Chapter 12 - Sārthavāha-avadāna

athāśoko mahīpālaḥ kṛtāṃjalipuṭo mudā |
upaguptaṃ guruṃ natvā punarevamabhāṣata || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
yathā te guruṇādiṣṭaṃ tathā me khyātumarhasi || 2 || {2}
[Analyze grammar]

iti tena narendreṇa pṛṣṭe 'sau sugatātmajaḥ |
upagupto yatiścaivaṃ taṃ nṛpaṃ pratyabhāṣata || 3 || {3}
[Analyze grammar]

śṛṇu rājan samādhāya yathā me guruṇoditaṃ |
tathāhaṃ te pravakṣyāmi tacchrutvā mudito bhava || 4 || {4}
[Analyze grammar]

puraikasamaye caivaṃ śākyasiṃho jagadguruḥ |
sarvajñaḥ sugataḥ śāstā sarvadharmānudeśakaḥ || 5 || {5}
[Analyze grammar]

sarvavidyādhipo nāthastraidhātukavināyakaḥ |
dharmarājo munīndro 'sau sarvasatvahitaṃkaraḥ || 6 || {6}
[Analyze grammar]

śrāvastyāṃ vahirudyāne jetāhvaye mahāvane |
anāthapiṇḍadārāme vihāre saugatāśrame || 7 || {7}
[Analyze grammar]

śrāvakairbhikṣubhiḥ sārddhamupāsakaiśca cailakaiḥ |
bodhisatvagaṇaiścāpi tathānyaiśca maharṣibhiḥ || 8 || {8}
[Analyze grammar]

vyaharatsatvahitārthena dharmāmṛtaiḥ pravarṣayan |
tatsaddharmāmṛtaṃ pātuṃ prāyayurbodhivāṃchinaḥ || 9 || {9}
[Analyze grammar]

lokapālagaṇāḥ sarve svasvasainyagaṇaiḥ saha |
brāhmaṇāḥ kṣatriyāścāpi vaiśyāḥ śūdrāśca maṃtriṇaḥ || 10 || {10}
[Analyze grammar]

amātyā dhaninaḥ paurāḥ sādhavaśca mahājanāḥ |
vaṇijaḥ sārthavāhāśca tathānye sarvajātikāḥ || 11 || {11}
[Analyze grammar]

sarvadigbhyaḥ samāgatya sarve te samupāgatāḥ |
saṃbuddhaṃ śrīghanaṃ natvā pūjayitvā samaṃtataḥ || 12 || {12}
[Analyze grammar]

parivṛtya puraskṛtya saddharmaśravaṇārthinaḥ |
kṛtāṃjalipuṭo dṛṣṭvā saṃtasthuḥ saṃmukhānatāḥ || 13 || {13}
[Analyze grammar]

athāsau bhagavāndṛṣṭvā tān sarvān samupāśritān |
ādimadhyāṃtakalyāṇaṃ dideśa dharmamuttamaṃ || 14 || {14}
[Analyze grammar]

tatsaddharmāmṛtaṃ pītvā sarve lokādhipādayaḥ |
harṣitāste 'numodanto nananduḥ paribodhitāḥ || 15 || {15}
[Analyze grammar]

tadaiva samaye tasyāṃ śrāvastyāṃ puri saṃsthitaḥ |
āsītsāṃyātrikotsāhī sārthavāho mahodyamī || 16 || {16}
[Analyze grammar]

svakuladharmabhṛdvīraḥ svakulavṛttimānitaḥ |
yaśodharmārthakāmāptyai samudraṃ gantumaichata || 17 || {17}
[Analyze grammar]

tato 'sau svāṃ priyāṃ bhāryāṃ bodhayitvā prayatnataḥ |
svasahāyāśca tāṃ sarvāṃ samāhūya samabravīt || 18 || {18}
[Analyze grammar]

bhavaṃto śrūyatāṃ sarve yadabhilaṣitaṃ mama |
atrāsti yadi vo vāṃchā tanme svāgantumarhatha || 19 || {19}
[Analyze grammar]

ahaṃ ratnākaraṃ gantumiche ratnasamṛddhaye |
tatprāyāta mayā sārddhaṃ yadi saṃpattimichatha || 20 || {20}
[Analyze grammar]

iti tenoditaṃ śrutvā sarve te ratnalobhitāḥ |
sahasā gaṃtumichante ratnākare mahodadhau || 21 || {21}
[Analyze grammar]

tato 'sau sārthabhṛcchīghraṃ sarve sārthagaṇaiḥ saha |
svastyayanavidhiṃ kṛtvā pratasthe saṃpramoditaḥ || 22 || {22}
[Analyze grammar]

tataḥ kramādvyatikramya grāmāraṇyavanāni ca |
sarve te pracaranto vai tīraṃ prāpurmahodadheḥ || 23 || {23}
[Analyze grammar]

tato bhāṃḍāni naukāyāmāropyāruhya ca svayaṃ |
karṇadhāraprayatnaiste jagāhire 'mbudhiṃ kramāt || 24 || {24}
[Analyze grammar]

tataḥ kramātsamullaṃghya bahudvīpāntarāṇi te |
ratnākaraṃ samāsādya ratnāni samasādhayan || 25 || {25}
[Analyze grammar]

tataste bahuratnāni samāsādya pramoditāḥ |
tataḥ pratyāgatā abdhestīrāntikaṃ samāyayuḥ || 26 || {26}
[Analyze grammar]

tatra tatkarmadoṣeṇa kālavātairvighaṭṭitaṃ |
bhidyate vahanaṃ teṣāṃ hṛdayaiḥ sā sahāśu tat || 27 || {27}
[Analyze grammar]

tadā te vaṇijaḥ sarve niḥprayatnapratikriyā |
sarvabhāṇḍaiḥ sahāgāḍhe nipeturduṣkare 'mbudhau || 28 || {28}
[Analyze grammar]

kecitphalakamālamvya samuttīrṇāḥ svavīryataḥ |
kecidvāhuvalādhānaṃ samuttīrya sthalaṃ yayuḥ || 29 || {29}
[Analyze grammar]

kecicca vilayaṃ prāptā nirālamvyanirāśrayāḥ |
utpravanto nimajjantaḥ kheditā nidhanaṃ yayuḥ || 30 || {30}
[Analyze grammar]

tataste vaṇijaḥ sarve ye viśiṣṭā viṣāditāḥ |
te yaśodhanavibhraṣṭāḥ śūnyahastā gṛhaṃ yayuḥ || 31 || {31}
[Analyze grammar]

tathāsau sārthavāho 'pi gṛhaṃ prāpto viṣāditaḥ |
etadvṛttaṃ svabhāryāyāḥ kathitvaivaṃ vyacintayat || 32 || {32}
[Analyze grammar]

hā hā me mandabhāgyatvājjāyate mīdṛśī vipat |
atrāhaṃ kiṃ kariṣyāmi yato bhāgyaṃ na vidyate || 33 || {33}
[Analyze grammar]

bhāgyavānpuruṣo dhīro bhāgyavān kuśalī sudhīḥ |
bhāgyena labhyate saṃpad yaśaḥ saukhyaguṇānvitaḥ || 34 || {34}
[Analyze grammar]

dhīḥ śrīlakṣmīyaśoratnaṃ valaṃ saṃpatkṣaṇādayaḥ |
etadādyā guṇāḥ sarve śobhanti bhāgyamāśritāḥ || 35 || {35}
[Analyze grammar]

nihīnabhāgyavṛttestu puruṣasyāpi saṃmate |
etadādyādiguṇāḥ sarve na prasiddhyaṃti sarvataḥ || 36 || {36}
[Analyze grammar]

tadatra kiṃ kariṣye 'haṃ kva yāsyāmi dhanāptaye |
dhanahīnā na śobhante gṛhasthāḥ sādhavo 'pi hi || 37 || {37}
[Analyze grammar]

varaṃ prāṇaparityāgaṃ na tu dravyairvinā gṛhe |
paśuvannirasaṃ bhuktvā sthāsyāmyevaṃ nirutsavaṃ || 38 || {38}
[Analyze grammar]

bhāgyena labhyate dravyaṃ bhāgyaṃ dharmeṇa labhyate |
dharme hi jāyate sveṣṭadevatāyāḥ prasādataḥ || 39 || {39}
[Analyze grammar]

taddharmabhāgyalabdhārthaṃ svakuladevatāṃ prati |
samyagārādhayitvaivaṃ yāyāṃ ratnākaraṃ punaḥ || 40 || {40}
[Analyze grammar]

manasīti viniścitya sa sārthavāhakaḥ punaḥ |
svakuladevatāṃ samyagārādhya samayācata || 41 || {41}
[Analyze grammar]

namaste devate nityaṃ bhaje 'haṃ śaraṇaṃ gataḥ |
kṣaṃtavyaṃ me 'parādhatvaṃ prasīda parameśvara || 42 || {42}
[Analyze grammar]

itthaṃ sā devatā samyagārādhya saṃpramoditā |
sarvasārthān samāhūya punarevamabhāṣata || 43 || {43}
[Analyze grammar]

bho bhavanto vijānīdhvaṃ vayaṃ sarve vaṇigjanāḥ |
tadatra bhavatāmagre kathyate me samīhitaṃ || 44 || {44}
[Analyze grammar]

yadbhavanto vayaṃ sarve sārthavāhakulodbhavāḥ |
tattathaiva gṛhe sthitvā naiva śobhāṃ vrajemahi || 45 || {45}
[Analyze grammar]

tasmātsvakulavṛttisthaiḥ sarvairasmābhirudyataiḥ |
yaśodharmasukhāptyarthaṃ karttavyaṃ dhanasādhanaṃ || 46 || {46}
[Analyze grammar]

dhanahīnā na śobhante gṛhasthā hi kuṭuṃvinaḥ |
sārthavāho 'stu śobhante vahuratnārjanodyatāḥ || 47 || {47}
[Analyze grammar]

tadviṣādaṃ parityaktvā yaśoratnasukhāptaye |
dhairyamālamvya sarvaiśca karttavyaṃ dhanasādhanaṃ || 48 || {48}
[Analyze grammar]

dhanavānpuruṣo lokaiḥ sarvatrāpi pramānyate |
dhanena sādhayeddharmaṃ dharmeṇa sadgatiṃ vrajet || 49 || {49}
[Analyze grammar]

tasmānnityaṃ mahotsāhais ñltyaktvālasyakuśīdatā |
arjanīyaṃ prayatnena dhanaṃ dānāya bhuktaye || 50 || {50}
[Analyze grammar]

dānaṃ vibhūṣaṇaṃ loke dānaṃ durgatinivāraṇaṃ |
dānaṃ svargasya sopānaṃ dānaṃ śāntikaraṃ sadā || 51 || {51}
[Analyze grammar]

asmāddānaṃ sadā kartuṃ bhoktuṃ saukhyaṃ yathechayā |
bhūyo ratnākaraṃ gaṃtumarhāmahe dhanārjane || 52 || {52}
[Analyze grammar]

tatra ratnāni saṃgṛhya svastipratyāgatā vayaṃ |
yāvajjīvaṃ sukhaṃ bhuktvā dānaṃ kṛtvā vasemahi || 53 || {53}
[Analyze grammar]

yadi daivo vipattiḥ syātsamudre patitā vayaṃ |
tīrtharāje mṛtāḥ sarve yāsyāmaḥ svargatiṃ dhruvaṃ || 54 || {54}
[Analyze grammar]

yadi bhāgyādathāsmākaṃ devānāṃ ca prasādataḥ |
yātrāsiddhirbhavennūnaṃ yāvajjīvaṃ sukhaṃ tadā || 55 || {55}
[Analyze grammar]

asmād ratnākare gantuṃ iche ratnapralabdhaye |
tatprāyāta mayā sārddhaṃ yadi saṃpattimichatha || 56 || {56}
[Analyze grammar]

iti tasyoditaṃ śrutvā te sarve vaṇijo mudā |
tathā tena sahaichānta gantuṃ ratnākaraiḥ punaḥ || 57 || {57}
[Analyze grammar]

tato 'sau sārthabhṛcchīghraṃ dhṛtvā svastyayanaṃ mudā |
sarve sārthagaṇaiḥ sārddhaṃ pratasthe svapurādvahi || 58 || {58}
[Analyze grammar]

tataḥ kramādvyatikramya grāmāraṇyavanāni ca |
pracarantaśca te sarve tīraṃ prāpurmahodadheḥ || 59 || {59}
[Analyze grammar]

tatra sarve 'pi te sārthā bhāṇḍāni vahane kramāt |
āropya sahasārūḍhā jagāhire mahāmbudhau || 60 || {60}
[Analyze grammar]

tataḥ kramātsamullaṃghya vahudvīpāntarāṇi te |
ratnākaraṃ samāsādya ratnāni samasādhayan || 61 || {61}
[Analyze grammar]

tatra te vahuratnāni samāgṛhya praharṣitāḥ |
tataḥ pratyāgatāścābdhestīrāntikamupāyayuḥ || 62 || {62}
[Analyze grammar]

tatastaddaivayogena kālikāvātaghaṭṭitā |
sā naukā bhidyate caivaṃ teṣāṃ vai hṛdayaiḥ saha || 63 || {63}
[Analyze grammar]

tadā te vaṇijaḥ sarve niḥprayatnapratikriyā |
sarvabhāṇḍaiḥ sahāgāḍhe nyapatanduṣṭare 'mbudhau || 64 || {64}
[Analyze grammar]

tatra te vilayaṃ prāptā nirālaṃvā nirāśrayāḥ |
unmajjanto nimajjantaḥ preritāstīramūrmibhiḥ || 65 || {65}
[Analyze grammar]

kecitphalakamāśritya samuttīrya svavīryataḥ |
kecidvāhuvalādhānaiḥ samuttīrya sthalaṃ yayuḥ || 66 || {66}
[Analyze grammar]

kecinnihīnavīryāṅgā hanyamānā mahormibhiḥ |
utplavantā nimajjantaḥ kheditā nidhanaṃ yayuḥ || 67 || {67}
[Analyze grammar]

tatasteṣāṃ ca sārthānāṃ ye 'vaśiṣṭā sujīvinaḥ |
yaśoratnaviyuktāste śūnyahastā gṛhaṃ yayuḥ || 68 || {68}
[Analyze grammar]

tathāsau sārthavāho 'pi gṛhaṃ gatvā viṣāditaḥ |
etadvṛttaṃ svavaṃdhūnāṃ kathitvaivamabhāṣata || 69 || {69}
[Analyze grammar]

hā mayā kiṃ kṛtaṃ pāpaṃ yenedrigjāyate vipat |
dvidhāpi siddhyate naiva yato bhāgyaṃ na vidyate || 70 || {70}
[Analyze grammar]

pāpairna siddhyate karma atra yatnasya kiṃ valaiḥ |
dharmeṇa siddhyate karma tasmāddharmo valottamaḥ || 71 || {71}
[Analyze grammar]

tasmāddharmaṃ puraskṛtya karttavyaṃ dravyasādhanaṃ |
dravyena sādhayetkarma sadgatiṃ samavāpnuyāḥ || 72 || {72}
[Analyze grammar]

karma tu siddhyate samyakkulavṛttiṃ ca cāriṇāṃ |
kulavṛttiṃ parityajya yo 'nyavṛttau caretkudhīḥ || 73 || {73}
[Analyze grammar]

sa ihāpi paribhraṣṭaḥ paratra durgatiṃ vrajet |
yenaivaṃ sadgatiprāptistadaiva karmma sādhayet || 74 || {74}
[Analyze grammar]

yato 'pi durgatiṃ prāptistatkarma tarhitaṃ budhaiḥ |
tadatra kiṃ kariṣye 'haṃ kva yāsyāmyarthamarjituṃ |
arthaṃ vinā kathaṃ dharmaṃ karttavyaṃ hi kuṭuṃvibhiḥ || 75 || {75}
[Analyze grammar]

vinā dharmaṃ hi saṃsāre janma jīvaṃ ca nisphalaṃ |
kiṃ te na pauruṣeṇāpi yena dharmaṃ na sādhyate || 76 || {76}
[Analyze grammar]

dhigdhigme janma saṃsāre jīvituṃ na tathotsahe |
varaṃ prāṇaparityāgaṃ na tvevaṃ cirajīvitaṃ || 77 || {77}
[Analyze grammar]

avaśyaṃ jantubhirmṛtyurgantavyaṃ ekadhā dhruvaṃ |
tato 'tra martumichāmi na tvevamuṣituṃ gṛhe || 78 || {(78)}
[Analyze grammar]

evaṃjīvo na śobhe 'haṃ dhigpravādāgnidagdhitaḥ |
kathaṃ me śāmyate duḥkhaṃ yenāhaṃ parikheditaḥ || 79 || {(78)}
[Analyze grammar]

kiṃ karttavyaṃ kva gantavyaṃ yatnaṃ cātra na vidyate |
sarvathāhaṃ vinaṣṭo 'smi ko me 'sti rakṣako janaḥ || 80 || {79}
[Analyze grammar]

yaśodharmaparibhraṣṭo vrajeyaṃ durgatiṃ khalu |
tadāhaṃ kiṃ kariṣyāmi dharmayaśaḥsukhānvitaḥ || 81 || {80}
[Analyze grammar]

mānuṣye labhyamāne hi kuto dharmānusādhanaṃ |
vinā dharmmaṃ yaśodravyaḥ kiṃ saukhyaṃ gṛhavāsināṃ || 82 || {81}
[Analyze grammar]

vinā dharmayaśodravyairyo gṛhasthaḥ paśuḥ khalu |
dharmeṇa sādhayeddravyaṃ yaśobhāgyasukhāptaye || 83 || {82}
[Analyze grammar]

dharmāddhi jāyate puṇyaṃ dānaśīlakṣamādibhiḥ |
puṇyenaiva pralabhyante caturvargā api dhruvaṃ || 84 || {83}
[Analyze grammar]

tadeteṣāṃ mamaiko 'pi na vidyate kathaṃ cana |
hā hato 'smi svadaivena kiṃ karomi vikheditaḥ || 85 || {84}
[Analyze grammar]

sarvathāhaṃ vinaṣṭo 'smi namo daivāya karmaṇe |
evaṃ teṣāṃ svavaṃdhūnāṃ vilapītvā sa sārthapaḥ || 86 || {85}
[Analyze grammar]

tasthau cintākulībhūto dhanārjananirāśrayā |
evaṃ vyavasthitaṃ dṛṣṭvā taṃ te sarve 'pi vāṃdhavāḥ || 87 || {86}
[Analyze grammar]

datvāśvāsaṃ vinodāya bodhayante dhruvaṃ tathā |
sādho sārthapate satyaṃ tatsarvaṃ yattvayocyate || 88 || {87}
[Analyze grammar]

tadevaṃ dhairyamālaṃvya prodyamasva gṛhe vasan |
sādho kutrāpi mā dhāva nirmāṇasadṛśaṃ phalaṃ || 89 || {88}
[Analyze grammar]

yāvadevāmbhasā kumbhaḥ siṃdhāvandhau 'vapūryate |
yadabhāvi na tadbhāvi bhāvi naiva tadanyathā || 90 || {89}
[Analyze grammar]

avaśyaṃ bhāvino bhāvā bhavaṃti sarvadehināṃ |
avaśyaṃ bhāvino bhāvā na bhaveyustathā yadi || 91 || {90}
[Analyze grammar]

pitrā tyaktaḥ kathaṃ rāmo rājyabhraṣṭo vanaṃ yayau |
tatrāpi vasatastasya bhāryā śītā pativratā || 92 || {91}
[Analyze grammar]

āhṛtya rakṣasā nītā kathaṃ laṃkāpure 'vasat |
tato rāmeṇa vīryeṇa hatvāsau rāvaṇastataḥ || 93 || {92}
[Analyze grammar]

pratyānīya punaḥ śītā tyaktā bharttrā svayaṃ kathaṃ |
punarṛṣeḥ samānīya sabhāmadhye parikṣitā || 94 || {93}
[Analyze grammar]

tataḥ pṛthyā svayaṃ gṛhya sītānītā rasātalaṃ |
tatastadvirahārttāsau rāmaḥ saṃsāranispṛhaḥ || 95 || {94}
[Analyze grammar]

nadyāṃ prāṇasvayaṃ tyaktvā janaṃ sārddhaṃ divaṃ yayau |
evamanye 'pi rājāno yudhiṣṭhirā nṛpādayaḥ |
rājyabhraṣṭā vane gatvā vibhramuste 'pi daivataḥ || 96 || {95}
[Analyze grammar]

evamanye 'pi lokāśca sarvatraidhātukabhavāḥ |
uttamā adhamā madhyā saṃti te 'pi svadaivataḥ || 97 || {96}
[Analyze grammar]

kecidgṛhe mṛtāḥ kecijjāyamānā mṛtā api |
kecidvālye mṛtāḥ kecitkaumāratve mṛtāstathā || 98 || {97}
[Analyze grammar]

yauvane 'pi mṛtāḥ kecinmṛtā vṛddhe vadanti me |
sarve 'pyevaṃ mṛtā lokāḥ svasvadaivapramāṇataḥ || 99 || {98}
[Analyze grammar]

evaṃ devādayo lokāḥ sukhaduḥkhānuyoginaḥ |
svasvadaivānubhāvena ṣaḍgatiṣu caranti te || 100 || {99}
[Analyze grammar]

kecidvālye sukhaṃ bhuktvā yauvane duḥkhabhāginaḥ |
kecicca yauvane saukhyaṃ bhuktvā vṛddhe suduḥkhitāḥ || 101 || {100}
[Analyze grammar]

kecicca duḥkhitā vālye yauvane saukhyabhāginaḥ |
vṛddhatvasya sukhībhūtā bhavaṃti te 'pi hi daivataḥ || 102 || {1}
[Analyze grammar]

sarve 'pi sukhamichanti duḥkhaṃ nechati kaścana |
tathā sukhāni saṃprāptuṃ yatnaṃ kurvantyanekaśaḥ || 103 || {2}
[Analyze grammar]

keṣāṃ citsiddhyate yatnaṃ keṣāṃ cidvā na siddhyati |
keṣāṃ cidvighnatāṃ yāti tatsarvaṃ daivayogataḥ || 104 || {3}
[Analyze grammar]

tathā ca rogiṇāṃ rogā vaidyopacāraṇairapi |
varddhyante naiva śāmyante tadapi daivayogataḥ || 105 || {4}
[Analyze grammar]

keṣāṃ cid rogiṇāṃ rogā vinā vaidyopacāraṇe |
śāmyaṃte yatnato cāpi tadapi daivayogataḥ || 106 || {5}
[Analyze grammar]

tathā caldmaṃtriṇāṃ maṃtrāḥ siddhyante yatnato laghuḥ |
keṣāṃ cidvighnatāṃ yānti tadapi daivakāraṇāt || 107 || {6}
[Analyze grammar]

tathaivaṃ vaṇijāṃ lābhoḥ siddhyante yatnato 'pi ca |
keṣāṃ cinnaiva yatnena tadapi daivayogataḥ || 108 || {7}
[Analyze grammar]

tathā vīrā raṇe śatruṃ vinā yatnaṃ jayaṃtyapi |
kecittu ripunā yuddhe hanyamānā mṛtāḥ pare || 109 || {8}
[Analyze grammar]

kecitkṛtvā mahāyuddhaṃ hanyamānāḥ parasparaṃ |
tyaktvā dehaṃ gatāḥ svargaṃ tadapi daivayogataḥ || 110 || {9}
[Analyze grammar]

evaṃ sāṃyātrikā ratnaṃ prāptuṃ ratnākaraṃ gatāḥ |
kecid ratnāni saṃgṛhya svasti pratyāgatā gṛhaṃ || 111 || {10}
[Analyze grammar]

kecid ratnamalabdhaṃ vai śūnyahastā gṛhāgatāḥ |
kecicca nidhanaṃ yātāstatraiva makarālaye || 112 || {11}
[Analyze grammar]

kecid yatnātsamuttīrya jīvanto gṛhamāgatāḥ |
kecicca jāṃgale caurairnihatā maraṇaṃ gatāḥ || 113 || {12}
[Analyze grammar]

kecicca jaṃtubhirmārge hiṃsyamāne mṛtā vane |
keṣāṃ citsiddhyate yātrā mahallābhasamanvitāḥ || 114 || {13}
[Analyze grammar]

keṣāṃ cidvighnatāṃ yānti tathāpi daivayogataḥ |
kaiścidgṛhe nidhiḥ prāptaḥ kaiściddeśāntare vane || 115 || {14}
[Analyze grammar]

kaiściddūre bhramadbhiśca naiva kiṃ citkva ciddhanaṃ |
keṣāṃ cidvarddhate saṃpad yatnāyāsaṃ vinā laghu || 116 || {15}
[Analyze grammar]

keṣāṃ ciddhīyate saṃpad rakṣitāpi prayatnataḥ |
keṣāṃ citsusthirā saṃpatkeṣāṃ cidvala asthirā || 117 || {16}
[Analyze grammar]

keṣāṃ cijjāyate naiva nānopāyārjanairapi |
evaṃ nānāprakāraiśca satvāstraidhātukodbhavāḥ || 118 || {17}
[Analyze grammar]

bhuṃjate sukhaduḥkhāni svasvadaivānusāriṇāḥ |
sukhasyānte hi duḥkhāni duḥkhasyānte sukhāni ca || 119 || {18}
[Analyze grammar]

bhuṃjante jaṃtavaḥ sarve bhramante ṣaḍgatiṣvapi |
tathā bhavanti mitrāṇi dviṣo 'pi hitakāriṇaḥ || 120 || {19}
[Analyze grammar]

mitrāṇyapi dviṣo duṣṭā bhavaṃti daivayogataḥ |
tathāmṛtaṃ viṣībhūtaṃ viṣaṃ cāpyamṛtī bhavet || 121 || {20}
[Analyze grammar]

tadapi daivayogena tasmāddaivaṃ mahadvaraṃ || 122 || {21}
[Analyze grammar]

tathā ca brahmaṇaḥ śīrṣaṃ nikṛttaṃ śūlapāṇinā |
tadapi daivayogena tasmāddaivaṃ mahāvalī || 123 || {22}
[Analyze grammar]

tathā cakrī suvīro 'pi vyādheṣu nihato mṛtaḥ |
tadapi daivayogena tasmāddaivaṃ mahadvalaṃ || 124 || {23}
[Analyze grammar]

yaśca bhūtādhipaśceśaḥ so 'pyumatto digaṃvaraḥ |
tadapi daivayogena tasmāddaivaṃ maheśvaraḥ || 125 || {24}
[Analyze grammar]

caṃdro 'pi ca kalaṃkāṅko māse māse 'pi hīyate |
tadapi daivayogena tasmāddaivaṃ mahadvalaṃ || 126 || {25}
[Analyze grammar]

evaṃ candradineśau ca graheṇāpi nipīḍitau |
tadapi daivayogena tasmāddaivaṃ mahāvalī || 127 || {26}
[Analyze grammar]

rāmo rakṣovijetāpi putreṇa nihato raṇe |
tadapi daivayogena tasmāddaivaṃ mahāvalī || 128 || {27}
[Analyze grammar]

tathārjjunaḥ sudhīro 'pi putreṇāpi hato raṇe |
tadapi daivayogena tasmāddaivaṃ mahāvalaṃ || 129 || {28}
[Analyze grammar]

tathā ca parśurāmeṇa mātāpi nihatā krudhā |
tadapi daivayogena tasmāddaivaṃ mahāvalaḥ || 130 || {29}
[Analyze grammar]

biṃbisāro nṛpendro 'pi putreṇājātaśatruṇā |
vaṃdhane māritaṃ caivaṃ tadapi daivayogataḥ || 131 || {30}
[Analyze grammar]

tasmācca brahmadattena dharmapālo sa nandanaḥ |
māritaḥ pramadātuṣṭyai tadapi daivayogataḥ || 132 || {31}
[Analyze grammar]

rājñī ca durpatī mātā svātmajasyāpi rohitaṃ |
pītvaiva nirdayā tuṣṭā tadapi daivayogataḥ || 133 || {32}
[Analyze grammar]

kṣāntivādī muniścāpi rājñā nirdayacetasā |
asinā ghātito 'raṇye tadapi daivayogataḥ || 134 || {33}
[Analyze grammar]

prasenajinnṛpeśo 'pi putreṇāpi svarājyataḥ |
nirvāsito vane bhrāntastadapi daivayogataḥ || 135 || {34}
[Analyze grammar]

evamanye 'pi rājāno hatvā jñātī svavāṃdhavān |
bhuṃjate prāpya rājyāni tadapi daivayogataḥ || 136 || {35}
[Analyze grammar]

evaṃ pitrā sutāstyaktvā mātrā ca svātmajā api |
vaṃdhumitrādibhistyaktvā keciddaivānuyogataḥ || 137 || {36}
[Analyze grammar]

bhāryāpi svāminā tyaktvā bharttāpi bhāryayā tathā |
tadapi daivayogena tasmāddaivaṃ mahattaraṃ || 138 || {37}
[Analyze grammar]

putreṇāpi pitā tyaktaṃ mātāpi jananī tathā |
dhātrī cāpi parityaktāstathā pautrapitāmahaḥ || 139 || {38}
[Analyze grammar]

tathā pitāmahastyaktaḥ putraiścāpyatinirdayaiḥ |
tadapi daivayogena tasmāddaivaṃ mahattaraṃ || 140 || {39}
[Analyze grammar]

tathā rājñā svabhṛtyāśca sevakā api sajjanāḥ |
aparādhaṃ vinā tyaktāstadapi daivayogataḥ || 141 || {40}
[Analyze grammar]

tathā sakhisahāyāṃ ca vaṃdhumitrasuhṛjjanān |
parityaktvā nihaṃtyante tadapi daivayogataḥ || 142 || {40*}
[Analyze grammar]

tathā śiṣyān gururhanti śiṣyo hanti gurumapi |
tadapi daivayogena tasmāddaivaṃ mahattaraṃ || 143 || {41}
[Analyze grammar]

tathāpi ghnanti bharttāraṃ svāminaṃ sevakānnapi |
tadapi daivayogena tasmāddaivaṃ mahattaraṃ || 144 || {42}
[Analyze grammar]

tathā ca svayamātmānaṃ ghnanti kecid ruṣānvitāḥ |
tadapi daivayogena tasmāddaivaṃ mahattamaḥ || 145 || {43}
[Analyze grammar]

kecicchastraiḥ svayaṃ hatvā kecidbhuktvā viṣādikaṃ |
kecidagnau jale svabhre prapātātpatitā mṛtāḥ || 146 || {44}
[Analyze grammar]

kecitpāśaiḥ svayaṃ badhya mṛtāḥ kecicca vaṃdhane |
kecitpānāśanādīṃśca tyaktvā yāṃti yamālayaṃ || 147 || {45}
[Analyze grammar]

evaṃ kṛtvāpi yāntyeva kecidvāpi surālayaṃ |
kecicca narake yānti tatsarvaṃ daivayogataḥ || 148 || {46}
[Analyze grammar]

tathā mṛddārupāṣāṇe nānādhātupratiṣṭhitāḥ |
devatāśca dadantyevaṃ phalaṃ daivaniyogataḥ || 149 || {47}
[Analyze grammar]

pare 'pi svajanā iṣṭāḥ sahajā api ca dviṣaḥ |
bhavanti tatkṣaṇādeva tadapi daivayogataḥ || 150 || {48}
[Analyze grammar]

evaṃ traidhātukotpannāḥ sarve satvāśca jaṃtavaḥ |
ṣaḍgatiṣu bhramantaste caranti daivayogataḥ || 151 || {49}
[Analyze grammar]

kecidvīrā guṇāḍhyāśca suṃdarā bhāgyamāninaḥ |
sarvasaṃpatsamṛddhāśca cakravarttinṛpādayaḥ || 152 || {50}
[Analyze grammar]

kecicca nirguṇāḥ prāḍhyāḥ kecinnirguṇinaḥ śaṭhāḥ |
kecicca vikalāṃgāśca guṇasaṃpattibhāginaḥ || 153 || {51}
[Analyze grammar]

kecicca suṃdarā mūrkhā nirdhanā nirguṇāḥ śaṭhāḥ |
kecicca guṇinaḥ prāḍhyā nīcakarmānucāriṇaḥ || 154 || {52}
[Analyze grammar]

kecinnīcakulotpannāḥ guṇāḍhyāḥ sādhuvṛttayaḥ |
dātāro dhanino vīrāḥ sarvasatvānupālakāḥ || 155 || {53}
[Analyze grammar]

keciduccakulotpannā nirguṇā duṣṭavṛttayaḥ |
kṛpaṇā vikalāṃgāśca nirdayāśca durāśayāḥ || 156 || {54}
[Analyze grammar]

kecidvīrā hyalābhijñāḥ kulīnāḥ sādhavo 'pi ye |
te 'pi jātinihīne 'pi bhajaṃti śaraṇaṃ gatāḥ || 157 || {55}
[Analyze grammar]

kecicca guṇavanto 'pi kucelāḥ kṛśagātrikāḥ |
pretavadbhujyamānāśca caraṃti bhikṣukā bhuvi || 158 || {56}
[Analyze grammar]

kecicca nirguṇā vāpi vaṃcakā duṣṭamānasāḥ |
mānyante sādhuval loke tadapi daivayogataḥ || 159 || {57}
[Analyze grammar]

evaṃ nānāvidhā lokāḥ ṣaḍgatiṣu samudbhavāḥ |
sukhaduḥkhāni bhuṃjante bhramaṃti daivayogataḥ || 160 || {58}
[Analyze grammar]

tasmāddaivaṃ mahāvīraṃ sarvatraidhātukeṣvapi |
kenāpi śakyate naiva vaśe netuṃ kathaṃ cana || 161 || {59}
[Analyze grammar]

tena daivaṃ mahānāthaḥ sarvakarmādhipaḥ prabhuḥ |
sraṣṭā bharttā ca harttā ca traidhātuvāsināmapi || 162 || {60}
[Analyze grammar]

tasyāpyadhipatibrahmā sarvalokeśvaro vidhiḥ |
tattasya śaraṇaṃ gatvā bhaktyā nityaṃ samarcaya || 163 || {61}
[Analyze grammar]

tasmiṃ tuṣṭe vidhau devaiḥ parituṣṭaṃ bhaveddhruvaṃ |
tato daivaprasādena sarvatra maṃgalaṃ bhavet || 164 || {62}
[Analyze grammar]

daive tuṣṭe susiddhyante sarvakarmāṇi yatnataḥ |
viruddhe tu na siddhyante yatnaiḥ saṃsādhitānyapi || 165 || {63}
[Analyze grammar]

tasmāddaivādhipaṃ devaṃ brahmāṇaṃ caturānanaṃ |
bhaja daivaprasannāya sarvakāryaprasiddhaye || 166 || {64}
[Analyze grammar]

daivaṃ brahmaprasādena śubhadaṃ saṃmukhī bhavet |
tataste maṃgalaṃ nityaṃ sarvakāryeṣu saṃbhavet || 167 || {65}
[Analyze grammar]

evaṃ sārthapate natvā vidhānaṃ kāryasādhanaṃ |
vidhinārādhya sadbhaktyā kuruṣva karmasādhanaṃ || 168 || {66}
[Analyze grammar]

tathā cetsarvathā nityaṃ yātrāyaṃ maṃgalaṃ bhavet |
anyadvā cintitaṃ kāryaṃ sarvāpyevaṃ prasatsyate || 169 || {67}
[Analyze grammar]

yadi vāṃchāsti te bhūyo gantuṃ ratnākaraṃ prati |
tathābhyarcya vidhātāraṃ gachetsvasti bhavetkhalu || 170 || {68}
[Analyze grammar]

iti tenoditaṃ śrutvā sārthavāhastatheti saḥ |
pratijñāya samabhyarcya brahmāṇaṃ prārthayattadā || 171 || {69}
[Analyze grammar]

namaste bhagavanbrahmaṃ yātrāsiddhiṃ kuruṣva me |
evaṃ vidhiṃ samārādhya sa sārthādhipatistataḥ || 172 || {70}
[Analyze grammar]

ratnaṃ prāptyai punaḥ sārthān samāhūyābravīttathā |
bhavantaḥ śrūyatāṃ vākyaṃ yanmayā samudīritaṃ || 173 || {71}
[Analyze grammar]

atrāsti yadi vo vāṃchā tathā kartuṃ samudyatāṃ |
ahaṃ ratnākaraṃ bhūyo gantuṃ ichāmi sāṃprataṃ || 174 || {72}
[Analyze grammar]

tad yadīchatha ratnāni tathā yāta mayā saha |
kiṃ cāpyatra vayaṃ sarve sārthavāhakulodbhavāḥ || 175 || {73}
[Analyze grammar]

tadgṛhe paśuvadbhuktvā kathaṃ śobhī vrajemahi |
saṃsāre sarvajaṃtūnāṃ ekadhā maraṇaṃ dhruvaṃ || 176 || {74}
[Analyze grammar]

tatkiṃ no maraṇe bhītyā mṛtyuṃ kena nivāryate |
yadi daivādvipattiḥ syādasmākaṃ karmmadoṣataḥ || 177 || {75}
[Analyze grammar]

sarvatīrthajalādhāre mṛtāḥ svargaṃ vrajemahi |
yadi bhāgyācca no yātrā siddhā svastimatī bhavet |
tadā jīvaṃ sukhaṃ dānaṃ kṛtvā svargaṃ vrajemahi |
tadviṣādaṃ parityajya yaśodharmmasukhāptaye || 178 || {76}
[Analyze grammar]

vīryotsāhaṃ samādhāya samāyāta mayā saha |
iti tasya vacaḥ śrutvā sarve te vaṇijo mudā || 179 || {77}
[Analyze grammar]

tatheti ca samutsāhaṃ kṛtvā gaṃtuṃ samudyatāḥ |
tataḥ sarve 'pi te sārthā dhṛtvā svastyayanaṃ vidhiṃ || 180 || {78}
[Analyze grammar]

paṇyamādāya tenaiva saha sārthabhṛtā yayuḥ |
tataste prasthitāḥ sarve grāmāraṇyavanasthalīḥ || 181 || {79}
[Analyze grammar]

samuttīrya kramād yātāstīraṃ prāpurmahodadheḥ |
tatra nāvi samārūḍhā karṇadhāraprayatnataḥ || 182 || {80}
[Analyze grammar]

marutāṃte 'nukūlena jagāhire mahodadhiṃ |
tatasteṣāṃ ca sarveṣāṃ daivayogānuyogataḥ || 183 || {81}
[Analyze grammar]

sā naukā kālikāvātasaṃkṣubdhābhūdvibheditā |
tadā sarve 'pi te sārthā dṛṣṭvā naukāṃ vibheditāṃ || 184 || {82}
[Analyze grammar]

trasitāḥ sahasā tasmātpratyāyayuḥ prayatnataḥ |
tataste vaṇijaḥ sarve vipaṃnāśā viṣāditāḥ || 185 || {83}
[Analyze grammar]

rātrau svasvagṛhe gatvā vibhagnāsā viṣedire |
tathāsau sārthavāho 'pi lajjitaḥ khaṇḍitāśayaḥ || 186 || {84}
[Analyze grammar]

kheditātmā gṛhe tasthau mūkavaddhi natotsavaḥ |
tato bhāryā satī bhadrā patikhedavibheditaṃ |
dṛṣṭvā taṃ vikalībhūtaṃ samupetyābravītpunaḥ || 187 || {85}
[Analyze grammar]

mā viṣādaṃ kṛthāḥ svāminnatra dhairyaṃ samāśrayaḥ |
dharmiṣṭhe śaraṇaṃ gatvā kuruṣva dharmasādhanaṃ || 188 || {86}
[Analyze grammar]

dharmmeṇa jīyate pāpaṃ niṣpāpo nirmalāśayaḥ |
śuddhacitto viśuddhātmā puṇyātmā bhāgyamāpnuyāt || 189 || {87}
[Analyze grammar]

tato bhāgyavataḥ puṃso yad yatkarmaṇi sādhitaṃ |
tattatsarvaṃ prasiddhyeta tasmāddharmaṃ carottamaṃ || 190 || {88}
[Analyze grammar]

dharmameva suhṛdmitramihāmutra sahānugaḥ |
dharmmeṇa pālyate sarvaṃ tasmāddharmo jagatsuhṛt || 191 || {89}
[Analyze grammar]

dharmā nānāvidhā loke kulacaryānusarataḥ |
sarveṣāmapi dharmāṇāṃ dayā dharme viśiṣyate || 192 || {90}
[Analyze grammar]

dayāluḥ sugato buddho dharmarājastathāgataḥ |
samantabhadra ātmajñaḥ sarvasatvahitaṃkaraḥ || 193 || {91}
[Analyze grammar]

sarvajño mārajicchāstā jagannāthaḥ śubhārthadaḥ |
ṣaḍabhijño jagadbharttā sarvalokādhipeśvaraḥ || 194 || {92}
[Analyze grammar]

tasmāttasya munīndrasya sadbhaktyā śaraṇaṃ vrajan |
saddharmaśaraṇaṃ kṛtvā bhaja nityamupāsakaḥ || 195 || {93}
[Analyze grammar]

tataste naśyate pāpaṃ maṃgalaṃ ca bhaveddhruvaṃ |
tadaiva sarvakāryāṇi sametsyaṃte na saṃśayaḥ || 196 || {94}
[Analyze grammar]

iti bhāryoditaṃ śrutvā sa sārthādhipatirmudā |
tatheti saṃpratijñāya saṃbuddhaśaraṇaṃ yayau || 197 || {95}
[Analyze grammar]

namaste bhagavannātha pāpistho 'haṃ sudurbhagaḥ |
bhavatāṃ śaraṇaṃ gache tanmāṃ dṛṣṭvāśu rakṣatāṃ || 198 || {96}
[Analyze grammar]

yanmayā prakṛtaṃ pāpaṃ kāritaṃ vānumoditaḥ |
tatsarvaṃ deśayiṣyāmi tanme dehi śubhāṃ gatiṃ || 199 || {97}
[Analyze grammar]

bhavatāṃ sarvadā nātha śaraṇaṃ yāmyupāsakaḥ |
anyo me śaraṇaṃ nāsti tanmāṃ rakṣa sadā bhaje || 200 || {98}
[Analyze grammar]

tridhāpi me jagannātha yātrā bhagnā svadaivataḥ |
gṛhasthaḥ sārthavāho 'haṃ tanme dehi susaṃpadaḥ || 201 || {99}
[Analyze grammar]

yanvahaṃ sāṃprataṃ nātha bhavataṃ śaraṇaṃ vrajan |
bhūyo ratnākaraṃ gantuṃ ichāmi ratnalabdhaye || 202 || {100}
[Analyze grammar]

yadi yātrā bhavetsiddhi yāval lābhaṃ ca lapsyate |
tadupāyena saṃbuddhaṃ pūjayeyaṃ sasāṃghikaṃ || 203 || {1}
[Analyze grammar]

ityevaṃ niścayaṃ kṛtvā saṃbuddhaṃ saṃsmaranmuhuḥ |
tāṃ bhāryāṃ bhadrikāṃ dṛṣṭvā punarevamabhāṣata || 204 || {2}
[Analyze grammar]

bhadre tvayā yadādiṣṭaṃ tathā kartuṃ samutsahe |
adyāgreṇa jagannāthaṃ śaraṇaṃ yāsyāmyupāsakaḥ || 205 || {3}
[Analyze grammar]

bhadre nāmnā jinendrasya yāsye ratnākare punaḥ |
yadi yātrā bhavetsiddhi yāval lābhaṃ ca lapsyate || 206 || {4}
[Analyze grammar]

tadupārddhena ratnena sasaṃghaṃ sugataṃ tadā |
yathārhaṃ pūjayiṣye 'hamiti saṃkalpitaṃ mayā || 207 || {5}
[Analyze grammar]

yadi daivādvipattiḥ syātsaṃbuddhanāma saṃsmaran |
sarvatīrthajalādhāne mṛto yāyāṃ sukhāvatīṃ || 208 || {6}
[Analyze grammar]

tadatra yadi me kāryaṃ śubhaṃ kartuṃ samichasi |
tadviṣādaṃ parityajya dhairyaṃ kṛtvā sukhaṃ vasa || 209 || {7}
[Analyze grammar]

iti bharttroditaṃ śrutvā sā bhāryā bhadrikā satī |
tatheti pratisaṃmodya svāminaṃ taṃ samabravīt || 210 || {8}
[Analyze grammar]

yadyevaṃ te samīhāsti kṛtvetaṃ niścayaṃ prabho |
saṃbuddhasmaraṇaṃ dhṛtvā gacha svastiṃ samācara || 211 || {9}
[Analyze grammar]

yadi buddhakṛpādṛṣṭiḥ satveṣu vidyate kila |
tathāvaśyaṃ sa saṃbuddhaḥ paśyantvāṃ cāpyacetkhalu || 212 || {10}
[Analyze grammar]

tadā te maṅgalaṃ nityaṃ yātrā svastimatī bhavet |
tataste janma saṃsāre sāphalyaṃ ca bhavetkhalu || 213 || {11}
[Analyze grammar]

tena svāmiṃ jineṃdrasya nāmasvastyayanaṃ dadhat |
gacha yātrā susiddhāstu svasti pratyāgatāśu ca || 214 || {12}
[Analyze grammar]

iti bhāryoditaṃ śrutvā sa sārthādhipatirmudā |
bhūyaḥ sārthagaṇān sarvān samāhūyābravīttathā || 215 || {13}
[Analyze grammar]

bhavanta śrūyatāṃ vākyaṃ yanmayātra samīhitaṃ |
ahaṃ ratnākaraṃ bhūyo gantumichāmi sāṃprataṃ || 216 || {14}
[Analyze grammar]

tadasti yadi vo vāṃchā yaśaḥsaṃpatsukhāptaye |
samāyāta mayā sārddhaṃ ratnākaraṃ vrajemahi || 217 || {15}
[Analyze grammar]

yadi bhāgyāddhi no yātrā siddhā svastimatirbhavet |
yāvajīvaṃ sukhaṃ dharmaṃ kṛtvā svargaṃ vrajemahi |
atha vā syādvipattirnaḥ sarvatīrthajalāśraye |
mṛtāḥ svargaṃ gamiṣyāmo hyavaśyaṃ maraṇe sati || 218 || {16}
[Analyze grammar]

paśuvatkiṃ gṛhe sthitvā sukhaṃ vā kiṃ yaśo vinā |
yaśonvitā mṛtā ye hi tatpumāṃso narottamāḥ || 219 || {17}
[Analyze grammar]

yadarthameva jīvāmastadarthaṃ yanna vidyate |
kiṃ tena jīvitenāpi kevalaṃ duḥkhabhāginaḥ || 220 || {18}
[Analyze grammar]

varamevādya me mṛtyurna vyarthaṃ cirajīvitaṃ |
yasmācciramapi sthitvā mṛtyur kena nivāryate || 221 || {19}
[Analyze grammar]

iti mṛtyubhayaṃ dṛṣṭvā sarvatrāpyanivāraṇaṃ |
tyaktvā viṣādakauśīdyaṃ prodyamahyaṃ yaśorjane || 222 || {20}
[Analyze grammar]

evaṃ nānāprakāreṇa tena sārthabhṛtāpi te |
bodhyamānā vaṇiksaṃghāḥ kiṃ cinnaiva samūcire || 223 || {21}
[Analyze grammar]

abhadro 'yaṃ pumāṃ cāpi yato yātrā na siddhyati |
iti tena mahāṃbhodhau naiko 'pi gantumaichata || 224 || {22}
[Analyze grammar]

atha sārthapatirdṛṣṭvā tān sarvān viratotsavān |
eko 'pi vā svayaṃ gantumaichad ratnākaraṃ prati || 225 || {23}
[Analyze grammar]

tato bhāryāṃ samāmaṃtrya paribodhya prasannadhīḥ |
svastyayanavidhiṃ kṛtvā pratasthe bhārakaiḥ saha || 226 || {24}
[Analyze grammar]

tataḥ paṇyaṃ samādāya bhāravāhajanaiḥ saha |
purādvahi vinirgatya kramāddeśāṃtaraṃ yayau || 227 || {25}
[Analyze grammar]

kramāccaṃcūryamāno 'sau grāmāraṇyavanasthalīḥ |
parikraman samullaṃghya prāpustīraṃ mahodadheḥ || 228 || {26}
[Analyze grammar]

tatrāsau sārthabhṛddṛṣṭvā taṃ samudraṃ mahāmbudhiṃ |
kṛtāṃjalipuṭo natvā prārthayaccharaṇaṃ gataḥ || 229 || {27}
[Analyze grammar]

namaste jīvamādhāra sarvasatvārthasaṃpade |
tvadāsayā samāyāmi tadāśāṃ me prapūraya || 230 || {28}
[Analyze grammar]

tato 'sau karṇadhāraṃ ca toṣayitvā prabodhayan |
kṛtāṃjalipuṭo natvā saṃdhṛtvā samayācata || 231 || {29}
[Analyze grammar]

karṇadhāra mahāvāho tavāhaṃ śaraṇaṃ vraje |
tatsvasti cārayannaukāṃ yātrāsiddhiṃ prasādhaya || 232 || {30}
[Analyze grammar]

tathāsau vahanaṃ kṛtvā dṛḍhītaṃ gāḍhavaṃdhitaṃ |
kṛtāṃjalipuṭo natvā saṃdhṛtvā samayācata || 233 || {31}
[Analyze grammar]

yathā mātā ca garbhasthaṃ vālakaṃ saṃprarakṣate |
tathā māmeva garbhasthe nauke mātaḥ prarakṣatāṃ || 234 || {32}
[Analyze grammar]

tataśca sugataṃ smṛtvā triratnaśaraṇaṃ gataḥ |
kṛtāṃjalipuṭo bhūtvā praṇamyaivamayācata || 235 || {33}
[Analyze grammar]

namaste bhagavannātha yathā trāsi jagattrayaṃ |
tathā māṃ kṛpayā dṛṣṭvā pāhi vraje ratnākare || 236 || {34}
[Analyze grammar]

ityevaṃ sārthavāho 'sau praṇatvā sugataṃ smaran |
bhāṇḍānyāropya naukāyaṃ samārohajjanaṃ saha || 237 || {35}
[Analyze grammar]

tato 'sau naukrameṇaiva karṇadhāraprayatnataḥ |
marutāṃ cānukūlena saṃjagāha mahāmbudhau || 238 || {36}
[Analyze grammar]

yattatra sārthavāho 'sau saṃsmaran sugataṃ muhuḥ |
tena puṇyabalenaiva sā naukā svastimācaran || 239 || {37}
[Analyze grammar]

tathā kramāccarantyevaṃ dvīpalokāntarāṇi ca |
vyatikramya suśighreṇa ratnākaraṃ samāyayau || 240 || {38}
[Analyze grammar]

tatra ratnākare prāpya ratnāni samasādhayan |
tato ratnāni saṃgṛhya pratasthe vahanāsthitaḥ || 241 || {39}
[Analyze grammar]

tataḥ kramādvyatikramya dvīpalokāntarāṇi ca |
tīraṃ prāpuḥ suśīghreṇa buddhadṛṣṭiprasādataḥ || 242 || {40}
[Analyze grammar]

tataḥ sthalaṃ samāsādya śailāraṇyavanasthalīḥ |
grāmāṃ deśāṃ parikramya śrāvastyāṃ puramāyayau || 243 || {41}
[Analyze grammar]

tato gṛhe praviṣṭo 'sau bharyayā saha moditaḥ |
suhṛnmitrajanaiścāpi kṛtvālāpaṃ nyaṣīdata || 244 || {42}
[Analyze grammar]

tataḥ sadyargṛhastho 'sau bhāryayā saha naṃditaḥ |
bhāṇḍamudghāṭya ratnāni pratyavekṣitumārabhat || 245 || {43}
[Analyze grammar]

tatra divyavicitrāṇi ratnāni vividhāni ca |
dṛṣṭvā harṣaṃ samāsādya punarevaṃ vabhāṣate || 246 || {44}
[Analyze grammar]

mamaitāni suratnāni divyānyetādṛśāni hi |
tatra divyavicitrāṇi nānāratnakulāni ca || 247 || {45}
[Analyze grammar]

labdhāni tajjinendrasya kṛpādṛṣṭiprasādataḥ |
tasmād yathāpratijñātaṃ śraddhayā sāṃprataṃ mayā || 248 || {46}
[Analyze grammar]

yadupārddhaṃ pradātavyaiḥ śravaṇāyārhate 'pi naḥ |
tadupārddhaṃ kathaṃ cānudātavyaṃ munaye 'rhate || 249 || {47}
[Analyze grammar]

yadi rājā vijānīyādetadarddhaṃ hare mama |
ratnalubdho nareśo yaṃ daṇḍaṃ vā praṇayaṃ mayi || 250 || {48}
[Analyze grammar]

tadā me syādvipattiśca tatkathaṃ kriyate mayā |
aho daivādvipattirmāmadyāpi ca na muṃcati |
tatkathaṃ vā pratijñātaṃ pūrayituṃ na manyate |
namaste bhagavannātha sarvajño 'si munīśvaraḥ || 251 || {49}
[Analyze grammar]

rakṣa māṃ pāpinaṃ mūḍhanimagnaṃ duḥkhasāgare |
ityasau sugataṃ smṛtvā taccintāvyathitāśayaḥ || 252 || {50}
[Analyze grammar]

kapolaṃ svakare dhṛtvā tasthau koṣṭhe nirutsavaḥ |
tathaivaṃ sthitamālokya svāmi naṃ taṃ viṣāditaṃ || 253 || {51}
[Analyze grammar]

sā bhāryā bhadrikopetya puraḥ sthitvābravīttathā |
svāmiṃ bharttaḥ kimeva tvaṃ sthito 'si duḥkhito yathā || 254 || {52}
[Analyze grammar]

kiṃ vā te jāyate duḥkhaṃ tadvaca cetpriyāsmi te || 255 || {53}
[Analyze grammar]

iti bhāryoditaṃ śrutvā sa sārthādhipatiḥ punaḥ |
tāṃ bhāryāṃ samupāmaṃtrya punaścaivamabhāṣata || 256 || {54}
[Analyze grammar]

bhadre yajjāyate duḥkhaṃ tatpravakṣye śṛṇu priye |
yathā mayā pratijñātaṃ pūrayituṃ kathaṃ tathā || 257 || {55}
[Analyze grammar]

yadyupārddhaṃ pradāsyāmi śravaṇāyārhate 'pi nu |
etadarddhaṃ hared rājā lobhānme daṇḍayedapi || 258 || {56}
[Analyze grammar]

ityevaṃ tadviṣādena vyathito 'haṃ nirutsavaḥ |
tanme nātra pratīkāro kathaṃ kartuṃ na manyate || 259 || {57}
[Analyze grammar]

iti bharttroditaṃ śrutvā sā bhāryā punarabravīt |
viṣādaṃ mā kṛthāḥ svāmiṃ śṛṇu yanme samīhitaiḥ || 260 || {58}
[Analyze grammar]

tāvadimāni saṃkalpaḥ paścāttatsamayāgate |
pūjayā saha bhojaiśca sasaṃghāyārhate 'rcayet || 261 || {59}
[Analyze grammar]

evaṃ kṛte tathā svāminpratijñā tena setsyate |
bhītiścāpi na vidyeta tasmādevaṃ kuru prabho || 262 || {60}
[Analyze grammar]

iti bhāryāvacaḥ śrutvā sa sārthādhipatirmudā |
tatheti pratisaṃśrutya punarevamabhāṣata || 263 || {61}
[Analyze grammar]

tāvadimāni sarvāṇi ratnāni te samarppaye |
paścātkāle sasaṃghaṃ taṃ pūjayiṣye munīśvaraṃ || 264 || {62}
[Analyze grammar]

idānīṃ sugaṃdhadhūpena pūjayeyaṃ munīśvaraṃ |
ityuktvā sarvaratnāni bhāryāyāṃ sa nyadhāpayet || 265 || {63}
[Analyze grammar]

tato 'sau cāguruṃ krītvā kārṣāpaṇadvayena vā |
gatvā jetavane vihāre tatra dvāre sthito gurumadhūpayet || 266 || {64}
[Analyze grammar]

tatrāpatramāno 'sau saṃbuddhaśaraṇaṃ gataḥ |
kṛtāṃjalipuṭo natvā saṃsmaranprārthayattathā || 267 || {65}
[Analyze grammar]

bhagavacchāstāsi sarvajño vijānīyā mamāśayaṃ |
tadyathā me pratijñātaiḥ pūrayituṃ samarhasi || 268 || {66}
[Analyze grammar]

athāsau bhagavāntasya matvāśayaviśuddhatāṃ |
mahadṛdhyabhisaṃskāraṃ cakāra tatprasādataḥ || 269 || {67}
[Analyze grammar]

yena sa dhūpa ākāśe prābhyudgamya purīṃ ca tāṃ |
sphuritvā khe punarabhrakūṭībhūtvābhyaśobhayat || 270 || {68}
[Analyze grammar]

tatrāsau sārthabhṛddṛṣṭvā prātihāryaṃ tadadbhutaṃ |
mahānaṃdaprasaṃnātmā punarevaṃ vyaciṃtayat || 271 || {69}
[Analyze grammar]

naitanme pratirūpaṃ syād yadayaṃ sugato jinaḥ |
mayā nābhyarcito ratnairdhigme cittabhayāddrutaṃ || 272 || {70}
[Analyze grammar]

yanvahaṃ sāṃprataṃ nāthaṃ prārthayitvā sasāṃghikaṃ |
saratnaiḥ pūjayiṣyāmi bhojanaiśca svake gṛhe || 273 || {71}
[Analyze grammar]

ityasau niścayaṃ kṛtvā kṛtāṃjalipuṭo mudā |
saṃbuddhasaṃmukhaṃ gatvā praṇatvaivaṃ vyajijñapat || 274 || {72}
[Analyze grammar]

bhagavannātha sarvajña kṣamasva me 'parādhatāṃ |
bhavatāṃ pūjanāṃ kartumichāmi me prasīdatu || 275 || {73}
[Analyze grammar]

ityevaṃ prārthite tena sa saṃbuddho munīśvaraḥ |
tatheti pratisaṃmodya tūṣṇībhūtvā vyavasthitaḥ || 276 || {74}
[Analyze grammar]

tato 'sau sārthabhṛnmatvā sugatenādhivāsitaṃ |
praṇatvā ca muneḥ pādau sahasā svagṛhaṃ yayau || 277 || {75}
[Analyze grammar]

tatra sa bhāryayā sārddhaṃ vaṃdhumitra janairapi |
praṇītaṃ bhojyapūjāṃgaṃ sādhayāmāsa satvaraṃ || 278 || {76}
[Analyze grammar]

tato bhojyārcanāṃgāni sajjīkṛtya pramoditaḥ |
vihāre sahasā gatvā natvā taṃ prārthayanmuniṃ || 279 || {77}
[Analyze grammar]

bhagavannātha saṃbuddha samayo 'yaṃ pravarttate |
tadbhavān sāṃghikaiḥ sārddhaṃ samāgantuṃ samarhati || 280 || {78}
[Analyze grammar]

ityevaṃ prārthite tena sa saṃbuddhaḥ sasāṃghikaḥ |
pratasthe sūryavanmārge prātihāryaṃ pradarśayan || 281 || {79}
[Analyze grammar]

tataḥ kramātpurīṃ prāpya tadgṛhaṃ samupāviśat |
taddatte pādyaṃ ādāya śuddhāsane nyaṣīdata || 282 || {80}
[Analyze grammar]

tatastān sāṃghikān sarvān saṃbuddhapramukhān kramāt |
svasvāsanasamāsīnāndṛṣṭvā samyaksamarcayat || 283 || {81}
[Analyze grammar]

yathārhaṃ bhojanairvāpi varṇagandharasānvitaiḥ |
saṃbuddhapramukhān saṃghān saṃtarpya paryatoṣayat || 284 || {82}
[Analyze grammar]

tataśca bhojanānte sa śodhayitvā bhujādikaṃ |
apanīya ca pātrāṇi tāmbūlādīnaḍhaukayat || 285 || {83}
[Analyze grammar]

tato yāni suratnāni pūrvasaṃkalpatāni hi |
etaiḥ sarvaṃ suratnaistaṃ saṃbuddhaiḥ samavākiran || 286 || {84}
[Analyze grammar]

tāni ratnāni sarvāṇi saṃbuddhasyānubhāvataḥ |
munerupari khe gatvā chatrībhūtvā sthitā vabhau || 287 || {85}
[Analyze grammar]

tatastaṃ sa gṛhī dṛṣṭvā dviguṇasaṃpramoditaḥ |
pādau tasya munernatvā praṇidhānaṃ vyadhāttathā || 288 || {86}
[Analyze grammar]

anena dānadharmeṇa puṇyena kuśalena ca |
bhaveyaṃ sugato buddho loke 'ndhe 'pariṇāyake || 289 || {87}
[Analyze grammar]

amukto mocayiṣyāmi tārayiṣyāmyatāritān |
bhītānāśvāsya saṃbodhau sthāpayiṣyāmi nirvṛtau || 290 || {88}
[Analyze grammar]

tathāsau bhagavānbuddhastathāśayaviśodhitaṃ |
saṃbodhau nihitaṃ cittaṃ jñātvā smitaṃ vyadhāttathā || 291 || {89}
[Analyze grammar]

tadā tasya munīndrasya mukhapadmādvinirgatāḥ |
paṃcavarṇā vibhāsanto viniśceruḥ subhānavaḥ || 292 || {90}
[Analyze grammar]

tataste bhāsvarāḥ sarve pravisṛtāḥ samaṃtataḥ |
kecidūrddhaṃ gatāḥ kecinmadhyaṃ kecid rasātale || 293 || {91}
[Analyze grammar]

kecidadho gatā yāste sarve te narakeṣu ca |
nipataṃto vibhāsanto pravisasruḥ samaṃtataḥ || 294 || {92}
[Analyze grammar]

ye uṣṇanarakāsteṣu śitībhūtā vicerire |
ye śītanarakāsteṣu nyapataduṣṇikāśca te || 295 || {93}
[Analyze grammar]

ye ye taiḥ kiraṇaiḥ spṛṣṭāste te sarve sukhānvitāḥ |
yadā te sukhasaṃprāptāstadā te vismayānvitāḥ || 296 || {94}
[Analyze grammar]

aho naḥ sukhamadyaivaṃ kathametadvyacintayan |
kiṃ nu vayamitaścyutvā kutra yātāsma sāṃprataṃ || 297 || {95}
[Analyze grammar]

āhosvidupapannāḥ syuranyatra bhuvaneṣvapi |
iti saṃdehināṃ teṣāṃ satvānāṃ paribodhane || 298 || {96}
[Analyze grammar]

bhagavānnirmite buddhaṃ preṣayannarakānprati |
dṛṣṭvā taṃ nirmitaṃ muniṃ vismitā harṣitāśca vai || 299 || {97}
[Analyze grammar]

te sarve narakā lokāḥ saṃmīlya saṃvabhāṣire |
na bhavanta itaścyutvā gatāsmānyatra bhūmiṣu || 300 || {98}
[Analyze grammar]

kiṃstvayaṃ nu mahāsatvaḥ hyapūrvadarśanaḥ pumān |
nūnamasyānubhāvena duḥkhāni samitāni ca || 301 || {99}
[Analyze grammar]

tadvayamenamānamya vaṃde mayā pramuktaye |
iti saṃbhāṣya te sarve natvā taccharaṇaṃ gatāḥ || 302 || {100}
[Analyze grammar]

namo buddhāya dharmāya saṃghāyeti vavandire |
iti te nirmite tasminprasādya cittamāratāḥ || 303 || {1}
[Analyze grammar]

sarvapāpavinirmuktā martyadevālayaṃ yayuḥ |
evaṃ te bhānavaḥ sarve sarvatra narakeṣvapi || 304 || {2}
[Analyze grammar]

prodyante nārakān sarvānpratyāyayurmuneḥ puraḥ |
tathā tadbhānavaścaivamupariṣṭāṃ gatā api || 305 || {3}
[Analyze grammar]

te 'pi sarve caturlokapālānāṃ bhuvanāni ca |
avabhāsya kramātsarvāndevalokānabhāsayan || 306 || {4}
[Analyze grammar]

tathākaniṣṭhaparyantaṃ traidhātukānabhāsayan |
evaṃ sarvāśca tān sarvānavabhāsya samaṃtataḥ || 307 || {5}
[Analyze grammar]

gāthāḥ prodghoṣayantaśca pralayaṃ saugate vṛṣe |
anityaṃ khalu saṃsāraṃ duḥkhaśūnyaṃ hyanātmakaṃ || 308 || {6}
[Analyze grammar]

tasmātmāraṃ parityajya gachadhvaṃ śaraṇaṃ muneḥ |
niṣkrāmatārabhadhvaṃ kaṃ yujyadhvaṃ buddhaśāsane || 309 || {7}
[Analyze grammar]

mṛtyusainyaṃ dhunītāśu naḍāgāraṃ karī yathā |
yo 'pyasmindharmavinaye hyapramattaścariṣyati || 310 || {8}
[Analyze grammar]

tyaktvā jātisasaṃsāre duḥkhasyāntaṃ kariṣyati || 311 || {9!}
[Analyze grammar]

atha te bhānavaḥ sarve traidhātubhuvaneṣvapi |
sarvān satvān samuddhṛtya punaḥ pratyāyayurmuneḥ || 312 || {10}
[Analyze grammar]

atha te bhānavaḥ sarve bhagavantaṃ munīśvaraṃ |
pradakṣiṇatrayaṃ kṛtvā mūrddhni cāntardadhurmuneḥ || 313 || {11}
[Analyze grammar]

athaitatsabhāsīnā lokāḥ sarve sasāṃghikāḥ |
tattadadbhutamālokya vabhūvurvismayoddhatāḥ || 314 || {12}
[Analyze grammar]

athānaṃdaḥ samutthāya kṛtāṃjalipuṭo mudā |
bhagavantaṃ guruṃ natvā papracha smitakāraṇaṃ || 315 || {12!}
[Analyze grammar]

bhagavanbhavato vaktrātpaṃcavarṇāḥ subhāṃsavaḥ |
vinirgatā diśaḥ sarvānavabhāsya śatā punaḥ || 316 || {13}
[Analyze grammar]

bhavān hi sugato śāstā saṃbuddho bhagavañjinaḥ |
nirmado nirahaṃkāraḥ mānamātsaryavarjitaḥ || 317 || {14}
[Analyze grammar]

tadbhava bhagavaṃ kasmātsmitaiḥ karoti sāṃprataṃ |
dṛṣṭvaivaṃ taṃ smitaṃ sarve ime lokāḥ pravismitāḥ || 318 || {15}
[Analyze grammar]

nāhetuḥ sugatā buddhā arhanto vigatoddhavāḥ |
darśayanti smitaṃ kecittatkena bhavataḥ smṛtaṃ || 319 || {16}
[Analyze grammar]

tadetaddhetumichanti śrotuṃ sarve ime janāḥ |
tadetatkāraṇaṃ śāstaḥ samādeṣṭuṃ samarhati || 320 || {17}
[Analyze grammar]

ityevaṃ prārthite tena śiṣyeṇānaṃdayoginā |
tatheti pratisaṃmodya tamānaṃdaṃ vabhāṣata || 321 || {18}
[Analyze grammar]

evametattathānaṃda yathaiva bhāṣasi tvayā |
tatsmitaṃ yadarthaṃ me tadvakṣye śṛṇutādarāt || 322 || {19}
[Analyze grammar]

paśyānaṃda mamānena sārthavāhena sādhunā |
ebhī ratnaiśca satkṛtya kṛtā pūjā svabhaktitaḥ || 323 || {20}
[Analyze grammar]

anena kuśalenaiva sārthavāho mahāsudhīḥ |
kramādbodhicarīṃ prāpya pūrya pāramitā daśa || 324 || {21}
[Analyze grammar]

saṃbodhipākṣikāndharmānprāpya brahmavihārikaḥ |
saṃbodhiṃ samavāpyaivaṃ jitvā māragaṇānapi || 325 || {22}
[Analyze grammar]

buddho ratnottamo nāma sarvajño 'rhaṃ tathāgataḥ |
dharmarājo jagaṃnātho loke śāstā bhaviṣyati || 326 || {23}
[Analyze grammar]

tadanumodanāṃ kṛtvā saddharmaṃ bhajatādarāt |
dharmeṇaiva jagajjitvā māracaryāvinirgataḥ || 327 || {24}
[Analyze grammar]

bhadracarī samāsādya saṃbodhipadamāpnuyāt |
dharnio hi jagatāṃ mitramihāmutra samantataḥ || 328 || {25}
[Analyze grammar]

hitakārī suhṛdiṣṭaḥ sarvadāpi sahānugaḥ |
tasmāddharmaṃ samādhāya saṃcaradhvaṃ samāhitaḥ || 329 || {26}
[Analyze grammar]

tena vā maṃgalaṃ nityaṃ sarvabhāvī bhaveddhruvaṃ || 330 || {27}
[Analyze grammar]

iti śāstrā samādiṣṭaṃ śrutvānaṃdaḥ sapārṣadaḥ |
tatheti moditastaṃ ca guruṃ natvā sa naṃdataḥ || 331 || {28}
[Analyze grammar]

so 'pi sārthapatiścaiva svakaṃ vyākaraṇaṃ kila |
munīndreṇa samādiṣṭaṃ śrutvātīvābhyanaṃdatat || 332 || {29}
[Analyze grammar]

tataścābhiprasannātmā samutthāya kṛtāṃjaliḥ |
bhagavaṃtaṃ sasaṃghaṃ taṃ praṇatvaivaṃ vyatijñapat || 333 || {30}
[Analyze grammar]

namaste bhagavannātha sarvadharmādhipeśvaraḥ |
bhavatāṃ śaraṇaṃ kṛtvā bhavāmyahamupāsakaḥ || 334 || {31}
[Analyze grammar]

yanmayā prakṛtaṃ pāpaṃ kāritaṃ cānumoditaṃ |
tatsarvaṃ deśayiṣyāmi tanme dehi śubhāṃ cariṃ || 335 || {32}
[Analyze grammar]

bodhau cittaṃ samādhāya triratnaṃ samupāśraye |
kṣamasva me 'parādhatvaṃ tanmāṃ rakṣa mudā tathā || 336 || {33}
[Analyze grammar]

evaṃ tenārthitaṃ śrutvā sa saṃbuddho 'bhyadhātpunaḥ |
yathā te 'bhihitaṃ sādho tathā saṃsetsyate dhruvaṃ || 337 || {34}
[Analyze grammar]

tasmāccittaṃ samādhāya triratnaśaraṇaṃ gataḥ |
sarvasatvahitaṃ kṛtvā bodhicaryāṃ samācara || 338 || {35}
[Analyze grammar]

tatastvaṃ kramato hyevaṃ pūrya pāramitā drutaṃ |
bodhisatvo mahāsatvo bhavedbodhimavāpnuyāt || 339 || {36}
[Analyze grammar]

etatsatyaṃ parijñāya saddharmaṃ saṃprasādhaya |
tena te maṃgalaṃ nityaṃ sarvatrāpi bhaveddhruvaṃ || 340 || {37}
[Analyze grammar]

jayo 'stu te sadā bodhau siddhyatu praṇihitaṃ drutaṃ |
ciraṃ jīvaṃ hitaṃ loke dharmaṃ dhṛtvā sukhaṃ vasa || 341 || {38}
[Analyze grammar]

ityasau bhagavānbuddhastasmai datvāśiṣaṃ śubhāṃ |
saṃghaiḥ saha samutthāya svaṃ vihāraṃ yayau tataḥ || 342 || {39}
[Analyze grammar]

atha sārthapatiścāsau sadāraḥ saṃpramoditaḥ |
triratnaśaraṇaṃ kṛtvā saddharmeṣu sadācarat || 343 || {40}
[Analyze grammar]

tathā sarve 'pi satvāśca śrutvā tasya pravṛttitāṃ |
bodhicittaṃ samādhāya triratnaśaraṇaṃ yayuḥ || 344 || {41}
[Analyze grammar]

etatme guruṇākhyātaṃ saṃśrutaṃ yathā mayā |
tathātraivaṃ tava prītyā kathyate saṃprabudhyatāṃ || 345 || {42}
[Analyze grammar]

tathā rājantvayāpyevaṃ svayaṃ dhṛtvā vṛṣaṃ śubhe |
bodhayitvā prajāścāpi sthāpanīyāḥ sadā śubhe || 346 || {43}
[Analyze grammar]