Chapter 31

[English text for this chapter is available]

bhīṣma uvāca |
bhagavanmahadāścaryaṃ bāṣkalerbaṃdhanaṃ hi yat |
kṛtaṃ trivikramaṃ rūpaṃ yadā saṃyamito bali || 1 ||
[Analyze grammar]

etanmayā śrutaṃ pūrvaṃ kathyamānaṃ dvijottamaiḥ |
pātāle vasatedyāpi vairocanasuto bali || 2 ||
[Analyze grammar]

nāgatīrthaṃ yathābhūtaṃ piśācānāṃ tu saṃbhavam |
śivadūtī kathaṃ cātra keneyaṃ maṃgalīkṛtā || 3 ||
[Analyze grammar]

aṃtarikṣe puṣkaraṃ tu kena nītaṃ mahāmune |
etadācakṣva me sarvaṃ yathā bāṣkalibaṃdhanam || 4 ||
[Analyze grammar]

bhūmiprakramaṇaṃ pūrvaṃ kṛtaṃ devena viṣṇunā |
dvitīye kāraṇaṃ kiṃ ca yena devaścakāra ha || 5 ||
[Analyze grammar]

tattvatastvaṃ hi tatsarvaṃ yathābhūtaṃ tathā vada |
pāpakṣayakaraṃ hyetacchrotavyaṃ bhūtimicchatā || 6 ||
[Analyze grammar]

pulastya uvāca |
praśnabhārastvayā rājankautukādeva kīrtitaḥ |
kathayāmi hi tatsarvaṃ yathābhūtaṃ nṛpottama || 7 ||
[Analyze grammar]

viṣṇoḥ padānuṣaṃgeṇa baṃdhanaṃ bāṣkaleriha |
śrutaṃ tadbhavatā sarvaṃ mayā te parikīrtitaṃ || 8 ||
[Analyze grammar]

bhūyopi viṣṇunā bhīṣma prāpte vaivasvateṃtare |
trailokyaṃ balinākrāṃtaṃ viṣṇunā prabhaviṣṇunā || 9 ||
[Analyze grammar]

gatvā tvekākinā yajñe tathā saṃyamito bali |
bhūyopi devadevena bhūmeḥ prakramaṇaṃ kṛtam || 10 ||
[Analyze grammar]

prādurbhāvo vāmanasya tathābhūto narādhipa |
punastrivikramo bhūtvā vāmano bhūdavāmanaḥ || 11 ||
[Analyze grammar]

utpattireṣā te sarvā kathitā kurunaṃdana |
nāgānāṃ tu yathā tīrthaṃ tacchṛṇuṣva mahāvrata || 12 ||
[Analyze grammar]

anaṃto vāsukiścaiva takṣakaśca mahābalaḥ |
karkoṭakaśca nāgeṃdraḥ padmaścānyaḥ sarīsṛpaḥ || 13 ||
[Analyze grammar]

mahāpadmastathā śaṃkhaḥ kulikaścāparājitaḥ |
ete kaśyapadāyādā etairāpūritaṃ jagat || 14 ||
[Analyze grammar]

eteṣāṃ tu prasūtyā tu idamāpūritaṃ jagat |
kuṭilābhīmakarmāṇastīkṣṇāsyāśca viṣolbaṇāḥ || 15 ||
[Analyze grammar]

daṣṭvā maṃdāṃścamanujānkuryurbhasmakṣaṇāttu te |
taddarśanādbhavennāśo manuṣyāṇāṃ narādhipa || 16 ||
[Analyze grammar]

ahanyahani jāyeta kṣayaḥ paramadāruṇaḥ |
ātmanastu kṣayaṃ dṛṣṭvā prajāssarvāssamaṃtataḥ || 17 ||
[Analyze grammar]

jagmuḥ śaraṇyaṃ śaraṇaṃ brahmāṇaṃ parameśvaraṃ |
imamevārthamuddiśya prajāḥ sarvā mahīpate || 18 ||
[Analyze grammar]

ūcuḥ kamalajaṃ dṛṣṭvā purāṇaṃ brahmasaṃjñakam |
prajā ūcuḥ |
devadeveśa lokānāṃ prasūte parameśvara || 19 ||
[Analyze grammar]

trāhi nastīkṣṇadaṃṣṭrāṇāṃ bhujagānāṃ mahātmanām |
dinedine bhayaṃ deva paśyāmaḥ kṛpaṇā bhṛśam || 20 ||
[Analyze grammar]

manuṣyapaśupakṣyādi tatsarvaṃ bhasmasādbhavet |
tvayā sṛṣṭiḥ kṛtā deva kṣīyate tu bhujaṃgamaiḥ || 21 ||
[Analyze grammar]

etajjñātvā yaducitaṃ tatkuruṣva pitāmaha |
brahmovāca |
ahaṃ rakṣāṃ vidhāsyāmi bhavatīnāṃ na saṃśayaḥ || 22 ||
[Analyze grammar]

vrajadhvaṃ svaniketāni nīrujo gatasādhvasāḥ |
evamukte prajāḥ sarvā brahmaṇā'vyaktamūrtinā || 23 ||
[Analyze grammar]

ājagmuḥ paramaprītāḥ stutvā caiva svayaṃbhuvam |
prayātāsu prajāsvevaṃ tānāhūya bhujaṃgamān || 24 ||
[Analyze grammar]

śaśāpa paramakruddho vāsukipramukhāṃstadā |
brahmovāca |
ahanyahani bhūtāni bhakṣyaṃte vai durātmabhiḥ || 25 ||
[Analyze grammar]

naśyaṃti tūragairdaṣṭā manuṣyāḥ paśavastathā |
yasmānmatprabhavānnityaṃ kṣayaṃ nayatha mānuṣān || 26 ||
[Analyze grammar]

atonyasminbhave bhūyānmamakopātsudāruṇāt |
bhavatāṃ hi kṣayo ghoro bhāvi vaivasvateṃtare || 27 ||
[Analyze grammar]

tathānyaḥ somavaṃśīyo rājā vai janamejayaḥ |
dhakṣyate sarpasatreṇa pradīpte havyavāhane || 28 ||
[Analyze grammar]

mātṛṣvasuśca tanayāṃstārkṣyo vo bhakṣayiṣyati |
evaṃ vo bhavitā nāśaḥ sarveṣāṃ duṣṭacetasām || 29 ||
[Analyze grammar]

śaptvā kulasahasraṃ tu yāvadekaṃ kulaṃ sthitam |
evamukte tu vepaṃto brahmaṇā bhujagottamāḥ || 30 ||
[Analyze grammar]

nipatya pādayostasya idamūcurvacastadā |
bhagavankuṭilā jātirasmākaṃ bhūtabhāvana || 31 ||
[Analyze grammar]

viṣolbaṇatvaṃ krūratvaṃ daṃdaśūkatvameva ca |
saṃpāditaṃ tvayā deva idānīṃ śapase kathaṃ || 32 ||
[Analyze grammar]

brahmovāca |
yadi nāma mayā sṛṣṭā bhavaṃtaḥ kuṭilāśayāḥ |
tataḥ kiṃ bahunā nityaṃ bhakṣayadhvaṃ gatavyathāḥ || 33 ||
[Analyze grammar]

nāgā ūcuḥ |
maryādāṃ kuru deveśa sthānaṃ caiva pṛthakpṛthak |
manuṣyāṇāṃ tathāsmākaṃ samayaṃ deva kāraya || 34 ||
[Analyze grammar]

śāpo yo bhavatā datto manuṣyo janamejayaḥ |
nāśaṃ naḥ sarpasatreṇa ulbaṇaṃ ca kariṣyati || 35 ||
[Analyze grammar]

brahmovāca |
jaratkāruriti khyāto bhavitā brahmavittamaḥ |
jaratkanyā tasya deyā tasyāmutpatsyate sutaḥ || 36 ||
[Analyze grammar]

rakṣāṃ kartā sa vo vipro bhavatāṃ kulapāvanaḥ |
tathā karomi nāgānāṃ samayaṃ manujaiḥ saha || 37 ||
[Analyze grammar]

tadekamanasaḥ sarve śṛṇudhvaṃ mama śāsanam |
sutalaṃ vitalaṃ caiva tṛtīyaṃ ca talātalam || 38 ||
[Analyze grammar]

dattaṃ ca triprakāraṃ vo gṛhaṃ tatra gamiṣyatha |
tatra bhogānbahuvidhānbhuṃjānā mama śāsanāt || 39 ||
[Analyze grammar]

tiṣṭhadhvaṃ saptamaṃ yāvatkālaṃ taṃ tu punaḥpunaḥ |
tato vaivasvatasyādau kāśyapeyo bhaviṣyati || 40 ||
[Analyze grammar]

dāyādaḥ sarvadevānāṃ suparṇassarpabhakṣakaḥ |
tadā prasūtiḥ sarpāṇāṃ dagdhā vai citrabhānunā || 41 ||
[Analyze grammar]

bhavatāṃ caiva sarveṣāṃ bhaviṣyati na saṃśayaḥ |
ye ye krūrā bhogino durvinītāsteṣāmaṃto bhāvitā nānyathaitat || 42 ||
[Analyze grammar]

kālavyāptaṃ bhakṣayadhvaṃ ca satvaṃ tathāpakāre cakṛte manuṣyam |
maṃtrauṣadhairgāruḍaiścaiva taṃtrairbaṃdhairjuṣṭā mānavā ye bhavaṃti || 43 ||
[Analyze grammar]

tebhyo bhītairvartitavyaṃ na cānyaccitte kāryaṃ cānyathā vo vināśaḥ |
itīrite brahmaṇā vai bhujaṃgā jagmuḥ sthānaṃ sutalākhyaṃ hi sarve || 44 ||
[Analyze grammar]

tasthurbhogānbhuṃjamānāśca sarve rasātale līlayā saṃsthitāste |
evaṃ śāpaṃ tute labdhvāprasādaṃ ca caturmukhāt || 45 ||
[Analyze grammar]

tasthuḥ pātālanilaye muditenāṃtarātmanā |
tataḥ kālāṃta rebhūte punarevaṃ vyaciṃtayan || 46 ||
[Analyze grammar]

bhavitā bharato rājā pāṃḍaveyo mahāyaśāḥ |
asmākaṃ tu kṣayakaro daivayogena kenacit || 47 ||
[Analyze grammar]

kathaṃ tribhuvane nāthaḥ sarveṣāṃ ca pitāmahaḥ |
sṛṣṭikartā jagadvaṃdyaḥ śāpamasmāsu dattavān || 48 ||
[Analyze grammar]

devaṃ viraṃcinaṃ tyaktvā gatiranyā na vidyate |
vairāje bhavanaśreṣṭhe tatra devaḥ sa tiṣṭhati || 49 ||
[Analyze grammar]

sa devaḥ puṣkarastho vai yajñaṃ yajati sāṃpratam |
gatvā prasādayāmastaṃ varaṃ tuṣṭaḥ pradāsyati || 50 ||
[Analyze grammar]

evaṃ viciṃtya te sarve nāgā gatvā ca puṣkaram |
yajñaparvatamāsādya śailabhittimupāśritāḥ || 51 ||
[Analyze grammar]

dṛṣṭvā nāgāṃstathā śrāntānvāridhārāśca śītalāḥ |
udaṅmukhā vai niṣkrāṃtāssarveṣāṃ tu sukhapradāḥ || 52 ||
[Analyze grammar]

nāgatīrthaṃ tato jātaṃ pṛthivyāṃ bharatarṣabha |
nāgakuṃḍaṃ ca vai kecitsaritaṃ cāpare'bruvan || 53 ||
[Analyze grammar]

puṇyaṃ tatsarvatīrthānāṃ sarpāṇāṃ viṣanāśanam |
majjanti tatra ye martyā adhiśrāvaṇa paṃcami || 54 ||
[Analyze grammar]

na teṣāṃ tu kule sarpāḥ pīḍāṃ kurvanti karhicit |
śrāddhaṃ pitṝṇāṃ ye tatra kariṣyaṃti narā bhuvi || 55 ||
[Analyze grammar]

brahmā teṣāṃ paraṃ sthānaṃ dāsyate nātra saṃśayaḥ |
nāgānāṃ tu bhayaṃ jñātvā brahmā lokapitāmahaḥ || 56 ||
[Analyze grammar]

pūrvoktaṃ tu punarvākyaṃ nāgānaśrāvayattadā |
paṃcamī sā tithirdhanyā sarvapāpaharā śubhā || 57 ||
[Analyze grammar]

yato'syāmeva sutithau nāgānāṃ kāryamuddhṛtam |
etasyāṃ sarvato yastu kaṭvamlaṃ parivarjayet || 58 ||
[Analyze grammar]

kṣīreṇa snāpayennāgāṃstasya te yāṃti mitratām |
bhīṣma uvāca |
śivadūtī yathā jātā yena caiva niveśitā || 59 ||
[Analyze grammar]

tanme sarvaṃ yathātattvaṃ bhavānśaṃsiturmahati |
pulastya uvāca |
śivā nīlagiriṃ prāptā tapase dhṛtamānasā || 60 ||
[Analyze grammar]

raudrī jaṭodbhavā śaktistasyāḥ śṛṇu nṛpa vratam |
tapaḥ kṛtvā ciraṃ kālaṃ grasiṣyāmyakhilaṃ jagat || 61 ||
[Analyze grammar]

evamuddiśya paṃcāgniṃ sādhayāmāsa bhāminī |
tasyāḥ kālāṃtare devyāstapaṃtyāstapa uttamam || 62 ||
[Analyze grammar]

rururnāmamahātejā brahmadattavaro'suraḥ |
samudramadhye ratnākhyaṃ puramasti mahādhanam || 63 ||
[Analyze grammar]

tatrātiṣṭhatsa daityeṃdrassarvadevabhayaṃkaraḥ |
aneka śatasāhasra koṭikoṭiśatottamaiḥ || 64 ||
[Analyze grammar]

asurairarcitaḥ śrīmāndvitīyo namuciryathā |
kālena mahatā so'tha lokapālapuraṃ yayau || 65 ||
[Analyze grammar]

jigīṣuḥ sainyasaṃvīto devairvairamarocayat |
uttiṣṭhatastasya mahāsurasya samudratoyaṃ vavṛdheti vegāt || 66 ||
[Analyze grammar]

aneka nāga graha mīnajuṣṭamāplāvayatparvatasānudeśān |
aṃtaḥsthitānekasurārisaṃghaṃ vicitravarmāyudhacitraśobham || 67 ||
[Analyze grammar]

bhīmaṃ balaṃ calitaṃ cāruyodhaṃ viniryayau siṃdhujalādviśālam |
tatra dvipā daityabhaṭhābhyupetāḥ sayānaghaṃṭāśca samṛddhiyuktāḥ || 68 ||
[Analyze grammar]

viniryayuḥ svākṛtibhirjhaṣāṇāṃ samatvamuccaiḥ khalu darśayaṃtaḥ |
aśvāstathā kāṃcanasūtranaddhā rohītamatsyā iva te jalāṃte || 69 ||
[Analyze grammar]

vyavasthitāstaiḥ samameva tūrṇaṃ viniryayurlakṣaśaḥ koṭiśaśca |
tathā ravisyaṃdanatulyavegāḥ sacakradaṃḍākṣataveṇuyuktāḥ || 70 ||
[Analyze grammar]

rathāśca yaṃtroparipīḍitāṃgāścalatpatākāḥ svanitaṃ vicakruḥ |
tathaiva yodhāḥ sthagitāstarībhistitīrṣavaste pravarāstrapāṇayaḥ || 71 ||
[Analyze grammar]

raṇeraṇe labdhajayāḥ prahāriṇo virejuruccairasurānugā bhṛśaṃ |
deveṣu vai raṇe teṣu vidruteṣu viśeṣataḥ || 72 ||
[Analyze grammar]

asurāssarvadevānāmanvadhāvaṃstatastataḥ |
tato devagaṇāḥ sarve dravaṃto bhayavihvalāḥ || 73 ||
[Analyze grammar]

nīlaṃ girivaraṃ jagmuryatra devī svayaṃ sthitā |
raudrī taponvitā dhanyā śāṃbhavī śaktiruttamā || 74 ||
[Analyze grammar]

saṃhārakāriṇī devī kālarātrīti yāṃ viduḥ |
sā tu dṛṣṭvā tadā devānbhayatrastānvicetasaḥ || 75 ||
[Analyze grammar]

papraccha vismayāddevī protphullāṃbujalocanā |
pṛṣṭhato vo na paśyāmi bhayaṃ kiṃcidupāgatam || 76 ||
[Analyze grammar]

kathaṃ tu vidrutā devāḥ sarve śakrapuraḥsarāḥ |
devā ūcuḥ |
ayamāyāti daityeṃdro rururbhīmaparākramaḥ || 77 ||
[Analyze grammar]

caturaṃgeṇa sainyena mahatā parivāritaḥ |
tasmāddīnā vayaṃ devīṃ bhavatīṃ śaraṇaṃ gatāḥ || 78 ||
[Analyze grammar]

devānāmiti vai śrutvā vākyamuccairjahāsa sā |
tasyāṃ hasaṃtyāṃ niścerurvarāṃgyo vadanāttataḥ || 79 ||
[Analyze grammar]

pāśāṃkuśadharāḥ sarvāḥ pīnonnatapayodharāḥ |
sarvāśśūladharā bhīmāḥ sarvā daṃṣṭrāṅkuśānanāḥ || 80 ||
[Analyze grammar]

ābaddhamakuṭāḥ sarvāḥ saṃdaṣṭadaśanacchadāḥ |
phūtkārarāvairaśivaistrāsayaṃtyaścarācaram || 81 ||
[Analyze grammar]

kāścicchuklāmbaradharāḥ kāściccitrāmbarāstathā |
sunīlavasanāḥ kāścidraktapānātilālasāḥ || 82 ||
[Analyze grammar]

nānārūpairmukhaistāstu nānāveṣavapurdharāḥ |
tābhirevaṃ vṛtā devī devānāmabhayaṃkarī || 83 ||
[Analyze grammar]

mā bhaiṣṭa devā bhadraṃ vo yāvadvadati dānavaḥ |
caturaṃgabalopeto rurustāvatsamāgataḥ || 84 ||
[Analyze grammar]

taṃ nīlaparvatavaraṃ devānāṃ mārgamārgaṇaḥ |
devānāmagrataḥ sainyaṃ dṛṣṭvā devī samākulam || 85 ||
[Analyze grammar]

tiṣṭhatiṣṭheti jalpaṃto daityāste samupāgatāḥ |
tataḥ pravavṛte yuddhaṃ tāsāṃ teṣāṃ mahābhayam || 86 ||
[Analyze grammar]

nārācairbhinnadehānāṃ daityānāṃ bhuvi sarpatāṃ |
roṣāddaṃḍaprabhagnānāṃ sarpāṇāmiva sarpatām || 87 ||
[Analyze grammar]

śaktinirbhinnahṛdayā gadāsaṃcūrṇitorasaḥ |
kuṭhārairbhinnaśiraso musalairbhinnamastakāḥ || 88 ||
[Analyze grammar]

viddhodarāstriśūlāgraiśchinnagrīvā varāsibhiḥ |
kṣatāśvarathamātaṃgapādātāḥ peturāhave || 89 ||
[Analyze grammar]

raṇabhūmiṃ samāsādya daityāḥ sarve ruruṃ vinā |
tato balaṃ hataṃ dṛṣṭvā rururmāyāṃ tadādade || 90 ||
[Analyze grammar]

tayā saṃmohitā devyo devāścāpi raṇājire |
tāmasyā māyayā devyā sarvamandhaṃtamobhavat || 91 ||
[Analyze grammar]

tato devī mahāśakyā taṃ daityaṃ samatāḍayat |
tayā tu tāḍitasyājau daityasya pragataṃ tamaḥ || 92 ||
[Analyze grammar]

māyāyāmatha naṣṭāyāṃ tāmasyāṃ dānavo ruruḥ |
pātālamāviśattūrṇaṃ tatrāpi parameśvarī || 93 ||
[Analyze grammar]

devībhiḥ sahitā kruddhā puratobhimukhī sthitā |
rurostu dānaveṃdrasya bhītasyāgre gatasya ca || 94 ||
[Analyze grammar]

nakhāgreṇa śiraśchitvā carma cādāya vegitā |
niṣpapātātha pātālātpuṣkaraṃ ca punargirim || 95 ||
[Analyze grammar]

kanyā sainyena mahatā bahurūpeṇa bhāsvatā |
devaistuvismitairdṛṣṭā carmamuṃḍadharā ruroḥ || 96 ||
[Analyze grammar]

svakīye tapasaḥ sthāne niviṣṭā parameśvarī |
tato devyo mahābhāgāḥ parivārya vyavasthitāḥ || 97 ||
[Analyze grammar]

yācayāmāsuravyagrāstāṃ tu devīṃ bubhukṣitāḥ |
bubhukṣitā vayaṃ devi dehi no bhojanaṃ varam || 98 ||
[Analyze grammar]

evamuktvā tato devī dadhyau tāsāṃ tu bhojanam |
nādhyagacchattadā tāsāṃ bhojanaṃ cintitammahat || 99 ||
[Analyze grammar]

tadā dadhyau mahādevaṃ rudraṃ paśupatiṃ vibhum |
sopi dhyānātsamuttasthau paramātmā trilocanaḥ || 100 ||
[Analyze grammar]

uvāca rudrastāṃ devīṃ kiṃ te kāryaṃ vivakṣitam |
brūhi devi mahāmāye yatte manasi vartate || 101 ||
[Analyze grammar]

śivadūtyuvāca |
chāgamadhye tu vai deva chāgarūpeṇa vartase |
etāstvāṃ bhakṣayiṣyanti bhakṣyamīpsitamādarāt || 102 ||
[Analyze grammar]

bhakṣārthamāsāṃ deveśa kiṃciddātumihārhasi |
śūlīkurvaṃti māmetā bhakṣārthinyo mahābalāḥ || 103 ||
[Analyze grammar]

anyathā māmapi balādbhakṣayeyurbubhukṣitāḥ |
evaṃ māṃ tu samālakṣya bhakṣyaṃ kalpaya satvaram || 104 ||
[Analyze grammar]

rudra uvāca |
śivadūti bravīmyekaṃ pravṛttaṃ yadyugāṃtare |
gaṃgādvāre dakṣayajño gaṇairvidhvaṃsito mama || 105 ||
[Analyze grammar]

tatra yajño mṛgo bhūtvā pradudrāva suvegavān |
mayā bāṇena nirviddho rudhireṇa prasecitaḥ || 106 ||
[Analyze grammar]

ajagaṃdhastadā bhūto nāma devaistu me kṛtam |
ajagaṃdhastvameveti dāsye cānyattu bhojanam || 107 ||
[Analyze grammar]

etāsāṃ śṛṇu me devi bhakṣyamekaṃ mayocitam |
kathyamānaṃ varārohe kālarātri mahāprabhe || 108 ||
[Analyze grammar]

yā strī sagarbhā deveśi anyastrīparidhānakam |
paridhatte spṛśedvāpi puruṣasya viśeṣataḥ || 109 ||
[Analyze grammar]

sabhāgostu varārohe kāsāṃcitpṛthivītale |
apyekavarṣaṃ bālaṃ tu gṛhītvā tatra vai balāt || 110 ||
[Analyze grammar]

bhuktvā tiṣṭhaṃtu suprītā api varṣaśatānbahūn |
anyāḥ sūtigṛhe cchidraṃ gṛhṇīyustu hyapūjitāḥ || 111 ||
[Analyze grammar]

nivasiṣyaṃti deveśi tathā vai jātahārikāḥ |
gṛhe kṣetre taṭāke ca vāpyudyāneṣu caiva hi || 112 ||
[Analyze grammar]

atyeṣu ca rudaṃtyo yā striyastiṣṭhaṃti nityaśaḥ |
tāsāṃ śarīragāścānyāḥ kāścittṛptimavāpnuyuḥ || 113 ||
[Analyze grammar]

śivadūtya uvāca |
kutsitaṃ bhavatā dattaṃ prajānāṃ paripīḍanam |
na ca tvaṃ budhyase dātuṃ śaṃkararasya viśeṣataḥ || 114 ||
[Analyze grammar]

trapākaraṃ yadbhavati prajānāṃ paripīḍakam |
na tu tadyujyate dātuṃ tāsāṃ bhakṣyaṃ tu śaṃkara || 115 ||
[Analyze grammar]

rudra uvāca |
avaṃtyāṃ tu yadā skaṃdo mayā pūrvaṃ tu bhadritaḥ |
cūḍākarmaṇi vṛtte tu kumārasya tadā śubhe || 116 ||
[Analyze grammar]

āgatya mātaro bhakṣyamapūrvaṃ tu pracakrire |
devalokāddevagaṇā mātṝṇāṃ bhoktumāgatāḥ || 117 ||
[Analyze grammar]

tāsāṃ gṛhe yadā pūrvaṃ brahmādyāssurasattamāḥ |
gaṃdharvāpsarasaścaiva yakṣāssarve ca guhyakāḥ || 118 ||
[Analyze grammar]

mervādayaḥ śikhariṇo gaṃgādyāḥ saritastathā |
sarve nāgā gajāssiddhāḥ pakṣiṇo'surasūdanāḥ || 119 ||
[Analyze grammar]

ḍākinyaḥ saha vetālairvṛtāḥ sarvairgrahaistadā |
kimuktenāmunā devi yatsṛṣṭaṃ brahmaṇā tviha || 120 ||
[Analyze grammar]

tatsarvaṃ bhojanaṃ dattaṃ svecchānnaṃ ca nabhogataṃ |
śivadūtyuvāca |
āsāṃ kṛtaṃ dehi bhojyaṃ durlabhaṃ yattriviṣṭape || 121 ||
[Analyze grammar]

snehāktaṃ saguḍaṃ hṛdyaṃ supakvaṃ parikalpitam |
kvacinnānyena yadbhuktamapūrvaṃ parameśvara || 122 ||
[Analyze grammar]

evamuktastadā sopi devadevo maheśvaraḥ |
bhakṣyārthaṃ tāstadā prāha pārvatyāścaiva sannidhau || 123 ||
[Analyze grammar]

mayā vai sādhitaṃ cānnaṃ prakārairbahubhiḥ kṛtaṃ |
tatsarvaṃ ca vyayaṃ yātaṃ na cānyadiha dṛśyate || 124 ||
[Analyze grammar]

bhavatīṣvāgatāsvadya kiṃ mayā deyamucyatām |
apūrvaṃ bhavatīnāṃ yanmayā deyaṃ viśeṣataḥ || 125 ||
[Analyze grammar]

asvāditaṃ na cānyena bhakṣyārthe ca dadāmyaham |
adhobhāge ca me nābhervartulau phalasannibhau || 126 ||
[Analyze grammar]

bhakṣayadhvaṃ hi sahitā laṃbau me vṛṣaṇāvimau |
anena cāpi bhojyena parā tṛptirbhaviṣyati || 127 ||
[Analyze grammar]

mahāprasādaṃ tā labdhvā devyassarvāstadā śivam |
praṇipatya sthitāśśarva idaṃ vacanamabravīt || 128 ||
[Analyze grammar]

kariṣyaṃti śubhācārānvinā hāsyena ye narāḥ |
teṣāṃ dhanaṃ paśuḥ putrā dārāścaiva gṛhādikam || 129 ||
[Analyze grammar]

bhaviṣyati mayā dattaṃ yaccānyanmanasi sthitam |
hāsyena dīrghadaśanā daridrāśca bhavaṃti te || 130 ||
[Analyze grammar]

tasmānna niṃdā hāsyaṃ ca kartavyaṃ hi vijānatā |
bhavatyo mātaraḥ khyātā hyasminloke bhaviṣyatha || 131 ||
[Analyze grammar]

upahāre narā ye tu kariṣyaṃti ca kaumudīm |
caṇakānpūrikāścaiva vṛṣaṇaiḥ saha pūpakān || 132 ||
[Analyze grammar]

baṃdhubhiḥ svajanaiścaiva teṣāṃ vaṃśo na chidyate |
aputro labhate putraṃ dhanārthī labhate dhanam || 133 ||
[Analyze grammar]

rūpavānsubhago bhogī sarvaśāstraviśāradaḥ |
haṃsayuktena yānena brahma loke mahīyate || 134 ||
[Analyze grammar]

śivadūti mayāpyevaṃ tāsāṃ dattaṃ ca bhakṣaṇam |
trapākaraṃ kiṃ bhavatyā uktohaṃ tanniśāmaya || 135 ||
[Analyze grammar]

jayasva devi cāmuṃḍe jaya bhūtāpahāriṇi |
jaya sarvagate devi kālarātri namostu te || 136 ||
[Analyze grammar]

viśvamūrtiyute śuddhe virūpākṣi trilocane |
bhīmarūpe śive vidye mahāmāye mahodare || 137 ||
[Analyze grammar]

manojaye manodurge bhīmākṣi kṣubhitakṣaye |
mahāmāri vicitrāṃgi gītanṛtyapriye śubhe || 138 ||
[Analyze grammar]

vikarāli mahākāli kālike pāpahāriṇi |
pāśahaste daṃḍahaste bhīmahaste bhayānake || 139 ||
[Analyze grammar]

cāmuṃḍe jvalamānāsye tīkṣṇadaṃṣṭre mahābale |
śivayānapriye devi pretāsanagate śive || 140 ||
[Analyze grammar]

bhīmākṣi bhīṣaṇe devi sarvabhūtabhayaṃkari |
karāli vikarāle ca mahākāli karālini || 141 ||
[Analyze grammar]

kālikarālavikrāṃte kālarātri namostu te |
sarvaśastrabhṛte devi namo devanamaskṛte || 142 ||
[Analyze grammar]

evaṃ stutā śivadūtī rudreṇa parameṣṭhinā |
tutoṣa paramā devī vākyaṃ caivamuvāca ha || 143 ||
[Analyze grammar]

varaṃ vṛṇīṣva deveśa yatte manasi vartate |
rudra uvāca |
stotreṇānena ye devi stoṣyaṃti ttvāṃ varānane || 144 ||
[Analyze grammar]

teṣāṃ tvaṃ varadā devi bhava sarvagatā satī |
imaṃ parvatamāruhya yaḥ pūjayati bhaktitaḥ || 145 ||
[Analyze grammar]

sa putrapautrapaśumānsamṛddhimupagacchatu |
yaścaivaṃ śṛṇuyādbhaktyā stavaṃ devi samudbhavaṃ || 146 ||
[Analyze grammar]

sarvapāpavinirmuktaḥ paraṃ nirvāṇamṛcchatu |
bhraṣṭarājyo yadā rājā navamyāṃ niyataḥ śuciḥ || 147 ||
[Analyze grammar]

aṣṭamyāṃ ca caturdaśyāṃ sopavāso narottama |
saṃvatsareṇa labhatāṃ rājyaṃ niṣkaṃṭakaṃ punaḥ || 148 ||
[Analyze grammar]

eṣā jñānānvitā śaktiḥ śivadūtīti cocyate |
ya evaṃ śṛṇuyānnityaṃ bhaktyā paramayā nṛpa || 149 ||
[Analyze grammar]

sarvapāpavinirmuktaḥ paraṃ nirvāṇamāpnuyāt |
yaścainaṃ paṭhate bhaktyā snātvā vai puṣkare jale || 150 ||
[Analyze grammar]

sarvametatphalaṃ prāpya brahmaloke mahīyate |
yatraitallikhitaṃ gehe sadā tiṣṭhati pārthiva || 151 ||
[Analyze grammar]

na tatrāgnibhayaṃ ghoraṃ sarvacorādisaṃbhavaṃ |
yaścedaṃ pūjayedbhaktyā pustakepi sthitaṃ budhāḥ || 152 ||
[Analyze grammar]

tena ceṣṭaṃ bhavetsarvaṃ trailokyaṃ sacarācaraṃ |
jāyaṃte bahavaḥ putrā dhanaṃ dhānyaṃ varastriyaḥ || 153 ||
[Analyze grammar]

ratnānyaśvā gajā bhṛtyāsteṣāmāśu bhavaṃti ca |
yatredaṃ likhyate gehe tatrāpyevaṃ dhruvaṃ bhavet || 154 ||
[Analyze grammar]

iti śrīpādmapurāṇe prathame sṛṣṭikhaṃḍe śivadūtīcaritaṃ nāma ekatriṃśo'dhyāyaḥ || 31 ||
[Analyze grammar]