Chapter 9

tatastadā mantripurohitau tau vāṣpapratodābhihatau nṛpeṇa |
viddhau sadaśvāviva sarvayatnātsauhārdaśīghraṃ yayaturvanaṃ tat || 1 ||
[Analyze grammar]

tamāśramam jātapariśramau tāvupetya kāle sadṛśānuyātrau |
rājarddhimutsṛjya vinītaceṣṭāvupeyaturbhārgavadhiṣṇyameva || 2 ||
[Analyze grammar]

tau nyāyatastaṃ pratipūjya vipraṃ tenārcitau tāvapi cānurūpam |
kṛtāsanau bhārgavamāsanasthaṃ chittvā kathāmūcaturātmakṛtyam || 3 ||
[Analyze grammar]

śuddhaujasaḥ śuddhaviśālakīrterikṣvākuvaṃśaprabhavasya rājñaḥ |
imaṃ janaṃ vettu bhavānadhīraṃ śrutagrahe mantraparigrahe ca || 4 ||
[Analyze grammar]

tasyendrakalpasya jayantakalpaḥ putro jarāmṛtyubhayaṃ titīrṣuḥ |
ihābhyupetaḥ kila tasya hetorāvāmupetau bhagavānavaitu || 5 ||
[Analyze grammar]

tau so 'bravīdasti sa dīrghabāhuḥ prāptaḥ kumāro na tu nāvabuddhaḥ |
dharmo 'yamāvartaka ityavetya yātastvarāḍābhimukho mumukṣuḥ || 6 ||
[Analyze grammar]

tasmāttatastāvupalabhya tattvaṃ taṃ vipramāmanttya tadaiva sadyaḥ |
khinnāvakhinnāviva rājaputraḥ prasasratustena yataḥ sa yātaḥ || 7 ||
[Analyze grammar]

yāntau tatastau sṛjayā vihīnamapaśyatāṃ taṃ vapuṣā jvalantam |
nṛpopaviṣṭaṃ pathi vṛkṣamūle sūryaṃ ghanābhogamiva praviṣṭam || 8 ||
[Analyze grammar]

yānaṃ vihāyopayayau tatastaṃ purohito mantradhareṇa sārdham |
yathā vanasthaṃ sahavāmadevo rāmaṃ didṛkṣurmuniraurvaśeyaḥ || 9 ||
[Analyze grammar]

tāvarcayāmāsaturarhatastaṃ divīva śukrāṅgirasau mahendram |
pratyarcayāmāsa sa cārhatastau divīva śukrāṅgirasau mahendraḥ || 10 ||
[Analyze grammar]

kṛtābhyanujñāvabhitastatastau niṣīdatuḥ śākyakuladhvajasya |
virejatustasya ca saṃnikarṣe punarvasū yogagatāvivendoḥ || 11 ||
[Analyze grammar]

taṃ vṛkṣamūlasthamabhijvalantaṃ purohito rājasutaṃ babhāṣe |
yathopaviṣṭaṃ divi pārijāte vṛhaspatiḥ śakrasutaṃ jayantam || 12 ||
[Analyze grammar]

tvacchokaśalye hṛdayāvagāḍhe mohaṃ gato bhūmitale muhūrtam |
kumāra rājā nayanāmbuvarṣo yattvāmavocattadidaṃ nibodha || 13 ||
[Analyze grammar]

jānāmi dharmaṃ prati niścayaṃ te paraimi te 'cyāvinametamartham |
ahaṃ tvakāle vanasaṃśrayātte śokāgnināgnipratimena dahye || 14 ||
[Analyze grammar]

tadehi dharmapriya matpriyārthaṃ dharmārthameva tyaja buddhimetām |
ayaṃ hi mā śokarayaḥ pravṛddho nadīrayaḥ kūlamivābhihanti || 15 ||
[Analyze grammar]

meghāmbukakṣādriṣu yā hi vṛttiḥ samīraṇārkāgnimahāśanīnām |
tāṃ vṛttimasmāsu karoti śoko vikarṣaṇocchoṣaṇadāhabhedaiḥ || 16 ||
[Analyze grammar]

tadbhuṅkṣva tāvadvasudhādhipatyaṃ kāle vanaṃ yāsyasi śāstradṛṣṭe |
aniṣṭabandhau kuru māpyupekṣāṃ sarveṣu bhūteṣu dayā hi dharmaḥ || 17 ||
[Analyze grammar]

na caiṣa dharmo vana eva siddhaḥ pure 'pi siddhirniyatā yatīnām |
buddhiśca yatnaśca nimittamatra vanaṃ ca liṅgaṃ ca hi bhīrucihnam || 18 ||
[Analyze grammar]

maulīdharairaṃsaviṣaktahāraiḥ keyūraviṣṭabdhabhujairnarendraiḥ |
lakṣmyaṅkamadhye parivartamānaiḥ prāpto gṛhasthairapi mokṣadharmaḥ || 19 ||
[Analyze grammar]

dhruvānujau yau balivajrabāhū vaibhrājamāṣāḍhamathāntidevam |
videharājaṃ janakaṃ tathaiva pākadrumaṃ senajitaśca rājñaḥ || 20 ||
[Analyze grammar]

etān gṛhasthān nṛpatīnavehi naiḥśreyase dharmavidhau vinītān |
ubhe 'pi tasmādyugapadbhajasva cittādhipatyaṃ ca nṛpaśriyaṃ ca || 21 ||
[Analyze grammar]

icchāmi hi tvāmupaguhya gāḍhaṃ kṛtābhiṣekaṃ salilārdrameva |
dhṛtātapatraṃ samudīkṣamāṇastenaiva harṣeṇa vanaṃ praveṣṭum || 22 ||
[Analyze grammar]

ityabravīdbhūmipatirbhavantaṃ vākyena vāṣpagrathitākṣareṇa |
śrutvā bhavānarhati tatpriyārthaṃ snehena tatsnehamanuprayātum || 23 ||
[Analyze grammar]

śokāmbhasi tvatprabhave hyagādhe duḥkhārṇave majjati śākyarājaḥ |
tasmāttamuttāraya nāthahīnaṃ nirāśrayaṃ magnamivārṇave gām || 24 ||
[Analyze grammar]

bhīṣmeṇa gaṅgodarasambhavena rāmeṇa rāmeṇa ca bhārgaveṇa |
śrutvā kṛtaṃ karma pituḥ priyārthaṃ pitustvamapyarhasi kartumiṣṭam || 25 ||
[Analyze grammar]

saṃvardhayitrīṃ ca samehi devīmagastyajuṣṭāṃ diśamaprayātām |
pranaṣṭavatsāmiva vatsalāṃ gāmajasramārttāṃ karuṇaṃ rudantīṃ || 26 ||
[Analyze grammar]

haṃsena haṃsīmiva viprayuktāṃ tyaktāṃ gajeneva vane kareṇum |
ārttāṃ sanāthāmapi nāthahīnāṃ trātuṃ vadhūmarhasi darśanena || 27 ||
[Analyze grammar]

ekaṃ sutaṃ bālamanarhaduḥkhaṃ santāpamantargatamudvahantam |
taṃ rāhulaṃ mokṣaya bandhuśokād rāhūpasargādiva pūrṇacandram || 28 ||
[Analyze grammar]

śokāgninā tvadvirahendhanena niḥśvāsadhūmena tamaḥśikhena |
tvaddarśanāyarchati dahyamānaḥ so 'ntaḥpuraṃ caiva puraṃ ca kṛtsnam || 29 ||
[Analyze grammar]

sa bodhisattvaḥ paripūrṇasattvaḥ śrutvā vacastasya purohitasya |
dhyātvā muhūrtaṃ guṇavadguṇajñaḥ pratyuttaraṃ praśritamityuvāca || 30 ||
[Analyze grammar]

avaimi bhāvaṃ tanayaprasaktaṃ viśeṣato yo mayi bhūmipasya |
jānannapi vyādhijarāvipadbhyo bhītastvagatyā svajanaṃ tyajāmi || 31 ||
[Analyze grammar]

draṣṭuṃ priyaṃ kaḥ svajanaṃ hi necchennāsau yadi syātpriyaviprayogaḥ |
yadā tu bhūtvāpi bhavedviyogastato guruṃ snigdhamapi tyajāmi || 32 ||
[Analyze grammar]

maddhetukaṃ yattu narādhipasya śokaṃ bhavānarhati na priyaṃ me |
yatsvapnabhūteṣu samāgameṣu santapyate bhāvini viprayogaiḥ || 33 ||
[Analyze grammar]

evaṃ ca te niścayametu buddhirdṛṣṭvā vicitraṃ vividhapracāram |
santāpaheturna suto na bandhurajñānanaimittika eṣa tāpaḥ || 34 ||
[Analyze grammar]

yadādhvagānāmiva saṅgatānāṃ kāle viyogo niyataḥ prajānām |
prājño janaḥ ko nu bhajeta śokaṃ bandhupriyaḥ sannapi bandhuhīnaḥ || 35 ||
[Analyze grammar]

ihaiti hitvā svajanaṃ paratra pralabhya cehāpi punaḥ prayāti |
gatvāpi tatrāpyaparatra gacchetyevaṃ jano yogini ko 'nurodhaḥ || 36 ||
[Analyze grammar]

yadā ca garbhātprabhṛti pravṛttaḥ sarvāsv avasthāsu vadhāya mṛtyuḥ |
kasmādakāle vanasaṃśrayaṃ me putrapriyastatra bhavān avocat || 37 ||
[Analyze grammar]

bhavatyakālo viṣayābhipattau kālastathaivābhividhau pradiṣṭaḥ |
kālo jagatkarṣati sarvakālānarcārhake śreyasi sarvakālaḥ || 38 ||
[Analyze grammar]

rājyaṃ mumukṣurmayi yacca rājā tadapyudāraṃ sadṛśaṃ pituśca |
pratigrahītuṃ mama na kṣamaṃ tu lobhādapathyānnamivāturasya || 39 ||
[Analyze grammar]

kathaṃ nu mohāyatanaṃ nṛpatvaṃ kṣamaṃ prapattuṃ viduṣā nareṇa |
sodvegatā yatra madaḥ śramaśca paropacāreṇa ca dharmapīḍā || 40 ||
[Analyze grammar]

jāmbūnadaṃ harmyamiva pradīptaṃ viṣeṇa saṃyuktamivottamānnam |
grāhākulaṃ cāmbviva sāravindaṃ rājyaṃ hi ramyaṃ vyasanāśrayaṃ ca || 41 ||
[Analyze grammar]

ityātmavijñānaguṇānurūpaṃ muktaspṛhaṃ hetumadūrjitaṃ ca |
śrutvā narendrātmajamuktavantaṃ pratyuttaraṃ mantradharo 'pyuvāca || 42 ||
[Analyze grammar]

yo niścayo mantravarastavāyaṃ nāyaṃ na yukto na tu kālayuktaḥ |
śokāya hitvā pitaraṃ vayaḥsthaṃ syāddharmakāmasya hi te na dharmaḥ || 43 ||
[Analyze grammar]

nūnaṃ ca buddhistava nātisūkṣmā dharmārthakāmeṣvavicakṣaṇā vā |
hetoradṛṣṭasya phalasya yastvaṃ pratyakṣamarthaṃ paribhūya yāsi || 44 ||
[Analyze grammar]

punarbhavo 'stīti ca kecidāhurnāstīti kecinniyatapratijñāḥ |
evaṃ yadā saṃśayito 'yamarthastasmāt kṣamaṃ bhoktumupasthitā śrīḥ || 45 ||
[Analyze grammar]

bhūyaḥ pravṛttiryadi kācidasti raṃsyāmahe tatra yathopapattau |
atha pravṛttiḥ parato na kācitsiddho 'prayatnājjagato 'sya mokṣaḥ || 46 ||
[Analyze grammar]

astīti kecitparalokamāhurmokṣasya yogaṃ na tu varṇayanti |
agneryathā hyuṣṇamapāṃ dravatvaṃ tadvatpravṛttau prakṛtiṃ vadanti || 47 ||
[Analyze grammar]

kecitsvabhāvāditi varṇayanti śubhāśubhaṃ caiva bhavābhavau ca |
svābhāvikaṃ sarvamidaṃ ca yasmādato 'pi mogho bhavati prayatnaḥ || 48 ||
[Analyze grammar]

yadindriyāṇāṃ niyataḥ pracāraḥ priyāpriyatvaṃ viṣayeṣu caiva |
saṃyujyate yajjarayārttibhiśca kastatra yatno nanu sa svabhāvaḥ || 49 ||
[Analyze grammar]

adbhirhutāśaḥ śamamabhyupaiti tejāṃsi cāpo gamayanti śoṣam |
bhinnāni bhūtāni śarīrasaṃsthānyaikyaṃ ca dattvā jagadudvahanti || 50 ||
[Analyze grammar]

yatpāṇipādodarapṛṣṭhamūrdhnā nirvartate garbhagatasya bhāvaḥ |
yadātmanastasya ca tena yogaḥ svābhāvikaṃ tatkathayanti tajjñāḥ || 51 ||
[Analyze grammar]

kaḥ kaṇṭakasya prakaroti taikṣṇyaṃ vicitrabhāvaṃ mṛgapakṣiṇāṃ vā |
svabhāvataḥ sarvamidaṃ pravṛttaṃ na kāmakāro 'sti kutaḥ prayatnaḥ || 52 ||
[Analyze grammar]

sargaṃ vadantīśvaratastathānye tatra prayatne puruṣaṣya ko 'rthaḥ |
ya eva heturjagataḥ pravṛttau heturnivṛttau niyataḥ sa eva || 53 ||
[Analyze grammar]

kecidvadantyātmanimittameva prādurbhavaṃ caiva bhavakṣayaṃ ca |
prādurbhavaṃ tu pravadantyayatnādyatnena mokṣādhigamaṃ bruvanti || 54 ||
[Analyze grammar]

naraḥ pitṝṇāmanṛṇaḥ prajābhirvedairṛṣīṇāṃ kratubhiḥ surāṇām |
utpadyate sārdhamṛṇaistribhistairyasyāsti mokṣaḥ kila tasya mokṣaḥ || 55 ||
[Analyze grammar]

ityevametena vidhikrameṇa mokṣaṃ sayatnasya vadanti tajjñāḥ |
prayatnavanto 'pi hi vikrameṇa mumukṣavaḥ khedamavāpnuvanti || 56 ||
[Analyze grammar]

tatsaumya mokṣe yadi bhaktirasti nyāyena sevasva vidhiṃ yathoktam |
evaṃ bhaviṣyatyupapattirasya santāpanāśaśca narādhipasya || 57 ||
[Analyze grammar]

yā ca pravṛttā bhavadoṣabuddhistapovanebhyo bhavanaṃ praveṣṭum |
tatrāpi cintā tava tāta mā bhūt pūrve 'pi jagmuḥ svagṛhaṃ vanebhyaḥ || 58 ||
[Analyze grammar]

tapovanastho 'pi vṛtaḥ prajābhirjagāma rājā puramambarīṣaḥ |
tathā mahīṃ viprakṛtāmanāryaistapovanādetya rarakṣa rāmaḥ || 59 ||
[Analyze grammar]

tathaiva śālvādhipatirdrumākṣo vanātsasūnuḥ svapuraṃ praviśya |
brahmarṣibhūtaśca munervaśiṣṭhāddadhre śriyaṃ sāṅkṛtirantidevaḥ || 60 ||
[Analyze grammar]

evaṃvidhā dharmayaśaḥpradīptā vanāni hitvā bhavanānyabhīyuḥ |
tasmānna doṣo 'sti gṛhaṃ praveṣṭuṃ tapovanāddharmanimittameva || 61 ||
[Analyze grammar]

tato vacastasya niśamya mantriṇaḥ priyaṃ hitaṃ caiva nṛpasya cakṣuṣaḥ |
anūnamavyastamasaktamadrutaṃ dhṛtau sthito rājasuto 'bravīdvacaḥ || 62 ||
[Analyze grammar]

ihāsti nāstīti ya eṣa saṃśayaḥ parasya vākyairna mamātra niścayaḥ |
avetya tattvaṃ tapasā śamena vā svayaṃ grahīṣyāmi yadatra niścitam || 63 ||
[Analyze grammar]

na me kṣamaṃ saṅgaśataṃ hi darśanaṃ grahītumavyaktaparaṃ parāhatam |
buddhaḥ parapratyayato hi ko vrajejjano 'ndhakāre 'ndha ivāndhadeśitaḥ || 64 ||
[Analyze grammar]

adṛṣṭatattvasya sato 'pi kiṃ tu me śubhāśubhe saṃśayite śubhe matiḥ |
vṛthāpi khedo 'pi varaṃ śubhātmanaḥ sukhaṃ na tattve 'pi vigarhitātmanaḥ || 65 ||
[Analyze grammar]

imaṃ tu dṛṣṭvāgamamavyavasthitaṃ yaduktamāptaistadavehi sādhviti |
prahīṇadoṣatvamavehi cāptatāṃ prahīṇadoṣo hyanṛtaṃ na vakṣyati || 66 ||
[Analyze grammar]

gṛhapraveśaṃ prati yacca me bhavānuvāca rāmaprabhṛtīn nidarśanam |
na te pramāṇaṃ na hi dharmaniścayeṣvalaṃ pramāṇāya parikṣatavratāḥ || 67 ||
[Analyze grammar]

tadevamapyeva ravirmahīṃ patedapi sthiratvaṃ himavān giristyajet |
adṛṣṭatattvo viṣayonmukhendriyaḥ śrayeya na tveva gṛhān pṛthagjanaḥ || 68 ||
[Analyze grammar]

ahaṃ viśeyaṃ jvalitaṃ hutāśanaṃ na cākṛtārthaḥ praviśeyamālayam |
iti pratijñāṃ sa cakāra garvito yatheṣṭamutthāya ca nirmamo yayau || 69 ||
[Analyze grammar]

tataḥ savāṣpau sacivadvijāvubhau niśamya tasya sthirameva niścayam |
viṣaṇṇavaktrāvanugamya duḥkhitau śanairagatyā purameva jagmatuḥ || 70 ||
[Analyze grammar]

tatsnehādatha nṛpateśca bhaktitastau sāpekṣaṃ pratiyayatuśca tasthatuśca |
durdharṣaṃ ravimiva dīptamātmabhāsā taṃ draṣṭuṃ na hi pathi śekaturna moktum || 71 ||
[Analyze grammar]

tau jñātuṃ paramagatergatiṃ tu tasya pracchannāṃścarapuruṣāñchucīn vidhāya |
rājānaṃ priyasutalālasaṃ nu gatvā drakṣyāvaḥ kathamiti jagmatuḥ kathañcit || 72 ||
[Analyze grammar]