Chapter 1 - Kauśīdyavīryotsāhana-avadāna

oṃ namaḥ śrīsarvabuddhabodhisatvebhyaḥ |
yaḥ śrīmāñchrīghano loke saddharmaṃ samupādiśat |
śāsanāni trilokeṣu jayantu tasya sarvadā || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
tad yathā guruṇādiṣṭaṃ tathā deṣṭuṃ ca me 'rhati || 3 || {3}
[Analyze grammar]

iti saṃprārthitaṃ rājñā śrutvā so 'rhanyatiḥ sudhīḥ |
upagupto narendraṃ taṃ samālokyaivamādiśat || 4 || {3A}
[Analyze grammar]

sādhu śṛṇu mahārāja yathā me guruṇoditaṃ |
tathāhaṃ te pravakṣyāmi śrutvā cāpyanumodaya || 5 || {4}
[Analyze grammar]

purāsau bhagavānbuddhaḥ śākyasiṃho dayānidhiḥ |
dharmarājo jagacchāstā sarvajñaḥ sugato jinaḥ || 6 || {5}
[Analyze grammar]

sarvavidyākalābhijñaḥ ṣaḍabhijño munīśvaraḥ |
mārajil lokavinnātho vināyakastathāgataḥ || 7 || {6}
[Analyze grammar]

śravastyāṃ jetakāraṇye mahodyāne manorame |
anāthapiṇḍadākhyasya gṛhasthasya mahātmanaḥ || 8 || {7}
[Analyze grammar]

nānāvṛkṣaiḥ samāpanne nānāpuṣpapraśobhitaiḥ |
nānāphalabharānamraiḥ kalpapādapasannibhaiḥ || 9 || {8}
[Analyze grammar]

aṣṭāṅgaguṇasaṃpannajalaiḥ padmotpalādibhiḥ |
puṣpaiśca paripūrṇābhiḥ puṣkariṇībhirāśrite || 10 || {9}
[Analyze grammar]

nānājantugaṇaiścāpi mithasnehanivandhitaiḥ |
nānāpakṣigaṇaiścāpi saṃrāvairupasevite || 11 || {10}
[Analyze grammar]

tasmindivyamanoramya ārāme pariśobhite |
puṇyakṣetre jināvāse vihāre maṇimaṇḍite || 12 || {11}
[Analyze grammar]

śrāvakairbhikṣubhiḥ sārddhaṃ bodhisatvagaṇairapi |
sarvasatvahitārthena tasthau dharmaṃ prakāśituṃ || 13 || {12}
[Analyze grammar]

evaṃ tatra samāsīnaṃ saṃbuddhaṃ dharmadeśinaṃ |
dṛṣṭvā dharmottamaṃ śrotuṃ sarve lokāḥ samāyayuḥ || 14 || {13}
[Analyze grammar]

devā daityāśca siddhāśca yakṣagaṃdharvakinnarāḥ |
grahā vidyādharāścāpi nāgāśca garuḍā api || 15 || {14}
[Analyze grammar]

sarve 'pi lokapālāśca munayaśca maharṣayaḥ |
brāhmaṇāḥ kṣatriyāścāpi vaiśyāśca maṃtriṇo janāḥ || 16 || {15}
[Analyze grammar]

amātyāḥ sādhavaḥ śūdrāḥ sārthavāhā mahājanāḥ |
dhanino vaṇijaścāpi gṛhasthāḥ paurikā api || 17 || {16}
[Analyze grammar]

tathā jānapadāścāpi grāmyāḥ kārpaṭikā api |
evamanye 'pi satvāśca saddharmaśravaṇārthinaḥ || 18 || {17}
[Analyze grammar]

pūjāpaṃcopahārāṇi gṛhītvā bhaktisaṃyutāḥ |
saddharmaṃ saugataṃ śrotumanumodya samāyayuḥ || 19 || {18}
[Analyze grammar]

sarve tatra praviṣṭāste dṛṣṭvā taṃ sugataṃ jinaṃ |
vismitānaṃditāḥ pūjāṃ kṛtvā natvā yathākramaṃ || 20 || {19}
[Analyze grammar]

sarve tatra samāsīnāḥ parivṛtāḥ puraskṛtāḥ |
taṃ dṛṣṭvā sadguruṃ dharmaṃ śrotuṃ tasthuḥ samāhitāḥ || 21 || {20}
[Analyze grammar]

athāsau bhagavāndṛṣṭvā lokān sarvān samāhitān |
ādimadhyāntakalyāṇaṃ dideśa dharmamuttamaṃ || 22 || {21}
[Analyze grammar]

evaṃ nityamasau nāthaḥ sarvasatvahitārthikaḥ |
dharmaṃ prakāśayan loke tasthau bhānurivoditaḥ || 23 || {22}
[Analyze grammar]

tasmiṃśca samaye tatra śrāvastyāṃ sanmahājanaḥ |
āḍhyaḥ śreṣṭhī mahābhogo vistīrṇasuparigrahaḥ || 24 || {23}
[Analyze grammar]

śrāddho bhadrāśayo dhīmān sarvabandhusuhṛtpriyaḥ |
tīrthikaśrāvako mānī babhūva dhanagarvitaḥ || 25 || {24}
[Analyze grammar]

tadāsau sundarīṃ bhāryāṃ kuladharmasamānikāṃ |
nītvā kāmaguṇāsakto reme nityaṃ tayā saha || 26 || {25}
[Analyze grammar]

tasyaivaṃ ramatastasyāṃ bhāryāyāṃ sucirādapi |
putro na duhitā vāpi nodbabhūva kathaṃ cana || 27 || {26}
[Analyze grammar]

tadaputro gṛhastho 'sau putrābhidarśanotsukaḥ |
kapolaṃ svakare dhṛtvā vyacintayad raho gataḥ || 28 || {27}
[Analyze grammar]

aho daivānna me putraḥ putrī vādyāpi nāsti yat |
tanme syuḥ saṃpado vyarthāyāsāṃ bhoktā na vidyate || 29 || {29!}
[Analyze grammar]

kiṃ mamaitairdhanai ratnaiḥ kevalaṃ duhkhasādhanaiḥ |
yeṣāṃ bhoktā na vidyeta vyarthaṃ mayā hyupārjitaṃ || 30 || {30}
[Analyze grammar]

hyaputrasya jagacchūnyaṃ saṃsāre niḥsukhaṃ mama |
yato na varddhate dharmastajjanmāpi ca nisphalaṃ || 31 || {31}
[Analyze grammar]

kimupāyaṃ kariṣyāmi yato bhāgyaṃ na vidyate |
daivo hi valavāṃl loke kimupāyairguṇairvalaiḥ || 32 || {32}
[Analyze grammar]

kutrātra śaraṇaṃ yāsye hyaputro 'haṃ kulāntakaḥ |
tanme syātko 'tra sanmitraṃ saṃkaṭe yaḥ samuddharet || 33 || {33}
[Analyze grammar]

nūnaṃ me pitaraḥ sarve piṇḍavichedadarśinaḥ |
matparaṃ durlabhaṃ matvā bhaviṣyanti nirāśitāḥ || 34 || {34}
[Analyze grammar]

sarvathāhaṃ vinaṣṭo 'smi kuladharmavināśakaḥ |
kiṃ paratra prabhokṣyāmi ko me piṇḍaṃ pradāsyati || 35 || {35}
[Analyze grammar]

iti cintāviṣaṇṇaṃ taṃ dṛṣṭvā sarve ca bāndhavāḥ |
samupetya samāmaṃtrya duhkhahetumapṛchan || 36 || {36}
[Analyze grammar]

kiṃ duḥsthito 'si sādho 'tra kiṃ cāpi duḥkhacintayā |
vaktavyaṃ cettadasmākaṃ sarvathā vaktumarhasi || 37 || {37}
[Analyze grammar]

iti pṛṣṭe gṛhastho 'sau dīrghaniśvāsamutsṛjan |
sarvāṃstānbāndhavāndṛṣṭvā duḥkhahetumudaharat || 38 || {38}
[Analyze grammar]

bhavantaḥ śrūyatāṃ sarvairmama duḥkhasya kāraṇaṃ |
yadadyāpi na me putraḥ putrī vāpi na vidyate || 39 || {39}
[Analyze grammar]

saṃpado me gṛhe santi sarvaratnasamanvitāḥ |
sarvadravyasamṛddhāśca tāsāṃ bhoktā na vidyate || 40 || {40}
[Analyze grammar]

tatsarvaṃ nakṣyate vyarthaṃ mayā yātnairupārjitaṃ |
aputrasya hi sarvasvaṃ nūnaṃ rājā grahīṣyti || 41 || {[41]}
[Analyze grammar]

aputro 'haṃ hyapuṇyātmā gantavyaṃ maraṇaṃ dhruvaṃ |
pretībhūtasya me ko 'nyaḥ piṇḍadānaṃ pradāsyati || 42 || {[42]}
[Analyze grammar]

mayā na prakṛtaṃ puṇyaṃ saṃpadarthaprasaṃginā |
tanme sarvaṃ nirarthaṃ syātko māṃ pāpātsamuddharet || 43 || {43}
[Analyze grammar]

iha bhogyaṃ prabhuktvāpi kiṃ me sāramavasthitaṃ |
kevalaṃ dhanasaktasya paratra sadgatiḥ kathaṃ || 44 || {44}
[Analyze grammar]

iti cintā hṛdi sthitvā cittaṃ me tudate 'niśaṃ |
evaṃ cittavyathākrāntaḥ śalyaviddha ivāsmyahaṃ || 45 || {45}
[Analyze grammar]

tadvyathāharaṇopāyaṃ dātavyaṃ mama taddhitaṃ |
anyathā cedihāmutra vinaṣṭaḥ syāṃ nirāśitaḥ || 46 || {46}
[Analyze grammar]

iti tenoditaṃ śrutvā sarve te bāndhavā janāḥ |
karuṇāviṣṭacittāstaṃ bodhayantaḥ samabruvan || 47 || {47}
[Analyze grammar]

mā mā bhaiṣṭhā mahābhāga tyaja cintāṃ vacaḥ śṛṇu |
tadupāyaṃ vayaṃ brūmastatkuruṣva samāhitaḥ || 48 || {48}
[Analyze grammar]

devatārādhanāṃ kṛtvā kuruṣva vaṃśayācanāṃ |
nūnaṃ vaṃśaṃ pradāsyanti devatāste prasāditāḥ || 49 || {49}
[Analyze grammar]

eṣa loke pravādo 'sti yadāyācanahetutaḥ |
putrā duhitaro vāpi jātā devaprasādataḥ || 50 || {50}
[Analyze grammar]

tathā naiva pramāṇaṃ syācchāstre karmapramāṇataḥ |
tattu devaprasādena karmaśśīghraṃ prasiddhyate || 51 || {51}
[Analyze grammar]

tadeva devavairuddhe karma vighnairnihanyate |
tasmāddaivaprasiddhyarthaṃ śraddhābhaktisamāhitaḥ || 52 || {52}
[Analyze grammar]

devatārādhanāṃ kṛtvā sarvakāryaṃ prasādhayet |
iti matvā bhavāṃścāpi satputrapratipattaye || 53 || {53}
[Analyze grammar]

bhāryayā saha bhaktyā ca devatāyācanāṃ kuru |
tato raktaiḥ priyāṃ bhāryāmṛtusnātāṃ prakāmataḥ || 54 || {54}
[Analyze grammar]

gāḍhamāliṃgya saṃrakto dharmavījaṃ praropaya |
tato devaprabhāvena suniṣpannaḥ prasiddhitaḥ || 55 || {55}
[Analyze grammar]

tvatputraḥ saṃprajāyeta satyamevaṃ pramāṇaya |
iti teṣāṃ vacaḥ śrutvā gṛhastho 'sau vinoditaḥ || 56 || {56}
[Analyze grammar]

tatheti ca pratiśrutya bhāryayā saha moditaḥ |
śivabrahmādideveśāniṃdrādidigadhīśvarān || 57 || {57}
[Analyze grammar]

jalāśrayavanārāmacatvaramaṇḍapālayān |
sūryādīṃśca grahān sarvā bhairavādyāśca mātṛkāḥ || 58 || {58}
[Analyze grammar]

svakulādhipatīṃ devānanyāṃśca tribhavasthitān |
sarvānevaṃ samārādhya pūjayitvā vidhānataḥ || 59 || {59}
[Analyze grammar]

saṃtānaṃ prārthayitvāsau patnyā saha tathāramat |
tadā kaścinmahāsatvaḥ svargāccyutvā bhuvaṃ gataḥ || 60 || {60}
[Analyze grammar]

tasya gṛhapateḥ patnyā garbhe sa samupāviśat |
tataḥ sā śreṣṭhino bhāryāpannasatvāśu gurviṇī || 61 || {61}
[Analyze grammar]

garbhe satvaṃ samutpannaṃ matvā bharttāramabravīt |
svāminprasīda mā bhūstvaṃ viṣaṇno 'tra sukhī bhava || 62 || {62}
[Analyze grammar]

tava bhāgyāddhi me garbhe nūnaṃ satvaḥ pravarttate |
yadgarbhe dakṣiṇe bhāge sthitaḥ saṃparivarttate || 63 || {63}
[Analyze grammar]

tannūnaṃ dārako 'yaṃ syātsatyameva na saṃśayaḥ |
iti bhāryāvacaḥ śrutvā gṛhastho 'sau pramoditaḥ || 64 || {64}
[Analyze grammar]

bhāryāyā garbhamālokya satyamityanvamanyata || 65 || {56!}
[Analyze grammar]

tato 'sau sahasā vandhusuhṛnmitrasahāyakān |
prāhūya puratasteṣāṃ mudaivaṃ samudānayat || 66 || {66}
[Analyze grammar]

aho bhāgyānmamotpannaṃ yadabhivāṃchitaṃ mayā |
dhanyo 'smi nāvagītaḥ syāddevatānuprasādataḥ || 67 || {67}
[Analyze grammar]

cirābhilaṣitaṃ putramukhaṃ paśyeya sāṃprataṃ |
kṛtyā me pratikurvīta bhṛtaśca prativibhṛyāt || 68 || {68}
[Analyze grammar]

dāyādyaṃ pratipadyeta vaṃśo me sthitiko bhavet |
suhṛdo me prasannāḥ syurdviṣantaśca viṣāditāḥ || 69 || {69}
[Analyze grammar]

mayā yāvanti dānāni puṇyāni prakṛtāni ca |
etatpuṇyaphalairnityaṃ maṃgalaṃ bhavatu dvayoḥ || 70 || {70}
[Analyze grammar]

etatpuṇyānubhāvena bhūyānmātā nirāturā |
sukhaṃ sunotu satputraṃ mā pāpaṃ samudāgamat || 71 || {71}
[Analyze grammar]

iti tenoditaṃ śrutvā sarve bandhusuhṛtsakhāḥ |
tathāstvityanumodantaḥ svasvālayaṃ samāyayuḥ || 72 || {72}
[Analyze grammar]

tato 'sau garbhiṇī kāntā kramādgarbhapravarddhitā |
vaidyopadiṣṭamāhāraṃ bhuktvācarad yathā sukhaṃ || 73 || {73}
[Analyze grammar]

tataśca samaye 'sūta putraṃ kāntaṃ manoharaṃ |
sarvalakṣaṇasaṃpannaṃ bhadrāṃśaṃ maṃgalānvitaṃ || 74 || {74}
[Analyze grammar]

tacchrutvaiva gṛhastho 'sau suprasannaḥ pramoditaḥ |
dṛṣṭvā taṃ dārakaṃ saumyaṃ naiva tṛptiṃ samāyayau || 75 || {75}
[Analyze grammar]

tato jñātīn samāhūya kṛtvā jātimahaṃ mudā |
putranāmābhisaṃskartuṃ bhūya etān samabravīt || 76 || {76}
[Analyze grammar]

bhavanto dṛśyatāṃ siddhaṃ mamabhilaṣitaṃ cirāt |
tannāmāsya yathāyogyaṃ prasiddhaṃ kriyatāṃ śubhaṃ || 77 || {76!}
[Analyze grammar]

iti tasya vacaḥ śrutvā sarve te jñātayo mudā |
dārakaṃ taṃ samālokya naṃditāḥ samabhāṣata || 78 || {78}
[Analyze grammar]

yasmindine hyayaṃ jātastadā sarve 'pi paurikāḥ |
nanditāstadbhavatvayaṃ nāmnā nanda iti śrutaḥ || 79 || {79}
[Analyze grammar]

athāsau dārako nandaḥ samyagdehopacāraṇe |
pitrāṣṭāsu ca dhātrīṣu paritoṣya samarpitaḥ || 80 || {80}
[Analyze grammar]

tato 'sau kramaśastāsāṃ dhātriṇāmupacārataḥ |
dine dine pravṛddho 'bhūddhradasthaṃ paṃkajaṃ yathā || 81 || {81}
[Analyze grammar]

evaṃ pravarddhamāno 'sau ṣaḍvarṣiko yadābhavat |
tadā kuśīdasaṃvṛtto babhūva viratotsavaḥ || 82 || {82}
[Analyze grammar]

sadā śayāsanasthastatsamutthātuṃ na caichata |
śayāsanasthitaścaiva bhuktvā naivācaratkvacit || 83 || {83}
[Analyze grammar]

sadā svāntargṛhastho 'pi sutīkṣṇabuddhimān sudhīḥ |
adhītya sarvaśāstrāṇi satyadharmarato 'bhavat || 84 || {84}
[Analyze grammar]

atha śreṣṭhī pitā dṛṣṭvā putramevaṃ kuśīditaṃ |
sarvavidyāguṇādhāraṃ dṛṣṭvā caivaṃ vyacintayat || 85 || {85}
[Analyze grammar]

kathaṃ cid yo mayā prāpto devatāsaṃprasādataḥ |
so 'pi putro mamābhāgyādbhavatyevaṃ kuśīditaḥ || 86 || {86}
[Analyze grammar]

sarvavidyāguṇādhāraṃ sarvaśāstravicakṣaṇaḥ |
kiṃ mamānena putreṇa dusthiteneva roginā |
yataḥ svasthaśarīro 'pi bhuktvaivaṃ paśuvatsthitaḥ || 87 || {87}
[Analyze grammar]

kimatrāhaṃ kariṣyāmi yatputro 'yaṃ ni rudyamaḥ |
kimīdrigjantunā kāryaṃ kuladharmopahāriṇā || 88 || {68!}
[Analyze grammar]

dhigme daivaṃ prayatnaṃ ca sarvaṃ tatsyānnirarthakaṃ |
kimupāyaṃ kariṣyāmi sarvathāhaṃ vibhagnitaḥ || 89 || {78}
[Analyze grammar]

evaṃ cintāparīto 'sau gṛhasthaśca vyacintayat |
pūraṇo me 'sti śāstā yaḥ pṛcheyaṃ tadupāyakaṃ || 90 || {79}
[Analyze grammar]

iti matvā gṛhastho 'sau tadāśramaṃ samāgataḥ |
pūraṇaṃ taṃ guruṃ natvā papraccha tadupāyatāṃ || 91 || {80}
[Analyze grammar]

bhagavanbho mahābhijña śāstāsi me prasīda tat |
yanmayā pṛchyate kāryaṃ tatsamādeṣṭumarhasi || 92 || {81}
[Analyze grammar]

iti tenārthitaṃ śrutvā tīrthiko mānagarvitaḥ |
āśu siddhaṃ kariṣyāmo yatkāryaṃ te 'tra tadvada || 93 || {82}
[Analyze grammar]

iti proktvaivamāśvāsya pūraṇo 'tyabhimānikaḥ |
pravadaṃstaṃ gṛhasthaṃ vai sarvathaivamabodhayat || 94 || {83}
[Analyze grammar]

iti tena samādiṣṭaṃ śrutvā gṛhapatirmudā |
kṛtāñjalipuṭo natvā taṃ guruṃ samabhāṣata || 95 || {84}
[Analyze grammar]

bhagavanbho vijānīyā yo me putraḥ prajāyate |
sa pravṛddho nirutsāhī kuśīdo varttate 'dhunā || 96 || {85}
[Analyze grammar]

sadā śayāsthito bhuṅkte bhuktvā śete nirudyamaḥ |
notsahati kvacidgaṃtuṃ paśuvattiṣṭhate gṛhe || 97 || {86}
[Analyze grammar]

na śayanātsamutthāya śrotuṃ draṣṭuṃ samicchati |
gṛhe śayāsanārūḍho rogīva vasate sadā || 98 || {87}
[Analyze grammar]

tadupāyaṃ kathaṃ kuryāṃ yenāyaṃ śayanotthitaḥ |
śrotuṃ draṣṭuṃ ca gaṃtuṃ ca karttuṃ kāryaṃ yathotsahet || 99 || {88}
[Analyze grammar]

tathā me bhagavanputraṃ kuladharme niyojaya |
bhavāneva hi me śāstā taddhitaṃ kartumarhasi || 100 || {89}
[Analyze grammar]

ityevaṃ prārthitaṃ tena śrutvāsau pūraṇo yatiḥ |
tasya gṛhapateścittaṃ praharṣayan samabravīt || 101 || {90}
[Analyze grammar]

are mā gā viṣādaṃ tvaṃ cintayā kiṃ pratapyase |
asmāsu vidyamāneṣu ṣaṭsu vijñeṣu śāstṛṣu || 102 || {91}
[Analyze grammar]

tadahaṃ te mahābhāga sārddhaṃ sarvaiśca tīrthikaiḥ |
ṛddhyā gatvā kariṣyāmi dārakaṃ vistayotthitaṃ || 103 || {92}
[Analyze grammar]

yadāsau dārako hyasmān sarvāndṛṣṭvā samutthitaḥ |
kṛtvā praṇāmamasmākaṃ dharmmaṃ śrotuṃ samutsahet || 104 || {93}
[Analyze grammar]

śrutvā dharmasamutsāhātkuśalāni samācaret |
tatkuśalaiḥ samāpanno vīryavān sa bhavetsudhīḥ || 105 || {94}
[Analyze grammar]

tataste sarvakāryāṇi sādhayetsa samudyataḥ |
svakuladharmakarmāṇi kuśalī saṃcariṣyate || 106 || {95}
[Analyze grammar]

evaṃ me vacanaṃ satyaṃ dṛṣṭvā samyakpramāṇaya |
tadviṣādaṃ parityajya karttavyaṃ hi tathā kuru || 107 || {96}
[Analyze grammar]

iti tena samādiṣṭaṃ śrutvā sa gṛhabhṛnmudā |
sahasā svagṛhaṃ gatvā tadbhojyaṃ samasādhayat || 108 || {97}
[Analyze grammar]

athāsau pūraṇo 'nyaiśca tīrthikaiḥ sārddhamāgataḥ |
gṛhe gatvā purastasya paryaṅke samupāśrayat || 109 || {98}
[Analyze grammar]

tathāsau tān samāgatvā kramaśa āsane sthitān |
dṛṣṭvā saṃharṣitaḥ śreṣṭhī sahasā putramabravīt || 110 || {99}
[Analyze grammar]

putra paśya gṛhe 'smākaṃ śāstāraḥ samupasthitāḥ |
tatsamutthāya natvaitāñchāstṝnbhojyaiḥ pravāraya || 111 || {100}
[Analyze grammar]

ityuktvā janakenāsau dārako na samutthitaḥ |
draṣṭumapi na cotsehe kiṃ namecca pravārayet || 112 || {1}
[Analyze grammar]

bahuśaḥ preryamāṇo 'pi pitrā sa bandhubhiḥ saha |
dārakastān samāsīnāndraṣṭumapi na caichata || 113 || {2}
[Analyze grammar]

kiṃ punarutthito natvā bhojaṇaiḥ saṃpravārayet |
tathā śayāsanārūḍha evaṃ tasthau nirutsavaḥ || 114 || {3}
[Analyze grammar]

tataste tīrthikāḥ sarve dṛṣṭvaivaṃ nirutsavaṃ |
nānāvidhiprayatnaistamutthāpayitumārabhan || 115 || {4}
[Analyze grammar]

tathāpi naiva śayāyā udatiṣṭhatsa dārakaḥ |
svadharmadeśakāṃścāpi tāndraṣṭumapi naihata || 116 || {5}
[Analyze grammar]

evaṃ cānutthitaṃ dṛṣṭvā taṃ te sarve ca tīrthikāḥ |
haṭhāccainaṃ samutthāpya vaśīkarttuṃ parākraman || 117 || {6}
[Analyze grammar]

tathaitāṃstīrthikān sarvāneva garvābhivāditān |
dṛṣṭvābhisaṃmukhāyātānbhīto 'rautsītsa dārakaḥ || 118 || {7}
[Analyze grammar]

tathā taṃ ruditaṃ dṛṣṭvā sarve te lajjayā bhiyā |
pratijagmurvibhinnāsyāḥ svasvālayāni bheditāḥ || 119 || {8}
[Analyze grammar]

tathā gṛhapatirdṛṣṭvā sarvānetānparāyitān |
pratibhinnaviṣaṇnātmā tasthau cintāvimohitaḥ || 120 || {9}
[Analyze grammar]

atha śrībhagavānbuddhaḥ sarvadarśī vināyakaḥ |
paśyan satvān samuddhartuṃ dadarśa taṃ kuśīditaṃ || 121 || {10}
[Analyze grammar]

dṛṣṭvā tasya kuśīdasya karmavṛttiparaṃparāṃ |
tatkuśīdaṃ samuddhartumaryānaṃdaṃ samabravīt || 122 || {11}
[Analyze grammar]

paśyānaṃda gṛhasthasya śrāvastīpuravāsinaḥ |
putro naṃda iti khyātaḥ sāmprataṃ saṃkuśīdikaḥ || 123 || {12}
[Analyze grammar]

asau me darśanādeva nūnaṃ vīryaṃ samārabhan |
sahasotthāya sa natvā dharmaṃ praśṛṇuyānmudā || 124 || {13}
[Analyze grammar]

tato me śāsane dharmaṃ pracaretsa sudhīḥ sadā |
kramādbodhicarīṃ pūrya saṃbodhiṃ cāpi lapsyati || 125 || {14}
[Analyze grammar]

tasmāttasya gṛhe gatvā tīrthikadarppachittaye |
saddharme saṃpratiṣṭhāpya sarvānbodhau niyojaye || 126 || {15}
[Analyze grammar]

ityādiṣṭaṃ munīndreṇa śrutvānandaḥ sa harṣitaḥ |
karttavyaṃ bhagavannevamityanumodito 'bhavat || 127 || {16}
[Analyze grammar]

tato bhagavatā tena suvarṇābhā marīcayaḥ |
utsṛṣṭāstaiśca tadgehamavabhāsya vyaśodhayat || 128 || {17}
[Analyze grammar]

yadā tairdārakaḥ spṛṣṭo buddhamaitrīmarīcibhiḥ |
tadā prahlāditaścāsāvityevaṃ samacintayat || 129 || {18}
[Analyze grammar]

aho kasya prabhāvo 'yaṃ yenaivamavabhāsitaṃ |
prahlāditaśca me kāyastanna jāne kutaḥ kathaṃ || 130 || {19}
[Analyze grammar]

iti cintāṃ samālambya kautukākrāntamānasaḥ |
samantato nirīkṣyaivaṃ tasthau gehe suvismitaḥ || 131 || {20}
[Analyze grammar]

tathā taṃ vismitaṃ dṛṣṭvā bhagavānbhikṣubhiḥ saha |
sahasā tadgṛhaṃ gatvā prādurāsītprabhāsayan || 132 || {21}
[Analyze grammar]

tatra sa dārako 'paśyadbhagavantaṃ tamāsthitaṃ |
kāntaṃ divyātiriktābhaṃ samantabhadrarūpiṇaṃ || 133 || {22}
[Analyze grammar]

dṛṣṭvaiva sahasotthāya natvā pādau pramoditaḥ |
svayamevāsanaṃ tasmai prajñapyaivamabhāṣata || 134 || {23}
[Analyze grammar]

svāgataṃ bhagavannātha vijayasva munīśvara |
prasīdānugrahārthena niṣīdātra śubhāsane || 135 || {24}
[Analyze grammar]

iti tenodite tatra bhagavānbhikṣubhiḥ saha |
tatprajñaptāsane sthitvā dharmaṃ deṣṭuṃ samārabhat || 136 || {25}
[Analyze grammar]

taddṛṣṭvā dārakasyaivaṃ dharmotsāhaṃ samutthitaṃ |
pitarau jñātivargāśca sarve 'pyāsan suvismitāḥ || 137 || {26}
[Analyze grammar]

tatrāsau dārako harṣādutphullanayano mudā |
natvā pādau muneścāgre dharmaṃ śrotumupāśrayat || 138 || {27}
[Analyze grammar]

athāsau bhagavāṃstasya jñātvāśayaviśuddhatāṃ |
ādimadhyāntakalyāṇaṃ dharmaṃ deṣṭuṃ tamabravīt || 139 || {27}
[Analyze grammar]

śṛṇu vatsa mahābhāga pāpapuṇyārthasādhane |
hetuṃ vakṣye śubhārthe te tadatra tvaṃ samācara || 140 || {29}
[Analyze grammar]

mānuṣyaṃ durlabhaṃ prāpya vidyuttaraṃgacaṃcalaṃ |
pāpakṣaye matiḥ kāryā puṇyārthasādhaneṣu ca || 141 || {30}
[Analyze grammar]

pāpena durgatiṃ yāyātpuṇyena sadgatiṃ vrajet |
pāpamitrānurāgeṇa matiḥ pāpe pravarttate || 142 || {31}
[Analyze grammar]

tataḥ pāparataḥ kuryātpāpāni dāruṇānyapi |
tato duṣṭaḥ supāpiṣṭhaḥ saddharmāṇi vinindayet || 143 || {32}
[Analyze grammar]

tato dharmaviruddhatvātkuśaktiḥ kutsito bhavet |
tataḥ sa kutsitātmā hi sarvasatvairvinindyate || 144 || {33}
[Analyze grammar]

paribhūto viṣādena bhavetmūḍho nirutsahaḥ |
utsāhavarjite citte ālasyaṃ samupāśrayet || 145 || {34}
[Analyze grammar]

ālasvī sādhayennaiva kiṃciddharmaṃ guṇāni vā |
dharmakarmaviraktātmā nirguṇī kiṃ kariṣyati |
bhogya eva sadāsaktaḥ paśorapyadhamo naraḥ |
kiṃ tena puruṣeṇāpi nirguṇena sukhāśinā |
yasya puṇye guṇe vāpi kadāpi notsahenmanaḥ |
puṇyotsāhavipannātmā duṣṭakleśairvihanyate |
kleśito mārasaṃghaiśca vaśīkṛtya nivaddhyate || 146 || {36}
[Analyze grammar]

mārasya vaśagaḥ strīṇāṃ dāsatvaṃ samupāśrayet |
sa dāsanirato bhuktvā paśuvattiṣṭhate gṛhe || 147 || {36}
[Analyze grammar]

naiva dharmaṃ kvacicchrotuṃ draṣṭuṃ vāpi na cotsahet |
dharmaṃ vinā vrajennaiva sadgatiṃ hi kadā cana || 148 || {37}
[Analyze grammar]

tasmāddharme samācartuṃ puṇyotsāhaṃ pravarddhayan |
trimaṇḍalaviśuddhena dānaṃ dadyācchubhāptaye || 149 || {39}
[Analyze grammar]

dānena siddhyate dharmaṃ dharmāccittaṃ viśuddhyate |
śuddhacittaścarecchīle śīlavān hi bhavetsudhīḥ || 150 || {40}
[Analyze grammar]

sudhīro bhāvayetkṣāṃtiṃ kṣāntimānduṣṭajitkṛtī |
kuśalī prārabhedvīryaṃ vīryavānpuruṣottamaḥ || 151 || {41}
[Analyze grammar]

mahāsatvo labheddhyānaṃ dhyātā brahmavihārikaḥ |
saṃsmṛtaḥ sādhayetprajñāṃ prajñāvān hi guṇālayaḥ || 152 || {42}
[Analyze grammar]

guṇajñaḥ samupāyaiśca satvāndharme niyojayet |
etatpuṇyānubhāvena bodhau praṇidhimācaret || 153 || {43}
[Analyze grammar]

bodhipraṇidhicittena balāni sādhayeddaśa |
tadbalaiśca mahāghorāṃ mārasaṃghānparājayet || 154 || {44}
[Analyze grammar]

jitvā māragaṇān sarvān saṃbodhijñānamāpnuyāt |
tataḥ sarvatra lokeṣu dharmacakraṃ pravarttayet || 155 || {45}
[Analyze grammar]

evaṃ pravarttayandharmaṃ śāstā lokādhipo bhavet |
sarvalokahitaṃ kurvanmahatpuṇyaiḥ samṛddhitaḥ || 156 || {46}
[Analyze grammar]

sadaivaṃ sadgatau sthitvā saṃbuddhapadamāpnuyāt |
evaṃ matvā tvayā vatsa caritavyaṃ tathā śubhe || 157 || {47}
[Analyze grammar]

ityādiṣṭaṃ jinendreṇa śrutvā sa dārako mudā |
kṛtāṃjaliḥ punarnatvā bhagavantamabhāṣata || 158 || {48}
[Analyze grammar]

adyārabhya sadā śāstarbhavataḥ śaraṇaṃ vraje |
tadyathā bhavatājñaptaṃ tathā satyaṃ carāmyahaṃ || 159 || {49}
[Analyze grammar]

kṛpādṛṣṭimupasthāpya samanvāhara māṃ sadā |
bhavāneva hi sarvajñastraidhātukavināyakaḥ || 160 || {50}
[Analyze grammar]

yadaivaṃ te dayā nāsti mayudyamavivarjite |
ka evaṃ samupāgatya proddharenmāṃ kuśīdikaṃ || 161 || {51}
[Analyze grammar]

pavitrībhūtamātmānaṃ manye 'haṃ te prasādataḥ |
dhanyo 'smi tanmahābhadro yacchāstraivaṃ pradarśitaḥ || 162 || {52}
[Analyze grammar]

iti tenodite bhūyaḥ sarvajñaḥ sa munīśvaraḥ |
sucaṃdanamayīṃ yaṣṭiṃ datvainaṃ samabhāṣata || 163 || {53}
[Analyze grammar]

vatsemāṃ yaṣṭimādhāya prakoṭaya samāhitaḥ |
tatastvaṃ sarvadāvaśyaṃ labheḥ puṇyamahotsavaṃ || 164 || {54}
[Analyze grammar]

iti śāstrā pradattāṃ tāṃ natvāsau dārako 'grahīt |
yathādiṣṭaṃ munīndreṇa tathā kartumudācarat || 165 || {55}
[Analyze grammar]

ityevaṃ taṃ samādiśya sa saṃbuddhaḥ sasāṃghikaḥ |
svaṃ vihāramupāśritya dharmaṃ diśan samāvasat || 166 || {56}
[Analyze grammar]

athāsau dārako harṣāttāṃ yaṣṭiṃ svayamādadhat |
yathādiṣṭaṃ munīndreṇa prākoṭayatsamāhitaḥ || 167 || {57}
[Analyze grammar]

tasyāmākoṭyamānāyāṃ puṇyaśabda udācarat |
gṛhe ratnanidhānāni prādurāsanbahūni ca || 168 || {57}
[Analyze grammar]

tacchabdaśravaṇaṃ kṛtvā dārako 'sau pramoditaḥ |
gṛhe ratnanidhānāni dṛṣṭvāścaryaṃ samāyayau || 169 || {59}
[Analyze grammar]

tataśca vismito harṣātpunarevaṃ vyacintayat |
batedaṃ sumahāśauryaṃ vīryaṃ prārambhaye tataḥ || 170 || {60}
[Analyze grammar]

tathā ratnākaraṃ gatvā ratnāni samupārjayan |
sasaṃghaṃ sugataṃ nityaṃ upatiṣṭheya saṃbhajan || 171 || {61}
[Analyze grammar]

iti dhyātvā samutsāhaṃ saṃnibadhya sa dārakaḥ |
ratnākaraṃ samāgantuṃ prārebhe saha vāṇijaiḥ || 172 || {62}
[Analyze grammar]

tato 'sau dārako vīrastasyāṃ pūryāṃ samantataḥ |
sārthavāhaṃ svamātmānaṃ kṛtvā ghoṣamakārayat || 173 || {63}
[Analyze grammar]

tathā tadghoṣaṇāṃ śrutvā ye vīrāste vaṇigjanāḥ |
tena sārddhaṃ mahotsāhairmahābdhiṃ gantumaichan || 174 || {64}
[Analyze grammar]

tato 'sau puruṣo vīraḥ sarvaistaiśca vaṇigjanaiḥ |
saha ratnākaraṃ gatvā bahuratnānyasādhayat || 175 || {65}
[Analyze grammar]

tataḥ sārthapatiḥ sarvaiḥ sārthaiḥ sārddhaṃ mahodadheḥ |
kṣemena sahasottīrya svadeśaṃ samupāyayau || 176 || {66}
[Analyze grammar]

atha sārthapatistatra yātrāsiddhipramoditaḥ |
sarvān sārthān samāmaṃtrya dṛṣṭvaivaṃ samabhāṣata || 177 || {67}
[Analyze grammar]

bhavantaḥ śrūyatāṃ sarvairyatsvasti prāgatā vayaṃ |
tatprabhāvaṃ vijānīdhvaṃ jinendrasya prasādatāḥ || 178 || {68}
[Analyze grammar]

tasmādasya munīndrasya kṛtvā darśanamādarāt |
pūjayitvā praṇatvā ca paścādgehaṃ vrajema hi |
iti tasya vacaḥ śrutvā sarve 'pi te vaṇigjanāḥ |
dṛṣṭasatyānumodantaḥ tatheti pratimenire |
iti saṃbhāṣaṇāṃ kṛtvā sarvasārthasamanvitaḥ |
tataḥ sārthapatiḥ śīghraṃ vihāraṃ samupāyayau |
tatra dṛṣṭvā jinendraṃ taṃ sarve te saṃpraharṣitāḥ |
pādau natvā munestasya parivṛtyopatasthire || 179 || {69}
[Analyze grammar]

athāsau bhagavāndṛṣṭvā sarvān sārthagaṇānapi |
dharmotsāhaprāvṛddhyarthaiḥ samāmaṃtrya samabravīt || 180 || {70}
[Analyze grammar]

āgatāḥ stha samāyāta mā stha śrāntāśca kheditāḥ |
yātrāsāphalyasiddhiśca kaccidvaḥ kuśalāni ca || 181 || {71}
[Analyze grammar]

evaṃ pṛṣṭe jinendreṇa sarve te saṃpramoditāḥ |
kṛtāñjalipuṭo natvā saṃbuddhaṃ procurādarāt || 182 || {72}
[Analyze grammar]

bhagavanbhavatāmevaṃ kṛpādṛṣṭiprasādataḥ |
yātrāsiddhiḥ kathaṃ na syātsarvatra kuśalaṃ hi naḥ || 183 || {73}
[Analyze grammar]

yadvayaṃ śāstarāyātāḥ śubharatnasamanvitāḥ |
tatsarvaṃ tvatprabhāvena satyametatpramāṇyate || 184 || {74}
[Analyze grammar]

tadbhavantaṃ suśāstāraṃ draṣṭuṃ sarve samāgatāḥ |
pūjayituṃ samichāmastatprasīda jagadguro || 185 || {75}
[Analyze grammar]

iti vijñāpanāṃ kṛtvā saha sārthaiḥ sa sārthabhṛt |
sasaṃghaṃ pūjayitvā ca ratnāni samaḍhaukata || 186 || {76}
[Analyze grammar]

namaste bhagavannātha vrajāmaḥ śaraṇaṃ tava |
pāhi naḥ sarvadāpyevaṃ tvameva jagadīśvaraḥ || 187 || {77}
[Analyze grammar]

evaṃ stutvā munīndraṃ taṃ sarve te saṃprasāditāḥ |
kṛtāñjalipuṭā natvā svagṛhaṃ gantumīhire || 188 || {78}
[Analyze grammar]

tataśca bhagavāndṛṣṭvā tān sarvān svagṛhotsukān |
datvāśīrvacanaṃ spṛṣṭvā vrajateti vyasarjayat || 189 || {79}
[Analyze grammar]

tataḥ sarve 'pi te sārthāḥ kṛtvā pradakṣiṇatrayaṃ |
śāstāraṃ sugataṃ natvā svaṃ svaṃ gehaṃ samāyayuḥ || 190 || {80}
[Analyze grammar]

tato bhūyastathānyaiśca prārthyamānaḥ sa vīryavān |
ṣaḍḍhā ratnākaraṃ gatvā bahuratnānyasādhayat || 191 || {81}
[Analyze grammar]

tataśca gṛhapatiḥ śreṣṭhī sārthavāhaḥ suvīryavān |
sasaṅghaṃ sugataṃ gehe praṇītvārcitumārabhat || 192 || {[82]}
[Analyze grammar]

tato bhojanasāmagrīṃ sādhayitvā niveśane |
sasaṃghaiḥ buddhamāmaṃtrya nyaveśayacchubhāsane || 193 || {[83]}
[Analyze grammar]

tataḥ pūjopahāraiśca pūjayitvā vidhānataḥ |
pratyekaṃ cīvaraṃ datvā bhojanaiḥ samatoṣayat || 194 || {84!}
[Analyze grammar]

tataśca bhojanānte 'sau sārthavāhaḥ kṛtāñjaliḥ |
sasaṃghaṃ sugataṃ natvā praṇidhānaṃ tathākarot || 195 || {85}
[Analyze grammar]

yatkiñcitprakṛtaṃ dānaṃ saṃbuddhaśāsane mayā |
etatpuṇyaphalena syāṃ saṃbuddho 'yaṃ jino yathā || 196 || {86}
[Analyze grammar]

iti tasya gṛhasthasya cittaṃ saṃbodhivāṃchitaṃ |
jñātvāsau bhagavānbuddhaḥ smitaṃ kṛtvābhyanaṃdata || 197 || {87}
[Analyze grammar]

tadā bhagavato vaktrānniśceruḥ paṃcavarṇikāḥ |
raśmayastāḥ samantācca trailokyaṃ śāmabhāsayan || 198 || {88}
[Analyze grammar]

yāḥ kāścid raśmayo yātā adhastānnarakeṣvapi |
tāśca niścaritāstāvatsaṃjīvaṃ kālasūtrakaṃ || 199 || {[89]}
[Analyze grammar]

saṃghātaṃ rauravaṃ cāpi mahārauravaviśrutaṃ |
tapanākhyaṃ tathā caivaṃ pratāpanāhvayaṃ tataḥ || 200 || {90}
[Analyze grammar]

avīcimarbudaṃ caivaṃ nirarbudaṃ tathāṭaṭaṃ |
hahavaṃ huhuvaṃ caivamutpalaṃ padmakaṃ tataḥ || 201 || {91}
[Analyze grammar]

mahāpadmākhyametāni ṣoḍaśa nilayāni hi |
tatroṣṇanarakā ye tu teṣu sarveṣu niḥsṛtāḥ || 202 || {92}
[Analyze grammar]

śītībhūtā viniḥpatya prabhāsayan samaṃtataḥ |
ye śītanarakāsteṣu tūṣṇībhūtāpyabhāsayan || 203 || {93}
[Analyze grammar]

teṣu ye nārakāḥ satvā nānāduḥkhābhivedinaḥ |
te tābhī raśmibhiḥ spṛṣṭā mahatsaukhyaṃ prarebhire || 204 || {94}
[Analyze grammar]

atha sarve 'pi te satvā mahatsaukhyasamanvitāḥ |
vismitāstatra saṃmīlya mithaścaivaṃ vabhāṣire || 205 || {95}
[Analyze grammar]

aho bhavanta āścaryaṃ kiṃ cāsmākaṃ bhavetkhalu |
yadvayaṃ sarvadāpītthaṃ nānāduḥkhaiḥ prapīḍitāḥ |
tanmuktāḥ sāṃprataṃ sarve vayaṃ saukhyasamanvitāḥ || 206 || {96}
[Analyze grammar]

kiṃ tato hi vayaṃ muktā anyatra caritā nanu |
iti vismitacittānāṃ sarveṣāṃ cittabodhane || 207 || {97}
[Analyze grammar]

bhagavānnirmitaṃ teṣāṃ purastātsamadarśayat || 208 || {98}
[Analyze grammar]

tatra taṃ nirmitaṃ dṛṣṭvā sarve 'pi te 'tivismitāḥ |
parasparaṃ mukhaṃ dṛṣṭvā tathaivaṃ saṃvabhāṣire || 209 || {99}
[Analyze grammar]

bho bhavanta itaścyutvā nānyatra gamitā vayaṃ |
kiṃ tvayaṃ sugatākāra āyāto 'pūrvadarśanaḥ || 210 || {100}
[Analyze grammar]

nūnamasyānubhāvena vayamitthaṃ sukhānvitāḥ || 211 || {1}
[Analyze grammar]

iti saṃbhāṣya te sarve tasmiṃ saugatanirmite |
cittaṃ prasādya buddhāya nama iti praṇemire || 212 || {2}
[Analyze grammar]

tataste nirmitaṃ dṛṣṭvā natva cittaprasāditaḥ |
sarvapāpavinirmuktāḥ sarve 'pi sugatiṃ yayuḥ || 213 || {3}
[Analyze grammar]

yāśca kāścidgatā ūrddhvaṃ tā mahārājikān gatāḥ |
trayastriṃśāṃśca yāmāṃśca tuṣitāṃśca gatāstataḥ || 214 || {4}
[Analyze grammar]

nirmāṇaratimābhāsya nirmitavaśavarttikān |
brahmakāyikalokāṃśca gatā brahmapurohitān || 215 || {5}
[Analyze grammar]

mahābrahmālayaṃ cāpi parītābhāṃstathā gatāḥ |
apramāṇābhalokāṃśca tata ābhāsvarān gatāḥ || 216 || {6}
[Analyze grammar]

parīttaśubhalokāṃstadāpramāṇaśubhān gatāḥ |
śubhakṛtsnānanabhrāṃśca puṇyaprasavakāṃstataḥ || 217 || {7}
[Analyze grammar]

bṛhatphalāṃstataścaivamavṛhānatapān gatāḥ |
ḥsudṛśāṃśca tato yātā tathā caivaṃ sudarśanān || 218 || {8}
[Analyze grammar]

akaniṣṭhaṃ tathā gatvā sarvānetān vyabhāsayan |
teṣu ye saṃsthitā lokāḥ sarve tābhiśca raśmibhiḥ || 219 || {9}
[Analyze grammar]

parispṛṣṭāḥ sukhaprāptā dṛṣṭvā tāṃ caivamūcire |
aho citraṃ śubhā kāmyā kasya puṇyaprabhā imāḥ || 220 || {10}
[Analyze grammar]

yābhirvayaṃ parispṛṣṭā mahatsaukhyaṃ labhāmahe |
iti vismitacittānāṃ teṣāṃ cittavinodane || 221 || {11}
[Analyze grammar]

tathā tā raśmayaścaināṃ gāthābhiḥ samacodayan |
anityaṃ khalu saṃsāraṃ duḥkhaṃ śūnyaṃ hyanātmakaṃ || 222 || {12}
[Analyze grammar]

ataḥ kleśagaṇāṃstyaktvā bhajadhvaṃ sugataṃ sadā |
niṣkrāmatārabhadhvaṃ kaṃ yujyadhvaṃ buddhaśāsane || 223 || {13}
[Analyze grammar]

dhunīta mārasainyāṃśca naḍāgāramiva dvipaḥ |
yo hyasmiṃ dharmavaineye 'tyapramattaścaretsudhīḥ || 224 || {14}
[Analyze grammar]

prahāya sa bhave kleśānduḥkhasyāntaṃ kariṣyati |
iti tā raśmayaḥ sarvā avabhāsya samantataḥ || 225 || {15}
[Analyze grammar]

prerayitvā śubhe satvānpunarmuneḥ purogatāḥ |
tato bhagavatastasya kṛtvā trayapradakṣiṇāṃ || 226 || {16}
[Analyze grammar]

tathā tā raśmayaḥ sarvā uṣṇīṣe 'ntarhitaṃ yayuḥ |
athānandaḥ samutthāya kṛtāñjalipuṭo mudā || 227 || {17}
[Analyze grammar]

bhagavantaṃ praṇamyaivaṃ papraccha smitakāraṇaṃ |
bhagavaṃstava śubhā raśmiḥ smitodbhavā vinirgatā || 228 || {18}
[Analyze grammar]

yayāvabhāsitā lokāḥ sūryeṇodayatā yathā |
nākasmāddarśayantyevaṃ smitaṃ buddhā jināḥ kvacit || 229 || {19}
[Analyze grammar]

tatkasmādbhagavān smitaṃ saṃdarśayati sāṃprataṃ |
yasyārthe bhavatāpyevaṃ smitaṃ saṃdarśitaṃ tathā || 230 || {20}
[Analyze grammar]

taṃ dṛṣṭvā vismitāḥ sarve śrotumichanti sajjanāḥ |
tadatra bhagavāñchāstā hyesāṃ dharmābhikāṃkṣiṇāṃ || 231 || {21}
[Analyze grammar]

sarveṣāṃ tatsamādiśya saṃdehaṃ chettumarhati |
ityānaṃdoditaṃ śrutvā bhagavāṃśca tamabravīt || 232 || {22}
[Analyze grammar]

evametattathānaṃda yathā tvaṃ bhāṣase kila |
nākāraṇe jinaṃ sarvaṃ smitaṃ saṃdarśitaṃ kvacit || 233 || {23}
[Analyze grammar]

tadarthaṃ śṛṇu vakṣye 'haṃ yadarthaṃ saṃsmitaṃ mama |
paśyānanda gṛhastho 'yaṃ dārako yaḥ kuśīditaḥ || 234 || {24}
[Analyze grammar]

mama saṃdarśanādevaṃ viryotsāhaṃ samāpnuvan |
itthaṃ ratnāni saṃsādhya buddhimāṃśca samṛddhitaḥ || 235 || {25}
[Analyze grammar]

evaṃ śrāddhaḥ prasannātmā śāsane me 'numoditaḥ |
satkṛtya śaraṇaṃ kṛtvā bhajati māṃ sasāṃghikaṃ || 236 || {26}
[Analyze grammar]

yadayaṃ sārthabhṛnnando mama dharmābhisaṃrataḥ |
asya puṇyavipākena bodhicittaṃ samāpnuyāt || 237 || {27}
[Analyze grammar]

tataḥ cikṣāḥ samāsādya pūrya pāramitā daśa |
kramānmāragaṇāñjitvā saṃbodhiṃ samavāpnuyāt || 238 || {28}
[Analyze grammar]

tato 'rhannabhivandyo 'tibalavīryaparākramaḥ |
iti nāmnā prasiddho 'yaṃ saṃbuddhaḥ sugato jinaḥ || 239 || {29}
[Analyze grammar]

sarvadharmādhipaḥ śāstā sarvavidyāguṇākaraḥ |
sarvajñastrijagadbharttā tathāgato bhaviṣyati || 240 || {30}
[Analyze grammar]

tasmādevaṃ sadānaṃda karttavyaṃ buddhadarśanaṃ |
buddhadarśanapuṇyena dharmotsāhaṃ samāpuṇyāt || 241 || {31}
[Analyze grammar]

tato vīryasamārūḍhaḥ saddharmaṃ sādhayenmudā |
tato dharmabalairmārāñjitvā saṃbodhimāpnuyāt || 242 || {32}
[Analyze grammar]

ityādiṣṭaṃ munīndreṇa śrutvānaṃdaḥ sasāṃghikaḥ |
anumodya guruṃ natvā tatheti prābhyanaṃdata || 243 || {33}
[Analyze grammar]

evaṃ me guruṇādiṣṭaṃ dharmotsāhapravṛddhaye |
tathā tava mayā khyātaṃ satyametatpradhāryatāṃ || 244 || {34}
[Analyze grammar]

evaṃ rājaṃstvayāpyevaṃ kṛtvānumodanāṃ tathā |
dharmaprotsāhanāṃ kṛtvā karttavyaṃ buddhadarśanaṃ || 245 || {35}
[Analyze grammar]

saddharmacaraṇotsāhe cāraṇīyāḥ prajāḥ sadā |
ityetadguruṇādiṣṭaṃ śrutvāśokaḥ sa bhūmipaḥ || 246 || {36}
[Analyze grammar]

satyamevaṃ pratiśrutya prābhyanandatsapārṣadaḥ || 247 || {37!}
[Analyze grammar]