Chapter 149

bhīṣma uvāca |
śṛṇu pārtha yathāvṛttamitihāsaṃ purātanam |
gṛdhrajambukasaṃvādaṃ yo vṛtto vaidiśe purā || 1 ||
[Analyze grammar]

duḥkhitāḥ kecidādāya bālamaprāptayauvanam |
kulasarvasvabhūtaṃ vai rudantaḥ śokavihvalāḥ || 2 ||
[Analyze grammar]

bālaṃ mṛtaṃ gṛhītvātha śmaśānābhimukhāḥ sthitāḥ |
aṅkenāṅkaṃ ca saṃkramya rurudurbhūtale tadā || 3 ||
[Analyze grammar]

teṣāṃ ruditaśabdena gṛdhro'bhyetya vaco'bravīt |
ekātmakamimaṃ loke tyaktvā gacchata māciram || 4 ||
[Analyze grammar]

iha puṃsāṃ sahasrāṇi strīsahasrāṇi caiva hi |
samānītāni kālena kiṃ te vai jātvabāndhavāḥ || 5 ||
[Analyze grammar]

saṃpaśyata jagatsarvaṃ sukhaduḥkhairadhiṣṭhitam |
saṃyogo viprayogaśca paryāyeṇopalabhyate || 6 ||
[Analyze grammar]

gṛhītvā ye ca gacchanti ye'nuyānti ca tānmṛtān |
te'pyāyuṣaḥ pramāṇena svena gacchanti jantavaḥ || 7 ||
[Analyze grammar]

alaṃ sthitvā śmaśāne'smingṛdhragomāyusaṃkule |
kaṅkālabahule ghore sarvaprāṇibhayaṃkare || 8 ||
[Analyze grammar]

na punarjīvitaḥ kaścitkāladharmamupāgataḥ |
priyo vā yadi vā dveṣyaḥ prāṇināṃ gatirīdṛśī || 9 ||
[Analyze grammar]

sarveṇa khalu martavyaṃ martyaloke prasūyatā |
kṛtāntavihite mārge ko mṛtaṃ jīvayiṣyati || 10 ||
[Analyze grammar]

karmāntavihite loke cāstaṃ gacchati bhāskare |
gamyatāṃ svamadhiṣṭhānaṃ sutasnehaṃ visṛjya vai || 11 ||
[Analyze grammar]

tato gṛdhravacaḥ śrutvā vikrośantastadā nṛpa |
bāndhavāste'bhyagacchanta putramutsṛjya bhūtale || 12 ||
[Analyze grammar]

viniścityātha ca tataḥ saṃtyajantaḥ svamātmajam |
nirāśā jīvite tasya mārgamāruhya dhiṣṭhitāḥ || 13 ||
[Analyze grammar]

dhvāṅkṣābhrasamavarṇastu bilānniḥsṛtya jambukaḥ |
gacchamānānsma tānāha nirghṛṇāḥ khalu mānavāḥ || 14 ||
[Analyze grammar]

ādityo'yaṃ sthito mūḍhāḥ snehaṃ kuruta mā bhayam |
bahurūpo muhūrtaśca jīvetāpi kadācana || 15 ||
[Analyze grammar]

yūyaṃ bhūmau vinikṣipya putrasnehavinākṛtāḥ |
śmaśāne putramutsṛjya kasmādgacchatha nirghṛṇāḥ || 16 ||
[Analyze grammar]

na vo'styasminsute sneho bāle madhurabhāṣiṇi |
yasya bhāṣitamātreṇa prasādamupagacchatha || 17 ||
[Analyze grammar]

na paśyatha sutasnehaṃ yādṛśaḥ paśupakṣiṇām |
na yeṣāṃ dhārayitvā tānkaścidasti phalāgamaḥ || 18 ||
[Analyze grammar]

catuṣpātpakṣikīṭānāṃ prāṇināṃ snehasaṅginām |
paralokagatisthānāṃ muniyajñakriyā iva || 19 ||
[Analyze grammar]

teṣāṃ putrābhirāmāṇāmiha loke paratra ca |
na guṇo dṛśyate kaścitprajāḥ saṃdhārayanti ca || 20 ||
[Analyze grammar]

apaśyatāṃ priyānputrānnaiṣāṃ śoko'nutiṣṭhati |
na ca puṣṇanti saṃvṛddhāste mātāpitarau kvacit || 21 ||
[Analyze grammar]

mānuṣāṇāṃ kutaḥ sneho yeṣāṃ śoko bhaviṣyati |
imaṃ kulakaraṃ putraṃ kathaṃ tyaktvā gamiṣyatha || 22 ||
[Analyze grammar]

ciraṃ muñcata bāṣpaṃ ca ciraṃ snehena paśyata |
evaṃvidhāni hīṣṭāni dustyajāni viśeṣataḥ || 23 ||
[Analyze grammar]

kṣīṇasyāthābhiyuktasya śmaśānābhimukhasya ca |
bāndhavā yatra tiṣṭhanti tatrānyo nāvatiṣṭhate || 24 ||
[Analyze grammar]

sarvasya dayitāḥ prāṇāḥ sarvaḥ snehaṃ ca vindati |
tiryagyoniṣvapi satāṃ snehaṃ paśyata yādṛśam || 25 ||
[Analyze grammar]

tyaktvā kathaṃ gacchethemaṃ padmalolāyatākṣakam |
yathā navodvāhakṛtaṃ snānamālyavibhūṣitam || 26 ||
[Analyze grammar]

bhīṣma uvāca |
jambukasya vacaḥ śrutvā kṛpaṇaṃ paridevataḥ |
nyavartanta tadā sarve śavārthaṃ te sma mānuṣāḥ || 27 ||
[Analyze grammar]

gṛdhra uvāca |
aho dhiksunṛśaṃsena jambukenālpamedhasā |
kṣudreṇoktā hīnasattvā mānuṣāḥ kiṃ nivartatha || 28 ||
[Analyze grammar]

pañcabhūtaparityaktaṃ śūnyaṃ kāṣṭhatvamāgatam |
kasmācchocatha niśceṣṭamātmānaṃ kiṃ na śocatha || 29 ||
[Analyze grammar]

tapaḥ kuruta vai tīvraṃ mucyadhvaṃ yena kilbiṣāt |
tapasā labhyate sarvaṃ vilāpaḥ kiṃ kariṣyati || 30 ||
[Analyze grammar]

aniṣṭāni ca bhāgyāni jānīta saha mūrtibhiḥ |
yena gacchati loko'yaṃ dattvā śokamanantakam || 31 ||
[Analyze grammar]

dhanaṃ gāśca suvarṇaṃ ca maṇiratnamathāpi ca |
apatyaṃ ca tapomūlaṃ tapoyogācca labhyate || 32 ||
[Analyze grammar]

yathākṛtā ca bhūteṣu prāpyate sukhaduḥkhatā |
gṛhītvā jāyate janturduḥkhāni ca sukhāni ca || 33 ||
[Analyze grammar]

na karmaṇā pituḥ putraḥ pitā vā putrakarmaṇā |
mārgeṇānyena gacchanti tyaktvā sukṛtaduṣkṛte || 34 ||
[Analyze grammar]

dharmaṃ carata yatnena tathādharmānnivartata |
vartadhvaṃ ca yathākālaṃ daivateṣu dvijeṣu ca || 35 ||
[Analyze grammar]

śokaṃ tyajata dainyaṃ ca sutasnehānnivartata |
tyajyatāmayamākāśe tataḥ śīghraṃ nivartata || 36 ||
[Analyze grammar]

yatkaroti śubhaṃ karma tathādharmaṃ sudāruṇam |
tatkartaiva samaśnāti bāndhavānāṃ kimatra hi || 37 ||
[Analyze grammar]

iha tyaktvā na tiṣṭhanti bāndhavā bāndhavaṃ priyam |
snehamutsṛjya gacchanti bāṣpapūrṇāvilekṣaṇāḥ || 38 ||
[Analyze grammar]

prājño vā yadi vā mūrkhaḥ sadhano nirdhano'pi vā |
sarvaḥ kālavaśaṃ yāti śubhāśubhasamanvitaḥ || 39 ||
[Analyze grammar]

kiṃ kariṣyatha śocitvā mṛtaṃ kimanuśocatha |
sarvasya hi prabhuḥ kālo dharmataḥ samadarśanaḥ || 40 ||
[Analyze grammar]

yauvanasthāṃśca bālāṃśca vṛddhāngarbhagatānapi |
sarvānāviśate mṛtyurevaṃbhūtamidaṃ jagat || 41 ||
[Analyze grammar]

jambuka uvāca |
aho mandīkṛtaḥ sneho gṛdhreṇehālpamedhasā |
putrasnehābhibhūtānāṃ yuṣmākaṃ śocatāṃ bhṛśam || 42 ||
[Analyze grammar]

samaiḥ samyakprayuktaiśca vacanaiḥ praśrayottaraiḥ |
yadgacchatha jalasthāyaṃ snehamutsṛjya dustyajam || 43 ||
[Analyze grammar]

aho putraviyogena mṛtaśūnyopasevanāt |
krośatāṃ vai bhṛśaṃ duḥkhaṃ vivatsānāṃ gavāmiva || 44 ||
[Analyze grammar]

adya śokaṃ vijānāmi mānuṣāṇāṃ mahītale |
snehaṃ hi karuṇaṃ dṛṣṭvā mamāpyaśrūṇyathāgaman || 45 ||
[Analyze grammar]

yatno hi satataṃ kāryaḥ kṛto daivena sidhyati |
daivaṃ puruṣakāraśca kṛtāntenopapadyate || 46 ||
[Analyze grammar]

anirvedaḥ sadā kāryo nirvedāddhi kutaḥ sukham |
prayatnātprāpyate hyarthaḥ kasmādgacchatha nirdayāḥ || 47 ||
[Analyze grammar]

ātmamāṃsopavṛttaṃ ca śarīrārdhamayīṃ tanum |
pitṝṇāṃ vaṃśakartāraṃ vane tyaktvā kva yāsyatha || 48 ||
[Analyze grammar]

atha vāstaṃ gate sūrye saṃdhyākāla upasthite |
tato neṣyatha vā putramihasthā vā bhaviṣyatha || 49 ||
[Analyze grammar]

gṛdhra uvāca |
adya varṣasahasraṃ me sāgraṃ jātasya mānuṣāḥ |
na ca paśyāmi jīvantaṃ mṛtaṃ strīpuṃnapuṃsakam || 50 ||
[Analyze grammar]

mṛtā garbheṣu jāyante mriyante jātamātrakāḥ |
vikramanto mriyante ca yauvanasthāstathāpare || 51 ||
[Analyze grammar]

anityānīha bhāgyāni catuṣpātpakṣiṇāmapi |
jaṅgamājaṅgamānāṃ cāpyāyuragre'vatiṣṭhate || 52 ||
[Analyze grammar]

iṣṭadāraviyuktāśca putraśokānvitāstathā |
dahyamānāḥ sma śokena gṛhaṃ gacchanti nityadā || 53 ||
[Analyze grammar]

aniṣṭānāṃ sahasrāṇi tatheṣṭānāṃ śatāni ca |
utsṛjyeha prayātā vai bāndhavā bhṛśaduḥkhitāḥ || 54 ||
[Analyze grammar]

tyajyatāmeṣa nistejāḥ śūnyaḥ kāṣṭhatvamāgataḥ |
anyadehaviṣakto hi śāvaṃ kāṣṭhamupāsate || 55 ||
[Analyze grammar]

bhrāntajīvasya vai bāṣpaṃ kasmāddhitvā na gacchatha |
nirarthako hyayaṃ sneho nirarthaśca parigrahaḥ || 56 ||
[Analyze grammar]

na cakṣurbhyāṃ na karṇābhyāṃ saṃśṛṇoti samīkṣate |
tasmādenaṃ samutsṛjya svagṛhāngacchatāśu vai || 57 ||
[Analyze grammar]

mokṣadharmāśritairvākyairhetumadbhiraniṣṭhuraiḥ |
mayoktā gacchata kṣipraṃ svaṃ svameva niveśanam || 58 ||
[Analyze grammar]

prajñāvijñānayuktena buddhisaṃjñāpradāyinā |
vacanaṃ śrāvitā rūkṣaṃ mānuṣāḥ saṃnivartata || 59 ||
[Analyze grammar]

jambuka uvāca |
imaṃ kanakavarṇābhaṃ bhūṣaṇaiḥ samalaṃkṛtam |
gṛdhravākyātkathaṃ putraṃ tyajadhvaṃ pitṛpiṇḍadam || 60 ||
[Analyze grammar]

na snehasya virodho'sti vilāparuditasya vai |
mṛtasyāsya parityāgāttāpo vai bhavitā dhruvam || 61 ||
[Analyze grammar]

śrūyate śambuke śūdre hate brāhmaṇadārakaḥ |
jīvito dharmamāsādya rāmātsatyaparākramāt || 62 ||
[Analyze grammar]

tathā śvetasya rājarṣerbālo diṣṭāntamāgataḥ |
śvo'bhūte dharmanityena mṛtaḥ saṃjīvitaḥ punaḥ || 63 ||
[Analyze grammar]

tathā kaścidbhavetsiddho munirvā devatāpi vā |
kṛpaṇānāmanukrośaṃ kuryādvo rudatāmiha || 64 ||
[Analyze grammar]

bhīṣma uvāca |
ityuktāḥ saṃnyavartanta śokārtāḥ putravatsalāḥ |
aṅke śiraḥ samādhāya rurudurbahuvistaram || 65 ||
[Analyze grammar]

gṛdhra uvāca |
aśrupātapariklinnaḥ pāṇisparśanapīḍitaḥ |
dharmarājaprayogācca dīrghāṃ nidrāṃ praveśitaḥ || 66 ||
[Analyze grammar]

tapasāpi hi saṃyukto na kāle nopahanyate |
sarvasnehāvasānaṃ tadidaṃ tatpretapattanam || 67 ||
[Analyze grammar]

bālavṛddhasahasrāṇi sadā saṃtyajya bāndhavāḥ |
dināni caiva rātrīśca duḥkhaṃ tiṣṭhanti bhūtale || 68 ||
[Analyze grammar]

alaṃ nirbandhamāgamya śokasya parivāraṇam |
apratyayaṃ kuto hyasya punaradyeha jīvitam || 69 ||
[Analyze grammar]

naiṣa jambukavākyena punaḥ prāpsyati jīvitam |
mṛtasyotsṛṣṭadehasya punardeho na vidyate || 70 ||
[Analyze grammar]

na vai mūrtipradānena na jambukaśatairapi |
śakyo jīvayituṃ hyeṣa bālo varṣaśatairapi || 71 ||
[Analyze grammar]

api rudraḥ kumāro vā brahmā vā viṣṇureva vā |
varamasmai prayaccheyustato jīvedayaṃ śiśuḥ || 72 ||
[Analyze grammar]

na ca bāṣpavimokṣeṇa na cāśvāsakṛtena vai |
na dīrgharuditeneha punarjīvo bhaviṣyati || 73 ||
[Analyze grammar]

ahaṃ ca kroṣṭukaścaiva yūyaṃ caivāsya bāndhavāḥ |
dharmādharmau gṛhītveha sarve vartāmahe'dhvani || 74 ||
[Analyze grammar]

apriyaṃ paruṣaṃ cāpi paradrohaṃ parastriyam |
adharmamanṛtaṃ caiva dūrātprājño nivartayet || 75 ||
[Analyze grammar]

satyaṃ dharmaṃ śubhaṃ nyāyyaṃ prāṇināṃ mahatīṃ dayām |
ajihmatvamaśāṭhyaṃ ca yatnataḥ parimārgata || 76 ||
[Analyze grammar]

mātaraṃ pitaraṃ caiva bāndhavānsuhṛdastathā |
jīvato ye na paśyanti teṣāṃ dharmaviparyayaḥ || 77 ||
[Analyze grammar]

yo na paśyati cakṣurbhyāṃ neṅgate ca kathaṃcana |
tasya niṣṭhāvasānānte rudantaḥ kiṃ kariṣyatha || 78 ||
[Analyze grammar]

bhīṣma uvāca |
ityuktāstaṃ sutaṃ tyaktvā bhūmau śokapariplutāḥ |
dahyamānāḥ sutasnehātprayayurbāndhavā gṛhān || 79 ||
[Analyze grammar]

jambuka uvāca |
dāruṇo martyaloko'yaṃ sarvaprāṇivināśanaḥ |
iṣṭabandhuviyogaśca tathaivālpaṃ ca jīvitam || 80 ||
[Analyze grammar]

bahvalīkamasatyaṃ ca prativādāpriyaṃvadam |
imaṃ prekṣya punarbhāvaṃ duḥkhaśokābhivardhanam || 81 ||
[Analyze grammar]

na me mānuṣaloko'yaṃ muhūrtamapi rocate |
aho dhiggṛdhravākyena saṃnivartatha mānuṣāḥ || 82 ||
[Analyze grammar]

pradīptāḥ putraśokena yathaivābuddhayastathā |
kathaṃ gacchatha sasnehāḥ sutasnehaṃ visṛjya ca |
śrutvā gṛdhrasya vacanaṃ pāpasyehākṛtātmanaḥ || 83 ||
[Analyze grammar]

sukhasyānantaraṃ duḥkhaṃ duḥkhasyānantaraṃ sukham |
sukhaduḥkhānvite loke nehāstyekamanantakam || 84 ||
[Analyze grammar]

imaṃ kṣititale nyasya bālaṃ rūpasamanvitam |
kulaśokākaraṃ mūḍhāḥ putraṃ tyaktvā kva yāsyatha || 85 ||
[Analyze grammar]

rūpayauvanasaṃpannaṃ dyotamānamiva śriyā |
jīvantamenaṃ paśyāmi manasā nātra saṃśayaḥ || 86 ||
[Analyze grammar]

vināśaścāpyanarho'sya sukhaṃ prāpsyatha mānuṣāḥ |
putraśokāgnidagdhānāṃ mṛtamapyadya vaḥ kṣamam || 87 ||
[Analyze grammar]

duḥkhasaṃbhāvanāṃ kṛtvā dhārayitvā svayaṃ sukham |
tyaktvā gamiṣyatha kvādya samutsṛjyālpabuddhivat || 88 ||
[Analyze grammar]

bhīṣma uvāca |
tathā dharmavirodhena priyamithyābhidhyāyinā |
śmaśānavāsinā nityaṃ rātriṃ mṛgayatā tadā || 89 ||
[Analyze grammar]

tato madhyasthatāṃ nītā vacanairamṛtopamaiḥ |
jambukena svakāryārthaṃ bāndhavāstasya dhiṣṭhitāḥ || 90 ||
[Analyze grammar]

gṛdhra uvāca |
ayaṃ pretasamākīrṇo yakṣarākṣasasevitaḥ |
dāruṇaḥ kānanoddeśaḥ kauśikairabhināditaḥ || 91 ||
[Analyze grammar]

bhīmaḥ sughoraśca tathā nīlameghasamaprabhaḥ |
asmiñśavaṃ parityajya pretakāryāṇyupāsata || 92 ||
[Analyze grammar]

bhānuryāvanna yātyastaṃ yāvacca vimalā diśaḥ |
tāvadenaṃ parityajya pretakāryāṇyupāsata || 93 ||
[Analyze grammar]

nadanti paruṣaṃ śyenāḥ śivāḥ krośanti dāruṇāḥ |
mṛgendrāḥ pratinandanti ravirastaṃ ca gacchati || 94 ||
[Analyze grammar]

citādhūmena nīlena saṃrajyante ca pādapāḥ |
śmaśāne ca nirāhārāḥ pratinandanti dehinaḥ || 95 ||
[Analyze grammar]

sarve vikrāntavīryāśca asmindeśe sudāruṇāḥ |
yuṣmānpradharṣayiṣyanti vikṛtā māṃsabhojanāḥ || 96 ||
[Analyze grammar]

dūrāccāyaṃ vanoddeśo bhayamatra bhaviṣyati |
tyajyatāṃ kāṣṭhabhūto'yaṃ mṛṣyatāṃ jāmbukaṃ vacaḥ || 97 ||
[Analyze grammar]

yadi jambukavākyāni niṣphalānyanṛtāni ca |
śroṣyatha bhraṣṭavijñānāstataḥ sarve vinaṅkṣyatha || 98 ||
[Analyze grammar]

jambuka uvāca |
sthīyatāṃ neha bhetavyaṃ yāvattapati bhāskaraḥ |
tāvadasminsutasnehādanirvedena vartata || 99 ||
[Analyze grammar]

svairaṃ rudata visrabdhāḥ svairaṃ snehena paśyata |
sthīyatāṃ yāvadādityaḥ kiṃ vaḥ kravyādabhāṣitaiḥ || 100 ||
[Analyze grammar]

yadi gṛdhrasya vākyāni tīvrāṇi rabhasāni ca |
gṛhṇīta mohitātmānaḥ suto vo na bhaviṣyati || 101 ||
[Analyze grammar]

bhīṣma uvāca |
gṛdhro'nastamite tvāha gate'stamiti jambukaḥ |
mṛtasya taṃ parijanamūcatustau kṣudhānvitau || 102 ||
[Analyze grammar]

svakāryadakṣiṇau rājangṛdhro jambuka eva ca |
kṣutpipāsāpariśrāntau śāstramālambya jalpataḥ || 103 ||
[Analyze grammar]

tayorvijñānaviduṣordvayorjambukapatriṇoḥ |
vākyairamṛtakalpairhi prātiṣṭhanta vrajanti ca || 104 ||
[Analyze grammar]

śokadainyasamāviṣṭā rudantastasthire tadā |
svakāryakuśalābhyāṃ te saṃbhrāmyante ha naipuṇāt || 105 ||
[Analyze grammar]

tathā tayorvivadatorvijñānaviduṣordvayoḥ |
bāndhavānāṃ sthitānāṃ ca upātiṣṭhata śaṃkaraḥ || 106 ||
[Analyze grammar]

tatastānāha manujānvarado'smīti śūlabhṛt |
te pratyūcuridaṃ vākyaṃ duḥkhitāḥ praṇatāḥ sthitāḥ || 107 ||
[Analyze grammar]

ekaputravihīnānāṃ sarveṣāṃ jīvitārthinām |
putrasya no jīvadānājjīvitaṃ dātumarhasi || 108 ||
[Analyze grammar]

evamuktaḥ sa bhagavānvāripūrṇena pāṇinā |
jīvaṃ tasmai kumārāya prādādvarṣaśatāya vai || 109 ||
[Analyze grammar]

tathā gomāyugṛdhrābhyāmadadatkṣudvināśanam |
varaṃ pinākī bhagavānsarvabhūtahite rataḥ || 110 ||
[Analyze grammar]

tataḥ praṇamya taṃ devaṃ śreyoharṣasamanvitāḥ |
kṛtakṛtyāḥ sukhaṃ hṛṣṭāḥ prātiṣṭhanta tadā vibho || 111 ||
[Analyze grammar]

anirvedena dīrgheṇa niścayena dhruveṇa ca |
devadevaprasādācca kṣipraṃ phalamavāpyate || 112 ||
[Analyze grammar]

paśya devasya saṃyogaṃ bāndhavānāṃ ca niścayam |
kṛpaṇānāṃ hi rudatāṃ kṛtamaśrupramārjanam || 113 ||
[Analyze grammar]

paśya cālpena kālena niścayānveṣaṇena ca |
prasādaṃ śaṃkarātprāpya duḥkhitāḥ sukhamāpnuvan || 114 ||
[Analyze grammar]

te vismitāḥ prahṛṣṭāśca putrasaṃjīvanātpunaḥ |
babhūvurbharataśreṣṭha prasādācchaṃkarasya vai || 115 ||
[Analyze grammar]

tataste tvaritā rājañśrutvā śokamaghodbhavam |
viviśuḥ putramādāya nagaraṃ hṛṣṭamānasāḥ |
eṣā buddhiḥ samastānāṃ cāturvarṇye nidarśitā || 116 ||
[Analyze grammar]

dharmārthamokṣasaṃyuktamitihāsamimaṃ śubham |
śrutvā manuṣyaḥ satatamiha pretya ca modate || 117 ||
[Analyze grammar]