Chapter 328

janamejaya uvāca |
astauṣīdyairimaṃ vyāsaḥ saśiṣyo madhusūdanam |
nāmabhirvividhaireṣāṃ niruktaṃ bhagavanmama || 1 ||
[Analyze grammar]

vaktumarhasi śuśrūṣoḥ prajāpatipaterhareḥ |
śrutvā bhaveyaṃ yatpūtaḥ śaraccandra ivāmalaḥ || 2 ||
[Analyze grammar]

vaiśaṃpāyana uvāca |
śṛṇu rājanyathācaṣṭa phalgunasya harirvibhuḥ |
prasannātmātmano nāmnāṃ niruktaṃ guṇakarmajam || 3 ||
[Analyze grammar]

nāmabhiḥ kīrtitaistasya keśavasya mahātmanaḥ |
pṛṣṭavānkeśavaṃ rājanphalgunaḥ paravīrahā || 4 ||
[Analyze grammar]

arjuna uvāca |
bhagavanbhūtabhavyeśa sarvabhūtasṛgavyaya |
lokadhāma jagannātha lokānāmabhayaprada || 5 ||
[Analyze grammar]

yāni nāmāni te deva kīrtitāni maharṣibhiḥ |
vedeṣu sapurāṇeṣu yāni guhyāni karmabhiḥ || 6 ||
[Analyze grammar]

teṣāṃ niruktaṃ tvatto'haṃ śrotumicchāmi keśava |
na hyanyo vartayennāmnāṃ niruktaṃ tvāmṛte prabho || 7 ||
[Analyze grammar]

śrībhagavānuvāca |
ṛgvede sayajurvede tathaivātharvasāmasu |
purāṇe sopaniṣade tathaiva jyotiṣe'rjuna || 8 ||
[Analyze grammar]

sāṃkhye ca yogaśāstre ca āyurvede tathaiva ca |
bahūni mama nāmāni kīrtitāni maharṣibhiḥ || 9 ||
[Analyze grammar]

gauṇāni tatra nāmāni karmajāni ca kānicit |
niruktaṃ karmajānāṃ ca śṛṇuṣva prayato'nagha |
kathyamānaṃ mayā tāta tvaṃ hi me'rdhaṃ smṛtaḥ purā || 10 ||
[Analyze grammar]

namo'tiyaśase tasmai dehināṃ paramātmane |
nārāyaṇāya viśvāya nirguṇāya guṇātmane || 11 ||
[Analyze grammar]

yasya prasādajo brahmā rudraśca krodhasaṃbhavaḥ |
yo'sau yonirhi sarvasya sthāvarasya carasya ca || 12 ||
[Analyze grammar]

aṣṭādaśaguṇaṃ yattatsattvaṃ sattvavatāṃ vara |
prakṛtiḥ sā parā mahyaṃ rodasī yogadhāriṇī |
ṛtā satyāmarājayyā lokānāmātmasaṃjñitā || 13 ||
[Analyze grammar]

tasmātsarvāḥ pravartante sargapralayavikriyāḥ |
tato yajñaśca yaṣṭā ca purāṇaḥ puruṣo virāṭ |
aniruddha iti prokto lokānāṃ prabhavāpyayaḥ || 14 ||
[Analyze grammar]

brāhme rātrikṣaye prāpte tasya hyamitatejasaḥ |
prasādātprādurabhavatpadmaṃ padmanibhekṣaṇa |
tatra brahmā samabhavatsa tasyaiva prasādajaḥ || 15 ||
[Analyze grammar]

ahnaḥ kṣaye lalāṭācca suto devasya vai tathā |
krodhāviṣṭasya saṃjajñe rudraḥ saṃhārakārakaḥ || 16 ||
[Analyze grammar]

etau dvau vibudhaśreṣṭhau prasādakrodhajau smṛtau |
tadādeśitapanthānau sṛṣṭisaṃhārakārakau |
nimittamātraṃ tāvatra sarvaprāṇivarapradau || 17 ||
[Analyze grammar]

kapardī jaṭilo muṇḍaḥ śmaśānagṛhasevakaḥ |
ugravratadharo rudro yogī tripuradāruṇaḥ || 18 ||
[Analyze grammar]

dakṣakratuharaścaiva bhaganetraharastathā |
nārāyaṇātmako jñeyaḥ pāṇḍaveya yuge yuge || 19 ||
[Analyze grammar]

tasminhi pūjyamāne vai devadeve maheśvare |
saṃpūjito bhavetpārtha devo nārāyaṇaḥ prabhuḥ || 20 ||
[Analyze grammar]

ahamātmā hi lokānāṃ viśvānāṃ pāṇḍunandana |
tasmādātmānamevāgre rudraṃ saṃpūjayāmyaham || 21 ||
[Analyze grammar]

yadyahaṃ nārcayeyaṃ vai īśānaṃ varadaṃ śivam |
ātmānaṃ nārcayetkaściditi me bhāvitaṃ manaḥ |
mayā pramāṇaṃ hi kṛtaṃ lokaḥ samanuvartate || 22 ||
[Analyze grammar]

pramāṇāni hi pūjyāni tatastaṃ pūjayāmyaham |
yastaṃ vetti sa māṃ vetti yo'nu taṃ sa hi māmanu || 23 ||
[Analyze grammar]

rudro nārāyaṇaścaiva sattvamekaṃ dvidhākṛtam |
loke carati kaunteya vyaktisthaṃ sarvakarmasu || 24 ||
[Analyze grammar]

na hi me kenaciddeyo varaḥ pāṇḍavanandana |
iti saṃcintya manasā purāṇaṃ viśvamīśvaram |
putrārthamārādhitavānātmānamahamātmanā || 25 ||
[Analyze grammar]

na hi viṣṇuḥ praṇamati kasmaicidvibudhāya tu |
ṛta ātmānameveti tato rudraṃ bhajāmyaham || 26 ||
[Analyze grammar]

sabrahmakāḥ sarudrāśca sendrā devāḥ saharṣibhiḥ |
arcayanti suraśreṣṭhaṃ devaṃ nārāyaṇaṃ harim || 27 ||
[Analyze grammar]

bhaviṣyatāṃ vartatāṃ ca bhūtānāṃ caiva bhārata |
sarveṣāmagraṇīrviṣṇuḥ sevyaḥ pūjyaśca nityaśaḥ || 28 ||
[Analyze grammar]

namasva havyadaṃ viṣṇuṃ tathā śaraṇadaṃ nama |
varadaṃ namasva kaunteya havyakavyabhujaṃ nama || 29 ||
[Analyze grammar]

caturvidhā mama janā bhaktā evaṃ hi te śrutam |
teṣāmekāntinaḥ śreṣṭhāste caivānanyadevatāḥ |
ahameva gatisteṣāṃ nirāśīḥkarmakāriṇām || 30 ||
[Analyze grammar]

ye ca śiṣṭāstrayo bhaktāḥ phalakāmā hi te matāḥ |
sarve cyavanadharmāṇaḥ pratibuddhastu śreṣṭhabhāk || 31 ||
[Analyze grammar]

brahmāṇaṃ śitikaṇṭhaṃ ca yāścānyā devatāḥ smṛtāḥ |
prabuddhavaryāḥ sevante māmevaiṣyanti yatparam |
bhaktaṃ prati viśeṣaste eṣa pārthānukīrtitaḥ || 32 ||
[Analyze grammar]

tvaṃ caivāhaṃ ca kaunteya naranārāyaṇau smṛtau |
bhārāvataraṇārthaṃ hi praviṣṭau mānuṣīṃ tanum || 33 ||
[Analyze grammar]

jānāmyadhyātmayogāṃśca yo'haṃ yasmācca bhārata |
nivṛttilakṣaṇo dharmastathābhyudayiko'pi ca || 34 ||
[Analyze grammar]

narāṇāmayanaṃ khyātamahamekaḥ sanātanaḥ |
āpo nārā iti proktā āpo vai narasūnavaḥ |
ayanaṃ mama tatpūrvamato nārāyaṇo hyaham || 35 ||
[Analyze grammar]

chādayāmi jagadviśvaṃ bhūtvā sūrya ivāṃśubhiḥ |
sarvabhūtādhivāsaśca vāsudevastato hyaham || 36 ||
[Analyze grammar]

gatiśca sarvabhūtānāṃ prajānāṃ cāpi bhārata |
vyāptā me rodasī pārtha kāntiścābhyadhikā mama || 37 ||
[Analyze grammar]

adhibhūtāni cānte'haṃ tadicchaṃścāsmi bhārata |
kramaṇāccāpyahaṃ pārtha viṣṇurityabhisaṃjñitaḥ || 38 ||
[Analyze grammar]

damātsiddhiṃ parīpsanto māṃ janāḥ kāmayanti hi |
divaṃ corvīṃ ca madhyaṃ ca tasmāddāmodaro hyaham || 39 ||
[Analyze grammar]

pṛśnirityucyate cānnaṃ vedā āpo'mṛtaṃ tathā |
mamaitāni sadā garbhe pṛśnigarbhastato hyaham || 40 ||
[Analyze grammar]

ṛṣayaḥ prāhurevaṃ māṃ tritakūpābhipātitam |
pṛśnigarbha tritaṃ pāhītyekatadvitapātitam || 41 ||
[Analyze grammar]

tataḥ sa brahmaṇaḥ putra ādyo ṛṣivarastritaḥ |
uttatārodapānādvai pṛśnigarbhānukīrtanāt || 42 ||
[Analyze grammar]

sūryasya tapato lokānagneḥ somasya cāpyuta |
aṃśavo ye prakāśante mama te keśasaṃjñitāḥ |
sarvajñāḥ keśavaṃ tasmānmāmāhurdvijasattamāḥ || 43 ||
[Analyze grammar]

svapatnyāmāhito garbha utathyena mahātmanā |
utathye'ntarhite caiva kadāciddevamāyayā |
bṛhaspatirathāvindattāṃ patnīṃ tasya bhārata || 44 ||
[Analyze grammar]

tato vai tamṛṣiśreṣṭhaṃ maithunopagataṃ tathā |
uvāca garbhaḥ kaunteya pañcabhūtasamanvitaḥ || 45 ||
[Analyze grammar]

pūrvāgato'haṃ varada nārhasyambāṃ prabādhitum |
etadbṛhaspatiḥ śrutvā cukrodha ca śaśāpa ca || 46 ||
[Analyze grammar]

maithunopagato yasmāttvayāhaṃ vinivāritaḥ |
tasmādandho jāsyasi tvaṃ macchāpānnātra saṃśayaḥ || 47 ||
[Analyze grammar]

sa śāpādṛṣimukhyasya dīrghaṃ tama upeyivān |
sa hi dīrghatamā nāma nāmnā hyāsīdṛṣiḥ purā || 48 ||
[Analyze grammar]

vedānavāpya caturaḥ sāṅgopāṅgānsanātanān |
prayojayāmāsa tadā nāma guhyamidaṃ mama || 49 ||
[Analyze grammar]

ānupūrvyeṇa vidhinā keśaveti punaḥ punaḥ |
sa cakṣuṣmānsamabhavadgautamaścābhavatpunaḥ || 50 ||
[Analyze grammar]

evaṃ hi varadaṃ nāma keśaveti mamārjuna |
devānāmatha sarveṣāmṛṣīṇāṃ ca mahātmanām || 51 ||
[Analyze grammar]

agniḥ somena saṃyukta ekayoni mukhaṃ kṛtam |
agnīṣomātmakaṃ tasmājjagatkṛtsnaṃ carācaram || 52 ||
[Analyze grammar]

api hi purāṇe bhavati |
ekayonyātmakāvagnīṣomau |
devāścāgnimukhā iti |
ekayonitvācca parasparaṃ mahayanto lokāndhārayata iti || 53 ||
[Analyze grammar]