Chapter 22

[English text for this chapter is available]

jaiminiruvāca |
rājātha tamuvācedaṃ nirlakṣya gamanaṃ katham |
ayaṃ puṣparatho'styeva manaso vegavānmune || 1 ||
[Analyze grammar]

enamāruhya yāsyāvaḥ kṣaṇaṃ tāvatpratīkṣyatām |
yāvadetānanujñāpya prāsāde hyadhikāriṇaḥ || 2 ||
[Analyze grammar]

pradakṣiṇīkṛtya vibhumāyāmi munisattama |
nārado'pi vacaḥ śrutvā śraddadhāno nṛpoktiṣu || 3 ||
[Analyze grammar]

kareṇa dhṛtvā rājānaṃ mahāvedīṃ praviśya ca |
sahitaṃ rāmabhadrābhyāṃ natvā kṛṣṇaṃ muhurmuhuḥ |
anujñāṃ prārthayāmāsa brahmalokagatiṃ prati || 4 ||
[Analyze grammar]

indradyumno'pi vacasā manasā vapuṣā harim |
pradakṣiṇīkṛtya punarnatvā sāṣṭāṃgamunmanāḥ |
brahmalokagatiṃ viprā yācate sma kṛtāṃjaliḥ || 5 ||
[Analyze grammar]

ubhau tau divyayānena jagmaturmunibhūbhṛtau |
pradakṣiṇīkṛtya raviṃ vyomamaṇḍalamadhyagam |
uparyupari jagmāte vyatītya dhruvamaṃḍalam || 6 ||
[Analyze grammar]

janalokagataiḥ siddhaiḥ satvarāvanatonmukhaiḥ |
vīkṣyamāṇau mudā yuktau saṃlapaṃtau parasparam || 7 ||
[Analyze grammar]

bhagavaccaritaṃ viprā manomalaviśodhanam |
jīvanmukto muniśreṣṭhaḥ sarvalokānbhramannayam |
yathānupahatavrajyastathāyaṃ martyavāsyapi || 8 ||
[Analyze grammar]

bhūpatiḥ prayayau śīghraṃ viṣṇubhaktiprasādataḥ |
brahmāṃḍaviṣaye naitadduṣprāpyaṃ vastu vidyate || 9 ||
[Analyze grammar]

viṣṇubhaktena yallabhyamathavā muktimeti saḥ |
maharlokagataiḥ siddhaiḥ sādarābhyarcitau ca tau || 10 ||
[Analyze grammar]

indradyumno na sasmāra pārthivaṃ vāsamātmanaḥ |
kramādūrdhvagatirgacchanpaśyansaukhyaikabhājanān || 11 ||
[Analyze grammar]

nirdvaṃdvānabhilāṣottha tatkṣaṇānekapauruṣān |
kevalaṃ bhagavatprītyai karmabhūmau cakāra yat || 12 ||
[Analyze grammar]

prāsādaṃ ciṃtayāmāsa saṃpūrṇo vā na vā bhavet |
mayyāgate brahmalokaṃ śatrubhirvābhibhūyate || 13 ||
[Analyze grammar]

ślathādarā vā bhūyāsuḥ sevakā dravyalobhataḥ |
gṛhītavetanāḥ śilpivṛṃdā maṃdakriyāstathā |
na śīghraṃ ghaṭayiṣyaṃti mayi brahmakṣayāgate || 14 ||
[Analyze grammar]

yāvadgamiṣye dhātāraṃ gṛhītvāhaṃ caturmukham |
tāvanna punareva syātprāsādo mayi dūrage || 15 ||
[Analyze grammar]

ihāyātāstu ye pūrve na punaste kṣitiṃ gatāḥ |
manvānā mama sāmaṃtā itthaṃ vā duṣṭamānasāḥ |
rājyaṃ mamāhariṣyaṃti dviṣataḥ kimu sāṃpratam || 16 ||
[Analyze grammar]

itthaṃ suvignamanasā ciṃtayānaṃ mahīpatim |
atītānāgatajñānanidhirmuniruvāca tam || 17 ||
[Analyze grammar]

kiṃ ciṃtayasi rājeṃdra tvamevaṃ dīnamānasaḥ |
yatra cābhyāgatāvāvāṃ na ciṃtāviṣayo hyayam || 18 ||
[Analyze grammar]

nādhayo vyādhayaścātra prabhavaṃti kadācana |
na jarā na ca vā mṛtyuḥ kimanyaduḥkhahetukam || 19 ||
[Analyze grammar]

kṛtārtho'si mahābhāga yanmānuṣavapuḥ svayam |
brahmalokamihāyātaḥ pratyakṣaṃ dṛṣṭavānharim || 20 ||
[Analyze grammar]

ihāyātā na śocaṃti heye saṃsārakalpake |
bruvāṇamitthaṃ bhūpālastamuvāca munīśvaram || 21 ||
[Analyze grammar]

śocāmi bhagavanrājñaḥ svajanabandhuṣu |
samārabdho bhagavataḥ prāsādo yo mayādhunā || 22 ||
[Analyze grammar]

atrāgataṃ māṃ te jñātvā nānutiṣṭhaṃti sevakāḥ |
ārabdhasya pratiṣṭhā hi kartavyā niścitā mune || 23 ||
[Analyze grammar]

tasyāṃtarāyaṃ saṃbhāvya duḥkhitaṃ me manaḥ prabho |
tasya tadvacaṃ śrutvā prahasya munirabravīt || 24 ||
[Analyze grammar]

prajāpatisamatvaṃ hi na tu sāmānyabhūpatiḥ |
kenāpyapakṛtaṃ naiva bhūmau pūrvairanuṣṭhitam || 25 ||
[Analyze grammar]

kiṃ punastava kṛtyaṃ tu yaḥ sṛṣṭisthitihānikṛt |
brahmalokaṃ gatasyādya pratāpayaśasā tava || 26 ||
[Analyze grammar]

trailokye bhramato nityaṃ yathā sūryaniśākarau |
yasya kāryeṣu bhagavānsahāyo'sau caturmukhaḥ || 27 ||
[Analyze grammar]

teṣu kiṃ rājaśārdūla vighnaśaṃkāpi jāyate |
eṣa dūre'sti rājeṃdra pratyakṣaṃ yastava dviṣām || 28 ||
[Analyze grammar]

sadomadhya gataḥ śakraḥ sākṣāttrijagatīpatiḥ |
viśeṣato jagannāthaprāsāde kaḥ pumānnṛpa || 29 ||
[Analyze grammar]

nihaṃtuṃ manasāpīcchettatra śaṃkāstu mā tava |
tadagrataḥ paśya bhūpa caṃdrakoṭisamatviṣā || 30 ||
[Analyze grammar]

parito hlādajanakaḥ sudhāsāgarakoṭivat |
yaścāyaṃ tejasāṃ rāśirjānīhi brahmasadmanaḥ || 31 ||
[Analyze grammar]

itthamālapatastau tu brahmalokāṃtikaṃ gatau |
śuśruvāte sudūrāttau brahmarṣīṇāṃ mukhodgatam || 32 ||
[Analyze grammar]

svādhyāyaśabdaṃ supadaṃ spaṣṭavarṇakramasvaram |
itihāsapurāṇāni cchaṃdaḥ kalpāni gāthikāḥ || 33 ||
[Analyze grammar]

asaṃkīrṇojjvalapadaṃ śrūyate pravibhāgaśaḥ |
atraitadrājaśārdūla jānīhi brahmaṇaḥ puram || 34 ||
[Analyze grammar]

sabhā hi dṛśyate caiṣā yatra lokapitāmahaḥ |
sārddhaṃ brahmarṣimukhyaiśca sukhāsīnaścaturmukhaḥ || 35 ||
[Analyze grammar]

nānā caitanyaśabalairjīvanmuktairupāsitaḥ |
yatrāgatāni varttaṃte na saṃsārābdhisaṃkaṭe || 36 ||
[Analyze grammar]

saditi brahmaṇo nāma tasyāyaṃ bhuvanottamaḥ |
satyaloka iti khyātastadūrdhvaṃ nāsti kiṃcana || 38 ||
[Analyze grammar]

asyaiva kiṃcidupari adhaścāṃḍakapālataḥ |
vaikuṇṭhabhuvanaṃ rājanmuktā yatra vasaṃti vai || 38 ||
[Analyze grammar]

yatra yogīśvaraḥ sākṣādyogiciṃtyo janārdanaḥ |
caitanyavapurāste vai sāṃdrānaṃdātmakaḥ prabhuḥ || 39 ||
[Analyze grammar]

yaṃ prāpya na nivarttaṃte mṛtyusaṃsāravartmani |
yamupāste sadā brahmā jīvanmuktaiḥ svamuktaye || 40 ||
[Analyze grammar]

kalpitasyāyuṣonte'sāvebhiḥ sārddhaṃ prapadyate |
sa eṣa sraṣṭā lokānāṃ matsyakūrmādirūpadhṛk || 41 ||
[Analyze grammar]

rakṣitā raudrarūpeṇa saṃharttā lokabhāvanaḥ |
indradyumnaṃ vadannitthaṃ prāpa brahmaniketanam || 42 ||
[Analyze grammar]

kṣaṇena ca sabhādvāri prakoṣṭhe sa nyavartata |
yatra tiṣṭhanti dikpālāḥ śakrādyāḥ paritastathā || 43 ||
[Analyze grammar]

cirakālaṃ dhyānaparāstathā manvaṃtarādhipāḥ |
pṛthagjananibhā dvāḥsthaniṣiddhāṃtaḥ praveśanāḥ || 44 ||
[Analyze grammar]

indradyumnena sahitaṃ nāradaṃ pravilokya saḥ |
dvārapālaḥ savinayaṃ nanāmānatakandharaḥ || 45 ||
[Analyze grammar]

caturdaśānāṃ lokānāṃ bhramaṇe rasika prabho |
tvayā vinā śobhate no svāmiṃstava pituḥ sabhā || 46 ||
[Analyze grammar]

saṃtyeva munayaḥ śreṣṭhā brāhmaṇā brahmavidvarāḥ |
gautamādyāstathāpyeṣā na ramyā brahmaṇaḥ sabhā || 47 ||
[Analyze grammar]

bahutārā surajanī caṃdreṇeva prakāśate |
iti stuvandadau tasya praveśaṃ vinayānvitaḥ || 48 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde dvāviṃśo'dhyāyaḥ || 22 ||
[Analyze grammar]