Buddha-Carita [sanskrit]

by E. B. Cowell | 2003 | 11,474 words | ISBN-10: 8187418788 | ISBN-13: 9788187418788

The Buddha Carita (Saddharma-pundarika) by Asvaghosa a famous Sanskrit text revolving around the live and exploits of the Buddha. The Buddha Carita (Buddhacarita) is written in the style of a Kavya (or Mahakavya, epic poetry) and extant original Sanskrit text consists of roughly 1,000 metrical verses.

ā janmano janmajarāntakasya tasyātmajasyātmajitaḥ sa rājā |
ahanyahanyarthagajāśvamitrairvṛddhiṃ yayau sindharivāmbuvegaiḥ || 1 ||
[Analyze grammar]

dhanasya ratnasya ca tasya tasya kṛtākṛtasyaiva ca kāñcanasya |
tadā hi naikātmanidhīnavāpi manorathasyāpyatibhārabhūtān || 2 ||
[Analyze grammar]

ye padmakalpairapi ca dvipendrairna maṇḍalaṃ śakyamihābhinetum |
madotkaṭā haimavatā gajāste vināpi yatnādupatasthurenam || 3 ||
[Analyze grammar]

nānāṅkacihnairnavahemabhāṇḍairabhūṣitairlambasaṭaistathānyaiḥ |
sañcukṣubhe cāsya puraṃ turaṅgairbalena maitryā ca dhanena cāptaiḥ || 4 ||
[Analyze grammar]

puṣṭāśca tuṣṭāśca tadāsya rājye sādhvyo 'rajaskā guṇavatpayaskāḥ |
udagravatsaiḥ sahitā babhūvurbahvyo bahukṣīraduhaśca gāvaḥ || 5 ||
[Analyze grammar]

madhyasthatāṃ tasya ripurjagāma madhyasvabhāvaḥ prayayau suhṛttvam |
viśeṣato dārḍhyamiyāya mitraṃ dvāvasya pakṣāvaparastu nāśam || 6 ||
[Analyze grammar]

tathāsya mandānilameghaśabdaḥ saudāminīkuṇḍalamaṇḍitāṅgaḥ |
vināśmavarṣāśanipātadoṣaiḥ kāle ca deśe pravavarṣa devaḥ || 7 ||
[Analyze grammar]

ruroha saṃyak phalavadyathārtu tadākṛtenāpi kṛṣiśrameṇa |
tā eva caivauṣadhayo rasena sāreṇa caivābhyadhikā babhūvuḥ || 8 ||
[Analyze grammar]

śarīrasandehakare 'pi kāle saṅgrāmasaṃmarda iva pravṛtte |
svasthāḥ sukhaṃ caiva nirāmayaṃ ca prajajñire garbhadharāśca nāryaḥ || 9 ||
[Analyze grammar]

yacca pratibhvo vibhave 'pi śakye na prārthayanti sma narāḥ parebhyaḥ |
abhyarthitaḥ sūkṣmadhano 'pi cāyaṃ tadā na kaścidvimukho babhūva || 10 ||
[Analyze grammar]

nāśe vadho bandhuṣu nāpyadātā naivāvrato nānṛtiko na hiṃsraḥ |
āsīttadā kaścana tasya rājye rājño yayāteriva nāhuṣasya || 11 ||
[Analyze grammar]

udyānadevāyatanāśramāṇāṃ kūpaprapāpuṣkariṇīvanānām |
cakruḥ kriyāstatra ca dharmakāmāḥ pratyakṣataḥ svargamivopalabhya || 12 ||
[Analyze grammar]

muktaśca durbhikṣabhayāmayebhyo hṛṣṭo janaḥ svargamivābhireme |
patnīṃ patirvā mahiṣī patiṃ vā parasparaṃ na vyabhiceratuśca || 13 ||
[Analyze grammar]

kaścitsiṣeve rataye na kāmaṃ kāmārthamarthaṃ na jugopa kaścit |
kaściddhanārthaṃ na cacāra dharmaṃ dharmāya kaścinna cakāra hiṃsām || 14 ||
[Analyze grammar]

steyādibhiścāpyabhitaśca naṣṭaṃ svasthaṃ svacakraṃ paracakramuktam |
kṣemaṃ subhikṣaṃ ca babhūva tasya purāṇyaraṇyāni yathaiva rāṣṭre || 15 ||
[Analyze grammar]

tadā hi tajjanmani tasya rājño manorivādityasutasya rājye |
cacāra harṣaḥ praṇanāśa pāpmā jajvāla dharmaḥ kaluṣaḥ śaśāma || 16 ||
[Analyze grammar]

evaṃvidhā rājasutasya tasya sarvārthasiddhiśca yato babhūva |
tato nṛpastasya sutasya nāma sarvārthasiddho 'yamiti pracakre || 17 ||
[Analyze grammar]

devī tu māyā vibudharṣikalpaṃ dṛṣṭvā viśālaṃ tanayaprabhāvam |
jātaṃ praharṣaṃ na śaśāka soḍhuṃ tato 'vināśāya divaṃ jagāma || 18 ||
[Analyze grammar]

tataḥ kumāraṃ suragarbhakalpaṃ snehena bhāvena ca nirviśeṣam |
mātṛṣvasā mātṛsamaprabhāvā saṃvardhayāmātmajavadbabhūva || 19 ||
[Analyze grammar]

tataḥ sa bālārka ivodayasthaḥ samīrito vahnirivānilena |
krameṇa samyagvavṛdhe kumārastārādhipaḥ pakṣa ivātamaske || 20 ||
[Analyze grammar]

tato mahārhāṇi ca candanāni ratnāvalīścauṣadhibhiḥ sagarbhāḥ |
mṛgaprayuktānrathakāṃśca haimānācakrire 'smai suhṛdālayebhyaḥ || 21 ||
[Analyze grammar]

vayo 'nurūpāṇi ca bhūṣaṇāni hiraṇmayā hastimṛgāśvakāśca |
rathāśca gāvo vasanaprayuktā gantrīśca cāmīkararūpyacitrāḥ || 22 ||
[Analyze grammar]

evaṃ sa taistairviṣayopacārairvayo 'nurūpairupacaryamāṇaḥ |
bālo 'pyabālapratimo babhūva dhṛtyā ca śaucena dhiyā śriyā ca || 23 ||
[Analyze grammar]

vayaśca kaumāramatītya madhyaṃ samprāpya bālaḥ sa hi rājasūnuḥ |
alpairahobhirbahuvarṣagamyā jagrāha vidyāḥ svakulānurūpāḥ || 24 ||
[Analyze grammar]

naiḥśreyasaṃ tasya tu bhavyamarthaṃ śrutvā purastādasitānmahārṣeḥ |
kāmeṣu saṅgaṃ janayāmbabhūva vṛddhirbhavacchākyakulasya rājñaḥ || 25 ||
[Analyze grammar]

kulāttato 'smai sthiraśīlayuktātsādhvīṃ vapurhrīvinayopapannām |
yaśodharāṃ nāma yaśoviśālāṃ tulyābhidhānaṃ śriyamājuhāva || 26 ||
[Analyze grammar]

athāparaṃ bhūmipateḥ priyo 'yaṃ sanatkumārapratimaḥ kumāraḥ |
sārdhaṃ tayā śākyanarendravadhvā śacyā sahasrākṣa ivābhireme || 27 ||
[Analyze grammar]

kiñcinmanaḥkṣobhakaraṃ pratīpaṃ kathañca paśyediti so 'nucintya |
vāsaṃ nṛpo hyādiśati sma tasmai harmyodareṣveva na bhūpracāram || 28 ||
[Analyze grammar]

tataḥ śarattoyadapāṇḍareṣu bhūmau vimāneṣviva rañjiteṣu |
harmyeṣu sarvartusukhāśrayeṣu strīṇāmudārairvijahāra tūryaiḥ || 29 ||
[Analyze grammar]

kalairhi cāmīkarabaddhakakṣairnārīkarāgrābhihatairmṛdaṅgaiḥ |
varāpsaronṛtyasamaiśca nṛtyaiḥ kailāsavattadbhavanaṃ rarāja || 30 ||
[Analyze grammar]

vāgbhiḥ kalābhirlalitaiśca hārairmadaiḥ sakhelairmadhuraiśca hāsaiḥ |
taṃ tatra nāryo ramayāmbabhūvurbhrūvañcitairardhanirīkṣitaiśca || 31 ||
[Analyze grammar]

tataśca kāmāśrayapaṇḍitābhiḥ strībhirgṛhīto ratikarkaśābhiḥ |
vimānapṛṣṭhānna mahīṃ jagāma vimānapṛṣthādiva puṇyakarmā || 32 ||
[Analyze grammar]

nṛpastu tasyaiva vivṛddhihetostadbhāvinārthena ca codyamānaḥ |
śame 'bhireme virarāma pāpādbheje damaṃ saṃvibabhāja sādhūn || 33 ||
[Analyze grammar]

nādhīravat kāmasukhe sasañje na saṃrarañje viṣamaṃ jananyām |
dhṛtyendriyāśvāṃścapalān vijigye bandhūṃśca paurāṃśca guṇairjigāya || 34 ||
[Analyze grammar]

nādhyaiṣṭa duḥkhāya parasya vidyāṃ jñānaṃ śivaṃ yattu tadadhyagīṣṭa |
svābhyaḥ prajābhyo hi yathā tathaiva sarvaprajābhyaḥ śivamāśaśaṃse || 35 ||
[Analyze grammar]

taṃ bhāsuraṃ cāṅgirasādhidevaṃ yathāvadānarca tadāyuṣe saḥ |
juhāva havyānyakṛśe kṛśānau dadau dvijebhyaḥ kṛśanaṃ ca gāśca || 36 ||
[Analyze grammar]

sasnau śarīraṃ pavituṃ manaśca tīrthāmbubhiścaiva guṇāmbubhiśca |
vedopadiṣṭaṃ samamātmajaṃ ca somaṃ papau śāntisukhaṃ ca hārdam || 37 ||
[Analyze grammar]

sāntvaṃ babhāṣe na ca nārthavadyajjajalpa tattvaṃ na ca vipriyaṃ yat |
sāntvaṃ hyatatvaṃ paruṣaṃ ca tattvaṃ hriyāśakannātmana eva vaktum || 38 ||
[Analyze grammar]

iṣṭeṣvaniṣṭeṣu ca kāryavatsu na rāgadoṣāśrayatāṃ prapede |
śivaṃ siṣeve 'vyavahāralabdhaṃ yajñaṃ hi mene na tathā yathāvat || 39 ||
[Analyze grammar]

āśāvate cābhigatāya sadyo deyāmbubhistarṣamacecchidiṣṭa |
yuddhādṛte vṛttaparaśvadhena dvidarpamudvṛttamabebhidiṣṭa || 40 ||
[Analyze grammar]

ekaṃ vininye sa jugopa sapta saptaiva tatyāja rarakṣa pañca |
prāpa trivargaṃ bubudhe trivargaṃ jajñe dvivargaṃ prajahau dvivargam || 41 ||
[Analyze grammar]

kṛtāgaso 'pi pratipādya vadhyānnājīghanannāpi ruṣā dadarśa |
babandha sāntvena phalena caitāṃstyāgo 'pi teṣāṃ hyanapāyadṛṣṭaḥ || 42 ||
[Analyze grammar]

ārṣāṇyacārītparamavratāni vairāṇyahāsīccirasambhṛtāni |
yaśāṃsi cāpadguṇagandhavanti rajāṃsyahāsīnmalinīkarāṇi || 43 ||
[Analyze grammar]

na cājihīrṣīdbalimapravṛttaṃ na cācikīrṣītparavastvabhidhyām |
na cāvivakṣīddviṣatāmadharmaṃ na cādidhakṣīddhṛdayena manyum || 44 ||
[Analyze grammar]

tasmiṃstathā bhūmipatau pravṛtte bhṛtyāśca paurāśca tathaiva ceruḥ |
śamātmake cetasi viprasanne prayuktayogasya yathendriyāṇi || 45 ||
[Analyze grammar]

kāle tataścārupayodharāyāṃ yaśodharāyāṃ suyaśodharāyām |
śauddhodanerāhusapatnavaktro jajñe suto rāhula eva nāmnā || 46 ||
[Analyze grammar]

atheṣṭaputraḥ paramapratītaḥ kulasya vṛddhiṃ prati bhūmipālaḥ |
yathaiva putraprasave nananda tathaiva pautraprasave nananda || 47 ||
[Analyze grammar]

pautrasya me putragato mamaiva snehaḥ kathaṃ syāditi jātaharṣaḥ |
kāle sa taṃ taṃ vidhimālalambe putrapriyaḥ svargamivārurukṣan || 48 ||
[Analyze grammar]

sthitvā pathi prāthamakalpikānāṃ rājarṣabhāṇāṃ yaśasānvitānām |
śuklānyamuktvāpi tapāṃsyatapta yajñe ca hiṃsārahitairayaṣṭa || 49 ||
[Analyze grammar]

ajājvaliṣṭātha sa puṇyakarmā nṛpaśriyā caiva tapaḥśriyā ca |
kulena vṛttena dhiyā ca dīptastejaḥ sahasrāṃśurivotsisṛkṣuḥ || 50 ||
[Analyze grammar]

svāyambhuvaṃ cārcikamarcayitvā jajāpa putrasthitaye sthitaśrīḥ |
cakāra karmāṇi ca duṣkarāṇi prajāḥ sisṛkṣuḥ ka ivādikāle || 51 ||
[Analyze grammar]

tatjyāja śastraṃ vimamarśa śāstraṃ śamaṃ siṣeve niyamaṃ viṣehe |
vaśīva kañcidviṣayaṃ na bheje piteva sarvānviṣayān dadarśa || 52 ||
[Analyze grammar]

babhāra rājyaṃ sa hi putrahetoḥ putraṃ kulārthaṃ yaśase kulaṃ tu |
svargāya śabdaṃ divamātmahetordharmārthamātmasthitimācakāṅkṣa || 53 ||
[Analyze grammar]

evaṃ sa dharmaṃ vividhaṃ cakāra sadbhirnipātaṃ śrutitaśca siddham |
dṛṣṭvā kathaṃ putramukhaṃ suto me vanaṃ na yāyāditi nāthamānaḥ || 54 ||
[Analyze grammar]

rirakṣiṣantaḥ śriyamātmasaṃsthā rakṣanti putrān bhuvi bhūmipālāḥ |
putraṃ narendraḥ sa tu dharmakāmo rarakṣa dharmādviṣayeṣvamuñcat || 55 ||
[Analyze grammar]

vanamanupamasattvā bodhisattvāstu sarve viṣayasukharasajñā jagmurutpannaputrāḥ |
ata upacitakarmā rūḍhamūle 'pi hetau sa ratimupasiṣeve bodhimāpannayāvat || 56 ||
[Analyze grammar]

Other editions:

Also see the following editions of the Sanskrit text or (alternative) English translations of the Buddha-carita Chapter 2

Cover of edition (2003)

The Buddha-Carita By Asvaghosa or Acts of Buddha
by E. B. Cowell (2003)

Buy now!
Cover of edition (2011)

Buddha Carita of Asvaghosa
by Shanti Lal Nagar (2011)

Sanskrit text, English translation, Index of Verse and Photographs of Archaeological Evidence

Buy now!
Cover of edition (2016)

Asvaghosa’s Buddhacarita or Acts of the Buddha
by E. H. Johnston (2016)

Sanskrit text with English Translation

Buy now!
Help me keep this site Ad-Free

For over a decade, this site has never bothered you with ads. I want to keep it that way. But I humbly request your help to keep doing what I do best: provide the world with unbiased truth, wisdom and knowledge.

Let's make the world a better place together!

Like what you read? Consider supporting this website: