Chapter 31

vaiśaṃpāyana uvāca |
praśnabhāro mahāṃstāta tvayoktaḥ śārṅgadhanvani |
yathāśakti tu vakṣyāmi śrūyatāṃ vaiṣṇavaṃ yaśaḥ || 1 ||
[Analyze grammar]

viṣṇoḥ prabhāvaśravaṇe diṣṭyā te matirutthitā |
hanta viṣṇoḥ samastāstvaṃ śṛṇu divyāḥ pravṛttayaḥ || 2 ||
[Analyze grammar]

sahasrāsyaṃ sahasrākṣaṃ sahasracaraṇaṃ ca yam |
sahasraśirasaṃ devaṃ sahasrakaramavyayam || 3 ||
[Analyze grammar]

sahasrayugaparyantaṃ sahasraparivatsaram || 3 ||
[Analyze grammar]

sahasraśatadhā bhūtvā pralayaṃ kārayettu yaḥ || 3 ||
[Analyze grammar]

sahasrajihvaṃ bhāsvantaṃ sahasramukuṭaṃ prabhum |
sahasradaṃ sahasrādiṃ sahasrabhujamavyayam || 4 ||
[Analyze grammar]

savanaṃ havanaṃ caiva havyaṃ hotārameva ca |
pātrāṇi ca pavitrāṇi vediṃ dīkṣāṃ caruṃ sruvam || 5 ||
[Analyze grammar]

sruksomaśūrpamupabhṛtprokṣaṇīṃ dakṣiṇāyanam |
adhvaryuṃ sāmagaṃ vipraṃ sadasyaṃ sadanaṃ savam || 6 ||
[Analyze grammar]

yūpaṃ samitsruvaṃ darvīṃ camasolūkhalāni ca |
prāgvaṃśaṃ yajñabhūmiṃ ca hotāraṃ cayanaṃ ca yat || 7 ||
[Analyze grammar]

hrasvānyatipramāṇāni sthāvarāṇi carāṇi ca |
prāyaścittāni cārghyaṃ ca sthaṇḍilāni kuśāṃstathā || 8 ||
[Analyze grammar]

mantraṃ yajñavahaṃ vahniṃ bhāgaṃ bhāgavahaṃ ca yat |
agrebhujaṃ somabhujaṃ hutārciṣamudāyudham |
āhurvedavido viprā yaṃ yajñaṃ śāśvataṃ vibhum || 9 ||
[Analyze grammar]

tasya viṣṇoḥ sureśasya śrīvatsāṅkasya dhīmataḥ |
prādurbhāvasahasrāṇi samatītānyanekaśaḥ |
sarvayajñamukhaṃ devaṃ sarvayajñapravartinam |
bhūyaścaiva bhaviṣyantītyevamāha pitāmahaḥ || 10 ||
[Analyze grammar]

yatpṛcchasi mahārāja divyāṃ puṇyāṃ kathāṃ śubhām |
kimarthaṃ bhagavānviṣṇurvasudevakule'bhavat || 11 ||
[Analyze grammar]

sureśo ripusūdanaḥ || 11c ||
[Analyze grammar]

devalokaṃ samutsṛjya || 11c ||
[Analyze grammar]

tatte'haṃ saṃpravakṣyāmi śṛṇu sarvamaśeṣataḥ |
vāsudevasya māhātmyaṃ caritaṃ ca mahādyuteḥ || 12 ||
[Analyze grammar]

hitārthaṃ suramartyānāṃ lokānāṃ prabhavāya ca |
bahuśaḥ sarvabhūtātmā prādurbhavati kāryataḥ |
prādurbhāvāṃśca vakṣyāmi puṇyāndevaguṇairyutān || 13 ||
[Analyze grammar]

chāndasībhirudārābhiḥ śrutibhiḥ samalaṃkṛtān || 13 ||
[Analyze grammar]

śuciḥ prayatavāgbhūtvā nibodha janamejaya || 13 ||
[Analyze grammar]

idaṃ purāṇaṃ paramaṃ puṇyaṃ vedaiśca saṃmitam || 13 ||
[Analyze grammar]

hanta te kathayiṣyāmi viṣṇordivyāṃ kathāṃ śṛṇu || 13 ||
[Analyze grammar]

yadā yadā hi dharmasya glānirbhavati bhārata || 13 ||
[Analyze grammar]

dharmasaṃsthāpanārthāya tadā saṃbhavati prabhuḥ || 13 ||
[Analyze grammar]

tasya hyekā mahārāja mūrtirbhavati sattama || 13 ||
[Analyze grammar]

nityaṃ diviṣṭhā yā rājaṃstapaścarati duścaram || 13 ||
[Analyze grammar]

dvitīyā cāsya śayane nidrāyogamupāyayau || 13 ||
[Analyze grammar]

prajāsaṃhārasargārthaṃ kimadhyātmavicintakam || 13 ||
[Analyze grammar]

suptvā yugasahasraṃ sa prādurbhavati kāryavān |
pūrṇe yugasahasre tu devadevo jagatpatiḥ || 14 ||
[Analyze grammar]

pitāmaho lokapālāścandrādityau hutāśanaḥ || 14 ||
[Analyze grammar]

brahmā ca kapilaścaiva parameṣṭhī tathaiva ca |
devāḥ saptarṣayaścaiva tryambakaśca mahāyaśāḥ || 15 ||
[Analyze grammar]

vāyuḥ samudrāḥ śailāśca tasya dehe samāśritāḥ || 15 ||
[Analyze grammar]

sanatkumāraśca mahānubhāvo manurmahātmā bhagavānprajākaraḥ |
purāṇadevo'tha purāṇi cakre pradīptavaiśvānaratulyatejāḥ || 16 ||
[Analyze grammar]

yena cārṇavamadhyasthau naṣṭe sthāvarajaṃgame |
naṣṭe devāsuranare pranaṣṭoragarākṣase || 17 ||
[Analyze grammar]

yoddhukāmau sudurdharṣau dānavau madhukaiṭabhau |
hatau prabhavatā tena tayordattvāmitaṃ varam || 18 ||
[Analyze grammar]

purā kamalanābhasya svapataḥ sāgarāmbhasi |
puṣkare yatra saṃbhūtā devāḥ sarṣigaṇāḥ purā || 19 ||
[Analyze grammar]

eṣa pauṣkarako nāma prādurbhāvaḥ prakīrtitaḥ |
purāṇaṃ kathyate yatra vedaśrutisamāhitam || 20 ||
[Analyze grammar]

vārāhastu śrutisukhaḥ prādurbhāvo mahātmanaḥ |
yatra viṣṇuḥ suraśreṣṭho vārāhaṃ rūpamāsthitaḥ || 21 ||
[Analyze grammar]

mahīṃ sāgaraparyantāṃ saśailavanakānanām || 21 ||
[Analyze grammar]

vedapādo yūpadaṃṣṭraḥ kratudantaścitīmukhaḥ |
agnijihvo darbhalomā brahmaśīrṣo mahātapāḥ || 22 ||
[Analyze grammar]

ahorātrekṣaṇo divyo vedāṅgaśrutibhūṣaṇaḥ |
ājyanāsaḥ sruvastuṇḍaḥ sāmaghoṣasvano mahān || 23 ||
[Analyze grammar]

dharmasatyamayaḥ śrīmān kramavikramasatkṛtaḥ |
prāyaścittanakho dhīraḥ paśujānurmahāvṛṣaḥ || 24 ||
[Analyze grammar]

udgātrāntro homaliṅgaḥ phalabījamahauṣadhiḥ |
vāyvantarātmā mantrasphigvikṛtaḥ somaśoṇitaḥ || 25 ||
[Analyze grammar]

vediskandho havirgandho havyakavyātivegavān |
prāgvaṃśakāyo dyutimānnānādīkṣābhirācitaḥ || 26 ||
[Analyze grammar]

dakṣiṇāhṛdayo yogī mahāsatramayo mahān |
upākarmeṣṭharucakaḥ pravargyāvartabhūṣaṇaḥ |
nānāchandogatipatho guhyopaniṣadāsanaḥ |
chāyāpatnīsahāyo vai maṇiśṛṅga ivocchritaḥ || 27 ||
[Analyze grammar]

rasātalatale magnāṃ rasātalatalaṃ gataḥ || 27 ||
[Analyze grammar]

mahīṃ sāgaraparyantāṃ saśailavanakānanām |
ekārṇavajale bhraṣṭāmekārṇavagatiḥ prabhuḥ || 28 ||
[Analyze grammar]

pūrvaṃ lokahitārthāya daṃṭrābhyāmujjahāra gām || 28 ||
[Analyze grammar]

tataḥ svasthānamānīya pṛthivīṃ pṛthivīśvaraḥ || 28 ||
[Analyze grammar]

mumoca pūrvaṃ manasā dhārayitvā dharādharān || 28 ||
[Analyze grammar]

sadyo jagāma nirvāṇaṃ medinī tasya dhāraṇāt || 28 ||
[Analyze grammar]

cakāra ca namaskāraṃ tasmai devāya vedhase || 28 ||
[Analyze grammar]

daṃṣṭrayā yaḥ samuddhṛtya lokānāṃ hitakāmyayā |
sahasraśīrṣo devādiścakāra jagatīṃ punaḥ || 29 ||
[Analyze grammar]

evaṃ yajñavarāheṇa bhūtvā bhūtahitārthinā |
uddhṛtā pṛthivī devī sāgarāmbudharā purā || 30 ||
[Analyze grammar]

vārāha eṣa kathito nārasiṃhamataḥ śṛṇu |
yatra bhūtvā mṛgendreṇa hiraṇyakaśipurhataḥ || 31 ||
[Analyze grammar]

purā kṛtayuge rājan surārirbaladarpitaḥ |
daityānāmādipuruṣaścakāra tapa uttamam || 32 ||
[Analyze grammar]

daśa varśasahasrāṇi śatāni daśa pañca ca |
jalopavāsastasyāsītsthānamaunadṛḍhavrataḥ || 33 ||
[Analyze grammar]

tataḥ śamadamābhyāṃ ca brahmacaryeṇa cānagha |
brahmā prītamanāstasya tapasā niyamena ca || 34 ||
[Analyze grammar]

taṃ vai svayaṃbhūrbhagavān svayamāgamya bhūpate |
vimānenārkavarṇena haṃsayuktena bhāsvatā || 35 ||
[Analyze grammar]

ādityairvasubhiḥ sādhyairmarudbhirdaivataiḥ saha |
rudrairviśvasahāyaiśca yakṣarākṣasakiṃnaraiḥ || 36 ||
[Analyze grammar]

diśābhirvidiśābhiśca nadībhiḥ sāgaraistathā |
nakṣatraiśca muhūrtaiśca khecaraiśca mahāgrahaiḥ || 37 ||
[Analyze grammar]

devarṣibhistapovṛddhaiḥ siddhaiḥ saptarṣibhistathā |
rājarṣibhiḥ puṇyatamairgandharvairapsarogaṇaiḥ || 38 ||
[Analyze grammar]

carācaraguruḥ śrīmānvṛtaḥ sarvaiḥ suraistathā |
brahmā brahmavidāṃ śreṣṭho daityaṃ vacanamabravīt || 39 ||
[Analyze grammar]

prīto'smi tava bhaktasya tapasānena suvrata |
varaṃ varaya bhadraṃ te yatheṣṭaṃ kāmamāpnuhi || 40 ||
[Analyze grammar]

hiraṇyakaśipuruvāca |
na devāsuragandharvā na yakṣoragarākṣsāḥ |
na mānuṣāḥ piśācā vā hanyurmāṃ devasattama || 41 ||
[Analyze grammar]

ṛṣayo vā na māṃ śāpaiḥ kruddhā lokapitāmaha |
śapeyustapasā yuktā varametaṃ vṛṇomyaham || 42 ||
[Analyze grammar]

na śastreṇa na cāstreṇa giriṇā pādapena vā |
na śuṣkeṇa na cārdreṇa syānna cānyena me vadhaḥ || 43 ||
[Analyze grammar]

pāṇiprahāreṇaikena sabhṛtyabalavāhanam || 43 ||
[Analyze grammar]

yo māṃ nāśayituṃ śaktaḥ sa me mṛtyurbhaviṣyati || 43 ||
[Analyze grammar]

nākāśe vā na bhūmau vā rātrau vā divase'pi vā || 43 ||
[Analyze grammar]

nāntarvā na bahirvāpi syādvadho me pitāmaha || 43 ||
[Analyze grammar]

paśubhirvā mṛgendrairvā pakṣibhirvā sarīsṛpaiḥ || 43 ||
[Analyze grammar]

bhaveyamahamevārkaḥ somo vāyurhutāśanaḥ |
salilaṃ cāntarikṣaṃ ca nakṣatrāṇi diśo daśa || 44 ||
[Analyze grammar]

ahaṃ krodhaśca kāmaśca varuṇo vāsavo yamaḥ |
dhanadaśca dhanādhyakṣo yakṣaḥ kiṃpuruṣādhipaḥ || 45 ||
[Analyze grammar]

vaiśaṃpāyana uvāca |
evamuktastu daityena svayaṃbhurbhagavāṃstadā || 45 ||
[Analyze grammar]

uvāca daityarājaṃ taṃ prahasannṛpasattama || 45 ||
[Analyze grammar]

na divā na ca rātrau vā na me mṛtyurbhaviṣyati || 45 ||
[Analyze grammar]

brahmovāca |
ete divyā varāstāta mayā dattāstavādbhutāḥ |
sarvān kāmānimāṃstāta prāpsyasi tvaṃ na saṃśayaḥ || 46 ||
[Analyze grammar]

evamuktvā tu bhagavāñjagāmākāśameva ha |
vairājaṃ brahmasadanaṃ brahmarṣigaṇasevitam || 47 ||
[Analyze grammar]

śrutvā devā varaṃ taṃ ca dattaṃ salilayoninā || 47 ||
[Analyze grammar]

vibhuṃ vijñāpayāmāsurdevāḥ śakrapurogamāḥ || 47 ||
[Analyze grammar]

tato devāśca nāgāśca gandharvā munayastathā |
varapradānaṃ śrutvaiva pitāmahamupasthitāḥ || 48 ||
[Analyze grammar]

devā ūcuḥ |
varadānena bhagavanvadhiṣyati sa no'suraḥ |
tatprasīdasva bhagavanvadho'sya pravicintyatām || 49 ||
[Analyze grammar]

bhagavān sarvabhūtānāṃ svayaṃbhūrādikṛdvibhuḥ |
sraṣṭā ca havyakavyānāmavyaktaḥ prakṛtirdhruvaḥ || 50 ||
[Analyze grammar]

tato lokahitaṃ vākyaṃ śrutvā devaḥ prajāpatiḥ |
provāca bhagavānvākyaṃ sarvāndevagaṇāṃstadā || 51 ||
[Analyze grammar]

avaśyaṃ tridaśāstena prāptavyaṃ tapasaḥ phalam |
tapaso'nte'sya bhagavānvadhaṃ viṣṇuḥ kariṣyati || 52 ||
[Analyze grammar]

etacchrutvā surāḥ sarve vākyaṃ paṅkajajanmanaḥ |
svāni sthānāni divyāni jagmuste vai mudā yutāḥ || 53 ||
[Analyze grammar]

labdhamātre vare cāpi sarvāḥ so'bādhata prajāḥ |
hiraṇyakaśipurdaityo varadānena darpitaḥ || 54 ||
[Analyze grammar]

āśrameṣu mahābhāgānmunīnvai saṃśitavratān |
satyadharmaratāndāntānpurā dharṣitavāṃstu saḥ || 55 ||
[Analyze grammar]

devāṃstribhuvanasthāṃśca parājitya mahāsuraḥ |
trailokyaṃ vaśamānīya svarge vasati dānavaḥ || 56 ||
[Analyze grammar]

yadā varamadonmatto nyavasaddānavo bhuvi |
yajñiyānakaroddaityānayajñīyāśca devatāḥ || 57 ||
[Analyze grammar]

ādityāśca tataḥ sādhyā viśve'tha vasavastathā |
maruto'psarasaścaiva gandharvā brahmaviddvijāḥ |
ṛṣināgāḥ suparṇāśca ye cānye'pyevamādayaḥ |
śaraṇyaṃ śaraṇaṃ viṣṇumupatasthurmahābalam || 58 ||
[Analyze grammar]

devaṃ brahmamayaṃ yajñaṃ brahmadevaṃ sanātanam |
bhūtabhavyabhaviṣyasya prabhuṃ lokanamaskṛtam |
nārāyaṇaṃ vibhuḥ devāḥ śaraṇyaṃ śaraṇyaṃ gatāḥ || 59 ||
[Analyze grammar]

trāyasva no'dya deveśa hiraṇyakaśiporvadhāt |
tvaṃ hi na paramo devastvaṃ hi na paramo guruḥ |
tvaṃ hi naḥ paramo dhātā brahmādīnāṃ surottama || 60 ||
[Analyze grammar]

utphullāmbujapatrākṣa śatrupakṣabhayāvaha |
kṣayāya ditivaṃśasya śaraṇaṃ tvaṃ bhavasva naḥ || 61 ||
[Analyze grammar]

viṣṇuruvāca |
bhayaṃ tyajadhvamamarā abhayaṃ vo dadāmyaham |
tathaiva tridivaṃ devāḥ pratipadyata māciram || 62 ||
[Analyze grammar]

eṣo'haṃ sagaṇaṃ daityaṃ varadānena darpitam |
avadhyamamarendrāṇāṃ dānavendraṃ nihanmi tam || 63 ||
[Analyze grammar]

evamuktvā sa bhagavānvisṛjya tridaśeśvarān |
hiraṇyakaśipo rājannājagāma hariḥ sabhām || 64 ||
[Analyze grammar]

sabhāṃ hiraṇyakaśiporjagāma harirīśvaraḥ || 64 ||
[Analyze grammar]

narasya kṛtvārdhatanuṃ siṃhasyārdhatanuṃ tathā |
nārasiṃhena vapuṣā pāṇiṃ saṃspṛśya pāṇinā || 65 ||
[Analyze grammar]

jīmūtaghanasaṃkāśo jīmūtaghananisvanaḥ |
jīmūtaghanadīptaujā jīmūta iva vegavān || 66 ||
[Analyze grammar]

devādirditijānvīro nṛsiṃhaḥ samupādravat || 66 ||
[Analyze grammar]

samutpatya nakhaistīkṣṇairvidārya nihato yudhi || 66 ||
[Analyze grammar]

daityaṃ so'tibalaṃ dṛptaṃ dṛptaśārdūlavikramam |
dṛptairdaityagaṇairguptaṃ hatavānekapāṇinā || 67 ||
[Analyze grammar]

nṛsiṃha eṣa kathito bhūyo'yaṃ vāmano'paraḥ |
yatra vāmanamāśritya rūpaṃ daityavināśanam || 68 ||
[Analyze grammar]

balerbalavato yajñe balinā viṣṇunā purā |
vikramaistribhirakṣobhyāḥ kṣobhitāste mahāsurāḥ || 69 ||
[Analyze grammar]

vipracittiḥ śibiḥ śaṅkurayaḥśaṅkustathaiva ca |
ayaḥśirā aśvaśirā hayagrīvaśca vīryavān |
vegavān ketumānugraḥ sogravyagro mahāsuraḥ || 70 ||
[Analyze grammar]

puṣkaraḥ puṣkalaścaiva sāśvo'śvapatireva ca |
prahrādo'śvaśirāḥ kumbhaḥ saṃhrādo gaganapriyaḥ || 71 ||
[Analyze grammar]

anuhrādo hariharau varāhaḥ saṃharo rujaḥ |
vepanaśca mahārathaḥ |
bṛhatkīrtirmahājihvaḥ |
śarabhaḥ śalabhaścaiva kupanaḥ kopanaḥ krathaḥ || 72 ||
[Analyze grammar]

bṛhatkīrtirmahājihvaḥ śaṅkukarṇo mahāsvanaḥ |
dīrghajihvo'rkanayano mṛdupādo mṛdupriyaḥ || 73 ||
[Analyze grammar]

vāyurgaviṣṭho namuciḥ śambaro vikṣaro mahān |
candrahantā krodhahantā krodhavardhana eva ca || 74 ||
[Analyze grammar]

kālakaḥ kālakeyaśca vṛtraḥ krodho virocanaḥ |
gariṣṭhaśca variṣṭhaśca pralambanarakāv ubhau || 75 ||
[Analyze grammar]

indratāpanavātāpī ketumānbaladarpitaḥ |
asilomā pulomā ca bāṣkalaḥ pramado madaḥ || 76 ||
[Analyze grammar]

khasṛmaḥ kālavadanaḥ karālaḥ keśireva ca |
ekākṣaścandrahā rāhuḥ saṃhrādaḥ sṛmaraḥ svanaḥ || 77 ||
[Analyze grammar]

śataghnīcakrahastāśca tathā parighapāṇayaḥ |
aśmayantrāyudhopetā bhiṇḍipālāyudhāstathā || 78 ||
[Analyze grammar]

śūlolūkhalahastāśca paraśvadhadharāstathā |
pāśamudgarahastā vai tathā laguḍapāṇayaḥ || 79 ||
[Analyze grammar]

mahāśilāpraharaṇāḥ śūlahastāśca dānavāḥ |
nānāpraharaṇā ghorā nānāveṣā mahājavāḥ || 80 ||
[Analyze grammar]

kūrmakukkuṭavaktrāśca śaśolūkamukhāstathā |
kharoṣṭravadanāścaiva varāhavadanāstathā || 81 ||
[Analyze grammar]

bhīmā makaravaktrāśca kroṣṭuvaktrāśca dānavāḥ |
ākhudarduravaktrāśca ghorā vṛkamukhāstathā || 82 ||
[Analyze grammar]

mārjāraśaśavaktrāśca mahāvaktrāstathāpare |
nakrameṣānanāḥ śūrā gojāvimahiṣānanāḥ || 83 ||
[Analyze grammar]

godhāśalyakavaktrāśca krauñcavaktrāstathāpare |
garuḍānanāḥ khaḍgamukhā mayūravadanāstathā || 84 ||
[Analyze grammar]

gajendracarmavasanāstathā kṛṣṇājināmbarāḥ |
cīrasaṃvṛtagātrāśca tathā valkalavāsasaḥ || 85 ||
[Analyze grammar]

uṣṇīṣiṇo mukuṭinastathā kuṇḍalino'surāḥ |
kirīṭino lambaśikhāḥ kambugrīvāḥ suvarcasaḥ |
nānāveṣadharā daityā nānāmālyānulepanāḥ || 86 ||
[Analyze grammar]

svānyāyudhāni saṃgṛhya pradīptānīva tejasā |
kramamāṇaṃ hṛṣīkeśamupāvartanta sarvaśaḥ || 87 ||
[Analyze grammar]

pramathya sarvāndaiteyānpādahastatalaistataḥ |
rūpaṃ kṛtvā mahābhīṃaṃ jahārāśu sa medinīm || 88 ||
[Analyze grammar]

tasya vikramato bhūmiṃ candrādityau stanāntare |
nabhaḥ prakramamāṇasya nābhyāṃ kila samāsthitau || 89 ||
[Analyze grammar]

paramākramamāṇasya jānubhyāṃ tau vyavasthitau |
viṣṇoramitavīryasya vadantyevaṃ dvijātayaḥ || 90 ||
[Analyze grammar]

hṛtvā sa medinīṃ kṛtsnāṃ hatvā cāsurapuṃgavān |
dadau śakrāya vasudhāṃ viṣṇurbalavatāṃ varaḥ || 91 ||
[Analyze grammar]

eṣa te vāmano nāma prādurbhāvo mahātmanaḥ |
vedavidbhirdvijairetatkathyate vaiṣṇavaṃ yaśaḥ || 92 ||
[Analyze grammar]

bhūyo bhūtātmano viṣṇoḥ prādurbhāvo mahātmanaḥ |
dattātreya iti khyātaḥ kṣamayā parayā yutaḥ || 93 ||
[Analyze grammar]

tena naṣṭeṣu deveṣu prakriyāsu makheṣu ca |
cāturvarṇye ca saṃkīrṇe dharme śithilatāṃ gate || 94 ||
[Analyze grammar]

abhivardhati cādharme satye naṣṭe'nṛte sthite |
prajāsu śīryamāṇāsu dharme cākulatāṃ gate || 95 ||
[Analyze grammar]

sayajñāḥ sakriyā vedāḥ pratyānītā hi tena vai |
cāturvarṇyamasaṃkīrṇaṃ kṛtaṃ tena mahātmanā || 96 ||
[Analyze grammar]

tena hehayarājasya kārtavīryasya dhīmataḥ |
varadena varo datto dattātreyeṇa dhīmatā || 97 ||
[Analyze grammar]

etadbāhudvayaṃ yatte tatte mama kṛte nṛpa |
śatāni daśa bāhūnāṃ bhaviṣyati na saṃśayaḥ || 98 ||
[Analyze grammar]

pālayiṣyasi kṛtsnāṃ ca vasudhāṃ vasudheśvara |
durnirīkṣyo'rivṛndānāṃ yuddhasthaśca bhaviṣyasi || 99 ||
[Analyze grammar]

eṣa te vaiṣṇavaḥ śrīmānprādurbhāvo'dbhutaḥ śubhaḥ |
kathito vai mahārāja yathāśrutamariṃdama |
bhūyaśca jāmadagnyo'yaṃ prādurbhāvo mahātmanaḥ || 100 ||
[Analyze grammar]

yatra bāhusahasreṇa vismitaṃ durjayaṃ raṇe |
rāmo'rjunamanīkasthaṃ jaghāna nṛpatiṃ prabhuḥ || 101 ||
[Analyze grammar]

rathasthaṃ pārthivaṃ rāmaḥ pātayitvārjunaṃ bhuvi |
dharṣayitvā yathākāmaṃ krośamānaṃ ca meghavat || 102 ||
[Analyze grammar]

kṛtsnaṃ bāhusahasraṃ ca ciccheda bhṛgunandanaḥ |
paraśvadhena dīptena jñātibhiḥ sahitasya vai || 103 ||
[Analyze grammar]

kīrṇā kṣatriyakoṭībhirmerumandarabhūṣaṇā |
triḥsaptakṛtvaḥ pṛthivī tena niḥkṣatriyā kṛtā || 104 ||
[Analyze grammar]

kṛtvā niḥkṣatriyāṃ caiva bhārgavaḥ sumahātapāḥ |
sarvapāpavināśāya vājimedhena ceṣṭavān || 105 ||
[Analyze grammar]

tasminyajñe mahādāne dakṣiṇāṃ bhṛgunandanaḥ |
mārīcāya dadau prītaḥ kaśyapāya vasuṃdharām || 106 ||
[Analyze grammar]

vāruṇāṃsturagāñchubhrān rathaṃ ca rathināṃ varaḥ |
hiraṇyamakṣayaṃ dhenūrgajendrāṃśca mahāmatiḥ |
dadau tasminmahāyajñe vājimedhe mahāyaśāḥ || 107 ||
[Analyze grammar]

adyāpi ca hitārthāya lokānāṃ bhṛgunandanaḥ |
caramāṇastapo dīptaṃ jāmadagnyaḥ punaḥ punaḥ |
tiṣṭhate devavacchrīmānmahendre parvatottame || 108 ||
[Analyze grammar]

kṛṣṇājinottarīyaṃ ca jaṭāmakuṭamaṇḍalī || 108 ||
[Analyze grammar]

eṣa viṣṇoḥ sureśasya śāśvatasyāvyayasya ca |
jāmadagnya iti khyātaḥ prādurbhāvo mahātmanaḥ || 109 ||
[Analyze grammar]

caturviṃśe yuge cāpi viśvāmitrapuraḥsaraḥ |
jajñe daśarathasyātha putraḥ padmāyatekṣaṇaḥ || 110 ||
[Analyze grammar]

kṛtvātmānaṃ mahābāhuścaturdhā prabhurīśvaraḥ |
loke rāma iti khyātastejasā bhāskaropamaḥ || 111 ||
[Analyze grammar]

prasādanārthaṃ lokasya rakṣasāṃ nigrahāya ca |
dharmasya ca vivṛddhyarthaṃ jajñe tatra mahāyaśāḥ |
tamapyāhurmanuṣyendraṃ sarvabhūtapatestanum || 112 ||
[Analyze grammar]

tasmai dattāni cāstrāṇi viśvāmitreṇa dhīmatā |
vadhārthaṃ devaśatrūṇāṃ durdharāṇi surairapi || 113 ||
[Analyze grammar]

yajñavighnakarau yena munīnāṃ bhāvitātmanām |
mārīcaśca subāhuśca balena balināṃ varau |
nihatau ca nirāśau ca kṛtau tena mahātmanā || 114 ||
[Analyze grammar]

vartamāne makhe yena janakasya mahātmanaḥ |
bhagnaṃ māheśvaraṃ cāpaṃ krīḍatā līlayā purā || 115 ||
[Analyze grammar]

yaḥ samāḥ sarvadharmajñaścaturdaśa vane'vasat |
lakṣmaṇānucaro rāmaḥ sarvabhūtahite rataḥ || 116 ||
[Analyze grammar]

rūpiṇī yasya pārśvasthā sīteti prathitā janaiḥ |
pūrvocitatvādyā lakṣmīrbhartāramanugacchati || 117 ||
[Analyze grammar]

caturdaśa vane taptvā tapo varṣāṇi rāghavaḥ |
janasthāne vasan kāryaṃ tridaśānāṃ cakāra saḥ || 118 ||
[Analyze grammar]

sītāyāḥ padamanvicchannijaghāna mahāmanāḥ |
virādhaṃ ca kabandhaṃ ca rākṣasau bhīmavikramau |
jaghāna puruṣavyāghrau gandharvau śāpavikṣatau || 119 ||
[Analyze grammar]

hutāśanārkāṃśutaḍitprakāśaiḥ prataptajāmbūnadacitrapuṅkhaiḥ |
surendravajrāśanitulyasāraiḥ śaraiḥ śarīreṣu viyojitau balāt || 120 ||
[Analyze grammar]

sugrīvasya kṛte yena vānarendro mahābalaḥ |
vālī vinihataḥ saṃkhye sugrīvaścābhiṣecitaḥ || 121 ||
[Analyze grammar]

devāsuragaṇānāṃ hi yakṣarākṣasapakṣiṇām |
yatrāvadhyaṃ rākṣasendraṃ rāvaṇaṃ yudhi durjayam || 122 ||
[Analyze grammar]

guptaṃ rākṣasakoṭībhirnīlāñjanacayopamam |
trailokyarāvaṇaṃ krūraṃ rākṣasaṃ rākṣaseśvaram || 123 ||
[Analyze grammar]

durjaraṃ durdharaṃ dṛptaṃ śārdūlasamavikramam |
durnirīkṣyaṃ suragaṇairvaradānena darpitam || 124 ||
[Analyze grammar]

jaghāna sacivaiḥ sārdhaṃ sasainyaṃ rāvaṇaṃ yudhi |
mahābhraghanasaṃkāśaṃ mahākāyaṃ mahābalam || 125 ||
[Analyze grammar]

tamāgaskāriṇaṃ krūraṃ paulastyaṃ puruṣarṣabhaḥ |
sabhrātṛputrasacivaṃ sasainyaṃ krūraniścayam |
rāvaṇaṃ nijaghānāśu rāmo bhūtapatiḥ purā || 126 ||
[Analyze grammar]

madhośca tanayo dṛpto lavaṇo nāma dānavaḥ |
hato madhuvane bhīmo varadatto mahāsuraḥ |
samare yuddhaśauṇḍena tathānye cāpi rākṣasāḥ || 127 ||
[Analyze grammar]

etāni kṛtvā karmāṇi rāmo dharmabhṛtāṃ varaḥ |
daśāśvamedhāñjārūthyānājahāra nirargalān || 128 ||
[Analyze grammar]

nāśrūyantāśubhā vāco nākulaṃ māruto vavau |
na vittaharaṇaṃ cāsīd rāme rājyaṃ praśāsati || 129 ||
[Analyze grammar]

paryadevanna vidhavā nānarthaścābhavattadā |
sarvamāsījjagaddāntaṃ rāme rājyaṃ praśāsati || 130 ||
[Analyze grammar]

na prāṇināṃ bhayaṃ cāsījjalānalavighātajam |
na ca sma vṛddhā bālānāṃ pretakāryāṇi kurvate || 131 ||
[Analyze grammar]

brahma paryaccaratkṣatraṃ viśaḥ kṣatramanuvratāḥ |
śūdrāścaiva hi varṇāṃstrīñchuśrūṣantyanahaṃkṛtāḥ || 132 ||
[Analyze grammar]

nāryo nātyacaranbhartṝnbhāryāṃ nātyacaratpatiḥ |
sarvamāsījjagaddāntaṃ nirdasyurabhavanmahī |
rāma eko'bhavadbhartā rāmaḥ pālayitābhavat || 133 ||
[Analyze grammar]

āsanvarṣasahasrāṇi tathā putrasahasriṇaḥ |
arogāḥ prāṇinaścāsan rāme rājyaṃ praśāsati || 134 ||
[Analyze grammar]

devatānāmṛṣīṇāṃ ca manuṣyāṇāṃ ca sarvaśaḥ |
pṛthivyāṃ sahavāso'bhūd rāme rājyaṃ praśāsati || 135 ||
[Analyze grammar]

rāmo rāmo rāma iti prajānāmabhavatkathāḥ || 135 ||
[Analyze grammar]

rāmārāmaṃ jagadbhūtaṃ rāme rājyaṃ praśāsati || 135 ||
[Analyze grammar]

gāthā apyatra gāyanti ye purāṇavido janāḥ |
rāme nibaddhāstattvārthā māhātmyaṃ tasya dhīmataḥ || 136 ||
[Analyze grammar]

śyāmo yuvā lohitākṣo dīptāsyo mitabhāṣitā |
ājānabāhuḥ sumukhaḥ siṃhaskandho mahābhujaḥ || 137 ||
[Analyze grammar]

daśa varṣasahasrāṇi daśa varṣaśatāni ca |
ayodhyādhipatirbhūtvā rāmo rājyamakārayat || 138 ||
[Analyze grammar]

ṛksāmayajuṣāṃ ghoṣo jyāghoṣaśca mahātmanaḥ |
avyucchinno'bhavad rāṣṭre dīyatāṃ bhujyatāmiti || 139 ||
[Analyze grammar]

sattvavān guṇasaṃpanno dīpyamānaḥ svatejasā |
ati sūryaṃ ca candraṃ ca rāmo dāśarathirbabhau || 140 ||
[Analyze grammar]

īje kratuśataiḥ puṇyaiḥ samāptavaradākṣiṇaiḥ |
hitvāyodhyāṃ divaṃ yāto rāghavo'saumahābalaḥ || 141 ||
[Analyze grammar]

evameṣa mahābāhūrikṣvākukulanandanaḥ |
rāvaṇaṃ sagaṇaṃ hatvā divamācakrame prabhuḥ || 142 ||
[Analyze grammar]

aparaḥ keśavasyāyaṃ prādurbhāvo mahātmanaḥ |
vikhyāto māthure kalpe sarvalokahitāya vai || 143 ||
[Analyze grammar]

yatra sālvaṃ ca kaṃsaṃ ca maindaṃ dvividameva ca |
ariṣṭaṃ vṛṣabhaṃ keśiṃ pūtanāṃ daityadārikām || 144 ||
[Analyze grammar]

nāgaṃ kuvalayāpīḍaṃ cāṇūraṃ muṣṭikaṃ tathā |
daityānmānuṣadehasthān sūdayāmāsa vīryavān || 145 ||
[Analyze grammar]

chinnaṃ bāhusahasraṃ ca bāṇasyādbhutakarmaṇaḥ |
narakaśca hataḥ saṃkhye yavanaśca mahābalaḥ || 146 ||
[Analyze grammar]

hṛtāni ca mahīpānāṃ sarvaratnāni tejasā |
durācārāśca nihatāḥ pārthivā ye mahītale || 147 ||
[Analyze grammar]

navame dvāpare viṣṇuraṣṭāviṃśe purābhavat || 147 ||
[Analyze grammar]

vedavyāsastadā jajñe jātūkarṇyapuraḥsaraḥ || 147 ||
[Analyze grammar]

eko vedaścaturdhā tu kṛtastena mahātmanā || 147 ||
[Analyze grammar]

janito bhārato vaṃśaḥ satyavatyāḥ sutena ca || 147 ||
[Analyze grammar]

ete lokahitārthāya prādurbhāvā mahātmanaḥ |
atītāḥ kathitā rājan kathyante cāpyanāgatāḥ |
kalkī viṣṇuyaśā nāma bhūyaścotpatsyate prabhuḥ || 148 ||
[Analyze grammar]

saṃbhalagrāmako dvijaḥ || 148 ||
[Analyze grammar]

sarvalokahitārthāya || 148 ||
[Analyze grammar]

daśamo bhāvyasaṃpanno yājñavalkyapuraḥsaraḥ || 148 ||
[Analyze grammar]

kṣapayitvā ca tān sarvānbhāvinārthena coditān || 148 ||
[Analyze grammar]

gaṅgāyamunayormadhye niṣṭhāṃ prāpsyati sānugaḥ || 148 ||
[Analyze grammar]

tataḥ kāle vyatīte tu sāmātye sahasainike || 148 ||
[Analyze grammar]

nṛpeṣvatha pranaṣteṣu tadā tvapragrahāḥ prajāḥ || 148 ||
[Analyze grammar]

kṣaṇena nirvṛte caiva hatvā cānyonyamāhave || 148 ||
[Analyze grammar]

parasparahṛtasvāśca nirākrandāḥ suduḥkhitāḥ || 148 ||
[Analyze grammar]

evaṃ kaṣṭamanuprāptāḥ kalisaṃdhyāṃśake tadā || 148 ||
[Analyze grammar]

prajāḥ kṣayaṃ prayāsyanti sārdhaṃ kaliyugena ha || 148 ||
[Analyze grammar]

kṣīṇe kaliyuge tasmiṃstataḥ kṛtayugaṃ punaḥ || 148 ||
[Analyze grammar]

prapatsyate yathānyāyaṃ svabhāvādeva nānyathā || 148 ||
[Analyze grammar]

anukarṣan sa vai senāṃ hastyaśvarathasaṃkulām || 148 ||
[Analyze grammar]

pragṛhītāyudhairviprairvṛtaḥ śatasahasraśaḥ || 148 ||
[Analyze grammar]

niḥśeṣāñchuddharājāṃstāṃstadā sa tu kariṣyati || 148 ||
[Analyze grammar]

pāṣaṇḍānmlecchajātīṃśca dasyūṃścaiva sahasraśaḥ || 148 ||
[Analyze grammar]

nātyarthaṃ dhārmikā ye ca ye ca dharmadviṣaḥ kvacit || 148 ||
[Analyze grammar]

udīcyā madhyadeśasthāḥ pārvatīyāstathaiva ca || 148 ||
[Analyze grammar]

prācyānpratīcyāṃśca tathā vindhyapṛṣṭhaparānugān || 148 ||
[Analyze grammar]

tathaiva dākṣiṇātyāṃśca draviḍān siṃhalaiḥ saha || 148 ||
[Analyze grammar]

gāndhārānpāradāṃścaiva pahlavānyavanāñchakān || 148 ||
[Analyze grammar]

tukhārānbarbarāṃścaiva śvānikāndaradān khaśān || 148 ||
[Analyze grammar]

lambakāṃśca maruṃdhāṃśca kirātāṃścaiva sa prabhuḥ || 148 ||
[Analyze grammar]

pravṛttacakro balavāndasyūnāmantako balī || 148 ||
[Analyze grammar]

adhṛṣyaḥ sarvabhūtānāṃ pṛthivīṃ vicariṣyati || 148 ||
[Analyze grammar]

mānuṣaḥ sa tu saṃjajñe devasyāgrasya dhīmataḥ || 148 ||
[Analyze grammar]

pūrvajanmani viṣṇuḥ sa pramatirnāma vīryavān || 148 ||
[Analyze grammar]

gātreṇa vai candramasaḥ pūrṇe kaliyuge'bhavat || 148 ||
[Analyze grammar]

ityetā vāsudevasya daśa saṃbhūtayaḥ smṛtāḥ || 148 ||
[Analyze grammar]

taṃ taṃ kālaṃ ca kāryaṃ ca taṃ tathoddeśakāriṇam || 148 ||
[Analyze grammar]

aṃśena triṣu lokeṣu tāṃstānyonīnviśatyapi || 148 ||
[Analyze grammar]

pañcaviṃśotthitaḥ kalkī pañcāśaccharadāṃ samāḥ || 148 ||
[Analyze grammar]

vinighnan sarvabhūtāni mānuṣāṃścaiva sarvaśaḥ || 148 ||
[Analyze grammar]

kṛtvā bījāvaśeṣāṃ tu mahīṃ krūreṇa karmaṇā || 148 ||
[Analyze grammar]

saṃyodhayitvā ca khalānprāyastānapyadhārmikān || 148 ||
[Analyze grammar]

tadeṣa vai tadā kalkī caritārthaḥ sasainikaḥ || 148 ||
[Analyze grammar]

prajānāṃ sādhayitvā ca saṃsiddhārthaḥ punaḥ svayam || 148 ||
[Analyze grammar]

vṛthānyonyaṃ prakupitān saṃhariṣyati mohitān || 148 ||
[Analyze grammar]

purāṇi hatvā grāmāṃśca tadā duṣpragrahāḥ prajāḥ || 148 ||
[Analyze grammar]

pranaṣṭaśrutidharmāśca naṣṭavarṇāśramāstathā || 148 ||
[Analyze grammar]

hvasvā alpāyuṣaścaiva bhaviṣyanti kalau yuge || 148 ||
[Analyze grammar]

saritparvatasevinyaḥ patramūlaphalāśanāḥ || 148 ||
[Analyze grammar]

cīrapatrājinadharā gahvaraṃ ghoramāśritāḥ || 148 ||
[Analyze grammar]

alpāyuṣo naṣṭavārtā bahubādhāḥ suduḥkhitāḥ || 148 ||
[Analyze grammar]

ete cānye ca bahavo divyā devaguṇairyutāḥ |
prādurbhāvāḥ purāṇeṣu gīyante brahmavādibhiḥ || 149 ||
[Analyze grammar]

yatra devā vimuhyanti prādurbhāvānukīrtane |
purāṇaṃ vartate yatra vedaśrutisamāhitam || 150 ||
[Analyze grammar]

etaduddeśamātreṇa prādurbhāvānukīrtanam |
kīrtitaṃ kīrtanīyasya sarvalokaguroḥ prabhoḥ || 151 ||
[Analyze grammar]

prīyante pitarastasya prādurbhāvānukīrtanāt |
viṣṇoramitavīryasya yaḥ śṛṇoti kṛtāñjaliḥ || 152 ||
[Analyze grammar]

sarvapāpavinirmukto dhanaputrapaśūṃl labhet || 152 ||
[Analyze grammar]

nāśubhaṃ vidyate tasya putravāndyutimānbhavet || 152 ||
[Analyze grammar]

etāstu yogeśvarayogamāyāḥ śrutvā naro mucyati sarvapāpaiḥ |
ṛddhiṃ samṛddhiṃ vipulāṃśca bhogānprāpnoti śīghraṃ bhagavatprasādāt || 153 ||
[Analyze grammar]