Chapter 31

[English text for this chapter is available]

nāradauvāca |
tato hṛṣṭamanāḥ so'tha dūtaṃ papraccha taṃ pathi |
saṃdehaṃ hṛdi kṛtvā tu vismayaṃ paramaṃ gataḥ |
vicārayanhṛdi svargaḥ kasya hetoḥ phalaṃ mama || 1 ||
[Analyze grammar]

vikuṃḍala uvāca |
he dūtavara pṛcchāmi saṃśayaṃ tvāmahaṃ param |
āvāṃ jātau kule tulye tulyaṃ karma tathā kṛtam || 2 ||
[Analyze grammar]

durmṛtyurapi tulyobhūttulyo dṛṣṭo yamastathā |
kathaṃ sa narake kṣiptastulyakarmmā mamāgrajaḥ || 3 ||
[Analyze grammar]

mamābhavatkathaṃ nākamiti me chiṃdhi saṃśayam |
devadūta na paśyāmi mama svargasya kāraṇam || 4 ||
[Analyze grammar]

devadūta uvāca |
mātā pitā suto jāyā svasā bhrātā vikuṃḍala |
janmahetoriyaṃ saṃjñā jaṃtoḥ karmmopabhuktaye || 5 ||
[Analyze grammar]

ekasminpādape yadvacchakunānāṃ samāgamaḥ |
yadyatsamīhitaṃ karma kurute pūrvabhāvitaḥ || 6 ||
[Analyze grammar]

tasya tasya phalaṃ bhuṃkte karmmaṇaḥ puruṣaḥ sadā |
satyaṃ vadāmi te prītyā naraiḥ karmma śubhāśubham || 7 ||
[Analyze grammar]

svakṛtaṃ bhujyate vaiśya kālekāle punaḥpunaḥ |
ekaḥ karoti karmāṇi ekastatphalamaśnute || 8 ||
[Analyze grammar]

anyo na lipyate vaiśya karmaṇānyasya kutracit |
apatannarake pāpaistavabhrātā sudāruṇaiḥ |
tvaṃ ca dharmeṇa dharmajña svargaṃ prāpnoṣi śāśvatam || 9 ||
[Analyze grammar]

vikuṃḍala uvāca |
ābālyānmama pāpeṣu na puṇyeṣu rataṃ manaḥ |
asmiñjanmani he dūta duṣkṛtaṃ hi kṛtaṃ mayā || 10 ||
[Analyze grammar]

devadūta na jānāmi sukṛtaṃ karma cātmanaḥ |
yadi jānāsi matpuṇyaṃ tanme tvaṃ kṛpayā vada || 11 ||
[Analyze grammar]

devadūta uvāca |
śṛṇu vaiśya pravakṣyāmi yattvayā puṇyamarjitam |
jānāmi tadahaṃ sarvaṃ na tvaṃ vetsi suniścitam || 12 ||
[Analyze grammar]

harimitrasuto vipraḥ sumitro vedapāragaḥ |
āsīttasyāśramaḥ puṇyo yamunā dakṣiṇetaṭe || 13 ||
[Analyze grammar]

tena sakhyaṃ vane tasmiṃstava jātaṃ viśāṃvara |
tatsaṃgena tvayā snātaṃ māghamāsadvayaṃ tathā || 14 ||
[Analyze grammar]

kāliṃdī puṇyapānīye sarvapāpahare vare |
tattīrthe lokavikhyāte nāmnā pāpapraṇāśane || 15 ||
[Analyze grammar]

ekena sarvapāpebhyo vimuktastvaṃ viśāṃpate |
dvitīyamāghapuṇyena prāptaḥ svargastvayānagha || 16 ||
[Analyze grammar]

tvaṃ tatpuṇyaprabhāveṇa modasva satataṃ divi |
narakeṣu tava bhrātā mahatīṃ pāpayātanām || 17 ||
[Analyze grammar]

chidyamāno'sipatraiśca bhidyamānastu mudgaraiḥ |
cūrṇyamānaḥ śilāpṛṣṭhe taptāṃgāreṣu bharjitaḥ || 18 ||
[Analyze grammar]

iti dūtavacaḥ śrutvā bhrātṛduḥkhena duḥkhitaḥ |
pulakāṃkita sarvāṃgo dīno'sau vinayānvitaḥ || 19 ||
[Analyze grammar]

uvāca taṃ devadūtaṃ madhuraṃ nipuṇaṃ vacaḥ |
maitrī saptapadī sādho satāṃ bhavati satphalā || 20 ||
[Analyze grammar]

mitrabhāvaṃ viciṃtya tvaṃ māmupākartumarhasi |
tato hi śrotumicchāmi sarvajñastvaṃ mato mama || 21 ||
[Analyze grammar]

yamalokaṃ na paśyaṃti karmaṇā kena mānavāḥ |
gacchaṃti nirayaṃ yena tanme tvaṃ kṛpayā vada || 22 ||
[Analyze grammar]

devadūta uvāca |
samyakpṛṣṭaṃ tvayā vaiśya naṣṭapāpo'si sāṃpratam |
viśuddhe hṛdaye puṃsāṃ buddhiḥ śreyasi jāyate || 23 ||
[Analyze grammar]

yadyapyavasaronāsti mama sevāparasya vai |
tathāpi ca tava snehātpravakṣyāmi yathāmati || 24 ||
[Analyze grammar]

karmaṇā manasā vācā sarvāvasthāsu sarvadā |
parapīḍāṃ na kurvaṃti na te yāṃti yamālayam || 25 ||
[Analyze grammar]

na vedairna ca dānaiśca na tapobhirna cādhvaraiḥ |
kathaṃcitsvargatiṃ yāṃti puruṣāḥ prāṇihiṃsakāḥ || 26 ||
[Analyze grammar]

ahiṃsā paramo dharmo hyahiṃsaiva paraṃ tapaḥ |
ahiṃsā paramaṃ dānamityāhurmunayaḥ sadā || 27 ||
[Analyze grammar]

maśakānsarīsṛpāndaṃśānyūkādyānmānavāṃstathā |
ātmaupamyena paśyaṃti mānavā ye dayālavaḥ || 28 ||
[Analyze grammar]

taptāṃgāramayaskīlaṃ mādaṃpretaraṃgiṇīm |
durgatiṃ naiva gacchaṃti kṛtāṃtasya ca te narāḥ || 29 ||
[Analyze grammar]

bhūtāni ye'tra hiṃsaṃti jalasthalacarāṇi ca |
jīvanārthaṃ ca te yāṃti kālasūtraṃ ca durgatim || 30 ||
[Analyze grammar]

śvamāṃsabhojanāstatra pūyaśoṇitapāyinaḥ |
majjaṃtaśca vasāpaṃke daṣṭāḥ kīṭairadhomukhaiḥ || 31 ||
[Analyze grammar]

parasparaṃ ca khādaṃto dhvāṃte cānyonya ghātinaḥ |
vasaṃti kalpānekāṃste rudaṃto dāruṇaṃ ravam || 32 ||
[Analyze grammar]

kṛmiyoni śataṃ gatvā sthāvarāḥ syuściraṃ tu te |
tatocchaṃti te krūrāstiryagyoni śateṣu ca || 33 ||
[Analyze grammar]

paścādbhavaṃti jātāṃdhāḥ kāṇāḥ kubjāśca paṃgavaḥ |
daridrāścāṃgahīnāśca mānuṣāḥ prāṇihiṃsakāḥ || 34 ||
[Analyze grammar]

tasmādvaiśya paratreha karmaṇā manasā girā |
lokadvayasukhaprepsurdharmajño na tadācaret || 35 ||
[Analyze grammar]

lokadvayena viṃdaṃti sukhāni prāṇihiṃsakāḥ |
yena hiṃsanti bhūtāni na te bibhyati kutracit || 36 ||
[Analyze grammar]

praviśaṃti yathā nadyaḥ samudramṛjuvakragāḥ |
sarve dharmā ahiṃsāyāṃ praviśaṃti tathā dṛḍham || 37 ||
[Analyze grammar]

sa snātaḥ sarvatīrtheṣu sarvayajñeṣu dīkṣitaḥ |
abhayaṃ yena bhūtebhyo dattamatra viṃśāṃvara || 38 ||
[Analyze grammar]

ye niyogāṃśca śāstroktāndharmādharma vimiśritān |
pālayaṃtīha ye vaiśya na te yāṃti yamālayam || 39 ||
[Analyze grammar]

brahmacārī gṛhasthaśca vānaprastho yatistathā |
svadharmaniratāḥ sarve nākapṛṣṭhe vasaṃti te || 40 ||
[Analyze grammar]

yathoktacāriṇaḥ sarve varṇāśramasamanvitāḥ |
narā jiteṃdriyā yāṃti brahmalokaṃ tu śāśvatam || 41 ||
[Analyze grammar]

iṣṭāpūrtaratā ye ca paṃcayajñaratāśca ye |
dayānvitāśca ye nityaṃ nekṣaṃte te yamālayam || 42 ||
[Analyze grammar]

iṃdriyārthanivṛttā ye samarthā vedavādinaḥ |
agnipūjāratā nityaṃ te viprāḥ svargagāminaḥ || 43 ||
[Analyze grammar]

adīnavadanāḥ śūrāḥ śatrubhiḥ pariveṣṭitāḥ |
āhaveṣu vipannā ye teṣāṃ mārgo divākaraḥ || 44 ||
[Analyze grammar]

anātha strī dvijārthe ca śaraṇāgatapālane |
prāṇāṃstyajaṃti ye vaiśya na cyavaṃti divastu te || 45 ||
[Analyze grammar]

paṃgvaṃdhabālavṛddhāṃśca rogyanāthadaridritān |
ye puṣṇaṃti sadā vaiśya te modaṃti sadā divi || 46 ||
[Analyze grammar]

gāṃ dṛṣṭvā paṃkanirmagnāṃ rogamagnaṃ dvijaṃ tathā |
uddharaṃti narā ye ca teṣāṃ loko'śvamedhinām || 47 ||
[Analyze grammar]

gogrāsaṃ ye prayacchaṃti ye śuśrūṣaṃti gāḥ sadā |
yenārohaṃti gopṛṣṭhe te svarlokanivāsinaḥ || 48 ||
[Analyze grammar]

gartamātraṃ tu ye cakruryatra gauratṛṣā bhavet |
yamalokamadṛṣṭvaiva te yāṃti svargatiṃ narāḥ || 49 ||
[Analyze grammar]

agnipūjā devapūjā gurupūjā ratāśca ye |
dvijapūjā ratā nityaṃ te viprāḥ svargagāminaḥ || 50 ||
[Analyze grammar]

vāpīkūpataḍāgādau dharmasyāṃto na vidyate |
pibaṃti svecchayā yatra jalasthala carāstadā || 51 ||
[Analyze grammar]

nityaṃ dānaparaḥ so'tra kathyate vibudhairapi |
yathāyathā ca pānīyaṃ pibaṃti prāṇino bhṛśam || 52 ||
[Analyze grammar]

tathātathā'kṣayaḥ svargo dharmabuddhyā viśāṃ vara |
prāṇināṃ jīvanaṃ vāri prāṇā vāriṇi saṃsthitāḥ || 53 ||
[Analyze grammar]

nityasnānena pūyaṃte ye'pi pātakino narāḥ |
prātaḥsnānaṃ haredvaiśya bāhmābhyaṃtarajaṃ malam || 54 ||
[Analyze grammar]

prātaḥsnānena niṣpāpo naro na nirayaṃ vrajet |
snānaṃ vinā tu yo bhuṃkte malāśī sa sadā naraḥ || 55 ||
[Analyze grammar]

asnāyī yo narastasya vimukhā pitṛdevatāḥ |
snānahīno naraḥ pāpaḥ snānahīno naro'śuciḥ || 56 ||
[Analyze grammar]

asnāyī narakaṃ bhuṃkte puṃskīṭādiṣu jāyate |
ye punaḥ srotasi snānamācaraṃtīha parvaṇi || 57 ||
[Analyze grammar]

te naiva narakaṃ yāṃti na jāyaṃte kuyoniṣu |
duḥsvapnā duṣṭaciṃtāśca vaṃdhyā bhavaṃti sarvadā || 58 ||
[Analyze grammar]

prātaḥsnānena śuddhānāṃ puruṣāṇāṃ viśāṃvara |
tilāṃśca tilapātrāṃśca tilaprasthaṃ yathāvidhi || 59 ||
[Analyze grammar]

dattvā pretapaterbhūmau na vrajaṃti narāḥ kvacit |
pṛthivīṃ kāṃcanaṃ gāṃ ca datvā dānāni ṣoḍaśa || 60 ||
[Analyze grammar]

gatvā na vinivartaṃte svargalokādvikuṃḍala |
puṇyāsu tithiṣu prājño vyatīpāte ca saṃkrame || 61 ||
[Analyze grammar]

snātvā dattvā ca yatkiṃcinnaiva majjati durgatau |
naivākrāmaṃti dātāro dāruṇaṃ rauravaṃ patham |
ihaloke na jāyaṃte kule dhanavivarjite || 62 ||
[Analyze grammar]

satyavādī sadā maunī priyavādī ca yo naraḥ |
akrodhanaḥ samācāro nātivādyanasūyakaḥ || 63 ||
[Analyze grammar]

sadā dākṣiṇyasaṃpannaḥ sadā bhūtadayānvitaḥ |
goptā ca paramarmāṇāṃ vaktā paraguṇasya ca || 64 ||
[Analyze grammar]

parasvaṃ tṛṇamātraṃ ca manasāpi na yo haret |
na paśyaṃti viśāṃśreṣṭha hyete narakayātanām || 65 ||
[Analyze grammar]

parāpavādī pākhaṃḍaḥ pāpebhyo'pi mato'dhikaḥ |
pacyate narake tāvadyāvadābhūtasaṃplavam || 66 ||
[Analyze grammar]

vaktā paruṣavākyānāṃ maṃtavyo narakāgataḥ |
saṃdeho na viśāṃśreṣṭha punaryāti ca durgatim || 67 ||
[Analyze grammar]

na tīrthairna tapobhiśca kṛtaghnasyāsti niṣkṛtiḥ |
sahate yātanāṃ ghorāṃ sa naro narake ciram || 68 ||
[Analyze grammar]

pṛthivyāṃ yāni tīrthāni teṣu majjati yo naraḥ |
jiteṃdriyo jitāhāro na sa yāti yamālayam || 69 ||
[Analyze grammar]

na tīrthe pātakaṃ kuryānna ca tīrthopajīvanam |
tīrthe pratigrahastyājyastyājyo dharmasya vikrayaḥ || 70 ||
[Analyze grammar]

durjaraṃ pātakaṃ tīrthe durjaraśca pratigrahaḥ |
tīrthe ca durjaraṃ sarvametatkinnarakaṃ vrajet || 71 ||
[Analyze grammar]

sakṛdgaṃgāṃbhasi snātaḥ pūto gāṃgeyavāriṇā |
na naro narakaṃ yāti api pātakarāśikṛt || 72 ||
[Analyze grammar]

vratadānatapo yajñāḥ pavitrāṇītarāṇi ca |
gaṃgābiṃdvabhiṣiktasya na samā iti naḥ śrutam || 73 ||
[Analyze grammar]

anyatīrthasamāṃ gaṃgāṃ yo bravīti narādhamaḥ |
sa yāti narakaṃ vaiśya dāruṇaṃ rauravaṃ mahat || 74 ||
[Analyze grammar]

dharmadravaṃ hyapāṃ bījaṃ vaikuṃṭhacaraṇacyutam |
dhṛtaṃ mūrdhni maheśena yadgāṃgamamalaṃ jalam || 75 ||
[Analyze grammar]

tadbrahmaiva na saṃdeho nirguṇaṃ prakṛteḥ param |
tena kiṃ samatāṃ gacchedapi brahmāṃḍagocare || 76 ||
[Analyze grammar]

gaṃgāgaṃgeti yo brūyādyojanānāṃ śatairapi |
naro na narakaṃ yāti kiṃ tayā sadṛśaṃ bhavet |
nānyena dahyate sadyaḥ kriyā narakadāyinī || 77 ||
[Analyze grammar]

gaṃgāṃbhasi prayatnena snātavyaṃ tena mānavaiḥ |
pratigṛha nivṛtto yaḥ pratigrahakṣamo'pi san |
sa dvijo dyotate vaiśya tārārūpaściraṃ divi || 78 ||
[Analyze grammar]

gāmuddharaṃti ye paṃkādye rakṣaṃti ca rogiṇaḥ |
mriyaṃte gogṛhe ye ca teṣāṃ nabhasi tārakāḥ |
yamalokaṃ na paśyaṃti prāṇāyāmaparāyaṇāḥ || 79 ||
[Analyze grammar]

api duṣkṛtakarmāṇastaireva hatakilbiṣāḥ |
divase divase vaiśya prāṇāyāmāstu ṣoḍaśa |
api brahmahaṇaṃ sākṣātpunaṃtyaharahaḥ kṛtāḥ || 80 ||
[Analyze grammar]

tapāṃsi yāni tapyaṃte vratāni niyamāśca ye |
gosahasrapradānaṃ ca prāṇāyāmastu tatsamaḥ || 81 ||
[Analyze grammar]

abbiṃduṃ yaḥ kuśāgreṇa māsemāse naraḥ pibet |
saṃvatsaraśataṃ sāgraṃ prāṇāyāmastu tatsamaḥ || 82 ||
[Analyze grammar]

pātakaṃ tu mahadyacca tathā kṣudropapātakam |
prāṇāyāmaiḥ kṣaṇātsarvaṃ bhasmasātkurute naraḥ || 83 ||
[Analyze grammar]

mātṛvatparadārānye manyaṃte vai narottamāḥ |
na te yāṃti naraśreṣṭha kadācidyama yātanām || 84 ||
[Analyze grammar]

manasāpi pareṣāṃ yaḥ kalatrāṇi na sevate |
saha lokadvaye nāsti tena vaiśya dharā dhṛtā || 85 ||
[Analyze grammar]

tasmāddharmmānvitaistyājyaṃ paradāropasevanam |
nayaṃti paradārāstu narakānekaviṃśatim || 86 ||
[Analyze grammar]

lobho na jāyate yeṣāṃ paradāreṣu mānase |
te yāṃti devalokaṃ tu na yamaṃ vaiśyasattama || 87 ||
[Analyze grammar]

śaśvatkrodhanidāneṣu yaḥ krodhena na jīyate |
jitasvargaḥ sa maṃtavyaḥ puruṣo'krodhano bhuvi || 88 ||
[Analyze grammar]

mātaraṃ pitaraṃ putra ārādhayati devavat |
aprāpte vārddhake kāle na yāti ca yamālayam || 89 ||
[Analyze grammar]

pituścādhikabhāvena ye'rcayaṃti guruṃ narāḥ |
bhavaṃtyatithayo loke brahmaṇaste viśāṃvara || 90 ||
[Analyze grammar]

iha caiva striyo dhanyāḥ śīlasya parirakṣaṇāt |
śīlabhaṃge ca nārīṇāṃ yamalokaḥ sudāruṇaḥ || 91 ||
[Analyze grammar]

śīlaṃ rakṣyaṃ sadā strībhirduṣṭasaṃgavivarjanāt |
śīlena hi paraḥ svargaḥ strīṇāṃ vaiśya na saṃśayaḥ || 92 ||
[Analyze grammar]

śūdrasya pākayajñena niṣiddhācaraṇena ca |
durgatirvihitā vaiśya tasya sā nārakī gatiḥ || 93 ||
[Analyze grammar]

vicārayaṃti ye śāstraṃ vedābhyāsaratāśca ye |
purāṇaṃ saṃhitāṃ ye ca śrāvayaṃti paṭhaṃti ca || 94 ||
[Analyze grammar]

vyākurvaṃti smṛtirye ca ye dharmapratibodhakāḥ |
vedāṃteṣu niṣaṇṇā ye tairiyaṃ jagatī dhṛtā || 95 ||
[Analyze grammar]

tattadabhyāsamāhātmyaiḥ sarve te hatakilbiṣāḥ |
gacchaṃti brahmaṇo lokaṃ yatra moho na vidyate || 96 ||
[Analyze grammar]

jñānamajñāya yo dadyādvedaśāstrasamudbhavam |
api vedāstamarcaṃti bhavabaṃdhavidāraṇam || 97 ||
[Analyze grammar]

śrūyatāmadbhutaṃ hyetadrahasyaṃ vaiśyasattama |
sammataṃ dharmarājasya sarvalokāmṛtapradam || 98 ||
[Analyze grammar]

na yamaṃ yamalokaṃ ca na bhūtānghoradarśanān |
paśyaṃti vaiṣṇavā nūnaṃ satyaṃ satyaṃ mayoditam || 99 ||
[Analyze grammar]

prāhāsmānyamunā bhrātā sadaiva hi punaḥpunaḥ |
bhavadbhirvaiṣṇavāstyājyā na te syurmamagocarāḥ || 100 ||
[Analyze grammar]

smaraṃti ye sakṛdbhūtāḥ prasaṃgenāpi keśavam |
te vidhvastākhilāghaughā yāṃti viṣṇoḥ paraṃ padam || 101 ||
[Analyze grammar]

durācāro duṣkṛto'pi sadācārarato'pi yaḥ |
bhavadbhiḥ sa sadā tyājyo viṣṇuṃ ca bhajate naraḥ || 102 ||
[Analyze grammar]

vaiṣṇavo yadgṛhe bhuṃkte yeṣāṃ vaiṣṇavasaṃgatiḥ |
te'pi vaḥ parivāryāḥ syustatsaṃgahatakilbiṣāḥ || 103 ||
[Analyze grammar]

itthaṃ vaiśyānuśāstyasmāndevo daṃḍadharaḥ sadā |
ato no vaiṣṇavā yāṃti rājadhānīṃ yamasya tu || 104 ||
[Analyze grammar]

viṣṇubhaktiṃ vinā nṝṇāṃ pāpiṣṭhānāṃ viśāṃ vara |
upāyo nāsti nāstyanyaḥ saṃtartuṃ narakāṃbudhim || 105 ||
[Analyze grammar]

śvapākamapi nekṣeta lokeṣṭaṃ vaiśya vaiṣṇavam |
vaiṣṇavo varṇabāhyo'pi punāti bhuvanatrayam || 106 ||
[Analyze grammar]

etāvatā lamaghanirharaṇāya puṃsāṃ saṃkīrtanaṃ bhagavato guṇakarmanāmnām |
vikruśya putra maghavānyadajāmilo'pi nārāyaṇeti mriyamāṇa iyāya muktim || 107 ||
[Analyze grammar]

narake tu ciraṃ magnāḥ pūrve ye ca kuladvaye |
tadaiva yāṃti te svargaṃ yadārcaṃti mudā harim || 108 ||
[Analyze grammar]

viṣṇubhaktasya ye dāsā vaiṣṇavānna bhujaśca ye |
te tu kratubhujāṃ vaiśya gatiṃ yāṃti nirākulāḥ || 109 ||
[Analyze grammar]

prārtharyadvaiṣṇavasyānnaṃ prayatnena vicakṣaṇaḥ |
sarvapāpaviśuddhyarthaṃ tadabhāve jalaṃ pibet || 110 ||
[Analyze grammar]

goviṃdeti japanmaṃtraṃ kutracinmriyate yadi |
sa naro na yamaṃ paśyettaṃ ca nekṣāmahe vayam || 111 ||
[Analyze grammar]

sāṃgaṃ samudraṃ sadhyānaṃ saṛṣiḥ chaṃdadaivatam |
dīkṣayāvidhivanmaṃtraṃ japedvai dvādaśākṣaram || 112 ||
[Analyze grammar]

aṣṭākṣaraṃ ca maṃtreśaṃ ye japaṃti narottamāḥ |
tāndṛṣṭvā brahmahā śuddhyadbhrājate viṣṇuvatsvayam || 113 ||
[Analyze grammar]

śaṃkhinaścakriṇo bhūtvā brahmābhyaṃtaragāminaḥ |
vasaṃti vaiṣṇave loke viṣṇurūpeṇa te narāḥ || 114 ||
[Analyze grammar]

hṛdi sūrye jale vātha pratimā sthaṃḍilepi ca |
samabhyarcya hariṃ yāṃti narāstadvaiṣṇavaṃ padam || 115 ||
[Analyze grammar]

athavā sarvadā pūjyo vāsudevo mumukṣubhiḥ |
śālagrāme maṇau cakre vajrakīṭavinirmite || 116 ||
[Analyze grammar]

adhiṣṭhānaṃ hi tadviṣṇoḥ sarvapāpapraṇāśanam |
sarvapuṇyapradaṃ vaiśya sarveṣāmapi muktidam || 117 ||
[Analyze grammar]

yaḥ pūjayeddhariṃ cakre śālagrāmaśilodbhave |
rājasūyasahasreṇa teneṣṭaṃ prativāsare || 118 ||
[Analyze grammar]

sadāmanaṃti vedāṃtā brahmanirvāṇamacyutam |
tatprasādo bhavennṝṇāṃ śālagrāmaśilārcanāt || 119 ||
[Analyze grammar]

mahākāṣṭhasthito vahnirmakhasthāne prakāśate |
yathā tathā harirvyāpī śālagrāme prakāśate || 120 ||
[Analyze grammar]

api pāpasamācārāḥ karmmaṇyanadhikāriṇaḥ |
śālagrāmārcakā vaiśya naiva yāṃti yamālayam || 121 ||
[Analyze grammar]

na tathā ramate lakṣmyāṃ na tathā svapure hariḥ |
śālagrāmaśilācakre yathā sa ramate sadā || 122 ||
[Analyze grammar]

agnihotraṃ kṛtaṃ tena dattā pṛthvī sasāgarā |
yenārcito hariścakre śālagrāmaśilodbhave || 123 ||
[Analyze grammar]

śilā dvādaśa bho vaiśya śālagrāmaśilodbhavāḥ |
vidhivatpūjitā yena tasya puṇyaṃ vadāmi te || 124 ||
[Analyze grammar]

koṭidvādaśaliṃgaistu pūjitaiḥ svarṇapaṃkajaiḥ |
yatsyāddvādaśakāleṣu dinenaikena tadbhavet || 125 ||
[Analyze grammar]

yaḥ punaḥ pūjayedbhaktyā śālagrāmaśilā śatam |
uṣitvā sa harerloke cakravarttīha jāyate || 126 ||
[Analyze grammar]

kāmaiḥ krodhaiḥ pralobhaiśca vyāpto yatra narādhamaḥ |
so'pi yāti harerlokaṃ śālagrāmaśilārcanāt || 127 ||
[Analyze grammar]

yaḥ pūjayecca goviṃdaṃ śālagrāme mudā naraḥ |
ābhūtasaṃplavaṃ yāvanna sa pracyavate divaḥ || 128 ||
[Analyze grammar]

vinā tīrthairvinā dānairvinā yajñairvinā matim |
muktiṃ yāṃti narā vaiśya śālagrāmaśilārcanāt || 129 ||
[Analyze grammar]

narakaṃ garbhavāsaṃ ca tiryaktvaṃ kṛmiyonitām |
na yāti vaiśya pāpo'pi śālagrāmaśilārcakaḥ || 130 ||
[Analyze grammar]

dīkṣāvidhāna maṃtrajño yaścakre balimāharet |
gaṃgā godāvarī revā nadyo muktipradāśca yāḥ || 131 ||
[Analyze grammar]

nivasaṃti hitāḥ sarvāḥ śālagrāmaśilā jale |
naivedyairvividhaiḥ puṣpairdhūpadīpairvilepanaiḥ || 132 ||
[Analyze grammar]

gītavāditrastotrādyaiḥ śālagrāmaśilārcanam |
kurute mānavo yastu kalau bhaktiparāyaṇaḥ || 133 ||
[Analyze grammar]

kalpakoṭisahasrāṇi ramate sannidhau hareḥ |
liṃgaistu koṭibhirdṛṣṭairyatphalaṃ pūjitaistu taiḥ || 134 ||
[Analyze grammar]

śālagrāmaśilāyāstu hyekenāhnā hi tatphalam |
sakṛdabhyarcite liṃge śālagrāmaśilodbhave || 135 ||
[Analyze grammar]

muktiṃ prayāṃti manujā nūnaṃ sāṃkhyena varjitāḥ |
śālagrāmaśilārūpī yatra tiṣṭhati keśavaḥ || 136 ||
[Analyze grammar]

tatra devāḥ surā yakṣā bhuvanāni caturdaśa |
śālagrāmaśilāyāṃ tu yaḥ śrāddhaṃ kurute naraḥ || 137 ||
[Analyze grammar]

pitarastasya tiṣṭhaṃti tṛptāḥ kalpaśataṃ divi |
ye pibaṃti narā nityaṃ śālagrāmaśilājalam || 138 ||
[Analyze grammar]

paṃcagavyasahasraistu sevitaiḥ kiṃ prayojanam |
koṭitīrthasahasraistu sevitaiḥ kiṃ prayojanam || 139 ||
[Analyze grammar]

toyaṃ yadi pibetpuṇyaṃ śālagrāmaśilāṃgajam |
śālagrāma śilā yatra tattīrthaṃ yojanatrayam || 140 ||
[Analyze grammar]

tatra dānaṃ ca homaṃ ca sarvaṃ koṭiguṇaṃ bhavet |
śālagrāmaśilā toyaṃ yaḥ pibedbiṃdunā samam || 141 ||
[Analyze grammar]

mātṛstanyaṃ punarnaiva sa pibedviṣṇubhāṅnaraḥ |
śālagrāma samīpe tu krośamātraṃ samaṃtataḥ || 142 ||
[Analyze grammar]

kīṭakopi mṛto yāti vaikuṃṭhaṃ bhavanaṃ param |
śālagrāmaśilācakraṃ yo dadyāddānamuttamam || 143 ||
[Analyze grammar]

bhūcakraṃ tena dattaṃ syātsaśailavanakānanam |
śālagrāmaśilāyā yo mūlyamutpādayennaraḥ || 144 ||
[Analyze grammar]

vikretā cānumaṃtā yaḥ parīkṣāsu ca modate |
te sarve narakaṃ yāṃti yāvadābhūtasaṃplavam || 145 ||
[Analyze grammar]

tataḥ saṃvarjayedvaiśya cakrasya krayavikrayam |
bahunoktena kiṃ vaiśya kartavyaṃ pāpabhīruṇā || 146 ||
[Analyze grammar]

smaraṇaṃ vāsudevasya sarvapāpaharaṃ hareḥ |
tapastaptvā naro ghoramaraṇye niyateṃdriyaḥ || 147 ||
[Analyze grammar]

yatphalaṃ samavāpnoti tannatvā garuḍadhvajam |
kṛtvāpi bahuśaḥ pāpaṃ naro mohasamanvitaḥ || 148 ||
[Analyze grammar]

na yāti narakaṃ gatvā sarvapāpaharaṃ harim |
pṛthivyāṃ yāni tīrthāni puṇyānyāyatanāni ca || 149 ||
[Analyze grammar]

tāni sarvāṇyavāpnoti viṣṇornāmānukīrtanāt |
devaṃ śārṅgadharaṃ viṣṇuṃ ye prapannāḥ parāyaṇāḥ || 150 ||
[Analyze grammar]

na teṣāṃ yamasālokyaṃ na te syurnarakaukasaḥ |
vaiṣṇavaḥ puruṣo vaiśya śivaniṃdāṃ karoti yaḥ || 151 ||
[Analyze grammar]

na viṃdedvaiṣṇavaṃ lokaṃ sa yāti narakaṃ mahat |
upoṣyaikādaśīmekāṃ prasaṃgenāpi mānavaḥ || 152 ||
[Analyze grammar]

na yāti yātanāṃ yāmīmiti lomaśataḥ śrutam |
nedṛśaṃ pāvanaṃ kiṃcittriṣu lokeṣu vidyate || 153 ||
[Analyze grammar]

ubhayaṃ padmanābhasya dinaṃ pātakanāśanam |
tāvatpāpāni dehe'sminvasaṃtīha viśāṃvara || 154 ||
[Analyze grammar]

yāvannopavasejjaṃtuḥ padmanābhadinaṃ śubham |
aśvamedhasahasrāṇi rājasūyaśatāni ca || 155 ||
[Analyze grammar]

ekādaśyupavāsasya kalāṃ nārhaṃti ṣoḍaśīm |
ekādaśeṃdriyaiḥ pāpaṃ yatkṛtaṃ vaiśya mānavaiḥ || 156 ||
[Analyze grammar]

ekādaśyupavāsena tatsarvaṃ vilayaṃ vrajet |
ekādaśīsamaṃ kiṃcitpuṇyaṃ loke na vidyate || 157 ||
[Analyze grammar]

vyājenāpi kṛtā yaistu vaśaṃ yāṃti na bhāskareḥ |
svargamokṣapradā hyeṣā śarīrārogyadāyinī || 158 ||
[Analyze grammar]

sukalatrapradā hyeṣā jīvatputrapradāyinī |
na gaṃgā na gayā vaiśya na kāśī na ca puṣkaram || 159 ||
[Analyze grammar]

na cāpi vaiṣṇavaṃ kṣetraṃ tulyaṃ haridinena tu |
yamunā candrabhāgā na tulyā haridinena tu || 160 ||
[Analyze grammar]

anāyāsena yenātra prāpyate vaiṣṇavaṃ padam |
rātrau jāgaraṇaṃ kṛtvā samupoṣya harerdine || 161 ||
[Analyze grammar]

daśa vai paitṛke pakṣe mātṛke daśa pūrvajāḥ |
priyāyā daśa ye vaiśya tānuddharati niścitam || 162 ||
[Analyze grammar]

dvaṃdvasaṃga parityaktā nāgāri kṛtaketanāḥ |
sragviṇaḥ pītavasanāḥ prayāṃti harimaṃdiram || 163 ||
[Analyze grammar]

bālatve yauvane vāpi vārddhake vā viśāṃvara |
upoṣyaikādaśīṃ nūnaṃ naiti pāpo'tidurgatim || 164 ||
[Analyze grammar]

upoṣyeha trirātrāṇi kṛtvā vā tīrthamajjanam |
datvā hematilāngāśca svargaṃ yāṃtīha mānavāḥ || 165 ||
[Analyze grammar]

tīrthe snāṃti na ye vaiśya na dattaṃ kāṃcanaṃ ca yaiḥ |
naiva taptaṃ tapaḥ kiṃcitte syuḥ sarvatra duḥkhitāḥ || 166 ||
[Analyze grammar]

saṃkṣipya kathitaṃ dharmmaṃ narakasya nirūpaṇam |
adrohaḥ sarvabhūteṣu vāṅmanaḥ kāya karmabhiḥ || 167 ||
[Analyze grammar]

iṃdriyāṇāṃ nirodhaśca dānaṃ ca harisevanam |
varṇāśramakriyāṇāṃ ca pālanaṃ vidhitaḥ sadā || 168 ||
[Analyze grammar]

svargārthī sarvadā vaiśya tapodānaṃ na kīrtayet |
yathāśakti tathā dadyādātmano hitakāmyayā || 169 ||
[Analyze grammar]

upānadvastramannāni patraṃ mūlaṃ phalaṃ jalam |
avaṃdhyaṃ divasaṃ kāryyaṃ daridreṇāpi vaiśyaka || 170 ||
[Analyze grammar]

ihaloke pare caiva na dattaṃ nopatiṣṭhate |
dātāro naiva paśyaṃti tāṃ tāṃ vai yamayātanām || 171 ||
[Analyze grammar]

dīrghāyuṣo dhanāḍhyāśca bhavaṃtīha punaḥpunaḥ |
kimatra bahunoktena yāṃtyadharmeṇa durgatim || 172 ||
[Analyze grammar]

ārohaṃti divaṃ dharmme narāḥ sarvatra sarvadā || 173 ||
[Analyze grammar]

tena bālatvamārabhya kartavyo dharmasaṃgrahaḥ |
iti te kathitaṃ sarvaṃ kimanyacchrotumicchasi || 174 ||
[Analyze grammar]

vikuṃḍala uvāca |
śrutvā tvadvacanaṃ saumya prasannaṃ cittameva me |
gaṃgodaṃ pāpahaṃ sadyaḥ pāpahāri satāṃ vacaḥ || 175 ||
[Analyze grammar]

upakartuṃ priyaṃ vaktuṃ guṇo naisargikaḥ satām |
śītāṃśuḥ kriyate kena śītalo'mṛtamaṃḍalaḥ || 176 ||
[Analyze grammar]

devadūta tato brūhi kāruṇyānmama pṛcchataḥ |
narakānniṣkṛtiḥ sadyo bhrāturme jāyate katham || 177 ||
[Analyze grammar]

iti tasya vacaḥ śrutvā devadūto jagāda ha |
dhyānaṃ dṛṣṭvā kṣaṇaṃ dhyātvā tanmaitrī rajjubandhanaḥ || 178 ||
[Analyze grammar]

yatte vaiśyāṣṭame puṇyaṃ tvayā janmani saṃcitam |
tadbhrātre dīyatāṃ sarvaṃ svargaṃ tasya yadīcchasi || 179 ||
[Analyze grammar]

vikuṃḍala uvāca |
kiṃ tatpuṇyaṃ kathaṃ jātaṃ kiṃ janma ca purātanam |
tatsarvaṃ kathyatāṃ dūta tato dāsyāmi satvaram || 180 ||
[Analyze grammar]

devadūta uvāca |
śṛṇu vaiśya pravakṣyāmi tatpuṇyaṃ ca sahetukam |
purā madhuvane puṇye ṛṣirāsīcca śākuniḥ || 181 ||
[Analyze grammar]

tapo'dhyayana saṃpannastejasāṃ brahmaṇā samaḥ |
jajñire tasya revatyāṃ nava putrā grahā iva || 182 ||
[Analyze grammar]

dhruvaḥ śīlo budhastāro jyotiṣmānuta paṃcamaḥ |
agnihotraratā hyete gṛhadharmeṣu remire || 183 ||
[Analyze grammar]

nirmoho jitakāmaśca dhyānakośo guṇādhikaḥ |
ete gṛhaviraktāśca catvāro dvijasūnavaḥ || 184 ||
[Analyze grammar]

caturthāśramamāpannāḥ sarvakāmavinispṛhāḥ |
grāmaikavāsinaḥ sarve niḥsaṃgā niṣparigrahāḥ || 185 ||
[Analyze grammar]

nirāśā niṣprayatnāśca sama loṣṭāśmakāṃcanāḥ |
yenakenacidācchannā yenakenacidāśitāḥ || 186 ||
[Analyze grammar]

sāyaṃgrahāstathā nityaṃ viṣṇudhyānaparāyaṇāḥ |
jitanidrā jitāhārā vātaśītasahiṣṇavaḥ || 187 ||
[Analyze grammar]

paśyaṃto viṣṇurūpeṇa jagatsarvaṃ carācaram |
caraṃti līlayā pṛthvadyaṃte'nyonyaṃ maunamāsthitāḥ || 188 ||
[Analyze grammar]

na kurvaṃti kriyāṃ kāṃcidarthamātraṃ hi yoginaḥ |
dṛṣṭajñānā asaṃdehāścidvikāra viśāradāḥ || 189 ||
[Analyze grammar]

evaṃ te tava viprasya pūrvamaṣṭamajanmani |
tiṣṭhato madhyadeśeṣu putradārakuṭuṃbinaḥ || 190 ||
[Analyze grammar]

gehaṃ tāvakamājagmurmadhyāhne kṣutpipāsitāḥ |
vaiśvadevāṃtare kāle tvayā dṛṣṭā gṛhāṃgaṇe || 191 ||
[Analyze grammar]

sagadgadaṃ sāśrunetraṃ saharṣaṃ ca sasaṃbhramam |
daṃḍavatpraṇipātena bahumānapuraḥsaram || 192 ||
[Analyze grammar]

praṇamya caraṇau mūrdhnā kṛtvā pāṇiyugāñjalim |
tadābhinanditāḥ sarve tayā sūnṛtayā girā || 193 ||
[Analyze grammar]

adya me saphalaṃ janma jīvitaṃ saphalaṃ tathā |
adya viṣṇuḥ prasanno me sanātho'dyāsmi pāvanaḥ || 194 ||
[Analyze grammar]

dhanyo'smyadya gṛhaṃ dhanyaṃ dhanyā adya kuṭuṃbinaḥ |
mamādya pitaro dhanyā dhanyā gāvaḥ śrutaṃ dhanam || 195 ||
[Analyze grammar]

yaddṛṣṭau bhavatāṃ pādau tāpatrayaharau mayā |
bhavatāṃ darśanaṃ yasmāddhanyasyaiva hareriva || 196 ||
[Analyze grammar]

evaṃ saṃpūjya kṛtvā tu pādaprakṣālanaṃ tathā |
dhṛtaṃ mūrdhni viśāṃśreṣṭha śraddhayā parayā tadā || 197 ||
[Analyze grammar]

yatra pādodakaṃ vaiśya śraddhayā śirasā dhṛtam |
gaṃdhapuṣpākṣatairdhūpairdīpairbhāvapuraḥsaram || 198 ||
[Analyze grammar]

saṃpūjya suṃdarānnena bhojitā yatayastathā |
tṛptāḥ paramahaṃsāste viśrāṃtā maṃdire niśi || 199 ||
[Analyze grammar]

dhyāyaṃtaśca paraṃ brahma yajjyotirjyotiṣāṃ matam |
teṣāmātithyajaṃ puṇyaṃ jātaṃ yatte viśāṃvara || 200 ||
[Analyze grammar]

na tadvaktrasahasreṇa vaktuṃ śaknomyahaṃ khalu |
bhūtānāṃ prāṇinaḥ śreṣṭhāḥ prāṇināṃ matijīvinaḥ || 201 ||
[Analyze grammar]

matimatsu surāḥ śreṣṭhā nareṣu brahmajātayaḥ |
brāhmaṇeṣu ca vidvāṃso vidvatsu kṛtabuddhayaḥ || 202 ||
[Analyze grammar]

kṛtabuddhiṣu kartāraḥ kartṛṣu brahmavedinaḥ |
ataeva supūjyāste tasmācchreṣṭhā jagattraye || 203 ||
[Analyze grammar]

tatsaṃgatirviśāṃśreṣṭha mahāpātakanāśinī |
viśrāṃtā gṛhiṇo gehe saṃtuṣṭā brahmavedinaḥ || 204 ||
[Analyze grammar]

ājanmasaṃcitaṃ pāpaṃ nāśayaṃtīkṣaṇena vai |
saṃcitaṃ yadgṛhasthasya pāpamāmaraṇāṃtikam || 205 ||
[Analyze grammar]

vinirdahati tatsarvamekarātroṣito yatiḥ |
svabhrātre dehi tatpuṇyaṃ narakādyena mucyate || 206 ||
[Analyze grammar]

iti dūtavacaḥ śrutvā dadau puṇyaṃ sa satvaram |
hṛṣṭena cetasā bhrātā nirayātso'pi nirgataḥ || 207 ||
[Analyze grammar]

devaistu puṣpavarṣeṇa pūjitau ca divaṃgatau |
tābhyāṃ saṃpūjitaḥ samyaggato dūto yathāgataḥ || 208 ||
[Analyze grammar]

akhilabhuvanabodhaṃ devadūtasyavākyaṃ nigamavacanatulyaṃ vaiśyaputro niśamya |
svakṛtasukṛtadānādbhrātaraṃ tārayitvā surapativaralokaṃ tena sārddhaṃ jagāma || 209 ||
[Analyze grammar]

itihāsamimaṃ rājanyaḥ paṭhecchṛṇuyādapi |
sa gosahasradānasya viśoko labhate phalam || 210 ||
[Analyze grammar]

iti śrīpādme mahāpurāṇe svargakhaṃḍe ekatriṃśo'dhyāyaḥ || 31 ||
[Analyze grammar]