Chapter 5 - Ādhiṣṭhānika-vilāsa

iti |
śrīcaitanyaprabhuṃ vande bālo 'pi yadanugrahāt |
taren nānāmatagrāhavyāptaṃ pūjākramārṇavam || 1 ||
[Analyze grammar]

śrīmadgopāladevasyāṣṭādaśākṣarayantrataḥ |
likhyate'rcāvidhir gūḍhaḥ kramadīpikayekṣitaḥ || 2 ||
[Analyze grammar]

āgamoktena mārgeṇa bhagavān brāhmaṇair api |
sadaiva pūjyo 'to lekhyaḥ prāya āgamiko vidhiḥ || 3 ||
[Analyze grammar]

tathā ca viṣṇuyāmale |
kṛte śrutyuktamārgaḥ syāt tretāyāṃ smṛtibhāvitaḥ |
dvāpare tu purāṇoktaḥ kalāv āgamasambhavaḥ || 4 ||
[Analyze grammar]

aśuddhāḥ śūdrākalpā hi brāhmaṇāḥ kalisambhavāḥ |
teṣām āgamamārgeṇa śuddhir na śrautavartmanā || 5 ||
[Analyze grammar]

śrīkṛṣṇadvāradevebhyo dattvā pādyādikaṃ tataḥ |
gandhapuṣpair arcayet tān yathāsthānaṃ yathākramam || 6 ||
[Analyze grammar]

dvārāgre saparīvārān bhūpīṭhe kṛṣṇapārṣadān |
tadagre garuḍaṃ dvārasyordhve dvāraśriyaṃ yajet || 7 ||
[Analyze grammar]

prāgdvārobhayapārśve tu yajec caṇḍapracaṇḍakau |
dvāre ca dakṣiṇe dhātṛvidhātārau ca paścime || 8 ||
[Analyze grammar]

jayaṃ ca vijayaṃ caiva balaṃ prabalam uttare |
dvandvaśastv evam abhyarcya dehalyāṃ vāstupuruṣam || 9 ||
[Analyze grammar]

dvārāntaḥpārśvayor gaṅgāṃ yamunāṃ ca tato 'rcayet |
tatpārśvayoḥ śaṅkhanidhiṃ tathā padmanidhiṃ yajet || 10 ||
[Analyze grammar]

gaṇeśaṃ mandirasyāgnikoṇe durgāṃ ca nairṛte |
vāṇīṃ vāyavya aiśāne kṣetrapālaṃ tathārcayet || 11 ||
[Analyze grammar]

sanātanaḥ āgneye koṇe gaṇeśam arcayet |
tathā coktaṃ kramadīpikāyām |
parivārārāḥ kṛtāḥ sarve punaḥ śrīviṣṇupārṣadāḥ |
dvārāgrābalipīṭhe'rcyāḥ pakṣīndraś ca tadagrataḥ || caṇḍapracaṇḍau prāg dhātṛvidhātārau ca dakṣiṇe |
jayaḥ savijayaḥ paścād balaḥ prabala uttare || ūrdhve dvāraśriyaṃ ceṣṭvā dvāry etān yugmaśo 'rcayet |
pūjyo vāstupumāṃs tatra tatra dvāḥpīthamadhyataḥ || dvārāntaḥpārśvayor arcyā gaṅgā ca yamunā nadī |
koṇeṣu vighnaṃ durgāṃ ca vāṇīṃ kṣetre samarcayet || iti |
dvāḥśākhām āśrayan vāmāṃ saṅkocyāṅgāni dehalīm |
aspṛṣṭvā praviśed veśma nyasyan prāg dakṣiṇaṃ padam || 12 ||
[Analyze grammar]

tathā ca sāradātilake |
kiṃcit spṛśan vāmaśākhāṃ dehalīṃ laṅghayan guruḥ |
aṅgaṃ saṅkocayann antaḥ praviśed dakṣiṇāṅghriṇā || 13 ||
[Analyze grammar]

tanmāhātmyaṃ ca haribhaktisudhodaye |
praviśann ālayaṃ viṣṇor arcanārthaṃ subhaktimān |
na bhūyaḥ praviśan mātuḥ kukṣikārāgṛhaṃ sudhīḥ || 14 ||
[Analyze grammar]

nairṛte vāstupuruṣaṃ brahmāṇam api pūjayet |
āsanastho yajet tāṃs tān anyatra bhagavadgṛhāt || 15 ||
[Analyze grammar]

tatpūjāmantraś coktaḥ |
praṇavādicaturthyantaṃ devanāma namo 'ntakam |
pūjāmantram idaṃ proktaṃ sarvatrārcanakarmaṇi || 16 ||
[Analyze grammar]

iti |
atha kṛṣṇāgratas tiṣṭhan kṛtvā digbandhanaṃ kṣipet |
puṣpākṣatān samastāsu dikṣu tatroktamantrataḥ || 17 ||
[Analyze grammar]

tataś cāsanamantreṇābhimantryābhyarcya cāsanam |
tasminn upaviśet padmāsanena svastikena vā || 18 ||
[Analyze grammar]

tatra kṛṣṇārcakaḥ prāyo divase prāṅmukho bhavet |
udaṅmukho rajanyāṃ tu sthiramūrtiś ca sammukhaḥ || 19 ||
[Analyze grammar]

tatra ca ekādaśaskandhe āsīnaḥ prāg udagvārcet sthirāyāntv atha sammukhaḥ || 20 ||
[Analyze grammar]

āsanamantrasya merupṛṣṭha ṛṣiḥ sutalaṃ chandaḥ |
kūrmo devatā āsanābhimantreṇa viniyogaḥ || 21 ||
[Analyze grammar]

pṛthvi tvayā dhṛtā lokā devi tvaṃ viṣṇunā dhṛtā |
tvaṃ ca dhāraya māṃ nityaṃ pavitraṃ kuru cāsanam || 22 ||
[Analyze grammar]

nāradapañcarātre vaṃśāśmadārudharaṇītṛṇapallavanirmitam |
varjayed āsanaṃ vidvān dāridryavyādhiduḥkhadam |
kṛṣṇājinaṃ kambalaṃ vā nānyad āsanam iṣyate || 23 ||
[Analyze grammar]

anyatra ca |
kṛṣṇājinaṃ vyāghracarma kauṣeyaṃ vetranirmitam |
vastrājinaṃ kambalaṃ vā kalpayed āsanaṃ mṛdu || 24 ||
[Analyze grammar]

nāradapañcarātre |
vaṃśād āhur daridratvaṃ pāṣāṇe vyādhisambhavam |
dharaṇyāṃ duḥkhasambhūtiṃ daurbhāgyaṃ dāravāsane || 25 ||
[Analyze grammar]

tṛṇāsane yaśohāniṃ pallave cittavibhramam |
darbhāsane vyādhināśaṃ kambalaṃ duḥkhamocanam || 26 ||
[Analyze grammar]

kiṃ ca śrībhagavadgītāsu |
śucau deśe pratiṣṭhāpya sthiram āsanam ātmanaḥ |
nātyucchritaṃ nātinīcaṃ cailājinakuśottaram || 27 ||
[Analyze grammar]

iti |
yathokatam upaviśyātha sampradāyānusārataḥ |
śaṅkhādipūjāsambhārān nyaset tattatpadeṣu tān || 28 ||
[Analyze grammar]

svasya vāmāgrataḥ śaṅkhaṃ sādhāraṃ sthāpayed budhaḥ |
tatraivārdhyādipātrāṇi nyasyec ca dvāri bhāgaśaḥ || 29 ||
[Analyze grammar]

tulasīgandhapuṣpādibhājanāni ca dakṣiṇe |
vāme ca sthāpayet pārśve kalasaṃ pūrṇam ambhasā || 30 ||
[Analyze grammar]

dakṣiṇe ghṛtadīpaṃ ca tailadīpaṃ ca vāmataḥ |
sambhārānaparān nyaset svadṛṣṭiviṣaye pade |
karaprakṣālanārthaṃ ca pātram ekaṃ svapṛṣṭhataḥ || 31 ||
[Analyze grammar]

devīpurāṇe |
nānāvicitrarūpāṇi puṇḍarīkākṛtīni ca |
śaṅkhanīlotpalābhāni pātrāṇi parikalpayet || 32 ||
[Analyze grammar]

ratnādiracitāny eva kāñcīmūlayutāni ca |
yathāśobhaṃ yathālābhaṃ tathā pātrāṇi kārayet || 33 ||
[Analyze grammar]

kiṃ ca |
haṃsapātreṇa sarvāṇi cepsitāni labhen mune |
arghyaṃ dattvā tathā raupyeṇāyurājyaṃ śubhaṃ bhavet |
tāmrapātreṇa saubhāgyaṃ dharmaṃ mṛṇmayasambhavam || 34 ||
[Analyze grammar]

vārāhe |
sauvarṇaṃ rājataṃ kāṃsyaṃ yena dīyate bhājanam |
tān sarvān samparityajya tāmraṃ tu mama rocate || 35 ||
[Analyze grammar]

pavitrāṇāṃ pavitraṃ yo maṅgalānāṃ ca maṅgalam |
viśuddhānāṃ śuciṃ caiva tāmraṃ saṃsāramokṣaṇam || 36 ||
[Analyze grammar]

dīkṣitānāṃ viśuddhānāṃ mama karmaparāyaṇaḥ |
sadā tāmreṇa kartavyam evaṃ bhūmi mama priyam || 37 ||
[Analyze grammar]

iti |
kecic ca tāmrapātreṣu gavyāder yogadoṣataḥ |
tāmrātiriktam icchanti madhuparkasya bhājanam || 38 ||
[Analyze grammar]

tathaiva śaṅkham evārdhyapātram icchanti kecana |
śaṅkhe kṛtvā tu pānīyaṃ sapuṣpaṃ salilākṣatam |
arghyaṃ dadāti devasyety evaṃ skānde'bhidhānataḥ || 39 ||
[Analyze grammar]

maṅgalārthaṃ ca kalasaṃ sajalaṃ karakānvitam |
phalādisahitaṃ divyaṃ nyased bhagavato 'grataḥ || 40 ||
[Analyze grammar]

tathā ca skānde |
kumbhaṃ sakarakaṃ divyaṃ phalakarpūrasaṃyutam |
nyased arcanakāle tu kṛṣṇasyātīva vallabham || 41 ||
[Analyze grammar]

iti |
kiṃ ca |
sanīraṃ ca sakarpūraṃ kumbhaṃ kṛṣṇāya yo nyaset |
kalpaṃ tasya na pāpekṣāṃ kurvanti prapitāmahāḥ || 42 ||
[Analyze grammar]

prakṣiped arghyapātre tu gandhapuṣpākṣatān yavān |
kuśāgratiladūrvāś ca siddhārthān api sādhakaḥ |
kecic cātra jalādīni dravyāṇy aṣṭau vadanti hi || 43 ||
[Analyze grammar]

yata uktaṃ bhaviṣye |
āpaḥ kṣīraṃ kuśāgrāṇi dadhyakṣatatilas tathā |
yavāḥ siddhārthakāś caivam arghyo 'ṣṭāṅgaḥ prakīrtitaḥ || 44 ||
[Analyze grammar]

pādyapātre ca kamalaṃ dūrvā śyāmākam eva ca |
nikṣiped viṣṇupatrīṃ cety evaṃ dravyacatuṣṭayam || 45 ||
[Analyze grammar]

tathaivācamanīyārthaṃ pātre dravyatrayaṃ budhaḥ |
jātīphalaṃ lavaṅgaṃ ca kakkolam api nikṣipet || 46 ||
[Analyze grammar]

madhuparkīyapātre ca gavyaṃ dadhi payo ghṛtam |
madhukhaṇḍam apīty evaṃ nikṣiped dravyapañcakam || 47 ||
[Analyze grammar]

kecit trīṇy eva pātre'smin dravyāṇīcchanti sādhavaḥ || 48 ||
[Analyze grammar]

yata uktaṃ śrīviṣṇudharme ghṛtaṃ dadhi tathā kṣaudraṃ madhuparko vidhīyate || 49 ||
[Analyze grammar]

ādivārāhe ca |
dadhisarpir madhusamaṃ pātre auḍumbare mama |
madhunas tu alābhe tu guḍena saha miśrayet || 50 ||
[Analyze grammar]

ghṛtasyālābhe suśroṇi lājaiś ca saha miśrayet |
tathā dadhno 'py alābhe tu kṣīreṇa saha miśrayet || 51 ||
[Analyze grammar]

teṣām abhāve puṣpādi tattadbhāvanayā kṣipet |
nāradas tv āha vimalenodakenaiva pūryate || 52 ||
[Analyze grammar]

mūlena pātreṇaikena maṣṭakṛtvo 'bhimantrayet |
kuryāc ca teṣāṃ pātrāṇāṃ rakṣaṇaṃ cakramudrayā || 53 ||
[Analyze grammar]

pūjām ārabhamāṇo hi yathoktāsanam āsthitaḥ |
paṭhen maṅgalaśāntiṃ tāṃ yārcane sammatā satām || 54 ||
[Analyze grammar]

oṃ bhadraṃ karṇebhiḥ śṛṇuyāma devā bhadraṃ paśyemākṣabhir yajatrā |
sthirair aṅgais tuṣṭuvāṃsas tanubhir vyaśema devahitaṃ yad āyuḥ || 55 ||
[Analyze grammar]

svasti na indro vṛddhaśravāḥ |
svasti naḥ pūṣā viśvadevāḥ |
svasti nas tārkṣo 'riṣṭanemiḥ |
svasti no bṛhaspatir dadhātu || 56 ||
[Analyze grammar]

iti |
paṭhan oṃ śāntiḥ śrīkṛṣṇapādapadmārādhaneṣu śāntir bhavatu || iti |
apasarpantu te bhūtā ye bhūtā bhuvi saṃsthitāḥ |
ye bhūtā vighnakartāras te naśyantu śivājñayā || 57 ||
[Analyze grammar]

ity udīryāstramantreṇa vāmapādasya pārṣṇinā |
ghātais tribhir budho vighnān bhaumān sarvān nivārayet || 58 ||
[Analyze grammar]

āntarīkṣāṃś ca tenaivordhvordhvatālatrayeṇa hi |
nirasyotsārayed divyān māntriko divyadṛṣṭitaḥ || 59 ||
[Analyze grammar]

tataḥ kṛtāñjalir vāme śrīguruṃ paramaṃ gurum |
parameṣṭhiguruṃ ceti named guruparamparām || 60 ||
[Analyze grammar]

gaṇeśaṃ dakṣiṇe bhāge durgām agre'tha pṛṣṭhataḥ |
kṣetrapālaṃ named bhaktyā madhye cātmeṣṭadaivatam || 61 ||
[Analyze grammar]

tataś cāstreṇa saṃśodhya karau kurvīta tena hi |
tālatrayaṃ diśāṃ bandham agniprākāram eva ca || 62 ||
[Analyze grammar]

śarīrākārabhūtānāṃ bhūtānāṃ yad viśodhanam |
avyayabrahmasamparkād bhūtaśuddhir iyaṃ matā || 63 ||
[Analyze grammar]

bhūtaśuddhiṃ vinā kartur japahomādikāḥ kriyāḥ |
bhavanti niṣphalāḥ sarvā yathāvidhy apy aniṣṭhitāḥ || 64 ||
[Analyze grammar]

karakacchapikāṃ kṛtvātmānaṃ buddhyā hṛdabjataḥ |
śiraḥsahasrapatrābje paramātmani yojayet |
pṛthivyādīni tattvāni tasmin līnāni bhāvayet || 65 ||
[Analyze grammar]

vāmahastaṃ tathottānam adho dakṣiṇabandhitam |
karakacchapikā mudrā bhūtaśuddhau prakīrtitā || 66 ||
[Analyze grammar]

dehaṃ saṃśoṣya dagdhvedam āplāvyāmṛtavarṣataḥ |
utpādya draḍhayitvāsupratiṣṭhāṃ vidhinācaret || 67 ||
[Analyze grammar]

ātmānam evaṃ saṃśodhya nītvā kṛṣṇārcanārhatām |
vātsalyād dhṛdgataṃ kṛṣṇaṃ yaṣṭuṃ hṛt punar ānayet || 68 ||
[Analyze grammar]

tathā ca trailokyasaṃmohanatantre |
nābhisthavāyunā dehaṃ sapāpaṃ śodhayed budhaḥ |
vahninā hṛdayasthena dahet tac ca kalevaram || 69 ||
[Analyze grammar]

sahasrāre mahāpadme lalāṭasthe sthitaṃ vidhum |
sampūrṇamaṇḍalaṃ śuddhaṃ cintayed amṛtātmakam || 70 ||
[Analyze grammar]

tasmād galitadhārābhiḥ plāvayed bhasmasād budhaḥ |
ābhir varṇamayībhiś ca pañcabhūtātmakaṃ vapuḥ |
pūrvavad bhāvayed devīm || 71 ||
[Analyze grammar]

ity ādi |
kiṃ cāgre |
tatas tasmāt samākṛṣya praṇavena tu mantravit |
tat tejo hṛdaye nyasya cintayed viṣṇum avyayam || 72 ||
[Analyze grammar]

kiṃ vā cintanamātreṇa bhūtaśuddhiṃ vidhāya tām |
prāṇāyāmāṃś tataḥ kuryāt sampradāyānusarataḥ || 73 ||
[Analyze grammar]

recaḥ ṣoḍaśamātrābhiḥ pūro dvātriṃśatā bhavet |
catuḥṣaṣṭhyā bhavet kumbha evaṃ syāt prāṇasaṃyamaḥ || 74 ||
[Analyze grammar]

virecya pavanaṃ pūrvaṃ saṃkocya gudamaṇḍalam |
pūrayitvā vidhānena svaśaktyā kumbhake sthitaḥ || 75 ||
[Analyze grammar]

tatra praṇavam abhyasyan bījaṃ vā mantram ūrdhvagam |
ṛṣyādismaraṇaṃ kṛtvā kuryād dhyānam atandritaḥ || 76 ||
[Analyze grammar]

tad dhyānaṃ coktam |
viṣṇuṃ bhāsvatkirīṭāṅgadavalayakalākalpahārodarāṅghri |
śroṇībhūṣaṃ savakṣomaṇimakaramahākuṇḍalāmṛṣṭagaṇḍam |
hastodyacchaṅkhacakrāmbujagadam amalaṃ pītakauśeyavāsaṃ vidyotadbhāsam udyaddinakarasadṛśaṃ padmasaṃsthaṃ namāmi || 77 ||
[Analyze grammar]

kvacic ca |
rudras tu recake brahmā pūrake dhyeyadevatā |
śrīviṣṇuḥ kumbhake jñeyo dhyānasthānaṃ guror mukhāt || 78 ||
[Analyze grammar]

tathā hi |
nābhisthāne pūrakeṇa cintayet kamalāsanam |
brahmāṇaṃ raktagaurāṅgaṃ caturvaktraṃ pitāmaham || 79 ||
[Analyze grammar]

nīlotpaladalaśyāmaṃ hṛdi madhye pratiṣṭhitam |
caturbhujaṃ mahātmānaṃ kumbhakena tu cintayet || 80 ||
[Analyze grammar]

recekanaiśvaraṃ dhyānaṃ lalāṭe sarvapāpaham |
śuddhasphaṭikasaṅkāśaṃ kuryād vai nirmalaṃ budhaḥ || 81 ||
[Analyze grammar]

iti |
ekāntibhiś ca bhagavān sarvadevamayaḥ prabhuḥ |
kṛṣṇaḥ priyajanopetaś cintanīyo hi sarvataḥ || 82 ||
[Analyze grammar]

pādme devahūtivikuṇḍalasaṃvāde |
yamalokaṃ na paśyanti prāṇāyāmaparāyaṇāḥ |
api duṣkṛtakarmāṇas tair eva hatakilbiṣāḥ || 83 ||
[Analyze grammar]

divase divase vaiśya prāṇāyāmās tu ṣoḍaśa |
api brahmahaṇaṃ sākṣāt punanty aharahaḥ kṛtāḥ || 84 ||
[Analyze grammar]

tapāṃsi yāni tapyante vratāni niyamāś ca ye |
gosahasrapradānaṃ ca prāṇāyāmas tu tatsamaḥ || 85 ||
[Analyze grammar]

ambubinduṃ yaḥ kuśāgreṇa māse māse naraḥ pibet |
saṃvatsaraśataṃ sāgraṃ prāṇāyāmas tu tatsamaḥ || 86 ||
[Analyze grammar]

pātakaṃ tu mahad yac ca tathā kṣudropapātakam |
prāṇāyāmaiḥ kṣaṇāt sarvaṃ bhasmasāt kurute naraḥ || 87 ||
[Analyze grammar]

iti |
nyāsān vinā japaṃ prāhur āsuraṃ viphalaṃ budhāḥ |
ato yathāsampradāyaṃ nyāsān kuryād yathāvidhi || 88 ||
[Analyze grammar]

ṛṣicchandodevatādi smṛtvādau mātṛkāmanoḥ |
śirovaktrahṛdādau ca nyasya taddhyānam ācaret || 89 ||
[Analyze grammar]

tac coktam |
pañcāśallipibhir vibhaktamukhadoḥpanmadhyavakṣaḥsthalīṃ bhāvanmaulinibaddhacandraśakalām āpīnatuṅgastanīm |
mudrām akṣaguṇaṃ sudhāḍhyakalasaṃ vidyāṃ ca hastāmbujair bibhrāṇāṃ viśadaprabhāṃ trinayanāṃ vāgdevatām āśraye || 90 ||
[Analyze grammar]

akārādīn kṣakārāntān varṇānādau tu kevalān |
lalāṭādiṣu cāṅgeṣu nyased vidvān yathākramam || 91 ||
[Analyze grammar]

tac ca vivicyoktam |
lalāṭamukhabimbākṣiśrutighrāṇeṣu gaṇḍayoḥ |
oṣṭhadantottamāṅgāsye doḥpatsandhyagrakeṣu ca || 92 ||
[Analyze grammar]

pārśvayoḥ pṛṣṭhato nābhau jaṭhare hṛdaye'ṃsake |
kakudyase ca hṛtpūrvaṃ pāṇipādayuge tataḥ |
jaṭharānanayor nyasen mātṛkārṇān yathākramam || 93 ||
[Analyze grammar]

iti |
sānusvārān visargāḍhyān sānusvāravisargakān |
nyased bhūyo 'pi tān vidvān evaṃ vāracatuṣṭayam || 94 ||
[Analyze grammar]

kaṇṭhahṛnnābhiguhyeṣu pāyubhrūmahdyayos tathā |
sthite ṣoḍaśapatrābje krameṇa dvādaśacchade || 95 ||
[Analyze grammar]

daśapatre ca ṣaṭpatre catuṣpatre dvipatrake |
nyased ekaikapatrānte sabindvekaikam akṣaram || 96 ||
[Analyze grammar]

smṛtvā ṛṣyādikāṃ varṇān mūrtibhiḥ keśavādibhiḥ |
kīrtyādibhiḥ śaktibhiś ca nyaset tān pūrvavat kramāt || 97 ||
[Analyze grammar]

nyasec caturthīn atyantā mūrtīḥ śaktīś ca yādibhiḥ |
saptadhātūn prāṇajīvau krodham apy ātmane'ntakān || 98 ||
[Analyze grammar]

udyatpradyotanaśataruciṃ taptahemāvadānaṃ pārśvadvandve jaladhisutayā viśvadhātryā ca juṣṭam |
nānāratnollasitavividhākalpam āpītavastraṃ viṣṇuṃ vande darakamalakaumodakīcakrapāṇim || 99 ||
[Analyze grammar]

prathamaṃ keśavo nārāyaṇaḥ paścāc ca mādhavaḥ |
govindaś ca tathā viṣṇur madhusūdana eva ca || 100 ||
[Analyze grammar]

trivikramo vāmano 'tha śrīdharaś ca tataḥ param |
ṛṣīkeśaḥ padmanābhas tato dāmodaras tathā || 101 ||
[Analyze grammar]

vāsudevaḥ saṅkarṣaṇaḥ pradyumno 'thāniruddhakaḥ |
cakrī gadī tathā śārṅgī khaḍgī śaṅkhī halī tathā || 102 ||
[Analyze grammar]

muṣalī ca tathā śūlī pāśī caivāṅkuśī tathā |
mukundo nandajaś caiva tathā nandī naras tathā || 103 ||
[Analyze grammar]

narakajid dhariḥ kṛṣṇaḥ satyaḥ sātvata eva ca |
tataḥ śauris tathā śūras tataḥ paścāj janārdanaḥ || 104 ||
[Analyze grammar]

bhūdharo viśvamūrtiś ca vaikuṇṭhaḥ puruṣottamaḥ |
balo balānujo bālo vṛṣaghno vṛṣa eva ca || 105 ||
[Analyze grammar]

haṃso varāho vimalo nṛsiṃhaś ceti mūrtayaḥ || 106 ||
[Analyze grammar]

kīrtiḥ kāntis tuṣṭipuṣṭī dhṛtiḥ śāntiḥ kriyā dayā |
medhā harṣā tathā śraddhā lajjā lakṣmīḥ sarasvatī || 107 ||
[Analyze grammar]

prītī ratir jayā durgā prabhā satyā ca caṇḍikā |
vāṇī vilāsinī caiva vijayā virajā tathā || 108 ||
[Analyze grammar]

viśvā ca vinadā caiva sunandā ca smṛtis tathā |
ṛddhiḥ samṛddhiḥ śuddhiś ca buddhir mūrtir natiḥ kṣamā || 109 ||
[Analyze grammar]

ramomā kledinī klinnā vasudā vasudhā parā |
parāyaṇā ca sūkṣmā ca sandhyā prajñā prabhā niśā || 110 ||
[Analyze grammar]

amoghā vidyutety ekapañcāśat śaktayo matāḥ |
dadāty ayaṃ keśavādinyāso 'trākhilasampadam || 111 ||
[Analyze grammar]

amutrācyutasārūpyaṃ nayati nyāsamātrataḥ || 112 ||
[Analyze grammar]

tad uktaṃ |
dhyātvaivaṃ paramapumāṃsam akṣarair yo vinyased dinam anu keśavādiyuktaiḥ |
medhāyuḥsmṛtidhṛtikīrtikāntilakṣmī |
saubhāgyaiś ciram upabṛṃhito bhavet saḥ || 113 ||
[Analyze grammar]

anyatra ca |
keśavādir ayaṃ nyāso nyāsamātreṇa dehinaḥ |
acyutatvaṃ dadāty eva satyaṃ satyaṃna saṃśayaḥ || 114 ||
[Analyze grammar]

iti |
yaś ca kuryād imaṃ nyāsaṃ lakṣmībījapuraḥsaram |
bhaktiṃ muktiṃ ca bhuktiṃ ca kṛṣṇaṃ ca labhate'cirāt || 115 ||
[Analyze grammar]

tathā coktam |
amum eva ramāpuraḥsaraṃ prabhajed yo manujo vidhiṃ budhaḥ |
samupetya ramāṃ prathīyasīṃ punar ante haritāṃ vrajaty asau || 116 ||
[Analyze grammar]

makārādikakārāntavarṇair yuktaṃ sabindukaiḥ |
namaḥ parāyeti pūrvam ātmane nama ity anu || 117 ||
[Analyze grammar]

nāma jīvāditattvānāṃ nyaset tattatpade kramāt |
nyāsenānena loko hi bhavet pūjādhikāravān || 118 ||
[Analyze grammar]

tatrādau sakale nyasej jīvaprāṇau kalevare |
hṛdaye maty ahaṅkāramanāṃsīti trayaṃ tataḥ || 119 ||
[Analyze grammar]

śabdaṃ sparśaṃ tato rūpaṃ rasaṃ gandhaṃ ca mastake |
mukhe hṛdi ca guhye ca pādayoś ca yathākramam || 120 ||
[Analyze grammar]

śrotraṃ tvacaṃ dṛśaṃ jihvāṃ ghrāṇaṃ svasvapade tataḥ |
vākpāṇipāyūpasthāni svasvapade tathā || 121 ||
[Analyze grammar]

ākāśavāyutejāṃsi jalaṃ pṛthvīṃ ca mūrdhani |
vadane hṛdaye liṅge pādayoś ca yathākramam || 122 ||
[Analyze grammar]

hṛdi hṛtpuṇḍarīkaṃ ca dviṣaṭdvyaṣṭadaśādikam |
kalāvyāpteti pūrvaṃ ca sūryacandrāgnimaṇḍalam |
varṇaiḥ saha sarephaiś ca kramān nyaset sabindukaiḥ || 123 ||
[Analyze grammar]

vāsudevaṃ ṣakāreṇa parameṣṭhiyutaṃ ca ke |
yakāreṇa mukhe saṅkarṣaṇaṃ nyaset pumanvitam || 124 ||
[Analyze grammar]

hṛdi nyasel lakāreṇa pradyumnaṃ viśvasaṃyutam |
aniruddhaṃ nivṛttyāḍhyaṃ vakāreṇa ca guhyake |
nārāyaṇaṃ ca sarvāḍhyaṃ lakāreṇaiva pādayoḥ || 125 ||
[Analyze grammar]

nṛsiṃhaṃ kopasaṃyuktaṃ tadbījenākhilātmani |
tattvanyāso 'yam acirāt kṛṣṇasānnidhyakārakaḥ || 126 ||
[Analyze grammar]

tathā coktam |
atattvavyāptyarūpasya tatprāpter hetunā punaḥ |
tattvanyāsam iti prāhur nyāsatattvavido budhāḥ || 127 ||
[Analyze grammar]

yaḥ kuryāt tattvavinyāsaṃ sa pūto bhavati dhruvam |
tadātmanānupraviśya bhagavān iha tiṣṭhati |
yataḥ sa eva tattvāni sarvaṃ tasmin pratiṣṭhitam || 128 ||
[Analyze grammar]

prāṇāyāmāṃs tataḥ kuryān mūlamantraṃ japan kramāt |
vārau dvau caturaḥ ṣaṭ ca recapūrakakumbhakaḥ || 129 ||
[Analyze grammar]

athavā recakādīṃs tān kuryād vārāṃs tu ṣoḍaśa |
dvātriṃśac ca catuḥṣaṣṭhiṃ kāmabījaṃ japan kramāt || 130 ||
[Analyze grammar]

tathā ca kramadīpikāyām |
recayen mārutaṃ dakṣayā dakṣiṇaḥ pūrayed vāmayā madhyanāḍyā punaḥ |
dhārayed īritaṃ recakāditrayaṃ syāt kalādantavidyākhyamātrācyukam || 131 ||
[Analyze grammar]

sanātanaḥ tad eva kramadīpikoktyā saṃvādayan tatraiva kiṃcid viśeṣaṃ ca darśayatirecayed iti |
dakṣayā dakṣiṇanāḍyā dakṣiṇaḥ vidvān janaḥ |
madhyanāḍyā suṣumṇayā dhārayet |
evaṃ recakapūrakakumbhakākhyaṃ trayaṃ syāt |
recakādiṣu triṣu krameṇāvadhikālam āhakalāḥ ṣoḍaśa |
dantā dvātriṃśat |
vidyāś catuḥṣaṣṭhis tattatsaṅkhyakamātrātmakam ity arthaḥ |
mātrā cavāmāṅguṣṭhena vāmakaniṣṭhādyaṅgulīnāṃ pratyekaṃ parvatrayasamparkakālaḥ |
vāmahastena vāmajānumaṇḍalasya prādakṣiṇyena sparśakālo vā |
tatrāpy aṅguliniyamo 'py uktaḥ |
kaniṣṭhānāmikāṅguṣṭhair yan nāsāpuṭadhāraṇam |
prāṇāyāmaḥ sa vijñeyas tarjanīmadhyame vinā || iti |
tatraiva |
purato japasya parato 'pi vihitam atha tattrayaṃ budhaiḥ |
ṣoḍaśa ya iha samācared dineśaḥ paripūyate sa khalu māsato 'ṃ haṃsaḥ || 132 ||
[Analyze grammar]

tato nijatanūm eva pūjāpīṭhaṃ prakalpayet |
pīṭhasyādhāraśaktyādīn nyaset svāṅgeṣu tāravat || 133 ||
[Analyze grammar]

ādhāraśaktiṃ prakṛtiṃ kūrmānantau ca tatra tu |
pṛthivīṃ kṣīrasindhuṃ ca śvetadvīpaṃ ca bhāsvaram || 134 ||
[Analyze grammar]

śrīratnamaṇḍapaṃ caiva kalpavṛkṣaṃ tathā hṛdi |
nyaset pradakṣiṇatvena dharmajñāne tato 'ṃsayoḥ || 135 ||
[Analyze grammar]

ūrvor vairāgyam aiśvaryaṃ tathaivādharmam ānane |
trike'jñānam avairāgyam anaiśvaryaṃ ca pārśvayoḥ || 136 ||
[Analyze grammar]

hṛdabje'nantapadmaṃ ca sūrySTARTuśikhinān tathā |
maṇḍalāni kramād varṇaiḥ praṇavāṃśaiḥ sabindukaiḥ || 137 ||
[Analyze grammar]

sattva rajas tamaś cātmāntarātmānau ca tatra hi |
paramātmānam apy ātmādyādyavarṇaiḥ sabindukaiḥ || 138 ||
[Analyze grammar]

jñānātmānaṃ ca bhuvaneśvarībījena saṃyutam |
tasyāṣṭadikṣu madhye'pi navaśaktīś ca dikkramāt || 139 ||
[Analyze grammar]

tāś coktāḥ |
vimalotkarṣiṇī jñānā kriyā yogeti śaktayaḥ |
prahvī satyā tatheśānānugrahā navam smṛtā || 140 ||
[Analyze grammar]

iti |
nyaset tadupariṣṭhāc ca pīṭhamantraṃ yathoditam |
ṛṣyādikaṃ smared asyāṣṭādaśārṇamanos tataḥ || 141 ||
[Analyze grammar]

jñeyāś caikāntibhiḥ kṣīrasamudrādicatuṣṭayam |
kramāc chrīmathurāvṛndāvanaṃ tatkuñjanīpakāḥ || 142 ||
[Analyze grammar]

tathā ca brahmasaṃhitāyām ādipuruṣarahasyastotre |
sa yatra kṣīrābdhiḥ sravati surabhībhyaś ca sumahān nimeṣārdhākhyo vā vrajati na hi yatrāpi samayaḥ |
bhaje śvetadvīpaṃ tam aham iha golokam iti yaṃ vidantas te santaḥ kṣitiviralacārāḥ katipaye || 143 ||
[Analyze grammar]

kramadīpikāyāṃ |
evaṃ hṛdayaṃ bhagavān viṣṇuḥ sarvānvitaś ca bhūtātmā |
ṅe'ntāḥ savāsudevāḥ sarvātmayutaṃ ca saṃyogaṃ || 144 ||
[Analyze grammar]

yogāvadhaś ca padmaṃ pīṭhāt ṅeyuto natiś cānte |
pīṭhamahāmanur vyaktaḥ paryāpto 'yaṃ saparyāsu || 145 ||
[Analyze grammar]

sanātanaḥ tāraḥ praṇavaḥ |
tato hṛdayaṃ nama iti padam |
tataś ca bhagavān iti viṣṇur iti ca |
sarvānvitaḥ sarvaśabdayukto bhūtātmā sarvabhūtātmeti |
ete trayaḥ savāsudevā vāsudevasahitāḥ pratyekaṃ ṅe'ntāś caturthyantāḥ |
tataś ca sarvātmanā yutaṃ saṃyogaṃ sarvātmasaṃyogam iti napuṃsakatvam ārṣam |
tataś ca yogasyāvadhau ante padmaṃ yogapadmam iti |
tadante ṅeyuktaś caturthyantaḥ pīṭhātmā |
tadante ca natiḥ namaḥśabdaḥ |
evaṃ oṃ namo bhagavate viṣṇave sarvabhūtātmane vāsudevāya sarvātmasaṃyogayogapadmapīṭhātmane nama iti siddham |
tathā ca śāradātilake |
namo bhagavate brūyād viṣṇave ca padaṃ vadet |
sarvabhūtātmane vāsudevāyeti vadet tataḥ || sarvātmasaṃyogapadād yogapadmapadaṃ punaḥ |
pīṭhātmane hṛdanto 'yaṃ mantras tārādir īritaḥ || iti |
sanatkumārakalpe ca |
oṃ namaḥ padam ābhāṣya tathā bhagavatepadam |
vāsudevāya ity uktvā sarvātmeti padaṃ tathā || saṃyogayogety uktvā ca tathā pīṭhātmane padam |
vahnipatnīsamāyuktaḥ pīṭhamantra itīritaḥ || iti || 144 ||
[Analyze grammar]

oṃ aṣṭādaśākṣaramantrasya śrīnārada ṛṣir gāyatrīcchandaḥ sakalalokamaṅgalo nandatanayo devatā hrīṃ bījaṃ svāhā śaktiḥ kṛṣṇaḥ prakṛtir durgādhiṣṭhātrī devatā abhimatārthe viniyogaḥ || 146 ||
[Analyze grammar]

tathā ca saṃmohanatantre śivomāsaṃvāde |
ṛṣir nārada ity ukto gāyatrīcchanda ucyate |
gopaveśadharaḥ kṛṣṇo devatā parikīrtitaḥ || 147 ||
[Analyze grammar]

bījaṃ manmathasaṃjñaṃ tu priyā śaktir havir bhujaḥ |
tvam eva parameśāni asyādhiṣṭhātṛdevatā |
caturvargaphalāvāptyai viniyogaḥ prakīrtitaḥ || 148 ||
[Analyze grammar]

catuś caturbhir varṇaiś ca catvāry aṅgāni kalpayet |
dvābhyām astrākhyam aṅgaṃ ca tasyety aṅgāni pañca vai || 149 ||
[Analyze grammar]

nyasyec ca vyāpakatvena tāny aṅgāni karadvaye |
tāny aṅgulīṣu pañcātha kecid varṇān svarān api || 150 ||
[Analyze grammar]

te coktāḥ |
drāvaṇakṣobhaṇākarṣavaśīkṛtsrāvaṇās tathā |
śoṣaṇo mohanaḥ sandīpanas tāpanamādanau || 151 ||
[Analyze grammar]

iti |
kiṃ ca |
namo 'ntaṃ hṛdayaṃ cāṅgaiḥ śiraḥ svāhānvitaṃ śikhām |
vaṣaḍyutaṃ ca kavacaṃ huṃyugastraṃ ca phaḍyutam || 152 ||
[Analyze grammar]

nyasyanti punar aṅguṣṭhau tarjanyau madhyame tathā |
anāmike kaniṣṭhe ca kramād aṅgaiś ca pañcabhiḥ || 153 ||
[Analyze grammar]

punaś ca hṛdayādīni tathāṅguṣṭhādikāni ca |
nyasyanti yugapat sarvāṇy aṅgais taiḥ pañcabhiḥ kramāt || 154 ||
[Analyze grammar]

nyasyanti ca ṣaḍaṅgāni hṛdayādīni tanmanoḥ |
hṛdayādiṣu caiteṣāṃ pañcaikaṃ dikṣu ca kramāt || 155 ||
[Analyze grammar]

ṣaḍaṅgāni coktāni sammohanatantre sanatkumārakalpe |
varrṇenaikena hṛdayaṃ tirbhir eva śiro matam |
caturbhiś ca śikhā proktā tathaiva kavacaṃ matam |
netraṃ tathā caturvarṇair astraṃ dvābhyāṃ tathā matam || 156 ||
[Analyze grammar]

iti |
tataś cāpādam ākeśān nyased dorbhyām imaṃ manum |
vārāṃs trīn vyāpakatvena nyasec ca praṇavaṃ sakṛt || 157 ||
[Analyze grammar]

tato 'ṣṭādaśavarṇāṃś ca mantrasyāsya yathākramam |
dante lalāṭe bhrūmadhye karṇayor netrayor dvayoḥ || 158 ||
[Analyze grammar]

nāsayor vadane kaṇṭhe hṛdi nābhau kaṭidvaye |
guhye jānudvaye caikaṃ nyased ekaṃ ca pādayoḥ || 159 ||
[Analyze grammar]

santo nyasyanti tārādinamo 'nantāṃs tān sabindukān |
śrīśaktikāmabījaiś ca sṛṣṭyādikramato 'pare || 160 ||
[Analyze grammar]

atha padanyāsaḥ tāraṃ śirasi vinyasya pañca mantrapadāni ca |
nyasen netradvaye vaktre hṛdguhyāṅghriṣu ca kramāt || 161 ||
[Analyze grammar]

dehe ca vyāpakatvena nyaset tāny akhile punaḥ |
kecit tāni namo 'ntāni nyasyanty ādyākṣaraiḥ saha || 162 ||
[Analyze grammar]

svāhāntāni tathā trīṇi saṃmiśrāṇy uttarottaraiḥ |
guhyād galān mastakāc ca vyāpayya caraṇāvadhi || 163 ||
[Analyze grammar]

nyāso 'tra jñānaniṣṭhānāṃ guhyādiviṣayas tu yaḥ |
svasvavarṇatanoḥ kāryas tattadvarṇeṣu vaiṣṇavaiḥ || 164 ||
[Analyze grammar]

ṛṣyādīn saptabhāgāṃś ca nyased asya manoḥ kramāt |
mūrdhāsyahṛtsu kucayoḥ punar hṛdi punar hṛdi || 165 ||
[Analyze grammar]

veṇvākhyāṃ vanamālākhyāṃ mudrāṃ sandarśayet tataḥ |
śrīvatsākhyāṃ kaustubhākhyāṃ blivākhyāṃ ca manoramām || 166 ||
[Analyze grammar]

itthaṃ naystaśarīraḥ san kṛtvā digbandhanaṃ punaḥ |
karakacchapikāṃ kṛtvā dhāyec chrīnandanandanam || 167 ||
[Analyze grammar]

atha prakaṭasaurabhodgalitamādhvikotphullasat |
prasūnanavapallavaprakaranamraśākhair drumaiḥ |
praphullanavamañjarīlalitavallarīveṣṭitaiḥ smarec chiśiritaṃ śivaṃ sitamatis tu vṛndāvanam || 168 ||
[Analyze grammar]

vikāsisumanorasāsvādanamañjulaiḥ sañcarac |
chilīmukhamukhodgatair mukharitāntaraṃ jhaṅkṛtaiḥ |
kapotaśukaśārikāparabhṛtādibhiḥ patribhir virāṇitam itas tato bhujagaśatrunṛtyākulam || 169 ||
[Analyze grammar]

kalindaduhituś calallaharivipruṣāṃ vāhibhir vinidrasarasīruhodararajaścayoddhūsaraiḥ |
pradīpitamanobhavavrajavilāsinīvāsasāṃ vilolanavihāribhiḥ satatasevitaṃ mārutaiḥ || 170 ||
[Analyze grammar]

pravālanavapallavaṃ marakatacchadaṃ vajramauktika prakarakorakaṃ kamalarāganānāphalam |
sthaviṣṭham akhilartubhiḥ satatasevitaṃ kāmadaṃ tadantar api kalpakāṅghripam udañcitaṃ cintayet || 171 ||
[Analyze grammar]

suhemaśikharāvaler uditabhānuvad bhāsvaram adho 'sya kanakasthalīm amṛtaśīkarāsāriṇaḥ |
pradīptamaṇikuṭṭimāṃ kusumareṇupuñjojjvalāṃ smaret punar atandrito vigataṣaṭtaraṅgāṃ budhaḥ || 172 ||
[Analyze grammar]

tadratnakuṭṭimaniviṣṭamahiṣṭhayoga |
pīṭhe'ṣṭapatram araṇaṃ kamalaṃ vicintya |
udyadvirocanasarocir amuṣya madhye sañcintayet ssukhaniviṣṭam atho mukundam || 173 ||
[Analyze grammar]

sūtrāmaratnadalitāñjanameghapuñja |
pratyagranīlajalajanmasamānabhāsam |
susnigdhanīlaghanakuñcitakeśajālaṃ rājanmanojñaśitikaṇṭhaśikhaṇḍacūḍam || 174 ||
[Analyze grammar]

rolambalālitasuradrumasūnakalpi |
tottaṃsam utkacanavotpalakarṇapūram |
lolālakasphuritabhālatalapradīpta |
gorocanātilakam uccalacillimālam || 175 ||
[Analyze grammar]

āpūrṇaśāradagatāṅkaśaśāṅkabimba |
kāntānanaṃ kamalapatraviśālanetram |
ratnasphuranmakarakuṇḍalaraśmidīpta |
gaṇḍasthalīmukuram unnatacārunāsam || 176 ||
[Analyze grammar]

sindūrasundaratarādharam indukunda |
mandāramandahasitadyutidīpitāṅgam |
vanyapravālakusumapracayāvakpta |
graiveyakojjvalamanoharakambukaṣṭham || 177 ||
[Analyze grammar]

mattabhramadbhramarajuṣṭavilambamāna |
santānakaprasavadāmapariṣkṛtāṃsam |
hārāvalībhagaṇarājitapīvaroro |
vyomasthalīlalitakaustubhabhānumantam || 178 ||
[Analyze grammar]

śrīvatsalakṣaṇasulakṣitam unnatāṃsa |
ājānupīnaparivṛttasujātabāhum |
ābandhurodaram udāragabhīranābhiṃ bhṛṅgāṅganānikaravañjularomarājim || 179 ||
[Analyze grammar]

nānāmaṇipraghaṭitāṅgadakaṅkaṇormi |
graiveyasārasananūpuratundabandham |
divyāṅgarāgaparipiñjaritāṅgayaṣṭi |
māpītavastraparivītanitambabimbam || 180 ||
[Analyze grammar]

cārūrujānumanuvṛttamanojñajaṅghaṃ kāntonnataprapadaninditakūrmakāntim |
māṇikyadarāṇalasannakharājirāja |
dratnāṅgulicchadanasundarapādapadmam || 181 ||
[Analyze grammar]

matsyāṅkuśāradaraketuyavābjavajra |
saṃlakṣitāruṇakarāṅghritalābhirāmam |
lāvaṇyasārasamudāyavinirmitāṅga |
saundaryanirjitamanobhavadehakāntim || 182 ||
[Analyze grammar]

āsyāravindaparipūritaveṇurandhra |
lolatkarāṅgulisamīritadivyarāgaiḥ |
śaśvadddravīkṛtavikṛṣṭasamastajantu |
santānasantatim anantasukhāmburāśim || 183 ||
[Analyze grammar]

gobhir mukhāmbujavilīnavilocanābhi |
rūdhobharaskhalitamantharamandagābhiḥ |
dantāgradaṣṭapariśiṣṭatṛṇāṅkurābhi |
rālambvāladhilatābhivītam || 184 ||
[Analyze grammar]

saprasravastanavicūṣaṇapūrṇaniśca |
lāsyāvaṭakṣaritapheniladugdhamugdhaiḥ |
veṇupravartitamanoharamandragīta |
dattoccakarṇayugalair api tarṇakaiś ca || 185 ||
[Analyze grammar]

pratyagraśṛṅgamṛdumastakasamprahāra |
saṃrambhavalganavilolakhurāgrapātaiḥ |
āmedurair bahulasāsnagalair udagra |
pucchaiś ca vatsataravatsatarīnikāyaiḥ || 186 ||
[Analyze grammar]

hambāravakṣubhitadigvalayair mahadbhi |
rapy ukṣabhiḥ pṛthukakudbharabhārakhinnaiḥ |
uttambhitaśrutipuṭīparivītavaṃśa |
dhvānāmṛtoddhatavikāśiviśālaghoṇaiḥ || 187 ||
[Analyze grammar]

gopaiḥ samānaguṇaśīlavayovilāsa |
veśaiś ca mūrcchitakalasvanaveṇuvīṇaiḥ |
mandroccatārapaṭagānaparair vilola |
dorvallarīlalitalāsyavidhānadakṣaiḥ || 188 ||
[Analyze grammar]

jaṅghāntapīvarakaṭīrataṭīnibaddha |
vyālolakiṅkiṇighaṭāraṭitair aṭadbhiḥ |
mugdhais tarakṣunakhakalpitakaṇṭhabhūṣai |
ravyaktamañjuvacanaiḥ pṛthukaiḥ parītam || 189 ||
[Analyze grammar]

atha sulalitagopasundarīṇāṃ pṛthunivivīṣanitambamantharāṇām |
gurukucabharabhaṅgurāvalagna |
trivalivijṛmbhitaromarājibhājām || 190 ||
[Analyze grammar]

tadatimadhuracāruveṇuvādyā |
mṛtarasapallavitāṅgajāṅghripāṇām |
mukulavisararamyarūḍharomo |
dgamasamalaṅkṛtagānavallarīṇām || 191 ||
[Analyze grammar]

tadatiruciramandahāsacandrā |
tapaparijṛmbhitarāgavārirāśeḥ |
taralatarataraṅgabhaṅgavipruṭ |
prakarasamaśramabindusantatānām || 192 ||
[Analyze grammar]

tadatilalitamandacillicāpa |
cyutaniśitekṣaṇamārabāṇavṛṣṭyā |
dalitasakalamarmavihvalāṅga |
pravisṛtaduḥsahavepathuvyathānām || 193 ||
[Analyze grammar]

tadatisubhagakamrarūpaśobhā |
mṛtarasapānavidhānalālasābhyām |
praṇayasalilapūravāhinīnā |
malasavilolavilocanāmbujābhyām || 194 ||
[Analyze grammar]

visraṃsatkavarīkalāpavigalatphullaprasūnasrava |
nmādhvīlampaṭacañcarīkaghaṭayā saṃsevitānāṃ muhuḥ |
māronmādamadaskhalanmṛdugirām ālolakāñcyucchvasa |
nnīvīviślathamānacīnahicayāntāvirnitambatviṣām || 195 ||
[Analyze grammar]

skhalitalalitapādāmbhojamandābhidhāna |
kvaṇitamaṇitulākoṭyākulāśāmukhānām |
caladadharadalānāṃ kuṭnalapakṣmalākṣi |
dvayasarasiruhāṇām ullasatkuṇḍalānām || 196 ||
[Analyze grammar]

drāghiṣṭhaśvasanasamīraṇābhitāpa |
pramlānībhavadaruṇoṣṭhapallavānām |
nānopāyanavilasatkarāmbujānā |
mālībhiḥ satataniṣevitaṃ samantāt || 197 ||
[Analyze grammar]

tāsām āyatalolanīlanayanavyākoṣanīlāmbuja |
sragbhiḥ samparipūjitākhilatanuṃ nānāvinodāspadam |
tanmugdhānanapaṅkajapravigalanmādhvīrasāsvādinīṃ vibhrāṇaṃ praṇayonmadākṣimadhukṛnmālāṃ manohāriṇīm || 198 ||
[Analyze grammar]

gopagopīpaśūnāṃ bahiḥ smared agrato 'sya gīrvāṇaghaṭām |
vittārthinīṃ viriñcitrinayana |
śatamanyupūrvikāṃ stotraparām || 199 ||
[Analyze grammar]

taddakṣiṇato muninikaraṃ dṛḍhadharmavāñcham ānāyaparam |
yogīndrān atha pṛṣṭhe mumukṣa |
māṇān samādhinā sanakādyān || 200 ||
[Analyze grammar]

savye sakāntān atha yakṣasiddha |
gandharvavidyādharacāraṇāṃś ca |
sakinnarān apsarasaś ca mukhyāḥ kāmārthino nartanagītavādyaiḥ || 201 ||
[Analyze grammar]

śaṅkhSTARTukundadhavalaṃ sakalāgamajñaṃ saudāmanītatipiṅgajaṭākalāpam |
tatpādapaṅkajagatām acalāṃ ca bhaktiṃ vāñchantam ujjhitatarānyasamastasaṅgam || 202 ||
[Analyze grammar]

nānāvidhaśrutigaṇānvitasaptarāga |
grāmatrayīgatamanoharamūrchanābhiḥ |
samprīṇayantam uditābhir amuṃ mahatyā sañcintayen nabhasi dhātṛsutaṃ munīndram || 203 ||
[Analyze grammar]

śrīgautamīyatantre |
atha dhyānaṃ pravakṣyāmi sarvapāpapraṇāśanam |
pītāmbaradharaṃ kṛṣṇaṃ puṇḍarīkanibhekṣaṇam || 204 ||
[Analyze grammar]

raktanetrādharaṃ raktapāṇapādanakhaṃ śubham |
kaustubhodbhāsitoraskaṃ nānāratnavibhūṣitam || 205 ||
[Analyze grammar]

taddhāmavilasanmuktābaddhahāropaśobhitam |
nānāratnaprabhodbhāsimukuṭaṃ divyatejasam || 206 ||
[Analyze grammar]

harakeyūrakaṭakakuṇḍalaiḥ parimaṇḍitam |
śrīvatsavakṣasaṃ cārunūpurādyupaśobhitam || 207 ||
[Analyze grammar]

nānāratnavicitraiś ca kaṭisūtrāṅgulīyakaiḥ |
barhipatrakṛtāpīḍaṃ vanyapuṣpair alaṅkṛtam || 208 ||
[Analyze grammar]

kadambakusumodbaddhavanamālāvibhūṣitam |
sacandratārakānandivimalāmbarasannibham || 209 ||
[Analyze grammar]

veṇuṃ gṛhītvā hastābhyāṃ mukhe saṃyojya saṃsthitam |
gāyantaṃ divyagānaiś ca goṣṭhamadhyagataṃ harim || 210 ||
[Analyze grammar]

svargād iva paribhraṣṭakanyakāśataveṣṭitam |
sarvalakṣaṇasampannaṃ saundaryeṇābhiśobhitam || 211 ||
[Analyze grammar]

mohanaṃ sarvagopīnāṃ sarvāsāṃ ca gavām api |
lelihyamānaṃ vatsaiś ca dhenubhiś ca samantataḥ || 212 ||
[Analyze grammar]

siddhagandharvayakṣaiś ca apsarobhir vihaṅgamaiḥ |
surāsuramanuṣyaiś ca sthāvaraiḥ pannagair api || 213 ||
[Analyze grammar]

mṛgair vidyādharaiś caiva vīkṣyamāṇaṃ suvismitaiḥ |
nāradena vaśiṣṭhena viśvāmitreṇa dhīmatā || 214 ||
[Analyze grammar]

parāśareṇa vyāsena bhṛguṇāṅgirasā tathā |
dakṣeṇa śaunakātribhyāṃ siddhena kapilena ca || 215 ||
[Analyze grammar]

sanakādyir munīndraiś ca brahmalokagatair api |
anyair api ca saṃyuktaṃ kṛṣṇaṃ dhyāyed aharniśam || 216 ||
[Analyze grammar]

saṅkṣepeṇa śrīsanatkumārakalpe'pi |
avyān mīlatkalāyadyutir ahiripupicchollasat keśajālo gopīnetrotsavārādhitalalitavapur gopagovṛndavītaḥ |
śrīmadvaktrāravindapratisahitśaśāṅkākṛtiḥ pītavāsā devo 'sau veṇunādakṣapitajanadhṛtir devakīnandano naḥ || 217 ||
[Analyze grammar]

iti |
dhyātvaivaṃ bhagavantaṃ taṃ samprārthya ca yathāsukham |
ādau sampūjayet sarvair upacāraiś ca mānasaiḥ || 218 ||
[Analyze grammar]

lekhyā ye bahir arcayām upacārā vibhāgaśaḥ |
te sarve'py antararcāyāṃ kalpanīyā yathāruci || 219 ||
[Analyze grammar]

śrīnāradapañcarātre |
svāgataṃ devadeveśa sannidhau bhava keśava |
gṛhāṇa mānasīṃ pūjāṃ yathārthaparibhāvinām || 220 ||
[Analyze grammar]

iti |
athopacārair bāhyaiś ca svātmany eva sthitaṃ prabhum |
pūjayan sthāpayed ādau śaṅkhaṃ satsampradāyataḥ || 221 ||
[Analyze grammar]

svasya vāmāgrato bhūmāv ullikhya tryasramaṇḍalam |
tatāstrakṣālitaṃ śaṅkhaṃ sādhāraṃ sthāpayed budhaḥ || 222 ||
[Analyze grammar]

śaṅkhe hṛdayamantreṇa gandhapuṣpākṣatān kṣipet |
vyutkrāntair mātṛkārṇais taṃ śiro 'ntaiḥ kena pūrayet || 223 ||
[Analyze grammar]

sabindunā makāreṇa tadādhāre'gnimaṇḍalam |
sampūjayed akāreṇa śaṅkhe cādityamaṇḍalam || 224 ||
[Analyze grammar]

ukāreṇa jale somamaṇḍalaṃ ca tathārcayet |
tīrthamantreṇa tīrthāny āvāhayec cārkamaṇḍalam || 225 ||
[Analyze grammar]

kṛṣṇaṃ cāvāhya hṛtpadmād gālinīṃ śikhayekṣayet |
netramantreṇa vīkṣyāntaḥ kavacenāvaguṇṭhaet || 226 ||
[Analyze grammar]

kuryān nyāsaṃ jale mūlamantrāṅgānāṃ tato diśaḥ |
baddhvāstreṇāmṛtīkuṛyād atha taddhenumudrayā || 227 ||
[Analyze grammar]

tac cakramudrayā rakṣya salilaṃ matsyamudrayā |
ācchādya saṃspṛśan śaṅkhaṃ japen mūlaṃ tato 'ṣṭaśaḥ || 228 ||
[Analyze grammar]

taj jalaṃ prokṣaṇīpātre kiṃcit kṣiptvā trir ukṣayet |
taccheṣeṇārcanadravyajātāni svatanūm api || 229 ||
[Analyze grammar]

kaniṣṭhāṅguṣṭhakau saktau karayor itaretaram |
tarjanīmadhyamānāmāḥ saṃhatā bhugnasajjitāḥ |
mudraiṣā gālinī proktā śaṅkhasyopari cālitā || 230 ||
[Analyze grammar]

tato 'pāsyāvaśiṣṭāntaḥ śaṅkhaṃ vardhanikāmbunā |
punar āpūrya kṛṣṇāgre nyased ācārataḥ satām || 231 ||
[Analyze grammar]

gurūn mūrdhni gaṇeśaṃ ca mūlādhāre'bhipūjya tam |
pīṭhanyāsānusāreṇa pīṭhaṃ cātmani pūjayet || 232 ||
[Analyze grammar]

tato japan kāmabījaṃ tristhānasthaṃ paraṃ mahaḥ |
mūlamantrātmakaṃ bījenaikībhūtaṃ vicintayet || 233 ||
[Analyze grammar]

tac ca pañcāṅganyāsena sākāraṃ sveṣṭadaivatam |
vicintya pañcāṅgādīni nyasyet tasmin yathātmani || 234 ||
[Analyze grammar]

kuryur bhagavati prādurbhūte kṛṣṇe ca vaiṣṇavāḥ |
tattannyāsān abhedāya manor bhagavatā saha || 235 ||
[Analyze grammar]

kecin nyasyanti tattvādīnn avyaktāni yathoditam |
mantrārṇaiḥ svarahaṃsādyair bhūṣaṇeṣu prabhoḥ kramāt || 236 ||
[Analyze grammar]

tasmin pīṭhe tam āsīnaṃ bhagavantaṃ vibhāvayan |
āsanādyais tu puṣpāntair yathāvidhy arcayed budhaḥ || 237 ||
[Analyze grammar]

tato mukhe'rcayed veṇuṃ vanamālāṃ ca vakṣasi |
dakṣastanordhve śrīvatsaṃ savye tatraiva kaustubham || 238 ||
[Analyze grammar]

vaiṣṇavaś candanenāmum ālipyopakaniṣṭhayā |
prāgvad dīpaśikhākāratilakāni dviṣaḍ likhet || 239 ||
[Analyze grammar]

yathoktaṃ pañcabhiḥ puṣpāñjalibhiś cābhipūjya tam |
dhūpaṃ dīpaṃ ca naivedyaṃ mukhavāsādi cārpayet || 240 ||
[Analyze grammar]

gītādibhiś ca santoṣya kṛṣṇam asmai tato 'khilam |
aśakto bahir arcāyām arpayej japam ācaret || 241 ||
[Analyze grammar]

vaiṣṇavatantre |
aśvamedhasahasrāṇi vājapeyaśatāni ca |
ekasya dhyānayogasya kalāṃ nārhanti ṣoḍaśīm || 242 ||
[Analyze grammar]

bṛhannāradīye śrīvāmanaprādurbhāve |
yannāmoccāraṇād eva sarve naśyanty upadravāḥ |
stotrair vā arhaṇābhir vā kim u dhyānena kathyate || 243 ||
[Analyze grammar]

nāradapañcarātre śrībhagavannāradasaṃvāde |
ayaṃ yo mānaso yāgo jarāvyādhibhayāpahaḥ |
sarvapāpaughaśamano bhāvābhāvakaro dvija |
satatābhyāsayogena dehabandhād vimocayet || 244 ||
[Analyze grammar]

yaś caivaṃ parayā bhaktyā sakṛt kuryān mahāmate |
kramoditena vidhinā tasya tuṣyāmy ahaṃ mune || 245 ||
[Analyze grammar]

smaraṇadhyānayoḥ pūrvaṃ māhātmyaṃ likhitaṃ ca yat |
jñeyaṃ tadadhikaṃ cātrāntaryāgāṅgatayā tayoḥ || 246 ||
[Analyze grammar]

evaṃ yathāsampradāyaṃ śaktyā yāvanmanaḥsukham |
antaḥpūjāṃ vidhāyādāv ārabheta bahis tataḥ || 247 ||
[Analyze grammar]

tathā coktaṃ nāradena |
dhyātvā ṣoḍaśasaṅkhyātair upacāraiś ca mānasaiḥ |
samyag ārādhanaṃ kṛtvā bāhyapūjāṃ samācaret || 248 ||
[Analyze grammar]

atha bahiḥpūjā anujñāṃ dehi bhagavan bahir yoge mama prabho |
śrīkṛṣṇam ity anujñāpya bahiḥ pūjāṃ samācaret || 249 ||
[Analyze grammar]

tatra tv anekaśaḥ santi pūjāsthānāni tatra ca |
śrīmūrtayo bahuvidhāḥ śālagrāmaśilās tathā || 250 ||
[Analyze grammar]

saṃmohanatantre |
śālagrāme manau yantre sthaṇḍile pratimādiṣu |
hareḥ pūjā tu kartavyā kevale bhūtale na tu || 251 ||
[Analyze grammar]

ekādaśaskandhe śrīmaduddhavasaṃvāde |
sūryo 'gnir brāhmaṇā gāvo vaiṣṇavaḥ khaṃ maruj jalam |
bhūr ātmā sarvabhūtāni bhadra pūjāpadāni me || 252 ||
[Analyze grammar]

sūrye tu vidyayā trayyā haviṣāgnau yajeta mām |
ātithyena tu viprāgrye goṣv aṅga yavasādinā || 253 ||
[Analyze grammar]

vaiṣṇave bandhusatkṛtyā hṛdi khe dhyānaniṣṭhayā |
vāyau mukhyadhiyā toye dravyais toyapuraḥsaraiḥ || 254 ||
[Analyze grammar]

sthaṇḍile mantrahṛdayair bhogair ātmānam ātmani |
kṣetrajñaṃ sarvabhūteṣu samatvena yajeta mām || 255 ||
[Analyze grammar]

dhiṣṇyeṣv ity eṣu madrūpaṃ śaṅkhacakragadāmbujaiḥ |
yuktaṃ caturbhujaṃ śāntaṃ dhyāyann arcet samāhitaḥ || 256 ||
[Analyze grammar]

tatraiva |
śailī dārumayī lauhī lepyā lekhyā ca saikatī |
manomayī maṇimayī pratimāṣṭavidhā matā || 257 ||
[Analyze grammar]

calācaleti dvividhā pratiṣṭhā jīvamandiram |
udvāsāvāhane na staḥ sthirāyām uddhavārcane || 258 ||
[Analyze grammar]

asthirāyāṃ vikalpaḥ syāt sthaṇḍile tu bhaved dvayam |
snapanaṃ tv avilepyāyām anyatra parimārjanam || 259 ||
[Analyze grammar]

gopālamantroddiṣṭatvāt tacchrīmūrtir apekṣitā |
tathāpi vaiṣṇavaprītyai lekhyāḥ śrīmūrtayo 'khilāḥ || 260 ||
[Analyze grammar]

śrīhayaśīrṣapañcarātre śrībhagavatśrīhayaśīrṣabrahmasaṃvāde |
ādimūrtir vāsudevaḥ saṅkarṣaṇam athāsṛjat |
caturmūrtiḥ paraṃ proktaṃ ekaiko bhidyate tridhā |
keśavādiprabhedena mūrtidvādaśakaṃ smṛtam || 261 ||
[Analyze grammar]

paṅkajaṃ dakṣiṇe dadyāt pāñcajanyaṃ tathopari |
vāmopari gadā yasya cakraṃ cādho vyavasthitam |
ādimūrtes tu bhedo 'yaṃ keśaveti parkīrtyate || 262 ||
[Analyze grammar]

adharottarabhāvena kṛtam etat tu yatra vai |
nārāyaṇākhyā sā mūrtiḥ sthāpitā bhuktimuktidā || 263 ||
[Analyze grammar]

savyādhaḥ paṅkajaṃ yasya pāñcajanyaṃ tathopari |
dakṣiṇordhve gadā yasya cakraṃ cādho vyavasthitam |
ādimūrtes tu bhedo 'yaṃ mādhaveti prakīrtyate || 264 ||
[Analyze grammar]

dakṣiṇādhaḥsthitaṃ cakraṃ gadā yasyopari sthitā |
vāmordhvasaṃsthitaṃ padmaṃ śaṅkhaṃ cādho vyavasthitam |
saṅkarṣaṇasya bhedo 'yaṃ govindeti prakīrtyate || 265 ||
[Analyze grammar]

dakṣiṇopari padmaṃ tu gadā cādho vyavasthitā |
saṅkarṣaṇasya bhedo 'yaṃ viṣṇur ity abhiśabdyate || 266 ||
[Analyze grammar]

dakṣiṇopari śaṅkhaṃ ca cakraṃ cādhaḥ pradarśyate |
vāmopari tathā padmaṃ gadā cādhaḥ pradarśyate |
madhusūdananāmāyaṃ bhedaḥ saṅkarṣaṇasya ca || 267 ||
[Analyze grammar]

vāmordhvasaṃsthitaṃ cakram adhaḥ śaṅkhaṃ pradarśyate |
brahmāṇḍagaṃ vāmapādaṃ dakṣiṇaṃ śeṣapṛṣṭhagam || 269 ||
[Analyze grammar]

dakṣiṇordhvaṃ sahasrāraṃ pāñcajanyam adhaḥsthitam |
saptatālapramāṇena vāmanaṃ kārayet sadā || 270 ||
[Analyze grammar]

ūrdhvaṃ dakṣiṇataś cakram adhaḥ padmaṃ vyavasthitam |
padmā padmakarā vāme pārśve yasya vyavasthitā || 271 ||
[Analyze grammar]

sthito vāpy upaviṣṭo vā sānurāgo vilāsavān |
pradyumnasya hi bhedo 'yaṃ śrīdhareti prakīrtyate || 272 ||
[Analyze grammar]

dakṣiṇordhvaṃ mahācakraṃ kaumudī tadadhaḥsthitā |
vāmordhve nalinaṃ yasya adhaḥ śaṅkhaṃ virājate |
hṛṣīkeśeti vijñeyaḥ sthāpitaḥ sarvakāmadaḥ || 273 ||
[Analyze grammar]

dakṣiṇordhve puṇḍarīkaṃ pāñcajanyam adhas tathā |
vāmordhve saṃsthitaṃ cakraṃ kaumudī tadadhaḥsthitā |
padmanābheti sā mūrtiḥ sthāpitā mokṣadāyinī || 274 ||
[Analyze grammar]

dakṣiṇordhve pāñcajanyam adhastāt tu kuśeśayam |
savordhve kaumudī caiva hetirājam adhaḥsthitam |
aniruddhasya bhedo 'yaṃ dāmodara iti smṛtaḥ || 275 ||
[Analyze grammar]

eteṣāṃ tu striyau kārye padmavīṇādhare śubhe || 276 ||
[Analyze grammar]

siddhārthasaṃhitāyām |
vāsudevo gadāśaṅkhacakrapadmadharo mataḥ |
padmaṃ śaṅkhaṃ tathā cakraṃ gadāṃ vahati keśavaḥ || 277 ||
[Analyze grammar]

śaṅkhaṃ padmaṃ gadāṃ cakraṃ dhatte nārāyaṇaḥ sadā |
gadāṃ cakraṃ tathā śaṅkhaṃ padmaṃ vahati mādhavaḥ || 278 ||
[Analyze grammar]

cakraṃ padmaṃ tathā śaṅkhaṃ gadāṃ ca puruṣottamaḥ |
padmaṃ kaumodakīṃ śaṅkhaṃ cakraṃ dhatte'py adhokṣajaḥ || 279 ||
[Analyze grammar]

saṅkarṣaṇo gadāśaṅkhapadmacakradharaḥ smṛtaḥ |
cakraṃ gadāṃ padmaśaṅkhau govindo dharate bhujaiḥ || 280 ||
[Analyze grammar]

gadāṃ padmaṃ tathā śaṅkhaṃ cakraṃ viṣṇur bibharti yaḥ |
cakraṃ śaṅkhaṃ tathā padmaṃ gadāṃ ca madhusūdanaḥ || 281 ||
[Analyze grammar]

gadāṃ sarojaṃ cakraṃ ca śaṅkhaṃ dhatte'cyutaḥ sadā |
śaṅkhaṃ kaumodakīṃ cakram upSTARTraḥ padmam udvahet || 282 ||
[Analyze grammar]

cakraśaṅkhagadāpadmadharaḥ pradyumna ucyate |
padmaṃ kaumodakīṃ cakraṃ śaṅkhaṃ dhatte trivikramaḥ || 283 ||
[Analyze grammar]

śaṅkhaṃ cakraṃ gadāṃ padmaṃ vāmano vahate sadā |
padmaṃ cakraṃ gadāṃ śaṅkhaṃ śrīdharo vahate bhujaiḥ || 284 ||
[Analyze grammar]

cakraṃ padmaṃ gadāṃ śaṅkhaṃ narasiṃho bibharti yaḥ |
padmaṃ sudarśanaṃ śaṅkhaṃ gadāṃ dhatte janārdanaḥ || 285 ||
[Analyze grammar]

aniruddhaś cakragadāśaṅkhapadmalasadbhujaḥ |
hṛṣīkeśo gadāṃ cakraṃ padmaṃ śaṅkhaṃ ca dhārayet || 286 ||
[Analyze grammar]

padmanābho vahet śaṅkhaṃ padmaṃ cakraṃ gadāṃ tathā |
padmaṃ cakraṃ gadāṃ śaṅkhaṃ dhatte dāmodaraḥ sadā || 287 ||
[Analyze grammar]

śaṅkhaṃ cakraṃ sarojaṃ ca gadāṃ vahati yo hariḥ |
śaṅkhaṃ kaumodakīṃ padmaṃ cakraṃ viṣṇur bibharti yaḥ || 288 ||
[Analyze grammar]

etāś ca mūrtayo jñeyā dakṣiṇādhaḥkarakramāt || 289 ||
[Analyze grammar]

matsyapurāṇe ca |
etaduddeśataḥ proktaṃ pratimālakṣaṇaṃ tathā |
vistareṇa na śaknoti bṛhaspatir api dvijāḥ || 290 ||
[Analyze grammar]

iti |
sevāniṣṭhā hareḥ śrīmadvaiṣṇavāḥ pāñcarātrikāḥ |
prākaṭyād akhilāṅgānāṃ śrīmūrtiṃ bahu manyate || 291 ||
[Analyze grammar]

sevyā nijanijair eva mantraiḥ svasveṣṭamūrtayaḥ |
śālagrāmātmake rūpe niyamo naiva vidyate || 292 ||
[Analyze grammar]

dvibhujā jaladaśyāmā tribhaṅgī madhurākṛtiḥ |
sevyā dhyānānurūpaiś ca mūrtiḥ kṛṣṇasya daivataiḥ || 293 ||
[Analyze grammar]

anyāś ca vividhā śrīmadavatārādimūrtayaḥ |
prādurbhāvavidhāv agre lekhyās tattadviśeṣataḥ || 294 ||
[Analyze grammar]

nityakarmaprasaṅge'tra mūrtijanmapratiṣṭhayoḥ |
vidhir na likhituṃ yogyaḥ sa tu lekhiṣyate'grataḥ || 295 ||
[Analyze grammar]

gautamīyatantre |
gaṇḍakyāś caiva deśe ca śālagrāmasthalaṃ mahat |
pāṣāṇaṃ tadbhavaṃ yat tat śālagrāmam iti smṛtam || 296 ||
[Analyze grammar]

skandapurāṇe |
snigdhā kṛṣṇā pāṇḍarā vā pītā nīlā tathaiva ca |
vakrā rukṣā ca raktā ca mahāsthūlā tv alāñchitā || 297 ||
[Analyze grammar]

kapilā dardurā bhagnā bahucakraikacakrikā |
bṛhanmukhī bṛhaccakrā lagnacakrāthavā punaḥ |
baddhacakrāthavā kācid bhagnacakrā tv adhomukhī || 298 ||
[Analyze grammar]

tatraiva |
snigdhā siddhikarī mantre kṛṣṇā kīrtiṃ dadāti ca |
pāṇḍarā pāpadahanī pītā putraphalapradā || 299 ||
[Analyze grammar]

nīlā sandiśate lakṣmīṃ raktā rogapradāyikā |
rakṣā codvegadā nityaṃ vakrā dāridryadāyikā || 300 ||
[Analyze grammar]

sthūlā nihati caivāyur niṣphalā tu alāñchitā |
kapilā karburā bhagnā bahucakraikacakrikā || 301 ||
[Analyze grammar]

bṛhanmukhī bṛhaccakrā lagnacakrāthavā punaḥ || 302 ||
[Analyze grammar]

baddhacakrāthavā yā syād bhagnacakrā tv adhomukhī |
pūjayed yaḥ pramādena duḥkham eva labheta saḥ || 303 ||
[Analyze grammar]

agnipurāṇe ca |
tathā vyālamukhī bhagnā viṣayā baddhacakrikā |
vikārāvartanābhiś ca nārasiṃhī tathaiva ca || 304 ||
[Analyze grammar]

kapilā vibhramāvartā rekhāvartā ca yā śilā |
duḥkhadā sā tu vijñeyā sukhadā na kadācana || 305 ||
[Analyze grammar]

snigdhā śyāmā tathā muktāmāyā vā samacakrikā |
ghoṇimūrtir anantākhyā gambhīrā sampuṭā tathā || 306 ||
[Analyze grammar]

sūkṣmamūrtir amūrtiś ca sammukhā siddhidāyikā |
dhātrīphalapramāṇā yā kareṇobhayasampuṭā |
pūjanīyā prayatnena śilā caitādṛśī śubhā || 307 ||
[Analyze grammar]

iṣṭā tu yasya yā mūrtiḥ sa tāṃ yatnena pūjayet |
pūjite phalam āpnoti ihaloke paratra ca || 308 ||
[Analyze grammar]

yata uktaṃ śrībhagavatā brāhme |
khaṇḍitaṃ sphuṭitaṃ bhagnaṃ pārśvabhinnaṃ vibheditam |
śālagrāmasamudbhūtaṃ śailaṃ doṣāvahaṃ na hi || 309 ||
[Analyze grammar]

śrīrudreṇa ca skānde |
khaṇḍitaṃ truṭitaṃ bhagnaṃ śālagrāme na doṣabhāk |
iṣṭā tu yasya yā mūrtiḥ sa tāṃ yatnena pūjayet || 310 ||
[Analyze grammar]

tathā |
cakraṃ vā kevalaṃ tatra padmena saha saṃyutam |
kevalā vanamālā vā harir lakṣmyā saha sthitaḥ || 311 ||
[Analyze grammar]

mukhyāḥ snighdādayas tatrāmukhyā raktādayo matāḥ |
mukhyābhāve tv amukhyā hi pūjyā ity ucyate paraiḥ || 312 ||
[Analyze grammar]

brāhme śrībhagavadbrahmasaṃvāde |
nivasāmi sadā brahman śālāgrāmākhyaveśmani |
tatraiva rathacakrāṅkabhedanāmāni me śṛṇu || 313 ||
[Analyze grammar]

dvāradeśe same cakre dṛśyate nāntarīyake |
vāsudevaḥ sa vijñeyaḥ śuklābhaś cātiśobhanaḥ || 314 ||
[Analyze grammar]

dve cakre ekalagne tu pūrvabhāgas tu puṣkalaḥ |
saṅkarṣaṇākhyo vijñeyo raktābhiś cātiśobhanaḥ || 315 ||
[Analyze grammar]

pradyumnaḥ sūkṣmacakras tu pītadīptis tathaiva ca |
śuṣiraṃ chidrabahulaṃ dīrghākāraṃ tu tad bhavet || 316 ||
[Analyze grammar]

aniruddhas tu nīlābho vartulaś cātiśobhanaḥ |
rekhātrayaṃ tu tad dvāri pṛṣṭhaṃ padmena lāñchitam || 317 ||
[Analyze grammar]

saubhāgyaṃ keśavo dadyāt catuṣkoṇo bhavet tu yaḥ |
śyāmaṃ nārāyaṇaṃ vidyān nābhicakraṃ tathonnatam || 318 ||
[Analyze grammar]

dīrgharekhāsamopetaṃ dakṣiṇe śuṣiraṃ pṛthu |
ūrdhvaṃ mukhaṃ vijānīyāt dvāre ca harirūpiṇam || 319 ||
[Analyze grammar]

kāmadaṃ mokṣadaṃ caiva arthadaṃ ca viśeṣataḥ |
parameṣṭhī lohitabhaḥ padmacakrasamanvitaḥ || 320 ||
[Analyze grammar]

bilvākṛtis tathā pṛṣṭhe śuṣiraṃ cātipuṣkalam |
kṛṣṇavarṇas tathā viṣṇuḥ sthūle cakre suśobhanaḥ |
bramacaryeṇa pūjyo 'sāv anyathā vighnado bhavet || 321 ||
[Analyze grammar]

kvacic ca |
kapilo narasiṃho 'tha pṛthucakre ca śobhane |
brahmacaryādhikārī syān nānyathā pūjanaṃ bhavet || 322 ||
[Analyze grammar]

narasiṃhas tribinduḥ syāt kapilaḥ pañcabindukaḥ |
brahmacaryeṇa pūjyaḥ syād anyathā sarvavighnadaḥ || 323 ||
[Analyze grammar]

sthūlaṃ cakradvayaṃ madhye guḍalākṣāsavarṇakam |
dvāropari tathā rekhā padmākārā suśobhanā || 324 ||
[Analyze grammar]

sphuṭitaṃ viṣamaṃ cakraṃ nārasiṃhaṃ tu kāpilam |
sampūjya muktim āpnoti saṃgrāme vijayī bhavet || 325 ||
[Analyze grammar]

pādme kārttikamāhātmye ca |
yasya dīrghaṃ mukhaṃ pūrvakathitair lakṣaṇair yutam |
rekhāś ca keśarākārā nārasiṃho mato hi saḥ || 326 ||
[Analyze grammar]

brāhme |
vārāhaṃ śaktiliṅge ca cakre ca viṣame smṛte |
indranīlanibhaṃ sthūlaṃ trirekhālāñchitaṃ śubham || 327 ||
[Analyze grammar]

pādme ca tatraiva |
varāhākṛtir ābhugnaś cakrarekhāsv alaṅkṛtaḥ |
vārāha iti sa prokto bhuktimuktiphalapradaḥ || 328 ||
[Analyze grammar]

brāhma eva |
dīrghā kāñcanavarṇā yā bindutrayavibhūṣitā |
matsyākhyā sā śilā jñeyā bhuktimuktiphalapradā || 329 ||
[Analyze grammar]

kvacic ca |
matsyarūpaṃ tu deveśaṃ dīrghākāraṃ tu yad bhavet |
bindutrayam āyuktaṃ kāsyavarṇaṃ viśobhanam || 330 ||
[Analyze grammar]

brāhma eva |
kūrmas tathonnataḥ pṛṣṭhe vartulāvartapūritaḥ |
haritaṃ varṇam ādhatte kaustubhena ca cihnitaḥ || 331 ||
[Analyze grammar]

pādme ca tatraiva kūrmākārā ca cakrāṅkā śilā kūrmaḥ prakīrtitaḥ || 332 ||
[Analyze grammar]

brāhma eva |
hayagrīvo 'ṅkuśākāro rekhā cakraśamīpagāḥ |
bahucakrasamāyuktaṃ pṛṣṭhe nīradanīlakam || 333 ||
[Analyze grammar]

kvacic ca |
hayagrīvāṅkuśākāre rekhāḥ pañca bhavanti hi |
bahubindusamākīrṇe dṛśyante nīlarūpakāḥ || 334 ||
[Analyze grammar]

pādme ca tatraiva |
hāyagrīvā yathā lambā rekhāṅkā yā śilā bhavet |
tathāsau syād dhayagrīvaḥ pūjito jñānado bhavet || 335 ||
[Analyze grammar]

kiṃ ca |
aśvākṛti mukhaṃ yasya sākṣamālaṃ śiras tathā |
padmākṛtir bhaved vāpi hayaśīrṣas tv asau mataḥ || 336 ||
[Analyze grammar]

brāhme eva |
vaikuṇṭham maṇivarṇābhaṃ cakram ekaṃ tathā dhvajam |
dvāropari tathā rekhā padmākārā suśobhanā || 337 ||
[Analyze grammar]

śrīdharas tu tathā devaś cihnito vanamālayā |
kadambakusumākāro rekhāpañcakabhūṣitaḥ || 338 ||
[Analyze grammar]

vartulaś cātihrasvaś ca vāmanaḥ parikīrtitaḥ |
atasīkusumaprakhyo bindunā pariśobhitaḥ || 339 ||
[Analyze grammar]

anyatra ca |
vāmanākhyo bhaved devo hrasvo yaḥ syān mahādyutiḥ |
ūrdhvacakras tv adhaś cakraḥ so 'bhīṣṭārthaprado 'rcitaḥ || 340 ||
[Analyze grammar]

brāhme eva |
sudarśanas tathā devaḥ śyāmavarṇo mahādyutiḥ |
vāmapārśve gadācakre rekhe caiva tu dakṣiṇe || 341 ||
[Analyze grammar]

pādme kārttikamāhātmye |
cakrākāreṇa paṅktiḥ sā yatra rekhāmayī bhavet |
sa sudarśana ity evaṃ khyātaḥ pūjāphalapradaḥ || 342 ||
[Analyze grammar]

brāhme |
dāmodaras tathā sthūlo madhye cakraṃ pratiṣṭhitam |
dūrvābhaṃ dvārasaṅkīrṇaṃ pītā rekhā tathaiva ca || 343 ||
[Analyze grammar]

pādme ca tatraiva |
uparyadhaś ca cakre dve nātidīrghaṃ mukhe bilam |
cakre ca rekhā lambaikā sa ca dāmodaraḥ smṛtaḥ || 344 ||
[Analyze grammar]

anyatra ca |
sthūlo dāmodaro jñeyaḥ sūkṣmarandhro bhavet tu yaḥ |
cakre ca madhyadeśasthe pūjitaḥ sukhadaḥ sadā || 345 ||
[Analyze grammar]

nānāvarṇo hy anantākhyo nāgabhogena cihnitaḥ |
anantaḥ sa tu vijñeyaḥ sarvapūjāphalapradaḥ || 346 ||
[Analyze grammar]

pādme ca tatraiva |
anantacakro bahubhiś cihnair apy upalakṣitaḥ |
anantaḥ sa tu vijñeyaḥ sarvapūjāphalapradaḥ || 347 ||
[Analyze grammar]

dṛśyate śikhare liṅgaṃ śālagrāmasamudbhavam |
yasya yogeśvaro nāma brahmahatyāṃ vyapohati || 348 ||
[Analyze grammar]

āraktaḥ padmanābhākhyaṃ paṅkajacchatrasaṃyutam |
tulasyā pūjayen nityaṃ daridras tv īśvaro bhavet || 349 ||
[Analyze grammar]

candrākṛtiṃ hiraṇyākhyaṃ raśmijālaṃ vinirdiśet |
suvarṇarekhābahulaṃ sphaṭikadyutiśobhitam || 350 ||
[Analyze grammar]

kiṃ ca |
ardhacandrākṛtir devo hṛṣīkeśa udāhṛtaḥ |
tam arcya labhate svargaṃ viṣayāṃś ca samīhitām || 351 ||
[Analyze grammar]

vāmapārśve same cakre kṛṣṇavarṇaḥ sa bindukaḥ |
lakṣmīnṛsiṃho vikhyāto bhuktimuktiphalapradaḥ || 352 ||
[Analyze grammar]

trivikramas tathā devaḥ śyāmavarṇo mahādyutiḥ |
vāmapārśve tathā cakre rekhā caiva tu dakṣiṇe || 353 ||
[Analyze grammar]

pradakṣiṇāvartakṛtavanamālāvibhūṣitā |
yā śilā kṛṣṇasaṃjñā sā dhanadhānyasukhapradā || 354 ||
[Analyze grammar]

gautamīye |
bahubhir janmabhiḥ puṇyair yadi kṛṣṇaśilāṃ labhet |
goṣpadena tu cihnena janus tena samāpyate || 355 ||
[Analyze grammar]

catasro yatra dṛśyante rekhāḥ pārśvasamīpagāḥ |
dve cakre madhyadeśe tu sā śilā tu caturmukhā || 356 ||
[Analyze grammar]

kiṃ ca pādme tatraiva |
vajrakīṭodbhavā rekhāḥ paṅktībhūtāś ca yatra vai |
śālagrāmaśilā yā sā viṣṇupañjarasaṃjñitā || 357 ||
[Analyze grammar]

nāgavat kuṇḍalībhūtarekhāpaṅktiḥ sa śeṣakaḥ |
padmākāre ca paṅktī dve madhye lambā ca rekhikā |
garuḍaḥ sa tu vijñeyaś catuś cakro janārdanaḥ || 358 ||
[Analyze grammar]

catuś cakraḥ sūkṣmadvāro vanamālāṅkitodaraḥ |
lakṣmīnārāyaṇaḥ śrīmān bhuktimuktiphalapradaḥ || 359 ||
[Analyze grammar]

etal lakṣaṇayuktās tu śālagrāmaśilāḥ śubhāḥ |
yāś ca tāsv api sūkṣmāḥ syus tāḥ praśastakarāḥ smṛtāḥ || 360 ||
[Analyze grammar]

tathā ca śrībhagavadbrahmasaṃvāde tatraiva |
yathā yathā śilā sūkṣmā mahat puṇyaṃ tathā tathā |
tasmāt tāṃ pūjayen nityaṃ dharmakāmārthasiddhaye || 361 ||
[Analyze grammar]

tatrāpy āmalakītulyā sūkṣmā cātīva yā bhavet |
tasyām eva sadā brahman śriyā saha vasāmy aham || 362 ||
[Analyze grammar]

śālagrāmaśilāsparśāt koṭijanmāghanāśanam |
kiṃ punar yajanaṃ tatra harisānnidhyakārakam || 363 ||
[Analyze grammar]

pādme māghamāhātmye tatraiva |
yaḥ pūjayed dhariṃ cakre śālagrāmaśilodbhave |
rājasūyasahasreṇa teneṣṭaṃ prativāsaram || 364 ||
[Analyze grammar]

yad āmananti vedāntā brahma nirguṇam acyutam |
tatprasādo bhaven nṛṇāṃ śālagrāmaśilārcanāt || 365 ||
[Analyze grammar]

mahākāṣṭhasthito vahnir mathyamānaḥ prakāśate |
yathā tathā harir vyāpī śālagrāme prakāśate || 366 ||
[Analyze grammar]

api pāpasamācārāḥ karmaṇy anadhikāriṇaḥ |
śālagrāmārcakā vaiśya naiva yānti yamālayam || 367 ||
[Analyze grammar]

na tathā ramate lakṣmyāṃ na tathā nijamandire |
śālagrāmśilācakre yathā sa ramate sadā || 368 ||
[Analyze grammar]

agnihotraṃ hutaṃ tena dattā pṛthvī sasāgarā |
yenārcito hariś cakre śālagrāmaśilodbhave || 369 ||
[Analyze grammar]

kāmaiḥ krodhaiḥ pralobhaiś ca vyāpto yo 'tra narādhamaḥ |
so 'pi yāti harer lokaṃ śālagrāmaśilārcanāt || 370 ||
[Analyze grammar]

yaḥ pūjayati govindaṃ śālagrāme sadā naraḥ |
āhūtasamplavaṃ yāvat na sa pracyavate divaḥ || 371 ||
[Analyze grammar]

vinā tīrthair vinā dānair vinā yajñair vinā matim |
muktiṃ yāti naro vaiśya śālagrāmaśilārcanāt || 372 ||
[Analyze grammar]

narakaṃ garbhavāsaṃ ca tiryaktvaṃ kṛmiyonitām |
na yāti vaiśya pāpo 'pi śālagrāme'cyutārcakaḥ || 373 ||
[Analyze grammar]

dīkṣāvidhānamantrajñaś cakre yo balim āharet |
sa yāti vaiṣṇavaṃ dhāma satyaṃ satyaṃ mayoditam || 374 ||
[Analyze grammar]

naivedyair vividhaiḥ puṣpair dhūpair dīpair vilepanaiḥ |
gītavāditrastotrādyaiḥ śālagrāmaśilārcanam || 375 ||
[Analyze grammar]

kurute mānavo yas tu kalau bhaktiparāyaṇaḥ |
kalpakoṭisahasrāṇi ramate sannidhau hareḥ || 376 ||
[Analyze grammar]

liṅgais tu koṭibhir dṛṣṭair yat phalaṃ pūjitais tu taiḥ |
śālagrāmaśilāyāṃ tu ekenāpīha tat phalam || 377 ||
[Analyze grammar]

śālagrāmaśilārūpī yatra tiṣṭhati keśavaḥ |
tatra devāsurā yakṣā bhuvanāni caturdaśa || 378 ||
[Analyze grammar]

śālagrāmaśilāyāṃ tu yaḥ śrāddhaṃ kurute naraḥ |
pitaras tasya tiṣṭhanti tṛptāḥ kalpaśataṃ divi || 379 ||
[Analyze grammar]

śālagrāmaśilā yatra tattīrthaṃ yojanatrayam |
yatra dānaṃ japo homaḥ sarvaṃ koṭiguṇaṃ bhavet || 380 ||
[Analyze grammar]

śālagrāmasamīpe tu krośamātraṃ samantataḥ |
kīkaṭo 'pi mṛto yāti vaikuṇṭhabhavanaṃ nara || 381 ||
[Analyze grammar]

śālagrāmaśilācakraṃ yo dadyād dānam uttamam |
bhūcakraṃ tena dattaṃ syāt saśailavanakānanam || 382 ||
[Analyze grammar]

skānde kārttikamāhātmye śrīśivaskandasaṃvāde |
śālagrāmaśilāyāṃ tu trailokyaṃ sacarācaram |
mayā saha mahāsena līnaṃ tiṣṭhati sarvadā || 383 ||
[Analyze grammar]

dṛṣā praṇamitā yena snāpitā pūjitā tathā |
yajñakoṭisamaṃ puṇyaṃ gavāṃ koṭiphalaṃ labhet || 384 ||
[Analyze grammar]

kāmāsakto 'pi yo nityaṃ bhaktibhāvavivarjitaḥ |
śālagrāmaśilāṃ vipra sampūjyaivācyuto bhavet || 385 ||
[Analyze grammar]

śālagrāmaśilābimbaṃ hatyākoṭivināśanam |
smṛtaṃ saṅkīrtitaṃ dhyātaṃ pūjitaṃ ca namaskṛtam || 386 ||
[Analyze grammar]

śālagrāmaśilāṃ dṛṣṭvā yānti pāpāny anekaśaḥ |
siṃhaṃ dṛṣṭvā yathā yānti vane mṛgagaṇā bhayāt || 387 ||
[Analyze grammar]

namaskaroti manujaḥ śālagrāmaśilārcane |
pāpāni vilayaṃ yānti tamaḥ sūryodaye yathā || 388 ||
[Analyze grammar]

kāmāsakto 'thavā kruddhaḥ śālagrāmaśilārcanam |
bhaktyā vā yadi vā'bhaktyā kṛtvā muktim avāpnuyāt || 389 ||
[Analyze grammar]

vaivasvataṃ bhayaṃ nāsti tathā maraṇajanmanoḥ |
yaḥ kathāṃ kurute viṣṇoḥ śālagrāmaśilāgrataḥ || 390 ||
[Analyze grammar]

gītair vādyais tathā stotraiḥ śālagrāmaśilārcanam |
kurute mānavo yas tu kalau bhaktiparāyaṇaḥ |
kalpakoṭisahasrāṇi ramate viṣṇusadmani || 391 ||
[Analyze grammar]

śālagrāmanamaskāre'bhāvenāpi naraiḥ kṛte |
bhayaṃ naiva kariṣyanti madbhaktā ye narā bhuvi || 392 ||
[Analyze grammar]

madbhaktibaladarpiṣṭhā matprabhuṃ na namanti ye |
vāsudevaṃ na te jñeyā madbhaktāḥ pāpino hi te || 393 ||
[Analyze grammar]

śālagrāmaśilāyāṃ tu sadā putra vasāmy aham |
dattaṃ devena tuṣṭena svasthānaṃ mama bhaktitaḥ || 394 ||
[Analyze grammar]

padmakoṭisahasrais tu pūjite mayi yat phalam |
tat phalaṃ koṭiguṇitaṃ śālagrāmaśilārcane || 395 ||
[Analyze grammar]

pūjito ahaṃ na tair martyair namito 'haṃ na tair naraiḥ |
na kṛtaṃ martyaloke yaiḥ śālagrāmaśilārcanam || 396 ||
[Analyze grammar]

śālagrāmaśilāgre tu yaḥ karoti mamārcanam |
tenārcito 'haṃ satataṃ yugānām ekaviṃśatim || 397 ||
[Analyze grammar]

kim arcitair liṅgaśatair viṣṇubhaktivivarjitaiḥ |
śālagrāmaśilābimbaṃ nārcitaṃ yadi putraka || 398 ||
[Analyze grammar]

anarhaṃ mama naivedyaṃ patraṃ puṣpaṃ phalaṃ jalam |
śālagrāmaśilālagnaṃ sarvaṃ yāti pavitratām || 399 ||
[Analyze grammar]

yo hi māheśvaro bhūtvā vaiṣṇavaliṅgam uttamam |
dveṣṭi vai yāti narakaṃ yāvad indrāś caturdaśa || 400 ||
[Analyze grammar]

sakṛd apy arcite bimbe śālagrāmaśilodbhave |
muktiṃ prayānti manujā nūnaṃ sāṅkhyena varjitāḥ || 401 ||
[Analyze grammar]

malliṅgaiḥ koṭibhir dṛṣṭair yat phalaṃ pūjitais tu taiḥ |
śālagrāmaśilāyāṃ tu ekenāpi hi tad bhavet || 402 ||
[Analyze grammar]

tasmād bhaktyā ca madbhaktaiḥ prītyarthe mama putraka |
kartavyaṃ satataṃ bhaktyā śālagrāmaśilārcanam || 403 ||
[Analyze grammar]

śālagrāmaśilārūpī yatra tiṣṭhati keśavaḥ |
tatra devāsurā yakṣā bhuvanāni caturdaśa || 404 ||
[Analyze grammar]

śālagrāmaśilāgre tu sakṛt piṇḍena tarpitāḥ |
vasanti pitaras tasya na saṅkhyā tatra vidyate || 405 ||
[Analyze grammar]

pramāṇam asti sarvasya sukṛtasya hi putraka |
phalaṃ pramāṇahīnaṃ tu śālagrāmaśilārcane || 406 ||
[Analyze grammar]

yo dadāti śilāṃ viṣṇoḥ śālagrāmasamudbhavām |
viprāya viṣṇubhaktāya teneṣṭaṃ bahubhiḥ makhaiḥ || 407 ||
[Analyze grammar]

atraprabhṛti ślokā ākare na dṛśyante |
mānuṣye durlabhā loke śālagrāmodbhavā śilā |
prāpyate na vinā puṇyaiḥ kalikāle viśeṣataḥ || 408 ||
[Analyze grammar]

sa dhanyaḥ puruṣo loke saphalaṃ tasya jīvitam |
śālagrāmaśilā śuddhā gṛhe yasya ca pūjitā || 409 ||
[Analyze grammar]

saṃniyamySTARTriyagrāmaṃ śālagrāmaśilārcanam |
yaḥ kuryān mānavo bhaktyā puṣpe puṣpe'śvamedhabhāk || 410 ||
[Analyze grammar]

kāle vā yadi vākāle śālagrāmaśilārcanam |
bhaktyā vā yadi vābhaktyā yaḥ karoti sa puṇyabhāk || 411 ||
[Analyze grammar]

dveṣeṇāpi ca lobhena dambhena kapaṭena vā |
śālagrāmodbhavaṃ devaṃ dṛṣṭvā pāpāt pramucyate || 412 ||
[Analyze grammar]

aśucir vā durācāraḥ satyaśaucavivarjitaḥ |
śālagrāmaśilāṃ spṛṣṭvā sadya eva śucir bhavet || 413 ||
[Analyze grammar]

tilaprasthaśataṃ bhaktyā yo dadāti dine dine |
tat phalaṃ samavāpnoti śālagrāmaśilārcane || 414 ||
[Analyze grammar]

patraṃ puṣpaṃ phalaṃ mūlaṃ toyaṃ dūrvākṣataṃ suta |
jāyate meruṇā tulyaṃ śālagrāmaśilārpitam || 415 ||
[Analyze grammar]

vidhihīno 'pi yaḥ kuryāt kriyāmantravivarjitaḥ |
cakrapūjām avāpnoti samyak śāstroditaṃ phalam || 416 ||
[Analyze grammar]

tatraiva cānyatra |
skandhe kṛtvā tu yo 'dhvānaṃ vahate śailanāyakam |
tenoḍhaṃ tu bhavet sarvaṃ trailokyaṃ sacarācaram || 417 ||
[Analyze grammar]

brahmahatyādikaṃ pāpaṃ yat kiñcit kurute naraḥ |
tat sarvaṃ nirdahaty āśu śālagrāmaśilārcanam || 418 ||
[Analyze grammar]

na pūjanaṃ na mantrāś ca na japo na ca bhāvanā |
na stutir nopacāraś ca śālagrāmaśilārcane || 419 ||
[Analyze grammar]

śālagrāmaśilā yatra tat tīrthaṃ yojanatrayam |
tatra dānaṃ ca homaś ca sarvaṃ koṭiguṇaṃ bhavet || 420 ||
[Analyze grammar]

śālagrāmaśilāyāṃ tu yaḥ śrāddhaṃ kurute naraḥ |
pitaras tasya tiṣṭhanti tṛptāḥ kalpaśataṃ divi || 421 ||
[Analyze grammar]

śālagrāmasamīpe tu krośamātraṃ samantataḥ |
kīkaṭo 'pi mṛto yāti vaikuṇṭhabhuvanaṃ naraḥ || 422 ||
[Analyze grammar]

pādme ca |
śālagrāmaśilācakraṃ yo dadyād dānam uttamam |
bhūcakraṃ tena dattaṃ syāt saśailavanakānanam || 423 ||
[Analyze grammar]

garuḍapurāṇe |
tiṣṭhanti nityaṃ pitaro manuṣyās tīrthāni gaṅgādikapuṣkarāṇi |
yajñāś ca medhā hy api puṇyaśailāś cakrāṅkitā yasya vasanti gehe || 424 ||
[Analyze grammar]

pādme kārttikamāhātmye śrīyamadhūmrakeśasaṃvāde |
śālagrāmaśilāyāṃ tu yair naraiḥ pūjito hariḥ |
saṃśodhya teṣāṃ pāpāni muktaye buddhito bhavet || 425 ||
[Analyze grammar]

kārttike mathurāyāṃ tu sārūpyaṃ diśate hariḥ |
śālagrāmaśilāyāṃ vai pitṝṇ uddiśya pūjitaḥ |
kṛṣṇaḥ samuddharet tasya pitṝn etān svalokatām || 426 ||
[Analyze grammar]

bṛhannāradīye ca yajñadhvajopākhyānānte |
śālagrāmaśilārūpī yatra tiṣṭhati keśavaḥ |
na bādhante'surās tatra bhūtavetālakādayaḥ || 427 ||
[Analyze grammar]

śālagrāmaśilā yatra tattīrthaṃ tat tapovanam |
yataḥ sannihitas tatra bhagavān madhusūdanaḥ || 428 ||
[Analyze grammar]

śālagrāmaśilās tāś ca yadi dvādaśa pūjitāḥ |
śataṃ vā pūjitaṃ bhaktyā tadā syād adhikaṃ phalam || 429 ||
[Analyze grammar]

pādme māghamāhātmye devadūtavikuṇḍalasaṃvāde |
śilā dvādaśa bho vaiśya śālagrāmaśilodbhavāḥ |
vidhivat pūjitā yena tasya puṇyaṃ vadāmi te || 430 ||
[Analyze grammar]

koṭidvādaśaliṅgais tu pūjitaiḥ svarṇapaṅkajaiḥ |
yat syād dvādaśakāleṣu dinenaikena tad bhavet || 431 ||
[Analyze grammar]

yaḥ punaḥ pūjayed bhaktyā śālagrāmaśilāśatam |
uṣitvā sa harer loke cakravartīha jāyate || 432 ||
[Analyze grammar]

skānde kārttikamāhātmye śrīśivaskandasaṃvāde |
dvādaśaiva śilā yo vai śālagrāmasamudbhavāḥ |
arcayed vaiṣṇavo nityaṃ tasya puṇyaṃ nibodha me || 433 ||
[Analyze grammar]

koṭiliṅgasahasrais tu pūjitair jāhnavītaṭe |
kāśīvāse yugāny aṣṭau dinenaikena tad bhavet || 434 ||
[Analyze grammar]

kiṃ punar bahunā yas tu pujayed vaiṣṇavo naraḥ |
na hi brahmādayo devāḥ saṃkhyāṃ kurvanti puṇyataḥ || 435 ||
[Analyze grammar]

tatraiva |
śālagrāmaśilāyāṃ yo mūlyam udghātayen naraḥ |
vikretā cānumantā ca yaḥ parīkṣām udīrayet || 436 ||
[Analyze grammar]

sarve te narakaṃ yānti yāvad āhūtasamplavam |
ataḥ saṃvarjayed vipra cakrasya krayavikrayam || 437 ||
[Analyze grammar]

tatraiva |
śālagrāmaśilāyāṃ tu pratiṣṭhā naiva vidyate |
mahāpūjāṃ tu kṛtvādau pūjayet tāṃ tato budhaḥ || 438 ||
[Analyze grammar]

iti |
ato 'dhiṣṭhānavargeṣu sūryādiṣv iva mūrtiṣu |
śālagrāmaśilaiva syād adhiṣṭhānottamaṃ hareḥ || 439 ||
[Analyze grammar]

pādme tatraiva |
hṛdi sūrye jale vātha pratimāsthaṇḍileṣu ca |
samabhyarcya hariṃ yānti narās te vaiṣṇavaṃ padam || 440 ||
[Analyze grammar]

athavā sarvadā pūjyo vāsudevo mumukṣubhiḥ |
śālagrāmeśilācakre vajrakīṭavinirmite || 441 ||
[Analyze grammar]

adhiṣṭhānaṃ hi tad viṣṇoḥ sarvapāpapraṇāśanam |
sarvapuṇyapradaṃ vaiśya sarveṣām api muktidam || 442 ||
[Analyze grammar]

tatraiva kārttikamāhātmye yamadhūmrakeśasaṃvāde |
pūjā ca vihitā tasya pratimāyāṃ nṛpātmaja |
śailī dārumayī lauhī lepyā lekhyā ca saikatā |
manomayī maṇimayī śrīmūrtir aṣṭadhā smṛtā || 443 ||
[Analyze grammar]

śālagrāmaśilāyāṃ tu sākṣāt śrīkṛṣṇasevanam |
nityaṃ saṃnihitas tatra vāsudevo jagadguruḥ || 444 ||
[Analyze grammar]

skānde kārttikamāhātmye śrīśivaskandasaṃvāde |
suvarṇārcā na ratnārcā na śilārcā surottama |
śālagrāmaśilāyāṃ tu sarvadā vasate hariḥ || 445 ||
[Analyze grammar]

ata evoktam |
hatyāṃ hanti yadaṅghrisaṅgatulasī steyaṃ ca toyaṃ pade naivedyaṃ bahumadyapānaduritaṃ gurvaṅganāsaṅgajam |
śrīśādhīnamatiḥ sthitir harijanais tatsaṅgajaṃ kilbiṣaṃ śālagrāmaśilānṛsiṃhamahimā ko 'py eṣa lokottaraḥ || 446 ||
[Analyze grammar]

śālagrāmaśilārūpabhagavanmahimāmbudheḥ |
ūrmīn gaṇayituṃ śakyaḥ śrīcaitanyāśrito 'pi kaḥ || 447 ||
[Analyze grammar]

pādme |
śālagrāmaśilāpūjā vinā yo 'śnāti kiñcana |
sa caṇḍālādiviṣṭhāyām ākalpaṃ jāyate kṛmiḥ || 448 ||
[Analyze grammar]

skānde ca |
gauravācalaśṛṅgāgrair bhidyate yasya vai tanuḥ |
na matir jāyate yasya śālagrāmaśilārcane || 449 ||
[Analyze grammar]

iti |
evaṃ śrībhagavān sarvaiḥ śālagrāmaśilātmakaḥ |
dvijaiḥ strībhiś ca śūdraiś ca pūjyo bhagavataḥ paraiḥ || 450 ||
[Analyze grammar]

tathā skānde śrībrahmanāradasaṃvāde cāturmāsyavrate śālagrāmaśilārcāprasaṅge |
brāhmaṇakṣatriyaviśāṃ sacchūdrāṇām athāpi vā |
śālagrāme'dhikāro 'sti na cānyeṣāṃ kadācana || 451 ||
[Analyze grammar]

tatraivānyatra |
striyo vā yadi vā śūdrā brāhmaṇāḥ kṣatriyādayaḥ |
pūjayitvā śilācakraṃ labhante śāśvataṃ padam || 452 ||
[Analyze grammar]

iti |
ato niṣedhakaṃ yad yad vacanaṃ śrūyate sphuṭam |
avaiṣṇavaparaṃ tat tad vijñeyaṃ tattvadarśibhiḥ || 453 ||
[Analyze grammar]

yathā |
brāhmaṇasyaiva pūjyo 'haṃ śucer apy aśucer api |
strīśūdrakarasaṃsparśo vajrād api suduḥsahaḥ || 454 ||
[Analyze grammar]

praṇavoccāraṇārcaiva śālagrāmaśilārcanāt |
brāhmaṇīgamanāc caiva śūdraś caṇḍālatām iyāt || 455 ||
[Analyze grammar]

sanātanaḥ tad eva śrīnāradoktyā pramāṇayatibrāhmaṇeti |
satāṃ vaiṣṇavānāṃ śūdrāṇāṃ śālagrāme śrīśālagrāmaśilārcane anyeṣām asatāṃ śūdrāṇām |
ataeva śūdram adhikṛtyoktaṃ vāyupurāṇe |
ayācakaḥ pradātā syāt kṛṣiṃ vṛttyartham ācaret |
purāṇaṃ śṛṇuyān nityaṃ śālagrāmaṃ ca pūjayet || iti |
evaṃ mahāpurāṇānāṃ vacanaiḥ sahabrāhmaṇasyaiva pūjyo 'ham iti vacanasya virodhān mātsaryaparaiḥ smārtaiḥ kaiścit kalpitam iti mantavyam |
yadi ca yuktyā siddhaṃ samūlaṃ syāt tarhi cāvaiṣṇaviḥ śūdrais tādṛśībhiś ca strībhis tatpūjā na kartavyā yathāvidhi gṛhītaviṣṇudīkṣākaiś ca taiḥ kartvyeti vyavasthāpanīyam |
yataḥ śūdreṣv antyajeṣv api madhye ye vaiṣṇavās te śūdrādayo na kilocyante |
tathā ca nāradīye śvapaco 'pi mahīpāla viṣṇor bhakto dvijodhikaḥ iti |
itihāsasamuccaye |
na śūdrā bhagavadbhaktaṃ niṣādaṃ śvapacaṃ tathā |
vīkṣate jātisāmānyāt sa yāti narakaṃ dhruvam || iti |
pādme ca |
na śūdrā bhagavadbhaktās te tu bhāgavatā narāḥ |
sarvavarṇeṣu te śūdrā ye na bhaktā janārdane || iti |
etadādikaṃ cāgre vaiṣṇavamāhātmye vistareṇa vyaktaṃ bhāvi |
kiṃ ca bhagavaddīkṣāprabhāvena śūdrādīnām api viprasāmyaṃ siddham eva |
tathā ca tatrayathā kāñcanatāṃ yāti ity ādi |
etac ca prāgdīkṣāmāhātmye likhitam eva |
ata eva tṛtīyaskandhe devahūtivākyam |
yannāmadheyaśravaṇānukīrtanād yatprahvaṇād yatsmaraṇād api kvacit |
śvādo 'pi sadyaḥ savanāya kalpate kutaḥ punas te bhagavan nu darśanāt || iti |
savanāya yajanāya kalpate yogyo bhavatīty arthaḥ |
ata eva vipraiḥ saha vaiṣṇavānām ekatraiva gaṇanā |
tathā ca haribhaktisudhodaye śrībhagavadbrahmasaṃvāde |
tīrthāny aśvatthataravo gāvo viprās tathā svayam |
madbhaktāś ceti vijñeyāḥ pañca te tanavo mama || iti |
caturthaskandhe śrīpṛthumahārājavarṇane |
sarvatrāskhalitādeśaḥ saptadvīpaikadaṇḍadhṛk |
anyatra brāhmaṇakulād anyatrācyutagotrataḥ || iti |
īmahārājasyoktau mā jātu tejaḥ prabhaven maharddhibhis titikṣayā tapasā vidyayā ca |
dedīpyamāne ñjitadevatānāṃ kule svayaṃ rājakulād dvijānām || iti |
atra śrīsvāmipādānāṃ ṭīkāmahatyaś ca tā ṛddhayaś ca tābhir yadrājakulasya tejas tat tasmāt sakāśād dvijānāṃ viprāṇāṃ kule ajito devatāpūjyo yeṣāṃ vaiṣṇavānāṃ teṣāṃ kule mā jātu prabhavet |
kadācid api prabhavaṃ na karotu |
kathambhūte ? samṛddhibhir vināpi svayam eva titikṣādibhir dedīpyamāna iti |
purañjanoktau ca |
tasmin dadhe damam ahaṃ tava vīrapatni yo 'nyatra bhūsurakulāt kṛtakilbiṣas tam |
paśye na vītabhayam unmuditaṃ trilokyām anyatra vai muraripor itaratra dāsāt || iti |
tatrāpi saiva ṭīkāhe vīrapatni ! yas te kṛtāparādhaḥ |
tasminn ahaṃ brāhmaṇakulād anyatra anyasmin muraripudāsād itaratra ca damaṃ dadhe daṇḍaṃ karomīty adi |
īdṛśāni ca vacanāni śrībhāgavatādau bahūny eva santi |
itthaṃ vaiṣṇavānāṃ brāhmaṇaiḥ saha sāmyam eva sidhyati |
kiṃ caviprād dviṣaḍguṇayutāt ity ādivacanair vaiṣṇavabrāhmaṇebhyo nīcajātijātānām api vaiṣṇavānāṃ śraiṣṭhyaṃ nirdiśyatetarām |
ata evoktaṃ śrībhagavatā śrīhayagrīveṇa śrīhayaśīrṣapañcarātre śrīpuruṣottamapratiṣṭhānte |
mūrtipānāṃ tu dātavyā deśikārdhena dakṣiṇā |
tadardhaṃ vaiṣṇavānāṃ tu tadardhaṃ taddvijanmanām || iti |
ato yuktam eva likhita sarvair bhagavataḥ paraiḥ pūjya iti |
tathā ca brahmavaivarte priyavratopākhyāne dharmavyādhasyāpi śrīśālagrāmaśilāpūjanam uktam |
tataḥ sa vismitaḥ śrutvā dharmavyādhasya tadvacaḥ |
tasthau sa ca samānīya darśayāmāsa tav ubhau || niniktavasanau vṛddhāvāsanasthau nijau gurū |
śālagrāmaśilāṃ caiva tatsamīpe supūjitam || iti |
śvādatvam atra śvabhakṣakajātiviśeṣatvam eva śvānam attīti nirukter vartamānaprayogāt kravyādavat tacchīlatvaprāpteḥ |
kādācitkabhakṣaṇaprāyaścittavivakṣāyāṃ tv atītaḥ prayogaḥ kriyeta |
rūḍhir yogam apaharatīti nyāyena ca tad virudhyate |
ataeva śvapaca iti tair vyākhyātam |
savanaṃ cātra somayāga ucyate |
tataś cāsya bhagavannāmaśravaṇādyekatarāt sadya eva savanayogyatāpratikūladurjātitvaprārambhakaprārabdhapāpanāśaḥ pratipadyate |
uddhavaṃ prati bhagavatā ca tasmāt bhaktiḥ punāti manniṣṭhā śvapākān api sambhavāt iti kaimutyārtham eva proktam ity āyāti |
kintu yogyatvam atra śvapacatvaprāpakaprārabdhapāpavicchinnatvamātram ucyate |
savanārthaṃ tu guṇāntarādhānam apekṣata eva |
brāhmaṇakumārāṇāṃ śaukre janmani yogyatve saty api sāvitradaiksyajanmāpekṣāvat |
sāvitrādijanmani tu sadācāraprāpter iti savane pravṛttir na yujyate |
tasmāt pūjyatvamātre tātparyam ity abhipretya ṭīkākṛdbhir apy uktam anena pūjyatvaṃ lakṣyata iti |
tathāpi jātidoṣaharatvena prārabdhahāritvaṃ tu vyaktam evāyātam |
sandhāryaā vaiṣṇavair yatnāc chālagrāmaśilā'suvat |
sā cārcyā dvārakācakrāṅkitopetaiva sarvadā || 456 ||
[Analyze grammar]

brāhme tatraiva |
śālagrāmodbhavo devo devo dvāravatībhavaḥ |
ubhayoḥ saṅgamo yatra muktis tatra na saṃśayaḥ || 457 ||
[Analyze grammar]

skānde śrībrahmanāradasaṃvāde |
cakrāṅkitā śilā yatra śālagrāmaśilāgrataḥ |
tiṣṭhate muniśārdūla vardhante tatra sampadaḥ || 458 ||
[Analyze grammar]

tatraivānyatra |
pratyahaṃ dvādaśa śilāḥ śālagrāmasya yo 'rcayet |
dvāravatyāḥ śilāyuktāḥ sa vaikuṇṭhe mahīyate || 459 ||
[Analyze grammar]

śrīprahlādasaṃhitāyām |
ekaḥ sudarśano dvābhyāṃ lakṣmīnārāyaṇaḥ smṛtaḥ |
tribhis trivikramo nāma caturbhiś ca janārdanaḥ || 460 ||
[Analyze grammar]

pañcabhir vāsudevas tu ṣaḍbhiḥ pradyumna ucyate |
saptabhir baladevas tu aṣṭabhiḥ puruṣottamaḥ || 461 ||
[Analyze grammar]

navabhiś ca navavyūho daśabhir daśamūrtikaḥ |
ekādaśaiś cāniruddho dvādaśair dvādaśātmakaḥ |
anyeṣū bahucakreṣu anantaḥ parikīrtitaḥ || 462 ||
[Analyze grammar]

vārāhe |
ye kecic caiva pāṣāṇā viṣṇucakreṇa mudritāḥ |
teṣāṃ sparśanamātreṇa mucyate sarvapātakaiḥ || 463 ||
[Analyze grammar]

gāruḍe sudarśanādyās tu śilāḥ pūjitāḥ sarvakāmadāḥ || 464 ||
[Analyze grammar]

skānde ca |
bhaktyā vā yadi vābhaktyā cakrāṅkaṃ pūjayen naraḥ |
api cet sudurācāro mucyate nātra saṃśayaḥ || 465 ||
[Analyze grammar]

dvārakāmāhātmye ca dvārakāgatānāṃ śrībrahmādīnām uktau |
etad vai cakratīrthaṃ tu yac chilā cakracihnitā |
muktidā pāpināṃ loke mlecchadeśe'pi pūjitā || 466 ||
[Analyze grammar]

kapilapañcarātre |
ekacakras tu pāṣāṇo dvāravatyāḥ suśobhanaḥ |
sudarśanābhidho yo 'sau mokṣaikaphaladāyakaḥ || 467 ||
[Analyze grammar]

lakṣmīnārāyaṇo dvābhyāṃ bhuktimuktiphalapradaḥ |
ebhiś cācyutarūpo 'sau phalam aindraṃ prayacchati || 468 ||
[Analyze grammar]

caturbhujaś catuścakraś caturvargaphalapradaḥ |
pañcabhir vāsudevaś ca janmamṛtyubhayāpahaḥ || 469 ||
[Analyze grammar]

ṣaḍbhiḥ pradyumna evāsau lakṣmīṃ kāntiṃ dadāti saḥ |
saptabhir balabhadro 'sau gotrakīrtivivardhanaḥ || 470 ||
[Analyze grammar]

dadāti vāñchitaṃ sarvam aṣṭabhiḥ puruṣottamaḥ |
navacakro nṛsiṃhas tu phalaṃ yacchaty anuttamam || 471 ||
[Analyze grammar]

rājyaprado daśabhis tu daśāvatārakaḥ smṛtaḥ |
ekādaśabhir aiśvaryam aniruddhaḥ prayacchati || 472 ||
[Analyze grammar]

nirvāṇaṃ dvādaśātmāsau saukhyadaś ca supūjitaḥ || 473 ||
[Analyze grammar]

tatraiva |
kṛṣṇa mṛtyuprado nityaṃ dhūmraś caiva bhayāvahaḥ |
asvāsthyaṃ karburo dadyān nīlas tu dhanahānidaḥ || 474 ||
[Analyze grammar]

chidro dāridryaduḥkhāni dadyāt sampūjito dhruvam |
pāṇḍaras tu mahad duḥkhaṃ bhagno bhāryāviyogadaḥ || 475 ||
[Analyze grammar]

putrapautradhanaiśvaryasukham atyantam uttamam |
dadāti śuklavarṇaś ca tasmād enaṃ samarcayet || 476 ||
[Analyze grammar]

śrīprahlādasaṃhitāyām |
kṛṣṇā mṛtyupradā nityaṃ kapilā ca bhayāvahā |
rogārtiṃ karburā dadyāt pītā vittavināśinī || 477 ||
[Analyze grammar]

dhūmrābhā vittanāśāya bhagnā bhāryāvināśikā |
sacchidrā ca trikoṇā ca tathā viṣamacakrikā |
ardhacandrākṛtir yā ca pūjyās tā na bhavanti hi || 478 ||
[Analyze grammar]

gārgyagālavayoḥ |
sukhadā samacakrā tu dvādaśī cottamā śubhā |
vartulā caturasrā ca narāṇāṃ ca sukhapradā || 479 ||
[Analyze grammar]

trikoṇā viṣamā caiva chidrā bhagnā tathaiva ca |
ardhacandrākṛtir yā tu pūjārhā na bhavet tu sā |
phalaṃ notpadyate tatra pūjitāyāṃ kadācana || 480 ||
[Analyze grammar]