Chapter 3

tataḥ kadācinmṛduśādvalāni puṃskokilonnāditapādapāni |
śuśrāva padmākaramaṇḍitāni śīte nibaddhāni sa kānanāni || 1 ||
[Analyze grammar]

śrutvā tataḥ strījanavallabhānāṃ manojñabhāvaṃ purakānanānām |
bahiḥprayāṇāya cakāra buddhimantargṛhe nāga ivāvaruddhaḥ || 2 ||
[Analyze grammar]

tato nṛpastasya niśamya bhāvaṃ putrābhidhānasya manorathasya |
snehasya lakṣmyā vayasaśca yogyām-ājñāpayāmāsa vihārayātrām || 3 ||
[Analyze grammar]

nivartayāmāsa ca rājamārge sampātamārtasya pṛthagjanasya |
mā bhūtkumāraḥ sukumāracittaḥ saṃvignacetā iva manyamānaḥ || 4 ||
[Analyze grammar]

pratyaṅgahīnān vikalendriyāṃśca jīrṇāturādīn kṛpaṇāṃśca bhikṣūn |
tataḥ samutsārya pareṇa sāmnā śobhāṃ parā rājapathasya cakruḥ || 5 ||
[Analyze grammar]

tataḥ kṛte śrīmati rājamārge śrīmān vinītānucaraḥ kumāraḥ |
prāsādapṛṣṭhādavatīrya kāle kṛtābhyanujño nṛpamabhyagacchat || 6 ||
[Analyze grammar]

atho narendraḥ sutamāgatāśruḥ śirasyupāghrāya ciraṃ nirīkṣya |
gaccheti cājñāpayati sma vācā snehānna cainaṃ manasā mumoca || 7 ||
[Analyze grammar]

tataḥ sa jāmbūnadabhāṇḍabhṛdbhiryuktaṃ caturbhirnibhṛtaisturaṅgaiḥ |
aklīvavidhyucchuciraśmidhārāṃ hiraṇmayaṃ syandanamāruroha || 8 ||
[Analyze grammar]

tataḥ prakīrṇojjvalapuṣpajālaṃ viṣaktamālyaṃ pracalatpatākam |
mārgaṃ prapede sadṛśānuyātraścandraḥ sanakṣatra ivāntarīkṣam || 9 ||
[Analyze grammar]

kautūhalātsphītataraiśca netrairnīlotpalābhairiva kīryamāṇaḥ |
śanaiḥ śanai rājapathaṃ jagāhe pauraiḥ samantādabhivīkṣyamāṇaḥ || 10 ||
[Analyze grammar]

taṃ tuṣṭuvuḥ saumyaguṇena kecidvavandire dīptatayā tathānye |
saumukhyatastu śriyamasya kecidvaipulyamāśaṃsiṣurāyuṣaśca || 11 ||
[Analyze grammar]

niḥsṛtya kubjāśca mahākulebhyo vyūhāśca kairātakavāmanānām |
nāryaḥ kṛśebhyaśca niveśanebhyo devānuyānadhvajavat praṇemuḥ || 12 ||
[Analyze grammar]

tataḥ kumāraḥ khalu gacchatīti śrutvā striyaḥ preṣyajanātpravṛttim |
didṛkṣayā harmyatalāni jagmurjanena mānyena kṛtābhyanujñāḥ || 13 ||
[Analyze grammar]

tāḥ srastakāñcīguṇavighnitāśca suptaprabuddhākulalocanāśca |
vṛttāntavinyastavibhūṣaṇāśca kautūhalenāpi bhṛtāḥ parīyuḥ || 14 ||
[Analyze grammar]

prāsādasopānatalapraṇādaiḥ kāñcīravairnūpuranisvanaiśca |
vibhrāmayantyo gṛhapakṣisaṅghānanyonyavegāṃśca samākṣipantyaḥ || 15 ||
[Analyze grammar]

kāsāñcidāsāṃ tu varāṅganānāṃ jātatvarāṇāmapi sotsukānām |
gatiṃ gurutvājjagṛhurviśālāḥ śroṇīrathāḥ pīnapayodharāśca || 16 ||
[Analyze grammar]

śīghraṃ samarthāpi tu gantumanyā gatiṃ nijagrāha yayau na tūrṇam |
hriyā pragalbhāni nigūhamānā rahaḥ prayuktāni vibhūṣaṇāni || 17 ||
[Analyze grammar]

parasparotpīḍanapiṇḍitānāṃ saṃmardasaṃśobhitakuṇḍalānām |
tāsāṃ tadā sasvanabhūṣaṇānāṃ vātāyaneṣvapraśamo babhūva || 18 ||
[Analyze grammar]

vātāyanebhyastu viniḥsṛtāni parasparopāsitakuṇḍalāni |
strīṇāṃ virejurmukhapaṅkajāni saktāni harmyeṣviva paṅkajāni || 19 ||
[Analyze grammar]

tato vimānairyuvatīkalāpaiḥ kautūhalodghāṭitavātayānaiḥ |
śrīmatsamantānnagaraṃ babhāse viyadvimānairiva sāpsarobhiḥ || 20 ||
[Analyze grammar]

vātāyanānāmaviśālabhāvādanyonyagaṇḍārpitakuṇḍalāni |
mukhāni rejuḥ pramadottamānāṃ baddhāḥ kalāpa iva paṅkajānām || 21 ||
[Analyze grammar]

tasmin kumāraṃ pathi vīkṣamāṇāḥ striyo babhurgāmiva gantukāmāḥ |
ūrdhvonmukhāścainamudīkṣamāṇā narā babhurdyāmiva gantukāmāḥ || 22 ||
[Analyze grammar]

dṛṣṭvā ca taṃ rājasutaṃ striyastā jājvalyamānaṃ vapuṣā śriyā ca |
dhanyāsya bhāryeti śanairavocañśuddhairmanobhiḥ khalu nānyabhāvāt || 23 ||
[Analyze grammar]

ayaṃ kila vyāyatapīnabāhū rūpeṇa sākṣādiva puṣpaketuḥ |
tyaktvā śriyaṃ dharmamupeṣyatīti tasmin hitā gauravameva cakruḥ || 24 ||
[Analyze grammar]

kīrṇaṃ tathā rājapathaṃ kumāraḥ paurairvinītaiḥ śucidhīraveṣaiḥ |
tatpūrvamālokya jaharṣa kiñcinmene punarbhāvamivātmanaśca || 25 ||
[Analyze grammar]

puraṃ tu tatsvargamiva prahṛṣṭaṃ śuddhādhivāsāḥ samavekṣya devāḥ |
jīrṇaṃ naraṃ nirmamire prayātuṃ sañcodanārthaṃ kṣitipātmajasya || 26 ||
[Analyze grammar]

tataḥ kumāro jarayābhibhūtaṃ dṛṣṭvā narebhyaḥ pṛthagākṛtiṃ tam |
uvāca saṅgrāhakamāgatāsthastatraiva niṣkampaniviṣṭadṛṣṭiḥ || 27 ||
[Analyze grammar]

ka eṣa bhoḥ sūta naro 'bhyupetaḥ keśaiḥ sitairyaṣṭiviṣaktahastaḥ |
bhrūsaṃvṛtākṣaḥ śithilānatāṅgaḥ kiṃ vikriyaiṣā prakṛtiryadṛcchā || 28 ||
[Analyze grammar]

ityevamuktaḥ sa rathapraṇetā nivedayāmāsa nṛpātmajāya |
saṃrakṣyamapyarthamadoṣadarśī taireva devaiḥ kṛtabuddhimohaḥ || 29 ||
[Analyze grammar]

rūpasya hartrī vyasanaṃ balasya śokasya yonirnidhanaṃ ratīnām |
nāśaḥ smṛtīnāṃ ripurindriyāṇāmeṣā jarā nāma yayaiṣa bhagnaḥ || 30 ||
[Analyze grammar]

pītaṃ hyanenāpi payaḥ śiśutve kālena bhūyaḥ parimṛṣṭamurvyām |
krameṇa bhūtvā ca yuvā vapuṣmān krameṇa tenaiva jarāmupetaḥ || 31 ||
[Analyze grammar]

ityevamukte calitaḥ sa kiñcidrājātmajaḥ sūtamidaṃ babhāṣe |
kimeṣa doṣo bhavitā mamāpītyasmai tataḥ sārathirabhyuvāca || 32 ||
[Analyze grammar]

āyuṣmato 'pyeṣa vayaḥprakarṣānniḥsaṃśayaṃ kālavaśena bhāvī |
evaṃ jarāṃ rūpavināśayitrīṃ jānāti caivecchati caiṣa lokaḥ || 33 ||
[Analyze grammar]

tataḥ sa pūrvāśayaśuddhabuddhirvistīrṇakalpācitapuṇyakarmā |
śrutvā jarāṃ saṃvivije mahātmā mahāśanerghoṣamivāntike gauḥ || 34 ||
[Analyze grammar]

niḥśvasya dīrghaṃ sa śiraḥ prakampya tasmiṃśca jīrṇe viniveśya cakṣuḥ |
tāṃ caiva dṛṣṭvā janatāṃ saharṣāṃ vākyaṃ sa saṃvignamidaṃ jagāda || 35 ||
[Analyze grammar]

evaṃ jarā hanti ca nirviśeṣaṃ smṛtiṃ ca rūpaṃ ca parākramaṃ ca |
na caiva saṃvegamupaiti lokaḥ pratyakṣato 'pīdṛśamīkṣamāṇaḥ || 36 ||
[Analyze grammar]

evaṃ gate sūta nivartayāśvān śīghraṃ gṛhāṇyeva bhavānprayātu |
udyānabhūmau hi kuto ratirme jarābhave cetasi vartamāne || 37 ||
[Analyze grammar]

athājñayā bhartṛsutasya tasya nivartayāmāsa rathaṃ niyantā |
tataḥ kumāro bhavanaṃ tadeva cintāvaśaḥ śūnyamiva prapede || 38 ||
[Analyze grammar]

yadā tu tatraiva na śarma lebhe jarā jareti praparīkṣamāṇaḥ |
tato narendrānumataḥ sa bhūyaḥ krameṇa tenaiva bahirjagāma || 39 ||
[Analyze grammar]

athāparaṃ vyādhiparītadehaṃ ta eva devāḥ sasṛjurmanuṣyam |
dṛṣṭvā ca taṃ sārathimābabhāṣe śauddhodanistadgatadṛṣṭireva || 40 ||
[Analyze grammar]

sthūlodaraḥ śvāsacalaccharīraḥ srastāṃsabāhuḥ kṛśapāṇdugātraḥ |
ambeti vācaṃ karuṇaṃ bruvāṇaḥ paraṃ samāśliṣya naraḥ ka eṣaḥ || 41 ||
[Analyze grammar]

tato 'bravītsārathirasya saumya dhātuprakopaprabhavaḥ pravṛddhaḥ |
rogābhidhānaḥ sumahānanarthaḥ śakro 'pi yenaiṣa kṛto 'svatantraḥ || 42 ||
[Analyze grammar]

ityūcivān rājasutaḥ sa bhūyastaṃ sānukampo naramīkṣamāṇaḥ |
asyaiva jātaḥ pṛthageṣa doṣaḥ sāmānyato rogabhayaṃ prajānām || 43 ||
[Analyze grammar]

tato babhāṣe sa rathapraṇetā kumāra sādhāraṇa eṣa doṣaḥ |
evaṃ hi rogaiḥ paripīḍyamāno rujāturo harṣamupaiti lokaḥ || 44 ||
[Analyze grammar]

iti śrutārthaḥ sa viṣaṇṇacetāḥ prāvepatāmbūrmigataḥ śaśīva |
idaṃ ca vākyaṃ karuṇāyamānaḥ provāca kiñcinmṛdunā svareṇa || 45 ||
[Analyze grammar]

idaṃ ca rogavyasanaṃ prajānāṃ paśyaṃśca viśrambhamupaiti lokaḥ |
vistīrṇavijñānamaho narāṇāṃ hasanti ye rogabhayairamuktāḥ || 46 ||
[Analyze grammar]

nivartyatāṃ sūta vahiḥprayāṇānnarendrasadmaiva rathaḥ prayātu |
śrutvā ca me rogabhayaṃ ratibhyaḥ pratyāhataṃ saṅkucatīva cetaḥ || 47 ||
[Analyze grammar]

tato nivṛttaḥ sa nivṛttaharṣaḥ pradhyānayuktaḥ praviveśa sadma |
taṃ dvistathā prekṣya ca saṃnivṛttaṃ puryāgamaṃ bhūmipatiścakāra || 48 ||
[Analyze grammar]

śrutvā nimittaṃ tu nivartanasya santyaktamātmānamanena mene |
mārgasya śaucādhikṛtāya caiva cukrośa ruṣṭo 'pi ca nogradaṇḍaḥ || 49 ||
[Analyze grammar]

bhūyaśca tasmai vidadhe sutāya viśeṣayuktaṃ viṣayaprakāram |
calendriyatvādapi nāpi śakto nāsmānvijahyāditi nāthamānaḥ || 50 ||
[Analyze grammar]

yadā ca śabdādibhirindriyārthairantaḥpure naiva suto 'sya reme |
tato vahirvyādiśati sma yātrāṃ rasāntaraṃ syāditi manyamānaḥ || 51 ||
[Analyze grammar]

snehācca bhāvaṃ tanayasya buddhvā saṃvegadoṣānavicintya kāṃścit |
yogyāḥ samājñāpayati sma tatra kalāsvabhijña iti vāramukhyāḥ || 52 ||
[Analyze grammar]

tato viśeṣeṇa narendramārge svalaṅkṛte caiva parīkṣite ca |
vyatyāsya sūtaṃ ca rathaṃ ca rājā prasthāpayāmāsa bahiḥ kumāram || 53 ||
[Analyze grammar]

tatastathā gacchati rājaputre taireva devairvihito gatāsuḥ |
taṃ caiva mārge mṛtamuhyamānaṃ sūtaḥ kumāraśca dadarśa nānyaḥ || 54 ||
[Analyze grammar]

athābravīdrājasutaḥ sa sūtaṃ naraiścaturbhirhriyate ka eṣaḥ |
dīnairmanuṣyairanugamyamāno yo bhūṣito 'śvāsyavarudyate ca || 55 ||
[Analyze grammar]

tataḥ sa śuddhātmabhireva devaiḥ śuddhādhivāsairabhibhūtacetāḥ |
avācyamapyarthamimaṃ niyantā pravyājahārārthavidīśvarāya || 56 ||
[Analyze grammar]

buddhīndriyaprāṇaguṇairviyuktaḥ supto visañjñastṛṇakāṣṭhabhūtaḥ |
sambadhya saṃrakṣya ca yatnavadbhiḥ priyāpriyaistyajyata eṣa ko 'pi || 57 ||
[Analyze grammar]

iti praṇetuḥ sa niśamya vākyaṃ sañcukṣubhe kiñciduvāca cainam |
kiṃ kevalasyaiva janasya dharmaḥ sarvaprajānāmayamīdṛśo 'ntaḥ || 58 ||
[Analyze grammar]

tataḥ praṇetā vadati sma tasmai sarvaprajānāmayamantakarmā |
hīnasya madhyasya mahātmano vā sarvasya loke niyato vināśaḥ || 59 ||
[Analyze grammar]

tataḥ sa dhīro 'pi narendrasūnuḥ śrutvaiva mṛtyuṃ viṣasāda sadyaḥ |
aṃsena saṃśliṣya ca kūbarāgraṃ provāca nihrādavatā svareṇa || 60 ||
[Analyze grammar]

iyaṃ ca niṣṭhā niyataṃ prajānāṃ pramādyati tyaktabhayaśca lokaḥ |
manāṃsi śaṅke kaṭhināni nṝṇāṃ svasthāstathā hyadhvani vartamānāḥ || 61 ||
[Analyze grammar]

tasmādrathaṃ sūta nivartyatāṃ no vihārabhūmau na hi deśakālaḥ |
jānanvināśaṃ kathamārttikāle sacetanaḥ syādiha hi pramattaḥ || 62 ||
[Analyze grammar]

iti bruvāṇe 'pi narādhipātmaje nivartayāmāsa sa naiva taṃ ratham |
viśeṣayuktaṃ tu narendraśāsanātsa padmakhaṇḍaṃ vanameva niryayau || 63 ||
[Analyze grammar]

tataḥ śivaṃ kusumitabālapādapaṃ paribhramatpramuditamattakokilam |
vipānavatsakamalacārudīrghikaṃ dadarśa tadvanamiva nandanaṃ vanam || 64 ||
[Analyze grammar]

varāṅganāgaṇakalilaṃ nṛpātmajastato balādvanamabhinīyate sma tat |
varāpsarovṛtamalakādhipālayaṃ navavrato muniriva vighnakātaraḥ || 65 ||
[Analyze grammar]