Chapter 3

ākuñcitābhyāmatha pakṣatibhyāṃ nabhovibhāgāttarasāvatīrya |
niveśadeśātatadhūtapakṣaḥ papāta bhūmāvupabhaimi haṃsaḥ || 1 ||
[Analyze grammar]

ākasmikaḥ pakṣapuṭāhatāyāḥ kṣitestadā yaḥ svana uccacāra |
drāganyavinyastadṛśaḥ sa tasyāḥ saṃbhrāntamantaḥ karaṇaṃ cakāra || 2 ||
[Analyze grammar]

netrāṇi vaidarbhasutāsakhīnāṃ vimuktatattadviṣāyagrahāṇi |
prāpustamekaṃ nirupākhyarūpaṃ brahmeva cetāṃsi yatavratānām || 3 ||
[Analyze grammar]

haṃsaṃ tanau sannihitaṃ carantaṃ munermanovṛttiriva svikāyām |
grahītukāmādariṇā śayena yatnādasau niścalatāṃ jagāhe || 4 ||
[Analyze grammar]

tāmiṅgitairapyanumāya māyāmayaṃ na bhaimyā viyadutpapāta |
tatpāṇimātmoparipātukaṃ tu moghaṃ vitene plutilāghavena || 5 ||
[Analyze grammar]

vyarth kṛtaṃ patrarathena tena tathā'vasāya vyavasāyamasyāḥ |
parasparāmarpitahastatālaṃ tatkālamālībhirahasyatālam || 6 ||
[Analyze grammar]

uccāṭanīyaḥ karatālikānāṃ dānādidānīṃ bhavatībhireṣaḥ |
yānveti māṃ druhyati mahyameva sātretyupālambhi tayālivargaḥ || 7 ||
[Analyze grammar]

dhṛtālpakopā hasite sakhīnāṃ chāyeva bhāsvantamabhiprayātuḥ |
śyāmātha haṃsasya karānavāptermandākṣalaksyā lagati sma paścāt || 8 ||
[Analyze grammar]

śastā na haṃsābhimukhī punaste yātreti tābhiśchalahasyamānā |
sāha sma naivāśakunībhavenme bhāvipriyāvedaka eṣa haṃsaḥ || 9 ||
[Analyze grammar]

haṃso'pyasau haṃsagateḥ sudatyāḥ puraḥ puraścāru calanbabhāse |
vailakṣyahetorgatimetadīyāmagre'nukṛtyopahasannivoccaiḥ || 10 ||
[Analyze grammar]

pade pade bhāVini bhāvinī taṃ yathā karaprāpyamavaiti nūnam |
tathā sakhelaṃ calatā latāsu pratārya tenācakṛṣe kṛśāṅgī || 11 ||
[Analyze grammar]

ruṣā niṣiddhālijanāṃ yadaināṃ chāyādvitīyāṃ kalayāṃcakāra |
tadā śramāmbhaḥ kaṇabhūṣitāṅgīṃ sa kīravanmānuṣavāgavādīt || 12 ||
[Analyze grammar]

aye kiyadyāvadupaiṣi dūraṃ vyarthaṃ pariśrāmyasi vā kimittham |
udeti te bhīrapi kiṃ nu bāle vilokayantyā na ghanā vanālīḥ || 13 ||
[Analyze grammar]

vṛthārpayantīmapathe padaṃ tvāṃ marullalatpallavapāṇikampaiḥ |
ālīva paśya pratiṣedhatīyaṃ kapotahuṃkāragirā vanālī || 14 ||
[Analyze grammar]

dhāryaḥ kathaṃkāramahaṃ bhavatyā viyadvihārī vasudhaikagatyā |
aho śiśutvaṃ tava khaṇḍitaṃ na smarasya sakhyā vayasāpyanena || 15 ||
[Analyze grammar]

sahasrapattrāsanapattrahaṃsa vaṃśasya pattrāṇi patatriṇaḥ smaḥ |
asmādṛśāṃ cāṭurasāmṛtāni svarlokaloketaradurlabhāni || 16 ||
[Analyze grammar]

svargāpagāhemamṛṇālinīnāṃ nālāmṛṇālāgrabhujo bhajāmaḥ |
annānurūpāṃ tanurūpaṛddhiṃ kāryaṃ nidānāddhi guṇānadhīte || 17 ||
[Analyze grammar]

dhāturniyogādiha naiṣaghīyaṃ līlāsaraḥ sevitumāgateṣu |
haimeṣu haṃseṣvahameka eva bhramāmi bhūlokavilokanotkaḥ || 18 ||
[Analyze grammar]

vidheḥ kadācidbhramaṇīvilāse śramāturebhyaḥ svamahattarebhyaḥ |
skandhasya viśrāntimadāṃ tadādi śramyāmi nāviśramaviśvago'pi || 19 ||
[Analyze grammar]

bandhāya divye na tiraści kaścitpāśādirāsāditapauruṣaḥ syāt |
ekaṃ vinā mādṛśi tannarasya svarbhogabhāgyaṃ viralodayasya || 20 ||
[Analyze grammar]

iṣṭena pūrtena nalasya vaśyāḥ svarbhogamatrāpi sṛjantyamartyāḥ |
mahīruhā dohadasekaśakterākālikaṃ korakamudgiranti || 21 ||
[Analyze grammar]

suvarṇaśailādavatīrya tūṛṇaṃ svarvāhinīvārikaṇāvakīrṇaiḥ |
taṃ vījayāmaḥ smarakelikāle pakṣairnṛpaṃ cāmarabaddhasakhyaḥ || 22 ||
[Analyze grammar]

kriyeta cetsādhuvibhakticintā vyaktistadā sā prathamābhidheyā |
yā svaujasāṃ sādhayituṃ vilāsaistāvatkṣamānāmapadaṃ bahu syāt || 23 ||
[Analyze grammar]

rājā sa yajvā vibudhavrajatrā kṛtvādhvarājyopamayaiva rājyam |
bhuṅkte śritaśṛotriyasātkṛtaśrīḥ pūrvaṃ tvaho śeṣamaśeṣamantyam || 24 ||
[Analyze grammar]

dāridryadāridraviṇaughavarṣairamoghameghavratamarthisārthe |
saṃtuṣṭamiṣṭāni tamiṣṭadevaṃ nāthanti ke nāma na lokanātham || 25 ||
[Analyze grammar]

asmatkila śrotrasudhāṃ vidhāya rambhā ciraṃ bhāmatulāṃ nalasya |
tatrānuraktā tamanāpya bheje tannāmagandhānnalakūbaraṃ sā || 26 ||
[Analyze grammar]

svarlokamasmābhiritaḥ prayātaiḥ kelīṣu tadgānaguṇānnipīya |
hā heti gāyanyadaśoci tena nāmnaiva hāhā harigāyano'bhūt || 27 ||
[Analyze grammar]

śṛṇvansadārastadudārabhāvaṃ hṛṣyanmuhurloma pulomajāyāḥ |
puṇyena nālokata lokapālaḥ pramodabāṣpāvṛtanetramālaḥ || 28 ||
[Analyze grammar]

sāpīśvare śṛṇvati tadguṇaughānprasahya ceto harato'rdhaśaṃbhuḥ |
abhūdaparṇāṅguliruddhakarṇā kadā na kaṇḍūyanakaitavena || 29 ||
[Analyze grammar]

alaṃ sajandharmavidhau vidhātā ruṇaddhi maunasya miṣeṇa vāṇīm |
tatkaṇṭhamāliṅgya rasasya tṛptāṃ na veda tāṃ vedajaḍaḥ sa vakrām || 30 ||
[Analyze grammar]

śriyastadāliṅganabhūrna bhūtā vratakṣatiḥ kāpi pativratāyāḥ |
samastabhūtātmatayā na bhūtaṃ tadbharturīrṣyākaluṣāṇunāpi || 31 ||
[Analyze grammar]

dhik taṃ vidheḥ pāṇimajātalajjaṃ nirmāti yaḥ parvaṇi pūrṇamindum |
manye sa viśaḥ smṛtatanmukhaśrīḥ kṛtvārdhamaujjhaddharamūrdhni yastam || 32 ||
[Analyze grammar]

nilīyate hrīvidhuraḥ svajaitraṃ śṛutvā vidhustasya mukhaṃ mukhānnaḥ |
sūre samudrasya kadāpi pūre kadācidabhrabhramadabhragarbhe || 33 ||
[Analyze grammar]

saṃjñāpya naḥ svadhvajabhṛtyavargāndaityāriratyabjunalāsyanutyai |
tatsaṃkucannābhisarojapītāddhāturvilajjaṃ ramate ramāyām || 34 ||
[Analyze grammar]

rekhābhirāsye gaṇanādivāsya dvātriṃśatā dantamayībhirantaḥ |
caturdaśāṣṭādaśa cātra vidyā dvedhāpi santīti śaśaṃsa vedhāḥ || 35 ||
[Analyze grammar]

śriyau narendrasya nirīkṣya tasya smarāmarendrāvapi na smarāmaḥ |
vāsena tasminkṣamayośca samyagbuddhau na dadhmaḥ khalu śeṣabuddhau || 36 ||
[Analyze grammar]

vinā patatraṃ vinatātanūjaiḥ samīraṇairīkṣaṇalakṣaṇīyaiḥ |
manobhirāsīdanaṇupramāṇairna laṅghitā dikkatamā tadaśvaiḥ || 37 ||
[Analyze grammar]

saṃgrāmabhūmīṣu bhavatyarīṇāmasrairnadīmātṛkatāṃ gatāsu |
tadbāṇadhārāpavanāśanānāṃ rājavrajīyairasubhiḥ subhikṣam || 38 ||
[Analyze grammar]

yaśo yadsyājani saṃyugeṣu kaṇḍūlabhāvaṃ bhajatā bhujena |
hetorguṇādeva digāpagālīkūlaṃkaṣatvavyasanaṃ tadīyam || 39 ||
[Analyze grammar]

yadi trilokī gaṇanāparā syāttasyāḥ samāptiryadi nāyuṣaḥ syāt |
pāreparārdhaṃ gaṇitaṃ yadi syādgaṇeyaniḥ śeṣaguṇo'pi sa syāt || 40 ||
[Analyze grammar]

avāritadvāratayā tiraścāmantaḥ pure tasya niviśya rājñaḥ |
gateṣu ramyeṣvadhikaṃ viśeṣamadhyāpayāmaḥ paramāṇumadhyāḥ || 41 ||
[Analyze grammar]

pīyūṣadhārānadharābhirantastāsāṃ rasodanvati majjayāmaḥ |
rambhādisaubhāgyarahaḥ kathābhiḥ kāvyena kāvyaṃ sṛjatādṛtābhiḥ || 42 ||
[Analyze grammar]

kābhirna tatrābhinavasmarājñā viśvāsanikṣepavaṇik triye'ham |
jihreti yannaiva kuto'pi tiryakkaścittiraścastrapate na tena || 43 ||
[Analyze grammar]

vārtāpi nāsatyapi sānyameti yogādarandhre hṛdi yaṃ nirundhe |
virañcinānānanavādadhautasamādhiśāstraśrutipūrṇakarṇaḥ || 44 ||
[Analyze grammar]

nalāśrayeṇa tridivopabhogaṃ tavānavāpyaṃ labhate batānyā |
kumudvatīvenduparigraheṇa jyotsnotsavaṃ durlabhamambujinyā || 45 ||
[Analyze grammar]

tannaiṣadhānūḍhatayā durāpaṃ śarma tvayāsmatkṛtacāṭujanma |
rasālavanyā madhupānuviddhaṃ saubhāgyamaprāptavasantayeva || 46 ||
[Analyze grammar]

tasyaiva vā yāsyasi kiṃ na hastaṃ dṛṣṭaṃ manaḥ kena vidheḥ praviśya |
ajātapāṇigrahaṇāsi tāvadrūpasvarūpātiśayāśrayaśca || 47 ||
[Analyze grammar]

niśā śaśāṅkaṃ śivayā girīśaṃ śṛyā hariṃ yojayataḥ pratītaḥ |
vidherapi svārasikaḥ prayāsaḥ parasparaṃ yogyasamāgamāya || 48 ||
[Analyze grammar]

velātigastraiṇaguṇābdhiveṇirna yogayogyāsi naletareṇa |
saṃdarbhyate darbhaguṇena mallīmālā na mṛdvī bhṛśakarkaśena || 49 ||
[Analyze grammar]

vidhiṃ vadhūsṛṣṭimapṛcchameva tadyānayugyo nalakeliyogyām |
tvannāmavarṇā iva karṇapītā mayāsya saṃkrīḍati cakricakre || 50 ||
[Analyze grammar]

anyena patyā tvayi yojitāyāṃ vijñatvakīrtyā gatajanmano vā |
janāpavādārṇavamuttarītuṃ vidhā vidhātuḥ katamā tarīḥ syāt || 51 ||
[Analyze grammar]

āstāṃ tadaprastutacintayālaṃ mayāsi tanvi śramitātivelam |
so'haṃ tadāgaḥ parimārṣṭukāmaḥ kimīpsitaṃ te vidadhe'bhidhehi || 52 ||
[Analyze grammar]

itīrayitvā virarāma pattrī sa rājaputrīhṛdayaṃ bubhutsuḥ |
hrade gabhīre hṛdi cāvagāḍhe śaṃsanti kāryāvataraṃ hi santaḥ || 53 ||
[Analyze grammar]

kiṃcittiraścīnavilolamaulirvicintya vācyaṃ manasā muhūrtam |
patatriṇaṃ sā pṛthivīndraputrī jagāda vaktreṇa tṛṇīkṛtenduḥ || 54 ||
[Analyze grammar]

dhikcāpale vatsimavatsalatvaṃ yatpreraṇāduttaralībhavantyā |
samīrasaṅgādiva nīrabhaṅgyā mayā taṭasyastvamupadruto'si || 55 ||
[Analyze grammar]

ādarśatāṃ svacchatayā prayāsi satāṃ sa tāvatkhalu darśanīyaḥ |
āgaḥ puraskurvati sāgasaṃ māṃ yasyātmanīdaṃ pratibimbitaṃ te || 56 ||
[Analyze grammar]

anāryamapyācaritaṃ kumāryā bhavānmama kṣāmyatu saumya tāvat |
haṃso'pi devāṃśatayāsi vandyaḥ śrīvatsalakṣmeva hi matsyamūrtiḥ || 57 ||
[Analyze grammar]

matprītimādhitsasi kāṃ tvadīkṣā mudaṃ madakṣṇorapi yātiśetām |
nijāmṛtairlocanasecanādvā pṛthakkiminduḥ sṛjati prajānām || 58 ||
[Analyze grammar]

manastu yaṃ nojjhati jātu yātu manorathaḥ kaṇṭhapathaṃ kathaṃ saḥ |
kā nāma bālā dvijarājapāṇigrahābhilāṣaṃ kathayedalajjā || 59 ||
[Analyze grammar]

vācaṃ tadīyāṃ paripīya mṛdvīṃ mṛdvīkayā tulyarasāṃ sa haṃsaḥ |
tatyāja toṣaṃ parapuṣṭaghuṣṭe ghṛṇāṃ ca vīṇākvaṇite vitene || 60 ||
[Analyze grammar]

mandākṣamandākṣaramudramuktvā tasyāṃ samākuñcitavāci haṃsaḥ |
tacchaṃsite kiṃcana saṃśayālurgirā mukhāmbhojamayaṃ yuyoja || 61 ||
[Analyze grammar]

kareṇa vāñcheva vidhuṃ vidhartuṃ yamitthamātthādariṇī tamartham |
pātuṃ śṛutibhyāmapi nādhikurve varṇaṃ śṛutervarṇa ivāntimaḥ kim || 62 ||
[Analyze grammar]

avāpyate vā kimiyadbhavatyā citaikapadyāmapi vidyate yaḥ |
yatrāndhakāraḥ kila cetaso'pi jihmetarairbrahma tadapyavāpyam || 63 ||
[Analyze grammar]

īśāṇimaiśvarya vivartamadhye lokeśalokeśayalokamadhye |
tiryañcamapyañca mṛṣānabhijñarasañjatopañjasamajñamajñam || 64 ||
[Analyze grammar]

madhye śrutīnāṃ prativeśinīnāṃ sarasvatī vāsavatī mukhe naḥ |
hriyeva tābhyaścalatīyamaddhā pathānna satsaṅgaguṇena naddhā || 65 ||
[Analyze grammar]

paryaṅkatāpannasarasvadaṅkāṃ laṅkāṃ purīmapyabhilāṣi cittam |
kutrāpi cedvastuni te prayāti tadapyavehi svaśaye śayālu || 66 ||
[Analyze grammar]

itīritā pattrarathena tena hrīṇā ca hṛṣṭā ca babhāṇa bhaimī |
ceto nalaṅkāmayate madīyaṃ nānyatra kutrāpi ca sābhilāṣam || 67 ||
[Analyze grammar]

vicintya bālājanaśīlaśailaṃ lajjānadīmajjadanaṅganāgam |
ācaṣṭa vispaṣṭamabhāṣamāṇāmenāṃ sa cakrāṅgapataṅgaśakraḥ || 68 ||
[Analyze grammar]

nṛpeṇa pāṇigrahaṇaspṛheti nalaṃ manaḥ kāmayate mameti |
āśleṣi na śleṣakaverbhavatyāḥ ślokadvayārthaḥ sudhiyā mayā kim || 69 ||
[Analyze grammar]

tvaccetasaḥ sthairyaviparyayaṃ tu saṃbhāvya bhāvyasmi tamajña eva |
lakṣye hi bālāhṛdi lolaśīle parāparāddheṣurapi smaraḥ syāt || 70 ||
[Analyze grammar]

mahīmahendraḥ khalu naiṣadhendustadbodhanīyaḥ kathamitthameva |
prayojanaṃ sāṃśayikaṃ pratīdṛkpṛthagjaneneva sa madvidhena || 71 ||
[Analyze grammar]

pitarniyogena nijecchayā vā yuvānamanyaṃ yadi vā vṛṇīṣe |
tvadarthamarthitvakṛti pratītiḥ kīdśṅmayi syānniṣadheśkrasya || 72 ||
[Analyze grammar]

tvayāpi kiṃ śaṅkitavikriye'sminnadhikriye vā viṣaye nidhātum |
itaḥ pṛthakprārthayase tu yadyatkurve tadurvīpatiputri sarvam || 73 ||
[Analyze grammar]

śravaḥ praviṣṭā iva tadgirastā vidhūya vaimatyadhutena mūrdhnā |
ūce hriyo'pi ślathitānurodhā punardharitrīpuruhūtaputrī || 74 ||
[Analyze grammar]

madanyadānaṃ prati kalpanā yā vedastvadīye hṛdi tāvadeṣā |
niśo'pi sometarakāntaśaṅkāmoṃkāramagresaramasya kuryāḥ || 75 ||
[Analyze grammar]

sarojinīmānasarāgavṛtteranarkasaṃparkamatarkayitvā |
madanyapāṇigrahaśaṅkiteyamaho mahīyastava sāhasikyam || 76 ||
[Analyze grammar]

sādhu tvayā tirkatametadeva svenānalaṃ yatkila saṃśrayiṣye |
vināmunā svātmani tu prahartuṃ mṛṣāgiraṃ tvāṃ nṛpatau na kartum || 77 ||
[Analyze grammar]

madvipralabhyaṃ punarāha yastvāṃ tarkaḥ sa kiṃ tatphalavāci mūkaḥ |
aśakyaśaṅkāvyabhicāraheturvāṇī na vedā yadi santu ke tu || 78 ||
[Analyze grammar]

anaiṣadhāyaiva juhoti tātaḥ kiṃ māṃ kṛśānau na śarīṛaśeṣām |
īṣṭe tanūjanmatanoḥ sa nūnaṃ matprāṇanāthastu nalastathāpi || 79 ||
[Analyze grammar]

tadekadāsītvapadādudagre madīpsite sādhu vidhitsutā te |
ahelinā kiṃ nalinī vidhatte sudhākareṇāpi sudhākareṇa || 80 ||
[Analyze grammar]

tadekalubdhe hṛdi me'sti labdhuṃ cintā na cintāmaṇimapyanarghyam |
citte samaikaḥ sakalatrilokīsāro nidhiḥ padmamukhaṃ sa eva || 81 ||
[Analyze grammar]

śrutaḥ sa dṛṣṭaśca haritsu mohāddhyātaḥ sa nīrandhritabuddhidhāram |
mamādya tatprāptirasuvyayo vā haste tavāste dvayamekaśeṣaḥ || 82 ||
[Analyze grammar]

saṃcīyatāmāśrutapālanotthaṃ matprāṇaviśrāṇanajaṃ ca puṇyam |
nivāṛyatāmārya vṛthā viśaṅkā bhadre'pi mudreyamaye bhṛśaṃ kā || 83 ||
[Analyze grammar]

alaṃ vilaṅghya priyavijña yāCjāṃ kṛtvāpi vāmyaṃ vividhaṃ vidheye |
yaśaḥ pathādāśravatāpadotthātkhalu skhalitvāstakhaloktikhelāt || 84 ||
[Analyze grammar]

svajīvamapyāṛtamude dadadbhyastava trapā nedṛśabaddhamuṣṭeḥ |
mahyaṃ madīyānyadasūnaditsordharmaḥ karādbhraśyati kīrtidhautaḥ || 85 ||
[Analyze grammar]

datvātmajīvaṃ tvayi jīvade'pi śudhyāmi jīvādhikade tu kena |
vidhehi tanmāṃ tvadṛṇānyaśoddhumamudradāridryasamudramagnām || 86 ||
[Analyze grammar]

krīṇīṣva majjīvitameva paṇyamanyannacedasti tadastu puṇyam |
jīveśadātaryadi te na dātuṃ yaśo'pi tāvatprabhavāmi gātum || 87 ||
[Analyze grammar]

varāṭikopakriyayāpi labhyānnebhyāḥ kṛtajñānathavādriyante |
prāṇaiḥ paṇaiḥ svaṃ nipuṇaṃ bhaṇantaḥ krīṇanti tāneva tu hanta santaḥ || 88 ||
[Analyze grammar]

sa bhūbhṛdaṣṭāvapi lokapālāstairme tadekāgradhiyaḥ prasede |
na hītarasmāddhaṭate yadetya svayaṃ tadāptipratibhūrmamābhūḥ || 89 ||
[Analyze grammar]

akāṇḍamevātmabhuvārjitasya bhūtvā pi mūlaṃ mayi vīraṇasya |
bhavānna me kiṃ naladatvametya kartā hṛdaścandanalepakṛtyam || 90 ||
[Analyze grammar]

alaṃ vilambya tvarituṃ hi velā kārye kila sthairyasahe vicāraḥ |
gurūpadeśaṃ gratibheva tīkṣṇā pratiīkṣate jātu na kālamartiḥ || 91 ||
[Analyze grammar]

abhyarthanīyaḥ sa gatena rājā tvayā na śuddhāntagato madartham |
priyāsyadākṣiṇyabalātkṛto hi tadodayedanyavadhūniṣedhaḥ || 92 ||
[Analyze grammar]

śuddhāntasaṃbhoganitāntatuṣṭe na naiṣadhe kāṛyamidaṃ nigādyam |
apāṃ hi tṛptāya na vāridhārā svāduḥ sugandhiḥ svadate tuṣārā || 93 ||
[Analyze grammar]

tvayā nidheyā na giro madarthāḥ kudhā kaduṣṇe hṛdi naiṣadhasya |
pittena dūne rasane sitāpi tiktāyate haṃsakulāvataṃsa || 94 ||
[Analyze grammar]

dharāturāṣāhi madarthayābjā kāṛyā na kāryāntaracumbicitte |
tadārthitasyānavabodhanidrā bibhartyavajñācaraṇasya mudrām || 95 ||
[Analyze grammar]

vijñena vijñāpyamidaṃ narendre tasmāttvayāsminsamayaṃ samīkṣya |
ātyantikāsiddhivilambisiddhyoḥ kāryasya kāryasya śubhā vibhāti || 96 ||
[Analyze grammar]

ityuktavatyā yadalopi lajjā sānaucitī cetasi naścakāstu |
smarastu sākṣī tadadoṣatāyāmunmādya yastattadavīvadattām || 97 ||
[Analyze grammar]

unmattamāsādya haraḥ smaraśca dvāvapyasīmāṃ mudamudvahete |
pūrvaḥ paraspardhitayā prasūnaṃ nūnaṃ dvitīyo virahādhidūnam || 98 ||
[Analyze grammar]

tathābhidhātrīmatha rājaputrīṃ nirṇīya tāṃ naiṣadhabaddharāgām |
amoci cañcūpuṭa maunamudrā vihāyasā tena vihasya bhūyaḥ || 99 ||
[Analyze grammar]

idaṃ yadi kṣmāpatiputri tattvaṃ paśyāmi tanna svavidheyamasmin |
tvāmuccakaistāpayatā nṛpaṃ ca pañceṣuṇaivājani yojaneyam || 10 ||
[Analyze grammar]

tvadabaddhabuddherbahirindriyāṇāṃ tasyopavāsavratināṃ tapobhiḥ |
tvāmadya labdhvāmṛtatṛptibhājāṃ svadevabhūyaṃcaritārthamastu || 101 ||
[Analyze grammar]

tulyāvayormūrtirabhūnmadīyā dagdhā paraṃ sāsya na tāpyate'pi |
ityabhyasūyanniva dehatāpaṃ tasyātanustvadvirahādvidhatte || 102 ||
[Analyze grammar]

lipiṃ dṛśā bhittivibhūṣaṇaṃ tvāṃ nṛpaḥ pibannādaranirnimeṣaḥ |
cakṣurjharairarpitamātmacakṣū rāgaṃ sa dhatte racitaṃ tvayā nu || 103 ||
[Analyze grammar]

pāturdṛśālekhyamayīṃ nṛpasya tvāmādarādastanimīlayāste |
mamedamityaśruṇi netravṛtteḥ prīternimeṣacchidayā vivādaḥ || 104 ||
[Analyze grammar]

tvaṃ hṛdgatā bhaimi bahirgatāpi prāṇāyitā nāsikayāsyagatyā |
na citramākrāmati tatra citrametanmano yadbhavadekavṛtti || 105 ||
[Analyze grammar]

ajasramārohasi dūradīrghāṃ saṃkalpasopānatatiṃ tadīyām |
śvāsānsa varṣatyadhikaṃ punaryaddhyānāttava tvanmayatāṃ tadāpya || 106 ||
[Analyze grammar]

hṛtasya yanmantrayate rahastvāṃ tadvyaktamāmantrayate mukhaṃ yat |
tadvairipuṣpāyudhamitracandra satyaucitī sā khalu tanmukhasya || 107 ||
[Analyze grammar]

sthitasya rātrāvadhiśayya śayyāṃ mohe manastasya nimajjayantī |
āliṅgya yā cumbati locane sā nidrādhunā na tvadṛte'ṅganā vā || 108 ||
[Analyze grammar]

smareṇa nistakṣya vṛthaiva bāṇairlāvaṇyaśeṣāṃ kṛśatāmanāyi |
anaṅgatāmapyayamāpyamānaḥ spardhāṃ na sārdhaṃ vijahāti tena || 109 ||
[Analyze grammar]

tvatprāpakāttrasyati nainaso'pi tvayyeṣa dāsye'pi na lajjate yat |
smareṇa bāṇairatitakṣya tīkṣṇairlūnaḥ svabhāvo'pi kiyānkamasya || 110 ||
[Analyze grammar]

smāraṃ jvaraṃ ghoramapatrapiṣṇoḥ siddhāgadaṅkāracaye cikitsau |
nidānamaunādaviśadviśālā sāṅkrāmikī tasya rujeva lajjā || 111 ||
[Analyze grammar]

bibheti ruṣṭāsi kiletyakasmātsa tvāṃ kilāpeti hasatyakāṇḍe |
yāntīmiva tvāmanu yātyahetoruktastvayeva prativakti modham || 112 ||
[Analyze grammar]

bhavadviyogācchidurārtidhārā yamasvasurmajjati niḥśaraṇyaḥ |
mūrcchāmayadvīpamahāndhyapaṅke hā hā mahībhṛdbhaṭakuñjaro'yam || 113 ||
[Analyze grammar]

savyāpasavyatyajanāddviruktaiḥ pañceṣubāṇaiḥ pṛthagarjitāsu |
daśāsu śeṣā khalu taddaśā yā tayā nabhaḥ puṣpyatu korakeṇa || 114 ||
[Analyze grammar]

tvayi smarādheḥ satatāsmitena prasthāpito bhūmibhṛtāsmi tena |
āgatya bhūtaḥ saphalo bhavatyā bhāvapratītyā guṇalobhavatyāḥ || 115 ||
[Analyze grammar]

dhanyāsi vaidarbhi guṇairudārairyayā samākṛṣyata naiṣadho'pi |
itaḥ stutiḥ kā khalu candrikāyā yadabdhimapyuttaralīkaroti || 116 ||
[Analyze grammar]

nalena bhāyāḥ śaśinā niśeva tvayā sa bhāyānniśayā śaśīva |
punaḥpunastadyugayugvidhātā yogyāmupāste nu yuvāṃ yuyukṣuḥ || 117 ||
[Analyze grammar]

stanadvaye tanvi paraṃ tavaiva pṛthau yadi prāpsyati naiṣadhasya |
analpavaidagdhyavivardhinīnāṃ pattrāvalīnāṃ valanā samāptim || 118 ||
[Analyze grammar]

ekaḥ sudhāṃśurna kathaṃcana syāttṛptikṣamastvannayanadvayasya |
tvallocanāsecanakastadastu nalāsyaśītadyutisadvitīyaḥ || 119 ||
[Analyze grammar]

aho tapaḥ kalpatarurnalīyastvatpāṇijāgrasphuradaṅkuraśrīḥ |
tvadbhrūyugaṃ yasya khalu dvipatrī tavādharo rajyati yatkalambaḥ || 120 ||
[Analyze grammar]

yaste navaḥ pallavitaḥ karābhyāṃ smitena yaḥ korakitastavāste |
aṅgamradimnā tava puṣpito yaḥ stanaśriyā yaḥ phalitastavaiva || 121 ||
[Analyze grammar]

kāṃsīkṛtāsītkhalu maṇḍalīndoḥ saṃsaktaraśmiprakarā smareṇa |
tulā ca nārācalatā nijaiva mithonurāgasya samīkṛtau vām || 122 ||
[Analyze grammar]

sattvasrutasvedamadhūtthasāndre tatpāṇipadme madanotsaveṣu |
lagnotthitāstvatkucapattralekhāstannirgatāstaṃ praviśantu bhūyaḥ || 123 ||
[Analyze grammar]

bandhāḍhyanānāratamallayuddhapramoditaiḥ kelivane marudbhiḥ |
prasūnavṛṣṭiṃ punaruktamuktāṃ pratīcchataṃ bhaimi yuvāṃ yuvānau || 124 ||
[Analyze grammar]

anyonyasaṃgamavaśādadhunā vibhātāṃ tasyāpi te'pi manasī vikasadvilāse |
sraṣṭuṃ punarmanasijasya tanuṃ pravṛttamādāviva dvyaṇukakṛtparamāṇuyugmam || 125 ||
[Analyze grammar]

kāmaḥ kausumacāpadurjayamamuṃ jetuṃ nṛpaṃ tvāṃ dhanurvallīmavraṇavaṃśajāmadhiguṇāmāsādya mādyatyasau |
grīvālaṃkṛtipaṭṭasūtralatayā pṛṣṭe kiyallambayā bhrājiṣṇuṃ kaṣarekhayeva nivasatsindūrasaundaryayā || 126 ||
[Analyze grammar]

tvadgucchāvalimauktikāni gulikāstaṃ rājahaṃsaṃ vibhorvedhyaṃ viddhi manobhuvaḥ svamapi tāṃ mañjuṃ dhanurmañjarīm |
yannityāṅkanivāsalālitatamajyābhajyamānaṃ lasannābhīmadhyabilā vilāsamakhilaṃ romālirālambate || 127 ||
[Analyze grammar]

puṣpeṣuścikureṣu te śaracayaṃ tvadbhālamūle dhanū raudre cakṣuṣi tajjitastanumanubhrāṣṭraṃ ca yaścikṣipe |
nirvidyāśrayadāśrayaṃ sa vitanustvāṃ tajjayāyādhunā patrālīstvadurojaśailanilayā tatparṇaśālāyate || 128 ||
[Analyze grammar]

ityālapatyatha patattriṇi tatra bhaimīṃ sakhyaścirāttadanusaṃdhiparāḥ parīyuḥ |
śarmāstu te visṛja māmiti so'pyudīrya vegājjagāma niṣadhādhiparājadhānīm || 129 ||
[Analyze grammar]

cetojanmaśaraprasūnamadhubhirvyāmiśratāmāśrayatpreyodūtapataṅgapuṃgavagavīhaiyaṅgavīnaṃ rasāt |
svādaṃsvādamasīmamiṣṭasurabhi prāptāpi tṛptiṃ na sā tāpaṃ prāpa nitāntamantaratulāmānarccha mūrcchāmapi || 130 ||
[Analyze grammar]

tasyā dṛśo nṛpatibandhumanuvrajantyāstaṃ vāṣpavāri nacirādavadhībabhūva |
pārśve'pi vipracakṛṣe yadanena dṛṣṭerārādapi vyavadadhe na tu cittavṛtteḥ || 131 ||
[Analyze grammar]

astitvaṃ kāryasiddheḥ sphuṭamatha kathayanpakṣateḥ kampabhedairākhyātuṃ vṛttametanniṣadhanarapatau sarvamekaḥ pratasthe |
kāntāre nirgatāsi priyasakhi padavī vismṛtā kiṃ nu mugdhe mārodīrehi yāmetyupahṛtavacaso ninyuranyāṃ vaṃyasyāḥ || 132 ||
[Analyze grammar]

sarasi nṛpamapaśyadyatra tattīrabhājaḥ smarataralamaśokānokahasyopamūlam |
kisalayadalatalpamlāyinaṃ prāpa taṃ sa jvaladasamaśareṣuspardhipuṣparddhimauleḥ || 133 ||
[Analyze grammar]

paravati damayanti tvāṃ na kiṃcidvadāmi drutamupanama kiṃ māmāha sā śaṃsa haṃsa |
iti vadati nale'sau tacchaśaṃsopanamraḥ priyamanu sukṛtāṃ hi svaspṛhāyā vilambaḥ || 134 ||
[Analyze grammar]

kathitamapi narendraḥ śaṃsayāmāsa haṃsaṃ kimiti kimiti pṛcchanbhāṣitaṃ sa priyāyāḥ |
adhigatamatha sāndrānandamādhvīkamattaḥ svayamapi śatakṛtvastattathānvācacakṣe || 135 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
tārtīyīkatayā mito'yamagamattasya prabandhe mahākāvye cāruṇi naiṣadhīyacarite sargo nisargojjvalaḥ || 136 ||
[Analyze grammar]