Chapter 32

[English text for this chapter is available]

bhīṣma uvāca |
kena karmavipākena pretatvaṃ jāyate punaḥ |
kena vātra pramucyeta tanme brūhi mahāmate || 1 ||
[Analyze grammar]

pulastya uvāca |
ahaṃ te kathayiṣyāmi sarvametadaśeṣataḥ |
yacchrutvā na punarmohaṃ yāsyate nṛpasattama || 2 ||
[Analyze grammar]

yena jāyeta pretatvaṃ yena cāsmātpramucyate |
prāpnoti narakaṃ ghoraṃ dustaraṃ tridaśairapi || 3 ||
[Analyze grammar]

satāṃ saṃbhāṣaṇe caiva puṇyatīrthānukīrttane |
mānavāstu pramucyaṃta āpannāḥ pretayoniṣu || 4 ||
[Analyze grammar]

śrūyate hi purā bhīṣma brāhmaṇaḥ saṃśitavrataḥ |
pṛthussarvatra vikhyātaḥ saṃtoṣe ca sadā sthitaḥ || 5 ||
[Analyze grammar]

svādhyāyayukto geheṣu nityayogaśca yogavit |
japayajñavidhānena yuktaṃ kālaṃ kṣipecca saḥ || 6 ||
[Analyze grammar]

yuktaḥ kṣamādayābhyāṃ ca kṣāṃtyāyuktaśca tattvavit |
ahiṃsāhitacittaśca mārddave ca tathāsthitaḥ || 7 ||
[Analyze grammar]

brahmacaryasamāyuktastapoyogasamanvitaḥ |
yuktaḥ sa pitṛkāryeṣu yukto vaidikakarmasu || 8 ||
[Analyze grammar]

paralokabhayeyukto yuktassatyavacaḥ prati |
yukto madhuravākyeṣu yuktaścātithipūjane || 9 ||
[Analyze grammar]

iṣṭāpūrtasamāyukto yukto dvaṃdvavivarjane |
svakarmavidhisaṃyukto yuktaḥ svādhyāyakarmasu || 10 ||
[Analyze grammar]

evaṃ karmāṇi kurvaṃtassaṃsāravijigīṣayā |
bahūnyabdānyatītāni brāhmaṇasya gṛhe sataḥ || 11 ||
[Analyze grammar]

tasya buddhiriyaṃ jātā tīrthābhigamanaṃ prati |
puṇyaistīrthajalairetatklinnaṃ kuryāṃ kalevaram || 12 ||
[Analyze grammar]

prayataḥ puṣkare snātvā bhāskarasyodayaṃ prati |
kṛtajapyanamaskāropyaddhvānaṃ pratyapadyata || 13 ||
[Analyze grammar]

agrataḥ paṃcapuruṣānapaśyatsoti bhīṣaṇān |
vane kaṃṭakavṛkṣāḍhye nirjane pakṣivarjite || 14 ||
[Analyze grammar]

tāndṛṣṭvā vikṛtākārānsughorānpāpadarśanān |
īṣatsaṃtrastahṛdayo vyatiṣṭhanniścalākṛtiḥ || 15 ||
[Analyze grammar]

avalaṃbya tato dhairyyaṃ bhayamutsṛjya dūrataḥ |
papraccha madhurābhāṣī ke yūyaṃ vikṛtāḥ kutaḥ || 16 ||
[Analyze grammar]

kiṃ vā caiva kṛtaṃ karma ye naprāptāśca vaikṛtam |
kathamevaṃvidhāḥ sarve prasthitāḥ kutra cādhvani || 17 ||
[Analyze grammar]

pretā ūcuḥ |
kṣutpipāsānvitā nityaṃ mahāduḥkhasamāvṛtāḥ |
hṛtaprajñā vayaṃ sarve naṣṭasañjñāvicetasaḥ || 18 ||
[Analyze grammar]

na jānīmo diśaṃ cāpi pradiśaṃ cāpi kāṃ ca na |
nāṃtarikṣaṃ mahīṃ cāpi na jānīmo divaṃ tathā || 19 ||
[Analyze grammar]

yadetadduḥkhamākhyātametadeva sukhaṃ bhavet |
prabhātamidamābhāti bhāskarodayadarśanāt || 20 ||
[Analyze grammar]

ahaṃ paryuṣito nāma sūcīmukhastathā'paraḥ |
śīghrago rohakaścaiva paṃcamo lekhakastathā || 21 ||
[Analyze grammar]

brāhmaṇa uvāca |
pretānāṃ karmajātānāṃ nāmnā vai saṃbhavaḥ kutaḥ |
kiṃ tatkāraṇamuddiśya yato yūyaṃ sanāmakāḥ || 22 ||
[Analyze grammar]

pretā ūcuḥ |
ahaṃ svādu sadā bhuṃje dadyāṃ paryuṣitaṃ dvije |
etatkāraṇamāsādya nāma paryuṣito mama || 23 ||
[Analyze grammar]

sūcitā bahavo'nena viprāścānnādyakāṃkṣiṇaḥ |
etatkāraṇamuddiśya sūcīmukhābhidho mataḥ || 24 ||
[Analyze grammar]

śīghraṃ gato'smi vipreṇa yācitaḥ kṣudhitena ca |
etatkāraṇamuddiśya śīghrago dvijasattama || 25 ||
[Analyze grammar]

gṛhopari sadā svādu bhuṃkte dvijabhayena hi |
udvignamānasastatra tenāsau rohakaḥ smṛtaḥ || 26 ||
[Analyze grammar]

maune cāpi sthito nityaṃ yācito vilikhanmahīm |
asmākamapi pāpiṣṭho lekhako nāma nāmataḥ || 27 ||
[Analyze grammar]

kṛcchreṇa lekhako yāti rohakastu avākśirāḥ |
śīghragaḥ paṃgutāṃ prāptaḥ sūcī sūcīmukho'bhavat || 28 ||
[Analyze grammar]

paryuṣito lambagrīvo laṃbodara udāhṛtaḥ |
bṛhadvṛṣaṇalaṃboṣṭhaḥ pāpādasmādajāyata || 29 ||
[Analyze grammar]

etatte sarvamākhyātamātmavṛttaṃ sahetukam |
pṛcchasva yadi te śraddhā pṛṣṭāśca kathayāmahe || 30 ||
[Analyze grammar]

brāhmaṇa uvāca |
ye jīvā bhuvi tiṣṭhaṃti sarvepyāhāramūlakāḥ |
yuṣmākamapi cāhāraṃ śrotumicchāmi tattvataḥ || 31 ||
[Analyze grammar]

pretā ūcuḥ |
śṛṇuṣvāhāramasmākaṃ sarvasatvavigarhitam |
yacchrutvā niṃdase vipra bhūyobhūyaśca nityaśaḥ || 32 ||
[Analyze grammar]

śleṣmamūtrapurīṣeṇa yoṣidaṅgamalena ca |
gṛhāṇi tyaktaśaucāni pretā bhuṃjaṃti tatra vai || 33 ||
[Analyze grammar]

strībhirdagdhāni kīrṇāni prakīrṇocchiṣṭakāni ca |
malenāpi jugupsyāni pretā bhuṃjaṃti tatra vai || 34 ||
[Analyze grammar]

cittalajjāvihīnāni homahīnāni yāni ca |
vrataiścaiva vihīnāni pretā bhuṃjaṃti tatra vai || 35 ||
[Analyze grammar]

guravo naiva pūjyaṃte strījitāni gṛhāṇi ca |
krodhalobhagṛhītāni pretā bhuṃjaṃti tatra vai || 36 ||
[Analyze grammar]

trapā me jāyate tāta kathyamāne svabhojane |
asmātparataraṃ cānyanna vaktumapi śakyate || 37 ||
[Analyze grammar]

nivṛttiṃ pretabhāvasya pṛcchāmastvāṃ dṛḍhavrata |
yathā na bhavati pretastanme vada tapodhana || 38 ||
[Analyze grammar]

brāhmaṇa uvāca |
ekarātra dvirātrādi kṛcchracāṃdrāyaṇadibhiḥ |
vratairanyaiḥ kṛtairnityaṃ na preto jāyate naraḥ || 39 ||
[Analyze grammar]

trīnagnīnpañca caikaṃ vā yo'hanyahani sevate |
sa vai bhūtadayāpanno na preto jāyate naraḥ || 40 ||
[Analyze grammar]

tulyo māne'pamāne ca tulyaḥ kāṃcanaloṣṭayoḥ |
tulyaḥ śatrau ca mitre ca na preto jāyate naraḥ || 41 ||
[Analyze grammar]

devatā'tithipūjāsu gurupūjāsu nityaśaḥ |
rato vai pitṛpūjāsu na preto jāyate naraḥ || 42 ||
[Analyze grammar]

śuklāṃgārakasaṃyuktā caturthī jāyate yadā |
śraddhayā śrāddhakṛttasyāṃ na preto jāyate naraḥ || 43 ||
[Analyze grammar]

jitakrodhavimarśoyastṛṣṇāsaṃgavivarjitaḥ |
kṣamāvāndānaśīlaśca na preto jāyate naraḥ || 44 ||
[Analyze grammar]

gobrāhmaṇāṃśca tīrthāni parvatāṃśca nadīstathā |
devāṃścaiva tu yo vandyānna preto jāyate naraḥ || 45 ||
[Analyze grammar]

pretā ūcuḥ |
śrutāśca vividhā dharmāḥ pṛcchāmo duḥkhitā mune |
yena vai jāyate pretastanno vada mahāmate || 46 ||
[Analyze grammar]

brāhmaṇa uvāca |
śūdrānnena tu bhuktena brāhmaṇena viśeṣataḥ |
mriyate hyudarasthena sa vai preto bhavennaraḥ || 47 ||
[Analyze grammar]

mātaraṃ pitaraṃ bhrātṝnbhaginīṃ sutameva ca |
adṛṣṭadoṣāṃstyajati sa preto jāyate naraḥ || 48 ||
[Analyze grammar]

ayājyayājanāccaiva yājyasya ca vivarjanāt |
rato vai śūdrasevāsu sa preto jāyate naraḥ || 49 ||
[Analyze grammar]

nyāsāpahartā mitradhrukśūdrapākarataḥ sadā |
visraṃbhaghātī kūṭasthaḥ sa preto jāyate naraḥ || 50 ||
[Analyze grammar]

brahmahā goghnakaḥ stenaḥ surāpo gurutalpagaḥ |
bhūmikanyāpaharttā ca sa preto jāyate naraḥ || 51 ||
[Analyze grammar]

sāmānyāṃ dakṣiṇāṃ labdhvā eka eva nigūhati |
nāstikībhāvanirataḥ sa vai pretobhijāyate || 52 ||
[Analyze grammar]

evaṃ bruvāṇe viprendra ākāśe duṃdubhisvanaḥ |
puṣpavṛṣṭiḥ papātorvyāṃ devairmuktā sahasraśaḥ || 53 ||
[Analyze grammar]

pretānāṃ tu vimānāni āgatāni samaṃtataḥ |
asya viprasya saṃbhāṣātpuṇyasaṃkīrtanena ca || 54 ||
[Analyze grammar]

tasmātsarvaprayatnena satāṃ saṃbhāṣaṇaṃ kuru |
yadi te śreyasā kāryaṃ gaṃgāsuta ataṃdritaḥ || 55 ||
[Analyze grammar]

tilakaṃ sarvadharmasya pañcapretakathāmimām |
paṭhellakṣaṃ yo'sya kule na preto jāyate naraḥ || 56 ||
[Analyze grammar]

śṛṇoti vāpyabhīkṣṇaṃ vā śraddhayā parayānvitaḥ |
bhaktyā samanvito vāpi na preto jāyate naraḥ || 57 ||
[Analyze grammar]

bhīṣma uvāca |
aṃtarikṣe kimarthaṃ tu puṣkaraṃ parikīrtyate |
munibhirdharmaśīlaiśca labhyate tatkathaṃ tviha || 58 ||
[Analyze grammar]

yena tallabhyate labdhaṃ labdhaṃ caiva phalapradam |
tanme sarvaṃ samācakṣva kautukādeva pṛcchataḥ || 59 ||
[Analyze grammar]

pulastya uvāca |
ṛṣikoṭissamāyātā dakṣiṇāpathavāsinī |
snānārthaṃ puṣkare rājanpuṣkaraṃ ca viyadgatam || 60 ||
[Analyze grammar]

matvāte munayaḥ sarve prāṇāyāmaparāyaṇāḥ |
dhyāyamānāḥ paraṃ brahma sthitā dvādaśavatsarān || 61 ||
[Analyze grammar]

brahmā maharṣayastatra devāssendrāssamāgatāḥ |
ṛṣayoṃtarhitāḥ procurniyamāṃste suduṣkarān || 62 ||
[Analyze grammar]

ākāraṇaṃ puṣkarasya maṃtreṇa kriyatāṃ dvijāḥ |
āpohiṣṭheti tisṛbhirṛgbhiḥ sāṃnidhyameṣyati || 63 ||
[Analyze grammar]

aghamarṣaṇajapyena bhavedvai phaladāyakam |
viprairvākyāvasāne tu sarvaistaistu tathā kṛtam || 64 ||
[Analyze grammar]

kṛtena puṇyatāṃ prāptā ye nideśācca te dvijāḥ |
garhitā dharmaśāstreṣu te viprā dakṣiṇottarāḥ || 65 ||
[Analyze grammar]

ye cānye pārvatīyāśca śrāddhenārhaṃti ketanam |
etasmātkāraṇādrājanviyatyevaṃ samāsthitam || 66 ||
[Analyze grammar]

kārtikyāṃ puṣkaraṃ snānātpūtatāmabhiyacchati |
brahmaṇā sahitaṃ rājansarveṣāṃ puṇyadāyakam || 67 ||
[Analyze grammar]

tatrāgatāstu ye varṇāḥ sarve te puṇyabhājanāḥ |
dvijaistulyā na saṃdeho vinā maṃtreṇa te nṛpa || 68 ||
[Analyze grammar]

āgneyaṃ tu yadā ṛkṣaṃ kārtikyāṃ bhavati kvacit |
mahatī sā tithirjñeyā snāne dāne tathottamā || 69 ||
[Analyze grammar]

yadā yāmyaṃ tu bhavati ṛkṣaṃ tasyāṃ tithau kvacit |
tithiḥ sāpi mahāpuṇyā yatibhiḥ parikīrtitā || 70 ||
[Analyze grammar]

prājāpatyaṃ yadā ṛkṣaṃ tithau tasyāṃ narādhipa |
sā mahākārtikī proktā devānāmapi durlabhā || 71 ||
[Analyze grammar]

yadā cārke gurau some vāreṣveteṣu vai triṣu |
trīṇyetāni ca ṛkṣāṇi svayaṃ proktāni brahmaṇā || 72 ||
[Analyze grammar]

atrāśvamedhikaṃ puṇyaṃ snātasya bhavati dhruvam |
dānamakṣayatāṃ yāti pitṝṇāṃ tarpaṇaṃ tathā || 73 ||
[Analyze grammar]

viśākhāsu yadā bhānuḥ kṛttikāsu ca caṃdramāḥ |
sa yogaḥ puṣkaro nāma puṣkareṣvatidurlabhaḥ || 74 ||
[Analyze grammar]

aṃtarikṣāvatīrṇe tu tīrthe paitāmahe śubhe |
snānaṃ ye'tra kariṣyaṃti teṣāṃ lokā mahodayāḥ || 75 ||
[Analyze grammar]

na spṛhāṃtenyapuṇyasya kṛtasyāpyakṛtasya ca |
kariṣyaṃti mahārāja satyametadudāhṛtam || 76 ||
[Analyze grammar]

tīrthānāṃ pravaraṃ tīrthaṃ pṛthivyāmiha paṭhyate |
nāsmātparaṃ puṇyatīrthaṃ lokeṣu nṛpa paṭhyate || 77 ||
[Analyze grammar]

kārtikyāṃ tu viśeṣeṇa puṇyā pāpaharā śubhā |
uduṃbaravanāttasmādāgatā ca sarasvatī || 78 ||
[Analyze grammar]

tayā tatpūritaṃ tīrthaṃ puṣkaraṃ munisevitam |
dakṣiṇe śikharaṃ bhāti parvatasyāvidūrataḥ || 79 ||
[Analyze grammar]

nīlāṃjanacayaprakhyaṃ varṇato nīlaśādvalam |
tayā tacchikharaṃ tasya khasthitaṃ puṣkaraṃ yathā || 80 ||
[Analyze grammar]

prāvṛṭkāle viyatpūrṇaṃ ghanavṛṃdamivocchritam |
kadaṃbapuṣpagaṃdhāḍhyaṃ kuṭajārjunabhūṣitam || 81 ||
[Analyze grammar]

rathamārgamivāroḍhuṃ ravestacchikharaṃ sthitam |
vṛttaissapulakaissnigdhaiḥ strīṇāmiva payodharaiḥ || 82 ||
[Analyze grammar]

śrīphalaiḥ śikharaṃ bhāti samantātsumanoharaiḥ |
guṃjadbhiḥ ṣaṭpadakulaiḥ samaṃtādupaśobhitam || 83 ||
[Analyze grammar]

kokilārāvaruciraṃ śikhi kekā ravākulam |
śṛṃge manohare tasminnudgatāsu manoramā || 84 ||
[Analyze grammar]

puṇyāpuṇyajalopetā nadīyaṃ brahmaṇassutā |
vaṃśastaṃbātsuvipulā pravṛttā cottarāmukhī || 85 ||
[Analyze grammar]

gatvā tato nātidūrātpunaryāti parāṅmukhī |
tataḥ prabhṛti sā devī prasannā prakaṭāsthitā || 86 ||
[Analyze grammar]

antardhānaṃ parityajya prāṇināmanukampayā |
kanakā suprabhā caiva nandā prācī sarasvatī || 87 ||
[Analyze grammar]

paṃcasrotāḥ puṣkareṣu brahmaṇā paribhāṣitā |
tasyāstīre suramyāṇi tīrthānyāyatanāni ca || 88 ||
[Analyze grammar]

saṃsevitāni munibhiḥ siddhaiścāpi samaṃtataḥ |
teṣu sarveṣu bhavitā dharmahetuḥ sarasvatī || 89 ||
[Analyze grammar]

hāṭakakṣitigaurīṇāṃ tattīrtheṣu mahodayam |
dānaṃ dattaṃ naraiḥ snātairjanayatyakṣayaṃ phalam || 90 ||
[Analyze grammar]

dhānyapradānaṃ pravaraṃ vadaṃti tilapradānaṃ ca tathā munīṃdrāḥ |
yaisteṣu tīrtheṣu naraiḥ pradattaṃ taddharmahetu pravaraṃ pradiṣṭam || 91 ||
[Analyze grammar]

prāyopaveśaṃ prayataḥ prayatnādyasteṣu kuryātpramadā pumānvā |
tīrthepi saṃyojya manopi cetthaṃ bhuṃkte phalaṃ brahmagṛhe yatheṣṭam || 92 ||
[Analyze grammar]

tasyopakaṃṭhe mriyate hi yaistu karmakṣayātsthāvarajaṃgamaiśca |
te cāpi sarve sakalaṃ prasahya labhaṃti yajñasya phalaṃ durāpam || 93 ||
[Analyze grammar]

tatastu sā dharmaphalāraṇī ca janmādiduḥkhārditacetasāṃ tu |
sarvātmanā cāruphalā sarasvatī sevyā prayatnātpuruṣairmahānadī || 94 ||
[Analyze grammar]

tatra ye salilaṃ pūtaṃ pibaṃti satataṃ narāḥ |
na te manuṣyā devāste jagatyāmiha saṃsthitāḥ || 95 ||
[Analyze grammar]

yajñairdānaistapobhiśca yatphalaṃ prāpyate dvijaiḥ |
tadatra snānamātreṇa śūdrairapi svabhāvajaiḥ || 96 ||
[Analyze grammar]

darśanātpuṣkarasyāpi mahāpātakinopi ye |
tepi tatpāpanirmuktāḥ svargaṃ yāṃti tanukṣaye || 97 ||
[Analyze grammar]

tatropavāsī yajñasya puṃḍarīkasya yatphalam |
tatprāpnoti naraḥ kṣipramalpāyāsena puṣkare || 98 ||
[Analyze grammar]

māghamāse tilānyastu prayacchati ca sa ddvije |
yathāśakti ca bhaktyā ca sa viṣṇubhavane vaset || 99 ||
[Analyze grammar]

tatropavāsaṃ snānaṃ ca paṃcagavyāśanaṃ tathā |
yaḥ karoti naraḥ sopi dehāṃte svargamāpnuyāt || 100 ||
[Analyze grammar]

vasaṃti tatsamīpasthā yepi taskarajātayaḥ |
tepi tasyānubhāvena svaryāṃti ca na saṃśayaḥ || 101 ||
[Analyze grammar]

ye punaḥ śūdravṛttisthāstrirātropoṣitā narāḥ |
prayacchaṃti dvijeṣvarthaṃ brahmaśaktisamanvitāḥ || 102 ||
[Analyze grammar]

te mṛtā yānamārūḍhāḥ padmāsanacaturbhujāḥ |
brahmaṇā saha sāyujyaṃ prāpnuvaṃtyapunarbhavam || 103 ||
[Analyze grammar]

gaṃgodbhedaṃ yatra gaṃgā saṃprāptā saritāṃ varām |
sarasvatīṃ draṣṭukāmā sāṃtvārthe prodgatāṃ'barāt || 104 ||
[Analyze grammar]

tatra gatvā payaḥpūtaṃ surasiddhaniṣevitam |
sārasvataṃ ca vimalaṃ vidyādharagaṇārcitam || 105 ||
[Analyze grammar]

pītamekāṃjalimitaṃ yenāptaṃ tena tatparaṃ |
avalokya diśaṃ pūrvāmāha gaṃge sakhi tvayā || 106 ||
[Analyze grammar]

ekākinī viyuktāsmi kva yāsyehamabāṃdhavā |
tāṃ vijñāya tato gaṃgā rudaṃtīṃ śokakarśitām || 107 ||
[Analyze grammar]

pūrvadeśātsamāyātā draṣṭuṃ tāṃ dīnamānasām |
dṛṣṭvā ca tāṃ mahābhāgāṃ pariṣvajya tu pīḍitām || 108 ||
[Analyze grammar]

netre pramṛjya caitasyāḥ prāha gaṃgā vacastadā |
mā rodīstvaṃ mahābhāge duḥṣkaraṃ te kṛtaṃ sakhi || 109 ||
[Analyze grammar]

devakāryaṃ yadanyena kartuṃ śakyeta naiva hi |
etasmātte mahābhāge draṣṭuṃ devāḥ samāgatāḥ || 110 ||
[Analyze grammar]

eṣāṃ ca kriyatāṃ pūjā vāṅmanaḥ kāya karmaṇā |
sarasvatī sureṃdrāṇāṃ kṛttvā pūjā vidhikramam || 111 ||
[Analyze grammar]

krameṇa brahmajā paścātsaṃgatā tu sakhījanam |
jyeṣṭhamadhyamayormadhye saṃgamo lokaviśrutaḥ || 112 ||
[Analyze grammar]

paścānmukhī brahmasutā jāhnavī tu udaṅmukhī |
tataste vibudhāḥ sarve puṣkaraṃ ye samāgatāḥ || 113 ||
[Analyze grammar]

viditvā duṣkaraṃ karma tasyā stutimakārayan |
tvaṃ buddhistvaṃ matirlakṣmīstvaṃ vidyā tvaṃ gatiḥ parā || 114 ||
[Analyze grammar]

tvaṃ śraddhā ttvaṃ parā niṣṭhā buddhirmedhā ratiḥ kṣamā |
tvaṃ siddhistvaṃ svadhā svāhā tvaṃ pavitraṃ mataṃ mahat || 115 ||
[Analyze grammar]

saṃdhyā rātriḥ prabhā bhūtirmedhā śraddhā sarasvatī |
yajña vidyā mahāvidyā guhyavidyā ca śobhanā || 116 ||
[Analyze grammar]

ānvīkṣikī tu yā vārtā daṃḍanītiśca kathyate |
namostu te puṇyajale namaḥ sāgaragāmini || 117 ||
[Analyze grammar]

namaste pāpanirmoke namo devi jagatpriye |
evaṃ stutā hi sā devī divyā svārthaparāyaṇaiḥ || 118 ||
[Analyze grammar]

evaṃ sā prāṅmukhī tatra sthitā devī sarasvatī |
sarvatīrthamayī devī sarvāmarasamanvitā || 119 ||
[Analyze grammar]

prācī seti budhairjñeyā brahmaṇo vacanaṃ tathā |
tatra śuddhāvaṭaṃnāma tīrthaṃ paitāmahaṃ smṛtam || 120 ||
[Analyze grammar]

darśanenāpi vai tasya mahāpātakinopi ye |
bhogibhogānsamaśnaṃti viśuddhā brahmaṇoṃtike || 121 ||
[Analyze grammar]

prāyopaveśaṃ ye tatra prakurvaṃti narottamāḥ |
te mṛtā brahmayānena divaṃ yāṃtyakutobhayāḥ || 122 ||
[Analyze grammar]

tatrālpamapi yairdānaṃ dattaṃ brahmavidātmanām |
janmāṃtaraśataṃ teṣāṃ tairdattaṃ bhāvitātmanām || 123 ||
[Analyze grammar]

khaṇḍasphuṭitasaṃskāraṃ tatra kurvanti ye narāḥ |
te brahmalokamāsādya modante sukhinassadā || 124 ||
[Analyze grammar]

yo'tra pūjājapohomaḥ kṛto bhavati dehinām |
anantaṃ tatphalaṃ sarvaṃ brahmabhaktiratātmanām || 125 ||
[Analyze grammar]

tatra dīpapradānena jñānacakṣuratīṃdriyaḥ |
prāpnoti dhūpadānena sthānaṃ brahmaniṣevitam || 126 ||
[Analyze grammar]

atha kiṃ bahunoktena saṃgame yatpradīyate |
tadanaṃtaphalaṃ proktaṃ jīvato vā mṛtasya ca || 127 ||
[Analyze grammar]

snānājjapāttathā homādanaṃtaphalasādhakam |
rāmeṇāgatya vai tatra piṃḍaṃ daśarathasya ca || 128 ||
[Analyze grammar]

dattaṃ śrāddhaṃ tatra tena mārkaṃḍeyena darśite |
tatra vāpī catuḥkoṇā tatra piṃḍapradā narāḥ || 129 ||
[Analyze grammar]

haṃsayuktena yānena sarve yāṃti triviṣṭapam |
tasyāṃ vāpyāṃ tu vai brahmā pitṛmedhaṃ cakāra ha || 130 ||
[Analyze grammar]

yajñaṃ yajñavidāṃ śreṣṭhaḥ samāptavaradakṣiṇam |
vasavaḥ pitaro jñeyā rudrāścaiva pitāmahāḥ || 131 ||
[Analyze grammar]

ādityāśca tatasteṣāṃ vihitāḥ prapitāmahāḥ |
trividhā api āhūya punaruktā viriṃcinā || 132 ||
[Analyze grammar]

bhavadbhiḥ piṃḍadānādyaṃ grāhyamatra sthitaissadā |
yatkṛtaṃ pitṛkāryaṃ ca tadanaṃtaphalaṃ bhavet || 133 ||
[Analyze grammar]

vṛtyarthaṃ pitarasteṣāṃ tuṣṭāścaiva pitāmahāḥ |
labhaṃte tarpaṇāttṛptiṃ piṃḍadānāttriviṣṭapam || 134 ||
[Analyze grammar]

tasmātsarvaṃ parityajya prācīne piṃḍado bhavet |
datvā putraḥ prayatnena pitṝnsarvāṃśca tarpayet || 135 ||
[Analyze grammar]

prācīneśvaradevasya purobhūtaṃ pratiṣṭhitam |
āditīrthaṃ tadityuktaṃ darśanādapi muktidam || 136 ||
[Analyze grammar]

spṛṣṭvā tu salilaṃ tatra mucyate janmabaṃdhanāt |
avagāhanādbrahmaṇo'sau bhavatyanucaraḥ sadā || 137 ||
[Analyze grammar]

āditīrthe naraḥ snātvā yaḥ pradadyātsamādhinā |
annamalpamapi prāyaḥ prāyaśassvargamāpnuyāt || 138 ||
[Analyze grammar]

yastatra brahmabhaktānāṃ naraḥ snātvā dadeddhanam |
kṛseraṇāpi hemnā ca sa svarge modate sukhī || 139 ||
[Analyze grammar]

prācīsarasvatī tatra naraiḥ kiṃ mṛgyate param |
tasyāṃ snānātphalaṃ tṛptyai tapoyajñādilakṣaṇam || 140 ||
[Analyze grammar]

ye pibaṃti narāḥ puṇyāṃ prācīṃ devīṃ sarasvatīm |
na te narāḥ surā jñeyā mārkaṃḍeyarṣirabravīt || 141 ||
[Analyze grammar]

sarasvatī nadīṃ prāpya na snāne niyamaḥ kvacit |
bhukte vā na ca vā bhukte divā vā yadi vā niśi || 142 ||
[Analyze grammar]

tattīrthaṃ sarvattīrthānāṃ prācīnaṃ pravaraṃ smṛtat |
pāpaghnaṃ puṇyajananaṃ prāṇināṃ parikīrtitam || 143 ||
[Analyze grammar]

ye punarbhāvitātmānastatra snātvā janārdanam |
pūjayanti yathāśakti te prayāṃti triviṣṭapam || 144 ||
[Analyze grammar]

devānāṃ pravaro viṣṇustena yatra sarasvatī |
sevitā tatparaṃ tīrthaṃ kṣitau brahmasuto'bravīt || 145 ||
[Analyze grammar]

tatastasmānmahātīrthaṃ manyamānā mahodayam |
maṃdākinīmudīkṣaṃtī sthitā tatra sarasvatī || 146 ||
[Analyze grammar]

tattīrthaṃ sarvatīrthānāṃ paraṃ svāyaṃbhuvo'bravīt |
maṃdākinyāsamaṃ yatra prāpya puṇyasamāgamam || 147 ||
[Analyze grammar]

tatrasthāne sthitā devaiḥ stutā devī sarasvatī |
matvā caikākinīṃ tāṃ tu dīnāsyāṃ dīnamānasāṃ || 148 ||
[Analyze grammar]

sakhīṃ tadā'sṛjadbrahmā rūpiṇīṃ vimalekṣaṇām |
hariṇīṃ harirapyāśu jajñe kamalalocanām || 149 ||
[Analyze grammar]

vajriṇīmapi deveśo vajrapāṇirvisṛṣṭavān |
sukuraṃgaruciṃ devo nīlakaṃṭho vṛṣadhvajaḥ || 150 ||
[Analyze grammar]

sakhīṃ saṃjanayāmāsa sarasvatyāstrilocanaḥ |
vilokyamānā sā rājansakhībhiḥ surasuṃdarī || 151 ||
[Analyze grammar]

prahṛṣṭā yātumārabdhā devādeśānmahānadī |
tataḥ sakhībhiḥ sārddhaṃ sā prācīnāgaṃtumudyatā || 152 ||
[Analyze grammar]

sarasvatī samastānāṃ tāsāṃ śreṣṭhatamā smṛtā |
prācīsarasvatītoyaṃ ye pibaṃti mṛgā bhuvi || 153 ||
[Analyze grammar]

tepi svargaṃ gamiṣyaṃti yajñairdvijavarā yathā |
ciṃtāmaṇirivātraiṣā prācī jñeyā sarasvatī || 154 ||
[Analyze grammar]

tathā kāmaphalasyeyaṃ hetubhūtā mahānadī |
dakṣiṇāṃ diśamālokya punaḥ paścānmukhī gatā || 155 ||
[Analyze grammar]

uktā tayā tathā gaṃgā diśaṃ prācīṃ vrajasva ha |
vismartavyā na cāhaṃ te vraja devi yathāgatam || 156 ||
[Analyze grammar]