Chapter 136

yudhiṣṭhira uvāca |
sarvatra buddhiḥ kathitā śreṣṭhā te bharatarṣabha |
anāgatā tathotpannā dīrghasūtrā vināśinī || 1 ||
[Analyze grammar]

tadicchāmi parāṃ buddhiṃ śrotuṃ bharatasattama |
yathā rājanna muhyeta śatrubhiḥ parivāritaḥ || 2 ||
[Analyze grammar]

dharmārthakuśala prājña sarvaśāstraviśārada |
pṛcchāmi tvā kuruśreṣṭha tanme vyākhyātumarhasi || 3 ||
[Analyze grammar]

śatrubhirbahubhirgrasto yathā varteta pārthivaḥ |
etadicchāmyahaṃ śrotuṃ sarvameva yathāvidhi || 4 ||
[Analyze grammar]

viṣamasthaṃ hi rājānaṃ śatravaḥ paripanthinaḥ |
bahavo'pyekamuddhartuṃ yatante pūrvatāpitāḥ || 5 ||
[Analyze grammar]

sarvataḥ prārthyamānena durbalena mahābalaiḥ |
ekenaivāsahāyena śakyaṃ sthātuṃ kathaṃ bhavet || 6 ||
[Analyze grammar]

kathaṃ mitramariṃ caiva vindeta bharatarṣabha |
ceṣṭitavyaṃ kathaṃ cātra śatrormitrasya cāntare || 7 ||
[Analyze grammar]

prajñātalakṣaṇe rājannamitre mitratāṃ gate |
kathaṃ nu puruṣaḥ kuryātkiṃ vā kṛtvā sukhī bhavet || 8 ||
[Analyze grammar]

vigrahaṃ kena vā kuryātsaṃdhiṃ vā kena yojayet |
kathaṃ vā śatrumadhyastho vartetābalavāniti || 9 ||
[Analyze grammar]

etadvai sarvakṛtyānāṃ paraṃ kṛtyaṃ paraṃtapa |
naitasya kaścidvaktāsti śrotā cāpi sudurlabhaḥ || 10 ||
[Analyze grammar]

ṛte śāṃtanavādbhīṣmātsatyasaṃdhājjitendriyāt |
tadanviṣya mahābāho sarvametadvadasva me || 11 ||
[Analyze grammar]

bhīṣma uvāca |
tvadyukto'yamanupraśno yudhiṣṭhira guṇodayaḥ |
śṛṇu me putra kārtsnyena guhyamāpatsu bhārata || 12 ||
[Analyze grammar]

amitro mitratāṃ yāti mitraṃ cāpi praduṣyati |
sāmarthyayogātkāryāṇāṃ tadgatyā hi sadā gatiḥ || 13 ||
[Analyze grammar]

tasmādviśvasitavyaṃ ca vigrahaṃ ca samācaret |
deśaṃ kālaṃ ca vijñāya kāryākāryaviniścaye || 14 ||
[Analyze grammar]

saṃdhātavyaṃ budhairnityaṃ vyavasyaṃ ca hitārthibhiḥ |
amitrairapi saṃdheyaṃ prāṇā rakṣyāśca bhārata || 15 ||
[Analyze grammar]

yo hyamitrairnaro nityaṃ na saṃdadhyādapaṇḍitaḥ |
na so'rthamāpnuyātkiṃcitphalānyapi ca bhārata || 16 ||
[Analyze grammar]

yastvamitreṇa saṃdhatte mitreṇa ca virudhyate |
arthayuktiṃ samālokya sumahadvindate phalam || 17 ||
[Analyze grammar]

atrāpyudāharantīmamitihāsaṃ purātanam |
mārjārasya ca saṃvādaṃ nyagrodhe mūṣakasya ca || 18 ||
[Analyze grammar]

vane mahati kasmiṃścinnyagrodhaḥ sumahānabhūt |
latājālaparicchanno nānādvijagaṇāyutaḥ || 19 ||
[Analyze grammar]

skandhavānmeghasaṃkāśaḥ śītacchāyo manoramaḥ |
vairantyamabhito jātastarurvyālamṛgākulaḥ || 20 ||
[Analyze grammar]

tasya mūlaṃ samāśritya kṛtvā śatamukhaṃ bilam |
vasati sma mahāprājñaḥ palito nāma mūṣakaḥ || 21 ||
[Analyze grammar]

śākhāśca tasya saṃśritya vasati sma sukhaṃ puraḥ |
lomaśo nāma mārjāraḥ pakṣisattvāvasādakaḥ || 22 ||
[Analyze grammar]

tatra cāgatya caṇḍālo vairantyakṛtaketanaḥ |
ayojayattamunmāthaṃ nityamastaṃ gate ravau || 23 ||
[Analyze grammar]

tatra snāyumayānpāśānyathāvatsaṃnidhāya saḥ |
gṛhaṃ gatvā sukhaṃ śete prabhātāmeti śarvarīm || 24 ||
[Analyze grammar]

tatra sma nityaṃ badhyante naktaṃ bahuvidhā mṛgāḥ |
kadācittatra mārjārastvapramatto'pyabadhyata || 25 ||
[Analyze grammar]

tasminbaddhe mahāprājñaḥ śatrau nityātatāyini |
taṃ kālaṃ palito jñātvā vicacāra sunirbhayaḥ || 26 ||
[Analyze grammar]

tenānucaratā tasminvane viśvastacāriṇā |
bhakṣaṃ vicaramāṇena nacirāddṛṣṭamāmiṣam || 27 ||
[Analyze grammar]

sa tamunmāthamāruhya tadāmiṣamabhakṣayat |
tasyopari sapatnasya baddhasya manasā hasan || 28 ||
[Analyze grammar]

āmiṣe tu prasaktaḥ sa kadācidavalokayan |
apaśyadaparaṃ ghoramātmanaḥ śatrumāgatam || 29 ||
[Analyze grammar]

śaraprasūnasaṃkāśaṃ mahīvivaraśāyinam |
nakulaṃ harikaṃ nāma capalaṃ tāmralocanam || 30 ||
[Analyze grammar]

tena mūṣakagandhena tvaramāṇamupāgatam |
bhakṣārthaṃ lelihadvaktraṃ bhūmāvūrdhvamukhaṃ sthitam || 31 ||
[Analyze grammar]

śākhāgatamariṃ cānyadapaśyatkoṭarālayam |
ulūkaṃ candrakaṃ nāma tīkṣṇatuṇḍaṃ kṣapācaram || 32 ||
[Analyze grammar]

gatasya viṣayaṃ tasya nakulolūkayostadā |
athāsyāsīdiyaṃ cintā tatprāpya sumahadbhayam || 33 ||
[Analyze grammar]

āpadyasyāṃ sukaṣṭāyāṃ maraṇe samupasthite |
samantādbhaya utpanne kathaṃ kāryaṃ hitaiṣiṇā || 34 ||
[Analyze grammar]

sa tathā sarvato ruddhaḥ sarvatra samadarśanaḥ |
abhavadbhayasaṃtaptaścakre cemāṃ parāṃ gatim || 35 ||
[Analyze grammar]

āpadvināśabhūyiṣṭhā śataikīyaṃ ca jīvitam |
samantasaṃśayā ceyamasmānāpadupasthitā || 36 ||
[Analyze grammar]

gataṃ hi sahasā bhūmiṃ nakulo māṃ samāpnuyāt |
ulūkaśceha tiṣṭhantaṃ mārjāraḥ pāśasaṃkṣayāt || 37 ||
[Analyze grammar]

na tvevāsmadvidhaḥ prājñaḥ saṃmohaṃ gantumarhati |
kariṣye jīvite yatnaṃ yāvaducchvāsanigraham || 38 ||
[Analyze grammar]

na hi buddhyānvitāḥ prājñā nītiśāstraviśāradāḥ |
saṃbhramantyāpadaṃ prāpya mahato'rthānavāpya ca || 39 ||
[Analyze grammar]

na tvanyāmiha mārjārādgatiṃ paśyāmi sāṃpratam |
viṣamastho hyayaṃ jantuḥ kṛtyaṃ cāsya mahanmayā || 40 ||
[Analyze grammar]

jīvitārthī kathaṃ tvadya prārthitaḥ śatrubhistribhiḥ |
tasmādimamahaṃ śatruṃ mārjāraṃ saṃśrayāmi vai || 41 ||
[Analyze grammar]

kṣatravidyāṃ samāśritya hitamasyopadhāraye |
yenemaṃ śatrusaṃghātaṃ matipūrveṇa vañcaye || 42 ||
[Analyze grammar]

ayamatyantaśatrurme vaiṣamyaṃ paramaṃ gataḥ |
mūḍho grāhayituṃ svārthaṃ saṃgatyā yadi śakyate || 43 ||
[Analyze grammar]

kadācidvyasanaṃ prāpya saṃdhiṃ kuryānmayā saha |
balinā saṃniviṣṭasya śatrorapi parigrahaḥ |
kārya ityāhurācāryā viṣame jīvitārthinā || 44 ||
[Analyze grammar]

śreyānhi paṇḍitaḥ śatrurna ca mitramapaṇḍitam |
mama hyamitre mārjāre jīvitaṃ saṃpratiṣṭhitam || 45 ||
[Analyze grammar]

hantainaṃ saṃpravakṣyāmi hetumātmābhirakṣaṇe |
apīdānīmayaṃ śatruḥ saṃgatyā paṇḍito bhavet || 46 ||
[Analyze grammar]

tato'rthagatitattvajñaḥ saṃdhivigrahakālavit |
sāntvapūrvamidaṃ vākyaṃ mārjāraṃ mūṣako'bravīt || 47 ||
[Analyze grammar]

sauhṛdenābhibhāṣe tvā kaccinmārjāra jīvasi |
jīvitaṃ hi tavecchāmi śreyaḥ sādhāraṇaṃ hi nau || 48 ||
[Analyze grammar]

na te saumya viṣattavyaṃ jīviṣyasi yathā purā |
ahaṃ tvāmuddhariṣyāmi prāṇāñjahyāṃ hi te kṛte || 49 ||
[Analyze grammar]

asti kaścidupāyo'tra puṣkalaḥ pratibhāti mām |
yena śakyastvayā mokṣaḥ prāptuṃ śreyo yathā mayā || 50 ||
[Analyze grammar]

mayā hyupāyo dṛṣṭo'yaṃ vicārya matimātmanaḥ |
ātmārthaṃ ca tvadarthaṃ ca śreyaḥ sādhāraṇaṃ hi nau || 51 ||
[Analyze grammar]

idaṃ hi nakulolūkaṃ pāpabuddhyabhitaḥ sthitam |
na dharṣayati mārjāra tena me svasti sāṃpratam || 52 ||
[Analyze grammar]

kūjaṃścapalanetro'yaṃ kauśiko māṃ nirīkṣate |
nagaśākhāgrahastiṣṭhaṃstasyāhaṃ bhṛśamudvije || 53 ||
[Analyze grammar]

satāṃ sāptapadaṃ sakhyaṃ savāso me'si paṇḍitaḥ |
sāṃvāsyakaṃ kariṣyāmi nāsti te mṛtyuto bhayam || 54 ||
[Analyze grammar]

na hi śaknoṣi mārjāra pāśaṃ chettuṃ vinā mayā |
ahaṃ chetsyāmi te pāśaṃ yadi māṃ tvaṃ na hiṃsasi || 55 ||
[Analyze grammar]

tvamāśrito nagasyāgraṃ mūlaṃ tvahamupāśritaḥ |
ciroṣitāvihāvāṃ vai vṛkṣe'sminviditaṃ hi te || 56 ||
[Analyze grammar]

yasminnāśvasate kaścidyaśca nāśvasate kvacit |
na tau dhīrāḥ praśaṃsanti nityamudvignacetasau || 57 ||
[Analyze grammar]

tasmādvivardhatāṃ prītiḥ satyā saṃgatirastu nau |
kālātītamapārthaṃ hi na praśaṃsanti paṇḍitāḥ || 58 ||
[Analyze grammar]

arthayuktimimāṃ tāvadyathābhūtāṃ niśāmaya |
tava jīvitamicchāmi tvaṃ mamecchasi jīvitam || 59 ||
[Analyze grammar]

kaścittarati kāṣṭhena sugambhīrāṃ mahānadīm |
sa tārayati tatkāṣṭhaṃ sa ca kāṣṭhena tāryate || 60 ||
[Analyze grammar]

īdṛśo nau samāyogo bhaviṣyati sunistaraḥ |
ahaṃ tvāṃ tārayiṣyāmi tvaṃ ca māṃ tārayiṣyasi || 61 ||
[Analyze grammar]

evamuktvā tu palitastadarthamubhayorhitam |
hetumadgrahaṇīyaṃ ca kālākāṅkṣī vyapaikṣata || 62 ||
[Analyze grammar]

atha suvyāhṛtaṃ tasya śrutvā śatrurvicakṣaṇaḥ |
hetumadgrahaṇīyārthaṃ mārjāro vākyamabravīt || 63 ||
[Analyze grammar]

buddhimānvākyasaṃpannastadvākyamanuvarṇayan |
tāmavasthāmavekṣyāntyāṃ sāmnaiva pratyapūjayat || 64 ||
[Analyze grammar]

tatastīkṣṇāgradaśano vaiḍūryamaṇilocanaḥ |
mūṣakaṃ mandamudvīkṣya mārjāro lomaśo'bravīt || 65 ||
[Analyze grammar]

nandāmi saumya bhadraṃ te yo māṃ jīvantamicchasi |
śreyaśca yadi jānīṣe kriyatāṃ mā vicāraya || 66 ||
[Analyze grammar]

ahaṃ hi dṛḍhamāpannastvamāpannataro mayā |
dvayorāpannayoḥ saṃdhiḥ kriyatāṃ mā vicāraya || 67 ||
[Analyze grammar]

vidhatsva prāptakālaṃ yatkāryaṃ sidhyatu cāvayoḥ |
mayi kṛcchrādvinirmukte na vinaṅkṣyati te kṛtam || 68 ||
[Analyze grammar]

nyastamāno'smi bhakto'smi śiṣyastvaddhitakṛttathā |
nideśavaśavartī ca bhavantaṃ śaraṇaṃ gataḥ || 69 ||
[Analyze grammar]

ityevamuktaḥ palito mārjāraṃ vaśamāgatam |
vākyaṃ hitamuvācedamabhinītārthamarthavat || 70 ||
[Analyze grammar]

udāraṃ yadbhavānāha naitaccitraṃ bhavadvidhe |
vidito yastu mārgo me hitārthaṃ śṛṇu taṃ mama || 71 ||
[Analyze grammar]

ahaṃ tvānupravekṣyāmi nakulānme mahadbhayam |
trāyasva māṃ mā vadhīśca śakto'smi tava mokṣaṇe || 72 ||
[Analyze grammar]

ulūkāccaiva māṃ rakṣa kṣudraḥ prārthayate hi mām |
ahaṃ chetsyāmi te pāśānsakhe satyena te śape || 73 ||
[Analyze grammar]

tadvacaḥ saṃgataṃ śrutvā lomaśo yuktamarthavat |
harṣādudvīkṣya palitaṃ svāgatenābhyapūjayat || 74 ||
[Analyze grammar]

sa taṃ saṃpūjya palitaṃ mārjāraḥ sauhṛde sthitaḥ |
suvicintyābravīddhīraḥ prītastvarita eva hi || 75 ||
[Analyze grammar]

kṣipramāgaccha bhadraṃ te tvaṃ me prāṇasamaḥ sakhā |
tava prājña prasādāddhi kṣipraṃ prāpsyāmi jīvitam || 76 ||
[Analyze grammar]

yadyadevaṃgatenādya śakyaṃ kartuṃ mayā tava |
tadājñāpaya kartāhaṃ saṃdhirevāstu nau sakhe || 77 ||
[Analyze grammar]

asmātte saṃśayānmuktaḥ samitragaṇabāndhavaḥ |
sarvakāryāṇi kartāhaṃ priyāṇi ca hitāni ca || 78 ||
[Analyze grammar]

muktaśca vyasanādasmātsaumyāhamapi nāma te |
prītimutpādayeyaṃ ca pratikartuṃ ca śaknuyām || 79 ||
[Analyze grammar]

grāhayitvā tu taṃ svārthaṃ mārjāraṃ mūṣakastadā |
praviveśa suvisrabdhaḥ samyagarthāṃścacāra ha || 80 ||
[Analyze grammar]

evamāśvāsito vidvānmārjāreṇa sa mūṣakaḥ |
mārjārorasi visrabdhaḥ suṣvāpa pitṛmātṛvat || 81 ||
[Analyze grammar]

līnaṃ tu tasya gātreṣu mārjārasyātha mūṣakam |
tau dṛṣṭvā nakulolūkau nirāśau jagmaturgṛhān || 82 ||
[Analyze grammar]

līnastu tasya gātreṣu palito deśakālavit |
ciccheda pāśānnṛpate kālākāṅkṣī śanaiḥ śanaiḥ || 83 ||
[Analyze grammar]

atha bandhaparikliṣṭo mārjāro vīkṣya mūṣakam |
chindantaṃ vai tadā pāśānatvarantaṃ tvarānvitaḥ || 84 ||
[Analyze grammar]

tamatvarantaṃ palitaṃ pāśānāṃ chedane tadā |
saṃcodayitumārebhe mārjāro mūṣakaṃ tadā || 85 ||
[Analyze grammar]

kiṃ saumya nābhitvarase kiṃ kṛtārtho'vamanyase |
chindhi pāśānamitraghna purā śvapaca eti saḥ || 86 ||
[Analyze grammar]

ityuktastvaratā tena matimānpalito'bravīt |
mārjāramakṛtaprajñaṃ vaśyamātmahitaṃ vacaḥ || 87 ||
[Analyze grammar]

tūṣṇīṃ bhava na te saumya tvarā kāryā na saṃbhramaḥ |
vayamevātra kālajñā na kālaḥ parihāsyate || 88 ||
[Analyze grammar]

akāle kṛtyamārabdhaṃ kartuṃ nārthāya kalpate |
tadeva kāla ārabdhaṃ mahate'rthāya kalpate || 89 ||
[Analyze grammar]

akālavipramuktānme tvatta eva bhayaṃ bhavet |
tasmātkālaṃ pratīkṣasva kimiti tvarase sakhe || 90 ||
[Analyze grammar]

yāvatpaśyāmi caṇḍālamāyāntaṃ śastrapāṇinam |
tataśchetsyāmi te pāśaṃ prāpte sādhāraṇe bhaye || 91 ||
[Analyze grammar]

tasminkāle pramuktastvaṃ tarumevādhirohasi |
na hi te jīvitādanyatkiṃcitkṛtyaṃ bhaviṣyati || 92 ||
[Analyze grammar]

tato bhavatyatikrānte traste bhīte ca lomaśa |
ahaṃ bilaṃ pravekṣyāmi bhavāñśākhāṃ gamiṣyati || 93 ||
[Analyze grammar]

evamuktastu mārjāro mūṣakeṇātmano hitam |
vacanaṃ vākyatattvajño jīvitārthī mahāmatiḥ || 94 ||
[Analyze grammar]

athātmakṛtyatvaritaḥ samyakpraśrayamācaran |
uvāca lomaśo vākyaṃ mūṣakaṃ cirakāriṇam || 95 ||
[Analyze grammar]

na hyevaṃ mitrakāryāṇi prītyā kurvanti sādhavaḥ |
yathā tvaṃ mokṣitaḥ kṛcchrāttvaramāṇena vai mayā || 96 ||
[Analyze grammar]

tathaiva tvaramāṇena tvayā kāryaṃ hitaṃ mama |
yatnaṃ kuru mahāprājña yathā svastyāvayorbhavet || 97 ||
[Analyze grammar]

atha vā pūrvavairaṃ tvaṃ smarankālaṃ vikarṣasi |
paśya duṣkṛtakarmatvaṃ vyaktamāyuḥkṣayo mama || 98 ||
[Analyze grammar]

yacca kiṃcinmayājñānātpurastādvipriyaṃ kṛtam |
na tanmanasi kartavyaṃ kṣamaye tvāṃ prasīda me || 99 ||
[Analyze grammar]

tamevaṃvādinaṃ prājñaḥ śāstravidbuddhisaṃmataḥ |
uvācedaṃ vacaḥ śreṣṭhaṃ mārjāraṃ mūṣakastadā || 100 ||
[Analyze grammar]

śrutaṃ me tava mārjāra svamarthaṃ parigṛhṇataḥ |
mamāpi tvaṃ vijānīhi svamarthaṃ parigṛhṇataḥ || 101 ||
[Analyze grammar]

yanmitraṃ bhītavatsādhyaṃ yanmitraṃ bhayasaṃhitam |
surakṣitaṃ tataḥ kāryaṃ pāṇiḥ sarpamukhādiva || 102 ||
[Analyze grammar]

kṛtvā balavatā saṃdhimātmānaṃ yo na rakṣati |
apathyamiva tadbhuktaṃ tasyānarthāya kalpate || 103 ||
[Analyze grammar]

na kaścitkasyacinmitraṃ na kaścitkasyacitsuhṛt |
arthairarthā nibadhyante gajairvanagajā iva || 104 ||
[Analyze grammar]

na hi kaścitkṛte kārye kartāraṃ samavekṣate |
tasmātsarvāṇi kāryāṇi sāvaśeṣāṇi kārayet || 105 ||
[Analyze grammar]

tasminkāle'pi ca bhavāndivākīrtibhayānvitaḥ |
mama na grahaṇe śaktaḥ palāyanaparāyaṇaḥ || 106 ||
[Analyze grammar]

chinnaṃ tu tantubāhulyaṃ tantureko'vaśeṣitaḥ |
chetsyāmyahaṃ tadapyāśu nirvṛto bhava lomaśa || 107 ||
[Analyze grammar]

tayoḥ saṃvadatorevaṃ tathaivāpannayordvayoḥ |
kṣayaṃ jagāma sā rātrirlomaśaṃ cāviśadbhayam || 108 ||
[Analyze grammar]

tataḥ prabhātasamaye vikṛtaḥ kṛṣṇapiṅgalaḥ |
sthūlasphigvikaco rūkṣaḥ śvacakraparivāritaḥ || 109 ||
[Analyze grammar]

śaṅkukarṇo mahāvaktraḥ palito ghoradarśanaḥ |
parigho nāma caṇḍālaḥ śastrapāṇiradṛśyata || 110 ||
[Analyze grammar]

taṃ dṛṣṭvā yamadūtābhaṃ mārjārastrastacetanaḥ |
uvāca palitaṃ bhītaḥ kimidānīṃ kariṣyasi || 111 ||
[Analyze grammar]

atha cāpi susaṃtrastau taṃ dṛṣṭvā ghoradarśanam |
kṣaṇena nakulolūkau nairāśyaṃ jagmatustadā || 112 ||
[Analyze grammar]

balinau matimantau ca saṃghātaṃ cāpyupāgatau |
aśakyau sunayāttasmātsaṃpradharṣayituṃ balāt || 113 ||
[Analyze grammar]

kāryārthaṃ kṛtasaṃdhī tau dṛṣṭvā mārjāramūṣakau |
ulūkanakulau tūrṇaṃ jagmatuḥ svaṃ svamālayam || 114 ||
[Analyze grammar]

tataściccheda taṃ tantuṃ mārjārasya sa mūṣakaḥ |
vipramukto'tha mārjārastamevābhyapataddrumam || 115 ||
[Analyze grammar]

sa ca tasmādbhayānmukto mukto ghoreṇa śatruṇā |
bilaṃ viveśa palitaḥ śākhāṃ bheje ca lomaśaḥ || 116 ||
[Analyze grammar]

unmāthamapyathādāya caṇḍālo vīkṣya sarvaśaḥ |
vihatāśaḥ kṣaṇenātha tasmāddeśādapākramat |
jagāma ca svabhavanaṃ caṇḍālo bharatarṣabha || 117 ||
[Analyze grammar]

tatastasmādbhayānmukto durlabhaṃ prāpya jīvitam |
bilasthaṃ pādapāgrasthaḥ palitaṃ lomaśo'bravīt || 118 ||
[Analyze grammar]

akṛtvā saṃvidaṃ kāṃcitsahasāhamupaplutaḥ |
kṛtajñaṃ kṛtakalyāṇaṃ kaccinmāṃ nābhiśaṅkase || 119 ||
[Analyze grammar]

gatvā ca mama viśvāsaṃ dattvā ca mama jīvitam |
mitropabhogasamaye kiṃ tvaṃ naivopasarpasi || 120 ||
[Analyze grammar]

kṛtvā hi pūrvaṃ mitrāṇi yaḥ paścānnānutiṣṭhati |
na sa mitrāṇi labhate kṛcchrāsvāpatsu durmatiḥ || 121 ||
[Analyze grammar]

tatkṛto'haṃ tvayā mitraṃ sāmarthyādātmanaḥ sakhe |
sa māṃ mitratvamāpannamupabhoktuṃ tvamarhasi || 122 ||
[Analyze grammar]

yāni me santi mitrāṇi ye ca me santi bāndhavāḥ |
sarve tvāṃ pūjayiṣyanti śiṣyā gurumiva priyam || 123 ||
[Analyze grammar]

ahaṃ ca pūjayiṣye tvāṃ samitragaṇabāndhavam |
jīvitasya pradātāraṃ kṛtajñaḥ ko na pūjayet || 124 ||
[Analyze grammar]

īśvaro me bhavānastu śarīrasya gṛhasya ca |
arthānāṃ caiva sarveṣāmanuśāstā ca me bhava || 125 ||
[Analyze grammar]

amātyo me bhava prājña piteva hi praśādhi mām |
na te'sti bhayamasmatto jīvitenātmanaḥ śape || 126 ||
[Analyze grammar]

buddhyā tvamuśanāḥ sākṣādbale tvadhikṛtā vayam |
tvanmantrabalayukto hi vindeta jayameva ha || 127 ||
[Analyze grammar]

evamuktaḥ paraṃ sāntvaṃ mārjāreṇa sa mūṣakaḥ |
uvāca paramārthajñaḥ ślakṣṇamātmahitaṃ vacaḥ || 128 ||
[Analyze grammar]

yadbhavānāha tatsarvaṃ mayā te lomaśa śrutam |
mamāpi tāvadbruvataḥ śṛṇu yatpratibhāti mām || 129 ||
[Analyze grammar]

veditavyāni mitrāṇi boddhavyāścāpi śatravaḥ |
etatsusūkṣmaṃ loke'smindṛśyate prājñasaṃmatam || 130 ||
[Analyze grammar]

śatrurūpāśca suhṛdo mitrarūpāśca śatravaḥ |
sāntvitāste na budhyante rāgalobhavaśaṃ gatāḥ || 131 ||
[Analyze grammar]

nāsti jātyā ripurnāma mitraṃ nāma na vidyate |
sāmarthyayogājjāyante mitrāṇi ripavastathā || 132 ||
[Analyze grammar]

yo yasmiñjīvati svārthaṃ paśyettāvatsa jīvati |
sa tasya tāvanmitraṃ syādyāvanna syādviparyayaḥ || 133 ||
[Analyze grammar]

nāsti maitrī sthirā nāma na ca dhruvamasauhṛdam |
arthayuktyā hi jāyante mitrāṇi ripavastathā || 134 ||
[Analyze grammar]

mitraṃ ca śatrutāmeti kasmiṃścitkālaparyaye |
śatruśca mitratāmeti svārtho hi balavattaraḥ || 135 ||
[Analyze grammar]

yo viśvasati mitreṣu na cāśvasati śatruṣu |
arthayuktimavijñāya calitaṃ tasya jīvitam || 136 ||
[Analyze grammar]

arthayuktimavijñāya yaḥ śubhe kurute matim |
mitre vā yadi vā śatrau tasyāpi calitā matiḥ || 137 ||
[Analyze grammar]

na viśvasedaviśvaste viśvaste'pi na viśvaset |
viśvāsādbhayamutpannaṃ mūlānyapi nikṛntati || 138 ||
[Analyze grammar]

arthayuktyā hi dṛśyante pitā mātā sutāstathā |
mātulā bhāgineyāśca tathā saṃbandhibāndhavāḥ || 139 ||
[Analyze grammar]

putraṃ hi mātāpitaru tyajataḥ patitaṃ priyam |
loko rakṣati cātmānaṃ paśya svārthasya sāratām || 140 ||
[Analyze grammar]

taṃ manye nikṛtiprajñaṃ yo mokṣaṃ pratyanantaram |
kṛtyaṃ mṛgayase kartuṃ sukhopāyamasaṃśayam || 141 ||
[Analyze grammar]

asminnilaya eva tvaṃ nyagrodhādavatāritaḥ |
pūrvaṃ niviṣṭamunmāthaṃ capalatvānna buddhavān || 142 ||
[Analyze grammar]

ātmanaścapalo nāsti kuto'nyeṣāṃ bhaviṣyati |
tasmātsarvāṇi kāryāṇi capalo hantyasaṃśayam || 143 ||
[Analyze grammar]

bravīti madhuraṃ kaṃcitpriyo me ha bhavāniti |
tanmithyākaraṇaṃ sarvaṃ vistareṇāpi me śṛṇu || 144 ||
[Analyze grammar]

kāraṇātpriyatāmeti dveṣyo bhavati kāraṇāt |
arthārthī jīvaloko'yaṃ na kaścitkasyacitpriyaḥ || 145 ||
[Analyze grammar]

sakhyaṃ sodarayorbhrātrordaṃpatyorvā parasparam |
kasyacinnābhijānāmi prītiṃ niṣkāraṇāmiha || 146 ||
[Analyze grammar]

yadyapi bhrātaraḥ kruddhā bhāryā vā kāraṇāntare |
svabhāvataste prīyante netaraḥ prīyate janaḥ || 147 ||
[Analyze grammar]

priyo bhavati dānena priyavādena cāparaḥ |
mantrahomajapairanyaḥ kāryārthaṃ prīyate janaḥ || 148 ||
[Analyze grammar]

utpanne kāraṇe prītirnāsti nau kāraṇāntare |
pradhvaste kāraṇasthāne sā prītirvinivartate || 149 ||
[Analyze grammar]

kiṃ nu tatkāraṇaṃ manye yenāhaṃ bhavataḥ priyaḥ |
anyatrābhyavahārārthāttatrāpi ca budhā vayam || 150 ||
[Analyze grammar]

kālo hetuṃ vikurute svārthastamanuvartate |
svārthaṃ prājño'bhijānāti prājñaṃ loko'nuvartate || 151 ||
[Analyze grammar]

na tvīdṛśaṃ tvayā vācyaṃ viduṣi svārthapaṇḍite |
akāle'viṣamasthasya svārthaheturayaṃ tava || 152 ||
[Analyze grammar]

tasmānnāhaṃ cale svārthātsusthitaḥ saṃdhivigrahe |
abhrāṇāmiva rūpāṇi vikurvanti kṣaṇe kṣaṇe || 153 ||
[Analyze grammar]

adyaiva hi ripurbhūtvā punaradyaiva sauhṛdam |
punaśca ripuradyaiva yuktīnāṃ paśya cāpalam || 154 ||
[Analyze grammar]

āsīttāvattu maitrī nau yāvaddheturabhūtpurā |
sā gatā saha tenaiva kālayuktena hetunā || 155 ||
[Analyze grammar]

tvaṃ hi me'tyantataḥ śatruḥ sāmarthyānmitratāṃ gataḥ |
tatkṛtyamabhinirvṛttaṃ prakṛtiḥ śatrutāṃ gatā || 156 ||
[Analyze grammar]

so'hamevaṃ praṇītāni jñātvā śāstrāṇi tattvataḥ |
praviśeyaṃ kathaṃ pāśaṃ tvatkṛtaṃ tadvadasva me || 157 ||
[Analyze grammar]

tvadvīryeṇa vimukto'haṃ madvīryeṇa tathā bhavān |
anyonyānugrahe vṛtte nāsti bhūyaḥ samāgamaḥ || 158 ||
[Analyze grammar]

tvaṃ hi saumya kṛtārtho'dya nirvṛttārthāstathā vayam |
na te'styanyanmayā kṛtyaṃ kiṃcidanyatra bhakṣaṇāt || 159 ||
[Analyze grammar]

ahamannaṃ bhavānbhoktā durbalo'haṃ bhavānbalī |
nāvayorvidyate saṃdhirniyukte viṣame bale || 160 ||
[Analyze grammar]

saṃmanye'haṃ tava prajñāṃ yanmokṣātpratyanantaram |
bhakṣyaṃ mṛgayase nūnaṃ sukhopāyamasaṃśayam || 161 ||
[Analyze grammar]

bhakṣyārthameva baddhastvaṃ sa muktaḥ prasṛtaḥ kṣudhā |
śāstrajñamabhisaṃdhāya nūnaṃ bhakṣayitādya mām || 162 ||
[Analyze grammar]

jānāmi kṣudhitaṃ hi tvāmāhārasamayaśca te |
sa tvaṃ māmabhisaṃdhāya bhakṣyaṃ mṛgayase punaḥ || 163 ||
[Analyze grammar]

yaccāpi putradāraṃ svaṃ tatsaṃnisṛjase mayi |
śuśrūṣāṃ nāma me kartuṃ sakhe mama na tatkṣamam || 164 ||
[Analyze grammar]

tvayā māṃ sahitaṃ dṛṣṭvā priyā bhāryā sutāśca ye |
kasmānmāṃ te na khādeyurhṛṣṭāḥ praṇayinastvayi || 165 ||
[Analyze grammar]

nāhaṃ tvayā sameṣyāmi vṛtto hetuḥ samāgame |
śivaṃ dhyāyasva me'trasthaḥ sukṛtaṃ smaryate yadi || 166 ||
[Analyze grammar]

śatrorannādyabhūtaḥ sankliṣṭasya kṣudhitasya ca |
bhakṣyaṃ mṛgayamāṇasya kaḥ prājño viṣayaṃ vrajet || 167 ||
[Analyze grammar]

svasti te'stu gamiṣyāmi dūrādapi tavodvije |
nāhaṃ tvayā sameṣyāmi nirvṛto bhava lomaśa || 168 ||
[Analyze grammar]

balavatsaṃnikarṣo hi na kadācitpraśasyate |
praśāntādapi me prājña bhetavyaṃ balinaḥ sadā || 169 ||
[Analyze grammar]

yadi tvarthena me kāryaṃ brūhi kiṃ karavāṇi te |
kāmaṃ sarvaṃ pradāsyāmi na tvātmānaṃ kadācana || 170 ||
[Analyze grammar]

ātmārthe saṃtatistyājyā rājyaṃ ratnaṃ dhanaṃ tathā |
api sarvasvamutsṛjya rakṣedātmānamātmanā || 171 ||
[Analyze grammar]

aiśvaryadhanaratnānāṃ pratyamitre'pi tiṣṭhatām |
dṛṣṭā hi punarāvṛttirjīvatāmiti naḥ śrutam || 172 ||
[Analyze grammar]

na tvātmanaḥ saṃpradānaṃ dhanaratnavadiṣyate |
ātmā tu sarvato rakṣyo dārairapi dhanairapi || 173 ||
[Analyze grammar]

ātmarakṣitatantrāṇāṃ suparīkṣitakāriṇām |
āpado nopapadyante puruṣāṇāṃ svadoṣajāḥ || 174 ||
[Analyze grammar]

śatrūnsamyagvijānanti durbalā ye balīyasaḥ |
teṣāṃ na cālyate buddhirātmārthaṃ kṛtaniścayā || 175 ||
[Analyze grammar]

ityabhivyaktamevāsau palitenāvabhartsitaḥ |
mārjāro vrīḍito bhūtvā mūṣakaṃ vākyamabravīt || 176 ||
[Analyze grammar]

saṃmanye'haṃ tava prajñāṃ yastvaṃ mama hite rataḥ |
uktavānarthatattvena mayā saṃbhinnadarśanaḥ || 177 ||
[Analyze grammar]

na tu māmanyathā sādho tvaṃ vijñātumihārhasi |
prāṇapradānajaṃ tvatto mama sauhṛdamāgatam || 178 ||
[Analyze grammar]

dharmajño'smi guṇajño'smi kṛtajño'smi viśeṣataḥ |
mitreṣu vatsalaścāsmi tvadvidheṣu viśeṣataḥ || 179 ||
[Analyze grammar]

tanmāmevaṃgate sādho na yāvayitumarhasi |
tvayā hi yāvyamāno'haṃ prāṇāñjahyāṃ sabāndhavaḥ || 180 ||
[Analyze grammar]

dhikśabdo hi budhairdṛṣṭo madvidheṣu manasviṣu |
maraṇaṃ dharmatattvajña na māṃ śaṅkitumarhasi || 181 ||
[Analyze grammar]

iti saṃstūyamāno hi mārjāreṇa sa mūṣakaḥ |
manasā bhāvagambhīraṃ mārjāraṃ vākyamabravīt || 182 ||
[Analyze grammar]

sādhurbhavāñśrutārtho'smi prīyate na ca viśvase |
saṃstavairvā dhanaughairvā nāhaṃ śakyaḥ punastvayā || 183 ||
[Analyze grammar]

na hyamitravaśaṃ yānti prājñā niṣkāraṇaṃ sakhe |
asminnarthe ca gāthe dve nibodhośanasā kṛte || 184 ||
[Analyze grammar]

śatrusādhāraṇe kṛtye kṛtvā saṃdhiṃ balīyasā |
samāhitaścaredyuktyā kṛtārthaśca na viśvaset || 185 ||
[Analyze grammar]

tasmātsarvāsvavasthāsu rakṣejjīvitamātmanaḥ |
dravyāṇi saṃtatiścaiva sarvaṃ bhavati jīvataḥ || 186 ||
[Analyze grammar]

saṃkṣepo nītiśāstrāṇāmaviśvāsaḥ paro mataḥ |
nṛṣu tasmādaviśvāsaḥ puṣkalaṃ hitamātmanaḥ || 187 ||
[Analyze grammar]

vadhyante na hyaviśvastāḥ śatrubhirdurbalā api |
viśvastāstvāśu vadhyante balavanto'pi durbalaiḥ || 188 ||
[Analyze grammar]

tvadvidhebhyo mayā hyātmā rakṣyo mārjāra sarvadā |
rakṣa tvamapi cātmānaṃ caṇḍālājjātikilbiṣāt || 189 ||
[Analyze grammar]

sa tasya bruvatastvevaṃ saṃtrāsājjātasādhvasaḥ |
svabilaṃ hi javenāśu mārjāraḥ prayayau tataḥ || 190 ||
[Analyze grammar]

tataḥ śāstrārthatattvajño buddhisāmarthyamātmanaḥ |
viśrāvya palitaḥ prājño bilamanyajjagāma ha || 191 ||
[Analyze grammar]

evaṃ prajñāvatā buddhyā durbalena mahābalāḥ |
ekena bahavo'mitrāḥ palitenābhisaṃdhitāḥ || 192 ||
[Analyze grammar]

ariṇāpi samarthena saṃdhiṃ kurvīta paṇḍitaḥ |
mūṣakaśca biḍālaśca muktāvanyonyasaṃśrayāt || 193 ||
[Analyze grammar]

ityeṣa kṣatradharmasya mayā mārgo'nudarśitaḥ |
vistareṇa mahīpāla saṃkṣepeṇa punaḥ śṛṇu || 194 ||
[Analyze grammar]

anyonyakṛtavairau tu cakratuḥ prītimuttamām |
anyonyamabhisaṃdhātumabhūccaiva tayormatiḥ || 195 ||
[Analyze grammar]

tatra prājño'bhisaṃdhatte samyagbuddhibalāśrayāt |
abhisaṃdhīyate prājñaḥ pramādādapi cābudhaiḥ || 196 ||
[Analyze grammar]

tasmādabhītavadbhīto viśvastavadaviśvasan |
na hyapramattaścalati calito vā vinaśyati || 197 ||
[Analyze grammar]

kālena ripuṇā saṃdhiḥ kāle mitreṇa vigrahaḥ |
kārya ityeva tattvajñāḥ prāhurnityaṃ yudhiṣṭhira || 198 ||
[Analyze grammar]

evaṃ matvā mahārāja śāstrārthamabhigamya ca |
abhiyukto'pramattaśca prāgbhayādbhītavaccaret || 199 ||
[Analyze grammar]

bhītavatsaṃvidhiḥ kāryaḥ pratisaṃdhistathaiva ca |
bhayādutpadyate buddhirapramattābhiyogajā || 200 ||
[Analyze grammar]

na bhayaṃ vidyate rājanbhītasyānāgate bhaye |
abhītasya tu visrambhātsumahajjāyate bhayam || 201 ||
[Analyze grammar]

na bhīruriti cātyantaṃ mantro'deyaḥ kathaṃcana |
avijñānāddhi vijñāte gacchedāspadadarśiṣu || 202 ||
[Analyze grammar]

tasmādabhītavadbhīto viśvastavadaviśvasan |
kāryāṇāṃ gurutāṃ buddhvā nānṛtaṃ kiṃcidācaret || 203 ||
[Analyze grammar]

evametanmayā proktamitihāsaṃ yudhiṣṭhira |
śrutvā tvaṃ suhṛdāṃ madhye yathāvatsamupācara || 204 ||
[Analyze grammar]

upalabhya matiṃ cāgryāmarimitrāntaraṃ tathā |
saṃdhivigrahakālaṃ ca mokṣopāyaṃ tathāpadi || 205 ||
[Analyze grammar]

śatrusādhāraṇe kṛtye kṛtvā saṃdhiṃ balīyasā |
samāgamaṃ caredyuktyā kṛtārtho na ca viśvaset || 206 ||
[Analyze grammar]

aviruddhāṃ trivargeṇa nītimetāṃ yudhiṣṭhira |
abhyuttiṣṭha śrutādasmādbhūyastvaṃ rañjayanprajāḥ || 207 ||
[Analyze grammar]

brāhmaṇaiścāpi te sārdhaṃ yātrā bhavatu pāṇḍava |
brāhmaṇā hi paraṃ śreyo divi ceha ca bhārata || 208 ||
[Analyze grammar]

ete dharmasya vettāraḥ kṛtajñāḥ satataṃ prabho |
pūjitāḥ śubhakarmāṇaḥ pūrvajityā narādhipa || 209 ||
[Analyze grammar]

rājyaṃ śreyaḥ paraṃ rājanyaśaḥ kīrtiṃ ca lapsyase |
kulasya saṃtatiṃ caiva yathānyāyaṃ yathākramam || 210 ||
[Analyze grammar]

dvayorimaṃ bhārata saṃdhivigrahaṃ subhāṣitaṃ buddhiviśeṣakāritam |
tathānvavekṣya kṣitipena sarvadā niṣevitavyaṃ nṛpa śatrumaṇḍale || 211 ||
[Analyze grammar]