ padmanibhaḥ pātu jaṭharaṃ caturānanaḥ || 124 ||
[Analyze grammar]

urastu viśvasṛkpātu hṛdayaṃ pātu padmajaḥ |
sāvitrīpatirme kaṃṭhaṃ hṛṣīkeśo mukhaṃ mama || 125 ||
[Analyze grammar]

padmavarṇaśca nayane paramātmā śiro mama |
evaṃ nyasya gurornāma śaṃkaro nāmaśaṃkaraḥ || 126 ||
[Analyze grammar]

namaste bhagavanbrahmannityuktvā virarāma ha |
tatastuṣṭo haraṃ brahmā vākyametaduvāca ha || 127 ||
[Analyze grammar]

kaṃ te kāmaṃ karomyadya pṛccha māṃ yadyadicchasi |
rudra uvāca |
yadi prasanno me nātha varado yadi vā mama || 128 ||
[Analyze grammar]

tadekaṃ me vada vibho yasminsthāne bhavānsthitaḥ |
keṣukeṣu ca sthāneṣu tvāṃ paśyaṃti sadā dvijāḥ || 129 ||
[Analyze grammar]

nāmnā ca kena te sthānaṃ śobhate dharaṇītale |
tanme vadasva sarveśa tava bhaktiratasya ca || 130 ||
[Analyze grammar]

brahmovāca |
puṣkarehaṃ suraśreṣṭho gayāyāṃ ca caturmukhaḥ |
kānyakubje devagarbho bhṛgukakṣe pitāmahaḥ || 131 ||
[Analyze grammar]

kāveryyāṃ sṛṣṭikartā ca naṃdipuryyāṃ bṛhaspatiḥ |
prabhāse padmajanmā ca vānaryāṃ ca surapriyaḥ || 132 ||
[Analyze grammar]

dvāravatyāṃ tu ṛgvedī vaidiśe bhuvanādhipaḥ |
pauṃḍrake puṃḍarīkākṣaḥ piṃgākṣo hastināpure || 133 ||
[Analyze grammar]

jayaṃtyāṃ vijayaścāsmi jayaṃtaḥ puṣkarāvate |
ugreṣu padmahastohaṃ tamonadyāṃ tamonudaḥ || 134 ||
[Analyze grammar]

ahicchanne jayā naṃdī kāṃcīpuryāṃ janapriyaḥ |
brahmāhaṃ pāṭalīputre ṛṣikuṃḍe munistathā || 135 ||
[Analyze grammar]

mahitāre mukuṃdaśca śrīkaṃṭhaḥ śrīnivāsite |
kāmarūpe śubhākāro vārāṇasyāṃ śivapriyaḥ || 136 ||
[Analyze grammar]

mallikākṣe tathā viṣṇurmaheṃdre bhārgavastathā |
gonarde sthavirākāra ujjayinyāṃ pitāmahaḥ || 137 ||
[Analyze grammar]

kauśāṃbyāṃ tu mahābodhirayodhyāyāṃ ca rāghavaḥ |
muṃnīṃdraścitrakūṭe tu vārāho viṃdhyaparvate || 138 ||
[Analyze grammar]

gaṃgādvāre parameṣṭhī himavatyapi śaṃkaraḥ |
devikāyāṃ srucāhastaḥ sruvahastaścaturvaṭe || 139 ||
[Analyze grammar]

vṛṃdāvane padmapāṇiḥ kuśahastaśca naimiṣe |
goplakṣe caiva gopīndraḥ sacaṃdro yamunātaṭe || 140 ||
[Analyze grammar]

bhāgīrathyāṃ padmatanurjalānaṃdo jalaṃdhare |
kauṃkaṇe caiva madrākṣaḥ kāṃpilye kanakapriyaḥ || 141 ||
[Analyze grammar]

veṃkaṭe cānnadātā ca śaṃbhuścaiva kratusthale |
laṃkāyāṃ ca pulastyohaṃ kāśmīre haṃsavāhanaḥ || 142 ||
[Analyze grammar]

vasiṣṭhaścārbude caiva nāradaścotpalāvate |
melake śrutidātāhaṃ prapāte yādasāṃpatiḥ || 143 ||
[Analyze grammar]

sāmavedastathā yajñe madhure madhurapriyaḥ |
aṃkoṭe yajñabhoktā ca brahmavāde surapriyaḥ || 144 ||
[Analyze grammar]

nārāyaṇaśca gomaṃte māyāpuryāṃ dvijapriyaḥ |
ṛṣivede durādharṣo devāyāṃ suramardanaḥ || 145 ||
[Analyze grammar]

vijayāyāṃ mahārūpaḥ svarūpo rāṣṭravarddhane |
pṛthūdarastu mālavyāṃ śākaṃbharyāṃ rasapriyaḥ || 146 ||
[Analyze grammar]

piṃḍārake tu gopālaḥ śaṃkhoddhāreṃgavarddhanaḥ |
kādaṃbake prajādhyakṣo devādhyakṣaḥ samasthale || 147 ||
[Analyze grammar]

gaṃgādharo bhadrapīṭhe jalaśāpyahamarbude |
tryaṃbake tripurādhīśaḥ śrīparvate trilocanaḥ || 148 ||
[Analyze grammar]

mahādevaḥ padmapure kāpāle vaidhasastathā |
śṛṃgiberapure śaurirnaimiṣe cakrapāṇikaḥ || 149 ||
[Analyze grammar]

daṃḍapuryāṃ virūpākṣo gautamo dhūtapāpake |
haṃsanātho mālyavati dvijeṃdro valike tathā || 150 ||
[Analyze grammar]

iṃdrapuryāṃ devanātho dyūtapāyāṃ puraṃdaraḥ |
haṃsavāhastu laṃbāyāṃ caṃḍāyāṃ garuḍapriyaḥ || 151 ||
[Analyze grammar]

mahodaye mahāyajñaḥ suyajño yajñaketane |
siddhismare padmavarṇaḥ vibhāyāṃ padmabodhanaḥ || 152 ||
[Analyze grammar]

devadāruvane liṃgaṃ mahāpattau vināyakaḥ |
tryaṃbako mātṛkāsthāne alakāyāṃ kulādhipaḥ || 153 ||
[Analyze grammar]

trikūṭe caiva gonardaḥ pātāle vāsukistathā |
padmādhyakṣaśca kedāre kūṣmāṃḍe suratapriyaḥ || 154 ||
[Analyze grammar]

kuṃḍavāpyāṃ śubhāṃgastu sāraṇyāṃ takṣakastathā |
akṣoṭe pāpahā caiva aṃbikāyāṃ sudarśanaḥ || 155 ||
[Analyze grammar]

varadāyāṃ mahāvīraḥ kāṃtāre durganāśanaḥ |
anaṃtaścaiva parṇāṭe prakāśāyāṃ divākaraḥ || 156 ||
[Analyze grammar]

virājāyāṃ padmanābhaḥ svarudraśca vṛkasthale |
mārkaṃḍo vaṭake caiva vāhinyāṃ mṛgaketanaḥ || 157 ||
[Analyze grammar]

padmāvatyāṃ padmagṛho gagane padmaketanaḥ |
aṣṭottaraṃ sthānaśataṃ mayā te parikīrtitam || 158 ||
[Analyze grammar]

yatra vai mama sāṃnidhyaṃ trisaṃdhyaṃ tripurāṃtaka |
eteṣāmapi yastvekaṃ paśyate bhaktimānnaraḥ || 159 ||
[Analyze grammar]

sthānaṃ suvirajaṃ labdhvā modate śāśvatīḥ samāḥ |
mānasaṃ vācikaṃ caiva kāyikaṃ yacca duṣkṛtam || 160 ||
[Analyze grammar]

tatsarvaṃ nāśamāyāti nātra kāryā vicāraṇā |
yastvetāni ca sarvāṇi gatvā māṃ paśyate naraḥ || 161 ||
[Analyze grammar]

bhavate mokṣabhāgī ca yatrāhaṃ tatra vai sthitaḥ |
puṣpopahārairdhūpaiśca brāhmaṇānāṃ ca tarpaṇaiḥ || 162 ||
[Analyze grammar]

dhyānena ca sthireṇāśu prāpyate parameśvaraḥ |
tasya puṇyaphalaṃ cāgryamaṃte mokṣaphalaṃ tathā || 163 ||
[Analyze grammar]

sa brahmalokamāsādya tatkālaṃ tatra tiṣṭhati |
punaḥ sṛṣṭau bhaveddevo vairājānāṃ mahātapāḥ || 164 ||
[Analyze grammar]

brahmahatyādi pāpāni ihaloke kṛtānyapi |
akāmataḥ kāmato vā tāni naśyaṃti tatkṣaṇāt || 165 ||
[Analyze grammar]

ihaloke daridro yo bhraṣṭarājyothavā punaḥ |
sthāneṣveteṣu vai gatvā māṃ paśyati samādhinā || 166 ||
[Analyze grammar]

kṛtvā pūjopahāraṃ ca snānaṃ ca pitṛtarpaṇam |
kṛtvā piṃḍapradānaṃ ca socirādduḥkhavarjitaḥ || 167 ||
[Analyze grammar]

ekacchatro bhavedrājā satyametanna saṃśayaḥ |
iha rājyāni saubhāgyaṃ dhanaṃ dhānyaṃ varastriyaḥ || 168 ||
[Analyze grammar]

bhavaṃti vividhāstasya yairyātrā puṣkare kṛtā |
idaṃ yātrāvidhānaṃ yaḥ kurute kārayeta vā || 169 ||
[Analyze grammar]

śṛṇoti vā sa pāpaistu sarvaireva pramucyate |
agamyāgamanaṃ yena kṛtaṃ jānāti mānavaḥ || 170 ||
[Analyze grammar]

brahmakriyāyā lopena bahuvarṣakṛtena ca |
yātrāṃ cemāṃ sakṛtkṛtvā vedasaṃskāramāpnuyāt || 171 ||
[Analyze grammar]

kimatra bahunoktena idamastīha śaṃkara |
aprāpyaṃ prāpyate tena pāpaṃ cāpi vinaśyati || 172 ||
[Analyze grammar]

sarvayajñaphalaistulyaṃ sarvatīrthaphalapradam |
sarveṣāṃ caiva vedānāṃ samāptistena vai kṛtā || 173 ||
[Analyze grammar]

yaiḥ kṛtvā puṣkare saṃdhyāṃ sāvitrī samupāsitā |
svapatnīhastadattena pauṣkareṇa jalena tu || 174 ||
[Analyze grammar]

bhṛṃgāreṇa vareṇaiva mṛṇmayenāpi śaṃkara |
ānīya tajjalaṃ puṇyaṃ saṃdhyopāstirdinakṣaye || 175 ||
[Analyze grammar]

samādhinā samādheyā saprāṇāyāmapūrvikā |
tasyāṃ kṛtāyāṃ yatpuṇyaṃ tacchṛṇuṣva harādya me || 176 ||
[Analyze grammar]

tena dvādaśavarṣāṇi bhavetsaṃdhyā suvaṃditā |
aśvamedhaphalaṃ snāne dāne daśaguṇaṃ tathā || 177 ||
[Analyze grammar]

upavāsepyanaṃtaṃ ca svayaṃ proktaṃ mayānagha |
sāvitryāḥ purato yastu daṃpatyorbhojanaṃ dadet || 178 ||
[Analyze grammar]

tenāhaṃ bhojitastatra bhavāmīha na saṃśayaḥ |
dvitīyaṃ bhojayedyastu bhojitastena keśavaḥ || 179 ||
[Analyze grammar]

lakṣmīsahāyo varado varāṃstasya prayacchati |
umāsahāyastārtīye bhojitosi na saṃśayaḥ || 180 ||
[Analyze grammar]

athavā yā kumārīṇāṃ bhaktyā dadyācca bhojanam |
tasyāḥ kule bhavedvaṃdhyā na kadācicca durbhagā || 181 ||
[Analyze grammar]

na kanyā jananī kvāpi na bharturyā na vallabhā |
tasmātsarvaprayatnena sāvitryagre tu bhojanam || 182 ||
[Analyze grammar]

pāratramaihikaṃ vāpi kāmayadbhirnaraiḥ sadā |
dātavyaṃ sarvadā bhīṣma kaṭutailavivarjitam || 183 ||
[Analyze grammar]

na cāmlaṃ na ca vai kṣāraṃ strīṇāṃ bhojyaṃ kadācana |
bhakṣyaṃ paṃcaprakāraṃ ca rasaiḥ sarvaissusaṃskṛtam || 184 ||
[Analyze grammar]

ghṛtapūryaḥ supakvāśca bahukṣīrasamanvitāḥ |
śikhariṇī tathā peyā dadhikṣīrasamanvitā || 185 ||
[Analyze grammar]

āhlādakāriṇī puṃsāṃ strīṇāṃ cātīva vallabhā |
dhanadhānyāṃ janopetaṃ nārīṇāṃ ca śatākulam || 186 ||
[Analyze grammar]

pūpakaṃ śaṣkulaṃ tasyāṃ jāyate nātra saṃśayaḥ |
na jvaro na ca saṃtāpo na duḥkhaṃ na viyogitā || 187 ||
[Analyze grammar]

asau tārayate svānāṃ kulānāmekaviṃśatiṃ |
baṃdhubhiśca sutaiścaiva dāsīdāsairanaṃtakaiḥ || 188 ||
[Analyze grammar]

pūritaṃ ca kulaṃ tasyāḥ pūrikāṃ yā pradāsyati |
edhate ca ciraṃ kālaṃ putrapautrasamanvitam || 189 ||
[Analyze grammar]

kulaṃ ca sakalaṃ tasya śaṣkulaṃ yaḥ prayacchati |
putriṇyo vai duhitaro baṃdhubhiḥ sahitaṃ kulam || 190 ||
[Analyze grammar]

śikhariṇīpradātrīṇāṃ yuvatīnāṃ na saṃśayaḥ |
modate tu kulaṃ tasyāḥ sarvasiddhiprapūritam || 191 ||
[Analyze grammar]

modakānāṃ pradānena evamāha prajāpatiḥ |
etadeva tu gaurīṇāṃ bhojanaṃ hara śasyate || 192 ||
[Analyze grammar]

subhagā putriṇī sādhvī dhanaṛddhisamanvitā |
sahasrabhojinī śaṃbho janmajanma bhaviṣyati || 193 ||
[Analyze grammar]

pūpāni caiva puṇyāni kṛtāni madhurāṇi ca |
drākṣārasapradhānaṃ ca guḍakhaṃḍasamanvitam || 194 ||
[Analyze grammar]

śāradena tu dhānyena kṛtvā khaṃḍaṃ vimiśritat |
strīṇāṃ caiva tu peyāni bhakṣyāṇi ca dvijanmanām || 195 ||
[Analyze grammar]

iha cāvikavāsāṃsi varṣāyogyāni sarvaśaḥ |
yāniyāni ca peyāni tāni yogyāni dāpayet || 196 ||
[Analyze grammar]

pratipūjya vidhānena vasudānaiḥ sakaṃcukaiḥ |
kuṃkumenānuliptāṃgyaḥ sragdāmabhiralaṃkṛtāḥ || 197 ||
[Analyze grammar]

datvā tūpānahāvaṅghryornārikelaṃ kare tathā |
akṣṇoścaivāṃjanaṃ datvā siṃdūraṃ caiva mastake || 198 ||
[Analyze grammar]

guḍaṃ phalāni hṛdyāni vāṃchitāni mṛdūni ca |
haste datvā sapātrāṇi praṇipatya visarjayet || 199 ||
[Analyze grammar]

svayaṃ bhuṃjīta vai paścātsabaṃdhurbālakaiḥ saha |
athavā naiva saṃpattistīrthe dānaṃ ca bhājanam || 200 ||
[Analyze grammar]

gṛhe gataḥ pradāsyāmi hṛṣṭo deva prasīda me |
evameva pitṝṇāṃ ca āgatya svīya maṃdire || 201 ||
[Analyze grammar]

piṃḍapradānapūrvaṃ tu śrāddhaṃ kuryādvidhānataḥ |
pitarastasya vai tṛptā bhavaṃti brahmaṇo dinam || 202 ||
[Analyze grammar]

tīrthādaṣṭaguṇaṃ puṇyaṃ svagṛhe dadatāṃ śiva |
na ca paśyaṃti vai nīcāḥ śrāddhaṃ dvijātibhiḥ kṛtaṃ || 203 ||
[Analyze grammar]

ekāṃte tu gṛhe gupte pitṝṇāṃ śrāddhamiṣyate |
nīcadṛṣṭyā hataṃ tacca pitṝnnaivopatiṣṭhati || 204 ||
[Analyze grammar]

tasmātsarvaprayatnena śrāddhaṃ guptaṃ ca kārayet |
pitṝṇāṃ tṛptidaṃ proktaṃ svayameva svayaṃbhuvā || 205 ||
[Analyze grammar]

gaurībhaktyādhikā yā tu śastā jñātakriyā tu sā |
rājasī manasā jñātā janānāṃ kīrtidāyinī || 206 ||
[Analyze grammar]

guptaṃ dānaṃ sadā deyamātmano hitamicchatā |
pakvānnaṃ dṛśyatāmeti dīyamānaṃ janairbhuvi || 207 ||
[Analyze grammar]

dṛśyamānaṃ tu tattuṣṭyai dṛśyate neha karhicit |
ekasminbhojite vipre koṭirbhavati bhojitā || 208 ||
[Analyze grammar]

bhavane nātra saṃdehaḥ satyaṃ paurāṇikaṃ vacaḥ |
tīrthe tu brāhmaṇaṃ naiva parīkṣeta kathaṃcana || 209 ||
[Analyze grammar]

annārthinamanuprāptaṃ bhojyaṃ taṃ manurabravīt |
saktubhiḥ piṃḍadānaṃ ca saṃyāvaiḥ pāyasena vā || 210 ||
[Analyze grammar]

karttavyamṛṣibhirdṛṣṭaṃ piṇyākenaiṃgudena vā |
tilapiṇyākakairdeyaṃ bhaktimadbhirnaraiḥ sadā || 211 ||
[Analyze grammar]

śrāddhaṃ tatra tu kartavyamarghyāvāhanavarjitam |
svadhāṃ tu gṛdhrāḥ kākā vā naiva dṛṣṭyā haranti te || 212 ||
[Analyze grammar]

śrāddhaṃ tattairthikaṃ proktaṃ pitṝṇāṃ tṛptidaṃ param |
kartavyaṃ tatprayatnena bhaktirevātra kāraṇam || 213 ||
[Analyze grammar]

bhaktyā tuṣyanti pitarastuṣṭāḥ kāmāndiśanti te |
putraṃ pautraṃ dhanaṃ dhānyaṃ kāmānyānmanasecchati || 214 ||
[Analyze grammar]

bhaktyā cārādhito dadyānnṛṇāṃ prītaḥ pitāmahaḥ |
akālepyatha kāle vā tīrthe śrāddhaṃ sadā naraiḥ || 215 ||
[Analyze grammar]

prāptaireva sadā snānaṃ kartavyaṃ pitṛtarpaṇam |
piṃḍadānaṃ ca kartavyaṃ pitṝṇāṃ cātivallabham || 216 ||
[Analyze grammar]

pitaro hi nirīkṣante gotrajaṃ samupāgatam |
āśayā parayā yuktāḥ kāṃkṣaṃtassalilaṃ ca te || 217 ||
[Analyze grammar]

vilambo naiva kartavyo naiva vighnaṃ samācaret |
acchinnā santatisteṣāṃ sadā kālaṃ bhaviṣyati || 218 ||
[Analyze grammar]

pitaraḥ putradātāraṃ vṛddhiśrāddhābhikāṃkṣiṇaḥ |
tena te santaticchedaṃ na kurvanti hi karhicit || 219 ||
[Analyze grammar]

ataḥ śrāddhaṃ purā proktaṃ svayameva svayaṃbhuvā |
guṇottaraṃtuyatkāryaṃdvijaiḥpitṛparāyaṇaiḥ || 220 ||
[Analyze grammar]

tīrthe kṣetre gṛhe vāpi saṃkrāṃtau grahaṇepi vā |
viṣuve ayane cāpi janmarkṣe ca prapīḍite || 221 ||
[Analyze grammar]

etānvai śrāddhakālāṃstu purā svāyaṃbhuvobravīt |
kṛte śrāddhe na vai puṃsāṃ pīḍā bhavati dehajā || 222 ||
[Analyze grammar]

tadā putrakṛtaṃ vāpi sarvaṃ tyajati duṣkṛtam |
yathā na bhavitā pīḍā grahacoranṛpādikāt || 223 ||
[Analyze grammar]

duṣkṛtaṃ naśyate sarvaṃ paratra ca gatiṃ śubhām |
labhate nātra sandehaḥ prajāpativaco yathā || 224 ||
[Analyze grammar]

kṛte yuge puṣkarāṇi tretāyāṃ naimiṣaṃ smṛtam |
dvāpare ca kurukṣetraṃ kalau gaṃgāṃ samāśrayet || 225 ||
[Analyze grammar]

duṣkaraḥ puṣkare vāso duṣkaraṃ puṣkare tapaḥ |
yadanyatra kṛtaṃ pāpaṃ tīrthe tadyāti lāghavam || 226 ||
[Analyze grammar]

na tīrthakṛtamanyatra kvacitpāpaṃ vyapohati |
sāyaṃprātaḥ smaredyastu puṣkarāṇi kṛtāñjali || 227 ||
[Analyze grammar]

upaspṛṣṭaṃ bhavettena sarvatīrtheṣu bhārata |
sāyaṃprātarupaspṛśya puṣkare niyatendriyaḥ || 228 ||
[Analyze grammar]

kratūnsarvānavāpnoti brahmalokaṃ ca gacchati |
dvādaśābdaṃ dvādaśāhaṃ māsaṃ māsārdhameva ca || 229 ||
[Analyze grammar]

yo vasetpuṣkare nityaṃ sa gacchetparamāṃgatim |
sarveṣāmevalokānāṃbrahmalokoparisthitaḥ || 230 ||
[Analyze grammar]

yaicchetpuṣkaraṃgantuṃsonusevetapuṣkaram |
yathā lomavilomābhyāṃ tathā vyastasamastayoḥ || 231 ||
[Analyze grammar]

snātastu puṣkare samyakkoṭyāśca phalamuśnute |
vidhivatkriyamāṇeṣu sarvatīrtheṣu yatphalam || 232 ||
[Analyze grammar]

puṣkarālokanādeva naraḥ prāpnoti tatphalam |
daśakoṭisahasrāṇi tīrthānāṃ vai mahītale || 233 ||
[Analyze grammar]

sānnidhyaṃ puṣkare teṣāṃ trisaṃdhyaṃ kurunandana |
yāvattiṣṭhaṃti girayo yāvattiṣṭhantisāgarāḥ || 234 ||
[Analyze grammar]

tāvatpuṣkara mṛtyūnāṃ brahmaloko na saṃśayaḥ |
janmāntarasahasraiśca ājanmamaraṇāṃntikam || 235 ||
[Analyze grammar]

nirdahedduṣkṛtaṃ sarvaṃ sakṛtsnātvā tu puṣkare |
puṣkaraṃ duṣkaraṃ kṣetraṃ sarvapāpapraṇāśanam || 236 ||
[Analyze grammar]

idānīṃ śṛṇu me rājanpañcapātakanāśanam |
yajanaṃ devadevasya brahmaputra vasupradam || 237 ||
[Analyze grammar]

iha janmani dāridrya vyādhikuṣṭhādipīḍitaḥ |
alakṣmīvānaputrastu yo bhavetpuruṣo bhuvi || 238 ||
[Analyze grammar]

tasya sadyo bhavellakṣmīrāyuḥ pūrṇaṃ sutāssukham |
kṛtvā tu maṇḍalagataṃ lokapālasamanvitam || 239 ||
[Analyze grammar]

brahmāṇaṃ tu paraṃ devaṃ yaḥ paśyati vidhānataḥ |
pūjitaṃ navanābhena mantramūrtimayo nijam || 240 ||
[Analyze grammar]

kārtike māsi śuklāyāṃ paurṇamāsyāṃ viśeṣataḥ |
sarvāsu vā yajedevaṃ pūrṇimāsu vidhānataḥ || 241 ||
[Analyze grammar]

saṃkrāntau ca mahābāho candrasūryagrahepi vā |
yaḥ paśyati vibhuṃ devaṃ pūjitaṃ guruṇā nṛpa || 242 ||
[Analyze grammar]

tasya sadyo bhavettuṣṭiḥ pāpadhvaṃsaśca jāyate |
sa mānyo devatānāṃ ca bhavatīha narādhipa || 243 ||
[Analyze grammar]

brāhmaṇakṣatriyaviśāṃ bhaktānāṃ tu parīkṣaṇam |
saṃvatsaraṃ guruḥ kuryājjātiśaucakriyādibhiḥ || 244 ||
[Analyze grammar]

upapannamiti jñātvā hṛdaye nāvadhārayet |
tepi bhaktiyutā dhyātvā tvācāryaṃ parameśvaram || 245 ||
[Analyze grammar]

saṃvatsaraṃ gurau bhaktiṃ kuryurviṣṇau yathā tathā |
prasādayeyuśca tataḥ pūrṇe saṃvatsare gurum || 246 ||
[Analyze grammar]

bhagavaṃstvatprasādena saṃsārārṇavatāraṇam |
parabrahmopāsanena viriṃcyārādhanena ca || 247 ||
[Analyze grammar]

sahasraśīrṣajapyena maṇḍalabrāhmaṇena ca |
dhyānena syāttathāsmākamupadeśaḥ pradīyatām || 248 ||
[Analyze grammar]

icchāmo vaidikīṃ lakṣmīṃ viśeṣeṇa prasīdatām |
abhyarthito gurustvevaṃ medhāvī taistadā tataḥ || 249 ||
[Analyze grammar]

yathāvidhi samabhyarcedbrahmāṇaṃ viṣṇumagrataḥ |
te baddhanetrāḥ svāpyāstu kārtikasya caturdaśīm || 250 ||
[Analyze grammar]

brāhme muhūrte cottthāya baddhapadmāsanāstu te |
dhyātvā guruṃ sahasrāre śvetavastropavītakam || 251 ||
[Analyze grammar]

śvetamālyāṃbaradharaṃ śvetagaṃdhānulepanam |
nirgamya ca bahirnadyāṃ kuryurnityamatandritāḥ || 252 ||
[Analyze grammar]

kṣīravṛkṣotthamācāryo dāpayeddantadhāvanam |
te ca taṃ bhakṣayeyurhi nadīṃ gatvā samudragām || 253 ||
[Analyze grammar]

itaradvā taṭākaṃ vā gṛhe vāpi vidhānataḥ |
tadbhakṣayeyurmaṃtreṇa maṃtritaṃ parameṣṭhinaḥ || 254 ||
[Analyze grammar]

āpohiṣṭheti maṃtreṇa saptakṛtvobhimaṃtritaṃ |
devasya tveti vai japtvā yuṃjāneti kare nyaset || 255 ||
[Analyze grammar]

irāvatyeti prakṣālya brahmodaneti vai mukhe |
bhakṣayitvā kṣipeddūraṃ patitaṃ ca nirīkṣayet || 256 ||
[Analyze grammar]

sammukhaṃ prāṅmukhaṃ vāpi vidiśaṃ cāpi vā gatam |
saṃmukhe devatālabdhirmaṃtrasiddhiśca jāyate || 257 ||
[Analyze grammar]

parāṅmukhe daṃtakāṣṭhe sarve devāḥ parāṅmukhāḥ |
uttareṇa gate tasminsiddhirbhavati vā na vā || 258 ||
[Analyze grammar]

dakṣiṇena bhavenmṛtyurgurostasya na saṃśayaḥ |
prekṣyāśubhaṃ svapedbhūmau devadevasya sannidhau || 259 ||
[Analyze grammar]

svapnāndṛṣṭvā guroragre śrāvayeyurvicakṣaṇāḥ |
tataḥ śubhāśubhaṃ tatra lakṣayetparamo guruḥ || 260 ||
[Analyze grammar]

paurṇamāsyāmatha snātvā tato devālayaṃ vrajet |
guruśca maṃḍalaṃ bhūmau kalpitāyāṃ tu vartayet || 261 ||
[Analyze grammar]

lakṣaṇairvividhairbhūmiṃ lakṣayitvā vidhānataḥ |
ṣoḍaśāraṃ likhetpadmaṃ navadhāramathāpi vā || 262 ||
[Analyze grammar]

aṣṭapatramatho vāpi likhittvā darśayedbudhaḥ |
netrabaṃdhaṃ tu kurvīta sitavastreṇa yatnataḥ || 263 ||
[Analyze grammar]

varṇānukramataḥ śiṣyānpuṣpahastānpraveśayet |
navanābhaṃ yadā kuryānmaṃḍalaṃ varṇakairbudhaḥ || 264 ||
[Analyze grammar]

iṃdrāṇīpūrvakaṃ devamiṃdramaiṃdryāṃ tu pūjayet |
lokapālaiḥ samaṃ tadvadagniṃ saṃpūjayennṛpa || 265 ||
[Analyze grammar]

diśi vahneryamaṃ yāmyāṃ naiṛtyāṃ caiva nirṛtim |
varuṇaṃ vāruṇāśāyāṃ vāyuṃ vāyavyagocare || 266 ||
[Analyze grammar]

dhanadaṃ cottare nyasya rudramīśānagocare |
kamaṃḍaluṃ pūrvato hi srucaṃ vai dakṣiṇe tathā || 267 ||
[Analyze grammar]

haṃsaṃ vai paścimāyāṃ tu uttarāyāṃ sruvaṃ tathā |
āgneyyāṃ ca brasīṃ dadyānnairṛtyāṃ pāduke tathā || 268 ||
[Analyze grammar]

vāyavyāṃ yogapaṭṭaṃ ca aiśānyāṃ ca galaṃtikām |
viṣṇustu pūrvataḥ pūjyo dakṣiṇe cāpi śaṃkaraḥ || 269 ||
[Analyze grammar]

paścime tu ravirdeva ṛṣayaścottare tathā |
madhye svayaṃ padmajanmā sāvitrī dakṣiṇe tathā || 270 ||
[Analyze grammar]

uttare caiva gāyatrī devī padmadalekṣaṇā |
ṛgvedaṃ pūrvato nyasya yajurvedaṃ ca dakṣiṇe || 271 ||
[Analyze grammar]

paścime sāmavedaṃ ca atharvaṃ cottare tathā |
itihāsapurāṇānicchaṃdojyautiṣamevaca || 272 ||
[Analyze grammar]

dharmaśāstrāṇi cānyāni iṃdrādi dikṣu vinyaset |
pūrvapatre balaṃ pūjya pradyumnaṃ dakṣiṇe dale || 273 ||
[Analyze grammar]

paścime cāniruddhaṃ ca vāsudevamathottare |
pūrvato vāmadevaṃ ca sadyojātaṃ tu dakṣiṇe || 274 ||
[Analyze grammar]

īśānaṃ paścime sthāpya tatpuruṣaṃ cottare tathā |
aghorassarvataḥ pūjya eṣā pūjā tu maṃḍale || 275 ||
[Analyze grammar]

pūrvato bhāskaraṃ pūjya dakṣiṇena divākaraṃ |
prabhākaraṃ paścime tu graharājamathottare || 276 ||
[Analyze grammar]

evaṃ pūjya vidhānena brahmāṇaṃ parameśvaram |
diṅmaṃḍale tu vinyasya aṣṭau kuṃbhānvidhānataḥ || 277 ||
[Analyze grammar]

brāhmaṃ tu kalaśaṃ madhye navamaṃ tatra kalpayet |
snāpayenmuktikāmaṃ tu brahmaṇo vai ghaṭena tu || 278 ||
[Analyze grammar]

śrīkāmaṃ vaiṣṇaveneha kalaśena tu pārthiva |
rājyārthinaṃ snāpayecca aiṃdreṇa kalaśena tu || 279 ||
[Analyze grammar]

dravyapratāpakāmaṃ tu āgneya ghaṭavāriṇā |
mṛtyuṃjayavidhānāya yāmyena snāpayennaram || 280 ||
[Analyze grammar]

duṣṭapradhvaṃsanāyālaṃ nairṛtena vidhīyate |
snāpayedvāruṇenāśu pāpanāśāya mānavaṃ || 281 ||
[Analyze grammar]

śarīrārogyakāmaṃ tu vāyavyenābhiṣecayet |
dravyasaṃpattikāmasya kaubereṇa vidhīyate || 282 ||
[Analyze grammar]

raudreṇa jñānakāmasya lokapālaghaṭāstvime |
ekaikena naraḥ snātvā sarvadoṣavivarjitaḥ || 283 ||
[Analyze grammar]

jāyate brahmasadṛśo rājāsadyo'tha vā naraḥ |
athavā dikṣu sarvāsu yathāsaṃkhyena lokapān || 284 ||
[Analyze grammar]

pūjayettu svanāmnā tu kuṃbhaireva vidhānataḥ |
evaṃ saṃpūjya devāṃstu lokapālānprasannadhīḥ || 285 ||
[Analyze grammar]

paścātparīkṣitānśiṣyānbaddhanetrānpraveśayet |
dagdhvāgneyyā dhāraṇayā vāyunā vidhunettataḥ || 286 ||
[Analyze grammar]

somenāpyāyitānkṛtvā śrāvayetsamayāṃstataḥ |
na niṃdyādbrāhmaṇāndevānviṣṇuṃ brahmāṇameva ca || 287 ||
[Analyze grammar]

iṃdramādityamagniṃ ca lokapālāngrahāṃstathā |
guruṃ ca brāhmaṇaṃ vāpi munīṃdraṃ pūrvadīkṣitam || 288 ||
[Analyze grammar]

evaṃ tu samayānśrāvya paścāddhomaṃ tu kārayet |
ūṃ namo bhagavate brahmaṇe sarvarūpiṇe huṃphaṭsvāhā || 289 ||
[Analyze grammar]

ṣoḍaśākṣaramaṃtreṇa homayejjvalitenale |
garbhādhānādikāḥ sarvā āhutīssaṃpradāpayet || 290 ||
[Analyze grammar]

tisṛbhistu vyāhṛtibhirdevadevasya sannidhau |
homāṃte dīkṣitaḥ paścāddāpayedgurudakṣiṇām || 291 ||
[Analyze grammar]

hastyaśvayānaśakaṭahemadhānyādikaṃ nṛpa |
dāpayedgurave prājño madhyame madhyamaṃ tathā || 292 ||
[Analyze grammar]

dāpayedapare yugmaṃ sahiraṇyaṃ tu tadguroḥ |
evaṃ kṛte tu yatpuṇyaṃ mahatsaṃjāyate tathā || 293 ||
[Analyze grammar]

tanna śakyaṃ nigaditumapi varṣaśatairapi |
dīkṣitotha purā bhūtvā pādmaṃ vai śṛṇuyādyadi || 294 ||
[Analyze grammar]

tena vedāḥ purāṇāni sarvamaṃtrāssasaṃgrahāḥ |
japtāssyuḥ puṣkare tīrthe prayāge siṃdhusāgare || 295 ||
[Analyze grammar]

devahrade kurukṣetre vārāṇasyāṃ viśeṣataḥ |
grahaṇe viṣuve caiva yatphalaṃ japatāṃ bhavet || 296 ||
[Analyze grammar]

phalaṃ śataguṇaṃ tacca puṣkarasthaṃ pitāmaham |
dṛṣṭvā prāpnoti vividhānkāmānkāmayate yadi || 297 ||
[Analyze grammar]

pūjāṃ vaidhānikīṃ kṛtvā dīkṣito yaḥ śṛṇoti ca |
devā api tapaḥ kṛtvā dhyāyaṃti ca vadanti ca || 298 ||
[Analyze grammar]

kadā me bhārate varṣe janma syāditi pārthiva |
dīkṣitāśca bhaviṣyāmaḥ pādmaṃ śroṣyāmahe kadā || 299 ||
[Analyze grammar]

pādmaṃ tu ṣoḍaśātmānaṃ nyasya dehe kadā vayam |
yāsyāmastu paraṃ sthānaṃ yadgatvā na punarbhavet || 300 ||
[Analyze grammar]

evaṃ jalpaṃti vibudhā manasā ciṃtayaṃti ca |
brahmayajñaṃ ca kārtikyāṃ kadā drakṣyāmahe nṛpa || 301 ||
[Analyze grammar]

evaṃ te vidhiruddiṣṭo mayāyaṃ kurusattama |
devagaṃdharvayakṣāṇāṃ sarvadā durlabho hyasau || 302 ||
[Analyze grammar]

evaṃ yo vetti tattvena yaśca paśyati maṃḍalam |
yaścemaṃ śṛṇuyāccaiva sarve muktā iti śrutiḥ || 303 ||
[Analyze grammar]

ataḥ paraṃ pravakṣyāmi rahasyamidamuttamam |
yena lakṣmīrdhṛtistuṣṭiḥ puṣṭiścāpi bhavennṛṇām || 304 ||
[Analyze grammar]

sarve grahāssadā saumyā jāyaṃte yena pārthiva |
ādityavāraṃ hastena pūrvamādāya bhaktitaḥ || 305 ||
[Analyze grammar]

bhaktaikena kṣipettāvadyāvatsapta ca saṃkhyayā |
tatastu saptame pūrṇe kuryādbrāhmaṇabhojanam || 306 ||
[Analyze grammar]

ādityaṃ caiva sauvarṇaṃ kṛtvā yatnena mānavaḥ |
raktavastrayugacchannaṃ chatrikāṃ pāduke tathā || 307 ||
[Analyze grammar]

upānahau ca dātavye sthāpayettāmrabhājane |
ghṛtena snapanaṃ kṛtvā saṃpūrṇāṃga dvijātaye || 308 ||
[Analyze grammar]

dāpayetkṛtyaviduṣe brāhmaṇāya viśeṣataḥ |
evaṃ kṛtau phalaṃ tasya bhavedārogyamuttamam || 309 ||
[Analyze grammar]

dravyasaṃpatsamagrāptiriti paurāṇikī kriyā |
avisaṃvādinī ceyaṃ śāṃti puṣṭipradā nṛṇām || 310 ||
[Analyze grammar]

tadvaccitrāsu saṃgṛhya somavāraṃ vicakṣaṇaḥ |
rātribhakṣaḥ kṣipedaṣṭau somavārānprayatnataḥ || 311 ||
[Analyze grammar]

pratyekaṃ brāhmaṇā bhojyā yathāśakti vicakṣaṇāḥ |
navame tu tataḥ pūrṇe kuryādbrāhmaṇabhojanam || 312 ||
[Analyze grammar]

vastrayugmaṃ ca dātavyaṃ tataḥ somaṃ pradāpayet |
kāṃsyabhājanasaṃsthaṃ tu kṣīrasaṃpūritaṃ tataḥ || 313 ||
[Analyze grammar]

tadvacchatraṃ pāduke ca tathopānatsamanvitam |
saṃpūrṇāṃgāya dātavyaṃ brāhmaṇāya viśeṣataḥ || 314 ||
[Analyze grammar]

svātyāmaṃgārakaṃ pūjya kṣapayennaktabhojanaiḥ |
aṣṭāvevaṃ ca yāvacca kuryādbrāhmaṇabhojanam || 315 ||
[Analyze grammar]

aṃgārakaṃ ca sauvarṇaṃ sthāpitaṃ tāmrabhājane |
dāpayedbrāhmaṇāyātha saṃpūrṇāṃgāya caiva hi || 316 ||
[Analyze grammar]

nakṣatrānukrameṇaiva kṣipennaktāni sapta vai |
aṣṭame tu kramātkheṭānsauvarṇāndāpayedbudhaḥ || 317 ||
[Analyze grammar]

agnikāryaṃ ca kurvīta yathādṛṣṭaṃ vidhānataḥ |
evaṃ kṛte bhavedyadvai tannibodha narādhipa || 318 ||
[Analyze grammar]

asaumyāśca grahāssarve saumyarūpā bhavaṃti ca |
sarve rogā vinaśyanti tuṣṭimāyānti devatāḥ || 319 ||
[Analyze grammar]

na virundhanti taṃ nāgāḥ pitarastarpitāstathā |
dussvapnanāśo bhavati śṛṇvatāṃ paṭhatāṃ tathā || 320 ||
[Analyze grammar]

yadi bhaumo ravisuto bhāskaro rāhuṇā saha |
ketuśca mūrdhni tiṣṭhaṃti raudrāḥ pīḍākarā grahāḥ || 321 ||
[Analyze grammar]

anena kṛtamātreṇa sasaubhāgyā bhavaṃti hi |
ya evaṃ kurute rājansadābhaktisamanvitaḥ || 322 ||
[Analyze grammar]

tasya sānugrahāḥ sarve śāṃtiṃ yacchaṃti nānyathā |
śanaiścaraṃ rāhuketū lohapātreṣu vinyaset || 323 ||
[Analyze grammar]

lohena kārayeccainānbrāhmaṇebhyaśca dāpayet |
kṛṣṇaṃ vastrayugaṃ deyameteṣāṃ prīṇanāya vai || 324 ||
[Analyze grammar]

sauvarṇāṃ gāśca dātavyāḥ śāṃtiśrīvijayepsubhiḥ |
vratāṃte sarva ete hi grahāssauvarṇakā nṛpa || 325 ||
[Analyze grammar]

dātavyāḥ śāṃtimicchadbhirvratāṃte dvijabhojanam |
yathāśakti dakṣiṇā ca grahāṇāṃ prītaye tathā || 326 ||
[Analyze grammar]

alpāyāsena rājeṃdra sarvānkāmānavāpnuyāt |
śaṃkarājjñānamanvicchedārogyaṃ bhāskarāttathā || 327 ||
[Analyze grammar]

hutāśanāddhanamicchedgatimicchejjanārdanāt |
brāhmyaṃ pitāmahāccaiva sarvajantupraśāṃtidam || 328 ||
[Analyze grammar]

bhīṣma uvāca |
yastvayā kathito yajño yajvanāṃ tu phalaṃ mahat |
tathāyuṣassvalpatayā anyaiḥ prāptuṃ na śakyate || 329 ||
[Analyze grammar]

svalyāyāsena yatpuṇyaṃ saṃvatsaramupoṣajam |
bhavettanme muniśreṣṭha kathayasva mahāphalam || 330 ||
[Analyze grammar]

pulastya uvāca |
idamarthaṃ mahārāja śveto rājā mahāyaśāḥ |
vasiṣṭhaṃ pṛṣṭavānpraśnaṃ kṣudhayā pīḍito bhṛśam || 331 ||
[Analyze grammar]

āsīdilāvṛte varṣe śveto rājā mahābalaḥ |
sa mahīṃ sakalāṃ jigye saptadvīpāṃ sapattanām || 332 ||
[Analyze grammar]

brahmaputro vasiṣṭhaśca āsīttasya purohitaḥ |
sa kadācinnṛpaśreṣṭho jitvā paramadhārmikaḥ || 333 ||
[Analyze grammar]

purohitamuvācedaṃ vasiṣṭhaṃ japatāṃ varam |
śveta uvāca |
bhagavannaśvamedhānāṃ sahasraṃ kartumutsahe || 334 ||
[Analyze grammar]

suvarṇarūpyaratnānāṃ dānaṃ kartuṃ dvijātiṣu |
pṛthivyāmannadānaṃ tu dātunnecchāmi vai guro || 335 ||
[Analyze grammar]

nānnena kiṃciddattena datte homni dvije prabho |
na kiṃcidvastviti jñātvā na dattaṃ tatkadācana || 336 ||
[Analyze grammar]

raktavastramalaṃkāraṃ grāmāṃśca nagarāṇi ca |
adadādbrāhmaṇebhyo'sau śveto rājā mahāyaśāḥ || 337 ||
[Analyze grammar]

nānnaṃ jalaṃ tena rājñā dattamāsītkadācana |
tato'śvamedhairbahubhiryajvāsau nṛpasattama || 338 ||
[Analyze grammar]

svargaṃ gataḥ puṇyajitaṃ tapastaptvārbudatrayam |
brāhmīṃ salokatāṃ prāptaḥ sarvālaṃkārabhūṣitaḥ || 339 ||
[Analyze grammar]

nṛtyaṃtyapsarasastatra gāyaṃte siddhayoṣitaḥ |
tuṃbururnāradastatra dvāvapyanugatau sadā || 340 ||
[Analyze grammar]

agāyetāṃ mahāprājñau munayaśca taponvitāḥ |
vedoktamaṃtraiḥ stuvanti anekakratuyājinam || 341 ||
[Analyze grammar]

evaṃ vibhavayuktasya rājñastasya mahātmanaḥ |
kṣudhāyā pīḍyate dehaṃ tṛṣṇayā ca viśeṣataḥ || 342 ||
[Analyze grammar]

sa tayā pīḍyamānastu kṣudhayā rājasattamaḥ |
vimānenāpyasau svargaṃ tyaktvāgādṛkṣaparvatam || 343 ||
[Analyze grammar]

yatrātmamūrtistatrāgātpurā dagdhā mahāvane |
tatrāsthīni svayaṃ gṛhya lihannāste sa pārthivaḥ || 344 ||
[Analyze grammar]

punarvimānamāruhya yayau nākaṃ narādhipaḥ |
atha kālena mahatā sa rājā saṃśitavrataḥ || 345 ||
[Analyze grammar]

svānyasthīni lihandṛṣṭo vasiṣṭhena purodhasā |
uktaśca kinnu rājendra svāsthibhakṣo narādhipa || 346 ||
[Analyze grammar]

evamuktastato rājā vasiṣṭhena maharṣiṇā |
uvāca vacanaṃ cedaṃ śveto rājātha taṃ munim || 347 ||
[Analyze grammar]

bhagavaṃstṛṭkṣudhārtohamannadānaṃ purā mayā |
na dattaṃ muniśārdūla tena māṃ kṣutprabādhate || 348 ||
[Analyze grammar]

evamuktastadā rājā vasiṣṭho munipuṃgavaḥ |
uvāca taṃ nṛpaṃ bhūyo vākyametanmahāmuniḥ || 349 ||
[Analyze grammar]

kiṃ te karomi rājeṃdra kṣudhitasya viśeṣataḥ |
vastu kasyāpi kiṃciddhi nā'dattamupatiṣṭhati || 350 ||
[Analyze grammar]

ratnahemapradānena bhogavānjāyate naraḥ |
annadānapradānena sarvakāmaiḥ pradīpitaḥ || 351 ||
[Analyze grammar]

tanna dattaṃ tvayā rājanstokaṃ matvā narādhipaḥ |
śveta uvāca |
adattasya ca saṃbhūtiryathā bhavati me guro || 352 ||
[Analyze grammar]

vasiṣṭha tvatprasādena tanmamācakṣva pṛcchataḥ |
vasiṣṭha uvāca |
astyekaṃ kāraṇaṃ yena jāyate nātra saṃśayaḥ || 353 ||
[Analyze grammar]

tacchṛṇuṣva naravyāghra kathyamānaṃ mayā tava |
āsīdrājā purā kalpe vinītāśveti kīrtitaḥ || 354 ||
[Analyze grammar]

sa cāśvamedhamārebhe yajñaṃ kartuṃ varaṃ nṛpaḥ |
yajanāṃte dvijeṃdrebhyo dattaṃ go'śvādi yācitam || 355 ||
[Analyze grammar]

nānnaṃ dattaṃ tena kiṃcitsvalpaṃ matvā yathā tvayā |
tataḥ kālena mahatā mṛto'sau jāhnavī taṭe || 356 ||
[Analyze grammar]

māyāpuryāṃ vinītāśvaḥ sārvabhaumo'bhavannṛpaḥ |
svargaṃ ca gatavānso'pi yathā rājā bhavānprabho || 357 ||
[Analyze grammar]

asāvapi kṣudhāviṣṭa evamevāgato'bhavat |
martyaloke nadītīre gaṃgāyāṃ nīlaparvate || 358 ||
[Analyze grammar]

vimānenārkavarṇena bhāsvatā devavannṛpa |
dadarśa tatsvakaṃ dehaṃ tathā svaṃ ca purohitam || 359 ||
[Analyze grammar]

hotāraṃ brāhmaṇaṃ nāma yajaṃtaṃ jāhnavī taṭe |
taṃ dṛṣṭvā'sāvapi punaḥ paryapṛcchadidvajottamam || 360 ||
[Analyze grammar]

kṣudhāyāḥ kāraṇaṃ rājansa hotā tamuvāca ha |
tiladhenuṃ ca vai rājanghṛtadhenuṃ ca sattama || 361 ||
[Analyze grammar]

jaladhenuṃ ca dhenuṃ ca rasadhenuṃ ca pārthiva |
dehi śīghraṃ yena bhavāṃstṛṭkṣudhāvarjito divi || 362 ||
[Analyze grammar]

rame tayāvadādityastapate divi caṃdramāḥ |
evamuktastato rājā taṃ punaḥ pṛṣṭavānidam || 363 ||
[Analyze grammar]

tiladhenusthitiṃ brūhi tathā kṛtvā dadāmyaham |
purohita uvāca |
vidhānaṃ tiladhenostu tacchṛṇuṣva narādhipa || 364 ||
[Analyze grammar]

dhenussyātṣoḍaśāḍhakya caturbhirvatsako bhavet |
ikṣudaṃḍamayāḥ pādā dantāḥ puṣpamayāḥ śubhāḥ || 365 ||
[Analyze grammar]

nāsā gaṃdhamayī tasyā jihvā guḍamayī tathā |
pucche srakkalpanīyāsyādghaṃṭābharaṇabhūṣitā || 366 ||
[Analyze grammar]

īdṛśīṃ kalpayitvā tu svarṇaśṛṃgīṃ tu kalpayet |
raupyakhurāṃ kāṃsyadohāṃ pūrvadhenuvidhānataḥ || 367 ||
[Analyze grammar]

kṛtvā tāṃ brāhmaṇāyāśu dāpayenmaṃtrato nṛpa |
sthitāṃ kṛṣṇājine dhenuṃ vāsobhirgopitāṃ śubhām || 368 ||
[Analyze grammar]

sūtreṇāsūtritāṃ kṛtvā paṃcaratnasamanvitām |
sarvauṣadhisamāyuktāṃ maṃtrapūtāṃ tu dāpayet || 369 ||
[Analyze grammar]

annamme jāyatāṃ sadyaḥ pānaṃ sarvarasāstathā |
kāmānsaṃpādayāsmākaṃ tiladheno dvijerpitā || 370 ||
[Analyze grammar]

gṛhṇāmi devi tvāṃ bhaktyā kuṭumbārthe viśeṣataḥ |
dehi kāmānvitānsarvāṃstiladheno namostu te || 371 ||
[Analyze grammar]

evaṃ vidhānato dattā tiladhenurnṛpottama |
sarvakāmasamāvāptiṃ kurute nātra saṃśayaḥ || 372 ||
[Analyze grammar]

jaladhenustathaiveha kuṃbhaireva prakalpitā |
dattā tu vidhinā kāmānsadyaḥ sarvānprayacchati || 373 ||
[Analyze grammar]

dhenuśataṃ tathā dattaṃ pūrṇimā niyamena hi |
sāvitrī iva vai svarge sarvakāmapradā bhavet || 374 ||
[Analyze grammar]

ghṛtadhenustathā dattā vidhānena vicakṣaṇaiḥ |
sarvakāmasamāvāptiṃ kurute kāṃtidā bhavet || 375 ||
[Analyze grammar]

rasadhenustathā dattā kārtike māsi pārthiva |
sarvānkāmānprayacchettu nityaṃ sā gatidā bhavet || 376 ||
[Analyze grammar]

etatte sarvamākhyātaṃ samāsādbahuvistaram |
apāraṃ phalamuddiṣṭaṃ brahmaṇā sarvakarmaṇā || 377 ||
[Analyze grammar]

tṛṣṇayā kṣudhayā yadvā pīḍito rājasattama |
taddānaṃ kārtike deyaṃ pūrvaṃ dehi narādhipa || 378 ||
[Analyze grammar]

brahmāṃḍaṃ sarvasaṃpannaṃ bhūtaratnauṣadhīyutam |
devadānavayakṣaiśca yuktametatsadā vibho || 379 ||
[Analyze grammar]

etattu sakalaṃ kṛtvā sarvato rajatānvitam |
suratnasūryacaṃdrāḍhyaṃ kārtike dvādaśī dine || 380 ||
[Analyze grammar]

athavā paṃcadaśyāṃ tu kārtikasyaiva nānyataḥ |
purohitāya gurave dāpayedbhaktimānnaraḥ || 381 ||
[Analyze grammar]

brahmāṃḍodaravartīni yāni bhūtāni pārthiva |
tāni dattāni vai tena samāsātkathitaṃ tava || 382 ||
[Analyze grammar]

yadyajñairyajato rājansamāptavaradakṣiṇaiḥ |
sarvaṃ phalaṃ tatkhaṃḍasya brahmāṃḍasya viśeṣataḥ || 383 ||
[Analyze grammar]

yaḥ punaḥ sakalaṃ cedaṃ brahmāṃḍaṃ pradiśennaraḥ |
tena japtaṃ hutaṃ dattaṃ paṭhitaṃ kīrtitaṃ bhavet || 384 ||
[Analyze grammar]

rājovāca |
vidhiṃ brahmāṃḍadānasya kṛtvā tatmokṣabhāgbhavet |
kālaṃ deśaṃ vipratīrthaṃ sarvaṃ tvaṃ vada menagha || 385 ||
[Analyze grammar]

kṛtena yena sarvasya phalabhāgī bhavāmyaham |
kutsitasyāsya bhāvasya mokṣassyādacirācca me || 386 ||
[Analyze grammar]

vasiṣṭha uvāca |
evaṃ śrutvā tato rājanpurodhāstasya sa dvijaḥ |
brahmāṃḍaṃ kārayāmāsa sauvarṇaṃ sarvadhātubhiḥ || 387 ||
[Analyze grammar]

yutaṃ niṣkasahasreṇa padmaṃ tatra hyakalpayat |
tatra brahmā tasya madhyepadmarāgairalaṃkṛtaḥ || 388 ||
[Analyze grammar]

sāvitryā caiva gāyatryā ṛṣibhirmunibhiḥ saha |
nāradādyāḥ sutāḥ sarva indrādyāśca divaukasaḥ || 389 ||
[Analyze grammar]

sauvarṇavigrahāḥ sarve brahmaṇastu puraḥsarāḥ |
varāharūpī bhagavānlakṣmyā saha sanātanaḥ || 390 ||
[Analyze grammar]

nīlaṃ marakataṃ caiva bhūṣāyāṃ tasya kārayet |
gomedaistasya vai śobhāṃ kārayeta ca buddhimān || 391 ||
[Analyze grammar]

moktikaiścāpi somasya śobhāṃ vajrairdivākare |
grahāṇāṃ caiva sarveṣāṃ suvarṇāni ca dāpayet || 392 ||
[Analyze grammar]

svarṇātsaptaguṇaṃ raupyaṃ raupyāttāmraṃ tathāvidham |
tataḥ saptaguṇaṃ kāryaṃ kāṃsyaṃ saptaguṇaṃ tathā || 393 ||
[Analyze grammar]

kāṃsyātsaptaguṇaṃ kāryaṃ trapu caiva narādhipa |
trapusaptaguṇaṃ sīsaṃ sīsāllohaṃ ca kārayet || 394 ||
[Analyze grammar]

saptadvīpāssamudrāśca sapta vai kulaparvatāḥ |
anayā saṃkhyayā kṛtvā nipuṇaiḥ śilpibhistataḥ || 395 ||
[Analyze grammar]

pādapādīni bhūtāni rājatānyeva kārayet |
āraṇyāni ca sattvāni sauvarṇāni ca kārayet || 396 ||
[Analyze grammar]

vṛkṣānvanaspatīngulmatṛṇaparṇāni vīrudhaḥ |
sarvaṃ prakalpya vidhivattīrthe deyaṃ vicakṣaṇaiḥ || 397 ||
[Analyze grammar]

kurukṣetre gayāyāṃ ca prayāge'marakaṃṭake |
dvāravatyāṃ prabhāse ca gaṃgādvāre ca puṣkare || 398 ||
[Analyze grammar]

tīrtheṣveteṣu vai deyaṃ grahaṇe śaśisūryayoḥ |
dinacchidreṣu sarveṣu ayane dakṣiṇottare || 399 ||
[Analyze grammar]

vyatīpāte bahuguṇaṃ viṣuve ca viśeṣataḥ |
dātavyametadrājeṃdra vicāraṃ naiva kārayet || 400 ||
[Analyze grammar]

śālāgnihotriṇaṃ kṛtvā surūpaṃ ca guṇānvitam |
sapatnīkaṃ ca saṃpūjya bhūṣayitvā ca bhūṣaṇaiḥ || 401 ||
[Analyze grammar]

purohitaṃ mukhyatamaṃ kṛtvā'nye ca tathā dvijāḥ |
caturviṃśadguṇopetāḥ sapatnīkā nimaṃtritāḥ || 402 ||
[Analyze grammar]

aṃgulīyāni ca tathā karṇaveṣṭaṃ ca dāpayet |
evaṃvidhāṃstu tānpūjya teṣāmagre susaṃsthitaḥ || 403 ||
[Analyze grammar]

aṣṭāṃgapraṇipātena praṇamya ca punaḥpunaḥ |
purohitāya purataḥ kṛtvā vai karasaṃpuṭam || 404 ||
[Analyze grammar]

yūyaṃ vai brāhmaṇāḥ prītā maitratvenānugṛhṇata |
saumukhyena dvijaśreṣṭhā bhūyaḥ pūtatarastvahaḥ || 405 ||
[Analyze grammar]

bhavatāṃ prītiyogena svayaṃ prītaḥ pitāmahaḥ |
brahmāṃḍena tu dattena toṣaṃ yātu janārdanaḥ || 406 ||
[Analyze grammar]

pinākapāṇirbhagavānśakraśca tridaśeśvaraḥ |
ete toṣaṃ samāyāṃtu anudhyānāddvijottamāḥ || 407 ||
[Analyze grammar]

evaṃ stutvā tato rājā brāhmaṇānvedapāragān |
brahmāṇḍaṃ tu guroḥ prādātsavidhānaṃ punaḥ kṣaṇāt || 408 ||
[Analyze grammar]

sarvakāmaistatastṛpto yayau svargaṃ narādhipaḥ |
tenaiva guruṇā tacca vibhaktaṃ brāhmaṇaiḥ saha || 409 ||
[Analyze grammar]

dattaṃ tenāpi cānyebhyo brahmāṃḍaṃ ca narādhipa |
brahmāṃḍe bhūmidāne ca grāhī caiko na vai bhavet || 410 ||
[Analyze grammar]

gṛhṇandoṣamavāpnoti brahmahatyāṃ na saṃśayaḥ |
sarveṣāṃ caiva pratyakṣaṃ dātavyaṃ parikīrtya vai || 411 ||
[Analyze grammar]

dīyamānaṃ ca paśyaṃti tepi pūtā bhavaṃti hi |
darśanādeva te muktā bhavaṃntyeva na saṃśayaḥ || 412 ||
[Analyze grammar]

yā bhīmadvādaśī proktā svarṇaṃ toyaṃ mṛgājinaṃ |
etāni kṛtvā paśyantu dṛṣṭairetaiḥ kriyāphalaṃ || 413 ||
[Analyze grammar]

ayatnādeva labhyeta kartuścaiva salokatā |
sadā gāvaḥ praṇamyāśca maṃtreṇānena pārthiva || 414 ||
[Analyze grammar]

namo gobhyaḥ śrīmatībhyaḥ saurabheyībhya eva ca |
namo brahmasutābhyaśca pavitrābhyo namonamaḥ || 415 ||
[Analyze grammar]

maṃtrasya cāsya smaraṇādgodānaphalamāpnuyāt |
tasmāttvamapi rājeṃdra puṣkare tīrtha uttame || 416 ||
[Analyze grammar]

kārtikyāṃ tu viśeṣeṇa godānaphalamāpsyasi |
yatkiṃcidvidyate pāpaṃ striyo vā puruṣasya vā || 417 ||
[Analyze grammar]

puṣkare snānamātreṇa tadaśeṣaṃ praṇaśyati |
pṛthivyāṃ yāni tīrthāni āsamudrāttu bhārata || 418 ||
[Analyze grammar]

puṣkare tānyupāyāṃti kārtikyāṃ tu viśeṣataḥ || 419 ||
[Analyze grammar]