Chapter 8.3

[English text for this chapter is available]

avidyāvinayaḥ puruṣavyasanahetuḥ || KAZ_08.3.01 ||

avinīto hi vyasanadoṣānna paśyati || KAZ_08.3.02 ||

tānupadekṣyāmaḥ || KAZ_08.3.03 ||

kopajastrivargaḥ kāmajaścaturvargaḥ || KAZ_08.3.04 ||

tayoḥ kopo garīyān || KAZ_08.3.05 ||

sarvatra hi kopaścarati || KAZ_08.3.06 ||

prāyaśaśca kopavaśā rājānaḥ prakṛtikopairhatāḥ śrūyante kāmavaśāḥ kṣayanimittamarivyādhibhiriti || KAZ_08.3.07 ||

neti bhāradvājaḥ || KAZ_08.3.08 ||

satpuruṣācāraḥ kopo vairayātanamavajñāvadho bhītamanuṣyatā ca || KAZ_08.3.09 ||

nityaśca kopena sambandhaḥ pāpapratiṣedhārthaḥ || KAZ_08.3.10 ||

kāmaḥ siddhilābhaḥ sāntvaṃ tyāgaśīlatā sampriyabhāvaśca || KAZ_08.3.11 ||

nityaśca kāmena sambandhaḥ kṛtakarmaṇaḥ phalopabhogārthaḥ iti || KAZ_08.3.12 ||

neti kauṭilyaḥ || KAZ_08.3.13 ||

dveṣyatā śatruvedanaṃ duḥkhāsaṅgaśca kopaḥ || KAZ_08.3.14 ||

paribhavo dravyanāśaḥ pāṭaccaradyūtakāralubdhakagāyanavādakaiścānarthyaiḥ samyogaḥ kāmaḥ || KAZ_08.3.15 ||

tayoḥ paribhavāddveṣyatā garīyasī || KAZ_08.3.16 ||

paribhūtaḥ svaiḥ paraiścāvagṛhyate dveṣyaḥ samucchidyata iti || KAZ_08.3.17 ||

dravyanāśācchatruvedanaṃ garīyaḥ || KAZ_08.3.18 ||

dravyanāśaḥ kośābādhakaḥ śatruvedanaṃ prāṇābādhakamiti || KAZ_08.3.19 ||

anarthyasamyogādduḥkhasamyogo garīyān || KAZ_08.3.20 ||

anarthyasamyogo muhūrtapratīkāro dīrghakleśakaro duḥkhānāmāsaṅga iti || KAZ_08.3.21 ||

tasmātkopo garīyān || KAZ_08.3.22 ||

vākpāruṣyamarthadūṣaṇaṃ daṇḍapāruṣyamiti || KAZ_08.3.23 ||

vākpāruṣyārthadūṣaṇayorvākpāruṣyaṃ garīyaḥ iti viśālākṣaḥ || KAZ_08.3.24 ||

paruṣamukto hi tejasvī tejasā pratyārohati || KAZ_08.3.25 ||

duruktaśalyaṃ hṛdi nikhātaṃ tejaḥsaṃdīpanamindriyopatāpi ca iti || KAZ_08.3.26 ||

neti kauṭilyaḥ || KAZ_08.3.27 ||

arthapūjā vāgśalyamapahanti vṛttivilopastvarthadūṣaṇam || KAZ_08.3.28 ||

adānamādānaṃ vināśaḥ parityāgo vārthasyetyarthadūṣaṇam || KAZ_08.3.29 ||

arthadūṣaṇadaṇḍapāruṣyayorarthadūṣaṇaṃ garīyaḥ iti pārāśarāḥ || KAZ_08.3.30 ||

arthamūlau dharmakāmau || KAZ_08.3.31 ||

arthapratibaddhaśca loko vartate || KAZ_08.3.32 ||

tasyopaghāto garīyāniti || KAZ_08.3.33 ||

neti kauṭilyaḥ || KAZ_08.3.34 ||

sumahatāpyarthena na kaścana śarīravināśamicchet || KAZ_08.3.35 ||

daṇḍapāruṣyācca tameva doṣamanyebhyaḥ prāpnoti || KAZ_08.3.36 ||

iti kopajastrivargaḥ || KAZ_08.3.37 ||

kāmajastu mṛgayā dyūtaṃ striyaḥ pānamiti caturvargaḥ || KAZ_08.3.38 ||

tasya mṛgayādyūtayormṛgayā garīyasī iti piśunaḥ || KAZ_08.3.39 ||

stenāmitravyāladāvapraskhalanabhayadinmohāḥ kṣutpipāse ca prāṇābādhastasyām || KAZ_08.3.40 ||

dyūte tu jitamevākṣaviduṣā yathā jayatsenaduryodhanābhyāmiti || KAZ_08.3.41 ||

nety kauṭilyaḥ || KAZ_08.3.42 ||

tayorapyanyataraparājayo'stīti nalayudhiṣṭhirābhyāṃ vyākhyātam || KAZ_08.3.43 ||

tadeva vijitadravyamāmiṣaṃ vairānubandhaśca || KAZ_08.3.44 ||

sato'rthasya vipratipattirasataścārjanamapratibhuktanāśo mūtrapurīṣadhāraṇabubhukṣādibhiśca vyādhilābha iti dyūtadoṣāḥ || KAZ_08.3.45 ||

mṛgayāyāṃ tu vyāyāmaḥ śleṣmapittamedaḥsvedanāśaścale sthite ca kāye lakṣaparicayaḥ kopabhayasthāneṣu ca mṛgāṇāṃ cittajñānamanityayānaṃ ceti || KAZ_08.3.46 ||

dyūtastrīvyasanayoḥ kaitavavyasanamiti kauṇapadantaḥ || KAZ_08.3.47 ||

sātatyena hi niśi pradīpe mātari ca mṛtāyāṃ dīvyatyeva kitavaḥ || KAZ_08.3.48 ||

kṛcchre ca pratipṛṣṭaḥ kupyati || KAZ_08.3.49 ||

strīvyasane tu snānapratikarmabhojanabhūmiṣu bhavatyeva dharmārthaparipraśnaḥ || KAZ_08.3.50 ||

śakyā ca strī rājahiteniyoktumupāṃśudaṇḍena vyādhinā vā vyāvartayitumavasrāvayituṃ vā iti || KAZ_08.3.51 ||

neti kauṭilyaḥ || KAZ_08.3.52 ||

sapratyādeyaṃ dyūtaṃ niṣpratyādeyaṃ strīvyasanam || KAZ_08.3.53 ||

adarśanaṃ kāryanirvedaḥ kālātipātanādanartho dharmalopaśca tantradaurbalyaṃ pānānubandhaśceti || KAZ_08.3.54 ||

strīpānavyasanayoḥ strīvyasanamiti vātavyādhiḥ || KAZ_08.3.55 ||

strīṣu hi bāliśyamanekavidhaṃ niśāntapraṇidhau vyākhyātam || KAZ_08.3.56 ||

pāne tu śabdādīnāmindriyārthānāmupabhogaḥ prītidānaṃ parijanapūjanaṃ karmaśramavadhaśca iti || KAZ_08.3.57 ||

neti kauṭilyaḥ || KAZ_08.3.58 ||

strīvyasane bhavatyapatyotpattirātmarakṣaṇaṃ cāntardāreṣu viparyayo vā bāhyeṣu agamyeṣu sarvocchittiḥ || KAZ_08.3.59 ||

tadubhayaṃ pānavyasane || KAZ_08.3.60 ||

pānasampatsaṃjñānāśo'nunmattasyonmattatvamapretasya pretatvaṃ kaupīnadarśanaṃ śrutaprajñāprāṇavittamitrahāniḥ sadbhirviyogo'narthyasamyogastantrīgītanaipuṇyeṣu cārthaghneṣu prasaṅga iti || KAZ_08.3.61 ||

dyūtamadyayordyūtam || KAZ_08.3.62 ||

ekeṣāṃ paṇanimitto jayaḥ parājayo vā prāṇiṣu niścetaneṣu vā pakṣadvaidhena prakṛtikopaṃ karoti || KAZ_08.3.63 ||

viśeṣataśca saṃghānāṃ saṃghadharmiṇāṃ ca rājakulānāṃ dyūtanimitto bhedastannimitto vināśa ityasatpragrahaḥ pāpiṣṭhatamo vyasanānāṃ tantradaurbalyāditi || KAZ_08.3.64 ||

asatāṃ pragrahaḥ kāmaḥ kopaścāvagrahaḥ satām || KAZ_08.3.65ab ||

vyasanaṃ doṣabāhulyādatyantamubhayaṃ matam || KAZ_08.3.65cd ||

tasmātkopaṃ ca kāmaṃ ca vyasanārambhamātmavān || KAZ_08.3.66ab ||

parityajenmūlaharaṃ vṛddhasevī jitendriyaḥ || KAZ_08.3.66cd ||