Chapter 102

[English text for this chapter is available]

yama uvāca |
tatastu karuṇāvārdhisteṣāṃ śokena pīḍitaḥ |
bhūpatiḥ śrīharerdūtānvinayenāha vāḍava || 1 ||
[Analyze grammar]

aiśvaryasyābhijātyasya guṇānāṃ sukṛtasya ca |
saṃtaḥ phalaṃ hi gaṇyaṃte yadbhītaparirakṣaṇam || 2 ||
[Analyze grammar]

yadyasti sukṛtaṃ kiṃcinmama tenaiva jaṃtavaḥ |
svarge gacchaṃtu muktaughāḥ sthāne teṣāṃ vasāmyaham || 3 ||
[Analyze grammar]

evaṃ bhūpavacaḥ śrutvā tasya satyavato hi te |
dhyāyaṃtaḥ satyamaudāryamabruvaṃste vaco nṛpam || 4 ||
[Analyze grammar]

dūtā ūcu |
anena tava kāruṇyakarmaṇā vacasā nṛpa |
babhūva vṛddhirdharmasya saṃcitasya viśeṣataḥ || 5 ||
[Analyze grammar]

snānaṃ dānaṃ japo homastapo devārcanādikam |
kṛtaṃ yanmādhave māsi tadanaṃtaphalaṃ viduḥ || 6 ||
[Analyze grammar]

svarge yajvā ca dātā ca krīḍate tridaśaiḥ saha |
vāpīṣu hemapadmāsu kalpavṛkṣatale'pi ca || 7 ||
[Analyze grammar]

gīyamāno mudaṃ yāti gīrvāṇaramaṇīgaṇaiḥ |
jalānnadānato lokaṃ labhate vāruṇaṃ śubham || 8 ||
[Analyze grammar]

kulāni helayā sapta saṃtārayati gopradaḥ |
hayaṃ datvā raverlokaṃ yāti vidyāprado naraḥ || 9 ||
[Analyze grammar]

brahmalokaṃ tathā hemadānādyāti surālaye |
yo dadāti tathā kanyāṃ viṣṇulokaṃ sa gacchati || 10 ||
[Analyze grammar]

mādhavemāsi yaḥ snātvā datvā saṃpūjya mādhavam |
avāpya sakalānkāmānprayāti padamavyayam || 11 ||
[Analyze grammar]

ekato'pi tapo dāna kratu sutyādikāḥ kriyāḥ |
ekato vidhivanmāso mādhavaścarito mahān || 12 ||
[Analyze grammar]

tasya mādhavamāsasya dinaikasyāpi bhūpate |
kṛtaṃ yatsukṛtaṃ tatte sarvadānādhikaṃ purā || 13 ||
[Analyze grammar]

kāruṇyena dinaikasya puṇyaṃ dehi dharāpate |
niraye pacyamānebhyo duḥkhitebhyo dayānidhe || 14 ||
[Analyze grammar]

na dayāsadṛśo dharmo na dayāsadṛśaṃ tapaḥ |
na dayāsadṛśaṃ dānaṃ na dayāsadṛśaḥ sakhā || 15 ||
[Analyze grammar]

puṇyadaḥ puṇyamāpnoti naro lakṣaguṇaṃ sadā |
kāruṇyena viśeṣātte dharmavṛddhistato bhavet || 16 ||
[Analyze grammar]

duḥkhitānāṃ hi bhūtānāṃ duḥkhoddharttā naro hi yaḥ |
sa eva sukṛtī loke jñeyo nārāyaṇāṃśajaḥ || 17 ||
[Analyze grammar]

vaiśākhe māsi pūrṇāyāṃ snānadānādikaṃ tvayā |
yattīrthe vihitaṃ vīra sarvāghaviniṣūdanam || 18 ||
[Analyze grammar]

tadebhyo dehi vidhivatkṛtvā sākṣye hariṃ prabhum |
trivācikaṃ ca nirayādyenāmī svargamāpnuyuḥ || 19 ||
[Analyze grammar]

kapotārthaṃ svamāṃsāni kāruṇyena purā śibiḥ |
datvā dayānidhiḥ svarge rājate kīrtivāridhiḥ || 20 ||
[Analyze grammar]

dadhīcirapi rājarṣirdatvāsthi ca yamātmanaḥ |
trailokyakaumudīṃ kīrtiṃ labdhavānsvargamakṣayam || 21 ||
[Analyze grammar]

sahasrajicca rājarṣiḥ prāṇāniṣṭānmahāyaśāḥ |
brāhmaṇārthe parityajya gato lokānanuttamān || 22 ||
[Analyze grammar]

na svarge nāpavarge'pi tatsukhaṃ labhate naraḥ |
yadārtajaṃtunirvvāṇadānotthamiti no matiḥ || 23 ||
[Analyze grammar]

sarveṣu dātṛjāteṣu purā jātosi bhūpate |
karmaṇānena saṃkhyāsu dhīra dhairyaṃ niyojya ca || 24 ||
[Analyze grammar]

dṛṣṭvā tavadhiyaṃ dharma dayā dānaṃ suniścalam |
asmābhirapi tūtsāhaḥ kriyate dharmmavādibhiḥ || 25 ||
[Analyze grammar]

yadi te rocate rājanna vilaṃbatayā tataḥ |
tadebhyo dehi tatpuṇyaṃ yātanāduḥkhadāhakam || 26 ||
[Analyze grammar]

ityuktaḥ sa tadā devaṃ kṛtvā sākṣye gadādharam |
tebhyastrivācikaṃ puṇyaṃ dayāvānvidhinā dadau || 27 ||
[Analyze grammar]

datte mādhavamāsasya tasminnekadinodbhave |
svakṛte jaṃtavo yāmyayātanāparivarjitāḥ || 28 ||
[Analyze grammar]

vimānavaramārūḍhāḥ sarve te tridivaṃ yayuḥ |
praṇamaṃtaḥ stuvaṃtaśca paśyaṃtastaṃ praharṣitāḥ || 29 ||
[Analyze grammar]

nṛpeṇa dattaṃ tadavāpya puṇyaṃ vaiśākhamāsaikadinābhijātam |
sarve yayuste narakādvimuktā divaṃ vimānādhigatā hi citram || 30 ||
[Analyze grammar]

nūnaṃ vicitro bhuvi bhūtavargaḥ saṃbhūtabhāvo bahudhā vicitraḥ |
tathā vicitro'khilakarmayogastatkarmaśaktipracayo vicitraḥ || 31 ||
[Analyze grammar]

saṃstūyamāno munidevasaṃghairyastadviśeṣādhikalabdhapuṇyaḥ |
paraṃ padaṃ yogivarairalabhyaṃ yayau jagannāthagaṇābhivaṃdyaḥ || 32 ||
[Analyze grammar]

iti śrīpadmapurāṇe pātālakhaṃḍe vaiśākhamāsamāhātmye |
dvyuttaraśatatamo'dhyāyaḥ || 102 ||
[Analyze grammar]