Chapter 59

[English text for this chapter is available]

vyāsa uvāca |
ataḥ paraṃ pravakṣyāmi kīrttidharmaṃ paraṃ śubham |
setubaṃdhaphalaṃ puṇyaṃ brahmaṇā bhāṣitaṃ yathā || 1 ||
[Analyze grammar]

kāṃtāre dustare paṃke puruśaṃkusamākulaṃ |
āliṃ kṛtvā bhavetpūto devatvaṃ yāti mānavaḥ || 2 ||
[Analyze grammar]

vitastau tu labhetsvargaṃ divyaṃ varṣaśataṃ samam |
evaṃ saṃkhyāvidhānena naraḥ svargānna hīyate || 3 ||
[Analyze grammar]

kadācitpaṃkayogācca svargādbhuvi vijāyate |
tadā bhaṭṭārakaḥ śrīmānrogaśokavivarjitaḥ || 4 ||
[Analyze grammar]

paṃkādau saṃkramāṃścaiva kṛtvā svargānna hīyate |
sarvapāpaṃ kṣayaṃ tasya saṃprayāti dinedine || 5 ||
[Analyze grammar]

tathālisaṃkramāṇāṃ ca phalaṃ tulyaṃ prakīrtitam |
dhanaprāṇāvyayenaiva dhīmatā kriyate sadā || 6 ||
[Analyze grammar]

śrūyatāṃ yatpurāvṛttamākhyānaṃ vṛddhasaṃmataṃ |
kaściccoro mahābhīṣme steyakarmaṇi codyataḥ || 7 ||
[Analyze grammar]

kāṃtāre gośiraḥ sthāpya krāṃtvā steyaṃ gato hyasau |
dhanāpaharaṇaṃ kṛtvā gṛhasthasya ca tena hi || 8 ||
[Analyze grammar]

gataḥ svamaṃdiraṃ tatra janā gacchaṃti vartmani |
sarveṣāmekapādasya sukhaṃ bhavati niścitaṃ || 9 ||
[Analyze grammar]

ekapāde hrade durge tārakaṃ gośiraḥ param |
cāṃdrāyaṇaṃ ca tattasya kāṃtāre saṃsthitaṃ śiraḥ || 10 ||
[Analyze grammar]

tataścorasya nidhane citraguptapraṇītake |
dharmasya phalamātraṃ tu etasya ca na vidyate || 11 ||
[Analyze grammar]

na daivaṃ paitṛkaṃ kāryaṃ tīrthaṃ snānaṃ dvijārcanaṃ |
dānaṃ gurujane mānaṃ jñānaṃ parahitaṃ śubham || 12 ||
[Analyze grammar]

manasā na kṛtaṃ tena kriyayā ca kathaṃ punaḥ |
kṛtaṃ sāhasikaṃ steyaṃ paradārābhimarśanam || 13 ||
[Analyze grammar]

bhūtamithyāpavādaṃ ca sādhuniṃdā paraṃ tathā |
evaṃ śatasahasraṃ tu tathā goharaṇaṃ kṛtam || 14 ||
[Analyze grammar]

tatrāha dharmarājastu kālānalasamaprabhaḥ |
nayatainaṃ phalaṃ śūrā durgatiṃ cāpunarbhavam || 15 ||
[Analyze grammar]

etasminnaṃtare'vocaccitraguptonukaṃpakaḥ |
astyasya gośiraḥ puṇyaṃ kicinnātha kṣamādhunā || 16 ||
[Analyze grammar]

nṛpo dvādaśavārṣikyaṃ labhetpuṇyodayaṃ kṣitau |
tathāha dharmarājastaṃ gaccha martyaṃ durātmaka || 17 ||
[Analyze grammar]

akaṃṭakaṃ ca rājyaṃ ca bhuṃkṣva dvādaśavatsaram |
yaddhṛtaṃ gośiro mārge muktastasyaiva kāraṇāt || 18 ||
[Analyze grammar]

punaratra samāgamya saṃgaṃtā cāpunarbhavam |
tataḥ kṛtāṃjalirdevamuvāca duḥkhapīḍitaḥ || 19 ||
[Analyze grammar]

dharmarājānukaṃpā ca mayyevaṃ pāpakāriṇi |
kuru nātha tvanāthe ca jānāmi prītipūrvakam || 20 ||
[Analyze grammar]

dharmarājastu taṃ cāha bāḍhamevamito vraja |
smariṣyasi svavṛttāṃtaṃ matprasādātsuduḥkhitaḥ || 21 ||
[Analyze grammar]

etasminnaṃtare caiva mocitaḥ kiṃkareṇa hi |
tasya janmābhavatkau ca durvidhe cātivāṇike || 22 ||
[Analyze grammar]

ājanmavividhaṃ duḥkhaṃ bhuktaṃ pūrvavikarmataḥ |
bhuktvā kleśaṃ mahāṃtaṃ ca ekaviṃśatihāyanam || 23 ||
[Analyze grammar]

tasminrāṣṭre mṛto bhūpaḥ svakarmaparipīḍitaḥ |
etasminnaṃtare'mātyaiḥ samālokya sumaṃtribhiḥ || 24 ||
[Analyze grammar]

aneka parimarśaistu pṛthivyāṃ bhramaṇaṃ kṛtam |
tamāvṛṇvaṃśca te sadyaḥ sarveṣāṃ purato dṛḍham || 25 ||
[Analyze grammar]

tato rājyābhiṣekaśca kṛtastaistu vimatsaraiḥ |
sa ca rājyaṃ ca saṃśritya dharmarājavareṇa ca || 26 ||
[Analyze grammar]

akarodālikaṃ karma śilābaddhaṃ ca mṛṇmayam |
saṃkramaṃ jaladurge ca taraṇiṃ ca tathāpare || 27 ||
[Analyze grammar]

vāpīkūpataṭākāni prapārāma mahīruhaṃ |
kṛtavānvividhaṃ yajñaṃ dānapuṇyamataḥ param || 28 ||
[Analyze grammar]

smaraṃśca pūrvakarmmāṇi sarvapāpakṣayāya vai |
kṛtaṃ bahuvidhaṃ dharmaṃ vratāni vividhāni ca || 29 ||
[Analyze grammar]

surāṇāṃ brāhmaṇānāṃ ca gurūṇāṃ caiva tarpaṇāt |
pāpātpūto yayau gehaṃ dharmarājasya dhīmataḥ || 30 ||
[Analyze grammar]

sayānasthaṃ tato dṛṣṭvā krodharaktekṣaṇo'bhavat |
sa ca taṃ prāṃjaliṃ prāha bho dharma kuru tāraṇam || 31 ||
[Analyze grammar]

citragupto'bravīdvākyaṃ dharmarājasamīpataḥ |
karmaṇā manasā pūto viṣṇulokaṃ sa gacchatu || 32 ||
[Analyze grammar]

sa tacchrutvā punaścāha tasya vijñāya kāraṇam |
smitaḥ prītyā prasannātmā gaccha gacchācyutālayam || 33 ||
[Analyze grammar]

vimānaṃ suralokācca svāgataṃ varṇakarburam |
samāruhya gataḥ svargaṃ punarāvṛttidurlabham || 34 ||
[Analyze grammar]

tasmātkiṣkupramāṇaṃ hi dattaṃ yenālikaṃ purā |
sa tu rājyānvayaṃ svargaṃ mahāṃtaṃ cānugacchati || 35 ||
[Analyze grammar]

tathaiva gopracāraṃ tu datvā svargānna hīyate |
yā gatirgopradasyaiva dhruvaṃ tasya bhaviṣyati || 36 ||
[Analyze grammar]

vyāmaikaṃ gopracāraṃ tu muktaṃ yena sudhīmatā |
tasya svargaṃ bhavediṣṭaṃ kimanyaiḥ purubhāṣitaiḥ || 37 ||
[Analyze grammar]

gopracāraṃ yathāśakti yo vai tyajati hetunā |
dinedine brahmabhojyaṃ puṇyaṃ tasya śatādhikam || 38 ||
[Analyze grammar]

tasmādgavāṃ pracāraṃ tu muktvā svargānna hīyate |
yaśchinatti drumaṃ puṇyaṃ gopracāraṃ chinatyapi || 39 ||
[Analyze grammar]

tasyaikaviṃśapuruṣāḥ pacyaṃte rauraveṣu ca |
gocāraghnaṃ grāmagopaḥ śakto jñātvā tu daṇḍayet || 40 ||
[Analyze grammar]

chettāraṃ dharmavṛkṣāṇāṃ viśeṣādgopracāragham |
tasya daṃḍe sukhaṃ tasya tasmāttaṃ daṃḍayettu saḥ || 41 ||
[Analyze grammar]

prāsādaṃ kurute yastu viṣṇuliṃgasya mānavaḥ |
trikāṃḍaṃ paṃcakāḍaṃ ca suśobhaṃ sughaṭānvitam || 42 ||
[Analyze grammar]

ito'dhikaṃ tu yo dadyānmṛnmayaṃ vā dṛṣanmayam |
vasuvṛttisupūrṇaṃ ca suramyaṃ divyabhūtalam || 43 ||
[Analyze grammar]

pratiṣṭhākarmasaṃpannaṃ kiṅkarādibhirāvṛtam |
suliṃgamiṣṭadevasya viṣṇoreva viśeṣataḥ || 44 ||
[Analyze grammar]

kṛtvā ca viṣṇusāyujyaṃ samāpnoti narottamaḥ |
tathaiva pratimāṃ kṛtvā hareranyatarasya ca || 45 ||
[Analyze grammar]

kṛtvā devakulaṃ ramyaṃ yatphalaṃ labhate naraḥ |
na tanmakhasahasraistu dānairbhuvi vratādibhiḥ || 46 ||
[Analyze grammar]

kalpakoṭisahasrāṇi kalpakoṭiśatāni ca |
prāsāde ratnasaṃyukte saṃpūrṇadravyasaṃkule || 47 ||
[Analyze grammar]

sa vasetkāmage yāne sarvalokamanohare |
svargāccyuto bhavedrājā sārvabhaumo guṇairvaśī || 48 ||
[Analyze grammar]

śivaliṃge tu prāsādaṃ kārayitvā svaśaktitaḥ |
yaduktaṃ viṣṇuliṃge tu tajjñeyaṃ śivaveśmani || 49 ||
[Analyze grammar]

bhuṃkte bhogaṃ mahābhāgo manaḥśarmakaraṃ param |
rāmābhirāmasaṃpūrṇaṃ sarvataḥ sukhadaṃ divi || 50 ||
[Analyze grammar]

urvyāmakṣayabhogyāni nṛpo vātha mahādhanī |
harasya pratimāṃ yaśca kṛtvā devagṛhe naraḥ || 51 ||
[Analyze grammar]

suliṃgāṃ vā surūpāṃ vā kalpakoṭiṃ vaseddivi |
svargādbhraṣṭo bhavedrājā dhanī pūjyatamopi vā || 52 ||
[Analyze grammar]

devīliṃgeṣu sarveṣu kṛtvā devagṛhaṃ naraḥ |
suratvaṃ prāpnuyālloke devyāssarvasukhodbhave || 53 ||
[Analyze grammar]

bhṛśamacyutatāmeti sukhameti nirāmayam |
ratnasaṃsṛṣṭaprāsāde maṇikarburabhūtale || 54 ||
[Analyze grammar]

rāmāyutaprasaṃbhogye devīsaṃsṛṣṭanirbhaye |
nṛtyagītapare ramye sarveṃdriyamanorame || 55 ||
[Analyze grammar]

ratnamarddalatālāḍhye sarvadā strījanerite |
nirmale sukhade ramye ratnānāṃ suśubhe gṛhe || 56 ||
[Analyze grammar]

tathaiva pratimāyāśca devyāḥ prāsādamuttamam |
niyutaṃ kalpakoṭīnāṃ svarlokameti mānavaḥ || 57 ||
[Analyze grammar]

svargādbhraṣṭo bhavedbhūpo devībhaktiparāyaṇaḥ |
evaṃ ca janmasāhasraṃ smara eva bhavedbhuvi || 58 ||
[Analyze grammar]

prāsādaṃ gāṇapatyaṃ ca devyā vā prītimānnaraḥ |
kṛtvā suragaṇānāṃ ca pūjito divi jāyate || 59 ||
[Analyze grammar]

tathaiva rājatāmeti bhogyāndevīpure tathā |
avighnaṃ sarvakāryeṣu sadaiva gaṇapo yathā || 60 ||
[Analyze grammar]

ājñānaskhalitā tasya surāsuranareṣu ca |
tathaiva sauraprāsāde phalameti narottamaḥ || 61 ||
[Analyze grammar]

arogī suprasannātmā kāmadevasamaprabhaḥ |
varadaḥ sarvalokeṣu yathā bradhnastathā hi saḥ || 62 ||
[Analyze grammar]

surasya pratimāyāṃ ca gṛhaṃ kṛtvā śilāmayam |
kalpakoṭiśataṃ bhuktvā svargamurvīśvaro bhavet || 63 ||
[Analyze grammar]

viṣṇvādi sarvadevānāmarcanaṃ yatpṛthakpṛthak |
pratyekaṃ saṃpravakṣyāmi narāṇāṃ hita hetave || 64 ||
[Analyze grammar]

ghṛtapradīpaṃ yo dadyātmāsamekamaharniśam |
divyaṃ varṣāyutaṃ svarge pūjito devasattamaiḥ || 65 ||
[Analyze grammar]

ghṛtasnānaṃ tathā liṃge yaḥ kuryādbhuvi mānavaḥ |
kalpakoṭisahasrāṇi māsaike labhate naraḥ || 66 ||
[Analyze grammar]

tilatailapradīpasya tathānyasyārddhakaṃ phalam |
māsaikaṃ jaladānasya phaleneśvaratāṃ vrajet || 67 ||
[Analyze grammar]

dhūpadānena gaṃdharvaṃ caṃdane dviguṇaṃ bhavet |
mṛgamadāgarusatvasya dāne bahuphalaṃ bhavet || 68 ||
[Analyze grammar]

mālāpuṣpapradānena naraḥ syāttridaśeśvaraḥ |
śīte tūlapaṭīṃ datvā sarvaduḥkhātpramucyate || 69 ||
[Analyze grammar]

janmajanmasu labhyeta uṣṇe ca śītalāṃ paṭīm |
datvā ca naivasīdeta śaktyā vastraṃ dadāti yaḥ || 70 ||
[Analyze grammar]

caturhastapramāṇaṃ ca varṣmaveṣṭaṃ suśobhanam |
pidhānaṃ caraṇānāṃ ca datvā svargānna hīyate || 71 ||
[Analyze grammar]

śaktyā svarṇapradānena svarge pūjyo bhavennaraḥ |
daśayojanavistīrṇe maṃḍape rūpabhāgbhavet || 72 ||
[Analyze grammar]

suvarṇaṃ ratnasaṃyuktaṃ dattvā daśaguṇaṃ labhet |
vajravaiḍūryagārutma māṇikyādīnanarghataḥ || 73 ||
[Analyze grammar]

datvā liṃge vidhānācca brāhmaṇe vā yaśasvini |
śatayojanavistīrṇamaṃḍaledhipatirbhavet || 74 ||
[Analyze grammar]

tathaiva bhuvi jātopi sarvalokapraraṃjanaḥ |
surabhidravyadānena vāvadūkaśca suṃdaraḥ || 75 ||
[Analyze grammar]

raktāmṛtasukaṃṭhaśca pūgadānānnaro bhavet |
varadāsīpradānena naraḥ kalpaṃ vaseddivi || 76 ||
[Analyze grammar]

varadāsī pradānena urvyāṃ jāto dhaneśvaraḥ |
tathaiva bhṛtyadānena bahubhṛtyo bhaveddivi || 77 ||
[Analyze grammar]

dharāyāmakṣayāṛddhirjanmajanmasu jāyate |
sarvatūryapradānena guṇavānlokasaṃmataḥ || 78 ||
[Analyze grammar]

nṛtyagītādiśāstreṇa gaṃdharvāṇāṃ patirbhavet |
dāsīdāsayutaḥ svarge dhanaiḥ strībhirvarairyutaḥ || 79 ||
[Analyze grammar]

tathaiva gopradānena tāvatkālaṃ vaseddivi |
liṃge dugdhapradānācca naraḥ kalpaṃ vaseddivi || 80 ||
[Analyze grammar]

dadhnā snānena dviguṇaṃ ghṛtena tu śatādhikam |
annaṃ ṣaḍrasasaṃyuktaṃ datvā kṣitipatirbhavet || 81 ||
[Analyze grammar]

tathaiva pāyasaṃ datvā munīnāṃ pravaro bhuvi |
haviṣyānnaṃ mudā datvā vedaśāstrārthapāragaḥ || 82 ||
[Analyze grammar]

nirāmiṣapradānācca brahmacārī vratī bhavet |
madhudānācca saubhāgyaṃ guḍena lavaṇena ca || 83 ||
[Analyze grammar]

śarkarādibhirlāvaṇyaṃ sarvalokeṣu gīyate |
devānāṃ śaṃbhuliṃgānāmarcāṃ kṛtvā vidhānataḥ || 84 ||
[Analyze grammar]

anukrameṇa svargādau lokānāṃ sa patirbhavet |
lokānāṃ ca hitārthāya devāstiṣṭhaṃti saṃmukhāḥ || 85 ||
[Analyze grammar]

sakṛtpradakṣiṇāṃ kṛtvā śaṃbhuliṃgeṣu paṃḍitaḥ |
divyaṃ varṣaśataṃ pūrṇaṃ svargameti narottamaḥ || 86 ||
[Analyze grammar]

evameva krameṇaiva namaskāraiḥ svayaṃbhuvaḥ |
lokavaṃdyo vrajetsvargaṃ tasmānnityaṃ samācaret || 87 ||
[Analyze grammar]

liṃgarūpasya devasya yo dhanaṃ harate naraḥ |
sa ca rauravamāsādya haraṇātkīṭatāṃ vrajet || 88 ||
[Analyze grammar]

dātuḥ pūjāṃ ca liṃgārthe hareścāpyādadāti yaḥ |
kulakoṭisahasreṇa narakānna nivartate || 89 ||
[Analyze grammar]

jalapuṣpādidīpārthe vasu cānyadgṛhītavān |
paścānna dīyate lobhādakṣayaṃ narakaṃ vrajet || 90 ||
[Analyze grammar]

dāsīṃ hṛtvā tu liṃgasya narakānna nivartate |
kāmārto mātaraṃ gacchenna gacchecchivaceṭikām || 91 ||
[Analyze grammar]

śivadāsīṃ tato gatvā śivasva haraṇe tathā |
bhakṣaṇādannapānānānnaro durgatimāpnuyāt || 92 ||
[Analyze grammar]

ato devalavipro yo narakānna nivartate |
tasmādveśyājanānāṃ ca dauṣṭyameva hitaṃ bhavet || 93 ||
[Analyze grammar]

atastu gaṇikāṃ spṛṣṭvā naraḥ snānādviśudhyati |
malināṃ durgatiṃ yāti bahupūruṣasaṃśrayāt || 94 ||
[Analyze grammar]

veśyā tapasvinī yā ca devārcanaratā sadā |
pativrataparā śuddhā svargaṃ cākṣayamaśnute || 95 ||
[Analyze grammar]

gaṇikāṃ mātṛvadyastu sadāsannāṃ prapaśyati |
devavatsuralokeṣu nikhilaṃ bhogamaśnute || 96 ||
[Analyze grammar]

surāsuranarāṇāṃ ca vaṃdanīyo yathā hariḥ |
tathārhoyaṃ sarvaloke sarvabhūtaikapāvanaḥ || 97 ||
[Analyze grammar]

devadāsaḥ sadā yastu devakṛtyeṣu lolupaḥ |
sa ca gacchati lokeśo devaloke mahīyate || 98 ||
[Analyze grammar]

eteṣāmeva liṃgāni kārayitvā ca maṃḍapam |
śaktyā yaṃ labhate nākaṃ kālasya niścayaṃ śṛṇu || 99 ||
[Analyze grammar]

hāyanaikaṃ tṛṇenaiva śarakāṃḍena tacchatam |
ayutaṃ tvanyakāṣṭhena lakṣaṃ khādiradāruṇā || 100 ||
[Analyze grammar]

koṭikoṭi ca pāṣāṇaiḥ sudṛḍhairyatnasaṃyutaiḥ |
tasmātsarvaprayatnena maṃḍapaṃ kārayedbudhaḥ || 101 ||
[Analyze grammar]

yāvatkālaṃ vasetsvarge naro maṃḍapakārakaḥ |
tāvatkālaṃ ca haraṇe naro durgatimāpnuyāt || 102 ||
[Analyze grammar]

janānāṃ nicaye ramye vastūnāṃ krayavikraye |
āśraye cādhvagānāṃ ca nadīnada samāgame || 103 ||
[Analyze grammar]

devānāṃ maṃḍapaṃ kṛtvā yatphalaṃ labhate naraḥ |
tatphalaṃ samavāpnoti dviguṇaṃ vipramaṃdire || 104 ||
[Analyze grammar]

anāthasya ca dīnasya śrotriyasya viśeṣataḥ |
kārayitvā gṛhaṃ ramyaṃ naraḥ svargānna hīyate || 105 ||
[Analyze grammar]

ya idaṃ śṛṇuyānnityaṃ puṇyākhyānamanuttamam |
akṣayaṃ labhate svargaṃ prāsādādeḥ phalaṃ labhet || 106 ||
[Analyze grammar]

dhanināṃ ceśvarāṇāṃ ca tathā puṇyavatāṃ punaḥ |
pāṭhayitvā paṭhitvā tu naraḥ svargānna hīyate || 107 ||
[Analyze grammar]

devānāṃ dāsadāsīnāṃ sadā devālayeṣu ca |
paṭhedyastu sadā vipro mokṣamārgaṃ sa gacchati || 108 ||
[Analyze grammar]

nṛpāṇāmīśvarāṇāṃ ca dhanināṃ guṇināṃ puraḥ |
paṭhitvā mokṣamāpnoti śravaṇāttatphalaṃ labhet || 109 ||
[Analyze grammar]

dvijā ūcuḥ |
sāmānyekaḥ paraḥ puṇyo martyaloke dvijottama |
sulabho martyapūjyastu munīnāṃ ca tapasvinām || 110 ||
[Analyze grammar]

cāturvarṇyāśramāṇāṃ ca pāpapuṇyavatāṃ nṛṇām |
guṇāguṇavatāṃ caiva varṇāvarṇavatāṃ tathā || 111 ||
[Analyze grammar]

vyāsa uvāca |
sarveṣāmeva bhūtānāṃ rudrākṣeṇa yuto varaḥ |
darśanādyasya lokānāṃ pāparāśiḥ pralīyate || 112 ||
[Analyze grammar]

sparśanāddivamaśnāti dhārāṇādraudratāṃ vrajet |
śirasyurasi bāhau ca rudrākṣaṃ dhārayettu yaḥ || 113 ||
[Analyze grammar]

sa ceśānasamo loke makhe sarvatra gocaraḥ |
yatra tiṣṭhatyasau viprassa deśaḥ puṇyavānbhavet || 114 ||
[Analyze grammar]

taṃ dṛṣṭvāpyathavā spṛṣṭvā naraḥ pūyeta kalmaṣāt |
yajjapyaṃ tarpaṇaṃ dānaṃ snānamarcā pradakṣiṇam || 115 ||
[Analyze grammar]

yatkiṃcitkurute puṇyaṃ nikhilaṃ tadanaṃtakam |
tīrthānāṃ ca mahattīrthaṃ rudrākṣasya phalaṃ dvijāḥ || 116 ||
[Analyze grammar]

asyaiva dhāraṇāddehī pāpātpūto'ti puṇyabhāk |
gṛhītvā cākṣamālāṃ ca brahmagraṃthiyutāṃ śivām || 117 ||
[Analyze grammar]

yajjaptaṃ ca kṛtaṃ dānaṃ stotraṃ maṃtraṃ surārcanam |
sarvaṃ cākṣayatāmeti pāpaṃ ca kṣayamāvrajet || 118 ||
[Analyze grammar]

mālāyā lakṣaṇaṃ brūmaḥ śrūyatāṃ dvijasattamāḥ |
tasyāstu lakṣaṇaṃ jñātvā śaivamārgaṃ pralapsyatha || 119 ||
[Analyze grammar]

niryonikīṭaviddhaṃ ca bhagnaligaṃ yathākramam |
anyonyaṃ bījalagnaṃ ca mālāyāṃ parivarjayet || 120 ||
[Analyze grammar]

svayaṃ ca grathitā yā ca ślathānyonya prasajjitā |
śūdrādigrathitā'śuddhā dūrāttāṃ parivarjayet || 121 ||
[Analyze grammar]

madhyamālagnakaṃ bījaṃ japtavyaṃ ca yathākramam |
hastasaṃbhramaṇenaiva mervāmarśaṃ punaḥ punaḥ || 122 ||
[Analyze grammar]

saṃkhyātaṃ yajjapenmaṃtramasaṃkhyātaṃ ca niṣphalam |
sarveṣāmeva devānāṃ japenmaṃtraṃ svamālayā || 123 ||
[Analyze grammar]

prayataḥ sakale tīrthe koṭikoṭiguṇaṃ bhavet |
śuddhāyāmeva bhūmyāṃ tu medhyake vṛkṣamūlake || 124 ||
[Analyze grammar]

goṣṭhe catuṣpathāgāre viṣṇormaṃtraṃ śivasya ca |
gaṇapateśca sūrasya liṃgenaṃtaphalaṃ labhet || 125 ||
[Analyze grammar]

śūnyāgāre śavasyāgre śmaśāne ca catuṣpathe |
devīmaṃtraṃ japedyastu sadyassidhyati sādhakaḥ || 126 ||
[Analyze grammar]

yāvaccāvaidikaṃ maṃtraṃ paurāṇaṃ cāgamodbhavam |
sarvaṃ rudrākṣamālāyāmīpsiteṣṭārthadāyakam || 127 ||
[Analyze grammar]

rudrākṣasravajaṃ śuddhaṃ jalaṃ śirasi dhārayet |
sarvasmātkalmaṣātpūtaḥ puṇyaṃ bhavati cākṣayam || 128 ||
[Analyze grammar]

rudrākṣasya ca pratyekaṃ bījaṃ pratyeka nirjaraṃ |
dhārayedyastanau martyaḥ surāṇāṃ sattamo bhavet || 129 ||
[Analyze grammar]

dvijā ūcuḥ |
rudrākṣastu kuto jātaḥ kuto vā medhyatāṃ gataḥ |
kimarthaṃ sthāvaro bhūmau kenaiva ca pracāritaḥ || 130 ||
[Analyze grammar]

vyāsa uvāca |
purā kṛtayuge viprāstripuro nāma dānavaḥ |
surāṇāṃ ca vadhaṃ kṛtvā aṃtarikṣapure hi saḥ || 131 ||
[Analyze grammar]

praṇāśe sarvalokānāṃ sthiro brahmavareṇa ca |
śuśrāva śaṃkaro bhīmaṃ devairīśo niveditam || 132 ||
[Analyze grammar]

tato'jagavamāsajya bāṇamaṃtakasannibham |
dhṛtvā taṃ ca jaghānātha dṛṣṭaṃ divyena cakṣuṣā || 133 ||
[Analyze grammar]

sa papāta mahīpṛṣṭhe maholkeva cyuto divaḥ |
ghaṭanavyākulādrudrātpatitāḥ svedabiṃdavaḥ || 134 ||
[Analyze grammar]

tatrāśrubiṃduto jāto mahārudrākṣakaḥ kṣitau |
asyaiva ca phalaṃ jīvā na jānaṃtyatiguhyataḥ || 135 ||
[Analyze grammar]

tataḥ kailāsaśikhare devadevaṃ maheśvaram |
praṇamya śirasā bhūmau skaṃdo vacanamabravīt || 136 ||
[Analyze grammar]

rudrākṣasya phalaṃ nātha jñātumicchāmi tattvataḥ |
japyetha dhāraṇe caiva darśane sparśanepi vā || 137 ||
[Analyze grammar]

īśvara uvāca |
lakṣaṃ tu darśanātpuṇyaṃ koṭirvai sparśanena ca |
daśakoṭiphalaṃ puṇyaṃ dhāraṇāllabhate naraḥ || 138 ||
[Analyze grammar]

lakṣakoṭisahasrāṇi lakṣakoṭiśatāni ca |
japtvāsya labhate puṇyaṃ nātra kāryā vicāraṇā || 139 ||
[Analyze grammar]

ucchiṣṭo vā vikarmastho yukto vā sarvapātakaiḥ |
mucyate sarvapāpebhyo rudrākṣadhāraṇena vai || 140 ||
[Analyze grammar]

kaṃṭhe rudrākṣamādāya śvāpado mriyate yadi |
sopi rudratvamāpnoti kiṃ punarmānuṣādayaḥ || 141 ||
[Analyze grammar]

dhyānadhāraṇahīnopi rudrākṣaṃ yadi dhārayet |
sarvapāpavinirmuktaḥ sa yāti paramāṃ gatim || 142 ||
[Analyze grammar]

kārtikeya uvāca |
ekavaktraṃ dvitricatuḥpaṃcaṣaḍvaktrameva ca |
saptāṣṭanavavaktraṃ ca daśaikādaśavaktrakam || 143 ||
[Analyze grammar]

rudrākṣaṃ dvādaśāsyaṃ ca trayodaśamukhaṃ tathā |
caturdaśāsyasaṃyuktaṃ svayamuktaṃ ca śaṃkaram || 144 ||
[Analyze grammar]

teṣāṃ ca tanmukhānāṃ ca devatāḥ kāśca tadvada |
guṇo vā kīdṛśasteṣāṃ doṣo vā jagadīśvara || 145 ||
[Analyze grammar]

yadi menugrahovāsti kathayasva yathārthataḥ |
īśvara uvāca |
ekavaktraḥ śivaḥ sākṣādbrahmahatyāṃ vyapohati || 146 ||
[Analyze grammar]

tasmāttu dhārayeddehe sarvapāpakṣayāya ca |
śivalokaṃ sa gacchecca śivena saha modate || 147 ||
[Analyze grammar]

mahatāpuṇyayogena harānugrahakāraṇāt |
ekavaktraṃ labhenmartyo kailāsaṃ ca ṣaḍānana || 148 ||
[Analyze grammar]

devadevo dvivaktraṃ ca yastu dhārayate naraḥ |
sarvapāpakṣayaṃ yāti yadguhyaṃgovadhādikam || 149 ||
[Analyze grammar]

svargaṃ cākṣayamāpnoti dvivaktradhāraṇāttataḥ |
trivaktramanalassākṣādyasyadehe pratiṣṭhati || 150 ||
[Analyze grammar]

tasya janmārjitaṃ pāpaṃ dahatyagniriveṃdhanam |
strīhatyā brahmahatyābhyāṃ bahūnāṃ caiva hatyayā || 151 ||
[Analyze grammar]

yatpāpaṃ labhate martyaḥ sarvaṃ naśyati tatkṣaṇāt |
yatphalaṃ vahnipūjāyāmagnikārye ghṛtāhutau || 152 ||
[Analyze grammar]

tatphalaṃ labhate dhīraḥ svargaṃ cānaṃtamaśnute |
trivaktraṃ dhārayedyastu sa ca brahmasamo bhuvi || 153 ||
[Analyze grammar]

nicitaṃ duṣkṛtaṃ sarvaṃ dahejjanmani janmani |
na codare bhavedrogo na caivāpaṭutāṃ vrajet || 154 ||
[Analyze grammar]

parājayaṃ na labhate nāgninā dahyate gṛham |
etānyanyāni sarvāṇi vajrādeśca nivāraṇam || 155 ||
[Analyze grammar]

nāśubhaṃ vidyate kiṃcittrivaktrasya tu dhāraṇāt |
caturvaktraḥ svayaṃ brahmā yasya dehe pratiṣṭhati || 156 ||
[Analyze grammar]

sa bhavetsarvaśāstrajño dvijo vedavidāṃ varaḥ |
sarvadharmārthatattvajñaḥ smārtaḥ paurāṇiko bhavet || 157 ||
[Analyze grammar]

yatpāpaṃ narahatyāyāṃ bahusattveṣu veśmasu |
tatsarvaṃ dahate śīghraṃ caturvaktrasya dhāraṇāt || 158 ||
[Analyze grammar]

maheśastuṣyate nityaṃ bhūtānāmadhipo bhavet |
sadyojātastatheśānastatpuruṣo'ghora eva ca || 159 ||
[Analyze grammar]

vāmadeva ime devā vaktraiḥ paṃcabhirāśritāḥ |
ataḥ sarvatra bhūyiṣṭhāḥ paṃcavaktro dharātale || 160 ||
[Analyze grammar]

rudrasyātmajarūpoyaṃ tasmāttaṃ dhārayedbudhaḥ |
kalpakoṭisahasrāṇi kalpakoṭiśatāni ca || 161 ||
[Analyze grammar]

tāvatkālaṃ śivasyāgre pūjanīyaḥ surāsuraiḥ |
sārvabhaumo bhavedbhūmau śarvatejāḥ śivālaye || 162 ||
[Analyze grammar]

tasmātsarvaprayatnena paṃcavaktraṃ tu dhārayet |
ṣaḍvaktraṃ kārtikeyaṃ tu dhārayandakṣiṇe bhuje || 163 ||
[Analyze grammar]

brahmahatyādibhiḥ pāpairmucyate nātra saṃśayaḥ |
skaṃdasya sadṛśaḥ śūraḥ kalpāṃte samupasthite || 164 ||
[Analyze grammar]

nātra parājayaṃ caiti guṇānāmākaro bhuvi |
kumāratvamavāpnoti yathā gaurīśanaṃdanaḥ || 165 ||
[Analyze grammar]

brāhmaṇo bhūpapūjyaśca kṣatriyo labhate jayam |
vaiśyāḥ śūdrādayo varṇāḥ sadaiśvaryaprapūritāḥ |
tasyaiva varadā gaurī māteva sulabhā bhavet || 166 ||
[Analyze grammar]

tato bhujabalādeva viśvatejā bhavennaraḥ |
vāgmī dhīrassabhāyāṃ ca nṛpaveśmani saṃsadi || 167 ||
[Analyze grammar]

na ca kātaratāmeti naiva bhaṃgo bhaveddhruvam || 168 ||
[Analyze grammar]

etānyanyāni sarvāṇi ṣaḍvaktrasyaiva dhāraṇāt |
saptavaktro mahāsenastvanaṃto nāma nāgarāṭ || 169 ||
[Analyze grammar]

asya pratyeka vaktre tu pratināgā vyavasthitāḥ |
anaṃtaḥ karkaṭaścaiva puṃḍarīkotha takṣakaḥ || 170 ||
[Analyze grammar]

viṣolbaṇaśca kārīṣaḥ śaṃkhacūḍaśca saptamaḥ |
ete nāgā mahāvīryāḥ saptavaktre vyavasthitāḥ || 171 ||
[Analyze grammar]

asya dhāraṇamātre tu viṣaṃ na kramate tanau |
haraśca paramaprīto bhavennāgeśvare yathā || 172 ||
[Analyze grammar]

prītyāsyā sarvapāpāni kṣayaṃ yāṃti dinedine |
brahmahatyā surāpānaṃ steyādi gurutalpajam || 173 ||
[Analyze grammar]

yatpāpaṃ labhate martyaḥ sarvaṃ naśyati tatkṣaṇāt |
devasya sadṛśaṃ bhojyaṃ trailokye niścitaṃ labhet || 174 ||
[Analyze grammar]

aṣṭavaktro mahāsenaḥ sākṣāddevo vināyakaḥ |
asyaiva dhāraṇādeva yatpuṇyaṃ tacchṛṇuṣva me || 175 ||
[Analyze grammar]

janmajanma na mūrkhaḥ syānnāturo na ca naṣṭadhīḥ |
avighnaṃ sarvakāryeṣu tasyaiva satataṃ bhavet || 176 ||
[Analyze grammar]

naipuṇyaṃ lipikāryeṣu mahākāryeṣu kauśalam |
sarvāraṃbhādikāryeṣu kṣamaṃtasya dine dine || 177 ||
[Analyze grammar]

ardhakūṭaṃ tulākūṭaṃ sarvakūṭaṃ tathaiva ca |
śiśnodarakareṇaiva saṃspṛśedvā gurustriyam || 178 ||
[Analyze grammar]

evamādīni sarvāṇi haṃti pāpāni sarvathā |
akṣayaṃ tridivaṃ bhuktvā mukto yāti parāṃ gatim || 179 ||
[Analyze grammar]

guṇānyetāni sarvāṇi aṣṭavaktrasya dhāraṇāt |
navāsyaṃ bhairavaṃ proktaṃ dhārayedyastu bāhutaḥ || 180 ||
[Analyze grammar]

kapilaṃ muktidaṃ dhṛtvā mamatulya balo bhavet |
lakṣakoṭisahasrāṇi brahmahatyāḥ karoti yaḥ || 181 ||
[Analyze grammar]

tāḥ sarvā dahate śīghraṃ navavaktrasya dhāraṇāt |
suraloke sadā devaiḥ pūjito maghavānyathā || 182 ||
[Analyze grammar]

haravadvaraveśmastho gaṇeśo nātra saṃśayaḥ |
pannagāśca vinaśyaṃti daśavaktrasya dhāraṇāt || 183 ||
[Analyze grammar]

vaktre caikādaśe vatsa rudrāścaikādaśa smṛtāḥ |
śikhāyāṃ dhārayennityaṃ tasya puṇyaphalaṃ śṛṇu || 184 ||
[Analyze grammar]

aśvamedhasahasrāṇi yajñakoṭiśatāni ca |
gavāṃ śatasahasrasya samyagdattasya yatphalam || 185 ||
[Analyze grammar]

tatphalaṃ śīghramāpnoti vaktraikādaśa dhāraṇāt |
harasya sadṛśo loke punarjanma na vidyate || 186 ||
[Analyze grammar]

rudrākṣaṃ dvādaśāsyaṃ yaḥ kaṃṭhadeśe tu dhārayet |
ādityastuṣyate nityaṃ dvādaśāsye vyavasthitaḥ || 187 ||
[Analyze grammar]

gomedhaṃ naramedhaṃ ca kṛtvā yatphalamaśnute |
tatphalaṃ śīghramāpnoti vajrādeśca nivāraṇam || 188 ||
[Analyze grammar]

naiva vahnerbhayaṃ caiva na ca vyādhiḥ pravartate |
arthalābhaṃ sukhaṃ bhuṃkta īśvaro na daridratā || 189 ||
[Analyze grammar]

hastyaśvanaramārjāra mūṣakāñchaśakāṃstathā |
vyāladaṃṣṭri sṛgālādīnhatvā vyāghātayatyapi || 190 ||
[Analyze grammar]

mucyate nātra saṃdeho vaktradvādaśa dhāraṇāt |
vaktra trayodaśo rudro rudrākṣaḥ prāpyate yadi || 191 ||
[Analyze grammar]

śaṃtamaḥ sa tu vijñeyaḥ sarvakāmaphalapradaḥ |
sudhārasāyanaṃ caiva dhātuvādaśca pādukā || 192 ||
[Analyze grammar]

sidhyaṃti tasya vai sarve bhāgyayuktasya ṣaṇmukha |
mātṛpitṛ svasṛ bhrātṛ gurūnvātha nihatya ca || 193 ||
[Analyze grammar]

mucyate sarvapāpebhyo trayodaśāsya dhāraṇāt |
akṣayaṃ labhate svargaṃ yathā devo maheśvaraḥ || 194 ||
[Analyze grammar]

caturdaśamukhaṃ vatsa rudrākṣaṃ yadi dhārayet |
satataṃ mūrdhni bāhau vā śaktipiṃḍaṃ śivasya ca || 195 ||
[Analyze grammar]

kiṃ punarbahunoktena varṇitena punaḥ punaḥ |
pūjyate satataṃ devaiḥ prāpyate puṇyagauravāt || 196 ||
[Analyze grammar]

kārtikeya uvāca |
bhagavanśrotumicchāmi vaktre vaktre yathāvidhi |
nyasanaṃ kena maṃtreṇa dhāraṇaṃ vā kathaṃ vada || 197 ||
[Analyze grammar]

īśvara uvāca |
śṛṇu ṣaṇmukha tattvena vaktre vaktre yathāvidhi |
amaṃtroccāraṇādeva guṇā hyete prakīrtitāḥ || 198 ||
[Analyze grammar]

yaḥ punarmaṃtrasaṃyuktaṃ dhārayedbhuvi mānavaḥ |
guṇāstasya mahattvaṃ ca kathituṃ naiva śakyate || 199 ||
[Analyze grammar]

idānīṃ maṃtrā diśyaṃte oṃ rudra ekavaktrasya |
oṃ khaṃ dvivaktrasya oṃ vuṃ trivaktrasya |
oṃ hrīṃ caturvaktrasya oṃ hrāṃ paṃcavaktrasya |
oṃ hrūṃ ṣaḍvaktrasya oṃ hraḥ saptavaktrasya |
oṃ kaṃ aṣṭavaktrasya oṃ jūṃ navavaktrasya |
oṃ kṣaṃ daśavaktrasya oṃ śrīṃ ekādaśavaktrasya |
oṃ hrīṃ dvādaśavaktrasya oṃ kṣauṃ trayodaśavaktrasya |
oṃ nrāṃ caturdaśavaktrasya |
evaṃ maṃtrā yathākramaṃ nyastavyāḥ |
śirasyurasi mālāṃ ca gṛhītvā yo vrajennaraḥ |
padepadeśvamedhasya phalamāpnoti nānyathā || 200 ||
[Analyze grammar]

sarveṣāmapi vaktrāṇāṃ dhāraṇe matsamo bhavet |
tasmātsarvaprayatnena rudrākṣaṃ putra dhāraya || 201 ||
[Analyze grammar]

dhārayitvā tu rudrākṣaṃ mriyate yaḥ kṣitau naraḥ |
sa yāti matpuraṃ ramyaṃ sarvadevaiḥ prapūjitaḥ || 202 ||
[Analyze grammar]

marudeśe purā vatsa vāṇijyāya kila sthale |
gacchanvaṇiksutastāta tarau pretā prapīḍitaḥ || 203 ||
[Analyze grammar]

narīnartitataḥ pretā dvijena paramaikṣi ca |
kā tvaṃ nṛtyasi dīnāsi saṃvṛtā jīrṇavāsasā || 204 ||
[Analyze grammar]

atha sā ca dvijaṃ prāha devadūtānmayā śrutam |
asya cāru narasyaiva vajrapātena sāṃpratam || 205 ||
[Analyze grammar]

niścitaṃ nidhanaṃ vipra madbharttā tu bhaviṣyati |
etasminnaṃtare nākādvajraṃ tasyaśiropari || 206 ||
[Analyze grammar]

apatatsa papātorvyāṃ rudrākṣasyārdhakhaṃḍake |
tato mama purātputra vimānaṃ cāpataddrutam || 207 ||
[Analyze grammar]

samāruhya tataḥ śrīmāṃstatra tiṣṭhati saṃciram |
mamāṃśakaṃ samāsādya īśvaraḥ kau dhanī bhavet || 208 ||
[Analyze grammar]

evaṃ rudrākṣakhaṃḍe ca mṛtasya sugatiḥ suta |
jñānena dhāriṇaḥ puṃsaḥ phalaṃ vaktuṃ na śaknumaḥ || 209 ||
[Analyze grammar]

sa śaivo vā bhavecchākto gāṇapatyotha saurakaḥ |
yo dadhāti mṛto mālāmekaṃ rudrākṣakaṃ tu vā || 210 ||
[Analyze grammar]

yaḥ paṭhetpāṭhayedvāpi śrāvayecchṛṇutepi vā |
sarvapāpātpramuktātmā sukhaṃ svargaṃ labhetkramāt || 211 ||
[Analyze grammar]