Chapter 330

śrībhagavānuvāca |
sūryācandramasau śaśvatkeśairme aṃśusaṃjñitaiḥ |
bodhayaṃstāpayaṃścaiva jagaduttiṣṭhataḥ pṛthak || 1 ||
[Analyze grammar]

bodhanāttāpanāccaiva jagato harṣaṇaṃ bhavet |
agnīṣomakṛtairebhiḥ karmabhiḥ pāṇḍunandana |
hṛṣīkeśo'hamīśāno varado lokabhāvanaḥ || 2 ||
[Analyze grammar]

iḍopahūtayogena hare bhāgaṃ kratuṣvaham |
varṇaśca me hariśreṣṭhastasmāddharirahaṃ smṛtaḥ || 3 ||
[Analyze grammar]

dhāma sāro hi lokānāmṛtaṃ caiva vicāritam |
ṛtadhāmā tato vipraiḥ satyaścāhaṃ prakīrtitaḥ || 4 ||
[Analyze grammar]

naṣṭāṃ ca dharaṇīṃ pūrvamavindaṃ vai guhāgatām |
govinda iti māṃ devā vāgbhiḥ samabhituṣṭuvuḥ || 5 ||
[Analyze grammar]

śipiviṣṭeti cākhyāyāṃ hīnaromā ca yo bhavet |
tenāviṣṭaṃ hi yatkiṃcicchipiviṣṭaṃ hi tatsmṛtam || 6 ||
[Analyze grammar]

yāsko māmṛṣiravyagro naikayajñeṣu gītavān |
śipiviṣṭa iti hyasmādguhyanāmadharo hyaham || 7 ||
[Analyze grammar]

stutvā māṃ śipiviṣṭeti yāsko ṛṣirudāradhīḥ |
matprasādādadho naṣṭaṃ niruktamabhijagmivān || 8 ||
[Analyze grammar]

na hi jāto na jāye'haṃ na janiṣye kadācana |
kṣetrajñaḥ sarvabhūtānāṃ tasmādahamajaḥ smṛtaḥ || 9 ||
[Analyze grammar]

noktapūrvaṃ mayā kṣudramaślīlaṃ vā kadācana |
ṛtā brahmasutā sā me satyā devī sarasvatī || 10 ||
[Analyze grammar]

saccāsaccaiva kaunteya mayāveśitamātmani |
pauṣkare brahmasadane satyaṃ māmṛṣayo viduḥ || 11 ||
[Analyze grammar]

sattvānna cyutapūrvo'haṃ sattvaṃ vai viddhi matkṛtam |
janmanīhābhavatsattvaṃ paurvikaṃ me dhanaṃjaya || 12 ||
[Analyze grammar]

nirāśīḥkarmasaṃyuktaṃ sātvataṃ māṃ prakalpaya |
sātvatajñānadṛṣṭo'haṃ sātvataḥ sātvatāṃ patiḥ || 13 ||
[Analyze grammar]

kṛṣāmi medinīṃ pārtha bhūtvā kārṣṇāyaso mahān |
kṛṣṇo varṇaśca me yasmāttasmātkṛṣṇo'hamarjuna || 14 ||
[Analyze grammar]

mayā saṃśleṣitā bhūmiradbhirvyoma ca vāyunā |
vāyuśca tejasā sārdhaṃ vaikuṇṭhatvaṃ tato mama || 15 ||
[Analyze grammar]

nirvāṇaṃ paramaṃ saukhyaṃ dharmo'sau para ucyate |
tasmānna cyutapūrvo'hamacyutastena karmaṇā || 16 ||
[Analyze grammar]

pṛthivīnabhasī cobhe viśrute viśvalaukike |
tayoḥ saṃdhāraṇārthaṃ hi māmadhokṣajamañjasā || 17 ||
[Analyze grammar]

niruktaṃ vedaviduṣo ye ca śabdārthacintakāḥ |
te māṃ gāyanti prāgvaṃśe adhokṣaja iti sthitiḥ || 18 ||
[Analyze grammar]

śabda ekamataireṣa vyāhṛtaḥ paramarṣibhiḥ |
nānyo hyadhokṣajo loke ṛte nārāyaṇaṃ prabhum || 19 ||
[Analyze grammar]

ghṛtaṃ mamārciṣo loke jantūnāṃ prāṇadhāraṇam |
ghṛtārcirahamavyagrairvedajñaiḥ parikīrtitaḥ || 20 ||
[Analyze grammar]

trayo hi dhātavaḥ khyātāḥ karmajā iti ca smṛtāḥ |
pittaṃ śleṣmā ca vāyuśca eṣa saṃghāta ucyate || 21 ||
[Analyze grammar]

etaiśca dhāryate janturetaiḥ kṣīṇaiśca kṣīyate |
āyurvedavidastasmāttridhātuṃ māṃ pracakṣate || 22 ||
[Analyze grammar]

vṛṣo hi bhagavāndharmaḥ khyāto lokeṣu bhārata |
naighaṇṭukapadākhyātaṃ viddhi māṃ vṛṣamuttamam || 23 ||
[Analyze grammar]

kapirvarāhaḥ śreṣṭhaśca dharmaśca vṛṣa ucyate |
tasmādvṛṣākapiṃ prāha kaśyapo māṃ prajāpatiḥ || 24 ||
[Analyze grammar]

na cādiṃ na madhyaṃ tathā naiva cāntaṃ kadācidvidante surāścāsurāśca |
anādyo hyamadhyastathā cāpyanantaḥ pragīto'hamīśo vibhurlokasākṣī || 25 ||
[Analyze grammar]

śucīni śravaṇīyāni śṛṇomīha dhanaṃjaya |
na ca pāpāni gṛhṇāmi tato'haṃ vai śuciśravāḥ || 26 ||
[Analyze grammar]

ekaśṛṅgaḥ purā bhūtvā varāho divyadarśanaḥ |
imāmuddhṛtavānbhūmimekaśṛṅgastato hyaham || 27 ||
[Analyze grammar]

tathaivāsaṃ trikakudo vārāhaṃ rūpamāsthitaḥ |
trikakuttena vikhyātaḥ śarīrasya tu māpanāt || 28 ||
[Analyze grammar]

viriñca iti yaḥ proktaḥ kapilajñānacintakaiḥ |
sa prajāpatirevāhaṃ cetanātsarvalokakṛt || 29 ||
[Analyze grammar]

vidyāsahāyavantaṃ māmādityasthaṃ sanātanam |
kapilaṃ prāhurācāryāḥ sāṃkhyā niścitaniścayāḥ || 30 ||
[Analyze grammar]

hiraṇyagarbho dyutimāneṣa yaśchandasi stutaḥ |
yogaiḥ saṃpūjyate nityaṃ sa evāhaṃ vibhuḥ smṛtaḥ || 31 ||
[Analyze grammar]

ekaviṃśatiśākhaṃ ca ṛgvedaṃ māṃ pracakṣate |
sahasraśākhaṃ yatsāma ye vai vedavido janāḥ |
gāyantyāraṇyake viprā madbhaktāste'pi durlabhāḥ || 32 ||
[Analyze grammar]

ṣaṭpañcāśatamaṣṭau ca saptatriṃśatamityuta |
yasmiñśākhā yajurvede so'hamādhvaryave smṛtaḥ || 33 ||
[Analyze grammar]

pañcakalpamatharvāṇaṃ kṛtyābhiḥ paribṛṃhitam |
kalpayanti hi māṃ viprā atharvāṇavidastathā || 34 ||
[Analyze grammar]

śākhābhedāśca ye kecidyāśca śākhāsu gītayaḥ |
svaravarṇasamuccārāḥ sarvāṃstānviddhi matkṛtān || 35 ||
[Analyze grammar]

yattaddhayaśiraḥ pārtha samudeti varapradam |
so'hamevottare bhāge kramākṣaravibhāgavit || 36 ||
[Analyze grammar]

rāmādeśitamārgeṇa matprasādānmahātmanā |
pāñcālena kramaḥ prāptastasmādbhūtātsanātanāt |
bābhravyagotraḥ sa babhau prathamaḥ kramapāragaḥ || 37 ||
[Analyze grammar]

nārāyaṇādvaraṃ labdhvā prāpya yogamanuttamam |
kramaṃ praṇīya śikṣāṃ ca praṇayitvā sa gālavaḥ || 38 ||
[Analyze grammar]

kaṇḍarīko'tha rājā ca brahmadattaḥ pratāpavān |
jātīmaraṇajaṃ duḥkhaṃ smṛtvā smṛtvā punaḥ punaḥ |
saptajātiṣu mukhyatvādyogānāṃ saṃpadaṃ gataḥ || 39 ||
[Analyze grammar]

purāhamātmajaḥ pārtha prathitaḥ kāraṇāntare |
dharmasya kuruśārdūla tato'haṃ dharmajaḥ smṛtaḥ || 40 ||
[Analyze grammar]

naranārāyaṇau pūrvaṃ tapastepaturavyayam |
dharmayānaṃ samārūḍhau parvate gandhamādane || 41 ||
[Analyze grammar]

tatkālasamayaṃ caiva dakṣayajño babhūva ha |
na caivākalpayadbhāgaṃ dakṣo rudrasya bhārata || 42 ||
[Analyze grammar]

tato dadhīcivacanāddakṣayajñamapāharat |
sasarja śūlaṃ krodhena prajvalantaṃ muhurmuhuḥ || 43 ||
[Analyze grammar]

tacchūlaṃ bhasmasātkṛtvā dakṣayajñaṃ savistaram |
āvayoḥ sahasāgacchadbadaryāśramamantikāt |
vegena mahatā pārtha patannārāyaṇorasi || 44 ||
[Analyze grammar]

tataḥ svatejasāviṣṭāḥ keśā nārāyaṇasya ha |
babhūvurmuñjavarṇāstu tato'haṃ muñjakeśavān || 45 ||
[Analyze grammar]

tacca śūlaṃ vinirdhūtaṃ huṃkāreṇa mahātmanā |
jagāma śaṃkarakaraṃ nārāyaṇasamāhatam || 46 ||
[Analyze grammar]

atha rudra upādhāvattāvṛṣī tapasānvitau |
tata enaṃ samuddhūtaṃ kaṇṭhe jagrāha pāṇinā |
nārāyaṇaḥ sa viśvātmā tenāsya śitikaṇṭhatā || 47 ||
[Analyze grammar]

atha rudravighātārthamiṣīkāṃ jagṛhe naraḥ |
mantraiśca saṃyuyojāśu so'bhavatparaśurmahān || 48 ||
[Analyze grammar]

kṣiptaśca sahasā rudre khaṇḍanaṃ prāptavāṃstadā |
tato'haṃ khaṇḍaparaśuḥ smṛtaḥ paraśukhaṇḍanāt || 49 ||
[Analyze grammar]

arjuna uvāca |
asminyuddhe tu vārṣṇeya trailokyamathane tadā |
jayaṃ kaḥ prāptavāṃstatra śaṃsaitanme janārdana || 50 ||
[Analyze grammar]

śrībhagavānuvāca |
tayoḥ saṃlagnayoryuddhe rudranārāyaṇātmanoḥ |
udvignāḥ sahasā kṛtsnā lokāḥ sarve'bhavaṃstadā || 51 ||
[Analyze grammar]

nāgṛhṇātpāvakaḥ śubhraṃ makheṣu suhutaṃ haviḥ |
vedā na pratibhānti sma ṛṣīṇāṃ bhāvitātmanām || 52 ||
[Analyze grammar]

devānrajastamaścaiva samāviviśatustadā |
vasudhā saṃcakampe'tha nabhaśca vipaphāla ha || 53 ||
[Analyze grammar]

niṣprabhāṇi ca tejāṃsi brahmā caivāsanāccyutaḥ |
agācchoṣaṃ samudraśca himavāṃśca vyaśīryata || 54 ||
[Analyze grammar]

tasminnevaṃ samutpanne nimitte pāṇḍunandana |
brahmā vṛto devagaṇairṛṣibhiśca mahātmabhiḥ |
ājagāmāśu taṃ deśaṃ yatra yuddhamavartata || 55 ||
[Analyze grammar]

sāñjalipragraho bhūtvā caturvaktro niruktagaḥ |
uvāca vacanaṃ rudraṃ lokānāmastu vai śivam |
nyasyāyudhāni viśveśa jagato hitakāmyayā || 56 ||
[Analyze grammar]

yadakṣaramathāvyaktamīśaṃ lokasya bhāvanam |
kūṭasthaṃ kartṛnirdvaṃdvamakarteti ca yaṃ viduḥ || 57 ||
[Analyze grammar]

vyaktibhāvagatasyāsya ekā mūrtiriyaṃ śivā |
naro nārāyaṇaścaiva jātau dharmakulodvahau || 58 ||
[Analyze grammar]

tapasā mahatā yuktau devaśreṣṭhau mahāvratau |
ahaṃ prasādajastasya kasmiṃścitkāraṇāntare |
tvaṃ caiva krodhajastāta pūrvasarge sanātanaḥ || 59 ||
[Analyze grammar]

mayā ca sārdhaṃ varadaṃ vibudhaiśca maharṣibhiḥ |
prasādayāśu lokānāṃ śāntirbhavatu māciram || 60 ||
[Analyze grammar]

brahmaṇā tvevamuktastu rudraḥ krodhāgnimutsṛjan |
prasādayāmāsa tato devaṃ nārāyaṇaṃ prabhum |
śaraṇaṃ ca jagāmādyaṃ vareṇyaṃ varadaṃ harim || 61 ||
[Analyze grammar]

tato'tha varado devo jitakrodho jitendriyaḥ |
prītimānabhavattatra rudreṇa saha saṃgataḥ || 62 ||
[Analyze grammar]

ṛṣibhirbrahmaṇā caiva vibudhaiśca supūjitaḥ |
uvāca devamīśānamīśaḥ sa jagato hariḥ || 63 ||
[Analyze grammar]

yastvāṃ vetti sa māṃ vetti yastvāmanu sa māmanu |
nāvayorantaraṃ kiṃcinmā te bhūdbuddhiranyathā || 64 ||
[Analyze grammar]

adya prabhṛti śrīvatsaḥ śūlāṅko'yaṃ bhavatvayam |
mama pāṇyaṅkitaścāpi śrīkaṇṭhastvaṃ bhaviṣyasi || 65 ||
[Analyze grammar]

evaṃ lakṣaṇamutpādya parasparakṛtaṃ tadā |
sakhyaṃ caivātulaṃ kṛtvā rudreṇa sahitāvṛṣī |
tapastepaturavyagrau visṛjya tridivaukasaḥ || 66 ||
[Analyze grammar]

eṣa te kathitaḥ pārtha nārāyaṇajayo mṛdhe |
nāmāni caiva guhyāni niruktāni ca bhārata |
ṛṣibhiḥ kathitānīha yāni saṃkīrtitāni te || 67 ||
[Analyze grammar]

evaṃ bahuvidhai rūpaiścarāmīha vasuṃdharām |
brahmalokaṃ ca kaunteya golokaṃ ca sanātanam |
mayā tvaṃ rakṣito yuddhe mahāntaṃ prāptavāñjayam || 68 ||
[Analyze grammar]

yastu te so'grato yāti yuddhe saṃpratyupasthite |
taṃ viddhi rudraṃ kaunteya devadevaṃ kapardinam || 69 ||
[Analyze grammar]

kālaḥ sa eva kathitaḥ krodhajeti mayā tava |
nihatāṃstena vai pūrvaṃ hatavānasi vai ripūn || 70 ||
[Analyze grammar]

aprameyaprabhāvaṃ taṃ devadevamumāpatim |
namasva devaṃ prayato viśveśaṃ haramavyayam || 71 ||
[Analyze grammar]