Chapter 10

daśamo'dhyāyaḥ - 10
śakraḥ---
kṣīrodamathanāyāsaphalarūpe madhudviṣaḥ|
namaścandrasahodaryai namaste'mṛtayonaye || 1 ||
bhāvottarāḥ prakārāste śrutāstvadvaktrapaṅkajāt|
idānīṃ śrotumicchāmi prakārān bhavaduttarān || 2 ||
vaiṣṇavā avatārāste kiṃrūpāḥ {1}kati vāmbuje|
etatpṛṣṭā mayā brūhi namaste paṅkajāsane || 3 ||
{1. kathitā budhaiḥ E. }
śrīḥ---
{2}hanta te śakra vakṣyāmi prakārān bhavaduttarān|
vaiṣṇavā avatārāste yāvanto yadvidhāśca te || 4 ||
{2. ahaṃ te B. C. }
ṣāḍ‌guṇyamamalaṃ brahma nirdoṣamajaraṃ dhruvam|
sarvaśakti nirātaṅkaṃ nirālambanabhāvanam || 5 ||
tadunmiṣati vaipūrvaṃ śaktimacchaktibhāvataḥ|
nārāyaṇaḥ paro devaḥ saṃsthitaḥ śaktimattayā || 6 ||
sthirā śaktirahaṃ tasya sarvakāryakarī vibhoḥ|
tāvāvāṃ jagato'rthāya bahudhā vikriyāvahe || 7 ||
yathāhamāsthitā bhedaistathā te kathitaṃ purā|
vikārānavikārasya viṣṇoḥ śrṛṇu mayoditān || 8 ||
aprākṛtānanaupamyānacintayamahimojjvalān|
svāṃ śaktiṃ māmadhiṣṭhāya prakṛtiṃ paramādbhutām || 9 ||
trairūpyeṇa jagannāthaḥ samudeti jagaddhite|
ādyena pararūpeṇa vyūharūpeṇa cāpyatha || 10 ||
tathā vibhavarūpeṇa nānābhāvamupeyuṣā|
vyāpako bhagavān devo bhaktānugrahakāmyayā || 11 ||
anaupamyamanirdaśyaṃ {3}vapuḥ sa bhajate param|
viśvāpyāyanakaṃ{4} kāntyā pūrṇendvayutatulyayā || 12 ||
{3. punaḥ A. B. G. I. }
{4. karaṃ E.I. }
varadābhayahastaṃ ca dvibhujaṃ padmalocanam|
rekhāmayena cakreṇa śaṅkhena ca karadvaye || 13 ||
aṅkitaṃ nirvikārāṅ‌ghristhitaṃ paramaśobhanam|
anyūnānatiriktaiḥ svairguṇaiḥ ṣaḍ‌bhiralaṃkṛtam || 14 ||
samaṃ samavibhaktāṅnaṃ sarvāvayavasundaram|
pūrṇamābharaṇaiḥ śubhraiḥ sudhākallolasaṃkulaiḥ || 15 ||
raśmibhūtairamūrtaiḥ svairacyutādyairavicyutam|
ekā mūrtiriyaṃ divyā parākhyā vaiṣṇavī parā || 16 ||
yogasiddhā bhajantyenāṃ hṛdi turyapadāśritām{5}|
atha vyūhasbarūpaṃ te dvitīyaṃ varṇayāmyaham || 17 ||
{5. śrayām E. F. }
vyūhyātmānaṃ caturdhā svaṃ devaḥ prāgādibhedataḥ{6}|
vāsudevādibhedena {7}sauṣuptādhvani tiṣṭhati || 18 ||
{6. bhedinaḥ A. }
{7. suṣuptyadhvani B.; suṣuptātmani E. }
{8}saṃsthānamādimūrtervai sarveṣāṃ tu samaṃ smṛtam|
ṣaḍ‌guṇaṃ prathamaṃ rūpaṃ dvandvairjñānādisaṃbhavaiḥ || 19 ||
{8. sṛṣṭyādisaṃsthā mūrtirvai A. B. C. }
itarāṇi svarūpāṇi kathitāni mayā purā{9}|
vahnyarkendusahasrābhamānandāspandalakṣaṇam{10} || 20 ||
{9. punaḥ E. }
{10. ānandaspandalakṣaṇam E. F. }
bījaṃ sarvakriyāṇāṃ tadvikalpānāṃ tadāspadam|
sauṣuptaṃ cāturātmyaṃ tatprathamaṃ viddhi vāsava || 21 ||
atha svāpre pade'pyevaṃ vibhajyātmānamātmanā|
devaḥ prāgādibhedena vāsudevādirūpataḥ || 22 ||
samāsavyāsabhedena guṇaānāṃ puruṣottamaḥ|
sitaraktasuvarṇābhrasadṛśaiḥ paramādbhutaiḥ || 23 ||
ādimūtisamai{11} rūpaiścaturdhā {12}vyavatiṣṭhate|
kaivalyabhogaphaladaṃ bhavabījakṣayaṃkaram || 24 ||
{11. samo B. }
{12. hyava A. B. C. F. }
cāturātmyaṃ dvitīyaṃ tat sudhāsaṃdohasundaram|
atha jāgratpade devaḥ sitaraktādibhedataḥ{13} || 25 ||
{13. bheditaiḥ G. }
caturbhujairudārāṅgaiḥ śaṅkhacakrādicihnitaiḥ|
nānādhvajavicitrāṅgairvāsudevādisaṃjñitaiḥ || 26 ||
vyūhaiḥ {14}svaṃ pravibhajyāste vibhurnāma svalīlayā|
tatrādyaṃ bhagavadrūpaṃ himakundendukāntimat || 27 ||
{14. svayaṃ vibhajya E. I. }
caturbhujaṃ saumyavaktraṃ puṇḍarīkanibhekṣaṇam|
pītakauśeyavasanaṃ suparṇadhvajabhūṣitam || 28 ||
mukyadakṣiṇahastena bhītānāmabhayapradam|
tathāvidhena vāmena dadhānaṃ śaṅkhamuttamam || 29 ||
apareṇa dadhānaṃ ca dakṣiṇena sudarśanam|
vāmena ca gadāṃ gurvīṃ niṣaṇṇāṃ vasudhātale || 30 ||
saṃcintayet puro bhāge vāsudevamitīdṛśam|
sindūraśikharākāraṃ saumyavaktraṃ caturbhujam || 31 ||
atasīpuṣpasaṃkāśavasanaṃ tālalāñchitam{15}|
mukhyena pāṇiyugmena tulyamādyasya vai vibhoḥ || 32 ||
{15. lāñchanam F. }
sīraṃ taccakrahaste'sya musalaṃ tu {16}gadākare|
dakṣiṇe cindayedbhāge saṃkarṣaṇamitīdṛśam || 33 ||
{16. gadāṃ E. }
prāvṛṇniśāsamuditakhadyotanicayaprabham|
raktakauśeyavasanaṃ makaradhvajaśobhitam || 34 ||
saumyavaktraṃ caturbāhuṃ tṛtīyaṃ parameśvaram|
mukhyahastadvayaṃ cāsya prāgvattulyaṃ mahāmate || 35 ||
vāme'parasmin śārṅgaṃ ca dakṣiṇe bāṇapañcakam|
apare cintayedbhāge pradyumnamiti kīrtitam || 36 ||
añjanādripratīkāśaṃ {17}supītāmbaraveṣṭitam|
caturbhujaṃ viśālākṣaṃ mṛgalāñchanabhūṣitam || 37 ||
{17. susitāmbara B. E. I. }
ādivat pāṇiyugalamādyamasya{18} vicintayet|
dakṣiṇādikrameṇātha dvābhyāṃ vai khaḍ‌gakheṭakau || 38 ||
{18. ādyaṃ tasya F. }
dadhānamaniruddhaṃ tu saumyabhāge vicintayet|
vanamālādharāḥ sarve śrīvatsakṛtalakṣaṇāḥ{19} || 39 ||
{19. lāñchanāḥ E. }
śobhitāḥ kaustubhenaiva ratnarājena vakṣasi|
jāgratpade sthitaṃ devaṃ cāturātmyamanuttamam || 40 ||
sthityutpattipralayakṛtsarvopakaraṇānvitam|
divyaṃ taccintayedyasya{20} viśvaṃ tiṣṭhati śāsane || 41 ||
{20. cintayettasya A. B. }
trividhaṃ cāturātmyaṃ tu suṣuptyādipadatrike|
suvyaktaṃ tatpade turye guṇalakṣyaṃ paraṃ sthitam || 42 ||
jñānakriyādibhirviṣṇorlokānanusisṛkṣataḥ|
vyūhasaṃjñamidaṃ rūpaṃ dvitīyaṃ kathitaṃ mayā || 43 ||
tṛtīyaṃ vibhavākhyaṃ tu{21} viśvamandiramadhyagam|
nānākārakriyākartṛ rūpaṃ viṣṇorniśāmaya || 44 ||
{21. taṃ F. }
iti {22}śrīpāñcarātrasāre lakṣmītantre paravyūhaprakāśo nāma daśamo'dhyāyaḥ
{22. śrīpañcarātra A.; śrīpañcarātre B. E. }
********iti daśamo'dhyāyaḥ********