Chapter 10

[English text for this chapter is available]

īśvara uvāca |
anyacca kathayiṣyāmi rahasyaṃ tava bhāmini |
yatra kasya cidākhyātaṃ tatte vacmi varānane || 1 ||
[Analyze grammar]

pṛthvībhāge sthito brahmā apāṃ bhāge janārddanaḥ |
tejobhāgasthito rudro vāyubhāge tatheśvaraḥ || 2 ||
[Analyze grammar]

ākāśabhāgasaṃsthāne sthitaḥ sākṣātsadāśivaḥ || 3 ||
[Analyze grammar]

yasyayasyaiva yo bhāgastasmiṃstīrthāni yāni vai |
tasyatasya na saṃdehaḥ sa sa eveśvaraḥ smṛtaḥ || 4 ||
[Analyze grammar]

chāgalaṃḍaṃ dugaṇḍaṃ ca mākoṭaṃ maṇḍaleśvaram |
kāliṃjaraṃ vanaṃ caiva śaṃkukarṇaṃ sthaleśvaram || 5 || || mahābhūtopari ṭippaṇī |
śūleśvaraṃ ca vikhyātaṃ pṛthvītattve ca saṃsthitam |
hariścandraṃ ca śrīśailaṃ jalpeśonnāṃtikeśvaram || 6 ||
[Analyze grammar]

mahākālaṃ madhyamaṃ ca kedāraṃ bhairavaṃ tathā |
pavitrāṣṭakametaddhi jalasaṃsthaṃ varānane || 7 ||
[Analyze grammar]

amareśaṃ prabhāsaṃ ca naimiṣaṃ puṣkaraṃ tathā |
āṣāḍhiṃ caiva daṇḍiṃ ca bhārabhūtiṃ ca lāṃgalam || 8 ||
[Analyze grammar]

ādi guhyāṣṭakaṃ hyetattejastattve pratiṣṭhitam |
gayā caiva kurukṣetraṃ tīrthaṃ kanakhalaṃ tathā || 9 ||
[Analyze grammar]

vimalaṃ cāṭṭahāsaṃ ca māhendraṃ bhīmasaṃjñakam |
guhyādguhyataraṃ hyetatproktaṃ vāyvaṣṭakaṃ tava || 10 ||
[Analyze grammar]

vastrāpathaṃ rudrakoṭirjyeṣṭheśvaraṃ mahālayam |
gokarṇaṃ rudrakarṇaṃ ca varṇākhyaṃ sthāpasaṃjñakam || 11 ||
[Analyze grammar]

pavitrāṣṭakametaddhi ākāśasthaṃ varānane |
etāni tattvatīrthāni sarvāṇi kathitāni vai || 12 ||
[Analyze grammar]

yo yasmindevatā tattve sā tanmāhātmyasūcikā |
audakaṃ ca mahātattvaṃ viṣṇoścātipriyaṃ priye || 13 ||
[Analyze grammar]

jalaśāyī smṛtastena nārāyaṇa iti śrutiḥ |
āpyatattvaṃ tu tīrthāni yāni proktāni te mayā || 14 ||
[Analyze grammar]

tāni priyāṇi deveśi dhruvaṃ nārāyaṇasya vai |
audakaṃ caiva yattattvaṃ tasminprābhāsikaṃ smṛtam || 15 ||
[Analyze grammar]

tatra devo layaṃ yāti harirjanmanijanmani |
sa vāsudevaḥ sūkṣmātmā parātparatare sthitaḥ || 16 ||
[Analyze grammar]

sa śivaḥ paramaṃ vyoma anādinidhano vibhuḥ |
tasmātparataraṃ nāsti sarvaśāstrāgameṣu ca || 17 ||
[Analyze grammar]

siddhāṃtāgamavedāṃtadarśaneṣu viśeṣataḥ |
teṣu caiva na bhinnastu mayā sārddhaṃ yaśasvini || 18 ||
[Analyze grammar]

tasminsthāne hariḥ sākṣātpratyakṣeṇa tu saṃsthitaḥ |
liṃgaiścaturbhiḥ saṃyukto jñāyate na ca kenacit || 19 ||
[Analyze grammar]

mokṣārthaṃ naiṣṭhikairvarṇairvrataiścaiva tu yatphalam |
tatphalaṃ samavāpnoti bhallukātīrthadarśanāt || 20 ||
[Analyze grammar]

gocarmamātraṃ tatsthānaṃ samaṃtātparimaṇḍalam |
na hi kaścidvijānāti vinā śāstreṇa bhāmini || 21 ||
[Analyze grammar]

viṣuvaṃ vahate tatra nṛṇāmadyāpi pārvati |
paṃcaliṃgāni tatraiva paṃcavaktrāṇi kāni cit || 22 ||
[Analyze grammar]

kukkuṭāṃḍakamānāni mahāsthūlāni kānicit |
sarpeṇa veṣṭitānyeva cihnitāni triśūlibhiḥ || 23 ||
[Analyze grammar]

teṣāṃ darśanamātreṇa koṭiliṃgārcanaphalam |
tasmādidaṃ mahākṣetraṃ brahmādyaiḥ sevyate sadā || 24 ||
[Analyze grammar]

śrutimadbhiśca vipreṃdraiḥ saṃsiddhaiśca tapasvibhiḥ |
pratimāsaṃ tathāṣṭamyāṃ pratimāsaṃ caturdaśīm || 25 ||
[Analyze grammar]

śaśibhānūparāge vā kārttikyāṃ tu viśeṣataḥ |
prabhāsasthāni liṃgāni prapūjyante varānane || 26 ||
[Analyze grammar]

saṃnihatyāṃ kurukṣetre sarvastīrthāyutaiḥ saha |
puṣkaraṃ naimiṣaṃ caivaṃ prayāgaṃ saṃpṛthūdakam || 27 ||
[Analyze grammar]

ṣaṣṭi tīrthasahasrāṇi ṣaṣṭikoṭiśatāni ca |
māghyāṃmāghyāṃ sameṣyaṃti sarasvatyabdhisaṃgame || 28 ||
[Analyze grammar]

smaraṇāttasya tīrthasya nāmasaṃkīrtanādapi |
mṛtyukālabhavādvāpi pāpaṃ tyakṣyati suvrate || 29 ||
[Analyze grammar]

ānarttasāraṃ saumyaṃ ca tathā bhuvanabhūṣaṇam |
divyaṃ pāṃcanadaṃ puṇyamādiguhyaṃ mahodayam || 30 ||
[Analyze grammar]

siddha ratnākaraṃ nāma samudrāvaraṇaṃ tathā |
dharmākāraṃ kalādhāraṃ śivagarbhagṛhaṃ tathā || 31 ||
[Analyze grammar]

sarvadevaniveśaṃ ca sarvapātakanāśanam |
asya kṣetrasya nāmāni kalpe kalpe pṛthakpriye || 32 ||
[Analyze grammar]

āyāmādīni jānīhi guhyāni surasundari |
ādye kalpe purā devi pramodanamiti smṛtam || 33 ||
[Analyze grammar]

nandanaṃ paritastasya tasyāpi parataḥ śivam |
śivātparataraṃ cograṃ bhadrikaṃ parataḥ punaḥ || 34 ||
[Analyze grammar]

samiṃdhanaṃ paraṃ tasmātkāmadaṃ ca tataḥ param |
siddhidaṃ cāpi dharmajñaṃ vaiśvarūpaṃ ca muktidam || 35 ||
[Analyze grammar]

tathā śrīpadmanābhaṃ tu śrīvatsaṃ tu mahāprabham |
tathā ca pāpasaṃhāraṃ sarvakāmapradaṃ tathā || 36 ||
[Analyze grammar]

mokṣamārgaṃ varā rohe tathā devi sudarśanam |
dharmagarbhaṃ tu dharmāṇāṃ prabhāsaṃ pāpanāśanam |
ataḥ paraṃ bhavantīha utpalāvarttikāni ca || 37 ||
[Analyze grammar]

kṣetrasya madhye yaddevi mama garbhagṛhaṃ smṛtam |
tasya nāmāni te devi kathitānyanupūrvaśaḥ || 38 ||
[Analyze grammar]

śrutvā nāmānyaśeṣāṇi kṣetramāhātmyameva ca |
teṣāṃ tu vāṃchitā siddhi rbhaviṣyati na saṃśayaḥ || 39 ||
[Analyze grammar]

etatkīrttayamānasya trikālaṃ tu mahodayam |
saṃdhyākālāṃtaraṃ pāpamahorātraṃ vinaśyati || 40 ||
[Analyze grammar]

api vai dāṃbhikāścaiva ye vasaṃtyalpabuddhayaḥ |
mūḍhā jīvanikā viprāste'pi yāṃti mṛtā divam || 41 ||
[Analyze grammar]

asya kṣetrasya madhye tu raviyojanamadhyataḥ |
upakṣetrāṇi deveśi saṃtyanyāni sahasraśaḥ || 42 ||
[Analyze grammar]

kānicitpadmarūpāṇi yavākārāṇi kānicit |
ṣaṭkoṇāni trikoṇāni daṇḍākārāṇi kānicit || 43 ||
[Analyze grammar]

caṃdrabiṃbārddhabhedāni caturasraprabhedataḥ |
brahmādidaivatānīśe kṣetramadhye sthitāni tu || 44 ||
[Analyze grammar]

kānicidyojanārddhāni tadardhārdhāni kānicit |
nivarttanapramāṇena daṇḍamānena kānicit || 45 ||
[Analyze grammar]

gocarmamānamadhyāni kāniciddhanuṣāṃtaram |
yajñopavītamātrāṇi prabhāse saṃti koṭiśaḥ || 46 ||
[Analyze grammar]

aṃgulyaṣṭama bhāgo'pi nabhosti kamalekṣaṇe |
na saṃti yasmiṃstīrthāni divyāni ca nabhastale || 47 ||
[Analyze grammar]

prabhāsakṣetramāsādya tiṣṭhaṃti pralayādanu |
kedāre caiva yalliṃgaṃ yacca devi mahālaye || 48 ||
[Analyze grammar]

madhyameśvarasaṃsthaṃ ca tathā pāśupateśvaram |
śaṃkukarṇeśvaraṃ caiva bhadreśvaramathāpi ca || 49 ||
[Analyze grammar]

some śvaramathaikāgraṃ kāleśvaramajeśvaram |
bhairaveśvaramīśānaṃ tathā kāyāvarohaṇam || 50 ||
[Analyze grammar]

cāpaṭeśvarakaṃ puṇyaṃ tathā badarikāśramam |
rudrakoṭirmahākoṭi stathā śrīparvataṃ śubham || 51 ||
[Analyze grammar]

kapālī caiva deveśaḥ karavīraṃ tathā punaḥ |
oṃkāraṃ paramaṃ puṇyaṃ vaśiṣṭhāśramameva ca |
yatra koṭiḥ smṛtā devi rudrāṇāṃ kāmarūpiṇām || 52 ||
[Analyze grammar]

yāni cānyāni sthānāni puṇyāni mama bhūtale |
prayāgaṃ purataḥ kṛtvā prabhāse nivasaṃti ca || 53 ||
[Analyze grammar]

uttare raviputrī tu dakṣiṇe sāgaraṃ smṛtam |
dakṣiṇottaramāno'yaṃ kṣetrasyāsya prakīrttitaḥ || 54 ||
[Analyze grammar]

rukmiṇyāḥ pūrvataścaiva taptatoyācca paścime |
pūrvapaścimamāno'yaṃ prabhāsasya prakīrttitaḥ || 55 ||
[Analyze grammar]

etadantaramāsādya tīrthāni surasundari |
pātālādikaṭāhāṃtaṃ tāni tatra vasaṃti vai || 56 ||
[Analyze grammar]

evaṃ jñātvā mahādevi sarvadevamayo hariḥ |
prabhāsakṣetramāsādya tatyāja svaṃ kalevaram || 57 ||
[Analyze grammar]

divyaṃ mamedaṃ caritaṃ hi raudraṃ śroṣyaṃti ye parvasu vā sadā vā |
te cāpi yāsyaṃti mama prasādāttriviṣṭapaṃ puṇyajanādhivāsam || 58 ||
[Analyze grammar]

iti kathitamaśeṣameva citraṃ caritamidaṃ tava devi puṇyayuktam |
itaramapi tavātivallabhaṃ yadvada kathayāmi mahodayaṃ munīnām || 59 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prabhāsa kṣetrastha tīrthakṣetramāhātmyadvārā prabhāsakṣetrasya sarvakṣetrottamatvavarṇanaṃnāma daśamo'dhyāyaḥ || 10 ||
[Analyze grammar]