Chapter 41

[English text for this chapter is available]

pulastya uvāca |
ādityā vasavo rudrā aśvinau ca mahābalau |
sabalāḥ sānugāścaiva saṃnahyanta yathākramam || 1 ||
[Analyze grammar]

puruhūtaśca purato lokapālaḥ sahasradṛk |
grāmaṇīḥ sarvadevānāmāruroha varadvipam || 2 ||
[Analyze grammar]

savye cāsya rathaḥ pārśve pakṣipravaraketanaḥ |
surārucakracaraṇo haimacchatrapariṣkṛtaḥ || 3 ||
[Analyze grammar]

devagaṃdharvayakṣaughairanuyātaḥ sahasraśaḥ |
dīptimadbhiśca svargasthairbrahmarṣibhirabhiṣṭutaḥ || 4 ||
[Analyze grammar]

vajravisphāritodbhūtairvidyudiṃdrāyudhaprabhaiḥ |
yuktaṃ balāhakagaṇaiḥ parvatairiva kāmagaiḥ || 5 ||
[Analyze grammar]

yamārūḍhaḥ sa bhagavānparyeti sakalaṃ jagat |
havirdāneṣu gāyaṃti viprā makhamukhesthitāḥ || 6 ||
[Analyze grammar]

svargasaṃgrāmayāteṣu devatūryaninādiṣu |
seṃdraṃ tamupanṛtyaṃti śataśo hyapsarogaṇāḥ || 7 ||
[Analyze grammar]

ketunā nāgarājena rājamāno yathā raviḥ |
yukto hayasahasreṇa manomārutaraṃhasā || 8 ||
[Analyze grammar]

samyagrathavaro bhāti yukto mātalinā tadā |
kṛtsnaḥ parivṛto merurbhāskarasyeva tejasā || 9 ||
[Analyze grammar]

yamastu daṃḍamudyamya kālayuktaṃ ca mudgaraṃ |
tasthau suragaṇānīke daityānāṃ caiva darśayan || 10 ||
[Analyze grammar]

caturbhiḥ sāgarairyukto lelihānaiśca pannagaiḥ |
śaṃkhamuktāṃgadadharo bibhrattoyamayaṃ vapuḥ || 11 ||
[Analyze grammar]

kālapāśānsamāvidhya hayaiḥ śaśikaropamaiḥ |
vāyvīritajalākāraiḥ kurvanlīlāḥ sahasraśaḥ || 12 ||
[Analyze grammar]

pāṃḍuroddhūtavasanaḥ pravālarucirāṃgadaḥ |
maṇiśyāmottamavapurhārakeṇārcitodaraḥ || 13 ||
[Analyze grammar]

varuṇaḥ pāśadhṛṅmadhye devānīkasya tasthivān |
yuddhavelāmabhilaṣanbhinnavela ivārṇavaḥ || 14 ||
[Analyze grammar]

yakṣarākṣasasainyena guhyakānāṃ gaṇairapi |
yuktaśca śaṃkhapadmābhyāṃ nidhīnāmadhipaḥ prabhuḥ || 15 ||
[Analyze grammar]

rājarājeśvaraḥśrīmāngadāpāṇiradṛśyata |
vimānayodhī dhanado vimāne puṣpake sthitaḥ || 16 ||
[Analyze grammar]

sa rājarājaḥ śuśubhe yakṣeśo naravāhanaḥ |
pūrvapakṣe sahasrākṣaḥ pitṛrājaśca dakṣiṇe || 17 ||
[Analyze grammar]

varuṇaḥ paścime pakṣa uttare naravāhanaḥ |
catuḥpakṣāśca cattvāro lokapālā mahābalāḥ || 18 ||
[Analyze grammar]

ātmadikṣucaraṃtaścatasyadevabalasyate |
sūryaḥ saptāśvayuktena rathenānilagāminā || 19 ||
[Analyze grammar]

śriyā jājvalyamānena dīpyamānaiśca raśmibhiḥ |
udayāstamayau cakre meruparyantagāminā || 20 ||
[Analyze grammar]

tridiva dvāracakreṇa tapasā lokamavyayam |
sahasraraśmiyuktena bhrājamānena tejasā || 21 ||
[Analyze grammar]

cacāra madhye devānāṃ dvādaśātmā divākaraḥ |
somaḥ śvetahayo bhāti syaṃdane śītaraśmimān || 22 ||
[Analyze grammar]

himatoyaprapūrṇābhirbhābhirāhlādayañjagat |
tamṛkṣayogānugataṃ śiśirāṃśuṃ dvijeśvaram || 23 ||
[Analyze grammar]

śaśacchāyāṃkitatanuṃ naiśasya tamasaḥ kṣayam |
jyotiṣāmīśvaraṃ vyomni rasadaṃ prabhumavyayam || 24 ||
[Analyze grammar]

oṣadhīnāṃ pavitrāṇāṃ nidhānamamṛtasya ca |
jagataḥ paramaṃ bhāgaṃ saumyaṃ sarvamayaṃ rasam || 25 ||
[Analyze grammar]

dadṛśurdānavāḥ somaṃ himapraharaṇaṃ sthitam |
yaḥ prāṇaḥ sarvabhūtānāṃ paṃcadhā bhidyate nṛṣu || 26 ||
[Analyze grammar]

saptaskaṃdhagato lokāṃstrīndadhāra cakāra ca |
yamāhuragnikarttāraṃ sarvaprabhavamīśvaram || 27 ||
[Analyze grammar]

saptasvaragatā yasya yonirgīrbhirudīryate |
yaṃ vadaṃti calaṃ bhūtaṃ yaṃ vadaṃtyaśarīriṇam || 28 ||
[Analyze grammar]

yamāhurākāśagamaṃ śīghragaṃ śabdayonijam |
sa vāyuḥ sarvabhūtāyuruddhataḥ svena tejasā || 29 ||
[Analyze grammar]

vavau pravyathayandaityānpratilomaṃ satoyadaḥ |
māruto devagaṃdharvairvidyādharagaṇaiḥ saha || 30 ||
[Analyze grammar]

cikrīḍa raśmibhiśśubhrairnirmuktairiva pannagaiḥ |
sṛjaṃtaḥ sarpapatayastīvraṃ roṣamayaṃ viṣam || 31 ||
[Analyze grammar]

śarabhūtā vilagnāśca cerurvyāttānanā divi |
parvatāśca śilāśṛṃgaiḥ śataśākhaiśca pādapaiḥ || 32 ||
[Analyze grammar]

upatasthuḥ suragaṇānprahartuṃ dānavaṃ balam |
yaḥ sa devo hṛṣīkeśaḥ padmanābhastrivikramaḥ || 33 ||
[Analyze grammar]

yugāṃte kṛṣṇavartmā ca viśvasya jagataḥ prabhuḥ |
sarvayoniḥ samadhuhā havyabhukkratusaṃsthitaḥ || 34 ||
[Analyze grammar]

bhūmyambuvyomabhūtātmā śyāmaḥ śāṃtikarorihā |
avighnamamarādīnāṃ cakre cakragadādharaḥ || 35 ||
[Analyze grammar]

savyenālabhya mahatīṃ sarvāyudhavināśinīṃ |
kareṇa kālīṃ vapuṣā śatrukālapradāṃ gadāṃ || 36 ||
[Analyze grammar]

śeṣairbhujaiḥ pradīptābhairbhujagāridhvajaḥ prabhuḥ |
dadhārāyudhajālāni śārṅgādīni mahābalaḥ || 37 ||
[Analyze grammar]

sa kaśyapasyātmabhavaṃ dvijaṃ bhujagabhojanam |
bhujageṃdreṇa vadane niviṣṭena virājitam || 38 ||
[Analyze grammar]

amṛtāraṃbhasaṃyuktaṃ maṃdarādrimivocchitam |
devāsuravimardeṣu bahuśo dṛṣṭavikramam || 39 ||
[Analyze grammar]

maheṃdreṇāmṛtasyārthe vajreṇa kṛtalakṣaṇam |
vicitrapatravasanaṃ dhātumaṃtamivācalam || 40 ||
[Analyze grammar]

sphītakrodhāvalaṃbena śītāṃśusamatejasā |
bhogibhogāvasaktena maṇiratnena bhāsvatā || 41 ||
[Analyze grammar]

pakṣābhyāṃ cārupatrābhyāmāvṛtaṃ divi līlayā |
yugāṃte seṃdracāpābhyāṃ toyadābhyāmivāṃbaram || 42 ||
[Analyze grammar]

nīlalohitapītābhiḥ patākābhiralaṃkṛtam |
aruṇāvarajaṃ śrīmānāruhya samare prabhuḥ || 43 ||
[Analyze grammar]

suvarṇavarṇavapuṣaṃ suparṇaṃ khecarottamam |
tamanvayuḥ suragaṇā munayaśca samāhitāḥ || 44 ||
[Analyze grammar]

gīrbhiḥ paramamaṃtrābhistuṣṭuvuśca gadādharam |
tadvaiśravaṇasaṃśliṣṭaṃ vaivasvatapuraḥsaram || 45 ||
[Analyze grammar]

vārirājaparikṣiptaṃ devarājavirājitam |
pavanābaddhanirghoṣaṃ saṃpradīpta hutāśanam || 46 ||
[Analyze grammar]

viṣṇorjiṣṇoḥ sahiṣṇośca bhrājiṣṇostejasāvṛtam |
balaṃ balavadudrikte yuddhāya samavartata || 47 ||
[Analyze grammar]

svastyastu devebhya iti bṛhaspatirabhāṣata |
svastyastu daityebhya iti uśanā vākyamādade || 48 ||
[Analyze grammar]

tābhyāṃ balābhyāṃ saṃjajñe tumulo vigrahastathā |
surāṇāmasurāṇāṃ ca parasparajayaiṣiṇām || 49 ||
[Analyze grammar]

dānavā daivataiḥ sārddhaṃ nānāpraharaṇodyamāḥ |
samīyuryudhyamānā vai parvatā iva parvataiḥ || 50 ||
[Analyze grammar]

tatsurāsurasaṃyuktaṃ yuddhamatyadbhutaṃ babhau |
dharmādharmasamāyuktaṃ darpeṇa vinayena ca || 51 ||
[Analyze grammar]

tato hayaiḥ prajavitairvāraṇaiśca pracoditaiḥ |
utpatadbhiśca gagane sāsihastaiḥ samaṃtataḥ || 52 ||
[Analyze grammar]

kṣipyamāṇaiśca musalaiḥ saṃpatadbhiśca sāyakaiḥ |
cāpairvisphāryamāṇaiśca pātyamānaiḥ sudāruṇaiḥ || 53 ||
[Analyze grammar]

tadyuddhamabhavadghoraṃ devadānavasaṃkulam |
jagatastrāsajananaṃ yugasaṃvartakopamam || 54 ||
[Analyze grammar]

svahastamuktaiḥ parighairmudgaraiścaiva parvataiḥ |
dānavāssamare jaghnurdevāniṃdrapurogamān || 55 ||
[Analyze grammar]

te vadhyamānā balibhirdānavairjitakāśibhiḥ |
viṣaṇṇavadanā devā jagmurārtiṃ parāṃ mṛdhe || 56 ||
[Analyze grammar]

te cāstraśūlamathitāḥ parighairbhinnamastakāḥ |
bhinnoraskā ditisutaiḥ sravadraktā raṇe bahu || 57 ||
[Analyze grammar]

sūditāḥ śarajālaiśca niryatnāśca śaraiḥ kṛtāḥ |
praviṣṭā dānavīṃ māyāṃ na śekuste viceṣṭitam || 58 ||
[Analyze grammar]

uttaṃbhitamivābhāti niṣprāṇa sadṛśākṛti |
balaṃ surāṇāmasurairniṣprayatnāyudhaṃ kṛtam || 59 ||
[Analyze grammar]

daityacāpacyutānghorāṃśchitvā vajreṇa tānśarān |
śakro daityabalaṃ ghoraṃ viveśa bahulocanaḥ || 60 ||
[Analyze grammar]

sa daityapramukhānsarvānhatvā daityabalaṃ mahat |
tāmasenāstrajālena tamobhūtamathākarot || 61 ||
[Analyze grammar]

te'nyonyaṃ nānvabudhyaṃta daityānāṃ vāhanāni ca |
ghoreṇa tamasāviṣṭāḥ puruhūtasya tejasā || 62 ||
[Analyze grammar]

māyāpāśairvimuktāstu yatnavaṃtaḥ surottamāḥ |
śirāṃsi daityasaṃghānāṃ tamobhūtānyapātayan || 63 ||
[Analyze grammar]

apadhvastā visaṃjñāśca tamasā nīlavarcasā |
petuste dānavāssadyaśchinnapakṣā ivādrayaḥ || 64 ||
[Analyze grammar]

tatrābhibhūtadaityaiṃdramaṃdhakāramivāṃtaraṃ |
dānavaṃ dehasadanaṃ tamobhūtamivābhavat || 65 ||
[Analyze grammar]

tathā'sṛjanmahāmāyāṃ mayastāṃ tāmasīṃ dahan |
yugāṃtodyotajananīṃ sṛṣṭā maurveṇa vahninā || 66 ||
[Analyze grammar]

sa dadāha ca tāṃ śākrīṃ māyā mayavikalpitā |
daityāścādityavapuṣā sadya uttasthurāhave || 67 ||
[Analyze grammar]

māyāṃ maurvīṃ samāsādya dahyamānā divaukasaḥ |
bhejire caṃdraviṣayaṃ śītāṃśusalilahradam || 68 ||
[Analyze grammar]

te dahyamānā aurveṇa vahninā naṣṭacetasaḥ |
śaśaṃsurvajriṇaṃ devāḥ saṃtaptāḥ śaraṇaiṣiṇaḥ || 69 ||
[Analyze grammar]

saṃtapte māyayā sainye hanyamāne ca dānavaiḥ |
codito devarājena varuṇo vākyamabravīt || 70 ||
[Analyze grammar]

purā brahmarṣijaḥ śakra tapastepe sudāruṇam |
urvaḥ sa pūrvaṃ tejasvī sadṛśo brahmaṇo guṇaiḥ || 71 ||
[Analyze grammar]

taṃ tapaṃtamivādityaṃ tapasā jagadavyayaṃ |
upatasthurmunigaṇā devā devarṣibhiḥ saha || 72 ||
[Analyze grammar]

hiraṇyakaśipuścaiva dānavo dānaveśvaraḥ |
ṝṣiṃ vijñāpayāmāsa purā paramatejasam || 73 ||
[Analyze grammar]

ūcurbrahmarṣayaste tu vacanaṃ dharmasaṃhitam |
ṝṣivaṃśeṣu bhagavaṃśchinnamūlamidaṃ kulaṃ || 74 ||
[Analyze grammar]

ekastvamanapatyaśca gotrā yā'nyo na vidyate |
kaumāraṃ vratamāsthāya kleśamevānuvartase || 75 ||
[Analyze grammar]

bahūni vipragotrāṇi munīnāṃ bhāvitātmanām |
ekadehāni tiṣṭhaṃti viviktāni vinā prajāḥ || 76 ||
[Analyze grammar]

evaṃbhūteṣu sarveṣu putrairme nāsti kāraṇam |
bhavāṃśca tāpasaśreṣṭhaḥ prajāpati samadyutiḥ || 77 ||
[Analyze grammar]

tatpravartasva vaṃśāya vardhayātmānamātmanā |
samādhatsvorjitaṃ tejo dvitīyāṃ kuru vai tanuṃ || 78 ||
[Analyze grammar]

sa evamukto munibhirmunirmanasi tāḍitaḥ |
jagarha tānṛṣigaṇānvacanaṃ cedamabravīt || 79 ||
[Analyze grammar]

yathā hi vihito dharmo munīnāṃ śāśvataḥ purā |
ārṣaṃ hi kevalaṃ karma vanyamūlaphalāśinaḥ || 80 ||
[Analyze grammar]

brahmayonau prasūtasya brāhmaṇasyātmavartinaḥ |
brahmacaryaṃ sucaritaṃ brahmāṇamapi cālayet || 81 ||
[Analyze grammar]

janānāṃ vṛttayastisro ye gṛhāśramavāsinaḥ |
asmākaṃ ca vane vṛttirvanāśramanivāsināṃ || 82 ||
[Analyze grammar]

abbhakṣā vāyubhakṣāśca daṃtolūkhalinastathā |
aśmakuṭṭādayo yatra paṃcāgnitapasaśca ye || 83 ||
[Analyze grammar]

ete tapasi tiṣṭhaṃto vratairapi suduścaraiḥ |
brahmacaryaṃ puraskṛtya prārthayaṃti parāṃ gatim || 84 ||
[Analyze grammar]

brahmacaryādbrahmaṇasya brāhmaṇatvaṃ vidhīyate |
evamāhuḥ pare loke brāhmacaryavido janāḥ || 85 ||
[Analyze grammar]

brahmacarye sthito dharmo brahmacarye sthitaṃ tapaḥ |
ye sthitā brahmacarye tu brāhmaṇā divi te sthitāḥ || 86 ||
[Analyze grammar]

nāsti yogaṃ vinā siddhirnāsti yogaṃ vinā yaśaḥ |
nāsti loke yaśomūlaṃ brahmacaryātparaṃtapaḥ || 87 ||
[Analyze grammar]

yo nigṛhyeṃdriyagrāmaṃ bhūtagrāmaṃ ca paṃcakam |
brahmacaryaṃ samādhatte kimataḥ paramaṃ tapaḥ || 88 ||
[Analyze grammar]

ayogakeśadharaṇamasaṃkalpa vrata kriyā |
abrahmacaryā caryā ca trayaṃ syāddaṃbhasaṃjñitaṃ || 89 ||
[Analyze grammar]

kva dārāḥ kva ca saṃyogaḥ kva ca bhāvaviparyayaḥ |
nanviyaṃ brahmaṇā sṛṣṭā manasā mānasī prajā || 90 ||
[Analyze grammar]

yadyasti tapaso vīryaṃ yuṣmākaṃ vijitātmanām |
sṛjadhvaṃ mānasānputrānprājāpatyena karmaṇā || 91 ||
[Analyze grammar]

manasā nirmitā yonirādhātavyā tapasvibhiḥ |
no dārayogaṃ bījaṃ ca vratamuktaṃ tapasvināṃ || 92 ||
[Analyze grammar]

yadidaṃ luptadharmākhyaṃ yuṣmābhiriha nirbhayaiḥ |
vyāhṛtaṃ sadbhiratyarthamasadbhiriva saṃmataṃ || 93 ||
[Analyze grammar]

vapurdīptāṃtarātmānameṣa kṛtvā manomayaṃ |
dārayogaṃ vinā srakṣye putramātmatanūruhaṃ || 94 ||
[Analyze grammar]

evamātmānamātmā me dvitīyaṃ janayiṣyati |
prājāpatyena vidhinā didhakṣaṃtamiva prajāḥ || 95 ||
[Analyze grammar]

varuṇa uvāca |
urvastu tapasāviṣṭo niveśyoruṃ hutāśane |
mamaṃthaikena darbheṇa putrasya prasavāraṇiṃ || 96 ||
[Analyze grammar]

tasyoruṃ sahasā bhitvā varo'sau hyagnirutthitaḥ |
jagato dahanākāṃkṣī putrognissamapadyata || 97 ||
[Analyze grammar]

urvasyoruṃ vinirbhidya aurvo nāmāṃtako'nalaḥ |
didhakṣuriva lokāṃstrīnjajñe paramakopanaḥ || 98 ||
[Analyze grammar]

utpadyamānaścovāca pitaraṃ dīnayā girā |
kṣudhā me bādhate tāta jagadbhakṣetyajasva māṃ || 99 ||
[Analyze grammar]

tridivārohibhirjvālairjṛmbhamāṇo diśo daśa |
nirdahansarvabhūtāni vavṛdhe soṃtakopamaḥ || 100 ||
[Analyze grammar]

etasminnaṃtare brahmā munimurvaṃ samāgataḥ |
uvāca vāryatāṃ putro jagatastvaṃ dayāṃ kuru || 101 ||
[Analyze grammar]

asyāpatpasyate vipra kariṣye sāhyamuttamaṃ |
tathyametadvacaḥ putra śṛṇu tvaṃ vadatāṃ vara || 102 ||
[Analyze grammar]

aurva uvāca |
dhanyosmyanugṛhītosmi yanme tvaṃ bhagavanśiśoḥ |
matimetāṃ dadāsīha paramātmanhitāya vai || 103 ||
[Analyze grammar]

prabhātakāle saṃprāpte kāṃkṣitavye samāgame |
bhagavaṃstarpitaḥ putraḥ kairhavyaiḥ prāpsyate sukham || 104 ||
[Analyze grammar]

kutra cāsya nivāsaḥ syādbhojanaṃ tu kimātmakam |
vidhāsyatīha bhagavānvīryatulyaṃ mahaujasaḥ || 105 ||
[Analyze grammar]

brahmovāca |
baḍavāmukhe ca vasatiḥ samudre vai bhaviṣyati |
mamayonirjalaṃ vipra taccāmeyaṃ vrajatvayaṃ || 106 ||
[Analyze grammar]

tatrā'yamāste niyataṃ pibanvārimayaṃ haviḥ |
tadvārivistaraṃ vipra visṛjāmyālayaṃ ca tam || 107 ||
[Analyze grammar]

tato yugāṃte bhūtānāmeṣa cāhaṃ ca putraka |
sahito vicariṣyāvo niṣpurāṇakarāviha || 108 ||
[Analyze grammar]

eṣogniraṃtakāle tu salilāśī mayā kṛtaḥ |
dahanaḥ sarvabhūtānāṃ sadevāsurarakṣasām || 109 ||
[Analyze grammar]

evamastviti taṃ sogniḥ saṃvṛtajvālamaṃḍalaḥ |
praviveśārṇavamukhaṃ natvorvaṃ pitaraṃ prabhum || 110 ||
[Analyze grammar]

pratiyātastato brahmā te ca sarve maharṣayaḥ |
aurvasyāgneḥ prabhāvajñāḥ svāṃsvāṃ gatimupāgatāḥ || 111 ||
[Analyze grammar]

hiraṇyakaśipurdṛṣṭvā tadā tanmahadadbhutam |
urvaṃ praṇatasarvāṃgo vākyametaduvāca ha || 112 ||
[Analyze grammar]

bhagavannadbhutamidaṃ saṃvṛttaṃ lokasākṣikam |
tapasā te muniśreṣṭha parituṣṭaḥ pitāmahaḥ || 113 ||
[Analyze grammar]

ahaṃ tu tava putrasya tava caiva mahāvrata |
bhṛtya ityavagaṃtavyaḥ ślāghyastvamiha karmaṇā || 114 ||
[Analyze grammar]

tanmāṃ paśya samāpannaṃ tavaivārādhane ratam |
yadi sīdenmuniśreṣṭha tavai vasyātparājayaḥ || 115 ||
[Analyze grammar]

urva uvāca |
dhanyosmyanugṛhītosmi yasya te'haṃ gururmataḥ |
nāsti te tapasānena bhayaṃ caiveha suvrata || 116 ||
[Analyze grammar]

tāmeva māyāṃ gṛhṇīṣva mama putreṇa nirmitām |
niriṃdhināmagnimayīṃ duḥsparśāṃ pāvakairapi || 117 ||
[Analyze grammar]

eṣā te svasya vaṃśasya vaśagāri vinigrahe |
rakṣiṣyatyātmapakṣaṃ ca vipakṣaṃ ca pradhakṣyati || 118 ||
[Analyze grammar]

varuṇa uvāca |
eṣā durviṣahā māyā devairapi durāsadā |
aurveṇa nirmitā pūrvaṃ pāvakenorvasūnunā || 119 ||
[Analyze grammar]

tasmiṃstu vyathite daitye nirvīryaiṣā na saṃśayaḥ |
śāpo hyasyāḥ purā dattaḥ sṛṣṭā yenaiva tejasā || 120 ||
[Analyze grammar]

yadyeṣā pratihaṃtavyā kartavyo bhagavānsukhī |
dīyatāṃ me sakho śakra toyayonirniśākaraḥ || 121 ||
[Analyze grammar]

tenāhaṃ sahasaṃ gamya yādobhiśca samāvṛtaḥ |
māyāmetāṃ haniṣyāmi tvatprasādānna saṃśayaḥ || 122 ||
[Analyze grammar]

evamastvitisaṃhṛṣṭaḥ śakrastridaśavardhanaḥ |
saṃdideśāgrataḥ somaṃ yuddhāya śiśirāyudham || 123 ||
[Analyze grammar]

gaccha soma sahāyantvaṃ kuru pāśadharasya vai |
asurāṇāṃ vināśāya jayārthaṃ tridivaukasām || 124 ||
[Analyze grammar]

tvaṃ mataḥ prativīryaśca jyotiṣāmapi ceśvaraḥ |
tvanmayānsarvalokeṣu rasānvedavido viduḥ || 125 ||
[Analyze grammar]

tvayā samo na lokesminvidyate śiśirāyudhaḥ |
kṣayavṛddhītavāvyaktesāgarecaivacāṃbare || 126 ||
[Analyze grammar]

pravartayasyahorātrātkālaṃ saṃmohayanjagat |
lokacchāyāmayaṃ lakṣma tavāṃkaḥ śaśavigrahaḥ || 127 ||
[Analyze grammar]

na viduḥ soma te māyāṃ ye ca nakṣatrayonayaḥ |
tvamādityapathādūrdhvaṃ jyotiṣāṃ coparisthitaḥ || 128 ||
[Analyze grammar]

tamaḥ protsārya sahasā bhāsayasyakhilaṃ jagat |
śītabhānurhimatanurjyotiṣāmadhipaḥ śaśī || 129 ||
[Analyze grammar]

api tatkālayogātmā ijyo yajñaratho'vyayaḥ |
oṣadhīśaḥ kriyāyonirapāṃ yoniranuṣṇaguḥ || 130 ||
[Analyze grammar]

śītāṃśuramṛtādhāraścapalaḥ śvetavāhanaḥ |
tvaṃ kāṃtiḥ kāṃtavapuṣāṃ tvaṃ somaḥ somapāyinām || 131 ||
[Analyze grammar]

saumyastvaṃ sarvabhūtānāṃ timiraghnastvamṛkṣarāṭ |
tadgaccha tvaṃ mahāsena varuṇena varūthinā || 132 ||
[Analyze grammar]

śamayasvāsurīṃ māyāṃ yayā dahyāmahe raṇe |
soma uvāca |
yanmāṃ vadasi yuddhārthaṃ devarājavaraprada || 133 ||
[Analyze grammar]

eṣa varṣāmi śiśiraṃ daityamāyāpakarṣaṇaṃ |
etānme śītanirdagdhānpaśyasva himaveṣṭitān || 134 ||
[Analyze grammar]

tathā himakarotsṛṣṭāḥ sapāśā himavṛṣṭayaḥ |
veṣṭayaṃti ca tāndaityānvāyurmeghagaṇāniva || 135 ||
[Analyze grammar]

tau pāśaśītāṃśudharau varuṇeṃdū mahābalau |
jaghnaturhimapātaiśca pāśapātaiśca dānavān || 136 ||
[Analyze grammar]

dvāvaṃbunāthau samare tau pāśahimayodhinau |
mṛdhe ceraturaṃbhobhiḥ kṣubdhāviva mahārṇavau || 137 ||
[Analyze grammar]

tābhyāmāpūritaṃ sarvaṃ taddānavabalaṃ mahat |
jagatsaṃvarttakāṃbhodaiḥ pravarṣairiva saṃvṛtaṃ || 138 ||
[Analyze grammar]

tāvudyatāvaṃbunāthau śaśāṃkavaruṇāvubhau |
śamayāmāsatustāṃ tu māyāṃ daityendranirmitāṃ || 139 ||
[Analyze grammar]

śītāṃśujālanirdagdhāḥ pāśaiścāskaṃditā raṇe |
na śekuścalituṃ daityā viśiraskā ivādrayaḥ || 140 ||
[Analyze grammar]

śītāṃśu nihatāste tu daityāssarve nipātitāḥ |
himaplāvita sarvāṃgānirūṣmāṇa ivāgnayaḥ || 141 ||
[Analyze grammar]

teṣāṃ tu divi daityānāṃ nipataṃti śubhāni vai |
vimānāni vicitrāṇi nipataṃtyutpataṃti ca || 142 ||
[Analyze grammar]

tānpāśahastagrathitānchāditānśītaraśmibhiḥ |
mayo dadarśa māyāvī dānavāndivi dānavaḥ || 143 ||
[Analyze grammar]

saśailajālāṃ vitatāṃ khaḍgapaṭṭasahāsinīm |
pādapotkarakūṭasthāṃ kaṃdarākīrṇakānanāṃ || 144 ||
[Analyze grammar]

siṃhavyāghragaṇākīrṇāṃ nadadbhirdevayūthapaiḥ |
īhāmṛgagaṇākīrṇāṃ pavanāghūrṇitaddrumām || 145 ||
[Analyze grammar]

nirmitāṃ svena putreṇa kūjaṃtīṃ divikāmagāṃ |
prathitāṃ pārvatīṃ māyāṃ sasṛje sa samaṃtataḥ || 146 ||
[Analyze grammar]

sāsiśabdaiśśilāvarṣaiḥ saṃpatadbhiśca pādapaiḥ |
jaghāna devasaṃghāṃste dānavānabhyajīvayat || 147 ||
[Analyze grammar]

naiśākarī vāruṇī ca māye aṃtarhite tadā |
abhavadghorasaṃcārā pṛthivī parvatairiva || 148 ||
[Analyze grammar]

na cāruddho drumagaṇairdevo dṛśyata kaścana |
tadapadhvastadhanuṣaṃ bhagnapraharaṇāvilam || 149 ||
[Analyze grammar]

niṣprayatnaṃ surānīkaṃ varjayitvā gadādharaṃ |
sa hi yuddhagataḥ śrīmānīśo na sma vyakaṃpata || 150 ||
[Analyze grammar]

sahiṣṇutvājjagatsvāmī na cukrodha gadādharaḥ |
kālajñaḥ kālameghābhaḥ samīkṣankālamāhave || 151 ||
[Analyze grammar]

devāsuravimardaṃ ca draṣṭukāmastadā hariḥ |
tato bhagavatādiṣṭau raṇe pāvakamārutau || 152 ||
[Analyze grammar]

coditau viṣṇuvākyena tato māyāṃ vyakarṣatāṃ |
tābhyāmudbhrāṃtavegābhyāṃ prabuddhābhyāṃ mahāhave || 153 ||
[Analyze grammar]

dagdhā sā pārvatī māyā bhasmībhūtā nanāśa ha |
sonilonalasaṃyuktassonalaścānilākulaḥ || 154 ||
[Analyze grammar]

daityasenāṃ dadahaturyugāṃteṣviva mūrcchitau |
vāyuḥ prajavitastatra paścādagniśca mārutāt || 155 ||
[Analyze grammar]

ceraturdānavānīke krīḍaṃtāvanalānilau |
bhasmībhūteṣu bhūteṣu prapatatsūtpatatsu ca || 156 ||
[Analyze grammar]

dānavānāṃ vimāneṣu nipatatsu samaṃtataḥ |
vātaskaṃdhāpaviddheṣu kṛtakarmaṇi pāvake || 157 ||
[Analyze grammar]

māyāvadhe pravṛtte tu stūyamāne gadādhare |
niṣprayatneṣu daityeṣu trailokye muktabaṃdhane || 158 ||
[Analyze grammar]

prahṛṣṭeṣu ca deveṣu sādhusādhviti jalpiṣu |
jaye daśaśatākṣasya daityānāṃ ca parājaye || 159 ||
[Analyze grammar]

dikṣu sarvāsu śuddhāsu pravṛtte dharmavistare |
apāvṛte caṃdrapathe svasthānasthe divākare || 160 ||
[Analyze grammar]

pravṛttistheṣu bhūteṣu nṛṣu cāritravatsu ca |
abhinnabaṃdhane mṛtyau hūyamāne hutāśane || 161 ||
[Analyze grammar]

yajñaśobhiṣu deveṣu svargamārgaṃ diśatsu ca |
lokapāleṣu sarveṣu dikṣu saṃdhānavartiṣu || 162 ||
[Analyze grammar]

bhāve tapasi siddhānāmabhāve pāpakarmaṇām |
devapakṣe pramudite daityapakṣe viṣīdati || 163 ||
[Analyze grammar]

tripādavigrahe dharme'dharme pādaparigrahe |
apāvṛtte mahādvāre vartamāne ca satpathe || 164 ||
[Analyze grammar]

lokeṣu dharmavṛtteṣu pravṛtteṣvāśrameṣu ca |
prajārakṣaṇayukteṣu rājamāneṣu rājasu || 165 ||
[Analyze grammar]

praśāṃteṣu ca lokeṣu śāṃte tamasi dānave |
agnimārutayostasminvṛtte saṃgrāmakarmaṇi || 166 ||
[Analyze grammar]

tanmayā vimalā lokāstābhyāṃ jayakṛtakriyāḥ |
tīvraṃ daityabhayaṃ śrutvā mārutāgnikṛtaṃ mahat || 167 ||
[Analyze grammar]

kālanemīti vikhyāto dānavaḥ pratyadṛśyata |
bhāskarākāramukuṭaḥ śiṃjitābharaṇāṃgadaḥ || 168 ||
[Analyze grammar]

maṃdarādripratīkāśo mahārajatasaṃvṛtaḥ |
śatapraharaṇodagraḥ śatabāhuḥ śatānanaḥ || 169 ||
[Analyze grammar]

śataśīrṣaḥ sthitaḥ śrīmānśataśṛṃga ivācalaḥ |
kakṣe mahati saṃvṛddho nidāgha iva pāvakaḥ || 170 ||
[Analyze grammar]

dhūmrakeśo hariśmaśrurdaṃturo vikaṭānanaḥ |
trailokyāṃtaravistāraṃ dhārayanvipulaṃ vapuḥ || 171 ||
[Analyze grammar]

bāhubhistulayanvyoma kṣipanpadbhyāṃ mahīdharān |
īrayanmukhaniḥśvāsairvṛṣṭikārānbalāhakān || 172 ||
[Analyze grammar]

tiryagāyataraktākṣaṃ maṃdarodagravarcasām |
didhakṣaṃtamivāyāṃtaṃ sarvāndevagaṇānmṛdhe || 173 ||
[Analyze grammar]

tarjayaṃtaṃ suragaṇāṃśchādayaṃtaṃ diśo daśa |
saṃvartakāle hṛṣitaṃ dṛṣṭaṃ mṛtyumivotthitam || 174 ||
[Analyze grammar]

sutalenocchrayavatā vipulāṃguliparvaṇā |
laṃbābharaṇapūrṇena kiṃciccalitakarmaṇā || 175 ||
[Analyze grammar]

ucchritenāgrahastena dakṣiṇena vapuṣmatā |
dānavāndevanihatānbruvantaṃ tiṣṭhateti ca || 176 ||
[Analyze grammar]

taṃ kālanemiṃ samare dviṣatāṃ kālaneminam |
vīkṣaṃte sma surāḥ sarve bhayavihvalalocanāḥ || 177 ||
[Analyze grammar]

taṃ vīkṣaṃte sma bhūtāni grasaṃtaṃ kālaneminam |
trivikramaṃ vikramaṃ taṃ nārāyaṇamivāparam || 178 ||
[Analyze grammar]

sobhyucchrayaṃ punaḥ prāpto mārutāghūrṇitāṃbaraḥ |
prakrāmadasuro yoddhuṃ trāsayansarvadevatāḥ || 179 ||
[Analyze grammar]

sameyivānsureṃdreṇa pariṣvakto bhramanraṇe |
kālanemirbabhau daityaḥ saviṣṇuriva maṃdaraḥ || 180 ||
[Analyze grammar]

atha vivyathire devāḥ sarve śakrapurogamāḥ |
kālaneminamāyāṃtaṃ dṛṣṭvā kālamivāparam || 181 ||
[Analyze grammar]

dānavānanupiprīṣuḥ kālanemirmahāsuraḥ |
vyavardhata mahātejāstapāṃte jalado yathā || 182 ||
[Analyze grammar]

taṃ trailokyāṃtaragataṃ dṛṣṭvā te dānaveśvarāḥ |
uttasthurapariśrāṃtāḥ pītvevāmṛtamuttamam || 183 ||
[Analyze grammar]

te vītabhayasaṃtrāsā mayatārapurogamāḥ |
tārakāmayasaṃgrāme satataṃ jitakāśinaḥ || 184 ||
[Analyze grammar]

rejurāyodhanagatā dānavā yuddhakāṃkṣiṇaḥ |
maṃtramabhyasatāṃ teṣāṃ vyūhaṃ ca paridhāvatām || 185 ||
[Analyze grammar]

prekṣatāṃ cābhavatprītirdānavaṃ kālaneminam |
ye tu tatra mayasyāsanmukhyā yuddhapurassarāḥ || 186 ||
[Analyze grammar]

te tu sarve bhayaṃ tyaktvā hṛṣṭā yoddhumupasthitāḥ |
mayastāro varāhaśca hayagrīvaśca dānavaḥ || 187 ||
[Analyze grammar]

vipracittisutaḥ śvetaḥ kharalaṃbāvubhāvapi |
ariṣṭo baliputraśca kiśorākhyastathaiva ca || 188 ||
[Analyze grammar]

surbhānuścāmaraprakhyaścakrayodhī mahāsuraḥ |
ete'stravedinaḥ sarve sarve tapasi susthitāḥ || 189 ||
[Analyze grammar]

dānavāḥ kṛtino jagmuḥ kālaneminamuddhatam |
te gadābhissugurvībhiścakrairathaparaśvadhaiḥ || 190 ||
[Analyze grammar]

kālakalpaiśca musalaiḥ kṣepaṇīyaiśca mudgaraiḥ |
aśmabhiścāstrasadṛśaistathā śailaiśca dāruṇaiḥ || 191 ||
[Analyze grammar]

paṭṭiśairbhiṃḍipālaiśca parighaiścottamāyasaiḥ |
ghātinībhiśca gurvībhiḥ śataghnībhistathaiva ca || 192 ||
[Analyze grammar]

yugairyaṃtraiśca nirmuktairlāṃgalairugratāḍitaiḥ |
dorbhirāyatamānaiśca pāśaiśca parighādibhiḥ || 193 ||
[Analyze grammar]

bhujaṃgavaktrairlelihānairvisarpadbhiśca sāyakaiḥ |
vajraiḥ praharaṇīyaiśca dīpyamānaiśca tomaraiḥ || 194 ||
[Analyze grammar]

vikośairasibhistīkṣṇaiḥ śūlaiśca śitanirmalaiḥ |
daityaiḥ saṃdīpyamānaiśca pragṛhītaśarāsanaiḥ || 195 ||
[Analyze grammar]

tataḥ puraskṛtya tadā kālaneminamāhave |
sā dīptaśastrapravarā daityānāṃ ruruce camūḥ || 196 ||
[Analyze grammar]

yairnimīlitasarvāṃgā vanālīvāṃbudāgame |
devatānāmapi camūrmumude śakrapālitā || 197 ||
[Analyze grammar]

upetā śiśiroṣṇābhyāṃ tejobhyāṃ caṃdrasūryayoḥ |
vāyuvegavatī saumyā tārāgaṇapatākinī || 198 ||
[Analyze grammar]

toyadā baddhavasanā grahanakṣatrahāsinī |
yameṃdradhanadairguptā varuṇena ca dhīmatā || 199 ||
[Analyze grammar]

sā pradīptāgnipavanā nārāyaṇaparāyaṇā |
sāsamudraughasadṛśī dīpyamānā mahācamūḥ || 200 ||
[Analyze grammar]

rarājāstravatī bhīmā yakṣagaṃdharvaśālinī |
tayoścamvostadānīṃ tu babhūva sa samāgamaḥ || 201 ||
[Analyze grammar]

dyāvāpṛthivyossaṃyogo yathā syādyugaparyaye |
tadyuddhamabhavadghoraṃ devadānavasaṃkulaṃ || 202 ||
[Analyze grammar]

kṣamāparākramaparaṃ sadarpavinayasyadaṃ |
niścakramurbalābhyāṃ tu bhīmābhyāṃ ca surā'surāḥ || 203 ||
[Analyze grammar]

pūrvāparābhyāṃ saṃrabdhāḥ sāgarābhyāmivāṃbudāḥ |
tābhyāṃ balābhyāṃ saṃhṛṣṭāśceruste devadānavāḥ || 204 ||
[Analyze grammar]

vanābhyāṃ pārvatīyābhyāṃ puṣpitābhyāṃ yathā nagāḥ |
samājaghnustathā bherīḥ śaṃkhāndadhmuranekaśaḥ || 205 ||
[Analyze grammar]

brahmāṃḍaṃ ca bhuvaṃ caiva diśaśca samapūrayan |
jyāghātatalanirghoṣa dhanuṣāṃ kūjitāni ca || 206 ||
[Analyze grammar]

duṃdubhīnāṃ ca nirhrādo daityamaṃtardadhuḥ svanam |
te'nyonyamabhisaṃpeturyātayaṃtaḥ parasparam || 207 ||
[Analyze grammar]

babhaṃjurbāhubhirbāhu yuddhamanye yuyutsavaḥ |
devānāmaśanīrghorāḥ parighāṃścottamāyudhān || 208 ||
[Analyze grammar]

nistriṃśānsasṛjuḥ saṃkhye gadāgurvīśca dānavāḥ |
gadānipātairbhagnāṃgā bāṇaiśca śakalīkṛtāḥ || 209 ||
[Analyze grammar]

paripeturbhṛśaṃ kecitpunaḥ kecittu jaghnire |
tato rathaiśca turagairvimānaiśca padātibhiḥ || 210 ||
[Analyze grammar]

samīyustetisaṃrabdhā roṣādanyonyamāhave |
saṃvarttamānāssamare saṃdaṣṭauṣṭapuṭānanāḥ || 211 ||
[Analyze grammar]

rathā rathairniyudhyaṃte pādātāśca padātibhiḥ |
teṣāṃ rathānāṃ tumulaḥ saśabdaḥ śabdavāhinām || 212 ||
[Analyze grammar]

nabho nidaddhvānayathā nabhasye jaladasvanaiḥ |
babhaṃjire rathānkecitkecitsaṃmṛditā rathaiḥ || 213 ||
[Analyze grammar]

saṃbādhamanye saṃprāptā na śekuścalituṃ rathāḥ |
anyonya madhye samare dorbhyāmutkṣipya daṃśitāḥ || 214 ||
[Analyze grammar]

saṃhrādamāṇāssabalā jaghnustatrāsi carmiṇaḥ |
astrairanye vinirbhinnā raktaṃ vemurhatāyudhi || 215 ||
[Analyze grammar]

kṣarajjalānāṃ sadṛśā jaladānāṃ samāgatāḥ |
anyonyabāṇavarṣeṇa yuddhadurdinamābabhau || 216 ||
[Analyze grammar]

etasminnaṃtare kruddhaḥ kālanemissa dānavaḥ |
avardhata samudraughaiḥ pūryamāṇa ivāṃbudaḥ || 217 ||
[Analyze grammar]

tasya vidyullatāpīḍāḥ pradīptāśanivarṣiṇaḥ |
gātrairnagagiriprakhyairvinipeturbalāhakāḥ || 218 ||
[Analyze grammar]

krodhānniśvasatastasya bhrūbhedasvedavarṣiṇaḥ |
sāgnisphuliṃgāḥ pratatā mukhānniścerurarciṣaḥ || 219 ||
[Analyze grammar]

tiryagūrdhvaṃ ca gagane vavṛdhustasya bāhavaḥ |
parvatādiva niṣkrāṃtāḥ paṃcāsyā iva pannagāḥ || 220 ||
[Analyze grammar]

so'strajālairbahuvidhairdhanurbhiḥ parighairapi |
divyamākāśamāvavre parvatairucchritairiva || 221 ||
[Analyze grammar]

sonilodbhūtavasanastasthau saṃgrāmalālasaḥ |
saṃdhyātapagrastaśilaḥ sākṣānmerurivācalaḥ || 222 ||
[Analyze grammar]

ūruvegapramathitaiḥ śṛṃgaśailāgrapādapaiḥ |
apātayaddevagaṇānvajreṇeva mahāgirīn || 223 ||
[Analyze grammar]

bāhubhiśca sanistriṃśaiśchinnabhinnaśiroruhāḥ |
na śekuścalituṃ devāḥ kālanemihatā yudhi || 224 ||
[Analyze grammar]

muṣṭibhirnihatāḥ kecitkecicca dvidalīkṛtāḥ |
yakṣagaṃdharvapatagāḥ samahoragakinnarāḥ || 225 ||
[Analyze grammar]

tena vitrāsitāḥ petuḥ samare kālaneminā |
na śekuryatnavaṃtopi yatnaṃ kartuṃ vicetasaḥ || 226 ||
[Analyze grammar]

tena śakraḥ sahasrākṣo'spaṃditaḥ śarabaṃdhanaiḥ |
niṣprayatnaḥ kṛtaḥ saṃkhye calituṃ na śaśāka ha || 227 ||
[Analyze grammar]

nirjalāṃbhodasadṛśo nirjalārṇavasaprabhaḥ |
nirvyāpāraḥ kṛtastena vipāśo varuṇo mṛdhe || 228 ||
[Analyze grammar]

raṇe vaiśravaṇastena parītaḥ kālarūpiṇā |
vilapanlokapāleśastyājito dhanadaḥ kriyāṃ || 229 ||
[Analyze grammar]

yamaḥ sarvaharastena mṛtyupraharaṇo raṇe |
yāmyāmavasthāṃ saṃtyajya bhītaḥ svāṃ diśamāviśat || 230 ||
[Analyze grammar]

salokapālānutsārya hṛtvā teṣāṃ ca karma tat |
dikṣu sarvāsu dehaṃ svaṃ caturdhā vidadhe tadā || 231 ||
[Analyze grammar]

sa nakṣatrapathaṃ gatvā divyaṃ svarbhānudarśitaṃ |
jahāra lakṣmīṃ somasya yaccāsya viṣayaṃ mahat || 232 ||
[Analyze grammar]

cālayāmāsa dīptāṃśuṃ dharmadvārā sabhāskaraṃ |
śāsanaṃ cāsya viṣayaṃ jahāra dinakarma ca || 233 ||
[Analyze grammar]

sogniṃ devamukhaṃ jitvā cakārātmamukhāśrayaṃ |
vāyuṃ ca tarasā jitvā cakārātmavaśānugaṃ || 234 ||
[Analyze grammar]

sa samudrātsamānīya samastāḥ sarito balāt |
cakārābhisukhāvīryā dehabhūtāśca siṃdhavaḥ || 235 ||
[Analyze grammar]

apaḥ svavaśagāḥ kṛtvā divijāyāśca bhūmijāḥ |
chādayāmāsa jagatīṃ suguptāṃ dharaṇīdharaiḥ || 236 ||
[Analyze grammar]

sa svayaṃbhūrivābhāti mahābhūtapatirmahān |
sarvalokamayo daityaḥ sarvalokabhayāvahaḥ || 237 ||
[Analyze grammar]

sa lokapālaikavapuścaṃdrasūryagrahātmavān |
pāvakānilasaṃbhūto rarāja yudhi dānavaḥ || 238 ||
[Analyze grammar]

pārameṣṭhye sthitaḥ sthāne lokānāṃ prabhavopame |
taṃ tuṣṭuvurdaityagaṇā devā iva pitāmahaṃ || 239 ||
[Analyze grammar]

paṃca taṃ nābhyavartaṃta viparītena karmaṇā |
vedo dharmaḥ kṣamā satyaṃ śrīśca nārāyaṇāśrayā || 240 ||
[Analyze grammar]

sa teṣāmanupasthānātsakrodho dānaveśvaraḥ |
vaiṣṇavaṃ padamanvicchansa gato devatāyataḥ || 241 ||
[Analyze grammar]

sa dadarśa suparṇasthaṃ śaṃkhacakragadādharaṃ |
dānavānāṃ vināśāya bhrāmayaṃtaṃ gadāṃ śubhāṃ || 242 ||
[Analyze grammar]

sajalāṃbhodasadṛśaṃ vidyutsadṛśavāsasaṃ |
ārūḍhaṃ svarṇapatrāḍhyaṃ khecaraṃ kāśyapaṃ khagaṃ || 243 ||
[Analyze grammar]

duṣṭadaityavināśāya dṛṣṭvā khasthamivasthitaṃ |
dānavo viṣṇumakṣobhyaṃ babhāṣe kṣubdhamānasaḥ || 244 ||
[Analyze grammar]

ayaṃ sa ripurasmākaṃ pūrveṣāṃ prāṇanāśanaḥ |
arṇavāvāsinaścaiva madhośca kaiṭabhasya ca || 245 ||
[Analyze grammar]

ayaṃ sa ripurasmākamasamaḥ kila kathyate |
anekasaṃyugenena dānavā bahavo hatāḥ || 246 ||
[Analyze grammar]

ayaṃ sa nirghṛṇo loke strībālanirapattrapaḥ |
yena dānavanārīṇāṃ sīmaṃtodvaraṇaṃ kṛtam || 247 ||
[Analyze grammar]

ayaṃ sa viṣṇurdevānāṃ vaikuṃṭhaśca divaukasām |
anaṃto bhogināṃ madhye svayaṃbhūśca svayaṃbhuvaḥ || 248 ||
[Analyze grammar]

ayaṃ sa nātho devānāmasmābhirviprakṛṣyate |
asya krodhaṃ samāsādya hiraṇyakaśipurhataḥ || 249 ||
[Analyze grammar]

asyacchāyāmupāśritya devā makhamukhe sthitāḥ |
ājyaṃ maharṣibhirdattamaśnuvaṃti tridhā hutam || 250 ||
[Analyze grammar]

ayaṃ sa nidhane hetuḥ sarveṣāmamaradviṣām |
asya cakrapraviṣṭāni kulānyasmākamāhave || 251 ||
[Analyze grammar]

ayaṃ sa kila yuddheṣu surārthe tyaktajīvitaḥ |
sa vibhustejasā yuktaṃ cakraṃ kṣipati śatruṣu || 252 ||
[Analyze grammar]

ayaṃ sa kālo daityānāṃ kālabhūte mayi sthite |
atikrāṃtasya kālasya phalaṃ prāpsyati keśavaḥ || 253 ||
[Analyze grammar]

diṣṭyedānīṃ samakṣaṃ me viṣṇureṣa samāgataḥ |
niṣpiṣṭo bahunā saṃkhye mayyeva praṇaśiṣyati || 254 ||
[Analyze grammar]

yāsyāmyapacitiṃ diṣṭyā pūrveṣāmadya saṃyuge |
imannārāyaṇaṃ hatvā dānavānāṃ bhayāvaham || 255 ||
[Analyze grammar]

kṣiprameva haniṣyāmi raṇe'maragaṇānaham |
jātyaṃtaragatopyeṣa bādhate dānavānmṛdhe || 256 ||
[Analyze grammar]

eṣo'naṃtaḥ purā bhūtvā padmanābha iti śrutaḥ |
jaghānaikārṇave ghore tāvubhau madhukaiṭabhau || 257 ||
[Analyze grammar]

dvidhābhūtaṃ vapuḥ kṛtvā siṃhasyārddhaṃ narasya ca |
pitaraṃ me jaghānaiko hiraṇyakaśipuṃ purā || 258 ||
[Analyze grammar]

śubhaṃ garbhamadhattainamaditirdevatāraṇiḥ |
trīnlokānājahāraikaḥ kramamāṇastribhiḥ kramaiḥ || 259 ||
[Analyze grammar]

bhūyastvidānīṃ saṃprāpte saṃgrāme tārakāmaye |
mayā saha samāgamya sa devo vinaśiṣyati || 260 ||
[Analyze grammar]

evamuktvā bahuvidhaṃ kṣipraṃ nārāyaṇaṃ raṇe |
vāgbhirapratirūpābhiryuddhamevābhyarocayat || 261 ||
[Analyze grammar]

kṣipyamāṇo'sureṃdreṇa na cukopa gadādharaḥ |
kṣamābalena mahatā sasmitaṃ cedamabravīt || 262 ||
[Analyze grammar]

alpaṃ darpabalaṃ daitya sthiramakrodhajaṃ balam |
hatastvaṃ darpajairdoṣairhitvā yo bhāṣase kṣamām || 263 ||
[Analyze grammar]

adhamastvaṃ mama mato dhigetattava vāgbalam |
ke tatra puruṣāḥ saṃti yatra garjaṃti yoṣitaḥ || 264 ||
[Analyze grammar]

ahaṃ tvāṃ daitya paśyāmi pūrveṣāṃ mārgagāminam |
prajāpatiṃ kṛtaṃ setuṃ tyaktvā kaḥ svastimānbhavet || 265 ||
[Analyze grammar]

adya tvāṃ nāśayiṣyāmi devavyāpāraghātakam |
sveṣu sveṣu ca sthāneṣu sthāpayiṣyāmi devatāḥ || 266 ||
[Analyze grammar]

evaṃ bruvati vākyaṃ tu mṛdhe śrīvatsadhāriṇi |
jahāsa dānavaḥ krodhāddhastāṃścakreṇa sāyudhān || 267 ||
[Analyze grammar]

sa bāhuśatamudyamya sarvāyudhagaṇānraṇe |
krodhādviguṇaraktākṣo viṣṇorvakṣasya pātayat || 268 ||
[Analyze grammar]

dānavāścāpi samare mayatārapurogamāḥ |
udyatāyudhanistriṃśā viṣṇumabhyadravanraṇe || 269 ||
[Analyze grammar]

sa tāḍyamāno'tibalairdaityaiḥ sarvāyudhodyataiḥ |
na cacāla tato yuddhe kaṃpyamāna ivācalaḥ || 270 ||
[Analyze grammar]

saṃyuktaśca suparṇena kālanemirmahāsuraḥ |
sarvaprāṇena mahatīṃ gadāmudyamya bāhubhiḥ || 271 ||
[Analyze grammar]

ghorāṃ jvalaṃtīṃ mumuce saṃrabdho garuḍopari |
karmaṇā tena daityasya viṣṇurvismayamāgamat || 272 ||
[Analyze grammar]

tadā tena suparṇasya pātitā mūrdhni sā gadā |
suparṇaṃ vyathitaṃ dṛṣṭvā kṣataṃ ca vapurātmanaḥ || 273 ||
[Analyze grammar]

krodhasaṃraktanayano vaikuṃṭhaścakramādade |
vyavarddhata ca vegena suparṇena samaṃ vibhuḥ || 274 ||
[Analyze grammar]

bhujāścāsya vyavardhaṃta vyāptavaṃto diśo daśa |
vidiśaścaiva khaṃ cāpi gāṃ caiva pratipūrayan || 275 ||
[Analyze grammar]

vavṛdhe sa punarlokānkrāṃtukāma ivaujasā |
taṃ jayāya sureṃdrāṇāṃ varddhamānaṃ nabhastale || 276 ||
[Analyze grammar]

ṝṣayaḥ saha gaṃdharvāstuṣṭuvurmadhusūdanam |
sadyāṃ kirīṭena likhanśirasā bhāsvareṇa ca || 277 ||
[Analyze grammar]

padbhyāmākramyavasudhāṃ diśaḥ pracchādya bāhubhiḥ |
sahasrakaratulyābhaṃ sahasrāramarikṣayam || 278 ||
[Analyze grammar]

dīptāgnisadṛśaṃ ghoraṃdarśanena sudarśanam |
suvarṇareṇuparyaṃtaṃ vajranābhaṃ bhayāvahaṃ || 279 ||
[Analyze grammar]

medosthimajjarudhiraiḥ siktaṃ dānavasaṃbhavaiḥ |
advitīyaṃ praharaṇaṃ kṣuraparyaṃtamaṃḍalam || 280 ||
[Analyze grammar]

sragdāmamālānicitaṃ kāmagaṃ kāmarūpiṇaṃ |
svayaṃ svayaṃbhuvā sṛṣṭaṃ bhayadaṃ sarvavidviṣām || 281 ||
[Analyze grammar]

dadhāra roṣeṇāviṣṭaṃ nityamāhavadarpitaṃ |
kṣepaṇādyasya muhyaṃti lokāḥ sasthāṇujaṃgamāḥ || 282 ||
[Analyze grammar]

kravyādāni ca bhūtāni tṛptiṃ yāṃti mahāmṛdhe |
tamapratimakarmāṇaṃ samānaṃ sūryavarcasā || 283 ||
[Analyze grammar]

cakramudyamya samare kopadīpto gadādharaḥ |
praṇaṣṭaṃ dānavaṃ tejaḥ kurvāṇaṃ svena tejasā || 284 ||
[Analyze grammar]

ciccheda bāhūṃstenaiva samare kālaneminaḥ |
tacca vaktraśataṃ ghoraṃ sāgnicūrṇāṭṭahāsi vai || 285 ||
[Analyze grammar]

tasya daityasya cakreṇa pramamātha balāddhariḥ |
sacchinnabāhurviśirānaprākaṃpata dānavaḥ || 286 ||
[Analyze grammar]

kabaṃdhāvasthitaḥ saṃkhye viśākhaiva pādapaḥ |
taṃvitatya mahāpakṣau vāyoḥ kṛtvā samaṃ javam || 287 ||
[Analyze grammar]

urasā tāḍayāmāsa garuḍaḥ kālaneminaṃ |
sa tasya dehobhimukho vibāhuḥ khātparibhraman || 288 ||
[Analyze grammar]

nipapāta divaṃ tyaktvā kṣobhayandharaṇītalam |
tasminnipatite daitye devāḥ sarṣigaṇāstathā || 289 ||
[Analyze grammar]

sādhusādhviti vaikuṃṭhaṃ sametāḥ pratyapūjayan |
apare ye tu daityā vai yuddhe dṛṣṭaparākramāḥ || 290 ||
[Analyze grammar]

te sarve bāhubhirvyāptā na śekuścalituṃ raṇe |
kāṃścitkeśeṣu jagrāha kāṃścitkaṃṭheṣvapīḍayat || 291 ||
[Analyze grammar]

cakarta kasyacidvaktraṃ madhye gṛhṇāttathāparam |
te gadācakranirdagdhā gatasatvā gatāsavaḥ || 292 ||
[Analyze grammar]

gaganādbhraṣṭasarvāṃgā nipeturdharaṇītale |
teṣu sarveṣu daityeṣu hateṣu puruṣottamaḥ || 293 ||
[Analyze grammar]

śakrapriyaṃ tataḥ kṛtvā kṛtakarmagadādharaḥ |
tasminvimarde saṃvṛtte saṃgrāme tārakāmaye || 294 ||
[Analyze grammar]

taṃ ca deśaṃ jagāmāśu brahmā lokapitāmahaḥ |
sarvairbrahmarṣibhiḥ sārddhaṃ gaṃdharvāpsarasāṃgaṇaiḥ || 295 ||
[Analyze grammar]

devadevaṃ hariṃ devaḥ pūjayanvākyamabravīt |
kṛtaṃ deva mahatkarma surāṇāṃ śalyamuddhṛtam || 296 ||
[Analyze grammar]

nidhanena ca daityānāṃ vayaṃ ca paritoṣitāḥ |
yo'yaṃ tvayā hato viṣṇo kālanemirmahāsuraḥ || 297 ||
[Analyze grammar]

tvāmetasya ṝte hyasminśāstā kaścinna vidyate |
eṣa devānparibhavanlokāṃśca sacarācarān || 298 ||
[Analyze grammar]

ṝṣīṇāṃ kadanaṃ kṛtvā māmapi pratigarjati |
tadanena tvadīyena parituṣṭosmi karmaṇā || 299 ||
[Analyze grammar]

yadayaṃ kālakalpaste kālanemirnipātitaḥ |
tadāgacchasva bhadraṃ te gacchāma divamuttamām || 300 ||
[Analyze grammar]

brahmarṣayastvāṃ tatrasthāḥ pratīkṣaṃte sado gatāḥ |
kaṃ cāhaṃ tava dāsyāmi varaṃ varabhṛtāṃ vara || 301 ||
[Analyze grammar]

svasthānastheṣu deveṣu teṣāṃ ca varado bhavān |
niryātametattrailokyaṃ sphītaṃ nihatakaṃṭakam || 302 ||
[Analyze grammar]

asminneva mṛdhe viṣṇo śakrāya sumahātmane |
evamukto bhagavatā brahmaṇā hariravyayaḥ || 303 ||
[Analyze grammar]

devānśakramukhānsarvānuvāca śubhayā girā |
viṣṇuruvāca |
śrūyatāṃ tridaśāssarve yāvaṃto'tra samāgatāḥ || 304 ||
[Analyze grammar]

suparṇasahitaistatra puraskṛtya puraṃdaraṃ |
asmābhiḥ samare sarvaiḥ kālanemimukhā hatāḥ || 305 ||
[Analyze grammar]

dānavā vikramopetāḥ śakrādapi mahattarāḥ |
asminmahati saṃgrāme dvāveva tu vinissṛtau || 306 ||
[Analyze grammar]

virocanastu daiteyaḥ svarbhānuśca mahābalaḥ |
svāṃ diśaṃ bhajatāṃ śakro diśaṃ varuṇa eva ca || 307 ||
[Analyze grammar]

yāmyāṃ yamaḥ pālayatāmuttarāṃ ca dhanādhipaḥ |
ṝkṣaiḥ saha sadā yogaṃ gacchatāṃ caṃdramāstathā || 308 ||
[Analyze grammar]

ayamṛtumukhaṃ sūryo bhajatāmayanaiḥ saha |
ājyabhāgāḥ pravartaṃtāṃ sadasyairabhipūjitāḥ || 309 ||
[Analyze grammar]

hūyaṃtāmagnayo viprairvedadṛṣṭena karmaṇā |
devāśca balihomena svādhyāyena maharṣayaḥ || 310 ||
[Analyze grammar]

śrāddhena pitaraścaiva tuṣṭiṃ yāṃtu yathāsukham |
vāyuścaratu mārgasthastridhā dīpyatu pāvakaḥ || 311 ||
[Analyze grammar]

trayovarṇāśca lokāṃstrīstaparpayaṃtvātmajairguṇaiḥ |
kratavaḥ saṃpravartaṃtāṃ dīkṣaṇīyairdvijātibhiḥ || 312 ||
[Analyze grammar]

dakṣiṇāścopapadyaṃtāṃ yājñikaiśca pṛthakpṛthak |
gāśca sūryo rasānsomo vāyuḥ prāṇāṃśca prāṇiṣu || 313 ||
[Analyze grammar]

tarpayantaḥ pravartaṃtāmete somyaiḥ svakarmabhiḥ |
yathāvadanupūrveṇa maheṃdramalayodbhavāḥ || 314 ||
[Analyze grammar]

trailokyamātaraḥ sarvāḥ samudraṃ yāṃtu siṃdhavaḥ |
daityebhyastyajyatāṃ bhīśca śāṃtiṃ vrajata devatāḥ || 315 ||
[Analyze grammar]

svasti vo'stu gamiṣyāmi brahmalokaṃ sanātanaṃ |
svagṛhe svargaloke vā saṃgrāme vā viśeṣataḥ || 316 ||
[Analyze grammar]

viśvastaiśca na gaṃtavyaṃ nityaṃ kṣudrā hi dānavāḥ |
chidreṣu praharaṃtyete na teṣāṃ saṃsthitirdhruvā || 317 ||
[Analyze grammar]

saumyānāṃ nijabhāvānāṃ bhavatāmārjave manaḥ |
evamuktvā suragaṇānviṣṇussatyaparākramaḥ || 318 ||
[Analyze grammar]

jagāma brahmaṇā sārddhaṃ brahmalokaṃ mahāyaśāḥ |
devānāṃ mahatīṃ prītimutpādya bhagavānprabhuḥ || 319 ||
[Analyze grammar]

etadāścaryamabhavatsaṃgrāme tārakāmaye |
dānavānāṃ ca viṣṇośca yanmāṃ tvaṃ paripṛcchasi || 320 ||
[Analyze grammar]