Chapter 28

[English text for this chapter is available]

sanatkumāra uvāca |
tataśca śaṃkhacūḍo'sau jaigīṣavyopadeśataḥ |
tataścakāra suprītyā brahmaṇaḥ puṣkare ciram || 1 ||
[Analyze grammar]

gurudattāṃ brahmavidyāṃ jajāpa niyatendriyaḥ |
sa ekāgramanā bhūtvā karaṇāni nigṛhya ca || 2 ||
[Analyze grammar]

tapaṃtaṃ puṣkare taṃ vai śaṃkhacūḍaṃ ca dānavam |
varaṃ dātuṃ jagāmāśu brahmālokagururvibhuḥ || 3 ||
[Analyze grammar]

varaṃ brūhīti provāca dānavendraṃ vidhistadā |
sa dṛṣṭvā taṃ nanāmāti namrastuṣṭāva sadgirā || 4 ||
[Analyze grammar]

varaṃ yayāce brahmāṇamajeyatvaṃ divaukasām |
tathetyāha vidhistaṃ vai suprasannena cetasā || 5 ||
[Analyze grammar]

śrīkṛṣṇakavacaṃ divyaṃ jaganmaṃgalamaṃgalam |
dattavāñśaṃkhacūḍāya sarvatra vijayapradam || 6 ||
[Analyze grammar]

badarīṃ saṃprayāhi tvaṃ tulasyā saha tatra vai |
vivāhaṃ kuru tatraiva sā tapasyati kāmataḥ || 7 ||
[Analyze grammar]

dharmadhvajasutā seti saṃdideśa ca taṃ vidhiḥ |
antardhānaṃ jagāmāśu paśyatastasya tatkṣaṇāt || 8 ||
[Analyze grammar]

tatassa śaṃkhacūḍo hi tapaḥsiddho'tipuṣkare |
gale babaṃdha kavacaṃ jaganmaṃgalamaṃgalam || 9 ||
[Analyze grammar]

ājñayā brāhmaṇasso'pi tapaḥsiddhamanorathaḥ |
samāyayau prahṛṣṭāsyastūrṇaṃ badarikāśramam || 10 ||
[Analyze grammar]

yadṛcchayā''gatastatra śaṃkhacūḍaśca dānavaḥ |
tapaścarantī tulasī yatra dharmadhvajātmajā || 11 ||
[Analyze grammar]

surūpā susmitā tanvī śubhabhūṣaṇabhūṣitā |
sakaṭākṣaṃ dadarśāsau tameva puruṣaṃ param || 12 ||
[Analyze grammar]

dṛṣṭvā tāṃ lalitā ramyāṃ suśīlāṃ sundarīṃ satīm |
uvāsa tatsamīpe tu madhuraṃ tāmuvāca saḥ || 13 ||
[Analyze grammar]

śaṃkhacūḍa uvāca |
kā tvaṃ kasya sutā tvaṃ hi kiṃ karoṣi sthitātra kim |
maunībhūtā kiṃkaraṃ māṃ saṃbhāvitumihārhasi || 14 ||
[Analyze grammar]

sanatkumāra uvāca |
ityevaṃ vacanaṃ śrutvā sakāmaṃ tamuvāca sā || 15 ||
[Analyze grammar]

tulasyuvāca |
dharmadhvajasutāhaṃ ca tapasyāmi tapasvinī |
tapovane ca tiṣṭhāmi kastvaṃ gaccha yathāsukham || 16 ||
[Analyze grammar]

nārījātirmohinī ca brahmādīnāṃ viṣopamā |
nindyā doṣakarī māyā śṛṃkhalā hyanuśāyinām || 17 ||
[Analyze grammar]

sanatkumāra uvāca |
ityuktvā tulasī taṃ ca sarasaṃ virarāma ha |
dṛṣṭvā tāṃ sasmitāṃ sopi pravaktumupacakrame || 18 ||
[Analyze grammar]

śaṃkhacūḍa uvāca |
tvayā yatkathitaṃ devi na ca sarvamalīkakam |
kiñcitsatyamalīkaṃ ca kiṃcinmatto niśāmaya || 19 ||
[Analyze grammar]

pativratāḥ striyo yāśca tāsāṃ madhye tvamagraṇīḥ |
na cāhaṃ pāpadṛkkāmī tathā tvaṃ neti dhīrmama || 20 ||
[Analyze grammar]

āgacchāmi tvatsamīpamājñayā brahmaṇo'dhunā |
gāṃdharveṇa vivāhena tvāṃ grahīṣyāmi śobhane || 21 ||
[Analyze grammar]

śaṃkhacūḍo'hamevāsmi devavidrāvakārakaḥ |
māṃ na jānāsi kiṃ bhadre na śruto'haṃ kadācana || 22 ||
[Analyze grammar]

danuvaṃśyo viśeṣeṇa manda putraśca dānavaḥ |
sudāmā nāma gopohaṃ pārṣadaśca hareḥ purā || 23 ||
[Analyze grammar]

adhunā dānavendro'haṃ rādhikāyāśca śāpataḥ |
jātismaro'haṃ jānāmi sarvaṃ kṛṣṇaprabhāvataḥ || 24 ||
[Analyze grammar]

|| sanatkumāra uvāca |
evamuktvā śaṃkhacūḍo virarāma ca tatpuraḥ |
dānaveṃdreṇa setyuktā vacanaṃ satyamādarāt |
sasmitaṃ tulasī tuṣṭā pravaktumupacakrame || 25 ||
[Analyze grammar]

tulasyuvāca |
tvayāhamadhunā || sattvavicāreṇa parājitā |
sa dhanyaḥ puruṣo loke na striyā yaḥ parājitaḥ || 26 ||
[Analyze grammar]

satkriyopyaśucirnityaṃ sa pumānyaḥ striyā jitaḥ |
nindaṃti pitaro devā mānavāssakalāśca tam || 27 ||
[Analyze grammar]

śudhyedvipro daśāhena jātake mṛtasūtake |
kṣatriyo dvādaśāhena vaiśyaḥ pañcadaśāhataḥ || 28 ||
[Analyze grammar]

śūdro māsena śudhyettu hīti vedānuśāsanam |
na śuciḥ strījitaḥ kvāpi citādāhaṃ vinā pumān || 29 ||
[Analyze grammar]

na gṛhṇatīcchayā tasmātpitaraḥ piṇḍatarpaṇam |
na gṛhṇanti surāstena dattaṃ puṣpaphalādikam || 30 ||
[Analyze grammar]

tasya kiṃ jñānasutapo japahoma prapūjanaiḥ |
vidyayā dānataḥ kiṃ vā strībhiryasya mano hṛtam || 31 ||
[Analyze grammar]

vidyāprabhāvajñānārthaṃ mayā tvaṃ ca parīkṣitaḥ |
kṛtvā kāṃtaparīkṣāṃ vai vṛṇuyātkāminī varam || 32 ||
[Analyze grammar]

sanatkumāra uvāca |
ityevaṃ pravadaṃtyāṃ tu tulasyāṃ tatkṣaṇe vidhiḥ |
tatrājagāma saṃsṛṣṭā provāca vacanaṃ tataḥ || 33 ||
[Analyze grammar]

brahmovāca |
kiṃ karoṣi śaṃkhacūḍa saṃvādamanayā saha |
gāṃdharveṇa vivāhena tvamasyā grahaṇaṃ kuru || 34 ||
[Analyze grammar]

tvaṃ vai puruṣaratnaṃ ca strīratnaṃ ca tviyaṃ satī |
vidagdhāyā vidagdhena saṃgamo guṇavān bhavet || 35 ||
[Analyze grammar]

nirvirodhaṃ sukhaṃ rājan ko vā tyajati durlabham |
yo'virodhasukhatyāgī sa paśurnātra saṃśayaḥ || 36 ||
[Analyze grammar]

kiṃ tvaṃ parīkṣase kāṃtamīdṛśaṃ guṇinaṃ sati |
devānāmasurāṇāṃ ca dānavānāṃ vimardakam || 37 ||
[Analyze grammar]

anena sārddhaṃ suciraṃ vihāraṃ kuru sarvadā |
sthānesthāne yathecchaṃ ca sarvalokeṣu sundari || 38 ||
[Analyze grammar]

aṃte prāpsyati goloke śrīkṛṣṇaṃ punareva saḥ |
caturbhujaṃ ca vaikuṇṭhe mṛte tasmiṃstvamāpsyasi || 39 ||
[Analyze grammar]

sanatkumāra uvāca |
ityevamāśiṣaṃ dattvā svālayaṃ tu yayau vidhiḥ |
gāṃdharveṇa vivāhena jagṛhe tāṃ ca dānavaḥ || 40 ||
[Analyze grammar]

evaṃ vivāhya tulasīṃ pituḥ sthānaṃ jagāma ha |
sa reme ramayā sārddhaṃ vāsagehe manorame || 41 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṃkhacūḍatapaḥkaraṇavivāhavarṇanaṃ nāmāṣṭaviṃśo'dhyāyaḥ || 28 ||
[Analyze grammar]