Chapter 81

vaiśaṃpāyana uvāca |
mathuropavane gatvā niviṣṭāṃstānnarādhipān |
apaśyanvṛṣṇayaḥ sarve puraskṛtya janārdanam || 1 ||
[Analyze grammar]

tānāgatānnṛpān rājanmāgadhān rājasattamān || 1 ||
[Analyze grammar]

tato hṛṣṭamanāḥ kṛṣṇo rāmaṃ vacanamabravīt |
tvarate khalu kāryārtho devatānāṃ na saṃśayaḥ || 2 ||
[Analyze grammar]

yathāyaṃ saṃnikṛṣṭo hi jarāsaṃdho narādhipaḥ |
lakṣyante hi dhvajāgrāṇi rathānāṃ vātaraṃhasām || 3 ||
[Analyze grammar]

etāni śaśikalpāni narāṇāṃ vijigīṣatām |
chatrāṇyārya virājante procchritāni sitāni ca || 4 ||
[Analyze grammar]

aho nṛparathodagrā vimalāśchatrapaṅktayaḥ |
abhivartanti naḥ śubhrā yathā khe haṃsapaṅktayaḥ || 5 ||
[Analyze grammar]

kāle khalu nṛpaḥ prāpto jarāsaṃdho mahīpatiḥ |
āvayoryuddhanikaṣaḥ prathamaḥ samarātithiḥ || 6 ||
[Analyze grammar]

ārya tiṣṭhāva sahitāvanuprāpte mahīpatau |
yuddhārambhaḥ prayoktavyo balaṃ tāvadvimṛśyatām || 7 ||
[Analyze grammar]

evamuktvā tataḥ kṛṣṇaḥ svasthaḥ saṃgrāmalālasaḥ |
jarāsaṃdhamabhiprepsuścakāra baladarśanam || 8 ||
[Analyze grammar]

vīkṣamāṇaśca tān sarvānnṛpānyaduvaro'vyayaḥ |
ātmānamātmanā vākyamuvāca hṛdi mantravit || 9 ||
[Analyze grammar]

ime te pṛthivīpālāḥ pārthive vartmani sthitāḥ |
ye vināśamiheṣyanti śāstradṛṣṭena karmaṇā || 10 ||
[Analyze grammar]

prokṣitāḥ khalvime manye mṛtyunā nṛpapuṃgavāḥ |
svargagāni tathā hyeṣāṃ vapūṃṣi pracakāśire || 11 ||
[Analyze grammar]

sthāne bhārapariśrāntā vasudheyaṃ divaṃ gatā |
eṣāṃ nṛpatimukhyānāṃ balaughairabhipīḍitā |
bhūmirnirantarā ceyaṃ balarāṣṭrābhisaṃvṛtā || 12 ||
[Analyze grammar]

svalpena khalu kālena viviktaṃ pṛthivītalam |
bhaviṣyati narendraughaiḥ śataśo vinipātitaiḥ || 13 ||
[Analyze grammar]

evaṃ cintayatastasya kṛṣṇasyādbhutakarmaṇaḥ || 13 ||
[Analyze grammar]

evaṃ saṃcintya bhagavānyuddhāya kṛtaniścayaḥ || 13 ||
[Analyze grammar]

saṃkarṣaṇena sahitastasthau giririvācalaḥ || 13 ||
[Analyze grammar]

jarāsaṃdhastataḥ kruddhaḥ prabhuḥ sarvamahīkṣitām |
narādhipasahasraughairanuyāto mahādyutiḥ || 14 ||
[Analyze grammar]

vyāyatodagraturagaiḥ sayantraiḥ susamāhitaiḥ |
rathaiḥ sāṃgrāmikairyuktairasaṅgagatibhiḥ kva cit || 15 ||
[Analyze grammar]

hemakakṣyairmahāghaṇṭairvāraṇairvāridopamaiḥ |
mahāmātrottamārūḍhaiḥ kalpitai raṇakovidaiḥ || 16 ||
[Analyze grammar]

svārūḍhaiḥ sādibhiryuktaiḥ prekṣamāṇaiḥ pravalgitaiḥ |
vājibhirmeghasaṃkāśaiḥ plavadbhiriva pattibhiḥ || 17 ||
[Analyze grammar]

khaḍgacarmadharodagraiḥ pattibhirvalgitāmbaraiḥ |
sahasrasaṃkhyāsaṃyuktairutpatadbhirivoragaiḥ || 18 ||
[Analyze grammar]

evaṃ caturvidhaiḥ sainyaiḥ kampamānairivāmbudaiḥ |
nṛpo'bhiyāto balavāñjarāsaṃdho dhṛtavrataḥ || 19 ||
[Analyze grammar]

sa rathairmeghanirghoṣairgajaiśca madaśiñcitaiḥ |
heṣamāṇaiśca turagaiḥ kṣveḍamāṇaiśca pattibhiḥ || 20 ||
[Analyze grammar]

nādayāno diśaḥ sarvāstasyāḥ puryā vanāni ca |
akṣauhiṇyā ca viṃśatyā anuyāto narādhipaḥ |
sa rājā sāgarākāraḥ sasainyaḥ pratyadṛśyata || 21 ||
[Analyze grammar]

tadbalaṃ pṛthivīśānāṃ dṛptayodhajanākulam |
kṣveḍitāsphoṭitaravaṃ meghasainyamivābabhau || 22 ||
[Analyze grammar]

rathaiḥ pavanasaṃpātairgajaiśca jaladopamaiḥ |
turagaiśca javopetaiḥ pattibhiḥ khagamairiva || 23 ||
[Analyze grammar]

vimiśraṃ sarvato bhāti mattadviparathākulam |
gharmānte sāgaragataṃ yathaivābhrabalaṃ tathā || 24 ||
[Analyze grammar]

sabalāste mahīpālā jarāsaṃdhapurogamāḥ |
parivārya purīṃ sarve niveśāyopacakrire || 25 ||
[Analyze grammar]

babhau tasya niviṣṭasya balaśrīḥ śibirasya vai |
śuklaparyantapūrṇasya yathā rūpaṃ mahodadheḥ || 26 ||
[Analyze grammar]

vītarātre tataḥ kāle samuttasthurmahīkṣitaḥ |
ārohaṇārthaṃ puryāste samīyuryuddhalālasāḥ || 27 ||
[Analyze grammar]

samavāyīkṛtāḥ sarve yamunāmanu te nṛpāḥ |
niviṣṭā mantrayāmāsuryuddhakālakutūhalāḥ || 28 ||
[Analyze grammar]

teṣāṃ sutumulaḥ śabdaḥ śuśruve pṛthivīkṣitām |
yugānte bhidyamānānāṃ sāgarāṇāṃ yathā svanaḥ || 29 ||
[Analyze grammar]

teṣāṃ sakañcukoṣṇīṣāḥ sthavirā vetrapāṇayaḥ |
cerurmā śabda ityevaṃ bruvanto rājaśasanāt || 30 ||
[Analyze grammar]

tasya rūpaṃ balasyāsīnniḥśabdastimitasya vai |
līnamīnagrahasyeva niḥśabdasya mahodadheḥ || 31 ||
[Analyze grammar]

niḥśabdastimite tasminyogādiva mahārṇave |
jarāsaṃdho bṛhadvākyaṃ bṛhaspatirivādade || 32 ||
[Analyze grammar]

śīghraṃ samabhivartantāṃ balāni pṛthivīkṣitām |
sarvato nagarī ceyaṃ janaughaiḥ parivāryatām || 33 ||
[Analyze grammar]

aśmayantrāṇi yujyantāṃ kṣepaṇīyāśca mudgarāḥ |
kāryā bhūmiḥ samā sarvā jalaughaiśca pariplutā |
ūrdhvaṃ cāpāni vāhyantāṃ prāsā vai tomarāstathā || 34 ||
[Analyze grammar]

dāryatāṃ caiva ṭaṅkaughaiḥ khanitraiśca purī drutam |
nṛpaśca yuddhamārgajñā vinyasyantāmadūrataḥ || 35 ||
[Analyze grammar]

adyaprabhṛti sainyairme purīrodhaḥ pravartyatām |
yāvadetau raṇe gopau vasudevasutāv ubhau |
saṃkarṣaṇaṃ ca kṛṣṇaṃ ca ghātayāmi śitaiḥ śaraiḥ |
ākāśamapi bāṇaughairniḥsaṃpātaṃ yathā bhavet || 36 ||
[Analyze grammar]

mayānuśiṣṭāstiṣṭhantu purībhūmiṣu pārthivāḥ |
teṣu teṣvavakāśeṣu śīghramāruhyatāṃ purī || 37 ||
[Analyze grammar]

madraḥ kaliṅgādhipatiścekitānaḥ sabāhlikaḥ |
kaśmīrarājo gonardaḥ karūṣādhipatistathā || 38 ||
[Analyze grammar]

drumaḥ kiṃpuruṣaścaiva pārvatīyaṣ ca dāmanaḥ |
nagaryāḥ paścimaṃ dvāraṃ kṣipramārohayantviti || 39 ||
[Analyze grammar]

pauravo veṇudāriśca vaidarbhaḥ somakastathā |
rukmī ca bhojādhipatiḥ sūryākṣaścaiva mālavaḥ || 40 ||
[Analyze grammar]

pāñcālānāmadhipatirdrupadānāṃ mahābalaḥ || 40 ||
[Analyze grammar]

vindānuvindāvāvantyau dantavaktraśca vīryavān |
dakṣiṇaṃ nagaradvāraṃ śīghramārodhayantviti |
chāgaliḥ purumitraśca virāṭaśca mahīpatiḥ || 41 ||
[Analyze grammar]

kauśāmbyo mālavaścaiva śatadhanvā vidūrathaḥ |
bhūriśravāstrigartaśca bāṇaḥ pañcanadastathā || 42 ||
[Analyze grammar]

uttaraṃ nagaradvāramete durgasahā nṛpāḥ |
ārohantāṃ vimardantāṃ vajrapratimagauravāḥ || 43 ||
[Analyze grammar]

ulūkaḥ kaitaveyaśca vīraścāṃśumataḥ sutaḥ |
ekalavyo bṛhatkṣatraḥ kṣatradharmā jayadrathaḥ || 44 ||
[Analyze grammar]

uttamaujāśca śalyaśca kauravāḥ kaikayāstathā |
vaidiśo vāmadevaśca sāketaśca sinīpatiḥ || 45 ||
[Analyze grammar]

pūrvaṃ nagaranirvyūhameteṣvāyattamastu vaḥ |
tvarayanto'bhidhāvantu vātā iva balāhakān || 46 ||
[Analyze grammar]

ahaṃ ca daradaścaiva cedirājaśca saṃgatāḥ |
dakṣiṇaṃ nagaradvāraṃ pālayiṣyāma daṃśitāḥ || 47 ||
[Analyze grammar]

evameṣā purī kṣipraṃ samantādveṣṭitā balaiḥ |
vajrāvapātapratimaṃ prāpnotu tumulaṃ bhayam || 48 ||
[Analyze grammar]

gadino ye gadābhiste parighaiḥ parighāyudhāḥ |
apare vividhaiḥ śastrairdārayantu purīmimām || 49 ||
[Analyze grammar]

adyaiva tu nagaryeṣā viṣamoccayasaṃkaṭā |
kāryā bhūmisamā sarvā bhavadbhirvasudhādhipaiḥ || 50 ||
[Analyze grammar]

evamuktvā jarāsaṃdhaḥ śakratulyaparākramaḥ || 50 ||
[Analyze grammar]

caturaṅgabalaṃ vyūhya jarāsaṃdho vyavasthitaḥ |
athābhyayād yadūn kruddhaḥ saha sarvairnarādhipaiḥ |
pratijagmurdaśārhāstaṃ vyūḍhānīkāḥ prahāriṇaḥ || 51 ||
[Analyze grammar]

tāvāgatau tadā dṛṣṭvā yādavau sainyamagragau || 51 ||
[Analyze grammar]

ruṣāha māgadho vīkṣya he kṛṣṇa puruṣādhama || 51 ||
[Analyze grammar]

na tvayā yoddhumicchāmi bālakeneti lajjayā || 51 ||
[Analyze grammar]

tava rāma yada śraddhā yuddhe sthairyaṃ samudvaha || 51 ||
[Analyze grammar]

hato vā maccharaiśchanna dehaḥ svaryāhi māṃ jahi || 51 ||
[Analyze grammar]

śrī bhagavānuvāca |
na vai śūrā vikatthante darśayantyeva pauruṣam || 51 ||
[Analyze grammar]

na gṛhṇīmo vaco rājannāturasya mumūrṣataḥ || 51 ||
[Analyze grammar]

tad yuddhamabhavadghoraṃ teṣāṃ devāsuropamam |
alpānāṃ bahubhiḥ sārdhaṃ vyatiṣaktarathadvipam || 52 ||
[Analyze grammar]

ugrasenaṃ puraskṛtya vāsudevahalāyudhau || 52 ||
[Analyze grammar]

rathasthāvabhivartetāṃ yuddhāya raṇakovidau || 52 ||
[Analyze grammar]

nagarānniḥsṛtau dṛṣṭvā vasudevasutāv ubau |
kṣubdhaṃ naravarānīkaṃ trastasaṃmūḍhavāhanam || 53 ||
[Analyze grammar]

rathasthau daṃśitau caiva ceratustatra yādavau |
makarāviva saṃrabdhau samudrakṣobhaṇāv ubhau || 54 ||
[Analyze grammar]

tābhyāṃ mṛdhe prayuktābhyāṃ yādavābhyāṃ matirbabhau |
tayoḥ prayudhyatoḥ saṃkhye matirāsīddhṛtātmanoḥ |
āyudhānāṃ purāṇānāmādāne kṛtalakṣaṇā || 55 ||
[Analyze grammar]

tataḥ khānnipatanti sma dīptānyāhavasaṃplave |
lelihānāni divyāni mahānti sudṛḍhāni ca || 56 ||
[Analyze grammar]

kravyādairanuyātāni mūrtimanti bṛhanti ca |
tṛṣitānyāhave bhoktuṃ nṛpamāṃsāni vai bhṛśam || 57 ||
[Analyze grammar]

divyasragdāmadhārīṇi trāsayanti nabhaścarān |
prabhayā bhāsamānāni daṃśitāni diśo daśa || 58 ||
[Analyze grammar]

halaṃ saṃvartakaṃ nāma saunandaṃ musalaṃ tathā |
dhanuṣāṃ pravaraṃ śārṅgaṃ gadā kaumodakī ca ha || 59 ||
[Analyze grammar]

catvāryetāni tejāṃsi viṣṇupraharaṇāni ca |
tābhyāṃ samavatīrṇāni yādavābhyāṃ mahāraṇe || 60 ||
[Analyze grammar]

jagrāha prathamaṃ rāmo lalāmapratimaṃ halam |
taṃ sarpamiva sarpantaṃ divyamālākulaṃ mṛdhe || 61 ||
[Analyze grammar]

saunandaṃ ca tataḥ śrīmānnirānandakaraṃ dviṣām |
savyena sātvatāṃ śreṣṭho jagrāha musalottamam || 62 ||
[Analyze grammar]

darśanīyaṃ ca lokeṣu dhanurjaladanisvanam |
nāmnā śārṅgamiti khyātaṃ viṣṇurjagrāha vīryavān || 63 ||
[Analyze grammar]

devairnigaditārthasya gadā tasyāpare kare |
viṣaktā kumudākṣasya nāmnā kaumodakīti sā || 64 ||
[Analyze grammar]

tau sapraharaṇau vīrau sākṣādviṣṇostanūpamau |
samare rāmagovindau ripūṃstānpratyayudhyatām || 65 ||
[Analyze grammar]

sāyudhapragrahau vīrau tāvanyonyamayāv ubhau |
pūrvajānujasaṃjñau tau rāmagovindalakṣaṇau |
dviṣatsu pratikurvāṇau parākrāntau yatheśvarau || 66 ||
[Analyze grammar]

viceraturyathā devau vasudevasutāv ubhau || 66 ||
[Analyze grammar]

halamudyamya rāmastu sarpendramiva kopitaḥ |
cacāra samare vīro dviṣatāmantako yathā || 67 ||
[Analyze grammar]

vikarṣan rathayūthāni kṣatriyāṇāṃ mahātmanām |
cakāra roṣaṃ saphalaṃ nāgeṣu ca hayeṣu ca || 68 ||
[Analyze grammar]

kuñjarāṃl lāṅgalakṣiptānmusalākṣepatāḍitān |
rāmo virājan samare nirmamantha yathācalān || 69 ||
[Analyze grammar]

te vidhyamānā rāmeṇa samare kṣatriyarṣabhāḥ |
jarāsaṃdhāntikaṃ vīrāḥ samarārtāḥ prajagmire || 70 ||
[Analyze grammar]

tānuvāca jarāsaṃdhaḥ kṣatradharme vyavasthitaḥ |
dhigetāṃ kṣatravṛttiṃ vaḥ samare kātarātmanām || 71 ||
[Analyze grammar]

parāvṛttasya samare virathasya palāyataḥ |
bhrūṇahatyāmivāsahyāṃ pravadanti manīṣiṇaḥ || 72 ||
[Analyze grammar]

bhītāḥ kasmānnivartadhvaṃ dhigetāṃ kṣatravṛttitām |
kṣipraṃ samabhivartadhvaṃ mama vākyena coditāḥ |
atha vā tiṣṭhata rathaiḥ prekṣakāḥ samavasthitāḥ |
yāvadetau raṇe gopau preṣayāmi yamakṣayam || 73 ||
[Analyze grammar]

sthito'smi yuddhe saṃrabdhaḥ kṣatriyā vijayāya hi || 73 ||
[Analyze grammar]

tataste kṣatriyāḥ sarve jarāsaṃdhena coditāḥ |
sṛjantaḥ śarajālāni hṛṣṭā yoddhuṃ vyavasthitāḥ || 74 ||
[Analyze grammar]

te hayaiḥ kāñcanāpīḍai rathaiścāmbudanādibhiḥ |
nāgaiścāmbhodasaṃkāśairmahāmātrapracoditaiḥ || 75 ||
[Analyze grammar]

satanutrāḥ sanistriṃśāḥ sapatākāyudhadhvajāh |
svāropitadhanuṣmantaḥ sutūṇīrāḥ satomarāḥ || 76 ||
[Analyze grammar]

sacchatrotsedhinaḥ sarve cārucāmaravījitāḥ |
raṇe te'bhigatā rejuḥ syandanasthā mahīkṣitaḥ || 77 ||
[Analyze grammar]

te yuddharāgā rathino vyagāhanta yudhāṃ varāḥ |
gadābhiścaiva gurvībhiḥ kṣepaṇīyaiśca mudgaraiḥ || 78 ||
[Analyze grammar]

etasminnantare tatra devānāṃ nandivardhanaḥ || 78 ||
[Analyze grammar]

etasminnantare rājā jarāsaṃdhaḥ pratāpavān || 78 ||
[Analyze grammar]

dadhmau śaṅkhaṃ mahānādaṃ diśaḥ sarvā vinādayan || 78 ||
[Analyze grammar]

tacchrutvā devadevo'pi pāñcajanyamanuttamam || 78 ||
[Analyze grammar]

yasya nādena vitrastā divisthāḥ sarvadevatāḥ || 78 ||
[Analyze grammar]

kimu sainyāni sarvāṇi vitrastānīti kā kathā || 78 ||
[Analyze grammar]

suparṇadhajamāsthāya kṛṣṇastu rathamuttamam |
tadābhyayājjarāsaṃdhaṃ śarairvivyādha cāṣṭabhiḥ || 79 ||
[Analyze grammar]

so'pi vidhvāṣṭabhirviṣṇumugrasenaṃ dadarśa ha || 79 ||
[Analyze grammar]

pārśvasthaṃ ca harerāha śṛṇu rājanvaco mama || 79 ||
[Analyze grammar]

tvaṃ kimāsīnnṛpo rānanvṛṣṇīnāṃ sāṃprataṃ vada || 79 ||
[Analyze grammar]

ajñānāmagraṇīḥ sa tvaṃ ko'nyastvatsadṛśo bhuvi || 79 ||
[Analyze grammar]

yattu dattaṃ kilānena piṇḍamātmajaghātinā || 79 ||
[Analyze grammar]

tadbhuṅkte tadbhavānnityaṃ vadāndha kimataḥ param || 79 ||
[Analyze grammar]

hatvā cāyaṃ sutaṃ śauristava rājaka nirdayaḥ || 79 ||
[Analyze grammar]

tvāmeva rājye saṃsthāpya sāṃprataṃ yuddhalālasaḥ || 79 ||
[Analyze grammar]

tasya bhṛtyatvamāyāsi rājaśabdaṃ samudvahan || 79 ||
[Analyze grammar]

kevalaṃ vayasā vṛddho na tu jñānena rājaka || 79 ||
[Analyze grammar]

nirlajja bhogasaṃsakta kṣudrajanto nṛpādhama || 79 ||
[Analyze grammar]

ito yāhi vṛthāvṛddha tvāṃ draṣṭuṃ nāhamutsahe || 79 ||
[Analyze grammar]

atha yuddhaṃ samālipsuḥ kṣaṇaṃ tiṣṭha mamāgrataḥ || 79 ||
[Analyze grammar]

haniṣye tvāṃ hi sabalaṃ sahariṃ sabalaṃ tathā || 79 ||
[Analyze grammar]

ityuktvā dhanurādāya tasthau tatpuratastadā || 79 ||
[Analyze grammar]

tacchrutva roṣatāmrākṣo babhāṣe māgadhaṃ hariḥ || 79 ||
[Analyze grammar]

antardhānaṃ gatastasmādgomantātparvatottamāt || 79 ||
[Analyze grammar]

tvamidānīṃ samāyāsi balaiḥ sarvaiḥ samanvitaḥ || 79 ||
[Analyze grammar]

sthito'smi yuddhasaṃrabdhaḥ kṣatriyāṇāṃ kṣayāvahaḥ || 79 ||
[Analyze grammar]

sa evāsmi śiśū rājanbhavānapi sa eva hi || 79 ||
[Analyze grammar]

naitad yuktaṃ vṛthā rājannugrasenaṃ prabhāṣitum || 79 ||
[Analyze grammar]

māmeva vada rājendra śatrurasmi tava prabho || 79 ||
[Analyze grammar]

drakṣyase yatkṛtaṃ rājanmayā sāṃpratamīdṛśam || 79 ||
[Analyze grammar]

atha kiṃ bahunoktena śiraśchetsyāmi te nṛpa || 79 ||
[Analyze grammar]

na karoṣi yadi tvaṃ hi rājendrādya palāyanam || 79 ||
[Analyze grammar]

ityuktvā pañcaviṃśatyā nṛpaṃ vivyādha keśavaḥ || 79 ||
[Analyze grammar]

sārathiṃ cāsya vivyādha pañcabhirniśitaiḥ śaraiḥ |
jaghāna turagāṃścājau yatamānasya vīryavān || 80 ||
[Analyze grammar]

dhanuściccheda rājendra jarāsaṃdhasya keśavaḥ || 80 ||
[Analyze grammar]

dhvajaṃ cāsya praciccheda sārathiṃ ca jaghāna ha || 80 ||
[Analyze grammar]

rathaṃ cāsya praciccheda sarvakṣatrasya paśyataḥ || 80 ||
[Analyze grammar]

viratho vidhanuṣkaśca tasthau bhūtalamāsthitaḥ || 80 ||
[Analyze grammar]

taṃ kṛcchragatamājñāya citraseno mahārathaḥ |
senānīḥ kauśikaścaiva kṛṣṇaṃ vivyādhatuḥ śaraiḥ || 81 ||
[Analyze grammar]

tribhirvivyādha saṃsaktaṃ baladevaṃ ca kauśikaḥ |
baladevo dhanuścāsya bhallenājau dvidhākarot |
javenābhyardayaccāpi tānarīñcharavṛṣṭibhiḥ || 82 ||
[Analyze grammar]

bahubhirbahudhā vīraḥ samantātsvarṇabhūṣaṇaiḥ || 82 ||
[Analyze grammar]

taṃ citrasenaḥ saṃrabdho vivyādha navabhiḥ śaraiḥ |
kauśikaḥ pañcabhiścāpi jarāsaṃdhaśca saptabhiḥ || 83 ||
[Analyze grammar]

tribhistribhiśca nārācaistānbibheda janārdanaḥ |
dhanuranyatsamādāya magadhendro mahīpatiḥ |
ugrasenaṃ samājaghne śareṇa niśitena ha || sa śaro'tha mahārāja rājānaṃ sa vyacūcudat |
pitā kaṃsasya rājendra śarairvivyādha saptabhiḥ || saptatyā ca jarāsaṃdhaṃ punaśca navabhiḥ śaraiḥ |
jarāsaṃdhaḥ samājaghne rājānaṃ yadunandanam |
śarairdaśasahasraiśca mādhavasya hi paśyataḥ || ugraseno dhanuṣpāṇirdhanuścāsya dvidhākarot || punarādāya cāpaṃ tu jarāsaṃdhaḥ pratāpavān |
ugrasenaṃ viṃśatibhiḥ śaraiḥ suniśitairapi || vivyādha rājarājānaṃ baladevasya paśyataḥ |
dhanuścāsya dvidhā rājanmuṣṭideśe tathākarot || ādāya niśitaṃ bāṇaṃ jarāsaṃdhaḥ pratāpavān |
vivyādha rājan rājendro rājānaṃ hṛdaye prabhuḥ || aśvāṃścaiva praciccheda śareṇa nataparvaṇā |
rathaṃ cāsya dvidhā cakre dhvajaṃ ca prādunonnṛpaḥ || rathāccaiva pradudrāva vṛṣṇīnāṃ nṛpasattamaḥ || kauśikaścitrasenaśca jarāsaṃdho mahīpatiḥ |
janārdanaṃ mahārāja samājaghnustribhistribhiḥ |
jarāsaṃdhaḥ śarairbhagno vasudevasya paśyataḥ |
pañcabhiḥ pañcabhiścaiva baladevaḥ śitaiḥ śaraiḥ || 84 ||
[Analyze grammar]

ratheṣāṃ cāpi ciccheda citrasenasya vīryavān |
baladevo dhanuścājau bhallenāsya dvidhākarot || 85 ||
[Analyze grammar]

sa cchinnadhanvā viratho gadāmādāya vīryavān |
abhyadravatsusaṃkruddho jighāṃsurmusalāyudham || 86 ||
[Analyze grammar]

sisṛkṣatastu nārācāṃścitrasenavadhaiṣiṇaḥ |
dhanuściccheda rāmasya jarāsaṃdho mahābalaḥ |
gadayā ca jaghānāśvān kopātsa magadheśvaraḥ || 87 ||
[Analyze grammar]

rāmaṃ cābhyadravadvīro jarāsaṃdho mahābalaḥ || 87 ||
[Analyze grammar]

ādāya musalaṃ rāmo jarāsaṃdhamupādravat |
tayostu yuddhamabhavatparasparavadhaiṣiṇoḥ || 88 ||
[Analyze grammar]

citrasenastu saṃsaktaṃ dṛṣṭvā rāmeṇa māgadham || 88 ||
[Analyze grammar]

rathamanyaṃ samāruhya jarāsaṃdhamavārayat || 88 ||
[Analyze grammar]

tato balena mahatā gajānīkena cāpyatha || 88 ||
[Analyze grammar]

ubhayorantare tābhyāṃ saṃkulaṃ samapadyata || 88 ||
[Analyze grammar]

tataḥ sainyena mahatā jarāsaṃdho'bhisaṃvṛtaḥ |
rāmakṛṣṇāgragānbhojānāsasāda mahābalaḥ || 89 ||
[Analyze grammar]

tataḥ prakṣubhitasyeva sāgarasya mahāsvanaḥ |
prādurbabhūva tumulaḥ senayorubhayostayoḥ || 90 ||
[Analyze grammar]

veṇubherīmṛdaṅgānāṃ śaṅkhānāṃ ca sahasraśaḥ |
ubhayoḥ senayo rājanprādurāsīnmahāsvanaḥ || 91 ||
[Analyze grammar]

kṣveḍitāsphoṭitotkruṣṭaistumulaḥ sarvato'bhavat |
utpapāta rajaścāpi khuranemisamuddhatam || 92 ||
[Analyze grammar]

samudyatamahāśastrāḥ pragṛhītaśarāsanāḥ |
anyonyamabhigarjantaḥ śūrāstatrāvatasthire || 93 ||
[Analyze grammar]

rathinaḥ sādinaścaiva pattayaśca sahasraśaḥ |
gajāścātibalāstatra saṃnipeturabhītavat || 94 ||
[Analyze grammar]

tatasteṣāṃ mahārāja nṛpāṇāṃ jayakāṅkṣiṇām || 94 ||
[Analyze grammar]

sa saṃprahārastumulastyaktvā prāṇānavartata |
vṛṣṇībhiḥ saha yodhānāṃ jarāsaṃdhasya dāruṇaḥ || 95 ||
[Analyze grammar]

tataḥ śiniranādhṛṣṭirbabhrurvipṛthurāhukaḥ |
baladevaṃ puraskṛtya sainyasyārdhena daṃśitāḥ || 96 ||
[Analyze grammar]

dakṣiṇaṃ pakṣamāseduḥ śatrusainyasya bhārata |
pālitaṃ cedirājena jarāsaṃdhena cābhibho || 97 ||
[Analyze grammar]

udīcyaiśca mahāvīryaiḥ śalyasālvādibhirnṛpaiḥ |
sṛjantaḥ śaravarṣāṇi samabhityaktajīvitāḥ || 98 ||
[Analyze grammar]

āgāvahaḥ pṛthuḥ kahvaḥ śatadyumno vidūrathaḥ |
hṛṣīkeśaṃ puraskṛtya sainyasyārdhena daṃśitāḥ || 99 ||
[Analyze grammar]

bhīṣmakeṇābhiguptasya rukmiṇā ca mahātmanā |
devakenāpi rājendra tathā madreśvareṇa ca |
prācyaiśca dākṣiṇātyaiśca guptavīryabalānvitaiḥ || 100 ||
[Analyze grammar]

teṣāṃ yuddhaṃ samabhavatsamabhityaktajīvitam |
śaktyṛṣṭiprāsabāṇaughān sṛjatāṃ tumulaṃ mahat || 101 ||
[Analyze grammar]

sātyakiścitrakaḥ śyāmo yuyudhānaśca vīryavān |
rājādhidevo mṛduraḥ śvaphalkaśca mahābalaḥ || 102 ||
[Analyze grammar]

satrājicca prasenaśca balena mahatā vṛtāḥ |
vyūhasya pakṣaṃ te savyaṃ pratīyurdviṣatāṃ mṛdhe || 103 ||
[Analyze grammar]

vyūhasyārdhaṃ samāsedurmṛdureṇābhirakṣitam |
tatra yuddhaṃ samabhavanmahaddevāsuropamam |
alpānāṃ bahubhiḥ sardhaṃ vāsudevavyapāśrayāt || evaṃ yuddhamabhūtteṣāṃ śūrāṇāṃ harṣavardhanam |
bhīrūṇāṃ trāsajananaṃ yamarāṣṭravivardhanam |
rājabhiścāpi bahubhirveṇudārimukhaiḥ saha || 104 ||
[Analyze grammar]

pratīcyaiśca balodagrairdhārtarāṣṭraiśca pālitam || 104 ||
[Analyze grammar]