Chapter 83

pulastya uvāca |
atha saṃdhyāṃ samāsādya saṃvedyaṃ tīrthamuttamam |
upaspṛśya naro vidvānbhavennāstyatra saṃśayaḥ || 1 ||
[Analyze grammar]

rāmasya ca prasādena tīrthaṃ rājankṛtaṃ purā |
tallohityaṃ samāsādya vindyādbahu suvarṇakam || 2 ||
[Analyze grammar]

karatoyāṃ samāsādya trirātropoṣito naraḥ |
aśvamedhamavāpnoti kṛte paitāmahe vidhau || 3 ||
[Analyze grammar]

gaṅgāyāstvatha rājendra sāgarasya ca saṃgame |
aśvamedhaṃ daśaguṇaṃ pravadanti manīṣiṇaḥ || 4 ||
[Analyze grammar]

gaṅgāyāstvaparaṃ dvīpaṃ prāpya yaḥ snāti bhārata |
trirātropoṣito rājansarvakāmānavāpnuyāt || 5 ||
[Analyze grammar]

tato vaitaraṇīṃ gatvā nadīṃ pāpapramocanīm |
virajaṃ tīrthamāsādya virājati yathā śaśī || 6 ||
[Analyze grammar]

prabhavecca kule puṇye sarvapāpaṃ vyapohati |
gosahasraphalaṃ labdhvā punāti ca kulaṃ naraḥ || 7 ||
[Analyze grammar]

śoṇasya jyotirathyāśca saṃgame nivasañśuciḥ |
tarpayitvā pitṝndevānagniṣṭomaphalaṃ labhet || 8 ||
[Analyze grammar]

śoṇasya narmadāyāśca prabhave kurunandana |
vaṃśagulma upaspṛśya vājimedhaphalaṃ labhet || 9 ||
[Analyze grammar]

ṛṣabhaṃ tīrthamāsādya kośalāyāṃ narādhipa |
vājapeyamavāpnoti trirātropoṣito naraḥ || 10 ||
[Analyze grammar]

kośalāyāṃ samāsādya kālatīrtha upaspṛśet |
vṛṣabhaikādaśaphalaṃ labhate nātra saṃśayaḥ || 11 ||
[Analyze grammar]

puṣpavatyāmupaspṛśya trirātropoṣito naraḥ |
gosahasraphalaṃ vindyātkulaṃ caiva samuddharet || 12 ||
[Analyze grammar]

tato badarikātīrthe snātvā prayatamānasaḥ |
dīrghamāyuravāpnoti svargalokaṃ ca gacchati || 13 ||
[Analyze grammar]

tato mahendramāsādya jāmadagnyaniṣevitam |
rāmatīrthe naraḥ snātvā vājimedhaphalaṃ labhet || 14 ||
[Analyze grammar]

mataṅgasya tu kedārastatraiva kurunandana |
tatra snātvā naro rājangosahasraphalaṃ labhet || 15 ||
[Analyze grammar]

śrīparvataṃ samāsādya nadītīra upaspṛśet |
aśvamedhamavāpnoti svargalokaṃ ca gacchati || 16 ||
[Analyze grammar]

śrīparvate mahādevo devyā saha mahādyutiḥ |
nyavasatparamaprīto brahmā ca tridaśairvṛtaḥ || 17 ||
[Analyze grammar]

tatra devahrade snātvā śuciḥ prayatamānasaḥ |
aśvamedhamavāpnoti parāṃ siddhiṃ ca gacchati || 18 ||
[Analyze grammar]

ṛṣabhaṃ parvataṃ gatvā pāṇḍyeṣu surapūjitam |
vājapeyamavāpnoti nākapṛṣṭhe ca modate || 19 ||
[Analyze grammar]

tato gaccheta kāverīṃ vṛtāmapsarasāṃ gaṇaiḥ |
tatra snātvā naro rājangosahasraphalaṃ labhet || 20 ||
[Analyze grammar]

tatastīre samudrasya kanyātīrtha upaspṛśet |
tatropaspṛśya rājendra sarvapāpaiḥ pramucyate || 21 ||
[Analyze grammar]

atha gokarṇamāsādya triṣu lokeṣu viśrutam |
samudramadhye rājendra sarvalokanamaskṛtam || 22 ||
[Analyze grammar]

yatra brahmādayo devā ṛṣayaśca tapodhanāḥ |
bhūtayakṣapiśācāśca kiṃnarāḥ samahoragāḥ || 23 ||
[Analyze grammar]

siddhacāraṇagandharvā mānuṣāḥ pannagāstathā |
saritaḥ sāgarāḥ śailā upāsanta umāpatim || 24 ||
[Analyze grammar]

tatreśānaṃ samabhyarcya trirātropoṣito naraḥ |
daśāśvamedhamāpnoti gāṇapatyaṃ ca vindati |
uṣya dvādaśarātraṃ tu kṛtātmā bhavate naraḥ || 25 ||
[Analyze grammar]

tata eva tu gāyatryāḥ sthānaṃ trailokyaviśrutam |
trirātramuṣitastatra gosahasraphalaṃ labhet || 26 ||
[Analyze grammar]

nidarśanaṃ ca pratyakṣaṃ brāhmaṇānāṃ narādhipa |
gāyatrīṃ paṭhate yastu yonisaṃkarajastathā |
gāthā vā gītikā vāpi tasya saṃpadyate nṛpa || 27 ||
[Analyze grammar]

saṃvartasya tu viprarṣervāpīmāsādya durlabhām |
rūpasya bhāgī bhavati subhagaścaiva jāyate || 28 ||
[Analyze grammar]

tato veṇṇāṃ samāsādya tarpayetpitṛdevatāḥ |
mayūrahaṃsasaṃyuktaṃ vimānaṃ labhate naraḥ || 29 ||
[Analyze grammar]

tato godāvarīṃ prāpya nityaṃ siddhaniṣevitām |
gavāmayamavāpnoti vāsukerlokamāpnuyāt || 30 ||
[Analyze grammar]

veṇṇāyāḥ saṃgame snātvā vājapeyaphalaṃ labhet |
varadāsaṃgame snātvā gosahasraphalaṃ labhet || 31 ||
[Analyze grammar]

brahmasthānaṃ samāsādya trirātramuṣito naraḥ |
gosahasraphalaṃ vindetsvargalokaṃ ca gacchati || 32 ||
[Analyze grammar]

kuśaplavanamāsādya brahmacārī samāhitaḥ |
trirātramuṣitaḥ snātvā aśvamedhaphalaṃ labhet || 33 ||
[Analyze grammar]

tato devahrade ramye kṛṣṇaveṇṇājalodbhave |
jātimātrahrade caiva tathā kanyāśrame nṛpa || 34 ||
[Analyze grammar]

yatra kratuśatairiṣṭvā devarājo divaṃ gataḥ |
agniṣṭomaśataṃ vindedgamanādeva bhārata || 35 ||
[Analyze grammar]

sarvadevahrade snātvā gosahasraphalaṃ labhet |
jātimātrahrade snātvā bhavejjātismaro naraḥ || 36 ||
[Analyze grammar]

tato'vāpya mahāpuṇyāṃ payoṣṇīṃ saritāṃ varām |
pitṛdevārcanarato gosahasraphalaṃ labhet || 37 ||
[Analyze grammar]

daṇḍakāraṇyamāsādya mahārāja upaspṛśet |
gosahasraphalaṃ tatra snātamātrasya bhārata || 38 ||
[Analyze grammar]

śarabhaṅgāśramaṃ gatvā śukasya ca mahātmanaḥ |
na durgatimavāpnoti punāti ca kulaṃ naraḥ || 39 ||
[Analyze grammar]

tataḥ śūrpārakaṃ gacchejjāmadagnyaniṣevitam |
rāmatīrthe naraḥ snātvā vindyādbahu suvarṇakam || 40 ||
[Analyze grammar]

saptagodāvare snātvā niyato niyatāśanaḥ |
mahatpuṇyamavāpnoti devalokaṃ ca gacchati || 41 ||
[Analyze grammar]

tato devapathaṃ gacchenniyato niyatāśanaḥ |
devasatrasya yatpuṇyaṃ tadavāpnoti mānavaḥ || 42 ||
[Analyze grammar]

tuṅgakāraṇyamāsādya brahmacārī jitendriyaḥ |
vedānadhyāpayattatra ṛṣiḥ sārasvataḥ purā || 43 ||
[Analyze grammar]

tatra vedānpranaṣṭāṃstu muneraṅgirasaḥ sutaḥ |
upaviṣṭo maharṣīṇāmuttarīyeṣu bhārata || 44 ||
[Analyze grammar]

oṃkāreṇa yathānyāyaṃ samyaguccāritena ca |
yena yatpūrvamabhyastaṃ tattasya samupasthitam || 45 ||
[Analyze grammar]

ṛṣayastatra devāśca varuṇo'gniḥ prajāpatiḥ |
harirnārāyaṇo devo mahādevastathaiva ca || 46 ||
[Analyze grammar]

pitāmahaśca bhagavāndevaiḥ saha mahādyutiḥ |
bhṛguṃ niyojayāmāsa yājanārthe mahādyutim || 47 ||
[Analyze grammar]

tataḥ sa cakre bhagavānṛṣīṇāṃ vidhivattadā |
sarveṣāṃ punarādhānaṃ vidhidṛṣṭena karmaṇā || 48 ||
[Analyze grammar]

ājyabhāgena vai tatra tarpitāstu yathāvidhi |
devāstribhuvaṇaṃ yātā ṛṣayaśca yathāsukham || 49 ||
[Analyze grammar]

tadaraṇyaṃ praviṣṭasya tuṅgakaṃ rājasattama |
pāpaṃ praṇaśyate sarvaṃ striyo vā puruṣasya vā || 50 ||
[Analyze grammar]

tatra māsaṃ vaseddhīro niyato niyatāśanaḥ |
brahmalokaṃ vrajedrājanpunīte ca kulaṃ naraḥ || 51 ||
[Analyze grammar]

medhāvikaṃ samāsādya pitṝndevāṃśca tarpayet |
agniṣṭomamavāpnoti smṛtiṃ medhāṃ ca vindati || 52 ||
[Analyze grammar]

tataḥ kālaṃjaraṃ gatvā parvataṃ lokaviśrutam |
tatra devahrade snātvā gosahasraphalaṃ labhet || 53 ||
[Analyze grammar]

ātmānaṃ sādhayettatra girau kālaṃjare nṛpa |
svargaloke mahīyeta naro nāstyatra saṃśayaḥ || 54 ||
[Analyze grammar]

tato girivaraśreṣṭhe citrakūṭe viśāṃ pate |
mandākinīṃ samāsādya nadīṃ pāpapramocanīm || 55 ||
[Analyze grammar]

tatrābhiṣekaṃ kurvāṇaḥ pitṛdevārcane rataḥ |
aśvamedhamavāpnoti gatiṃ ca paramāṃ vrajet || 56 ||
[Analyze grammar]

tato gaccheta rājendra bhartṛsthānamanuttamam |
yatra devo mahāseno nityaṃ saṃnihito nṛpaḥ || 57 ||
[Analyze grammar]

pumāṃstatra naraśreṣṭha gamanādeva sidhyati |
koṭitīrthe naraḥ snātvā gosahasraphalaṃ labhet || 58 ||
[Analyze grammar]

pradakṣiṇamupāvṛtya jyeṣṭhasthānaṃ vrajennaraḥ |
abhigamya mahādevaṃ virājati yathā śaśī || 59 ||
[Analyze grammar]

tatra kūpo mahārāja viśruto bharatarṣabha |
samudrāstatra catvāro nivasanti yudhiṣṭhira || 60 ||
[Analyze grammar]

tatropaspṛśya rājendra kṛtvā cāpi pradakṣiṇam |
niyatātmā naraḥ pūto gaccheta paramāṃ gatim || 61 ||
[Analyze grammar]

tato gacchetkuruśreṣṭha śṛṅgaverapuraṃ mahat |
yatra tīrṇo mahārāja rāmo dāśarathiḥ purā || 62 ||
[Analyze grammar]

gaṅgāyāṃ tu naraḥ snātvā brahmacārī samāhitaḥ |
vidhūtapāpmā bhavati vājapeyaṃ ca vindati || 63 ||
[Analyze grammar]

abhigamya mahādevamabhyarcya ca narādhipa |
pradakṣiṇamupāvṛtya gāṇapatyamavāpnuyāt || 64 ||
[Analyze grammar]

tato gaccheta rājendra prayāgamṛṣisaṃstutam |
yatra brahmādayo devā diśaśca sadigīśvarāḥ || 65 ||
[Analyze grammar]

lokapālāśca sādhyāśca nairṛtāḥ pitarastathā |
sanatkumārapramukhāstathaiva paramarṣayaḥ || 66 ||
[Analyze grammar]

aṅgiraḥpramukhāścaiva tathā brahmarṣayo'pare |
tathā nāgāḥ suparṇāśca siddhāścakracarāstathā || 67 ||
[Analyze grammar]

saritaḥ sāgarāścaiva gandharvāpsarasastathā |
hariśca bhagavānāste prajāpatipuraskṛtaḥ || 68 ||
[Analyze grammar]

tatra trīṇyagnikuṇḍāni yeṣāṃ madhye ca jāhnavī |
prayāgādabhiniṣkrāntā sarvatīrthapuraskṛtā || 69 ||
[Analyze grammar]

tapanasya sutā tatra triṣu lokeṣu viśrutā |
yamunā gaṅgayā sārdhaṃ saṃgatā lokapāvanī || 70 ||
[Analyze grammar]

gaṅgāyamunayormadhyaṃ pṛthivyā jaghanaṃ smṛtam |
prayāgaṃ jaghanasyāntamupasthamṛṣayo viduḥ || 71 ||
[Analyze grammar]

prayāgaṃ sapratiṣṭhānaṃ kambalāśvatarau tathā |
tīrthaṃ bhogavatī caiva vedī proktā prajāpateḥ || 72 ||
[Analyze grammar]

tatra vedāśca yajñāśca mūrtimanto yudhiṣṭhira |
prajāpatimupāsante ṛṣayaśca mahāvratāḥ |
yajante kratubhirdevāstathā cakracarā nṛpa || 73 ||
[Analyze grammar]

tataḥ puṇyatamaṃ nāsti triṣu lokeṣu bhārata |
prayāgaḥ sarvatīrthebhyaḥ prabhavatyadhikaṃ vibho || 74 ||
[Analyze grammar]

śravaṇāttasya tīrthasya nāmasaṃkīrtanādapi |
mṛttikālambhanādvāpi naraḥ pāpātpramucyate || 75 ||
[Analyze grammar]

tatrābhiṣekaṃ yaḥ kuryātsaṃgame saṃśitavrataḥ |
puṇyaṃ sa phalamāpnoti rājasūyāśvamedhayoḥ || 76 ||
[Analyze grammar]

eṣā yajanabhūmirhi devānāmapi satkṛtā |
tatra dattaṃ sūkṣmamapi mahadbhavati bhārata || 77 ||
[Analyze grammar]

na vedavacanāttāta na lokavacanādapi |
matirutkramaṇīyā te prayāgamaraṇaṃ prati || 78 ||
[Analyze grammar]

daśa tīrthasahasrāṇi ṣaṣṭikoṭyastathāparāḥ |
yeṣāṃ sāṃnidhyamatraiva kīrtitaṃ kurunandana || 79 ||
[Analyze grammar]

cāturvede ca yatpuṇyaṃ satyavādiṣu caiva yat |
snāta eva tadāpnoti gaṅgāyamunasaṃgame || 80 ||
[Analyze grammar]

tatra bhogavatī nāma vāsukestīrthamuttamam |
tatrābhiṣekaṃ yaḥ kuryātso'śvamedhamavāpnuyāt || 81 ||
[Analyze grammar]

tatra haṃsaprapatanaṃ tīrthaṃ trailokyaviśrutam |
daśāśvamedhikaṃ caiva gaṅgāyāṃ kurunandana || 82 ||
[Analyze grammar]

yatra gaṅgā mahārāja sa deśastattapovanam |
siddhakṣetraṃ tu tajjñeyaṃ gaṅgātīrasamāśritam || 83 ||
[Analyze grammar]

idaṃ satyaṃ dvijātīnāṃ sādhūnāmātmajasya ca |
suhṛdāṃ ca japetkarṇe śiṣyasyānugatasya ca || 84 ||
[Analyze grammar]

idaṃ dharmyamidaṃ puṇyamidaṃ medhyamidaṃ sukham |
idaṃ svargyamidaṃ ramyamidaṃ pāvanamuttamam || 85 ||
[Analyze grammar]

maharṣīṇāmidaṃ guhyaṃ sarvapāpapramocanam |
adhītya dvijamadhye ca nirmalatvamavāpnuyāt || 86 ||
[Analyze grammar]

yaścedaṃ śṛṇuyānnityaṃ tīrthapuṇyaṃ sadā śuciḥ |
jātīḥ sa smarate bahvīrnākapṛṣṭhe ca modate || 87 ||
[Analyze grammar]

gamyānyapi ca tīrthāni kīrtitānyagamāni ca |
manasā tāni gaccheta sarvatīrthasamīkṣayā || 88 ||
[Analyze grammar]

etāni vasubhiḥ sādhyairādityairmarudaśvibhiḥ |
ṛṣibhirdevakalpaiśca śritāni sukṛtaiṣibhiḥ || 89 ||
[Analyze grammar]

evaṃ tvamapi kauravya vidhinānena suvrata |
vraja tīrthāni niyataḥ puṇyaṃ puṇyena vardhate || 90 ||
[Analyze grammar]

bhāvitaiḥ kāraṇaiḥ pūrvamāstikyācchrutidarśanāt |
prāpyante tāni tīrthāni sadbhiḥ śiṣṭānudarśibhiḥ || 91 ||
[Analyze grammar]

nāvrato nākṛtātmā ca nāśucirna ca taskaraḥ |
snāti tīrtheṣu kauravya na ca vakramatirnaraḥ || 92 ||
[Analyze grammar]

tvayā tu samyagvṛttena nityaṃ dharmārthadarśinā |
pitarastāritāstāta sarve ca prapitāmahāḥ || 93 ||
[Analyze grammar]

pitāmahapurogāśca devāḥ sarṣigaṇā nṛpa |
tava dharmeṇa dharmajña nityamevābhitoṣitāḥ || 94 ||
[Analyze grammar]

avāpsyasi ca lokānvai vasūnāṃ vāsavopama |
kīrtiṃ ca mahatīṃ bhīṣma prāpsyase bhuvi śāśvatīm || 95 ||
[Analyze grammar]

nārada uvāca |
evamuktvābhyanujñāpya pulastyo bhagavānṛṣiḥ |
prītaḥ prītena manasā tatraivāntaradhīyata || 96 ||
[Analyze grammar]

bhīṣmaśca kuruśārdūla śāstratattvārthadarśivān |
pulastyavacanāccaiva pṛthivīmanucakrame || 97 ||
[Analyze grammar]

anena vidhinā yastu pṛthivīṃ saṃcariṣyati |
aśvamedhaśatasyāgryaṃ phalaṃ pretya sa bhokṣyate || 98 ||
[Analyze grammar]

ataścāṣṭaguṇaṃ pārtha prāpsyase dharmamuttamam |
netā ca tvamṛṣīnyasmāttena te'ṣṭaguṇaṃ phalam || 99 ||
[Analyze grammar]

rakṣogaṇāvakīrṇāni tīrthānyetāni bhārata |
na gatirvidyate'nyasya tvāmṛte kurunandana || 100 ||
[Analyze grammar]

idaṃ devarṣicaritaṃ sarvatīrthārthasaṃśritam |
yaḥ paṭhetkalyamutthāya sarvapāpaiḥ pramucyate || 101 ||
[Analyze grammar]

ṛṣimukhyāḥ sadā yatra vālmīkistvatha kāśyapaḥ |
ātreyastvatha kauṇḍinyo viśvāmitro'tha gautamaḥ || 102 ||
[Analyze grammar]

asito devalaścaiva mārkaṇḍeyo'tha gālavaḥ |
bharadvājo vasiṣṭhaśca muniruddālakastathā || 103 ||
[Analyze grammar]

śaunakaḥ saha putreṇa vyāsaśca japatāṃ varaḥ |
durvāsāśca muniśreṣṭho gālavaśca mahātapāḥ || 104 ||
[Analyze grammar]

ete ṛṣivarāḥ sarve tvatpratīkṣāstapodhanāḥ |
ebhiḥ saha mahārāja tīrthānyetānyanuvraja || 105 ||
[Analyze grammar]

eṣa vai lomaśo nāma devarṣiramitadyutiḥ |
sameṣyati tvayā caiva tena sārdhamanuvraja || 106 ||
[Analyze grammar]

mayā ca saha dharmajña tīrthānyetānyanuvraja |
prāpsyase mahatīṃ kīrtiṃ yathā rājā mahābhiṣaḥ || 107 ||
[Analyze grammar]

yathā yayātirdharmātmā yathā rājā purūravāḥ |
tathā tvaṃ kuruśārdūla svena dharmeṇa śobhase || 108 ||
[Analyze grammar]

yathā bhagīratho rājā yathā rāmaśca viśrutaḥ |
tathā tvaṃ sarvarājabhyo bhrājase raśmivāniva || 109 ||
[Analyze grammar]

yathā manuryathekṣvākuryathā pūrurmahāyaśāḥ |
yathā vainyo mahātejāstathā tvamapi viśrutaḥ || 110 ||
[Analyze grammar]

yathā ca vṛtrahā sarvānsapatnānnirdahatpurā |
tathā śatrukṣayaṃ kṛtvā prajāstvaṃ pālayiṣyasi || 111 ||
[Analyze grammar]

svadharmavijitāmurvīṃ prāpya rājīvalocana |
khyātiṃ yāsyasi dharmeṇa kārtavīryārjuno yathā || 112 ||
[Analyze grammar]

vaiśaṃpāyana uvāca |
evamāśvāsya rājānaṃ nārado bhagavānṛṣiḥ |
anujñāpya mahātmānaṃ tatraivāntaradhīyata || 113 ||
[Analyze grammar]

yudhiṣṭhiro'pi dharmātmā tamevārthaṃ vicintayan |
tīrthayātrāśrayaṃ puṇyamṛṣīṇāṃ pratyavedayat || 114 ||
[Analyze grammar]