Chapter 103

[English text for this chapter is available]

yama uvāca |
etanmādhavamāsasya samāsātkiṃcidīritam |
māhātmyaṃ pūrṇimāyāśca viśeṣāddvijasattama || 1 ||
[Analyze grammar]

vaiśākhamāse madhusūdanasya priyaṃ ya enaṃ paṭhatītihāsam |
sa yāti kṛṣṇālayamāśupūtaḥ kalpānanekāniha modate ca || 2 ||
[Analyze grammar]

dhanyaṃ yaśasyamāyuṣyamidaṃ svastyayanaṃ mahat |
svargyaṃ śrīdaṃ saumanasyaṃ praśasyamaghamarṣaṇam || 3 ||
[Analyze grammar]

idaṃ mādhavamāsasya māhātmyaṃ mādhavapriyam |
caritraṃ bhūpatestasya saṃvādaṃ cāvayorapi || 4 ||
[Analyze grammar]

śrutvā paṭhitvā vidhivadanumodya manaḥpriyam |
bhavedbhaktirbhagavati yayā syātpāpasaṃkṣayaḥ || 5 ||
[Analyze grammar]

atha gaccha mahīdeva devalokādyathecchayā |
nipātya bhuvi vaidehaṃ rudaṃtyadyāpi bāṃdhavāḥ || 6 ||
[Analyze grammar]

vilapyamānairapi baṃdhubhistairna yāvadagnau tava taccharīram |
prakṣipyate haṃta javairna tāvadyāhi svayaṃ supta iva prabuddhaḥ || 7 ||
[Analyze grammar]

mamaprasādādiha puṇyayogaḥ śruto yathāvattamimaṃ vidhehi |
vidhānato vai samaye samaṃte samāgamoṃ'te bhavitā suraiśca || 8 ||
[Analyze grammar]

sūta uvāca |
iti devavacaḥ śrutvā natvā dharmādhipaṃ tataḥ |
punaḥ papāta sa iha parituṣṭamanā dvijaḥ || 9 ||
[Analyze grammar]

dharmarājaprasādena tatastatra mahītale |
saṃsuptaiva cottasthau baṃdhuvargasamanvitaḥ || 10 ||
[Analyze grammar]

vidhimenaṃ dvijo bhūmau varṣevarṣe ca sa svayam |
svayaṃ ca kārayāmāsa mādhavasnāpanaṃ janam || 11 ||
[Analyze grammar]

yamabrāhmaṇasaṃvādo mayāyaṃ parikīrtitaḥ |
tasya mādhavamāsasya puṇyasnānaprasaṅgataḥ || 12 ||
[Analyze grammar]

vaiśākhamāse satataṃ haripriye snānaṃ vidadhyācca dadāti bhaktyā |
dānaṃ ca homaṃ sukṛtaṃ tathā budho hareḥpadaṃ tasya nadurllabhaṃ kadā || 13 ||
[Analyze grammar]

yaḥśṛṇotyekacittenamāhātmyaṃmeṣasūryajam |
sarvapāpavinirmukto yāti viṣṇoḥ paraṃ padam || 14 ||
[Analyze grammar]

ṛṣaya ūcuḥ |
sūtasūta mahāprājña tvayā'tikaruṇātmanā |
vaiśākhamāsamāhātmyaṃ kīrtitaṃ pāpanāśanam || 15 ||
[Analyze grammar]

niyamā madhuhanturye mādhave kathitāstvayā |
pūjanaṃ snānadānādyaṃ śrautasmārtavidhānataḥ || 16 ||
[Analyze grammar]

yathā ca mādhavo devaḥ prīyate pāpanāśanaḥ |
adhunā śrotumicchāmo dhyānaṃ tasya mahātmanaḥ || 17 ||
[Analyze grammar]

kṛṣṇasya bhaktavṛndānāṃ priyasya bhavatāraṇam || 18 ||
[Analyze grammar]

sūta uvāca |
śṛṇudhvaṃ munayaḥ sarve kṛṣṇasya jagadātmanaḥ |
gogopagopīprāṇasya vṛndāvanacarasya ca || 19 ||
[Analyze grammar]

ekadā nāradaḥ pṛṣṭo gautamena dvijottamāḥ |
sa tasmai prāha yaddhyānaṃ tadvakṣye pāpanāśanam || 20 ||
[Analyze grammar]

nārada uvāca |
sumaprakarasaurabhodgalitamādhvikādyullasatsuśākhinavapallavaprakaranamra śobhāyutam |
praphullanavamañjarīlalitavallarīveṣṭitaṃ smareta satataṃ śivaṃ śitamatiḥ suvṛndāvanam || 21 ||
[Analyze grammar]

vikāśi sumanorasāsvadanamaṃjulaiḥ saṃcaracchilīmukhamukhodgatairmukharitāntaraṃ jhaṃkṛtaiḥ |
kapotaśukasārikāparabhṛtādibhiḥ patribhirvirāṇitamitastato bhujagaśatrunṛtyākulam || 22 ||
[Analyze grammar]

kalindaduhituśca lallaharivipluṣāṃ vāhibhirvinidra sarasīruhodararajaśca yoddhūsaraiḥ |
pradīpita manobhavavrajavilāsinī vāsasāṃ vilolanaparairniṣevitamanārataṃ mārutaiḥ || 23 ||
[Analyze grammar]

pravālanavapallavaṃ marakatacchadaṃ mauktikaprabhāprakarakorakaṃ kamalarāganānāphalam |
sthaviṣṭhamakhilartubhiḥ satatasevitaṃ kāmadaṃ tadantarapikalpakāṅghripamudañcitaṃ |
cintayet || 24 ||
[Analyze grammar]

suhemaśikharācaleuditabhānuvadbhāsurāmadho'sya kanakasthalīmamṛtaśīkarāsāriṇaḥ |
pradīptamaṇikuṭṭimāṃ kusumareṇupuñjojjvalāṃ smaretpunaratandrito vigataṣaṭtaraṅgāṃbudhaḥ || 25 ||
[Analyze grammar]

tadratnakuṭṭimaniviṣṭamahiṣṭhayogapīṭhe'ṣṭapatramaruṇaṃ kamalaṃ vicintya |
udyadvirocanasarociramuṣyamadhye saṃcintayetsukhaniviṣṭamathomukundam || 26 ||
[Analyze grammar]

sutrāmaheti dalitāñjanameghapuñjapratyagranīlajalajanmasamānabhāsam |
susnigdhanīlaghanakuñcitakeśajālaṃ rājanmanojñaśitikaṇṭhaśikhaṇḍacūḍam || 27 ||
[Analyze grammar]

rolambalālitasuradrumasūnusaṃpadyuktaṃ samutkacanavotpalakarṇapūram |
lolālibhiḥ sphuritabhālatalapradīptagorocanātilakamujjvalacillicāpam || 28 ||
[Analyze grammar]

āpūrṇaśāradagatāṅka śaśāṅkabimbakāntānanaṃ kamalapatraviśālanetram |
ratnasphuranmakarakuṇḍalaraśmidīptagaṇḍasthalīmukuramunnatacārunāsam || 29 ||
[Analyze grammar]

sindūrasundaratarādharamindukundamandāramandahasitadyutidīpitāśam |
vanyapravālakusumapracayāvakḷptagraiveyakojjvalamanoharakambukaṇṭham || 30 ||
[Analyze grammar]

mattabhramadbhramaraghuṣṭavilambamānaṃ saṃtānakaprasaradāmapariṣkṛtāṃsam |
hārāvalībhagaṇarājitapīvaroruvyomasthalīlasitakaustubhabhānumantam || 31 ||
[Analyze grammar]

śrīvatsalakṣaṇasulakṣitamunnatāṃsamājānupīnaparivṛttasujātabāhum |
ābandhurodaramudāragabhīranābhiṃ bhṛṅgāṅganāni karamaṃjularomarājim || 32 ||
[Analyze grammar]

nānāmaṇipraghaṭitāṅgadakaṅkaṇormi graiveyasārasananūpuratundabandham |
divyāṅgarāgaparipiñjaritāṅgayaṣṭimāpītavastraparivītanitambabimbam || 33 ||
[Analyze grammar]

cārūrujānumanuvṛttamanojñajaṅghaṃ kāntonnataprapadanindita kūrmakāntim |
māṇikyadarpaṇalasannakharājarājadraktāṅgulicchadanusundarapādapadmam || 34 ||
[Analyze grammar]

matsyāṅkuśāridaraketuyavābjavajraiḥ saṃlakṣitāruṇakarāṅghritalābhirāmam |
lāvaṇyasārasamudāyavinirmitāṅgaṃ saundaryaninditamanobhava dehakāntim || 35 ||
[Analyze grammar]

āsyāravindaparipūritaveṇurandhralolatkarāṅgulisamīritadivyarāgaiḥ |
śaśvadbhavaiḥ kṛtaniviṣṭasamastajantusaṃtānasaṃnatimanantasukhāmburāśim || 36 ||
[Analyze grammar]

gobhirmukhāmbujavilīnavilocanābhirūdhobharaskhalitamantharamandagābhiḥ |
dantāgradaṣṭapariśiṣṭatṛṇāṅkurābhirālambivāladhilatābhirathābhivītam || 37 ||
[Analyze grammar]

saṃprasnutastanavibhūṣaṇapūrṇaniścalāsyāddṛḍhakṣaritapheniladugdhamugdhaiḥ |
veṇupravartitamanoharamandagītadattoccakarṇayugalairapitarṇakaiśca || 38 ||
[Analyze grammar]

pratyagraśṛṅgamṛdumastakasaṃprahārasaṃrambhabhāvanavilolakhurāgrapātaiḥ |
āmedurairbahulasāsnagalairudagrapucchaiśca vatsataravatsatarīnikāyaiḥ || 39 ||
[Analyze grammar]

hambhāravakṣubhitadigvalayairmahadbhiradhyukṣabhiḥ pṛthukakudbharabhārakhinnaiḥ |
uttambhitaśrutipuṭīparipītavaṃśadhvānāmṛtoddhatavikāsiviśālaghoṇaiḥ || 40 ||
[Analyze grammar]

gopaiḥ samānaguṇaśīlavayovilāsaveśaiśca mūrchitakalasvanaveṇuvīṇaiḥ |
mandoccatārapaṭugānaparairviloladorvallarīlalitalāsyavidhānadakṣaiḥ || 41 ||
[Analyze grammar]

jaṅghāntapīvarakaṭīrataṭīnibaddhavyālolakiṅkiṇighaṭāraṇitairaṭadbhiḥ |
mugdhaistarakṣunakhakalpitakāntabhūṣairavyaktamaṃjuvacanaiḥ pṛthukaiḥ parītam || 42 ||
[Analyze grammar]

atha sulalitagopasundarīṇāṃ pṛthukabarīṣanitambamantharāṇām |
gurukucabharabhaṃgurāvalagnatrivalivijṛmbhitaromarājibhājām || 43 ||
[Analyze grammar]

tadatiruciracāruveṇuvādyāmṛtarasapallavitāṅgajāṅghripasya |
mukulavimalaramyarūḍharomodgamasamalaṃkṛtagātravallarīṇām || 44 ||
[Analyze grammar]

tadatirucira mandahāsacandrātapaparijṛmbhitarāgavārirāśeḥ |
taralatarataraṅgabhaṅgavipruṭprakaraghanaśramabindusaṃtatānām || 45 ||
[Analyze grammar]

tadatilalitamandacillicāpacyutaniśitekṣaṇamārabāṇavṛṣṭyā |
dalitasakalamarmavihvalāṅgapravisṛtaduḥsahavepathuvyathānām || 46 ||
[Analyze grammar]

tadatiruciraveṣarūpaśobhāmṛtarasapānavidhānalālasānām |
praṇayasalilapūravāhinīnāmalasavilolavilocanāmbujānām || 47 ||
[Analyze grammar]

visraṃsatkabarīkalāpavigalatphullatprasūnāsravan |
mādhvīlampaṭacañcarīkaghaṭayāsaṃsevitānāṃ muhuḥ |
māronmādamadaskhalanmṛdugirāmālolakāñcyullasa |
nnīvīviślathamānacīnasicayāntārcirnitambatviṣām || 48 ||
[Analyze grammar]

skhalitalasitapādāmbhojamandābhighāta |
cchuritamaṇitulākoṭyākulāśāmukhānām |
caladadharadalānāṃkuḍmalāpakṣmalākṣi |
dvayasarasiruhāṇāmullasatkuṇḍalānām || 49 ||
[Analyze grammar]

drāghiṣṭhaśvasanasamīraṇābhitāpapramlānībhavadaruṇauṣṭhapallavānām |
nānopāyanavilasatkarāmbujānāmālībhiḥ satataniṣevitaṃ samantāt || 50 ||
[Analyze grammar]

tāsāmāyatalolanīlanayanavyākośalīnāmbuja |
sragbhiḥ saṃparipūjitākhilatanuṃ nānāvilāsāspadam |
tanmugdhānanapaṅkajapravigalanmādhvīrasāsvādinīṃ |
bibhrāṇaṃ praṇayānmadākṣimadhuhṛnmālāṃ manohāriṇīm || 51 ||
[Analyze grammar]

gopīgopapaśūnāṃ bahiḥ smaredagrato'sya gīrvāṇaghaṭāṃvittārthinīṃ viriñcitrinayanaśatamanyupūrvikāṃ stotraparām || 52 ||
[Analyze grammar]

tadvaddakṣiṇato muninikaraṃ dṛḍhadharmavāñchayā samāmnāyaparam |
yogīndrānatha pṛṣṭhe mumukṣamāṇānsamādhinā tu sanakādyān || 53 ||
[Analyze grammar]

savye sakāntānatha yakṣasiddhagandharvavidyādharacāraṇāṃśca |
sakinnarānapsarasaśca mukhyāḥ kāmārthinīrnartanagītavādyaiḥ || 54 ||
[Analyze grammar]

śaṅkhendukundadhavalaṃ sakalāgamajñaṃ saudāminītatipiśaṅgajaṭākalāpam |
tatpādapaṅkajagatāmamalāṃ ca bhaktiṃ vāñchantamujjhitatarānyasamastasaṅgam || 55 ||
[Analyze grammar]

nānāvidha śrutiguṇānvitasaptarāgagrāmatrayīgatamanoharamūrchanābhiḥ |
saṃprīṇayantamuditābhirapi prabhaktyā saṃcintayannabhasi māṃ druhiṇaprasūtam || 56 ||
[Analyze grammar]

iti dhyātvā'tmānaṃ paṭuviśadadhīrnandatanayaṃ naro buddhyaivā'rghaprabhṛtibhiranindyopahṛtibhiḥ |
yajedbhūyo bhaktyā svavapuṣi bahiṣṭhaiśca vibhavairiti proktaṃ sarvaṃ yadabhilaṣitaṃ bhūsuravarāḥ || 57 ||
[Analyze grammar]

iti śrīpadmapurāṇe pātālakhaṃḍe vaiśākhamāhātmye tryuttaraśatatamo'dhyāyaḥ || 103 ||
[Analyze grammar]