Chapter 30

[English text for this chapter is available]

skaṃda uvāca |
śṛṇvagastyamahābhāga sa ca rājā bhagīrathaḥ |
ārādhya śrīmahādevamuddidhīrṣuḥ pitāmahān || 1 ||
[Analyze grammar]

brahmaśāpa vinirdagdhānsarvānrājarṣisattamaḥ |
mahatā tapasā bhūmimānināya trivartmagām || 2 ||
[Analyze grammar]

trayāṇāmapi lokānāṃ hitāya mahate nṛpaḥ |
samānaiṣīttato gaṃgāṃ yatrāsīnmaṇikarṇikā || 3 ||
[Analyze grammar]

ānaṃdakānanaṃ śaṃbhoścakrapuṣkariṇī hareḥ |
parabrahmaikasukṣetraṃ līlāmokṣasamarpakam || 4 ||
[Analyze grammar]

prāpayāmāsa tāṃ gaṃgāṃ dailīpiḥ purataścaran |
nirvāṇakāśanādyatra kāśīti prathitā purī || 5 ||
[Analyze grammar]

avimuktaṃ mahākṣetraṃ na muktaṃ śaṃbhunā kvacita |
prāgeva hi mune'narghyaṃ jātyaṃ jāṃbūnadaṃ svayam || 6 ||
[Analyze grammar]

punarvāritareṇāpi hīreṇayadi saṃgatam |
cakrapuṣkaraṇītīrthaṃ prāgeva śreyasāṃpadam || 7 ||
[Analyze grammar]

tataḥ śreṣṭhataraṃ śaṃbhormaṇiśravaṇabhūṣaṇāt |
ānaṃdakānane tasminnavimukte śivālaye || 8 ||
[Analyze grammar]

prāgeva muktiḥ saṃsiddhā gaṃgāsaṃgāttatodhikā |
yadā prabhṛti sā gaṃgā maṇikarṇyāṃ samāgatā || 9 ||
[Analyze grammar]

tadāprabhṛti tatkṣetraṃ duṣprāpaṃ tridaśairapi |
kṛtvā karmāṇyanekāni kalyāṇānītarāṇi vā || 10 ||
[Analyze grammar]

tāni kṣaṇātsamutkṣipya kāśīsaṃstho'mṛtobhavet |
tasyāṃ vedāṃtavedyasya nididhyāsanato vinā || 11 ||
[Analyze grammar]

vinā sāṃkhyena yogena kāśyāṃ saṃstho'mṛto bhavet |
karmanirmūlanavatā vinā jñānena kuṃbhaja || 12 ||
[Analyze grammar]

śaśimauliprasādena kāśīsaṃstho'mṛto bhavet |
yatnato'yatnato vāpi kālāttyaktvā kalevaram || 13 ||
[Analyze grammar]

tārakasyopadeśena kāśīsaṃstho'mṛto bhavet |
anekajanmasaṃsiddhairbaddho'pi prākṛtairguṇaiḥ || 14 ||
[Analyze grammar]

asisaṃbheda yogena kāśīsaṃstho'mṛto bhavet |
dehatyāgo'tra vai dānaṃ dehatyāgotra vai tapaḥ || 158 ||
[Analyze grammar]

dehatyāgo'tra vai yogaḥ kāśyāṃ nirvāṇasaukhyakṛt |
prāpyottaravahāṃ kāśyāmatiduṣkṛtavānapi || 16 ||
[Analyze grammar]

yāyātsvaṃ helayā tyaktvā tadviṣṇoḥ paramaṃ padam |
yameṃdrāgnimukhā devā dṛṣṭvā muktipathonmukhān || 17 ||
[Analyze grammar]

sarvānsarve samālokya rakṣāṃ cakruḥ purāpuraḥ |
asiṃ mahāsirūpāṃ ca pāpyasanmatikhaṃḍanīm || 18 ||
[Analyze grammar]

duṣṭapraveśaṃ dhunvānāṃ dhunīṃ devā vinirmamuḥ |
varaṇāṃ ca vyadhustatra kṣetravighnanivāriṇīm || 19 ||
[Analyze grammar]

durvṛttasupravṛtteśca nivṛttikaraṇīṃ surāḥ |
dakṣiṇottaradigbhāge kṛtvā'siṃ varaṇāṃ surāḥ || 20 ||
[Analyze grammar]

kṣetrasya mokṣanikṣepa rakṣāṃ nirvṛtimāpnuyuḥ |
kṣetrasya paścāddigbhāge taṃ dehalivināyakam || 21 ||
[Analyze grammar]

svayaṃ vyāpārayāmāsa rakṣārthaṃ śaśiśekharaḥ |
anujñātapraveśānāṃ viśveśena kṛpāvatā || 22 ||
[Analyze grammar]

te praveśaṃ prayacchaṃti nānyeṣāṃ hi kadācana |
ityarthe kathayiṣye'hamitihāsaṃ purātanam |
āścaryakāriparamaṃ kāśībhaktipravardhanam || 23 ||
[Analyze grammar]

skaṃda uvāca |
dakṣiṇābdhitaṭe kaścitsetubaṃdhasamīpataḥ |
vaṇigdhanaṃjayo nāma mātṛbhaktisamanvitaḥ || 24 ||
[Analyze grammar]

puṇyamārgārjita dhano dhanatoṣitamārgaṇaḥ |
mārgaṇasphāritayaśā yaśodātanayārcakaḥ || 25 ||
[Analyze grammar]

samunnatopi saṃpattyā vinayānatakaṃdharaḥ |
ākaropi guṇānāṃ hi guṇiṣvākāragopakaḥ || 26 ||
[Analyze grammar]

rūpasaṃpadudāropi paradāraparāṅmukhaḥ |
sasaṃpūrṇakalopyāsīnniṣkalaṃkodayaḥ sadā || 27 ||
[Analyze grammar]

sasatyānṛtavṛttiśca prāyaḥ satyapriyo mune |
varṇetaropyabhūlloke suvarṇakṛtavarṇanaḥ || 28 ||
[Analyze grammar]

sadācaraṇagopyeṣa sukhayānacaraḥ kṛtī |
adaridropi medhāvī sobhūtpāpadaridradhīḥ || 29 ||
[Analyze grammar]

tasyaivaṃ vartamānasya kadācitkālaparyayāt |
jananī nidhanaṃ prāptā vyādhitā'tijarāturā || 30 ||
[Analyze grammar]

tayā ca yauvanaṃ prāpya meghacchāyāticaṃcalam |
prāvṛṇnadīpūrasamaṃ svapatiḥ parivaṃcitaḥ || 31 ||
[Analyze grammar]

dina tricaturasthāyi yā nārī prāpya yauvanam |
bhartāraṃ vaṃcayenmohātsā'kṣayaṃ narakaṃ vrajet || 32 ||
[Analyze grammar]

śīlabhaṃgena nārīṇāṃ bhartādharmaparopi hi |
patedduḥkhārjitātsvargācchīlaṃ rakṣyaṃ tataḥ striyā || 33 ||
[Analyze grammar]

viṣṭhāgarte ca niraye svayaṃ patati durmatiḥ |
ābhūtasaṃplavaṃ yāvattataḥ syādgrāmasūkarī || 34 ||
[Analyze grammar]

svaviṣṭhāpāyinī cātha valgulī vṛkṣalaṃbinī |
ulūkī vā divāṃdhā syādvṛkṣakoṭaravāsinī || 35 ||
[Analyze grammar]

rakṣaṇīyaṃ mahāyatnādidaṃ sukṛtabhājanam |
vapuḥ parasya duḥsparśātsukhābhāsātmakātstriyā || 36 ||
[Analyze grammar]

anenaiva śarīreṇa bhartṛsādvihitena hi |
kiṃ satī na ca tastaṃbha bhānumudyaṃtamājñayā || 37 ||
[Analyze grammar]

atripatnyanasūyā kiṃ bhartṛbhaktiprabhāvataḥ |
dadhāra na trayīṃ garbhe pativrata parāyaṇā || 38 ||
[Analyze grammar]

iha kīrtiśca vipulā svargevāsastathā'kṣayaḥ |
pātivratyātstriyā labhyaṃ sakhitvaṃ ca śriyā saha || 39 ||
[Analyze grammar]

sādurvṛttyā parityajya patidharmaṃ sanātanam |
svacchaṃdacāriṇī bhūtvāmṛtānirayamudyayau || 40 ||
[Analyze grammar]

dhanaṃjayopi ca mune kenacicchivayoginā |
sārdhaṃ tapodayāditthaṃ so'bhavaddharmatatparaḥ || 41 ||
[Analyze grammar]

dhanaṃjayopi dharmātmā mātṛbhaktiparāyaṇaḥ |
ādāyāsthīnyatho māturgaṃgā mārgasthito'bhavat || 42 ||
[Analyze grammar]

paṃcagavyena saṃsnāpya tataḥ paṃcāmṛtena vai |
yakṣakardamalepena liptvā puṣpaiḥ prapūjya ca || 43 ||
[Analyze grammar]

āveṣṭya netravastreṇa tataḥ paṭṭāṃbareṇa vai |
tataḥ surasavastreṇa tato māṃjiṣṭhavāsasā || 44 ||
[Analyze grammar]

nepālakaṃbalenātha mṛdācā'tha viśuddhayā |
tāmrasaṃpuṭake kṛtvā māturaṃgānyaho vaṇik || 45 ||
[Analyze grammar]

aspṛṣṭahīnajātiḥ sa śuciṣmānsthaṃḍileśayaḥ |
ānayañjvaritopyāsīnmadhye mārgaṃ dhanaṃjayaḥ || 46 ||
[Analyze grammar]

bhāravāhaḥ kṛtastena kaściddattvocitāṃ bhṛtim |
kiṃ bahūktena ghaṭaja kāśī prāptā'tha tena vai || 47 ||
[Analyze grammar]

dhṛtvā saṃbhṛtirakṣārthaṃ bhāravāhaṃ dhanaṃjayaḥ |
jagāmāpaṇamānetuṃ kiṃcidvastvaśanādikam || 48 ||
[Analyze grammar]

bhāravāhyaṃtaraṃ prāpya tasya saṃbhṛtimadhyataḥ |
tāmrasaṃpuṭamādāya dhanaṃ jñātvā gṛhaṃ yayau || 49 ||
[Analyze grammar]

vāsasthānamathāgatya tamadṛṣṭvā dhanaṃjayaḥ |
tvarāvānsaṃbhṛtiṃ vīkṣya tāmrasaṃpuṭavarjitām || 50 ||
[Analyze grammar]

hāhetyātāḍya hṛdayaṃ cakraṃda bahuśo bhṛśam |
itastatastamālokya gatastadanusārataḥ || 51 ||
[Analyze grammar]

akṛtvā jāhnavīsnānamanavekṣya jagatpatim |
tasya saṃvasathaṃ prāpto bhāravoḍhurdhanaṃjayaḥ || 52 ||
[Analyze grammar]

bhāravāḍapyaraṇyānyāṃ tāmrasaṃpuṭamadhyataḥ |
dṛṣṭvāsthīni viniḥśvasya tāni tyaktvā gṛhaṃ yayau || 53 ||
[Analyze grammar]

vaṇikca tadgṛhaṃ prāpya śuṣkakaṃṭhoṣṭhatālukaḥ |
dṛṣṭvā'tha cailaśakalaṃ tṛṇakuṭyaṃtare tadā || 54 ||
[Analyze grammar]

āśayā kiṃcidāśvasya tatpatnīṃ paripṛṣṭavān |
satyaṃ brūhi na bhetavyaṃ dāsyāmyanyadapi dhruvam || 55 ||
[Analyze grammar]

vasu kva te gato bhartā māturasthīnime'rpaya |
vayaṃ kārpaṭikā bhadre bhavāmo na ca duḥkhadāḥ || 56 ||
[Analyze grammar]

ajñātvā lobhavaśatastena nīto'sthisaṃpuṭaḥ |
tasyaiṣa doṣo no bhadre māturme karma tādṛśam || 57 ||
[Analyze grammar]

athavā na prasū doṣo maṃdabhāgyo'smi tatsutaḥ |
sutenakṛtyaṃ yatkṛtyaṃ tatprāptirnāsti bhilli me || 58 ||
[Analyze grammar]

udyamaṃ kṛtavānasmi na siddhyenmaṃdabhāgyataḥ |
āyātu satyavākyānme mā bibhetu vanecaraḥ || 59 ||
[Analyze grammar]

asthīni darśayatvāśu dhanaṃ dāsye'dhikaṃ tataḥ |
ityuktā tena sā bhillī vyājahāra nijaṃ patim || 60 ||
[Analyze grammar]

lajjānamraśirāḥso'tha vṛttāṃtaṃ vinivedya ca |
nināya tāmaraṇyānīṃ śabarastaṃ dhanaṃjayam || 61 ||
[Analyze grammar]

vanecaro'tha tatsthānaṃ daivādvismṛtavānmune |
digbhrāṃtiṃ samavāpyātha paribabhrāma kānane || 62 ||
[Analyze grammar]

itoraṇyāttato yāti tatoraṇyādito vrajet |
vanādvanāṃtaraṃ bhrāṃtvā khinnaḥ sopi vanecaraḥ || 63 ||
[Analyze grammar]

vihāya madhye'raṇyāni taṃ yayau ca svapakkaṇam |
dvitrāṇyahāni saṃbhramya sa kārpaṭikasattamaḥ || 64 ||
[Analyze grammar]

kṣutkṣāmaḥ śuṣkakaṃṭhoṣṭho hāheti paridevayan |
punaḥ kāśīpurīṃ prāptaḥ parimlānamukho vaṇik || 865 ||
[Analyze grammar]

tanmaṃdabhāgyatāṃ śrutvā lokātkārpaṭiko mune |
kṛtvā gayāṃ prayāgaṃ ca tataḥ svaviṣayaṃ yayau || 66 ||
[Analyze grammar]

kāśyāṃ praveśaṃ prāpyāpi tadasthīni ghaṭodbhava |
vinā vaiśveśvarīmājñāṃ bahiryātāni tatkṣaṇāt || 67 ||
[Analyze grammar]

evaṃ kāśyāṃ praviśyāpi pāpī dharmānuṣaṃgataḥ |
na kṣetraphalamāpnoti bahirbhavati tatkṣaṇāt || 68 ||
[Analyze grammar]

tasmādviśveśvarājñaiva kāśīvāse'tra kāraṇam |
asiśca varaṇā yatra kṣetrarakṣākṛtau kṛte || 69 ||
[Analyze grammar]

vārāṇasīti vikhyātā tadārabhya mahāmune |
aseśca varaṇāyāśca saṃgamaṃ prāpya kāśikā || 70 ||
[Analyze grammar]

vārāṇasīha karuṇāmayadivyamūrtirutsṛjya yatra tu tanuṃ tanubhṛtsukhena |
viśveśadṛṅmahasi yatsahasā praviśya rūpeṇa tāṃ vitanutāṃ padavīṃ dadhāti || 71 ||
[Analyze grammar]

jāto mṛto bahuṣu tīrthavareṣu re tvaṃ jaṃto na jātu tava śāṃtirabhūnnimajya |
vārāṇasī nigadatīha mṛto'mṛtatvaṃ prāpyādhunā mama balātsmaraśāsanaḥ syāḥ || 72 ||
[Analyze grammar]

anyatra tīrtha salile patitodvijanmā devādibhāvamayate na tathā tu kāśyām |
citraṃ yadatra patitaḥ punarutthitiṃ na prāpnoti pulkasajanopi kimagra janmā || 73 ||
[Analyze grammar]

naiṣā purī saṃsṛtirūpapārāvārasya pāraṃ purahā purāriḥ |
yasyāṃ paraṃ pauruṣamarthamicchansiddhiṃ nayetpauraparaṃparāṃsaḥ || 74 ||
[Analyze grammar]

tīrthāṃtarāṇi manujaḥ parito'vagāhya hitvā tanuṃ kaluṣitāṃ divi daivataṃ syāt |
vārāṇasīparisare tu visṛjya dehaṃ saṃdehabhāgbhavati dehadaśāptayepi || 75 ||
[Analyze grammar]

vārāṇasī samarasīkaraṇādṛtepi yogādayogijanatāṃ janatāpahaṃtrī |
tattārakaṃ śravaṇagocaratāṃ nayaṃtī tadbahmadarśayati yena punarbhavo na || 76 ||
[Analyze grammar]

vārāṇasī parisare tanumiṣṭadātrīṃ dharmārthakāmanilayāmahahāvisṛjya |
iṣṭaṃ padaṃ kimapi hṛṣṭatarobhilaṣya lābhostumūlamapi no yadavāpa śūnyam || 77 ||
[Analyze grammar]

āḥkāśivāsijanatā nanu vaṃcitābhūdbhāle vilocanavatāvanitārdhabhājā |
ādāya yatsandhyakṛtabhājanamiṣṭadehaṃ nirvāṇamātramapavarjayatāpunarbhu || 78 ||
[Analyze grammar]

vārāṇasī sphuradasīmaguṇaikabhūmiryatra sthitāstanubhṛtaḥśaśibhṛtprabhāvāt |
sarve gale garalino'kṣiyujo lalāṭe vāmārdhavāmatanavo'tanavastatoṃ'te || 79 ||
[Analyze grammar]

ānaṃdakānanamidaṃ sukhadaṃ puraiva tattrāpi cakrasarasī maṇikarṇikā'tha |
svaḥ siṃdhusaṃgatiratho paramāspadaṃ ca viśveśituḥ kimiha tanna vimuktaye yat || 80 ||
[Analyze grammar]

vārāṇasīha varaṇāsi saridvariṣṭhā saṃbhedakhedajananī dyunadī lasacchrīḥ |
viśrāmabhūmiracalā'malamokṣalakṣmyāhaināṃ vihāya kimusīdati mūḍhajaṃtuḥ || 81 ||
[Analyze grammar]

kiṃ vismṛtaṃ tvahahagarbhajamāmanasyaṃ kārtāṃtadūtakṛtabaṃdhana tāḍanaṃ ca |
śaṃbhoranugraha parigraha labhya kāśīṃ mūḍho vihāya kimu yāti karastha muktim || 82 ||
[Analyze grammar]

tīrthāṃtarāṇi kaluṣāṇi harati sadyaḥ śreyo dadatyapi bahu tridivaṃ nayaṃti |
pānāvagāhanavidhānatanuprahāṇairvārāṇasī tu kurute bata mūlanāśam || 83 ||
[Analyze grammar]

kāśīpurī parisare maṇikarṇikāyāṃ tyaktvā tanuṃ tanubhṛtastanumāpnuvaṃti |
bhāle vilocanavatīṃ galanīlalakṣmīṃ vāmārdhabaṃdhuravadhūṃ vidhurāvarodhāḥ || 84 ||
[Analyze grammar]

jñātvā prabhāvamatulaṃ maṇikarṇikāyāṃ yaḥ pudgalaṃ tyajati cāśucipūyagaṃdhi |
svātmāvabodhamahasā sahasā militvā kalpāṃtareṣvapi sa naiva pṛthaktvameti || 85 ||
[Analyze grammar]

rāgādidoṣaparipūra mano hṛṣīkāḥ kāśīpurīmatuladivyamahāprabhāvām |
ye kalpayaṃtyaparatīrthasamāṃ samaṃtātte pāpino na saha taiḥ paribhāṣaṇīyam || 86 ||
[Analyze grammar]

vārāṇasīṃ smaraharapriyarājadhānīṃ tyaktvā kuto vrajasi mūḍha digaṃtareṣu |
prāpyāpyajādyasulabhāṃsthiramokṣalakṣmīṃ lakṣmīṃ svabhāvacapalāṃ kimu kāmayethāḥ || 87 ||
[Analyze grammar]

vidyā dhanāni sadanāni gajāśvabhṛtyāḥ srakcaṃdanāni vanitāśca nitāṃta ramyāḥ |
svargopyagamya iha nodyamabhājipuṃsi vārāṇasītvasulabhā śalabhādimuktiḥ |
dhātrā dhṛtāni tulayā tulanāmavaituṃ vaikuṃṭhamukhyabhuvanāni ca kāśikā ca |
tānyudyayurlaghutayānyagiyaṃ gurutvāttasthau purīha puruṣārthacatuṣṭayasya || 89 ||
[Analyze grammar]

kāśī purīmadhivasandrinaronaropihmāropyamāṇaihamānyahavaikarudraḥ |
nānopasargajanisargajaduḥkhabhāraiḥkarmāpanudyasaviśetparameśadhāmni || 90 ||
[Analyze grammar]

sthirāpāyaṃ kāyaṃ jananamaraṇakleśanilayaṃ vihāyāsyāṃ kāśyāmahahaparigṛhṇīta na kutaḥ |
vapustejorūpaṃ sthirataraparānaṃdasadanaṃ vimūḍho'sau jaṃtuḥ sphuṭitamivakāṃmyaṃ vinimayan || 91 ||
[Analyze grammar]

aho lokaḥ śokaṃ kimiha sahate haṃtahatadhīrvipadbhāraiḥ sārairniyatanidhanairdhvasita dhanaiḥ |
kṣitau satyāṃ kāśyāṃ kathayati śivo yatra nidhane śrutau kiṃcidbhūyaḥ praviśati na yenodaradarīm || 92 ||
[Analyze grammar]

kāśivāsinijane vanecaredvitribhujyapi samīrabhojane |
svairacāriṇi jiteṃdriyepyaho kāśivāsini jane viśiṣṭatā || 93 ||
[Analyze grammar]

nāstīha duṣkṛtakṛtāṃ sukṛtātmanāṃ vā kācidviśeṣagatiraṃtakṛtāṃ hi kāśyām |
bījāni karmajanitāni yadūṣarāyāṃ nāṃkūraṃyati haradṛgjvalitāniteṣām || 94 ||
[Analyze grammar]

śaśakā maśakā bakāḥ śukāḥ kalaviṃkāśca vṛkāḥ sajaṃbukāḥ |
turagoraga vānarānarā girije kāśimṛtāḥ parāmṛtam || 95 ||
[Analyze grammar]

arudrarudrākṣaphaṇīṃdrabhūṣaṇāstripuṃḍracaṃdrārdhadharādharāgatāḥ |
niraṃtaraṃ kāśinivāsinojanā girīṃdraje pāriṣadā matā mama || 96 ||
[Analyze grammar]

yāvaṃta eva nivasaṃti ca jaṃtavo'tra kāśyāṃ jalasthalacarā jhaṣajaṃbukādyāḥ |
tāvaṃta eva madanugraha rudradehā dehāvasānamadhigamya mayi praviṣṭāḥ || 97 ||
[Analyze grammar]

ye tu varṣeṣavorudrā divi devi prakīrtitāḥ |
vāteṣavoṃ'tarikṣe ye ye bhuvyanneṣavaḥ priye || 98 ||
[Analyze grammar]

rudrā daśa daśa prācyavācī pratyagudaksthitāḥ |
ūrdhvadiksthāśca ye rudrāḥ paṭhyaṃte vedavādibhiḥ || 99 ||
[Analyze grammar]

asaṃkhyātāḥ sahasrāṇi ye rudrā adhibhūtale |
tatsarvebhyo'dhikā kāśyāṃ jaṃtavo rudrarūpiṇaḥ || 100 ||
[Analyze grammar]

rudrāvāsastataḥ proktamavimuktaṃ ghaṭodbhava |
tasmātsamarcya kāśisthānvarṇānvarṇetarāśramān || 1 ||
[Analyze grammar]

śraddhayeśvarabuddhyā ca rudrārcā phalabhāṅnaraḥ || 2 ||
[Analyze grammar]

śma śabdena śavaḥ proktaḥ śānaṃ śayanamucyate |
nirvacaṃti śmaśānārthaṃ mune śabdārthakovidāḥ || 3 ||
[Analyze grammar]

mahāṃtyapi ca bhūtāni pralaye samupasthite |
śerate'tra śavā bhūtvā śmaśānaṃ tu tato mahat || 4 ||
[Analyze grammar]

apsu bhūriha laye layaṃ vrajedāpa aurvavadanograkaṃdare |
mātariśvani mahātanūnapādvyomni saṃkṣayati vai sadāgatiḥ || 5 ||
[Analyze grammar]

vyoma cāpi layametyahaṃkṛtau sāpi ṣoḍaśavikārasaṃyutā |
līyate mahati buddhisaṃjñakehā mahānprakṛtimadhyago bhavet || 6 ||
[Analyze grammar]

sā guṇatrayamayī ca nirguṇaṃ taṃ pumāṃsamavaguhya tiṣṭhati |
paṃcaviṃśatitamaḥ paraḥ pumāndehagehapatireṣa jīvakaḥ || 7 ||
[Analyze grammar]

prākṛtaḥ pralaya eṣa ucyate haṃsayāna hari rudravarjitaḥ |
kālamūrtiratha taṃ ca pūruṣaṃ helayā kalayatīśvaraḥ paraḥ || 8 ||
[Analyze grammar]

sa vai mahāviṣṇuritīryate budhaistaṃ vai mahādevamudāharaṃti |
soṃ'tādimadhyaiḥ parivarjitaḥ śivaḥ sa śrīpatiḥ sopi hi pārvatīpatiḥ || 9 ||
[Analyze grammar]

dainaṃdine'tha pralaye triśūlakoṭau samutkṣipya purīṃ haraḥ svām |
bibharti saṃvarta mahāsthibhūṣaṇastato hi kāśī kalikālavarjitā || 110 ||
[Analyze grammar]

skaṃda uvāca |
vārāṇasīti kāśīti rudrāvāsa iti dvija |
mahāśmaśānamityevaṃ proktamānaṃdakānanam || 11 ||
[Analyze grammar]

iti devīpuraḥ proktaṃ devadevena śaṃbhunā |
yathāviṣṇoḥ purākhyātaṃ tathaiva ca mayā śrutam |
tacca tvadagre kathitaṃ rahasyaṃ kāśijaṃ mahat || 12 ||
[Analyze grammar]

japtvādhyāyamimaṃ puṇyaṃ mahāpātakanāśanam |
śrāvayitvā dvijānsamyakchivaloke mahīyate || 13 ||
[Analyze grammar]

ataḥ paraṃ kalaśaja kiṃ śuśrūṣasi tadvada |
kāśīkathā kathyamānā mamāpi paritoṣakṛt || 114 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe vārāṇasīmahimavarṇanaṃ nāma triṃśattamo'dhyāyaḥ || 30 ||
[Analyze grammar]