Chapter 10

sa rājavatsaḥ pṛthupīnavakṣāstau havyamantrādhikṛtau vihāya |
uttīrya gaṅgāṃ pracalattaraṅgāṃ śrīmadgṛhaṃ rājagṛhaṃ jagāma || 1 ||
[Analyze grammar]

śailaiḥ suguptaṃ ca vibhūṣitaṃ ca dhṛtaṃ ca pūtaṃ ca śivaistapodaiḥ |
pañcācalāṅkaṃ nagaraṃ prapede śāntaḥ svayambhūriva nākapṛṣṭham || 2 ||
[Analyze grammar]

gāmbhīryamojaśca niśāmya tasya vapuśca dīptaṃ puruṣānatītya |
visismiye tatra janastadānīṃ sthāṇuvratasyeva vṛṣadhvajasya || 3 ||
[Analyze grammar]

taṃ prekṣya yo 'nyena yayau sa tasthau yaścātra tasthau pathi so 'nvagacchat |
drutaṃ yayau yaṃ sadayaṃ sadhīraṃ yaḥ kaścidāste sma sa cotpapāta || 4 ||
[Analyze grammar]

kaścittamānarca janaḥ karābhyāṃ satkṛtya kaścicchirasā vavande |
snigdhena kaścidvacasābhyanandannaivaṃ jagāmāpratipūjya kaścit || 5 ||
[Analyze grammar]

taṃ jihriyuḥ prekṣya vicitraveṣāḥ prakīrṇavācaḥ pathi maunamīyuḥ |
dharmasya sākṣādiva saṃnikarṣānna kaścidanyāyamatirbabhūva || 6 ||
[Analyze grammar]

anyakriyāṇāmapi rājamārge strīṇāṃ nṛṇāṃ vā bahumānapūrvam |
tadeva kalpaṃ naradevasūtraṃ nirīkṣamāṇā na tu tasya dṛṣṭiḥ || 7 ||
[Analyze grammar]

bhruvau lalāṭaṃ mukhamīkṣaṇaṃ vā vapuḥ karau vā caraṇau gatiṃ vā |
yadeva yastasya dadarśa tatra tadeva tasyānubabandha cakṣuḥ || 8 ||
[Analyze grammar]

dṛṣṭvā śubhorṇabhruvamāyatākṣaṃ jvalaccharīraṃ śubhajālahastam |
taṃ bhikṣuveśaṃ kṣitipālanārhaṃ sañcukṣubhe rājagṛhasya lakṣmīḥ || 9 ||
[Analyze grammar]

śreṇyo 'tha bhartā magadhājirasya vāhyādvimānādvipulaṃ janaugham |
dadarśa papraccha ca tasya hetuṃ tatastamasmai puruṣaḥ śaśaṃsa || 10 ||
[Analyze grammar]

jñānaṃ paraṃ vā pṛthivīśriyaṃ vā viprairya ukto 'dhigamiṣyatīti |
sa eva śākyādhipatestanūjo nirīkṣyate pravrajito janena || 11 ||
[Analyze grammar]

tataḥ śrutārtho manasā gatārtho rājā babhāṣe puruṣaṃ tameva |
vijñāyatāṃ kva pratigacchatīti tathetyathainaṃ puruṣo 'nvagacchat || 12 ||
[Analyze grammar]

alolacakṣuryugamātradarśī nivṛttavāgyantritamandagāmī |
cacāra bhikṣāṃ sa tu bhikṣuvaryo nidhāya gātrāṇi calaṃ ca cetaḥ || 13 ||
[Analyze grammar]

ādāya bhaikṣaṃ ca yathopapannaṃ yayau gireḥ prasravaṇaṃ viviktam |
nyāyena tatrābhyavahṛtya cainanmahīdharaṃ pāṇḍavamāruroha || 14 ||
[Analyze grammar]

tasminvane lodhravanopagūḍhe mayūranādapratipūrṇakuñje |
kāṣāyavāsāḥ sa babhau nṛsūryo yathodayasyopari bālasūryaḥ || 15 ||
[Analyze grammar]

tatraivamālokya sa rājabhṛtyaḥ śreṇyāya rājñe kathayāṃ cakāra |
saṃśrutya rājā sa ca bāhumānyāttatra pratasthe nibhṛtānuyātraḥ || 16 ||
[Analyze grammar]

sa pāṇḍavaṃ pāṇḍavatulyavīryaḥ śailottamaṃ śailasamānavarṣmā |
maulīdharaḥ siṃhagatirnṛsiṃhaścalatsaṭaḥ siṃha ivāruroha || 17 ||
[Analyze grammar]

calasya tasyopari śṛṅgabhūtaṃ śāntendriyaṃ paśyati bodhisattvam |
paryaṅkamāsthāya virocamānaṃ śaśāṅkamudyantamivābhrakūṭāt || 18 ||
[Analyze grammar]

taṃ rūpalakṣmyā ca śamena caiva dharmasya nirmāṇamivopadiṣṭam |
savismayaḥ praśrayavān narendraḥ svayambhuvaṃ śakra ivopatasthe || 19 ||
[Analyze grammar]

taṃ nyāyato nyāyavatāṃ variṣṭhaḥ sametya papraccha ca dhātusāmyam |
sa cāpyavocatsadṛśena sāmnā nṛpaṃ manaḥsvāsthyamanāmayaṃ ca || 20 ||
[Analyze grammar]

tataḥ śucau vāraṇakarṇanīle śilātale 'sau niṣasāda rājā |
nṛpopaviśyānumataśca tasya bhāvaṃ vijijñāsuridaṃ babhāṣe || 21 ||
[Analyze grammar]

prītiḥ parā me bhavataḥ kulena kramāgatā caiva parīkṣitā ca |
jātā vivakṣā suta yā yato me tasmādidaṃ snehavaco nibodha || 22 ||
[Analyze grammar]

ādityapūrvaṃ vipulaṃ kulaṃ te navaṃ vayo dīptamidaṃ vapuśca |
kasmādiyaṃ te matirakrameṇa bhaikṣāka evābhiratā na rājye || 23 ||
[Analyze grammar]

gātraṃ hi te lohitacandanārhaṃ kāṣāyasaṃśleṣamanarhametat |
hastaḥ prajāpālanayogya eṣa bhoktuṃ na cārhaḥ paradattamannam || 24 ||
[Analyze grammar]

tatsaumya rājyaṃ yadi paitṛkaṃ tvaṃ snehātpiturnecchasi vikrameṇa |
na ca kṣamaṃ marṣayituṃ matiste bhuktvārdhamasmadviṣayasya śīghram || 25 ||
[Analyze grammar]

evaṃ hi na syātsvajanāvamardaḥ kālakrameṇāpi śamaśrayā śrīḥ |
tasmātkuruṣva praṇayaṃ mayi tvaṃ sadbhiḥ sahīyā hi satāṃ samṛddhiḥ || 26 ||
[Analyze grammar]

atha tvidānīṃ kulagarvitatvādasmāsu viśrambhaguṇo na te 'sti |
vyūhānyanekāni vigāhya vāṇairmayā sahāyena parāñjigīṣa || 27 ||
[Analyze grammar]

tadbuddhimatrānyatarāṃ vṛṇīṣva dharmārthakāmān vidhivadbhajasva |
vyatyasya rāgādi ha hi trivargaṃ pretyeha vibhraṃśamavāpnuvanti || 28 ||
[Analyze grammar]

yo hyarthadharmau paripīḍya kāmaḥ syāddharmakāmye paribhūya cārthaḥ |
kāmārthayoścoparameṇa dharmastyājyaḥ sa kṛtsno yadi kāṅkṣitārthaḥ || 29 ||
[Analyze grammar]

tasmāttrivargasya niṣevaṇena tvaṃ rūpametatsaphalaṃ kuruṣva |
dharmārthakāmādhigamaṃ hyanūnaṃ nṛṇāmanūnaṃ puruṣārthamāhuḥ || 30 ||
[Analyze grammar]

tanniṣphalau nārhasi kartumetau pīnau bhujau cāpavikarṣaṇārhau |
māndhātṛvajjetumimau hi yogyau lokāni hi trīṇi hi kiṃ punargām || 31 ||
[Analyze grammar]

snehena khalvetadahaṃ bravīmi naiśvaryarāgeṇa na vismayena |
imaṃ hi dṛṣṭvā tava bhikṣuveśaṃ jātānukampo 'smyapi cāgatāśruḥ || 32 ||
[Analyze grammar]

tadbhuṅkṣva bhikṣāśramakāma kāmānkāle 'si kartā priyadharma dharmam |
yāvatsvavaṃśapratirūparūpaṃ na te jarābhyetyabhibhūya bhūyaḥ || 33 ||
[Analyze grammar]

śaknoti jīrṇaḥ khalu dharmamāptuṃ kāmopabhogeṣvagatirjarāyāḥ |
ataśca yūnaḥ kathayanti kāmānmadhyasya vittaṃ sthavirasya dharmam || 34 ||
[Analyze grammar]

dharmasya cārthasya ca jīvaloke pratyarthibhūtāni hi yauvanāni |
saṃrakṣyamāṇānyapi durgrahāṇi kāmā yatastena yathā haranti || 35 ||
[Analyze grammar]

vayāṃsi jīrṇāni vimarśayanti dhīrāṇyavasthānaparāyaṇāni |
alpena yatnena śamātmakāni bhavantyagatyeva ca lajjayā ca || 36 ||
[Analyze grammar]

ataśca lolaṃ viṣayapradhānaṃ pramattamakṣāntamadīrghadarśi |
bahucchalaṃ yauvanamabhyatītya nistīrya kāntāramivāśvasanti || 37 ||
[Analyze grammar]

tasmādadhīraṃ capalapramādi navaṃ vayastāvadidaṃ vyapaitu |
kāmasya pūrvaṃ hi vayaḥ śaravyaṃ na śakyate rakṣitumindriyebhyaḥ || 38 ||
[Analyze grammar]

athau cikīrṣā tava dharma eva yajasva yajñaṃ kuladharma eṣaḥ |
yajñairadhiṣṭhāya hi nākapṛṣṭhaṃ yayau marutvānapi nākapṛṣṭham || 39 ||
[Analyze grammar]

suvarṇakeyūravidaṣṭabāhavo maṇipradīpojjvalacitramaulayaḥ |
nṛparṣayastāṃ hi gatiṃ gatā makhaiḥ śrameṇa yāmeva mahārṣayo yayuḥ || 40 ||
[Analyze grammar]

ityevaṃ magadhapatirvaco babhāṣe yaḥ samyagvalabhidiva dhruvaṃ babhāṣe |
tacchrutvā na sa vicacāra rājasūnuḥ kailāso giririva naikacitrasānuḥ || 41 ||
[Analyze grammar]