Chapter 11

[English text for this chapter is available]

sūta uvāca |
iti proktā tadā devi vismayotphullalocanā |
romāṃcakañcukā subhrūḥ punaḥ papraccha bhūsurāḥ || 1 ||
[Analyze grammar]

devyuvāca |
dhanyā'haṃ kṛtapuṇyā'haṃ tapaḥ sucaritaṃ mayā |
yadeṣa kṣetra mahimā mahādevānmayā śrutaḥ || 2 ||
[Analyze grammar]

bhagavandevadeveśa saṃsārārṇavatāraka |
pṛṣṭaṃ tu yanmayā pūrvaṃ tatsarvaṃ kathitaṃ hara || 3 ||
[Analyze grammar]

punaśca devadeveśa tvadvākyāmṛtaraṃjitā |
na tṛptimadhigacchāmi devadeva maheśvara || 4 ||
[Analyze grammar]

kiṃcitpraṣṭumanāścāsmi prabhāsakṣetravistaram |
tanme kathaya kāmeśa dayāṃ kṛtvā jagatprabho || 5 ||
[Analyze grammar]

īśvara uvāca |
pṛthivyā madhyagarbhasthaṃ jaṃbūdvīpamiti smṛtam |
tacca vai navadhā bhinnaṃ varṣabhedena sundari || 6 ||
[Analyze grammar]

tasyādyaṃ bhārataṃ varṣaṃ taccāpi navadhā smṛtam |
navayojanasāhasraṃ dakṣiṇottaramānataḥ || 7 ||
[Analyze grammar]

aśītiśca sahasrāṇi pūrvapaścāyataṃ smṛtam |
uttare himavānasti kṣīrodo dakṣiṇe smṛtaḥ || 8 ||
[Analyze grammar]

etasminnaṃtare devi bhārataṃ kṣetramuttamam |
kṛtaṃ tretā dvāparaṃ ca tiṣyaṃ yugacatuṣṭayam || 9 ||
[Analyze grammar]

atraivaiṣā yugāvasthā caturvarṇaśca vai janaḥ |
catvāri trīṇi ca dve ca tathaivaika śaracchatam || 10 ||
[Analyze grammar]

jīvantyatra narā devi kṛtatretādiṣu kramāt |
yadetatpārthivaṃ padmaṃ catuṣpatraṃ mayoditam || 11 ||
[Analyze grammar]

varṣāṇi bhāratādyāni patrāṇyasya caturddiśam |
bhārataṃ ketumālaṃ ca kuru bhadrāśvameva ca || 12 ||
[Analyze grammar]

bhārataṃ nāma yadvarṣaṃ dākṣiṇātyaṃ mayoditam |
dakṣiṇāparato yasya pūrveṇa ca mahodadhiḥ |
himavānuttareṇāsya kārmukasya yathā guṇaḥ || 13 ||
[Analyze grammar]

tadetadbhārataṃ varṣaṃ sarvabījaṃ varānane |
tatkarmabhūmirnānyatra saṃprāptiḥ puṇyapāpayoḥ || 14 ||
[Analyze grammar]

devānāmapi deveśi sadaivaiṣa manorathaḥ |
api mānuṣyamāpsyāmo bhārate pratyuta kṣitau || 15 ||
[Analyze grammar]

bhadrāśve'śvaśirā viṣṇurbhārate kūrmasaṃsthitaḥ |
varāhaḥ ketumāle ca matsyarūpastathottare || 16 ||
[Analyze grammar]

teṣu nakṣatravinyāsādviṣayāḥ samavasthitāḥ |
caturṣvapi mahādevi vigraho nava pādakaḥ || 17 ||
[Analyze grammar]

bhārato yo mahādevi kūrmarūpeṇa saṃsthitaḥ |
nakṣatragrahavinyāsaṃ tasya te kathayāmyaham || 18 ||
[Analyze grammar]

prāṅmukho bhagavāndevo kūrmarūpī vyavasthitaḥ |
ākramya bhārataṃ varṣaṃ navabhedamidaṃ priye || 19 ||
[Analyze grammar]

navadhā saṃsthitasyāsya nakṣatrāṇi nibodha me |
kṛttikā rohiṇī saumyaṃ tṛtīyaṃ kūrmapṛṣṭhigam || 20 ||
[Analyze grammar]

raudraṃ punarvasuḥ puṣyaṃ nakṣatratritayaṃ mukhe |
āśleṣākhyaṃ tathā paitraṃ phālgunī prathamā priye || 21 ||
[Analyze grammar]

nakṣatratritayaṃ pādamāśritaṃ pūrvadakṣiṇam |
phālgunī cottarā hastaṃ citrā carkṣatrayaṃ smṛtam || 22 ||
[Analyze grammar]

kūrmasya dakṣiṇe kukṣau carkṣapādaṃ tathā'param |
svātī viśākhā maitraṃ ca nairṛte tritayaṃ smṛtam || 23 ||
[Analyze grammar]

aiṃdraṃ mūlaṃ tathāṣāḍhā pṛṣṭhe tu tritayaṃ smṛtam |
āṣāḍhā śravaṇaṃ caiva dhaniṣṭhā cātra śabditā || 24 ||
[Analyze grammar]

nakṣatritayaṃ pāde vāyavye tu yaśasvini |
vāruṇaṃ caiva nakṣatraṃ tathā proṣṭhapadādvayam || 25 ||
[Analyze grammar]

kūrmasya vāmakukṣau tu tritayaṃ saṃsthitaṃ priye |
revatī cāśvidaivatyaṃ yāmyaṃ carkṣamiti trayam |
īśapāde samākhyātaṃ śubhāśubhaphalaṃ śṛṇu || 26 ||
[Analyze grammar]

yasyarkṣasya patiryo vai grahastaddhainyato bhayam |
taddeśasya mahādevi tathotkarṣe śubhāgamaḥ || 27 ||
[Analyze grammar]

eṣa kūrmo mayākhyāto bhārate bhagavāniha |
nārāyaṇo hyaciṃtyātmā yatra sarvaṃ pratiṣṭhitam || 28 ||
[Analyze grammar]

meṣavṛṣau hṛdo madhye mukhe ca mithunādikau |
prāgdakṣiṇe tathā pāde karkasiṃhau vyavasthitau || 29 ||
[Analyze grammar]

siṃhakanyātulāścaiva kukṣau rāśitrayaṃ smṛtam |
dhaṭo'dha vṛścikāścobhau pāde dakṣiṇapaścime || 30 ||
[Analyze grammar]

pucche tu vṛścikaścaiva sadhanuśca vyavasthitaḥ |
vāyavye vāmapāde ca dhanurgrāhādikaṃ trayam || 31 ||
[Analyze grammar]

kumbha mīnau tathā cāsya uttarāṃ kukṣimāśritau |
mīnameṣau mahādevi pāde pūrvottare sthitau || 32 ||
[Analyze grammar]

kūrmmadeśāṃstatharkṣāṇi deśeṣveteṣu vai priye |
rāśayaśca tatharkṣeṣu grahā rāśivyavasthitāḥ || 33 ||
[Analyze grammar]

tasmādgraharkṣapīḍāsu deśapīḍāṃ vinirdiśet |
tatra snānaṃ prakurvaṃti dānaṃ homādikaṃ tathā || 34 ||
[Analyze grammar]

sa eṣa vaiṣṇavaḥ pādo devi madhye graho'sya yaḥ |
nārāyaṇākhyo'ciṃtyātmā kāraṇaṃ jagataḥ prabhuḥ || 35 ||
[Analyze grammar]

bhaumaśukrabudheṃdvarkabudhaśukramahīsutāḥ |
gurumaṃdāsurācāryā meṣādīnāmadhīśvarāḥ || 36 ||
[Analyze grammar]

evaṃvidho mahādevi kūrmarūpī janārddanaḥ |
tasya naiṛtapāde tu saurāṣṭra iti viśrutaḥ || 37 ||
[Analyze grammar]

sa caivaṃ navadhā bhinnaḥ purabhedena suṃdari |
tasya yo navamo bhāgaḥ sāgarasya ca sannidhau || 38 ||
[Analyze grammar]

prabhāsa iti vikhyāto mama devi priyaḥ sadā |
yojanānāṃ daśadve ca vistīrṇaḥ parimaṇḍalam || 39 ||
[Analyze grammar]

madhyesya pīṭhikā proktā paṃcayojanavistṛtā |
tanmadhye madgrahaṃ devi tiṣṭhatyudadhisaṃnidhau || 40 ||
[Analyze grammar]

tasya madhye mahādevi liṃgarūpo vasāmyaham || 41 ||
[Analyze grammar]

kṛtasmarātpaścimato dhanuṣāṃ ca śatatraye |
vasāmi tatra deveśi tvayā saha varānane || 42 ||
[Analyze grammar]

tanme sthānaṃ mahādevi kailāsādapi vallabham |
gocarmamātraṃ tatrāpi mahāgopyaṃ varānane || 43 ||
[Analyze grammar]

akathyaṃ devadeveśi tava snehātprakāśitam |
etatprābhāsikaṃ kṣetraṃ prabhayā dīpitaṃ mama || 44 ||
[Analyze grammar]

tena prabhāsamityuktamādikalpe varānane |
dvitīye tu prabhā labdhā sarvairdevaiḥ savāsavaiḥ || 45 ||
[Analyze grammar]

mama prabhābhā deveśi tena prābhāsikaṃ smṛtam |
prabhāvavanto deveśi yatra saṃti mahāsurāḥ || 46 ||
[Analyze grammar]

athavā tena lokeṣu prabhāsamiti kīrtyate |
prathamaṃ bhāsate devi sarveṣāṃ bhuvi tejasām |
tīrthānāmāditīrthaṃ yatprabhāsaṃ tena kīrttitam || 47 ||
[Analyze grammar]

prakṛṣṭaṃ bhānurathavā bhāsito viśvakarmaṇā |
yatra sākṣātprabhāpāto jātaḥ prābhāsikaṃ tataḥ || 48 ||
[Analyze grammar]

athavā dakṣasaṃśaptenendunā niṣprabheṇaca |
tatra devi prabhā labdhā tena prābhāsikaṃ smṛtam |
proddadhe bhāratī devī hyaurvāgniṃ vaḍavānalam || 49 ||
[Analyze grammar]

athavā tena deveśi prabhāsamiti kīrtyate |
prakṛṣṭā bhāratī brāhmī viproktā śrūyate'dhvani |
sadā yatra mahādevi prabhāsaṃ tena kīrtitam || 50 ||
[Analyze grammar]

prollasadvīcibhirbhāti sarvadā sāgaraḥ priye |
tena prabhāsa nāmeti triṣu lokeṣu viśrutam || 51 ||
[Analyze grammar]

pratyakṣaṃ bhāskaro yatra sadā tiṣṭhati bhāmini |
tena prabhāsa nāmeti prasiddhimagamatkṣitau || 52 ||
[Analyze grammar]

prakṛṣṭaṃ bhāvināṃ sarvaṃ kāmaṃ tatra dadāmyaham |
tena prabhāsanāmeti tīrthaṃ trailokyaviśrutam || 53 ||
[Analyze grammar]

kalpabhedena nāmāni tathaiva surasundari |
niruktabhedairbahudhā bhidyaṃte kāraṇaiḥ priye |
prabhāsamiti yannāma dātavyaṃ niścalaṃ smṛtam || 54 ||
[Analyze grammar]

aptattve saṃsthitaṃ devi viṣṇorādyakalevare |
iti te kathitaṃ devi saṃkṣepātkṣetrakāraṇam || 55 ||
[Analyze grammar]

punaste kathayāmyadya yatpṛcchasi varānane |
tadbrūhi śīghraṃ kalyāṇi yatte manasi vartate || 56 ||
[Analyze grammar]

devyuvāca |
asminkalpe yathā jātaṃ kṣetraṃ prābhāsikaṃ hara |
tanme vistarato brūhi utpattiṃ kāraṇaṃ tathā || 57 ||
[Analyze grammar]

īśvara uvāca |
śṛṇu devi pravakṣyāmi yathāvatkṣetrakāraṇam |
yacchrutvā mānavo bhaktyā mucyate sarvapātakaiḥ || 58 ||
[Analyze grammar]

ādikṣetrasya māhātmyaṃ rahasyaṃ pāpanāśanam |
kathayiṣye varārohe tava snehena bhāmini || 59 ||
[Analyze grammar]

asminkalpe tu yaddevi ādāveva varānane |
svāyaṃbhuve manau tatra brahmaṇaḥ sṛjataḥ purā || 60 ||
[Analyze grammar]

dakṣiṇāllocanājjātaḥ pūrvaṃ sūrya iti priye |
tataḥ kālāntare tasya bhārye dve ca babhūvatuḥ || 61 ||
[Analyze grammar]

tayostu rājñī dyaurjñeyā nikṣubhā pṛthivī smṛtā |
saumyamāsasya saptamyāṃ dyauḥ sūryeṇa ca yujyate || 62 ||
[Analyze grammar]

māghamāse tu saptamyāṃ mahyā saha bhavedraviḥ |
bhūścādityaśca bhagavāngacchate saṃgamaṃ tadā || 63 ||
[Analyze grammar]

ṛtusnātā mahī tatra garbhaṃ gṛhṇāti bhāskarāt |
dyaurjalaṃ sūyate garbhaṃ varṣāsvāsviha bhūtale || 64 ||
[Analyze grammar]

tatastrailokyavṛttyarthaṃ mahī sasyāni sūyate |
sasyopayogātsaṃhṛṣṭā juhvatyāhutibhirdvijāḥ || 65 ||
[Analyze grammar]

svāhākārasvadhākārairyajaṃti pitṛdevatāḥ |
niḥkṣudhaḥ kurute yasmādgarbhauṣadhisudhā'mṛtaiḥ || 66 ||
[Analyze grammar]

martyānpitṝṃśca devāṃśca tena bhūrnikṣubhā smṛtā |
yathā rājñī ca saṃjātā yasya ceyaṃ sutā matā || 67 ||
[Analyze grammar]

apatyāni ca yānyasyāstāni vakṣyāmyaśeṣataḥ |
marīcirbrahmaṇaḥ putro mārīcaḥ kaśyapaḥ smṛtaḥ || 68 ||
[Analyze grammar]

tasmāddhiraṇyakaśipuḥ prahrādastasya cātmajaḥ |
prahrādasya suto nāmnā virocana iti smṛtaḥ || 69 ||
[Analyze grammar]

virocanasya bhaginī saṃjñā yā jananī tu sā |
hiraṇyakaśipoḥ pautrī diteḥ putrasya sā smṛtā || 70 ||
[Analyze grammar]

sā viśvakarmaṇaḥ patnī prāhlādī procyate budhaiḥ || 71 ||
[Analyze grammar]

atha nāmnātirūpeti marīciduhitā śubhā |
patnī hyaṃgirasaḥ sā tu jananī ca bṛhaspateḥ || 72 ||
[Analyze grammar]

bṛhaspatestu bhaginī viśrutā brahmavādinī |
prabhāsasya tu sā patnī vasūnāmaṣṭamasya vai || 73 ||
[Analyze grammar]

prasūtā viśvakarmāṇaṃ sarvaśilpavatāṃ varam |
sa caiva nāmnā tvaṣṭā tu punastridaśavārddhakiḥ || 74 ||
[Analyze grammar]

devācāryasya tasyeyaṃ duhitā viśvakarmaṇaḥ |
sureṇuriti vikhyātā triṣu lokeṣu bhāminī || 75 ||
[Analyze grammar]

prahrādaputrī yā proktā bhāryā vaṣṭustu sā smṛtā |
tasyāṃ sa janayāmāsa putrīstā lokamātaraḥ || 76 ||
[Analyze grammar]

rājñī saṃjñā ca dyaustvaṣṭrī prabhā saiva vibhāvyate |
tasyāstu valayā chāyā nikṣubhā sā mahīyasī || 77 ||
[Analyze grammar]

sā tu bhāryā bhagavatī mārtaṃḍasya mahātmanaḥ |
sādhvī pativratā devī rūpayauvanaśālinī || 78 ||
[Analyze grammar]

na tu tāṃ nararūpeṇa bhāryāṃ bhajati vai purā |
ādityasyeha taptatvaṃ mahatā svena tejasā || 79 ||
[Analyze grammar]

gātreṣvapratirūpeṣu māsikāṃtamivābhavat |
saṃjñā ca raviṇā dṛṣṭā nimīlayati locane |
yatastataḥ saroṣo'rkaḥ saṃjñāṃ vacanamabravīt || 80 ||
[Analyze grammar]

raviruvāca |
mayi dṛṣṭe sadā yasmātkuruṣe netrasaṃkṣayam |
tasmājjaniṣyase mūḍhe prajāsaṃyamanaṃ yamam || 81 ||
[Analyze grammar]

īśvara uvāca |
tataḥ sā capalā dṛṣṭiṃ devī cakre bhayākulā |
vilolitadṛśaṃ dṛṣṭvā punarāha ca tāṃ raviḥ || 82 ||
[Analyze grammar]

raviruvāca |
yasmādvilolitā dṛṣṭirmayi dṛṣṭe tvayā punaḥ |
tasmādvilolāṃ tanayāṃ nadīṃ tvaṃ prasaviṣyasi || 83 ||
[Analyze grammar]

īśvara uvāca |
tatastasyāstu saṃjajñe bhartṛśāpena tena vai |
yamaśca yamunā ceyaṃ prakhyātā sumahānadī |
tṛtīyaṃ ca sutaṃ jajñe śrāddhadevaṃ manuṃ śubham || 84 ||
[Analyze grammar]

sāpi saṃjñā ravestejo golākāraṃ mahāprabham |
asahantī ca sā citte cintayāmāsa vai tadā || 85 ||
[Analyze grammar]

kiṃ karomi kva yāsyāmi kva gatāyāśca nirvṛtiḥ |
bhavenmama kathaṃ bhartā kopamarkkaśca neṣyati || 86 ||
[Analyze grammar]

iti saṃcintya bahudhā prajāpatisutā tadā |
bahu mene mahābhāgā pitṛsaṃśrayameva ca || 87 ||
[Analyze grammar]

tataḥ pitṛgṛhaṃ gantuṃ kṛtabuddhiryaśasvinī |
chāyāmayīmātmatanuṃ pratyaṃgamiva nirmitām || 88 ||
[Analyze grammar]

sammukhaṃ prekṣya tāṃ devīṃ svāṃ chāyāṃ vākyamabravīt || 89 ||
[Analyze grammar]

saṃjñovāca |
ahaṃ yāsyāmi bhadraṃ te svakaṃ ca bhavanaṃ pituḥ |
nirvikāraṃ tvayā tvatra stheyaṃ macchāsanācchubhe || 90 ||
[Analyze grammar]

imau ca bālakau mahyaṃ kanyā ca varavarṇinī |
saṃbhāvyā naiva cākhyeyamidaṃ bhagavate tvayā || 91 ||
[Analyze grammar]

pṛṣṭayāpi na vācyaṃ te tathaitadgamanaṃ mama |
tenāsmi nāmasaṃjñeti vācyase tatpratiṣṭhayā || 92 ||
[Analyze grammar]

chāyovāca |
ā keśagrahaṇāddevi ā śāpānnaiva karhicit |
ākhyāsyāmi mataṃ tubhyaṃ gamyatāṃ yatra vāṃchitam || 93 ||
[Analyze grammar]

īśvara uvāca |
ityuktā sā tadā devī jagāma bhavanaṃ pituḥ |
dadarśa tatra tvaṣṭāraṃ tapasā dhūtakalmaṣam || 94 ||
[Analyze grammar]

bahumānācca tenāpi pūjitā viśvakarmaṇā |
varṣāṇāṃ ca sahasraṃ tu vasamānā piturgṛhe |
tasthau pitṛgṛhe sā tu kiṃcitkālamaniṃditā || 95 ||
[Analyze grammar]

tatastāṃ prāha cārvaṃgīṃ pitā nāticiroṣitām |
stutvā tu tanayāṃ premṇā bahumānapuraḥsaram || 96 ||
[Analyze grammar]

viśvakarmovāca |
tvāmeva paśyato vatse dināni subahūnyapi |
muhūrtārddhasamāni syuḥ kiṃ tu dharmo vilupyate || 97 ||
[Analyze grammar]

bāṃdhaveṣu ciraṃ vāso nārīṇāṃ na yaśaskaraḥ |
manorathā bāṃdhavānāṃ nāryā bhartṛgṛhe sthitiḥ || 98 ||
[Analyze grammar]

sā tvaṃ trailokyanāthena bhartrā sūryeṇa saṃyutā |
piturgṛhe ciraṃ kālaṃ vastuṃ nārhasi putrike || 99 ||
[Analyze grammar]

tattvaṃ bhartṛgṛhaṃ gaccha dṛṣṭo'haṃ pūjitāsi me |
punarāgamanaṃ kāryaṃ darśanāya śucismite || 100 ||
[Analyze grammar]

īśvara uvāca |
ityuktā sā tadā pitrā gacchagaccheti sā punaḥ |
saṃpūjayitvā pitaraṃ vaḍavārūpadhāriṇī || 101 ||
[Analyze grammar]

meroruttaratastatra varṣaṃ yaddhanuṣākṛti |
uttarāḥ kuravo loke prakhyātā ye yaśasvini || 102 ||
[Analyze grammar]

tatra tepe tapaḥ sādhvī nirāhārā'śvarūpiṇī |
etasminnaṃtare devi tasyāśchāyā vivasvataḥ || 103 ||
[Analyze grammar]

samīpasthā tadā devī saṃjñāyā vākyatatparā |
tasyāṃ ca bhagavānsūryo dvitīyāyāṃ divaspatiḥ || 104 ||
[Analyze grammar]

saṃjñeyamiti manvāno rūpaudāryeṇa mohitaḥ |
tasyāṃ ca janayāmāsa dvau putrau kanyakāṃ tathā || 105 ||
[Analyze grammar]

pūrvaṃ yastu manostulyaḥ sāvarṇistena so'bhavat |
yaḥ sūryātprathamaṃ jātaḥ putrayoḥ surasundari || 106 ||
[Analyze grammar]

dvitīyo yo'bhavaccānyaḥ sa graho'bhūcchanaiścaraḥ |
kanyā 'bhūttapatī yā tāṃ vavre saṃvaraṇo nṛpaḥ || 107 ||
[Analyze grammar]

tāpīnāma nadī ceyaṃ viṃdhyamūlādviniḥsṛtā |
nityaṃ puṇyajalā snāne paścimodadhigāminī || 108 ||
[Analyze grammar]

anyā caiva tathā bhadrā jātā putrī mahāprabhā |
saṃjñā tu pārthivī chāyā ātmajānāṃ yathākarot || 109 ||
[Analyze grammar]

snehaṃ na pūrvajātānāṃ tathā kṛtavatī satī |
lālanādyupabhogeṣu viśeṣamanuvāsaram || 110 ||
[Analyze grammar]

yathā sveṣvanuvarteta na tathānyeṣu bhāminī |
manustu kṣāṃtavāṃstasyā bhaviṣyo yo hi pārvati || 111 ||
[Analyze grammar]

merau tiṣṭhati so'dyāpi tapaḥ kurvanvarānane |
sarvaṃ tatkṣāṃtavānmāturyamastasyā na cakṣame || 112 ||
[Analyze grammar]

bahuśo yācamānastu chāyayā'tīva kopitaḥ |
sa vai kopācca bālyācca bhāvino'rthasya vai balāt || 113 ||
[Analyze grammar]

tāḍanāya tataḥ kopātpādastena samudyataḥ |
tathā punaḥ kṣāṃtimatā na tu dehe nipātitaḥ || 114 ||
[Analyze grammar]

padā saṃtarjayāmāsa chāyāṃ saṃjñāsuto yamaḥ || 115 ||
[Analyze grammar]

taṃ śaśāpa tataśchāyā kruddhā sā pārthivī bhṛśam |
kiṃcitprasphuramāṇoṣṭhī vicalatpāṇipallavā || 116 ||
[Analyze grammar]

chāyovāca |
pituḥ patnīmamaryāda yanmāṃ tarjayase padā |
bhuvi tasmādayaṃ pādastavādyaiva patiṣyati || 117 ||
[Analyze grammar]

īśvara uvāca |
yamastu tena śāpena bhṛśaṃ pīḍitamānasaḥ |
manunā saha dharmātmā pitre sarvaṃ nyavedayat || 118 ||
[Analyze grammar]

yama uvāca |
tātaitanmahadāścaryaṃ na dṛṣṭamiha kenacit |
mātā vātsalyamutsṛjya śāpaṃ putre prayacchati || 119 ||
[Analyze grammar]

snehena tulyamasmāsu mātādya naiva varttate |
visṛjya jyāyaso yasmātkanīyaḥsu bubhūṣati || 120 ||
[Analyze grammar]

tasyā mayodyataḥ pādo na tu dehe nipātitaḥ |
bālyādvā yadi vā mohāttadbhavānkṣaṃtumarhati || 121 ||
[Analyze grammar]

śapto'haṃ tāta kopena tayā suta iti sphuṭam |
ato na mahyaṃ jananī sā bhavedvadatāṃ vara || 122 ||
[Analyze grammar]

nigurṇeṣvapi putreṣu na mātā nirguṇā bhavet |
pādaste patatāṃ putra kathametattayoditam || 123 ||
[Analyze grammar]

tava prasādāccaraṇo na patedbhagavanyathā |
mātṛśāpādayaṃ me'dya tathā ciṃtaya gopate || 124 ||
[Analyze grammar]

raviruvāca |
asaṃśayaṃ mahatputra bhaviṣyatyatra kāraṇam |
yena te hyāviśatkrodho dharmajñasya mahātmanaḥ || 126 ||
[Analyze grammar]

sarveṣāmeva śāpānāṃ pratighāto'pi vidyate |
na tu mātrābhiśaptānāṃ kvacicchāpanivarttanam || 126 ||
[Analyze grammar]

na yuktametanmithyā tu kartuṃ māturvacastava |
kiṃcitte saṃvidhāsyāmi putrasnehādanugraham || 127 ||
[Analyze grammar]

kṛmayo māṃsamādāya prayāsyaṃti mahītalam |
kṛtaṃ tasyā vacaḥ satyaṃ tvaṃ ca trāto bhaviṣyasi || 128 ||
[Analyze grammar]

īśvara uvāca |
ādityastvabravīcchāyāṃ kimarthaṃ tanayeṣu vai |
tulyeṣvapyadhikaḥ sneha ekatra kriyate tvayā || 129 ||
[Analyze grammar]

nūnaṃ na caiṣāṃ jananī tvaṃ saṃjñā kvāpi sā gatā |
vikaleṣvapyapatyeṣu na mātā śāpadā bhavet || 130 ||
[Analyze grammar]

api doṣasahasrāṇi yadi putraḥ samācaret |
prāṇadrohe'pi nirato na mātā pāpamācaret |
tasmātsatyaṃ mama brūhi mā śāpavaśagā bhava || 131 ||
[Analyze grammar]

īśvara uvāca |
taṃ śaptumudyataṃ dṛṣṭvā chāyāsaṃjñā dinādhipam |
bhayena kaṃpatī devī yathāvṛttaṃ mahāsatī || 132 ||
[Analyze grammar]

sā cāha tanayā tvaṣṭurahaṃ saṃjñā vibhāvaso |
patnī tava tvayā patyā patiyuktā divākara || 133 ||
[Analyze grammar]

itthaṃ vivasvataḥ sā tu bahuśaḥ pṛcchato'nyathā |
na vācā bhāṣate kruddhaḥ śāpaṃ dātuṃ samudyataḥ || 134 ||
[Analyze grammar]

śāpodyatakaraṃ dṛṣṭvā sūryaṃ chāyā vivasvataḥ |
kathayāmāsa tatsarvaṃ saṃjñāyāḥ suviceṣṭitam || 135 ||
[Analyze grammar]

tacchrutvā bhagavānsūryo jagāma tvaṣṭurālayam |
tataḥ saṃpūjayāmāsa tadā trailokyapūjitam || 136 ||
[Analyze grammar]

nirdagdhukāmaṃ roṣeṇa sāntvayāmāsa pārvati |
bhāsvaṃtaṃ nijayā dīptyā nijagehamupāgatam |
kva saṃjñeti ca pṛcchantaṃ kathayāmāsa viśvakṛt || 137 ||
[Analyze grammar]

viśvakarmmovāca |
āgataiva hi me veśma bhavatā śrūyatāṃ vacaḥ |
vikhyātaṃ tejasā'ḍhyaṃ ta idaṃ rūpaṃ suduḥsaham || 138 ||
[Analyze grammar]

asahantī tataḥ saṃjñā vane carati vai tapaḥ |
drakṣyase tāṃ bhavānadya svabhāryāṃ śubhacāriṇīm || 139 ||
[Analyze grammar]

rūpārthaṃ carate'raṇyaṃ caraṃtī sumahattapaḥ |
mataṃ me brahmaṇo vākyādyadi te deva rocate |
rūpaṃ nirvarttayāmyadya tava kāṃtaṃ divaspate || 140 ||
[Analyze grammar]

īśvara uvāca |
yato hi bhāsvato rūpaṃ prāgāsītparimaṃḍalam |
tatastatheti taṃ prāha tvaṣṭāraṃ bhagavānraviḥ || 141 ||
[Analyze grammar]

viśvakarmātvanujñātaḥ śākadvīpe vivasvatā |
bhṛ mimāropya tattejaḥ śātanāyopacakrame || 142 ||
[Analyze grammar]

bhramatā'śeṣajagatāmadhibhūtena bhāsvatā |
samudrā draviṇopetāścukṣubhuśca samantataḥ || 143 ||
[Analyze grammar]

bhramatā khalu deveśi sacaṃdragrahatārakam |
adhogati mahābhāge babhūvākṣiptamākulam || 144 ||
[Analyze grammar]

vikṣiptasalilāḥ sarve babhūvuśca tathā nadāḥ |
vyabhidyaṃta tathā śailāḥ śīrṇasānunibaṃdhanāḥ || 145 ||
[Analyze grammar]

dhruvādhārāṇyaśeṣāṇi dhiṣṇyāni varavarṇini |
bhrāmyadraśminibaddhāni adho jagmuḥ sahasraśaḥ || 146 ||
[Analyze grammar]

vyaśīryaṃta mahāmeghā ghorārāvavirāviṇaḥ |
bhāsvadbhramaṇavibhrāṃtabhūmyākāśamahītalam || 147 ||
[Analyze grammar]

jagadākulamatyarthaṃ tadā'sīdvaravarṇini |
trailokye sakale devi bhramamāṇe maharṣaryaḥ |
devāśca brahmaṇā sārddhaṃ bhāsvaṃtamabhituṣṭuvuḥ || 148 ||
[Analyze grammar]

devā ūcuḥ |
ādidevo'si devānāṃ jātametatsvayaṃ tava |
sargasthityaṃtakāleṣu tridhā bhedena tiṣṭhasi || 149 ||
[Analyze grammar]

svasti te'stu jagannātha gharmavarṣahimākara |
iṃdra āgamya taṃ devaṃ likhyamānamathāstavīt |
jaya deva jagatsvāmiñjaya deva jagatpate || 15 ||
[Analyze grammar]

ṛṣayaśca tataḥ sapta vasiṣṭhātripurogamāḥ |
tuṣṭuvurvividhaiḥ stotraiḥ svasti svastīti vādinaḥ |
vedoktibhirathāgryābhirvālakhilyāśca tuṣṭuvuḥ || 151 ||
[Analyze grammar]

vālakhilyā ūcuḥ |
namasta ṛksvarūpāya sāmarūpāya te namaḥ |
yajuḥsvarūparūpāya sāmnāṃ dhāmaga te namaḥ || 152 ||
[Analyze grammar]

jñānaikarūpadehāya nirdhūtatamase namaḥ |
śuddhajyotiḥsvarūpāya trimūrtāyāmalātmane || 153 ||
[Analyze grammar]

variṣṭhāya vareṇyāya sarvasmai paramātmane |
namo'khilajagadvyāpirūpāyānaṃtamūrttaye || 154 ||
[Analyze grammar]

sarvakāraṇabhūtāya niṣṭhāya jñāna cetasām |
namaḥ sūryasvarūpāya prakāśālakṣyarūpiṇe || 155 ||
[Analyze grammar]

bhāskarāya namastubhyaṃ tathā dinakṛte namaḥ |
sarvasmai hetave caiva saṃdhyājyo tsnākṛte namaḥ || 156 ||
[Analyze grammar]

tvaṃ sarvametadbhagavañjagacca bhramatā tvayā |
bhramatyāviśvamakhilaṃ brahmāṃḍaṃ sacarācaram |
tvadaṃśubhiridaṃ sarvaṃ spṛṣṭaṃ vai jāyate śuci || 157 ||
[Analyze grammar]

kriyate tvatkarasparśairjalādīnāṃ pavitratā || 158 ||
[Analyze grammar]

homadānādiko dharmo nopakārāya jāyate |
tāta yāvanna saṃyogi jagadetattvadaṃśubhiḥ || 159 ||
[Analyze grammar]

ṛcaste sakalā hyetāstathā yāni yajūṃṣi ca |
sakalāni ca sāmāni nipataṃti tvadaṃgataḥ || 160 ||
[Analyze grammar]

ṛṅmayastvaṃ jagannātha tvameva ca yajurmayaḥ |
yataḥ sāmamayaścaiva tato nātha trayīmayaḥ || 161 ||
[Analyze grammar]

tvameva brahmaṇo rūpaṃ paraṃ cāparameva ca |
mūrttāmūrttaṃ tathā sūkṣmaṃ sthūlaṃ rūpeṇa saṃsthitaḥ || 162 ||
[Analyze grammar]

nimeṣakāṣṭhādimayaḥ kālarūpakṣaṇātmakaḥ |
prasīda svecchayā rūpaṃ svaṃ tejaḥ śamanaṃ kuru |
tvaṃ deva jagatāṃ hetorduḥkhaṃ sahasi duḥsaham || 163 ||
[Analyze grammar]

tvaṃ nātha mokṣiṇāṃ mokṣo dhyeyastvaṃ dhyāyatāṃ varaḥ |
tvaṃ gatiḥ sarvabhūtānāṃ karmakāṃḍanivartinām || 164 ||
[Analyze grammar]

śaṃ prajābhyo'stu deveśa śanno'stu jagatāṃpate || 165 ||
[Analyze grammar]

tvaṃ dhātā visṛjasi viśvameka eva tvaṃ pātā sthitikaraṇāya saṃpravṛttaḥ |
tvayyaṃte layamakhilaṃ prayāti caitattvattonyo na hi tapanāsti sarvadātā || 166 ||
[Analyze grammar]

tvaṃ brahmā hariharasaṃjñitastvamindro vitteśaḥ pitṛpitaraṃbupaḥ samīraḥ |
somo'gnirgaganamahādharādirūpaḥ kiṃ na tvaṃ sakalamanorathapradātā || 167 ||
[Analyze grammar]

yajñaistvāmanudinamātmakarmmasaktāḥ stuvanto vividhapadairdvijā yajaṃti |
dhyāyantaḥ savinayacetaso bhavantaṃ yogasthāḥ paramapadaṃ prayāṃti marttyā || 168 ||
[Analyze grammar]

tapasi pacasi viśvaṃ pāsi bhasmīkaroṣi prakaṭayasi mayūkhairhlādayatasyaṃśugarbhaiḥ |
sṛjasi kamalajanmā pālayasyacyutākhyaḥ kṣapayasi ca yugāṃte rudrarūpastvamekaḥ || 169 ||
[Analyze grammar]

īśvara uvāca |
likhamānastato bhānuṃ viśvakarmā prajāpatiḥ |
udbhūtapulakaḥ stotramidaṃcakre vivasvataḥ || 17 ||
[Analyze grammar]

vivasvate praṇatajanānukampine mahātmane samajavasaptasaptaye |
satejase kamalakulālibaṃdhave sadā tamaḥpaṭalapaṭāvapāṭine || 171 ||
[Analyze grammar]

pāvanātiśayasarvacakṣuṣe naikakāmaviṣayapradāyine |
bhāsurāmalamayūkhamāline sarvabhūtahitakāriṇe namaḥ || 172 ||
[Analyze grammar]

ajāya lokatrayabhāvanāya bhūtātmane gopataye vṛṣāya |
namo mahākāruṇikottamāya sūryāya vastuprabhavālayāya || 173 ||
[Analyze grammar]

vivasvate jñānabhṛte'ntarātmane jagatpratiṣṭhāya jagaddhitaiṣiṇe |
svayaṃbhuve nirmalalokacakṣuṣe surottamāyāmitatejase namaḥ || 174 ||
[Analyze grammar]

kṣaṇamudayācalabhālitārcciḥ suragaṇagītigariṣṭhagītaḥ |
tvamuta mayūkhasahasravajjagati vikāsitapadmanābhaḥ || 175 ||
[Analyze grammar]

tava timirāsavapānamadādbhavati vilohitavigrahatā |
mihiravibhāsatayā sutarāṃ tribhuvanabhāvanamātraparaḥ || 176 ||
[Analyze grammar]

rathamāruhya samāvayavaṃ ruciravikalitadivyahayam |
satatamaribale bhagavaṃścarasi jagaddhitabaddharasaḥ || 177 ||
[Analyze grammar]

amṛtamayena rasena samaṃ vibudhapitṝnapi tarppayase |
arigaṇasūdana tena tava praṇatimupetya likhāmi vapuḥ || 178 ||
[Analyze grammar]

śubhasamavarṇamayaṃ racitaṃ tava padapāṃsupavitratamam |
natajanavatsala māṃ praṇataṃ tribhuvanapāvana pāhi rave || 179 ||
[Analyze grammar]

iti sakalajagatprasūti bhūtaṃ tribhuvanabhāvanadhāmahetumekam |
ravimakhilajagatpradīpabhūtaṃ tridaśavaraṃ praṇato'smi devadevam || 180 ||
[Analyze grammar]

īśvara uvāca |
hāhāhūhaśca gandharvo nāradastuṃbarustathā |
upagātuṃ samārabdhā gāṃdharvakuśalā ravim || 181 ||
[Analyze grammar]

ṣaḍjamadhyamagāṃdhāragrāmatrayaviśāradāḥ |
mūrchanābhiśca tānaiśca suprayogaiḥ sukhapradam || 182 ||
[Analyze grammar]

saptasvaravinirvṛttaṃ yatitrayavibhūṣitam |
saptadhātusamāyuktaṃ ṣaḍjāti triguṇāśrayam || 183 ||
[Analyze grammar]

caturgītasamāyuktaṃ catuvarṇasamutthitam |
caturvarṇapratīkāraṃ saptālaṃkārabhūṣitam || 184 ||
[Analyze grammar]

tristhānaśuddhaṃ trilayaṃ samyakkālavyavasthitam |
citte citte ca nṛtye ca raseṣu layasaṃyutam || 185 ||
[Analyze grammar]

caturviṃśadguṇairyuktaṃ jagurgītaṃ ca gāyanāḥ |
viśvārcī ca ghṛtācī ca urvaśyatha tilottamā || 186 ||
[Analyze grammar]

menakā sahajanyā ca raṃbhā cāpsarasāṃ varā |
caturvidhapadaṃ tālaṃ triprakāraṃ layatrayam || 187 ||
[Analyze grammar]

yatitrayaṃ tathā'todyaṃ nāṭyaṃ caiva caturvidham |
nanṛturjagatāmīśe likhyamāne vibhāvasau || 188 ||
[Analyze grammar]

bhāvānbhāvaviśāradyaḥ kurvantyo vidhivadbahūn |
devadundubhayaḥ śaṃkhāḥ śataśo'tha sahasraśaḥ || 189 ||
[Analyze grammar]

anāhatā mahādevi nedire ghananisvanāḥ |
gāyadbhiścaiva gaṃdharvairnṛtyadbhiścāpsarogaṇaiḥ || 190 ||
[Analyze grammar]

avādyaṃta tatastatra veṇuvīṇādijharjharāḥ |
paṇavāḥ puṣkarāścaiva mṛdaṃgapaṭahānakāḥ || 191 ||
[Analyze grammar]

tūryavāditraghoṣaiśca sarvaṃ kolāhalīkṛtam |
tataḥ kṛtāṃjalipuṭā bhaktinamrātmamūrttayaḥ || 192 ||
[Analyze grammar]

tataḥ kalakale tasminsarvadevasamāgame |
saṃvatsaraṃ bhramasthasya viśvakarmā ravestataḥ || 193 ||
[Analyze grammar]

tejasaḥ śātanaṃ cakre stūyamānasya daivataiḥ |
devaṃ cakre samāropya bhrāmayāmāsa sūtrabhṛt || 194 ||
[Analyze grammar]

mṛtpiṃḍavatkulālasya saṃspṛśankṣuradhārayā |
pataṃgasya stavaṃ kurvanviśvakarmā divaspateḥ || 195 ||
[Analyze grammar]

tejasaḥ ṣoḍaśaṃ bhāgaṃ maṇḍalasthamadhārayat |
śātitaṃ tasya tattejo yāvatpādau varānane || 196 ||
[Analyze grammar]

yattasya ṛṅmayaṃ tejastatprabhāse'patatpriye |
yajurmayena deveśi bhāvitā dyaurmahāprabhoḥ || 197 ||
[Analyze grammar]

svargaṃ sāmamayenāpi bhūrbhuvaḥsvaritisthitam |
tatastaistejaso bhāgairdaśabhiḥ paṃcabhistathā || 198 ||
[Analyze grammar]

tena vai nirmitaṃ cakraṃ viṣṇoḥ śūlaṃ harasya ca |
mahāprabhaṃ mahākāyaṃ śibikā dhanadasya ca || 199 ||
[Analyze grammar]

daṇḍaḥ pretapateḥ śaktirdevasenāpatestathā |
anyeṣāṃ ca surāṇāṃ ca astrāṇyuktāni yāni vai || 200 ||
[Analyze grammar]

yakṣavidyādharāṇāṃ ca tāni cakre sa viśvakṛt |
tataḥ ṣoḍaśamaṃ bhāgaṃ bibhartti bhagavānraviḥ |
tattejo ravibhāgaśca khastho vicarati priye || 201 ||
[Analyze grammar]

iti śātitatejāḥ sa śvaśureṇātiśobhanam |
vapurdadhāra mārttaṃḍaḥ puṣpabāṇamanoramam || 202 ||
[Analyze grammar]

tataḥ surūpa dhṛgbhānuruttarānagamatkurūn |
dadṛśe tatra saṃjñāṃ tu vaḍavārūpadhāriṇīm || 1203 ||
[Analyze grammar]

apāpāṃ sarvabhūtānāṃ tapasā niyamena ca |
sā ca dṛṣṭvā tamāyāṃtaṃ parapuṃso viśaṃkayā |
jagāma saṃmukhaṃ tasya aśvarūpadharasya ca || 204 ||
[Analyze grammar]

tataśca nāsikāyoge tayostatra sametayoḥ |
nāsatyadasrau tanayāvaśvavaktrau vinirgatau || 205 ||
[Analyze grammar]

retasonte ca revantaḥ khaḍgī chatrī tanutrabhṛt |
piturgṛhyottamaṃ so'śvaṃ jātamātraḥ palāyata || 206 ||
[Analyze grammar]

sa tasminsakṛdārūḍhastamaśvaṃ naiva muṃcati |
tatorkeṇa samādiṣṭau daṃḍanāyakapiṃgalau || 207 ||
[Analyze grammar]

aśvaṃ pratyānayadhvaṃ me mā balācchidrato'syatu |
pārśvasthau tiṣṭhatastasya aśvacchidrābhikāṃkṣiṇau || 208 ||
[Analyze grammar]

na ca cchidraṃ labhete tau tasyādyāpi mahātmanaḥ |
agre gacchati revaṃte pṛṣṭhagau daṇḍapiṃgalau || 209 ||
[Analyze grammar]

uttarebhyaḥ kurubhyastu nirgatau vegavattarau |
dakṣiṇaṃ bhārataṃ prāptau yatra kṣetra prabhāsikam || 21 ||
[Analyze grammar]

atyarthaṃ vegakhinnau tau sa ca revaṃtako'pi hi |
prasvinnagātraḥ socchvāso revaṃtastatra saṃsthitaḥ || 211 ||
[Analyze grammar]

muhūrtena samākrāntaṃ lakṣayojanamaṃḍalam |
uttarāddakṣiṇaṃ devi revatena mahātmanā || 212 ||
[Analyze grammar]

svinnagātrastato devi prabhāse samavasthitaḥ |
daṇḍapiṃgalakasaṃyukto hyaśvārūḍhaḥ sa tiṣṭhati || 213 ||
[Analyze grammar]

sāvitryā nairṛte bhāge nātidūre vyavasthitaḥ |
rājñīputro yato devi rājā bhaṭṭārakastataḥ || 214 ||
[Analyze grammar]

loke khyātiṃ samāyāti rājabhaṭṭāriketi ca |
guhyabhaṭṭārakatve ca revaṃto viniyojitaḥ || 215 ||
[Analyze grammar]

evamabhyetyāha tato bhagavāṃllokatāpanaḥ |
tvamapyaśeṣalokasya pūjyo vatsa bhaviṣyasi || 216 ||
[Analyze grammar]

araṇye ca mahādāve vairidasyubhayeṣu ca |
tvāṃ smariṣyaṃti ye marttyā mokṣyante te mahāpadaḥ || 217 ||
[Analyze grammar]

kṣemamṛddhiṃ sukhaṃ rājyamārogyaṃ kīrtimunnatim |
narāṇāmatituṣṭastvaṃ pūjitaḥ saṃpradāsyasi || 218 ||
[Analyze grammar]

aśvinau devabhiṣajau kṛtau pitrā mahātmanā |
dharmadṛṣṭiryamaścāsau samo mitre tathā'hite || 219 ||
[Analyze grammar]

tato niyogaṃ taṃ cāsya cakāra timirāpahaḥ |
yamunāṃ ca nadīṃ cakre kalindāntaravāhinīm || 220 ||
[Analyze grammar]

chāyāsaṃjñāsutaścāpi sāvarṇistu mahāyaśāḥ |
bhāvyaḥ sonāgate kāle manuḥ sāvarṇikoṣṭamaḥ || 221 ||
[Analyze grammar]

merupṛṣṭhe tapo ghoramadyāpi carati prabhuḥ |
bhrātā śanaiścarastasya graho'bhūcca priye dhruvam || 222 ||
[Analyze grammar]

evaṃ tebhyo varāndattvā revaṃtasyāpi bhāskaraḥ |
punarnāma niruktaṃ sa revaṃtasyākarotpramuḥ || 223 ||
[Analyze grammar]

evaṃgacchatyasau yasmātsaṃjñāyāḥ śāṃtidaḥ sutaḥ |
aśvānāmādhipatye tu bhānunā ca niyojitaḥ || 224 ||
[Analyze grammar]

kṣemeṇa gacchate'dhvānaṃ yastu pūjayate pathi |
sukhaprasādyo marttyānāṃ sadā ca varavarṇini || 225 ||
[Analyze grammar]