Chapter 9.7

[English text for this chapter is available]

kāmādirutsekaḥ svāḥ prakṛtīḥ kopayati apanayo bāhyāḥ || KAZ_09.7.01 ||

tadubhayamāsurī vṛttiḥ || KAZ_09.7.02 ||

svajanavikāraḥ kopaḥ || KAZ_09.7.03 ||

paravṛddhihetuṣu āpadartho'narthaḥ saṃśaya iti || KAZ_09.7.04 ||

yo'rthaḥ śatruvṛddhimaprāptaḥ karoti prāptaḥ pratyādeyaḥ pareṣāṃ bhavati prāpyamāṇo vā kṣayavyayodayo bhavati sa bhavatyāpadarthaḥ || KAZ_09.7.05 ||

yathā sāmantānāmāmiṣabhūtaḥ sāmantavyasanajo lābhaḥ śatruprārthito vā svabhāvādhigamyo lābhaḥ paścātkopena pārṣṇigrāheṇa vā vigṛhītaḥ purastāllābhaḥ mitrocchedena saṃdhivyatikrameṇa vā maṇḍalaviruddho lābhaḥ ityāpadarthaḥ || KAZ_09.7.06 ||

svataḥ parato vā bhayotpattirityanarthaḥ || KAZ_09.7.07 ||

tayoḥ artho na veti anartho na veti artho'nartha iti anartho'rtha iti saṃśayaḥ || KAZ_09.7.08 ||

śatrumitramutsāhayitumartho na veti saṃśayaḥ || KAZ_09.7.09 ||

śatrubalamarthamānābhyāmāvāhayitumanartho na veti saṃśayaḥ || KAZ_09.7.10 ||

balavatsāmantāṃ bhūmimādātumartho'nartha iti saṃśayaḥ || KAZ_09.7.11 ||

jāyasā sambhūyayānamanartho'rtha iti saṃśayaḥ || KAZ_09.7.12 ||

teṣāmarthasaṃśayamupagacchet || KAZ_09.7.13 ||

artho'rthānubandhaḥ artho niranubandhaḥ artho'narthānubandhaḥ anartho'rthānubandhaḥ anartho niranubandhaḥ anartho'narthānubandhaḥ ityanubandhaṣaḍvargaḥ || KAZ_09.7.14 ||

śatrumutpāṭya pārṣṇigrāhādānamartho'narthānubandhaḥ || KAZ_09.7.15 ||

udāsīnasya daṇḍānugrahaḥ phalena artho niranubandhaḥ || KAZ_09.7.16 ||

parasyāntarucchedanamartho'narthānubandhaḥ || KAZ_09.7.17 ||

śatruprativeśasyānugrahaḥ kośadaṇḍābhyāmanartho'narthānubandhaḥ || KAZ_09.7.18 ||

hīnaśaktimutsāhya nivṛttiranartho niranubandhaḥ || KAZ_09.7.19 ||

jyāyāṃsamutthāpya nivṛttiranartho'narthānubandhaḥ || KAZ_09.7.20 ||

teṣāṃ pūrvaḥ pūrvaḥ śreyānupasamprāptum || KAZ_09.7.21 ||

iti kāryāvasthāpanam || KAZ_09.7.22 ||

samantato yugapadarthotpattiḥ samantato'rthāpadbhavati || KAZ_09.7.23 ||

saiva pārṣṇigrāhavigṛhītā samantato'rthasaṃśayāpadbhavati || KAZ_09.7.24 ||

tayormitrākrandopagrahātsiddhiḥ || KAZ_09.7.25 ||

samantataḥ śatrubhyo bhayotpattiḥ samantto'narthāpadbhavati || KAZ_09.7.26 ||

saiva mitravigṛhītā samantato'narthasaṃśayāpadbhavati || KAZ_09.7.27 ||

tayoścalāmitrākrandopagrahātsiddhiḥ paramiśrāpratīkāro vā || KAZ_09.7.28 ||

ito lābha itarato lābha ityubhayato'rthāpadbhavati || KAZ_09.7.29 ||

tasyāṃ samantato'rthāyāṃ ca lābhaguṇayuktamarthamādātuṃ yāyāt || KAZ_09.7.30 ||

tulye lābhaguṇe pradhānamāsannamanatipātinamūno vā yena bhavettamādātuṃ yāyāt || KAZ_09.7.31 ||

ito'nartha itarato'nartha ityubhayato'narthāpat || KAZ_09.7.32 ||

tasyāṃ samantato'narthāyāṃ ca mitrebhyaḥ siddhiṃ lipseta || KAZ_09.7.33 ||

mitrābhāve prakṛtīnāṃ laghīyasyaikato'narthāṃ sādhayet ubhayato'narthāṃ jyāyasyā samantato'narthāṃ mūlena pratikuryāt || KAZ_09.7.34 ||

aśakye sarvamutsṛjyāpagacchet || KAZ_09.7.35 ||

dṛṣṭā hi jīvataḥ punarāvṛttiryathā suyātrodayanābhyām || KAZ_09.7.36 ||

ito lābha itarato rājyābhimarśa ityubhayato'rthānarthāpadbhavati || KAZ_09.7.37 ||

tasyāmanarthasādhako yo'rthastamādātuṃ yāyāt || KAZ_09.7.38 ||

anyathā hi rājyābhimarśaṃ vārayet || KAZ_09.7.39 ||

etayā samantato'rthānarthāpadvyākhyātā || KAZ_09.7.40 ||

ito'nartha itarato'rthasaṃśaya ityubhayato'narthārthasaṃśayā || KAZ_09.7.41 ||

tasyāṃ pūrvamanarthaṃ sādhayettatsiddhāvarthasaṃśayam || KAZ_09.7.42 ||

etayā samantato'narthārthasaṃśayā vyākhyātā || KAZ_09.7.43 ||

ito'rtha itarato'narthasaṃśaya ityubhayato'rthānarthasaṃśayāpad || KAZ_09.7.44 ||

etayā samantato'rthānarthasaṃśayā vyākhyātā || KAZ_09.7.45 ||

tasyāṃ pūrvāṃ pūrvāṃ prakṛtīnāmanarthasaṃśayānmokṣayituṃ yateta || KAZ_09.7.46 ||

śreyo hi mitramanarthasaṃśaye tiṣṭhanna daṇḍaḥ daṇḍo vā na kośa iti || KAZ_09.7.47 ||

samagramokṣaṇābhāve prakṛtīnāmavayavānmokṣayituṃ yateta || KAZ_09.7.48 ||

tatra puruṣaprakṛtīnāṃ bahulamanuraktaṃ vā tīkṣṇalubdhavarjam dravyaprakṛtīnāṃ sāraṃ mahopakāraṃ vā || KAZ_09.7.49 ||

saṃdhināsanena dvaidhībhāvena vā laghūni viparyayairgurūṇi || KAZ_09.7.50 ||

kṣayasthānavṛddhīnāṃ cottarottaraṃ lipseta || KAZ_09.7.51 ||

prātilomyena vā kṣayādīnāmāyatyāṃ viśeṣaṃ paśyet || KAZ_09.7.52 ||

iti deśāvasthāpanam || KAZ_09.7.53 ||

etena yātrādimadhyānteṣvarthānarthasaṃśayānāmupasamprāptirvyākhyātā || KAZ_09.7.54 ||

nirantarayogitvāccārthānarthasaṃśayānāṃ yātrādāvarthaḥ śreyānupasamprāptuṃ pārṣṇigrāhāsārapratighāte kṣayavyayapravāsapratyādeye mūlarakṣaṇeṣu ca bhavati || KAZ_09.7.55 ||

tathānarthaḥ saṃśayo vā svabhūmiṣṭhasya viṣahyo bhavati || KAZ_09.7.56 ||

etena yātrāmadhye'rthānarthasaṃśayānāmupasamprāptirvyākhyātā || KAZ_09.7.57 ||

yātrānte tu karśanīyamucchedanīyaṃ vā karśayitvocchidya vārthaḥ śreyānupasamprāptuṃ nānarthaḥ saṃśayo vā parābādhabhayāt || KAZ_09.7.58 ||

sāmavāyikānāmapurogasya tu yātrāmadhyāntago'narthaḥ saṃśayo vā śreyānupasamprāptumanirbandhagāmitvāt || KAZ_09.7.59 ||

artho dharmaḥ kāma ityarthatrivargaḥ || KAZ_09.7.60 ||

tasya pūrvaḥ pūrvaḥ śreyānupasamprāptum || KAZ_09.7.61 ||

anartho'dharmaḥ śoka ityanarthatrivargaḥ || KAZ_09.7.62 ||

tasya pūrvaḥ pūrvaḥ śreyānpratikartum || KAZ_09.7.63 ||

artho'nartha iti dharmo'dharma iti kāmaḥ śoka iti saṃśayatrivargaḥ || KAZ_09.7.64 ||

tasyottarapakṣasiddhau pūrvapakṣaḥ śreyānupasamprāptum || KAZ_09.7.65 ||

iti kālāvasthāpanam || KAZ_09.7.66 ||

ityāpadaḥ tāsāṃ siddhiḥ || KAZ_09.7.67 ||

putrabhrātṛbandhuṣu sāmadānābhyāṃ siddhiranurūpā paurajānapadadaṇḍamukhyeṣu dānabhedābhyāṃ sāmantāṭavikeṣu bhedadaṇḍābhyām || KAZ_09.7.68 ||

eṣānulomā viparyaye pratilomā || KAZ_09.7.69 ||

mitrāmitreṣu vyāmiśrā siddhiḥ || KAZ_09.7.70 ||

parasparasādhakā hyupāyāḥ || KAZ_09.7.71 ||

śatroḥ śaṅkitāmātyeṣu sāntvaṃ prayuktaṃ śeṣaprayogaṃ nivartayati dūṣyāmātyeṣu dānaṃ saṃghāteṣu bhedaḥ śaktimatsu daṇḍa iti || KAZ_09.7.72 ||

gurulāghavayogāccāpadāṃ niyogavikalpasamuccayā bhavanti || KAZ_09.7.73 ||

anenaivopāyena nānyena iti niyogaḥ || KAZ_09.7.74 ||

anena vānyena vā iti vikalpaḥ || KAZ_09.7.75 ||

anenānyena ca iti samuccayaḥ || KAZ_09.7.76 ||

teṣāmekayogāścatvārastriyogāśca dviyogāḥ ṣaṭ ekaścaturyogaḥ || KAZ_09.7.77 ||

iti pañcadaśopāyāḥ || KAZ_09.7.78 ||

tāvantaḥ pratilomāḥ || KAZ_09.7.79 ||

teṣāmekenopāyena siddhirekasiddhiḥ dvābhyāṃ dvisiddhiḥ tribhistrisiddhiḥ caturbhiścatuḥsiddhiriti || KAZ_09.7.80 ||

dharmamūlatvātkāmaphalatvāccārthasya dharmārthakāmānubandhā yārthasya siddhiḥ sā sarvārthasiddhiḥ | iti siddhayah || KAZ_09.7.81 ||

daivādagnirudakaṃ vyādhiḥ pramāro vidravo durbhikṣamāsurī sṛṣṭirityāpadaḥ || KAZ_09.7.82 ||

tāsāṃ daivatabrāhmaṇarpaṇipātataḥ siddhiḥ || KAZ_09.7.83 ||

ativṛṣṭiravṛṣṭirvā sṛṣṭirvā yāsurī bhavet || KAZ_09.7.84ab ||

tasyāmātharvaṇaṃ karma siddhārambhāśca siddhayaḥ || KAZ_09.7.84cd ||