Chapter 329

arjuna uvāca |
agnīṣomau kathaṃ pūrvamekayonī pravartitau |
eṣa me saṃśayo jātastaṃ chindhi madhusūdana || 1 ||
[Analyze grammar]

śrībhagavānuvāca |
hanta te vartayiṣyāmi purāṇaṃ pāṇḍunandana |
ātmatejodbhavaṃ pārtha śṛṇuṣvaikamanā mama || 2 ||
[Analyze grammar]

saṃprakṣālanakāle'tikrānte caturthe yugasahasrānte |
avyakte sarvabhūtapralaye sthāvarajaṅgame |
jyotirdharaṇivāyurahite'ndhe tamasi jalaikārṇave loke |
tama ityevābhibhūte'saṃjñake'dvitīye pratiṣṭhite |
naiva rātryāṃ na divase na sati nāsati na vyakte nāvyakte vyavasthite |
etasyāmavasthāyāṃ nārāyaṇaguṇāśrayādakṣayādajarādanindriyādagrāhyādasaṃbhavātsatyādahiṃsrāllalāmādvividhapravṛttiviśeṣāt |
akṣayādajarāmarādamūrtitaḥ sarvavyāpinaḥ sarvakartuḥ śāśvatāttamasaḥ puruṣaḥ prādurbhūto hariravyayaḥ || 3 ||
[Analyze grammar]

nidarśanamapi hyatra bhavati |
nāsīdaho na rātrirāsīt |
na sadāsīnnāsadāsīt |
tama eva purastādabhavadviśvarūpam |
sā viśvasya jananītyevamasyārtho'nubhāṣyate || 4 ||
[Analyze grammar]

tasyedānīṃ tamaḥsaṃbhavasya puruṣasya padmayonerbrahmaṇaḥ prādurbhāve sa puruṣaḥ prajāḥ sisṛkṣamāṇo netrābhyāmagnīṣomau sasarja |
tato bhūtasarge pravṛtte prajākramavaśādbrahmakṣatramupātiṣṭhat |
yaḥ somastadbrahma yadbrahma te brāhmaṇāḥ |
yo'gnistatkṣatraṃ kṣatrādbrahma balavattaram |
kasmāditi lokapratyakṣaguṇametattadyathā |
brāhmaṇebhyaḥ paraṃ bhūtaṃ notpannapūrvam |
dīpyamāne'gnau juhotīti kṛtvā bravīmi |
bhūtasargaḥ kṛto brahmaṇā bhūtāni ca pratiṣṭhāpya trailokyaṃ dhāryata iti || 5 ||
[Analyze grammar]

mantravādo'pi hi bhavati |
tvamagne yajñānāṃ hotā viśveṣām |
hito devebhirmānuṣe jane iti |
nidarśanaṃ cātra bhavati |
viśveṣāmagne yajñānāṃ hoteti |
hito devairmānuṣairjagata iti |
agnirhi yajñānāṃ hotā kartā |
sa cāgnirbrahma || 6 ||
[Analyze grammar]

na hyṛte mantrāddhavanamasti |
na vinā puruṣaṃ tapaḥ saṃbhavati |
havirmantrāṇāṃ saṃpūjā vidyate devamanuṣyāṇāmanena tvaṃ hoteti niyuktaḥ |
ye ca mānuṣā hotrādhikārāste ca |
brāhmaṇasya hi yājanaṃ vidhīyate na kṣatravaiśyayordvijātyoḥ |
tasmādbrāhmaṇā hyagnibhūtā yajñānudvahanti |
yajñā devāṃstarpayanti devāḥ pṛthivīṃ bhāvayanti || 7 ||
[Analyze grammar]

śatapathe hi brāhmaṇaṃ bhavati |
agnau samiddhe sa juhoti yo vidvānbrāhmaṇamukhe dānāhutiṃ juhoti |
evamapyagnibhūtā brāhmaṇā vidvāṃso'gniṃ bhāvayanti |
agnirviṣṇuḥ sarvabhūtānyanupraviśya prāṇāndhārayati |
api cātra sanatkumāragītāḥ ślokā bhavanti || 8 ||
[Analyze grammar]

viśvaṃ brahmāsṛjatpūrvaṃ sarvādirniravaskaram |
brahmaghoṣairdivaṃ tiṣṭhantyamarā brahmayonayaḥ || 9 ||
[Analyze grammar]

brāhmaṇānāṃ matirvākyaṃ karma śraddhā tapāṃsi ca |
dhārayanti mahīṃ dyāṃ ca śaityādvāryamṛtaṃ yathā || 10 ||
[Analyze grammar]

nāsti satyātparo dharmo nāsti mātṛsamo guruḥ |
brāhmaṇebhyaḥ paraṃ nāsti pretya ceha ca bhūtaye || 11 ||
[Analyze grammar]

naiṣāmukṣā vardhate nota vāhā na gargaro mathyate saṃpradāne |
apadhvastā dasyubhūtā bhavanti yeṣāṃ rāṣṭre brāhmaṇā vṛttihīnāḥ || 12 ||
[Analyze grammar]

vedapurāṇetihāsaprāmāṇyānnārāyaṇamukhodgatāḥ sarvātmānaḥ sarvakartāraḥ sarvabhāvanāśca brāhmaṇāḥ |
vāksamakālaṃ hi tasya devasya varapradasya brāhmaṇāḥ prathamaṃ prādurbhūtā brāhmaṇebhyaśca śeṣā varṇāḥ prādurbhūtāḥ |
itthaṃ ca surāsuraviśiṣṭā brāhmaṇā yadā mayā brahmabhūtena purā svayamevotpāditāḥ surāsuramaharṣayo bhūtaviśeṣāḥ sthāpitā nigṛhītāśca || 13 ||
[Analyze grammar]

ahalyādharṣaṇanimittaṃ hi gautamāddhariśmaśrutāmindraḥ prāptaḥ |
kauśikanimittaṃ cendro muṣkaviyogaṃ meṣavṛṣaṇatvaṃ cāvāpa |
aśvinorgrahapratiṣedhodyatavajrasya puraṃdarasya cyavanena stambhito bāhuḥ |
kratuvadhaprāptamanyunā ca dakṣeṇa bhūyastapasā cātmānaṃ saṃyojya netrākṛtiranyā lalāṭe rudrasyotpāditā || 14 ||
[Analyze grammar]

tripuravadhārthaṃ dīkṣāmabhyupagatasya rudrasyośanasā śiraso jaṭā utkṛtya prayuktāḥ |
tataḥ prādurbhūtā bhujagāḥ |
tairasya bhujagaiḥ pīḍyamānaḥ kaṇṭho nīlatāmupanītaḥ |
pūrve ca manvantare svāyaṃbhuve nārāyaṇahastabandhagrahaṇānnīlakaṇṭhatvameva vā || 15 ||
[Analyze grammar]

amṛtotpādane puraścaraṇatāmupagatasyāṅgiraso bṛhaspaterupaspṛśato na prasādaṃ gatavatyaḥ kilāpaḥ |
atha bṛhaspatirapāṃ cukrodha |
yasmānmamopaspṛśataḥ kaluṣībhūtā na prasādamupagatāstasmādadyaprabhṛti jhaṣamakaramatsyakacchapajantusaṃkīrṇāḥ kaluṣībhavateti |
tadāprabhṛtyāpo yādobhiḥ saṃkīrṇāḥ saṃvṛttāḥ || 16 ||
[Analyze grammar]

viśvarūpo vai tvāṣṭraḥ purohito devānāmāsītsvasrīyo'surāṇām |
sa pratyakṣaṃ devebhyo bhāgamadadatparokṣamasurebhyaḥ || 17 ||
[Analyze grammar]

atha hiraṇyakaśipuṃ puraskṛtya viśvarūpamātaraṃ svasāramasurā varamayācanta |
he svasarayaṃ te putrastvāṣṭro viśvarūpastriśirā devānāṃ purohitaḥ pratyakṣaṃ devebhyo bhāgamadadatparokṣamasmākam |
tato devā vardhante vayaṃ kṣīyāmaḥ |
tadenaṃ tvaṃ vārayitumarhasi tathā yathāsmānbhajediti || 18 ||
[Analyze grammar]

atha viśvarūpaṃ nandanavanamupagataṃ mātovāca |
putra kiṃ parapakṣavardhanastvaṃ mātulapakṣaṃ nāśayasi |
nārhasyevaṃ kartumiti |
sa viśvarūpo māturvākyamanatikramaṇīyamiti matvā saṃpūjya hiraṇyakaśipumagāt || 19 ||
[Analyze grammar]

hairaṇyagarbhācca vasiṣṭhāddhiraṇyakaśipuḥ śāpaṃ prāptavān |
yasmāttvayānyo vṛto hotā tasmādasamāptayajñastvamapūrvātsattvajātādvadhaṃ prāpsyasīti |
tacchāpadānāddhiraṇyakaśipuḥ prāptavānvadham || 20 ||
[Analyze grammar]

viśvarūpo mātṛpakṣavardhano'tyarthaṃ tapasyabhavat |
tasya vratabhaṅgārthamindro bahvīḥ śrīmatyo'psaraso niyuyoja |
tāśca dṛṣṭvā manaḥ kṣubhitaṃ tasyābhavattāsu cāpsaraḥsu nacirādeva sakto'bhavat |
saktaṃ cainaṃ jñātvāpsarasa ūcurgacchāmahe vayaṃ yathāgatamiti || 21 ||
[Analyze grammar]

tāstvāṣṭra uvāca |
kva gamiṣyatha āsyatāṃ tāvanmayā saha śreyo bhaviṣyatīti |
tāstamabruvan |
vayaṃ devastriyo'psarasa indraṃ varadaṃ purā prabhaviṣṇuṃ vṛṇīmaha iti || 22 ||
[Analyze grammar]

atha tā viśvarūpo'bravīdadyaiva sendrā devā na bhaviṣyantīti |
tato mantrāñjajāpa |
tairmantraiḥ prāvardhata triśirāḥ |
ekenāsyena sarvalokeṣu dvijaiḥ kriyāvadbhiryajñeṣu suhutaṃ somaṃ papāvekenāpa ekena sendrāndevān |
athendrastaṃ vivardhamānaṃ somapānāpyāyitasarvagātraṃ dṛṣṭvā cintāmāpede || 23 ||
[Analyze grammar]

devāśca te sahendreṇa brahmāṇamabhijagmurūcuśca |
viśvarūpeṇa sarvayajñeṣu suhutaḥ somaḥ pīyate |
vayamabhāgāḥ saṃvṛttāḥ |
asurapakṣo vardhate vayaṃ kṣīyāmaḥ |
tadarhasi no vidhātuṃ śreyo yadanantaramiti || 24 ||
[Analyze grammar]

tānbrahmovāca ṛṣirbhārgavastapastapyate dadhīcaḥ |
sa yācyatāṃ varaṃ yathā kalevaraṃ jahyāt |
tasyāsthibhirvajraṃ kriyatāmiti || 25 ||
[Analyze grammar]

devāstatrāgacchanyatra dadhīco bhagavānṛṣistapastepe |
sendrā devāstamabhigamyocurbhagavaṃstapasaḥ kuśalamavighnaṃ ceti |
tāndadhīca uvāca svāgataṃ bhavadbhyaḥ kiṃ kriyatām |
yadvakṣyatha tatkariṣyāmīti |
te tamabruvañśarīraparityāgaṃ lokahitārthaṃ bhagavānkartumarhatīti |
atha dadhīcastathaivāvimanāḥ sukhaduḥkhasamo mahāyogī ātmānaṃ samādhāya śarīraparityāgaṃ cakāra || 26 ||
[Analyze grammar]

tasya paramātmanyavasṛte tānyasthīni dhātā saṃgṛhya vajramakarot |
tena vajreṇābhedyenāpradhṛṣyeṇa brahmāsthisaṃbhūtena viṣṇupraviṣṭenendro viśvarūpaṃ jaghāna |
śirasāṃ cāsya chedanamakarot |
tasmādanantaraṃ viśvarūpagātramathanasaṃbhavaṃ tvaṣṭrotpāditamevāriṃ vṛtramindro jaghāna || 27 ||
[Analyze grammar]

tasyāṃ dvaidhībhūtāyāṃ brahmavadhyāyāṃ bhayādindro devarājyaṃ parityajya apsu saṃbhavāṃ śītalāṃ mānasasarogatāṃ nalinīṃ prapede |
tatra caiśvaryayogādaṇumātro bhūtvā bisagranthiṃ praviveśa || 28 ||
[Analyze grammar]

atha brahmavadhyābhayapranaṣṭe trailokyanāthe śacīpatau jagadanīśvaraṃ babhūva |
devānrajastamaścāviveśa |
mantrā na prāvartanta maharṣīṇām |
rakṣāṃsi prādurabhavan |
brahma cotsādanaṃ jagāma |
anindrāścābalā lokāḥ supradhṛṣyā babhūvuḥ || 29 ||
[Analyze grammar]

atha devā ṛṣayaścāyuṣaḥ putraṃ nahuṣaṃ nāma devarājatve'bhiṣiṣicuḥ |
nahuṣaḥ pañcabhiḥ śatairjyotiṣāṃ lalāṭe jvaladbhiḥ sarvatejoharaistriviṣṭapaṃ pālayāṃ babhūva |
atha lokāḥ prakṛtimāpedire svasthāśca babhūvuḥ || 30 ||
[Analyze grammar]

athovāca nahuṣaḥ |
sarvaṃ māṃ śakropabhuktamupasthitamṛte śacīmiti |
sa evamuktvā śacīsamīpamagamaduvāca cainām |
subhage'hamindro devānāṃ bhajasva māmiti |
taṃ śacī pratyuvāca |
prakṛtyā tvaṃ dharmavatsalaḥ somavaṃśodbhavaśca |
nārhasi parapatnīdharṣaṇaṃ kartumiti || 31 ||
[Analyze grammar]

tāmathovāca nahuṣaḥ |
aindraṃ padamadhyāsyate mayā |
ahamindrasya rājyaratnaharo nātrādharmaḥ kaścittvamindrabhukteti |
sā tamuvāca |
asti mama kiṃcidvratamaparyavasitam |
tasyāvabhṛthe tvāmupagamiṣyāmi kaiścidevāhobhiriti |
sa śacyaivamabhihito nahuṣo jagāma || 32 ||
[Analyze grammar]

atha śacī duḥkhaśokārtā bhartṛdarśanalālasā nahuṣabhayagṛhītā bṛhaspatimupāgacchat |
sa ca tāmabhigatāṃ dṛṣṭvaiva dhyānaṃ praviśya bhartṛkāryatatparāṃ jñātvā bṛhaspatiruvāca |
anenaiva vratena tapasā cānvitā devīṃ varadāmupaśrutimāhvaya |
sā tavendraṃ darśayiṣyatīti || 33 ||
[Analyze grammar]

sātha mahāniyamamāsthitā devīṃ varadāmupaśrutiṃ mantrairāhvayat |
sopaśrutiḥ śacīsamīpamagāt |
uvāca caināmiyamasmi tvayopahūtopasthitā |
kiṃ te priyaṃ karavāṇīti |
tāṃ mūrdhnā praṇamyovāca śacī bhagavatyarhasi me bhartāraṃ darśayituṃ tvaṃ satyā matā ceti |
saināṃ mānasaṃ saro'nayat |
tatrendraṃ bisagranthigatamadarśayat || 34 ||
[Analyze grammar]

tāmindraḥ patnīṃ kṛśāṃ glānāṃ ca dṛṣṭvā cintayāṃ babhūva |
aho mama mahadduḥkhamidamadyopagatam |
naṣṭaṃ hi māmiyamanviṣyopāgamadduḥkhārteti |
tāmindra uvāca kathaṃ vartayasīti |
sā tamuvāca |
nahuṣo māmāhvayati |
kālaścāsya mayā kṛta iti || 35 ||
[Analyze grammar]

tāmindra uvāca |
gaccha |
nahuṣastvayā vācyo'pūrveṇa māmṛṣiyuktena yānena tvamadhirūḍha udvahasva |
indrasya hi mahānti vāhanāni manasaḥ priyāṇyadhirūḍhāni mayā |
tvamanyenopayātumarhasīti |
saivamuktā hṛṣṭā jagāma |
indro'pi bisagranthimevāviveśa bhūyaḥ || 36 ||
[Analyze grammar]

athendrāṇīmabhyāgatāṃ dṛṣṭvovāca nahuṣaḥ pūrṇaḥ sa kāla iti |
taṃ śacyabravīcchakreṇa yathoktam |
sa maharṣiyuktaṃ vāhanamadhirūḍhaḥ śacīsamīpamupāgacchat || 37 ||
[Analyze grammar]

atha maitrāvaruṇiḥ kumbhayoniragastyo maharṣīnvikriyamāṇāṃstānnahuṣeṇāpaśyat |
padbhyāṃ ca tenāspṛśyata |
tataḥ sa nahuṣamabravīdakāryapravṛtta pāpa patasva mahīm |
sarpo bhava yāvadbhūmirgirayaśca tiṣṭheyustāvaditi |
sa maharṣivākyasamakālameva tasmādyānādavāpatat || 38 ||
[Analyze grammar]

athānindraṃ punastrailokyamabhavat |
tato devā ṛṣayaśca bhagavantaṃ viṣṇuṃ śaraṇamindrārthe'bhijagmuḥ |
ūcuścainaṃ bhagavannindraṃ brahmavadhyābhibhūtaṃ trātumarhasīti |
tataḥ sa varadastānabravīdaśvamedhaṃ yajñaṃ vaiṣṇavaṃ śakro'bhiyajatu |
tataḥ svaṃ sthānaṃ prāpsyatīti || 39 ||
[Analyze grammar]

tato devā ṛṣayaścendraṃ nāpaśyanyadā tadā śacīmūcurgaccha subhage indramānayasveti |
sā punastatsaraḥ samabhyagacchat |
indraśca tasmātsarasaḥ samutthāya bṛhaspatimabhijagāma |
bṛhaspatiścāśvamedhaṃ mahākratuṃ śakrāyāharat |
tataḥ kṛṣṇasāraṅgaṃ medhyamaśvamutsṛjya vāhanaṃ tameva kṛtvā indraṃ marutpatiṃ bṛhaspatiḥ svasthānaṃ prāpayāmāsa || 40 ||
[Analyze grammar]

tataḥ sa devarāḍdevairṛṣibhiḥ stūyamānastriviṣṭapastho niṣkalmaṣo babhūva |
brahmavadhyāṃ caturṣu sthāneṣu vanitāgnivanaspatigoṣu vyabhajat |
evamindro brahmatejaḥprabhāvopabṛṃhitaḥ śatruvadhaṃ kṛtvā svasthānaṃ prāpitaḥ || 41 ||
[Analyze grammar]

ākāśagaṅgāgataśca purā bharadvājo maharṣirupāspṛśaṃstrīnkramānkramatā viṣṇunābhyāsāditaḥ |
sa bharadvājena sasalilena pāṇinorasi tāḍitaḥ salakṣaṇoraskaḥ saṃvṛttaḥ || 42 ||
[Analyze grammar]

bhṛguṇā maharṣiṇā śapto'gniḥ sarvabhakṣatvamupanītaḥ || 43 ||
[Analyze grammar]

aditirvai devānāmannamapacadetadbhuktvāsurānhaniṣyantīti |
tatra budho vratacaryāsamāptāvāgacchat |
aditiṃ cāvocadbhikṣāṃ dehīti |
tatra devaiḥ pūrvametatprāśyaṃ nānyenetyaditirbhikṣāṃ nādāt |
atha bhikṣāpratyākhyānaruṣitena budhena brahmabhūtena vivasvato dvitīye janmanyaṇḍasaṃjñitasyāṇḍaṃ māritamadityāḥ |
sa mārtaṇḍo vivasvānabhavacchrāddhadevaḥ || 44 ||
[Analyze grammar]

dakṣasya vai duhitaraḥ ṣaṣṭirāsan |
tābhyaḥ kaśyapāya trayodaśa prādāddaśa dharmāya daśa manave saptaviṃśatimindave |
tāsu tulyāsu nakṣatrākhyāṃ gatāsu somo rohiṇyāmabhyadhikāṃ prītimakarot |
tatastāḥ śeṣāḥ patnya īrṣyāvatyaḥ pituḥ samīpaṃ gatvemamarthaṃ śaśaṃsuḥ |
bhagavannasmāsu tulyaprabhāvāsu somo rohiṇīmadhikaṃ bhajatīti |
so'bravīdyakṣmainamāvekṣyatīti || 45 ||
[Analyze grammar]

dakṣaśāpātsomaṃ rājānaṃ yakṣmāviveśa |
sa yakṣmaṇāviṣṭo dakṣamagamat |
dakṣaścainamabravīnna samaṃ vartasa iti |
tatrarṣayaḥ somamabruvankṣīyase yakṣmaṇā |
paścimasyāṃ diśi samudre hiraṇyasarastīrtham |
tatra gatvātmānamabhiṣecayasveti |
athāgacchatsomastatra hiraṇyasarastīrtham |
gatvā cātmanaḥ snapanamakarot |
snātvā cātmānaṃ pāpmano mokṣayāmāsa |
tatra cāvabhāsitastīrthe yadā somastadāprabhṛti tīrthaṃ tatprabhāsamiti nāmnā khyātaṃ babhūva |
tacchāpādadyāpi kṣīyate somo'māvāsyāntarasthaḥ |
paurṇamāsīmātre'dhiṣṭhito meghalekhāpraticchannaṃ vapurdarśayati |
meghasadṛśaṃ varṇamagamattadasya śaśalakṣma vimalamabhavat || 46 ||
[Analyze grammar]

sthūlaśirā maharṣirmeroḥ prāguttare digbhāge tapastepe |
tasya tapastapyamānasya sarvagandhavahaḥ śucirvāyurvivāyamānaḥ śarīramaspṛśat |
sa tapasā tāpitaśarīraḥ kṛśo vāyunopavījyamāno hṛdayaparitoṣamagamat |
tatra tasyānilavyajanakṛtaparitoṣasya sadyo vanaspatayaḥ puṣpaśobhāṃ na darśitavanta iti sa etāñśaśāpa na sarvakālaṃ puṣpavanto bhaviṣyatheti || 47 ||
[Analyze grammar]

nārāyaṇo lokahitārthaṃ vaḍavāmukho nāma maharṣiḥ purābhavat |
tasya merau tapastapyataḥ samudra āhūto nāgataḥ |
tenāmarṣitenātmagātroṣmaṇā samudraḥ stimitajalaḥ kṛtaḥ |
svedaprasyandanasadṛśaścāsya lavaṇabhāvo janitaḥ |
uktaścāpeyo bhaviṣyasi |
etacca te toyaṃ vaḍavāmukhasaṃjñitena pīyamānaṃ madhuraṃ bhaviṣyati |
tadetadadyāpi vaḍavāmukhasaṃjñitenānuvartinā toyaṃ sāmudraṃ pīyate || 48 ||
[Analyze grammar]

himavato girerduhitaramumāṃ rudraścakame |
bhṛgurapi ca maharṣirhimavantamāgamyābravītkanyāmumāṃ me dehīti |
tamabravīddhimavānabhilaṣito varo rudra iti |
tamabravīdbhṛguryasmāttvayāhaṃ kanyāvaraṇakṛtabhāvaḥ pratyākhyātastasmānna ratnānāṃ bhavānbhājanaṃ bhaviṣyatīti |
adyaprabhṛtyetadavasthitamṛṣivacanam || 49 ||
[Analyze grammar]

tadevaṃvidhaṃ māhātmyaṃ brāhmaṇānām |
kṣatramapi śāśvatīmavyayāṃ pṛthivīṃ patnīmabhigamya bubhuje |
tadetadbrahmāgnīṣomīyam |
tena jagaddhāryate || 50 ||
[Analyze grammar]