Chapter 21

[English text for this chapter is available]

jaiminiruvāca |
iti bruvāṇaṃ rājarṣiṃ kaścidṛgvedapāragaḥ |
vedāṃtavijjñānaśīlo dvijo vākyaṃ mudā jagau || 1 ||
[Analyze grammar]

aho tavāyaṃ khalu bhāgyarāśiryenāvirāsīdbhuvi dārumūrtiḥ |
yasyātyupāstiṃ śrutirāha muktipradāmanātmajñavimohitānām || 2 ||
[Analyze grammar]

ya eṣa plavate dāruḥ siṃdhoḥ pāre hyapauruṣam |
tamupāsya durārādhyaṃ muktiṃ yāṃti sudurlabhām || 3 ||
[Analyze grammar]

brahmajñānanidhiḥ sākṣānnāradaḥ pratyuvāca yat |
na hi vedāṃtavacaso'parasmājjñānamasya vai || 4 ||
[Analyze grammar]

na hi pravṛttirviṣṇostu vinā vedaṃ pravartate |
pareṣāṃ svasya vā sṛṣṭau śrutiprāmāṇyavānprabhuḥ || 5 ||
[Analyze grammar]

vinā śrutiṃ pravarteccetkastatprāmāṇyamṛcchati |
tasmācchrutiprasiddho'yamavatāro'tra bhūpate || 6 ||
[Analyze grammar]

vedāṃtavedyaṃ puruṣaṃ gītaṃ taṃ sāmagītiṣu |
pratimāṃ na tu jānīhi niḥśreyasakaraṃ nṛṇām || 7 ||
[Analyze grammar]

darśanādeva naḥ śāṃtaṃ sudṛḍhaṃ tama uttamam |
saṃtyeva śrutayaḥ pūrvametadarcāprakāśikāḥ || 8 ||
[Analyze grammar]

etadarcā praśastā vai sadarthe viniyojitā |
aho bhāratavarṣasthā manuṣyāḥ kṣīṇakalmaṣāḥ || 9 ||
[Analyze grammar]

apavargaprado yeṣāmāvirāsījjanārdanaḥ |
tatrāpyayaṃ coḍhradeśaḥ sarveṣāmuttamottamaḥ || 10 ||
[Analyze grammar]

yatrasthāścarmanetreṇa paśyaṃti brahmarūpiṇam |
śrutismṛtīnāṃ gahanaḥ paṃthā karmabhirākulaḥ || 11 ||
[Analyze grammar]

yena yātā bhramaṃtīha ghaṭīyaṃtravadākulāḥ |
nirvyalīkapadaprāptihetureṣa sa cinmayaḥ || 12 ||
[Analyze grammar]

śrutyādibhirvinopāyaiḥ paramānaṃdamuktidaḥ |
niraṃtaragatāyātaduḥsthitānāṃ durātmanām || 13 ||
[Analyze grammar]

eṣa dāruvapurviṣṇuḥ sukhadātā subāṃdhavaḥ |
śrutismṛtyuktaniyamā vartaṃte neha pārthiva || 14 ||
[Analyze grammar]

yathā tathā dṛṣṭipathamācāṃḍālādvimuktidaḥ |
abhaktaścedamuṃ paśyedgatānugatiko naraḥ || 15 ||
[Analyze grammar]

aśvamedhasahasrāṇāṃ phalaṃ hyavikalaṃ labhet |
bhajeccenniyamastho hi bhaktimāndṛḍhamānasaḥ || 16 ||
[Analyze grammar]

asaṃśayaṃ sa sāyujyaṃ brahmaṇā labhate naraḥ |
kva duḥkhāyāsabahulamanāyāsavinaśvaram || 17 ||
[Analyze grammar]

acirasthaṃ kṣudraphalaṃ punarāvṛttilakṣaṇam |
kvedaṃ dārumayaṃ brahma pāparāśidavānalam || 18 ||
[Analyze grammar]

saccidānaṃdakaivalyamuktidaṃ darśanādapi |
vedānuvacanādīni duṣkarāṇi durātmanām || 19 ||
[Analyze grammar]

mahātmabhistairyatprāpyaṃ tadavyagramayaṃ dadet |
anyakṣetreṣu bhagavānsudūro martyavāsinām || 20 ||
[Analyze grammar]

svakṣetre'sminnivasati nityaṃ muktiprado vibhuḥ |
asmādatra mahābhāga tiṣṭha svabalapauruṣaḥ || 21 ||
[Analyze grammar]

vidvattamo'si bhaktaśca sāṃgopāṃgamamuṃ bhaja || 22 ||
[Analyze grammar]

jaiminiruvāca |
dvijasya tadvacaḥ śrutvā nārado hṛṣṭamānasaḥ |
sādhūktaṃ dvijavaryeṇa śrautamārgānusāriṇā || 23 ||
[Analyze grammar]

sṛṣṭyādau brahmaniśvāsairabhavadvedasaṃhatiḥ |
tatropaniṣadartho'yaṃ sāṃprataṃ vyaktimāgataḥ || 24 ||
[Analyze grammar]

vettyetadarthaṃ bhagavānpadmayoniḥ prajāpatiḥ |
ajñāsiṣaṃ ca bhūpāla sāṃprataṃ tanmukhādaham || 25 ||
[Analyze grammar]

tasyājñayā kṛtaṃ sarvaṃ yathābhilaṣitaṃ tava |
enamārādhya tiṣṭhātra yāmyahaṃ brahmaṇoṃ'tikam || 26 ||
[Analyze grammar]

kṛtaṃ nivedayiṣyāmi prakāśaṃ ca muradviṣaḥ |
prāsādaṃ kuru bhūpāla dhanena mahatā tathā || 27 ||
[Analyze grammar]

prāsāde narasiṃhaṃ tu pratiṣṭhāpya vimucyase || 28 ||
[Analyze grammar]

jaiminiruvāca |
tacchrutvā sa tu bhūmīṃdraḥ pratyuvāca muniṃ tadā |
maharṣe'haṃ tvayā sārddhaṃ yiyāsurbrahmaṇoṃ'tikam || 29 ||
[Analyze grammar]

yatprasādājjagannāthaścake'yaṃ locanātithiḥ |
nivedya taṃ ca prāsādaṃ pratiṣṭhārthaṃ muradviṣaḥ || 30 ||
[Analyze grammar]

vijñāpayiṣye sānnidhye prāsādasthāpanotsavam |
yathā svayaṃ samāgamya brahmalokātpitāmahaḥ || 31 ||
[Analyze grammar]

mahotsavaṃ bhagavataḥ prāsāde'tra kariṣyati |
tanmune māmapi vidheḥ saṃnidhiṃ prāpayasva ca || 32 ||
[Analyze grammar]

garbhapratiṣṭhāṃ prāsāde samāpyeha sthito mune |
paścādāvāṃ gamiṣyāvaḥ kaṃcitkālaṃ pratīkṣa me || 33 ||
[Analyze grammar]

tataḥ sa nṛpatiḥ sarvāñchilpaśāstraviśāradān |
pāṣāṇakhaṃḍaghaṭanākarmaṇyekaikayogataḥ || 34 ||
[Analyze grammar]

satkārairdānamānaiśca yojayāmāsa sādaram |
dine dine sughaṭitaḥ prāsādo vavṛdhe dvijāḥ || 35 ||
[Analyze grammar]

paritaḥ pūryamāṇastu śuklapakṣe yathā śaśī |
evaṃ saṃvardhyamāno'pi prāsādaḥ parivarddhitaḥ || 36 ||
[Analyze grammar]

mahocchrayatvādalpena na kālenābhilakṣyate |
pāṣāṇasaṃkhyā śakyā vā kathaṃcidghaṭanākramāt || 37 ||
[Analyze grammar]

vittavyayastu koṭīnāṃ na saṃkhyātuṃ ca śakyate |
yāvanto bhārate varṣe lokāḥ samayavartinaḥ || 38 ||
[Analyze grammar]

indradyumnasya nṛpaterniyuktāste mahībhṛtaḥ |
ekaikaśo niyuktā ye parasparasamanvitāḥ || 39 ||
[Analyze grammar]

te'pi cānyairniyuktāste sarve tatra pravartitāḥ |
ajasraṃ tanniyuktānāṃ yo harṣottho mahāravaḥ || 40 ||
[Analyze grammar]

ākāśamaśnuvāno'sau diśāṃ bhāgānapūrayat |
nṛpateḥ śraddhayā bhaktyā sāttvikena prasāditā || 41 ||
[Analyze grammar]

śrīḥ samṛddhābhavadviprāḥ kīrtyā saha mahīpateḥ |
kvacitkāṃcanavinyastanānāratnamahojjvalaḥ || 42 ||
[Analyze grammar]

kvacitsphaṭikabhāgāṃtaśāradābhranibhacchaviḥ |
kvacinnīlāśmaghaṭitā bhittiḥ kālābhramedurā || 43 ||
[Analyze grammar]

evaṃ sughaṭite viṣṇoḥ prāsāde sumanohare |
garbhapratiṣṭhāṃ vidhivatkṛtvā sa nṛpasattamaḥ || 44 ||
[Analyze grammar]

vajrapātādibhaṃgādivāraṇārthaṃ yathocitam |
śilpaśāstreṣu maṇyādi vinyasya pauruṣāhṛtam || 45 ||
[Analyze grammar]

punaḥ prāsādaghaṭanāsaṃbhārocitameva vai |
bahumūlyaṃ vastujātaṃ yatnāttatra nyaveśayat || 46 ||
[Analyze grammar]

tato viracyamāne'sminprāsāde kīrtivarddhane |
manasāpi na saṃbhāvye triṣu lokeṣu bhūbhujām || 47 ||
[Analyze grammar]

devānāmapi no lakṣye dvijāḥ kalpāṃtavāsinām |
prāsāda īdṛśo bhūmau kvacicca ghaṭito na hi || 48 ||
[Analyze grammar]

svarge vā itthamādityā ālapaṃti parasparam |
aho subuddhirasyoccairyeyamīdṛkparīṇatā || 49 ||
[Analyze grammar]

śraddhayā bhagavatpādapadmayoḥ sābhilāṣiṇī |
alaukikāni karmāṇi paśyaṃti hi racaṃtyapi || 50 ||
[Analyze grammar]

ke vātra bhūmau rājāno babhūvurnītiśālinaḥ || |
sārvabhaumāstu sāmrājyajetāraḥ sarvavidviṣām || 51 ||
[Analyze grammar]

vittāni yaiḥ saṃcitāni subahūni ca koṭiśaḥ |
aśvamedhasahasraṃ tu yatkṛtaṃ tridiveśituḥ || 52 ||
[Analyze grammar]

śakyaṃ vā syādbhūbhujāṃ tu nātaḥ pūrvamanuṣṭhitam |
na dṛṣṭaṃ na śrutaṃ vāpi vājimedhasahasrakam || 53 ||
[Analyze grammar]

mahīkṣitānuṣṭhitaṃ vai yatra trailokya vāsinaḥ |
pṛthivyāmasya nṛpateḥ sahasthā bhogabhoginaḥ || 54 ||
[Analyze grammar]

brahmaloka ivābhāti sabha yasya ca yajvinaḥ |
mūrtimaṃtastrayo vedāścatuṣpādo vṛṣastathā || 55 ||
[Analyze grammar]

surāḥ saṃkalpakāmāstu yatrādbhutadhiyo'bhavan |
ayaṃ prāsādavaryo vai buddherviṣayatāṃ gataḥ || 56 ||
[Analyze grammar]

mano'pi yatra bhavati na vā trailokyavāsinām |
bhūpaterdurlabhaṃ kiṃ syātsahāyo yasya nāradaḥ || 57 ||
[Analyze grammar]

pitāmahaśca jagatāṃ sraṣṭā sarvāmareśvaraḥ |
athavā viṣṇubhaktasya nātidūraṃ cikīrṣitam || 58 ||
[Analyze grammar]

viṣṇostadbhaktalokasya nāṃtaraṃ vidyate dvijaḥ |
tataḥ sa nāradaṃ prāha prāsādāṃte munīśvaram || 59 ||
[Analyze grammar]

sarvaṃ sapannamāsīnme yadaśakyaṃ surāsuraiḥ |
sākṣādbhagavato viṣṇoradvaitopāsanārataḥ || 60 ||
[Analyze grammar]

bhagavadvapurābhāṣi prāsādastu ciraṃ mayi |
ityuktvā pādayormūrdhnā praṇanāma sa nāradam || 61 ||
[Analyze grammar]

nārado'pi tamutthāpya paripūjya nṛpottamam |
tvatto na bhedo nṛpate mamāsti khalu tattvataḥ || 63 ||
[Analyze grammar]

yastu sākṣājjagannātha āvirbhūtaḥ kṛtena vā |
avaśyamarcayasvainaṃ jīvanmukto'si sāṃpratam || 63 ||
[Analyze grammar]

tatpādapadme yādṛkte cetaḥ pra pravaṇatānvitam |
bhaktyā hyananyayā puṃsaḥ kimataḥ paramasti vai || 64 ||
[Analyze grammar]

tīrthairmaṃtrairjapairdānaiḥ kratubhirbhūridakṣiṇaiḥ |
vratairadhyayanairbhūpa tapobhiśca yadarjitum || 65 ||
[Analyze grammar]

na śakyaṃ tava rājendra bhaktyā tatkaramāgatam |
ataḥ paraṃ na śocasva bhaktiyoge namo'stu te || 66 ||
[Analyze grammar]

prakarṣaṃ bahurājeṃdra sthitvā cāsmiṃściraṃ bhuvi |
ārādhaya jagannāthamupacārairmahotsavaiḥ || 67 ||
[Analyze grammar]

pitāmahaṃ draṣṭukāmo gaṃtā cedaṃtikaṃ vibhoḥ |
upadekṣyati so'pyasya yātrāstāstā mahotsavāḥ || 68 ||
[Analyze grammar]

svayaṃ ca bhagavāneva varaṃ tubhyaṃ pradāsyati |
pratiṣṭhāpite prāsāde tasminkāle svayaṃbhuvā || 69 ||
[Analyze grammar]

ahamapyāgamiṣyāmi tadā saptarṣibhiḥ saha |
tadāvāṃ tatra gacchāvo brahmalokamakalmaṣam || 70 ||
[Analyze grammar]

tvāṃ vinā bhuvi kaḥ śakto brahmalokagatiṃ prati |
ityuktvā nārado bhūpaṃ samuttasthau nabhastalam || 70 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāda ekaviṃśo'dhyāyaḥ || 21 ||
[Analyze grammar]