Buddha-Carita [sanskrit]

by E. B. Cowell | 2003 | 11,474 words | ISBN-10: 8187418788 | ISBN-13: 9788187418788

The Buddha Carita (Saddharma-pundarika) by Asvaghosa a famous Sanskrit text revolving around the live and exploits of the Buddha. The Buddha Carita (Buddhacarita) is written in the style of a Kavya (or Mahakavya, epic poetry) and extant original Sanskrit text consists of roughly 1,000 metrical verses.

tasminśca bodhāya kṛtapratijñe rājarṣivaṃśaprabhave mahārṣau |
tatropaviṣṭe prajaharṣa lokastatrāsa saddharmaripustu māraḥ || 1 ||
[Analyze grammar]

yaṃ kāmadevaṃ pravadanti loke citrāyudhaṃ puṣpaśaraṃ tathaiva |
kāmapracārādhipatiṃ tameva mokṣadviṣaṃ māramudāharanti || 2 ||
[Analyze grammar]

tasyātmajā vibhramaharṣadarpāstisro ratiprītitṛṣaśca kanyāḥ |
papracchurenaṃ manaso vikāraṃ sa tāṃśca tāścaiva vaco babhāṣe || 3 ||
[Analyze grammar]

asau munirniścayavarma bibhrat sattvāyudhaṃ buddhiśaraṃ vikṛṣya |
jigīṣurāste viṣayānmadīyān tasmādayaṃ me manaso viṣādaḥ || 4 ||
[Analyze grammar]

yadi hyasau māmabhibhūya yāti lokāya cākhyātyapavargamārgam |
śūnyastato 'yaṃ viṣayo mamādya vṛttāccyutasyeva videhabhartuḥ || 5 ||
[Analyze grammar]

tadyāvadevaiṣa na labdhacakṣurmadgocare tiṣṭhati yāvadeva |
yāsyāmi tāvadvratamasya bhettuṃ setuṃ nadīvega ivābhivṛddhaḥ || 6 ||
[Analyze grammar]

tato dhanuḥ puṣpamayaṃ gṛhītvā śarāṃstathā mohakarāṃśca pañca |
so 'śvatthamūlaṃ sasuto 'bhyagacchadasvāsthyakārī manasaḥ prajānām || 7 ||
[Analyze grammar]

atha praśāntaṃ munimāsanasthaṃ pāraṃ titīrṣuṃ bhavasāgarasya |
viṣajya savyaṃ karamāyudhāgre krīḍañśareṇedamuvāca māraḥ || 8 ||
[Analyze grammar]

uttiṣṭha bhoḥ kṣatriya mṛtyubhīta varasva dharmaṃ tyaja mokṣadharmam |
vāṇaiśca yajñaiśca vinīya lokān lokān parān prāpnuhi vāsavasya || 9 ||
[Analyze grammar]

panthā hi niryātumayaṃ yaśasyo yo vāhitaḥ pūrvatamairnarendraiḥ |
jātasya rājarṣikule viśāle bhaikṣākamaślāghyamidaṃ prapattum || 10 ||
[Analyze grammar]

athādya nottiṣṭhasi niścitātmā bhava sthiro mā vimucaḥ pratijñām |
mayodyato hyeṣa śaraḥ sa eva yaḥ sūryake mīnaripau vimuktaḥ || 11 ||
[Analyze grammar]

pṛṣṭaḥ sa cānena kathañcidaiḍaḥ somasya naptāpyabhavadvicittaḥ |
sa cābhavacchāntanurasvatantraḥ kṣīṇe yuge kiṃ vata durbalo 'nyaḥ || 12 ||
[Analyze grammar]

tatkṣipramuttiṣṭha labhasva sañjñāṃ vāṇo hyayaṃ tiṣṭhati lelihānaḥ |
priyābhidheyeṣu ratipriyeṣu yaṃ cakravākeṣvapi notsṛjāmi || 13 ||
[Analyze grammar]

ityevamukto 'pi yadā nirāstho naivāsanaṃ śākyamunirbibheda |
śaraṃ tato 'smai visasarja māraḥ kanyāśca kṛtvā purataḥ sutāṃśca || 14 ||
[Analyze grammar]

tasmiṃstu vāṇe 'pi sa vipramukte cakāra nāsthāṃ na dhṛteścacāla |
dṛṣṭvā tathainaṃ viṣasāda māraścintāparītaśca śanairjagāda || 15 ||
[Analyze grammar]

śailendraputrīṃ prati yena viddho devo 'pi śambhuścalito babhūva |
na cintayatyeṣa tameva vāṇaṃ kiṃ syādacitto na śaraḥ sa eṣaḥ || 16 ||
[Analyze grammar]

tasmādayaṃ nārhati puṣpavāṇaṃ na harṣaṇaṃ nāpi raterniyogam |
arhatyayaṃ bhūtagaṇairaśeṣaiḥ santrāsanātarjanatāḍanāni || 17 ||
[Analyze grammar]

sasmāra māraśca tataḥ svasainyaṃ vidhvaṃsanaṃ śākyamuneścikīrṣan |
nānāśrayāścānucarāḥ parīyuḥ śaradrumaprāsagadāsihastāḥ || 18 ||
[Analyze grammar]

varāhamīnāśvakharoṣṭravaktrā vyāghrarkṣasiṃhadviradānanāśca |
ekekṣaṇā naikamukhāstriśīrṣā lambodarāścaiva pṛṣodarāśca || 19 ||
[Analyze grammar]

ajāsu saktā ghaṭajānavaśca daṃṣṭrāyudhāścaiva nakhāyudhāśca |
kabandhahastā bahumūrtayaśca bhagnārdhavaktrāśca mahāmukhāśca || 20 ||
[Analyze grammar]

tāmrāruṇā lohitavinducitrāḥ khaṭvāṅgahastā haridhūmrakeśāḥ |
lambasrajo vāraṇalambakarṇāścarmāmbarāścaiva nirambarāśca || 21 ||
[Analyze grammar]

śvetārdhavaktrā haritārdhakāyāstāmrāśca dhūmrā harayo 'sitāśca |
vyāḍottarāsaṅgabhujāstathaiva praghuṣṭaghaṇṭākulamekhalāśca || 22 ||
[Analyze grammar]

tālapramāṇāśca gṛhītaśūlā daṃṣṭrākarālāśca śiśupramāṇāḥ |
urabhravaktrāśca vihaṅgamāśca mārjāravaktrāśca manuṣyakāyāḥ || 23 ||
[Analyze grammar]

prakīrṇakeśāḥ śikhino 'rdhamuṇḍā rajjvambarā vyākulaveṣṭanāśca |
prahṛṣṭavaktrā bhṛkuṭīmukhāśca tejoharāścaiva manoharāśca || 24 ||
[Analyze grammar]

kecidvrajanto bhṛśamāvavalguranyo 'nyamāpupluvire tathānye |
cikrīḍurākāśagatāśca kecitkecicca cerustarumastakeṣu || 25 ||
[Analyze grammar]

nanarta kaścidbhramayaṃstriśūlaṃ kaściddha pusphūrja gadāṃ vikarṣan |
harṣeṇa kaścidvṛṣavannanarta kaścitprajajvāla tanūruhebhyaḥ || 26 ||
[Analyze grammar]

evaṃvidhā bhūtagaṇāḥ samantāttadbodhimūlaṃ parivārya tasthuḥ |
jighṛkṣavaścaiva jighāṃsavaśca bharturniyogaṃ paripālayantaḥ || 27 ||
[Analyze grammar]

taṃ prekṣya mārasya ca pūrvarātre śākyarṣabhasyaiva ca yuddhakālam |
na dyauścakāśe pṛthivī cakampe prajajvaluścaiva diśaḥ saśabdāḥ || 28 ||
[Analyze grammar]

viṣvagvavau vāyurudīrṇavegastārā na rejurna babhau śaśāṅkaḥ |
tamaśca bhūyo vitatāra rātreḥ sarve ca sañcukṣubhire samudrāḥ || 29 ||
[Analyze grammar]

mahībhṛto dharmaparāśca nāgā mahāmunervighnamamṛṣyamāṇāḥ |
māraṃ prati krodhavivṛttanetrā niḥśaśvasuścaiva jajṛmbhire ca || 30 ||
[Analyze grammar]

śuddhādhivāsā vibudharṣayastu saddharmasiddhyarthamiva pravṛttāḥ |
māre 'nukampāṃ manasā pracakrurvirāgabhāvāttu na roṣamīyuḥ || 31 ||
[Analyze grammar]

tadbodhimūlaṃ samavekṣya kīrṇaṃ hiṃsātmanā mārabalena tena |
dharmātmabhirlokavimokṣakāmairbabhūva hāhākṛtamantarīkṣam || 32 ||
[Analyze grammar]

upaplutaṃ dharmavidastu tasya dṛṣṭvā sthitaṃ mārabalaṃ mahārṣiḥ |
na cukṣubhe nāpi yayau vikāraṃ madhye gavāṃ siṃha ivopaviṣṭaḥ || 33 ||
[Analyze grammar]

mārastato bhūtacamūmudīrṇāmājñāpayāmāsa bhayāya tasya |
svaiḥ svaiḥ prabhāvairatha sāsya senā taddhairyabhedāya matiṃ cakāra || 34 ||
[Analyze grammar]

keciccalannaikavilambijihvāstīkṣṇogradaṃṣṭrā harimaṇḍalākṣāḥ |
vidāritāsyāḥ sthiraśaṅkukarṇāḥ santrāsayantaḥ kila nāma tasthuḥ || 35 ||
[Analyze grammar]

tebhyaḥ sthitebhyaḥ sa tathāvidhebhyaḥ rūpeṇa bhāvena ca dāruṇebhyaḥ |
na vivyathe nodvivije mahārṣiḥ krīḍan subālebhya ivoddhatebhyaḥ || 36 ||
[Analyze grammar]

kaścittato raudravivṛttadṛṣṭistasmai gadāmudyamayāñcakāra |
tastambha bāhuḥ sagadastato 'sya purandarasyeva purā savajraḥ || 37 ||
[Analyze grammar]

kecitsamudyamya śilāstarūṃśca viṣehire naiva munau vimoktum |
petuḥ savṛkṣāḥ saśilāstathaiva vajrāvabhagnā iva vindhyapādāḥ || 38 ||
[Analyze grammar]

kaiścitsamutpatya nabho vimuktāḥ śilāśca vṛkṣāśca paraśvadhāśca |
tasthurnabhasyeva na cāvapetuḥ sandhyābhrapādā iva naikavarṇāḥ || 39 ||
[Analyze grammar]

cikṣepa tasyopari dīptamanyaḥ kaḍaṅgaraṃ parvataśṛṅgamātram |
yanmuktamātraṃ gaganasthameva tasyānubhāvācchatadhā babhūva || 40 ||
[Analyze grammar]

kaścijjvalannarka ivoditaḥ khādaṅgāravarṣaṃ mahadutsasarja |
cūrnāni cāmīkarakandarāṇāṃ kalpātyaye meruriva pradīptaḥ || 41 ||
[Analyze grammar]

tadbodhimūle pravikīryamāṇamaṅgāravarṣaṃ tu savisphuliṅgam |
maitrīvihārādṛṣisattamasya babhūva raktotpalapatravarṣaḥ || 42 ||
[Analyze grammar]

śarīracittavyasanātapaistairevaṃvidhaistaiśca nipātyamānaiḥ |
naivāsanācchākyamuniścacāla svaṃ niścayaṃ bandhumivopaguhya || 43 ||
[Analyze grammar]

athāpare nirjagalurmukhebhyaḥ sarpānvijīrṇebhya iva drumebhyaḥ |
te mantrabaddhā iva tatsamīpe na śaśvasurnotsasṛjurna celuḥ || 44 ||
[Analyze grammar]

bhūtvāpare vāridharā vṛhantaḥ savidyutaḥ sāśanicaṇḍaghoṣāḥ |
tasmin drume tatyajuraśmavarṣaṃ tatpuṣpavarṣaṃ ruciraṃ babhūva || 45 ||
[Analyze grammar]

cāpe 'tha vāṇo nihito 'pareṇa jajvāla tatraiva na niṣpapāta |
anīśvarasyātmani dhūryamāṇo durmarṣaṇasyeva narasya manyuḥ || 46 ||
[Analyze grammar]

pañceṣavo 'nyena tu vipramuktāstasthurnayatyeva munau na petuḥ |
saṃsārabhīrorviṣayapravṛttau pañcendriyāṇīva parīkṣakasya || 47 ||
[Analyze grammar]

jighāṃsayānyaḥ prasasāra ruṣṭo gadāṃ gṛhītvābhimukho mahārṣeḥ |
so 'prāptakālo vivaśaḥ papāta doṣeṣvivānarthakareṣu lokaḥ || 48 ||
[Analyze grammar]

strī meghakālī tu kapālahastā kartuṃ mahārṣeḥ kila mohacittam |
babhrāma tatrāniyataṃ na tasthau calātmano buddhirivāgameṣu || 49 ||
[Analyze grammar]

kaścitpradīptaṃ praṇidhāya cakṣurnetrāgnināśīviṣavaddidhakṣuḥ |
tatraiva nāsīttamṛṣiṃ dadarśa kāmātmakaḥ śreya ivopadiṣṭam || 50 ||
[Analyze grammar]

gurvīṃ śilāmudyamayaṃstathānyaḥ śaśrāma moghaṃ vihataprayatnaḥ |
niḥśreyasaṃ jñānasamādhigamyaṃ kāyaklamairdharmamivāptukāmaḥ || 51 ||
[Analyze grammar]

tarakṣusiṃhākṛtayastathānye praṇeduruccairmahataḥ praṇādān |
sattvāni yaiḥ sañcukucuḥ samantādvajrāhatā dyauḥ phalatīti matvā || 52 ||
[Analyze grammar]

mṛgā gajāścārttaravān sṛjanto vidudruvuścaiva nililyire ca |
rātrau ca tasyāmahanīva digbhyaḥ khagā ruvantaḥ paripeturārttāḥ || 53 ||
[Analyze grammar]

teṣāṃ praṇādaistu tathāvidhaistaiḥ sarveṣu bhūteṣvapi kampiteṣu |
munirna tatrāsa na sañcukoca ravairgarutmāniva vāyasānām || 54 ||
[Analyze grammar]

bhayāvahebhyaḥ pariṣadgaṇebhyo yathā yathā naiva munirbibhāya |
tathā tathā dharmabhṛtāṃ sapatnaḥ śokācca roṣācca sasāra māraḥ || 55 ||
[Analyze grammar]

bhūtaṃ tataḥ kiñcidadṛśyarūpaṃ viśiṣṭarūpaṃ gaganasthameva |
dṛṣṭvārṣaye drugdhamavairaruṣṭaṃ māraṃ babhāṣe mahatā svareṇa || 56 ||
[Analyze grammar]

moghaṃ śramaṃ nārhasi māra kartuṃ hiṃsrātmatāmutsṛja gaccha śarma |
naiṣa tvayā kampayituṃ hi śakyo mahāgirirmerurivānilena || 57 ||
[Analyze grammar]

apyuṣṇabhāvaṃ jvalanaḥ prajahyādāpo dravatvaṃ pṛthivī sthiratvam |
anekakalpācitapuṇyakarmā na tveva jahyādvyavasāyameṣaḥ || 58 ||
[Analyze grammar]

yo niścayo hyasya parākramaśca tejaśca yadyā ca dayā prajāsu |
aprāpya notthāsyati tattvameṣa tamāṃsyahatveva sahasraraśmiḥ || 59 ||
[Analyze grammar]

kāṣṭhaṃ hi mathnan labhate hutāśaṃ bhūmiṃ khanan vindati cāpi toyam |
nirbandhinaḥ kiñca na nāsya sādhyaṃ nyāyena yuktaṃ ca kṛtaṃ ca sarvam || 60 ||
[Analyze grammar]

tallokamārttaṃ karuṇāyamāno rogeṣu rāgādiṣu vartamānam |
mahābhiṣagnārhati vighnameṣa jñānauṣadhārthaṃ parikhidyamānaḥ || 61 ||
[Analyze grammar]

hṛte ca loke bahubhiḥ kumārgaiḥ sanmārgamanvicchati yaḥ śrameṇa |
sa daiśikaḥ kṣobhayituṃ na yuktaṃ sudeśikaḥ sārtha iva pranaṣṭe || 62 ||
[Analyze grammar]

sattveṣu naṣṭeṣu mahāndhakārairjñānapradīpaḥ kriyamāṇa eṣaḥ |
āryasya nirvāpayituṃ na sādhu prajvālyamānastamasīva dīpaḥ || 63 ||
[Analyze grammar]

dṛṣṭvā ca saṃsāramaye mahaughe magnaṃ jagatpāramavindamānam |
yaścedamuttārayituṃ pravṛttaḥ kaścinnayettasya tu pāpamāryaḥ || 64 ||
[Analyze grammar]

kṣamāśipho dhairyavigāḍhamūlaścāritrapuṣpaḥ smṛtibuddhiśākhaḥ |
jñānadrumo dharmaphalapradātā notpāṭanaṃ hyarhati vardhamānaḥ || 65 ||
[Analyze grammar]

baddhāṃ dṛḍhaiścetasi mohapāśairyasya prajāṃ mokṣayituṃ manīṣā |
tasmin jighāṃsā tava nopapannā śrānte jagadbandhanamokṣahetoḥ || 66 ||
[Analyze grammar]

bodhāya karmāṇi hi yānyanena kṛtāni teṣāṃ niyato 'dya kālaḥ |
sthāne tathāsminnupaviṣṭa eṣa yathaiva pūrve munayastathaiva || 67 ||
[Analyze grammar]

eṣā hi nābhirvasudhātalasya kṛtsnena yuktā parameṇa dhāmnā |
bhūmerato 'nyo 'sti hi na pradeśo veśaṃ samādherviṣayo hitasya || 68 ||
[Analyze grammar]

tanmā kṛthāḥ śokamupehi śāntiṃ mā bhūnmahimnā tava māra mānaḥ |
viśrambhituṃ na kṣamamadhruvā śrīścale pade kiṃ padamabhyupaiṣi || 69 ||
[Analyze grammar]

tataḥ sa saṃśrutya ca tasya tadvaco mahāmuneḥ prekṣya ca niṣprakampatām |
jagāma māro vimanā hatodyamaḥ śarairjagaccetasi yairvihanyase || 70 ||
[Analyze grammar]

gatapraharṣā viphalīkṛtaśramā praviddhapāṣāṇakaḍaṅgaradrumā |
diśaḥ pradudrāva tato 'sya sā camūrhatāśrayeva dviṣatā dviṣaccamūḥ || 71 ||
[Analyze grammar]

dravati saparapakṣe nirjite puṣpaketau jayati jitatamaske nīrajaske mahārṣau |
yuvatiriva sahāsā dyauścakāśe sacandrā surabhi ca jalagarbhaṃ puṣpavarṣaṃ papāta || 72 ||
[Analyze grammar]

tathāpi pāpīyasi nirjite gate diśaḥ praseduḥ prababhau niśākaraḥ |
divo nipeturbhuvi puṣpavṛṣṭayo rarāja yoṣeva vikalmaṣā niśā || 73 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Buddha-carita Chapter 13

Cover of edition (2003)

The Buddha-Carita By Asvaghosa or Acts of Buddha
by E. B. Cowell (2003)

Buy now!
Cover of edition (2011)

Buddha Carita of Asvaghosa
by Shanti Lal Nagar (2011)

Sanskrit text, English translation, Index of Verse and Photographs of Archaeological Evidence

Buy now!
Cover of edition (2016)

Asvaghosa’s Buddhacarita or Acts of the Buddha
by E. H. Johnston (2016)

Sanskrit text with English Translation

Buy now!
Like what you read? Consider supporting this website: