Chapter 32

[English text for this chapter is available]

agastya uvāca |
barhiyāna samācakṣva harikeśasamudbhavam |
kosau kasya sutaḥ śrīmānkīdṛgasya tapo mahat || 1 ||
[Analyze grammar]

kathaṃ ca devadevasya priyatvaṃ samupeyivān |
kāśīvāsijanīnobhūtkathaṃ vā daṃḍanāyakaḥ || 2 ||
[Analyze grammar]

etadicchāmyahaṃ śrotuṃ prasādaṃ kuru me vibho |
annadatvaṃ ca saṃprāptaḥ kathameṣa mahāmatiḥ || 3 ||
[Analyze grammar]

saṃbhramo vibhramaścobhau kathaṃ tadanugāminau |
vibhrāṃtikāriṇau kṣetravairiṇāṃ sarvadā nṛṇām || 4 ||
[Analyze grammar]

skaṃda uvāca |
samyagāpṛcchi bhavatā kāśīvāsisamāhitam |
kuṃbhasaṃbhava viprarṣe daṃḍapāṇi kathānakam || 5 ||
[Analyze grammar]

yadākarṇya naraḥ prājña kāśīvāsasya yatphalam |
niṣpratyūhaṃ tadāpnoti viśvabhartturanugrahāt || 6 ||
[Analyze grammar]

ratnabhadra iti khyātaḥ parvate gaṃdhamādane |
yakṣaḥ sukṛtalakṣaśrīḥ purā parama dhārmikaḥ || 7 ||
[Analyze grammar]

pūrṇabhadraṃ sutaṃ prāpya so'bhūtpūrṇamanorathaḥ |
vayaścaramamāsādya bhuktvā bhogānanekaśaḥ || 8 ||
[Analyze grammar]

śāṃbhavenātha yogena dehamutsṛjya pārthivam |
āsasādāśavaṃ śāṃtaṃ śāṃtasarveṃdriyārthakaḥ || 9 ||
[Analyze grammar]

pitaryuparateso'tha pūrṇabhadro mahāyaśāḥ |
sukṛtopāttavibhava bhavasaṃbhogabhuktibhāk || 10 ||
[Analyze grammar]

sarvānmanorathāṃllebhe vinā svargaikasādhanam |
gārhasthyāśrama nepathyaṃ pathyaṃ paitāmahaṃ mahat || 11 ||
[Analyze grammar]

saṃsāratāpasaṃtaptāvayavāmṛtasīkaram |
apatyaṃ patatāṃ potaṃ bahukleśamahārṇave || 12 ||
[Analyze grammar]

pūrṇabhadro'tha saṃvīkṣya maṃdiraṃ sarvasuṃdaram |
tadbālakomalālāpa vikalaṃ tyaktamaṃgalam || 13 ||
[Analyze grammar]

śūnyaṃ daridrahṛdiva jīrṇāraṇyamivāthavā |
pāṃthavatprāṃtaramiva khinno'tīvānapatyavān || 14 ||
[Analyze grammar]

āhūya gṛhiṇī so'tha yakṣaḥ kanakakuṃḍalām |
uvāca yakṣiṇīṃ śreṣṭhāṃ pūrṇabhadro ghaṭodbhava || 15 ||
[Analyze grammar]

na harmyaṃ sukhadaṃ kāṃte darpaṇodarasuṃdaram |
muktā gavākṣasubhagaṃ caṃdrakāṃtaśilājiram || 16 ||
[Analyze grammar]

padmarāgeṃdranīlārcirarcitāṭṭālakaṃ kvaṇat |
vidrumastaṃbhaśobhāḍhyaṃ sphuratsphaṭikakuḍyavat || 17 ||
[Analyze grammar]

preṃkhatpatākānikaraṃ maṇimāṇikyamālitam |
kṛṣṇāgurumahādhūpa bahulāmodamoditam || 18 ||
[Analyze grammar]

anarghyāsanasaṃyuktaṃ cāruparyaṃkabhūṣitam |
ramyārgalakapāṭāḍhyaṃ dukūlacchannamaṃḍapam || 19 ||
[Analyze grammar]

suramyaratiśālāḍhyaṃ vājirājivirājitam |
dāsadāsīśatākīrṇaṃ kiṃkiṇīnādanāditam || 20 ||
[Analyze grammar]

nūpurārāvasotkaṃṭha kekikekāravākulam |
kūjatpārāvata kulaṃ gurusārīkathāvaram || 21 ||
[Analyze grammar]

khelanmarālayugalaṃ jīvaṃ jīvakakāṃtimat |
mālyāhūta dvirephāṇāṃ maṃjuguṃjāravāvṛtam || 22 ||
[Analyze grammar]

karpūraiṇa madāmoda sodarānilavījitam |
krīḍāmarkaṭadaṃṣṭrāgrī kṛtamāṇikyadāḍimam || 23 ||
[Analyze grammar]

dāḍimībījasaṃbhrāṃtaśukatuṃḍāttamauktikam |
dhanadhānyasamṛddhaṃ ca padmālayamivāparam || 24 ||
[Analyze grammar]

kamalāmodagarbhaṃ ca garbharūpaṃ vinā priye |
garbharūpamukhaṃ prekṣye kathaṃ kanakakuḍale || 25 ||
[Analyze grammar]

yadyupāyo'sti tadbrūhi dhigaputrasya jīvitam |
sarvaśūnyamivābhāti gṛhametadanaṃgajam || 26 ||
[Analyze grammar]

dhigetatsaudhasauṃdaryaṃ dhigetaddhanasaṃcayam |
vināpatyaṃ priyatame jīvitaṃ ca dhigāvayoḥ || 217 ||
[Analyze grammar]

pralapaṃtamiva proccaiḥ priyaṃ kanakakuṃḍalā |
babhāṣeṃ'tarviniḥśvasya yakṣiṇī sā pativratā || 28 ||
[Analyze grammar]

kanakakuṃḍalovāca |
kimarthaṃ khidyase kāṃta jñānavānasi yadbhavān |
atropāyo'styapatyāptyai visrabdhamavadhāraya || 29 ||
[Analyze grammar]

kimudyamavatāṃ puṃsāṃ durlabhaṃ hi carācare |
īśvarārpitabuddhīnāṃ sphuṃraṃtyagre manorathāḥ || 30 ||
[Analyze grammar]

daivaṃ hetuṃ vadaṃtyevaṃ bhṛśaṃ kāpuruṣāḥ pate |
svayaṃ purākṛtaṃ karma daivaṃ tacca na hītarat || 31 ||
[Analyze grammar]

tataḥ pauruṣamālaṃbya tatkarma pariśāṃtaye |
īśvaraṃ śaraṇaṃ yāyātsarvakāraṇakāraṇam || 32 ||
[Analyze grammar]

apatyaṃ draviṇaṃ dārā hārā harmya hayā gajāḥ |
sukhāni svargamokṣau ca na dūre śivabhaktitaḥ || 33 ||
[Analyze grammar]

vidhātuḥ śāṃbhavīṃ bhaktiṃ priya sarve manorathāḥ |
siddhayoṣṭau gṛhadvāraṃ sevaṃte nātra saṃśayaḥ || 34 ||
[Analyze grammar]

nārāyaṇopi bhagavānaṃtarātmā jagatpatiḥ |
carācarāṇāmavitā jātaḥ śrīkaṃṭhasevayā || 35 ||
[Analyze grammar]

brahmaṇaḥ sṛṣṭikarttṛtvaṃ dattaṃ tenaiva śaṃbhunā |
iṃdrādayo lokapālā jātā śaṃbhoranugrahāt || 36 ||
[Analyze grammar]

mṛtyuṃjayaṃ sutaṃ lebhe śilādopyanapatyavān |
śvetaketurapi prāpa jīvitaṃ kālapāśataḥ || 37 ||
[Analyze grammar]

kṣīrārṇavādhipatitāmupamanyuravāptavān |
aṃdhakopyabhavadbhṛṃgī gāṇapatyapadorjitaḥ || 38 ||
[Analyze grammar]

jigāya śārṅgiṇaṃ saṃkhye dadhīciḥ śaṃbhusevayā |
prājāpatyapadaṃ prāpa dakṣaḥ saṃśīlya śaṃkaram || 39 ||
[Analyze grammar]

manorathapathātītaṃ yacca vācāmagocaram |
gocaro gocarīkuryāttatpadaṃ kṣaṇato mṛḍaḥ || 40 ||
[Analyze grammar]

anārādhya maheśānaṃ sarvadaṃ sarvadehinām |
kopi kvāpi kimapyatra na labheteti niścitam || 41 ||
[Analyze grammar]

tasmātsarvaprayatnena śaṃkaraṃ śaraṇaṃ vraja |
yadicchasi priyaṃ putraṃ priyasarvajanīnakam || 42 ||
[Analyze grammar]

iti śrutvā vacaḥ patnyāḥ pūrṇabhadraḥ sa yakṣarāṭ |
ārādhya śrīmahādevaṃ gītajño gītavidyayā || 43 ||
[Analyze grammar]

dinaiḥ katipayaireva paripūrṇamanorathaḥ |
putrakāmamavāpoccaistasyāṃ patnyāṃ dṛḍhavrataḥ || 44 ||
[Analyze grammar]

nādeśvaraṃ samabhyarcya kaiḥ kairnāpi svaciṃtitam |
tasmātkāśyāṃ prayatnena sevyo nādeśvaro nṛbhiḥ || 45 ||
[Analyze grammar]

aṃtarvatnyatha kālane tatpatnī suṣuve sutam |
tasya nāma pitā cakre harikeśa iti dvija || 46 ||
[Analyze grammar]

prītidāyaṃ dadau cātha bhūriputrānanekṣaṇāt |
pūrṇabhadrastathāgastya hṛṣṭā kanakakuṃḍalā || 47 ||
[Analyze grammar]

bālo'pi pūrṇacaṃdrābha vadano madanopamaḥ |
vṛddhiṃ pratikṣaṇaṃ prāpa śuklapakṣa ivoḍurāṭ || 48 ||
[Analyze grammar]

yadāṣṭavarṣadeśīyo harikeśo'bhavacchiśuḥ |
nityaṃ tadāprabhṛtyevaṃ śivamekamamanyata || 49 ||
[Analyze grammar]

pāṃsukrīḍanasaktopi kuryālliṃgaṃ rajomayam |
śādvalaiḥ komalatṛṇaiḥ pūjayecca sa kautukam || 50 ||
[Analyze grammar]

ākārayati mitrāṇi śivanāmnā'khilāni saḥ |
caṃdraśekharabhūteśa mṛtyuṃjaya mṛḍeśvaraḥ || 51 ||
[Analyze grammar]

dhūrjaṭe khaṃḍaparaśo mṛḍānīśa trilocana |
bhargaśaṃbhopaśupate pinākinnugraśaṃkara || 52 ||
[Analyze grammar]

śrīkaṃṭhanīlakaṃṭheśa smarāre pārvatīpate |
kapālinbhālanayana śūlapāṇe maheśvara || 5 || || 3 ||
[Analyze grammar]

ajināṃbaradigvāsaḥ svardhunī klinnamaulija |
virūpākṣāhinepathya gṛṇannāmāvalīmimām || 54 ||
[Analyze grammar]

savayaskāniti muhuḥ samāhvayati lālayan |
śabdagrahau na gṛhṇītastasyānyākhyāṃ harādṛte || 55 ||
[Analyze grammar]

padbhyāṃ na padyate cānyadṛte bhūteśvarājirāt |
draṣṭuṃ rūpāṃtaraṃ tasya vīkṣaṇena vicakṣaṇe || 56 ||
[Analyze grammar]

rasayettasya rasanā haranāmākṣarāmṛtam |
śivāṃghrikamalāmodādghrāṇaṃ naiva jighṛkṣati || 57 ||
[Analyze grammar]

karau tatkautukakarau mano manati nāparam |
śivasātkṛtyapeyāni pīyate tena saddhiyā || 58 ||
[Analyze grammar]

bhakṣyate sarvabhakṣyāṇi tryakṣapratyakṣagānyapi |
sarvāvasthāsu sarvatra na sa paśyecchivaṃ vinā || 59 ||
[Analyze grammar]

gacchangāyansvapaṃstiṣṭhañcchayāno'danpibannapi |
paritastryakṣamaikṣiṣṭa nānyaṃ bhāvaṃ ciketi saḥ || 60 ||
[Analyze grammar]

kṣaṇadāsu prasuptopi kva yāsīti vadanmuhuḥ |
kṣaṇaṃ tryakṣa pratīkṣasva budhyatīti sa bālakaḥ || 61 ||
[Analyze grammar]

spaṣṭāṃ ceṣṭāṃ vilokyeti harikeśasya tatpitā |
aśikṣayatsutaṃ so'tha gṛhakarmarato bhava || 62 ||
[Analyze grammar]

ete turaṃgamā vatsa tavaite'śvakiśo rakāḥ |
citrāṇīmāni vāsāṃsi sudukūlānyamūni ca || 63 ||
[Analyze grammar]

ratnānyākaraśuddhāni nānājātīnyanekaśaḥ |
kupyaṃ bahuvidhaṃ caitadgodhanāni mahāṃti ca || 64 ||
[Analyze grammar]

amatrāṇi mahārhāṇi raupya kāṃsyamayāni ca |
paṇanīyāni vastūni nānādeśodbhavānyapi || 65 ||
[Analyze grammar]

cāmarāṇi vicitrāṇi gaṃdhadravyāṇyanekaśaḥ |
etānyanyāni bahuśastvaneke dhānyarāśayaḥ || 66 ||
[Analyze grammar]

etattvadīyaṃ sakalaṃvastujātaṃ samaṃtataḥ |
arthopārjanavidyāśca sarvāḥ śikṣasva putraka || 67 ||
[Analyze grammar]

ceṣṭāstyaja daridrāṇāṃ dhūlidhūsariṇāmamūḥ |
abhyasyavidyāḥ sakalā bhogānnirviśya cottamān || 68 ||
[Analyze grammar]

tāṃ daśāṃ caramāṃ prāpya bhaktiyogaṃ tataścara |
asakṛcchikṣitaḥ pitretyavamanya gurorgiram || 69 ||
[Analyze grammar]

ruṣṭadṛṣṭiṃ ca janakaṃ kadācidavalokya saḥ |
nirjagāma gṛhādbhīto harikeśa udāradhīḥ || 70 ||
[Analyze grammar]

tataściṃtāmavāpoccairdigbhrāṃtimapi cāptavān |
aho bāliśabuddhitvātkutastyaktaṃ gṛhaṃ mayā || 71 ||
[Analyze grammar]

kva yāmi kva sthite śaṃbho mama śreyo bhaviṣyati |
pitrā nirvāsitaścāhaṃ na ca vedmyatha kiṃcana || 72 ||
[Analyze grammar]

iti śrutaṃ mayā pūrvaṃ piturutsaṃgavartinā |
gadatastātapurataḥ kasyacidvacanaṃ sphuṭam || 73 ||
[Analyze grammar]

mātrā pitrā parityaktā ye tyaktā nijabaṃdhubhiḥ |
yeṣāṃ kvāpi gatirnāsti teṣāṃ vārāṇasī gatiḥ || 74 ||
[Analyze grammar]

jarayā paribhūtā ye ye vyādhivikalīkṛtāḥ |
yeṣāṃ kvāpi gatirnāsti teṣāṃ vārāṇasī gatiḥ || 75 ||
[Analyze grammar]

pade pade samākrāṃtā ye vipadbhiraharniśam |
yeṣāṃ kvāpi gatirnāsti teṣāṃvārāṇasī gatiḥ || 76 ||
[Analyze grammar]

pāparāśibhirākrāṃtā ye dāridrya parājitāḥ |
yeṣāṃ kvāpi gatirnāsti teṣāṃ vārāṇasī gatiḥ || 77 ||
[Analyze grammar]

saṃsāra bhayabhītāya ye ye baddhāḥ karmabaṃdhanaiḥ |
yeṣāṃ kvāpi gatirnāsti teṣāṃ vārāṇasī gatiḥ || 78 ||
[Analyze grammar]

śrutismṛtivihīnā ye śaucācāravivarjitāḥ |
yeṣāṃ kvāpi gatirnāsti teṣāṃ vārāṇasī gatiḥ || 79 ||
[Analyze grammar]

ye ca yogaparibhraṣṭāstapo dāna vivarjitāḥ |
yeṣāṃ kvāpi gatirnāsti teṣāṃ vārāṇasī gatiḥ || 80 ||
[Analyze grammar]

madhye baṃdhujane yeṣāmapamānaṃ pade pade |
teṣāmānaṃdadaṃ caikaṃ śaṃbhorānaṃdakānanam || 81 ||
[Analyze grammar]

ānaṃdakānane yeṣāṃ rucirvai vasatāṃ satām |
viśveśānugṛhītānāṃ teṣāmānaṃdajodayaḥ || 82 ||
[Analyze grammar]

bharjyate karmabījāni yatra viśveśavahninā |
ato mahāśmaśānaṃ tadagatīnāṃ parā gatiḥ || 83 ||
[Analyze grammar]

harikeśo vicāryeti yāto vārāṇasīṃ purīm |
yatrāvimukte jaṃtūnāṃ tyajatāṃ pārthivīṃ tanum || 84 ||
[Analyze grammar]

punarno tanusaṃbaṃdhastanudveṣiprasādataḥ |
ānaṃdavanamāsādya sa tapaḥ śaraṇaṃ gataḥ || 85 ||
[Analyze grammar]

atha kālāṃtare śaṃbhuḥ praviśyānaṃdakānamam |
pārvatyai darśayāmāsa nijamākrīḍakānanam || 86 ||
[Analyze grammar]

amaṃdāmodamaṃdāraṃ kovidārapariṣkṛtam |
cārucaṃpakacūtāḍhyaṃ protphullanavamallikam || 87 ||
[Analyze grammar]

vikasanmālatījālaṃ karavīravirājitam |
prasphuṭatketakivanaṃ prodyatkurabakorjitam || 88 ||
[Analyze grammar]

jṛṃbhadvicakilāmodaṃ lasatkaṃkelipallavam |
navamallīparimalākṛṣṭaṣaṭpadanāditam || 89 ||
[Analyze grammar]

puṣpyapunnāganikaraṃ bakulāmodamoditam |
medasvipāṭalāmoda sadāmodita diṅmukham || 90 ||
[Analyze grammar]

bahuśolaṃbirolaṃba mālāmālitabhūtalam |
calaccaṃdanaśākhāgra ramamāṇapi kākulam || 91 ||
[Analyze grammar]

guruṇā'guruṇāmatta bhadrajātivihaṃgamam |
nāgakesaraśākhāstha śālabhaṃji vinoditam || 92 ||
[Analyze grammar]

merutuṃga namerusthacchāyākrīḍitakiṃnaram |
kiṃnarīmithunodgītaṃ gānavacchukakiṃśukam || 93 ||
[Analyze grammar]

kadaṃbānāṃ kadaṃbeṣu guṃjadrolaṃbayugmakam |
jitasauvarṇavarṇocca karṇikāravirājitam || 94 ||
[Analyze grammar]

śālatālatamālālī hiṃtālī lakucāvṛtam |
lasatsaptacchadāmodaṃ kharjūrīrājirājitam |
nārikela tarucchanna nāraṃgīrāgaraṃjitam || 95 ||
[Analyze grammar]

phalijaṃbīranikaraṃ madhūkamadhupākulam |
śālmalī śītalacchāyaṃ picumaṃda mahāvanam || 96 ||
[Analyze grammar]

madhurāmoda damanacchannaṃ marubanoditam |
lavalīlolalīlābhṛnmaṃdamārutalolitam || 97 ||
[Analyze grammar]

bhillī hallīsakaprīti jhillīrāvavirāviṇam |
kvacitsaraḥ parisarakrīḍatkroḍakadaṃbakam || 98 ||
[Analyze grammar]

marālīgalanālīstha bisāsaktasitacchadam |
viśokakokamithunakrīḍākreṃkārasuṃdaram || 99 ||
[Analyze grammar]

bakaśāvakasaṃcāraṃ lakṣmaṇāsakta sārasam |
mattabarhiṇasaṃghuṣṭaṃ kapiṃjalakulākulam || 100 ||
[Analyze grammar]

jīvaṃjīvalasajjīvaṃ kvaṇatkāraṃḍavotkaṭam |
dīrghikāvārisaṃcāri śītamāruta vījitam || 1 ||
[Analyze grammar]

madāṃdolitakahlāra parāgaparipiṃgalam |
ullasatpaṃkajamukhaṃ nīleṃdīvaralocanam || 2 ||
[Analyze grammar]

tamālakabarībhāraṃ vilasaddāḍimīradam |
bhramarālīlasadbhrūkaṃ śukanāsāvirājitam || 3 ||
[Analyze grammar]

mahāṃdhuśravaṇaṃ dūrvā śmaśrubhiḥ pariśobhitam |
kamalāmodaniḥśvāsaṃ biṃbīphala radacchadam || 4 ||
[Analyze grammar]

supadmapatravasanaṃ karṇikāravibhūṣaṇam |
kamrakaṃbu lasatkaṃṭhaṃ śaṃkaraskaṃdha baṃdhuram || 5 ||
[Analyze grammar]

gaṃdhasārasamāsaktā hīna dordaṃḍamaṃḍitam |
aśokapallavāṃguṣṭhaṃ ketakīnakharojjvalam || 6 ||
[Analyze grammar]

lasatkaṃṭhīravoraskaṃ gaṃḍaśailapṛthūdaram |
jalāvartalasannābhi tarujaṃghā yugānvitam || 7 ||
[Analyze grammar]

sthalabhākpadmacaraṇaṃ mattamātaṃgagāminam |
lasatkadalikedāradalaccīnāṃśukāvṛtam || 8 ||
[Analyze grammar]

nānāsukumamālābhirmālitaṃ ca samaṃtataḥ |
akaṃṭakitarucchannaṃ mahiṣa śvāpadāvṛtam || 9 ||
[Analyze grammar]

caṃdrakāṃtaśilāsuptakṛṣṇaiṇaharitoḍupam |
taruprakīrṇakusuma jitasvarlokatārakam |
darśayannitthamākrīḍaṃ devyai devoviśadvanam || 110 ||
[Analyze grammar]

devadeva uvāca |
yathāpriyatamā devi mama tvaṃ sarvasuṃdari |
tathā priyataraṃ caitanme sadānaṃdakānanam || 11 ||
[Analyze grammar]

atrānaṃdavane devi mṛtānāṃ madanugrahāt |
vapustvamṛtatāṃ prāptamapunarbhavinastu te || 12 ||
[Analyze grammar]

bhavino ye vipadyaṃte vārāṇasyāṃ mamājñayā |
teṣāṃ bījāni dagdhāni śmaśānajvaladagninā || 13 ||
[Analyze grammar]

mahāśmaśāne ye prāptā dīrghanidrāṃ girīṃdraje |
na punargarbhaśayane te svapaṃti kadācana || 14 ||
[Analyze grammar]

brahmajñānena mucyaṃte nānyathā jaṃtavaḥ kvacit |
brahmajñānamaye kṣetre prayāge vā tanutyajaḥ || 15 ||
[Analyze grammar]

brahmajñānaṃ tadevāhaṃ kāśīsaṃsthitibhāginām |
diśāmi tārakaṃ prāṃte mucyaṃte te tu tatkṣaṇāt || 16 ||
[Analyze grammar]

gṛhṇīyuḥ pāpakarmāṇi kāśīmṛtaviniṃdakāḥ |
sukṛtāni stutikṛto mucyaṃte te'tra jaṃtavaḥ || 17 ||
[Analyze grammar]

brahmajñānaṃ kuto devi kalinopahatātmanām |
svabhāvacaṃcalākṣāṇāṃ tadbrahmeha diśāmyaham || 18 ||
[Analyze grammar]

yogino yogavibhraṣṭāḥ pataṃtyaiśvaryamohitāḥ |
kāśyāṃ patitvā na punaḥ pataṃtyapi mahālaye || 19 ||
[Analyze grammar]

brahmajñānaṃ na viṃdaṃti yogairekena janmanā |
janmanaikena mucyaṃte kāśyāmaṃtakṛto janāḥ || 120 ||
[Analyze grammar]

yatheha mucyate jaṃturgirije madanugrahāt |
avimukte mahākṣetre na tathānyatra kutracit || 21 ||
[Analyze grammar]

bahujanmasamabhyāsādyogī mucyeta vā na vā |
mṛtamātro vimucyeta kāśyāmekena janmanā || 22 ||
[Analyze grammar]

na sidhyati kalau yogo na sidhyati kalau tapaḥ |
nyāyārjitadhanotsargaḥ sadyaḥ sidhyetkalau naraḥ || 23 ||
[Analyze grammar]

na vrataṃ na tapo nejyā na japo na surārcanam |
dānameva kalau muktyai kāśīdānairavāpyate || 24 ||
[Analyze grammar]

kalau viśveśvaro devaḥ kalau vārāṇasī purī |
kalau bhāgīrathī gaṃgā kalau dānaṃ viśiṣyate || 25 ||
[Analyze grammar]

gaṃgottaravahākāśyāṃ liṃgaṃ viśveśvaraṃ mama |
ubhe vimuktide puṃsāṃ prāpye dānabalātkalau || 26 ||
[Analyze grammar]

puṇyavānitaro vāpi mama kṣetrasya sevayā |
mukto bhavati deveśi nātra kāryā vicāraṇā || 27 ||
[Analyze grammar]

avimuktasya māhātmyātpuṇyapāpena karmaṇā |
devi prabhavataḥ puṃsāmapijanmaśatārjite || 28 ||
[Analyze grammar]

avimuktaṃ na moktavyaṃ tasmāddevi mumukṣuṇā |
hanyamānena bahudhā hyupasargaśatairapi || 29 ||
[Analyze grammar]

vidhāya kṣetrasaṃnyāsaṃ ye vasaṃtīha mānavāḥ |
jīvanmuktāstu te devi teṣāṃ vighnaṃ harāmyaham || 130 ||
[Analyze grammar]

na yogināṃ hṛdākāśe na kailāse na maṃdare |
tathā vāsaratirme'sti yathā kāśyāṃ ratirmama || 31 ||
[Analyze grammar]

kāśīvāsi jano devi mama garbhe vasetsadā |
atastaṃ mocayāmyaṃte pratijñeyaṃ yato mama || 32 ||
[Analyze grammar]

tāmasīṃ prakṛtiṃ prāpya kālo bhūtvā carācaram |
grasāmi līlayā devi kāśīṃ rakṣāmi yatnataḥ || 33 ||
[Analyze grammar]

premapātradvayaṃ devi nitarāṃ netaranmama |
tvaṃ vā tapodhane gauri kāśī vānaṃdabhūmikā || 34 ||
[Analyze grammar]

vinā kāśī na me sthānaṃ vinā kāśī na me ratiḥ |
vinā kāśī na nirvāṇaṃ satyaṃ satyaṃ vadāmyaham || 35 ||
[Analyze grammar]

brahmāṃḍagolake yadvanmuktiḥ kāśyāṃ vyavasthitā |
aṣṭāṃgayogayuktyā vā na tathā helayā'nyataḥ || 36 ||
[Analyze grammar]

iti bruvāṇo deveśo harikeśamavaikṣata |
madhye vanaṃ tapasyaṃtamaśokatarumūlagam || 37 ||
[Analyze grammar]

śuṣkasnāyupinaddhāsthi saṃcayaṃ niścalākṛtim |
valmīkakīṭakākoṭiśoṣitāsṛgasṛgdharam || 38 ||
[Analyze grammar]

nirmāṃsakīkasacayaṃ sphaṭikopalaniścalam |
śaṃkhakuṃdeṃdutuhina mahāśaṃkhalasacchriyam || 39 ||
[Analyze grammar]

satvāvalaṃbitaprāṇamāyuḥśeṣeṇarakṣitam |
niḥśvāsocchāsapavanavṛttisūcitajīvitam || 140 ||
[Analyze grammar]

nimeṣonmeṣasaṃcāra piśunīkṛtajaṃtukam |
piṃgatārasphuradraśmi netradīpita diṅmukham || 41 ||
[Analyze grammar]

tattapogniśikhādāva cuṃbitamlānakānanam |
tatsaumyadṛksudhāvarṣa saṃsiktā'khilabhūruham || 42 ||
[Analyze grammar]

sākṣāttapasyaṃtamiva tapo dhṛtvā narākṛtim |
nirākṛtiṃ nirākāṃkṣaṃ kṛtvā bhaktiṃ ca kāṃcana || 43 ||
[Analyze grammar]

kuraṃgaśāvairgaṇaśo bhramadbhiḥ parivāritam |
nitāṃtabhīṣaṇāsyaiśca paṃcāsyaiḥ parirakṣitam || 44 ||
[Analyze grammar]

taṃ tathābhūtamālokya devī devaṃ vyajijñapat |
vareṇacchaṃdayeśāmuṃ nijabhaktaṃ tapasvinam || 45 ||
[Analyze grammar]

tvadekacittaṃ tvadadhīnajīvitaṃ tvadekakarmāṇamamuṃ tvadāśrayam |
tīvraistapobhiḥ pariśuṣkavigrahaṃ kuruṣva yakṣasya vairaranugraham || 46 ||
[Analyze grammar]

devo vṛṣeṃdrādavaruhya devyā śailādinā dattakarāvalaṃbaḥ |
samādhisaṃkocitanetrapatraṃ pasparśa hastena dayārdracetāḥ || 47 ||
[Analyze grammar]

tataḥ sa yakṣo vinimīlya cakṣuṣī tryakṣaṃ puro vīkṣya samakṣamātmanaḥ |
udyatsahasrāṃśu sahasratejasaṃ jagāda harṣākula gadgadākṣaram || 48 ||
[Analyze grammar]

jayeśa śaṃbho girijeśa śaṃkara triśūlapāṇe śaśikhaṃḍaśekhara |
sparśatkṛpālo tava pāṇipaṃkajaṃ prāpyāmṛtībhūtatanūlato'bhavam || 49 ||
[Analyze grammar]

śrutvoditāṃ tasya maheśvaro giraṃ mṛdvīkayā sāmyamupeyuṣīṃ mṛdu |
bhaktasya dhīrasya mahātaponidhe dadau varāṇāṃ nikara tadā mudā || 150 ||
[Analyze grammar]

kṣetrasya yakṣāsya mama priyasya me bhavādhunā daṃḍadharo varānmama |
sthirastvamadyādi durātmadaṃḍakaḥ supālakaḥ puṇyakṛtāṃ ca matpriyaḥ || 51 ||
[Analyze grammar]

tvaṃ daṃḍapāṇirbhava nāmato'dhunā sarvāngaṇāñchādhi mamājñayotkaṭān |
gaṇāvimau tvāmanuyāyinau sadā nāmnā yathārthau nṛṣu saṃbhramodbhramau || 52 ||
[Analyze grammar]

tvamaṃtyabhūṣāṃ kuru kāśivāsināṃ gale sunīlāṃ bhujageṃdra kaṃkaṇām |
bhālesu netrāṃ karikṛttivāsasaṃ vāmekṣaṇālakṣita vāmabhāgām || 53 ||
[Analyze grammar]

maulau lasatpiṃgakapardabhāriṇī vibhūtisaṃkṣālita puṇyavigrahām |
ahohimāṃśoḥ kalayā lasacchriyaṃ vṛṣeṃdralīlā gatimaṃdagāminīm || 54 ||
[Analyze grammar]

tvamannadaḥ kāśinivāsināṃ sadā tvaṃ prāṇado jñānada eka eva hi |
tvaṃ mokṣado manmukhasūpadeśatastvaṃ niścalāṃ sadvasatiṃ vidhāsyasi || 55 ||
[Analyze grammar]

tvaṃ vighnapūgaiḥ paripīḍya pāpinaḥ saṃbhrātimutpādya vineṣyase bahiḥ |
ānīya bhaktānkṣaṇatopidūrato muktiṃ parāṃ dāpayitāsi piṃgala || 56 ||
[Analyze grammar]

tvatsātkṛte kṣetravare hi yakṣarāṭkastvāmanārādhya vimuktibhājanam |
sabhājanaṃ pūrvata eva te carettataḥ samarcāṃ mama bhakta ācaret || 57 ||
[Analyze grammar]

tvaṃ grāmavāsaprada eva me pure'dhyakṣastvamedhīha ca daṃḍanāyakaḥ |
duṣṭānsamudghāṭaya kāśivairiṇaḥ kāśīṃ purīṃ rakṣa sadā mudānvitaḥ || 58 ||
[Analyze grammar]

pūrṇabhadrasutadaṃḍanāyaka tryakṣayakṣaharikeśa piṃgala |
kāśivāsa vasatāṃ sadānnadajñānamokṣadagaṇāgraṇīrbhava || 59 ||
[Analyze grammar]

madbhaktiyuktopi vinā tvadīyāṃ bhaktiṃ na kāśī vasatiṃ labheta |
gaṇeṣu deveṣu hi mānaveṣu tadagramānyo bhava daṃḍapāṇe || 160 ||
[Analyze grammar]

jñānodatīrthe vihitodakakriyo yastvāṃ samārādhayitā gaṇeśam |
sa eva loke kṛtakṛtyatāmagānmamātulānugrahato'tra puṇyavān || 61 ||
[Analyze grammar]

tvaṃ dakṣiṇasyāṃ diśi daṃḍapāṇe sadaiva me netrasamakṣamatra |
tvaṃ daṃḍayanprāṇabhṛto durīhānihāsvanṝnsvānabhayaṃ diśanvai || 62 ||
[Analyze grammar]

skaṃda uvāca |
iti dattvā varānvipra girīśo daṃḍapāṇaye |
vṛṣeṃdramadhiruhyātha viveśānaṃdakānanam || 63 ||
[Analyze grammar]

kuṃbhodbhava tadārabhya yakṣarāḍdaṃḍanāyakaḥ |
purīṃ vārāṇasīṃ samyaganuśāsti nideśataḥ || 64 ||
[Analyze grammar]

ahamapyatra vasatiṃ cakre tadanusūyayā |
vasannapi mayā kāśyāṃ yataḥ saṃbhāvito na saḥ || 69 ||
[Analyze grammar]

mune kṣetraṃ yadatyākṣīstvamapyevaṃvidho vaśī |
śaṃke tatrāhamevāddhā kāmaṃ tasyaiva vikriyām || 66 ||
[Analyze grammar]

manāgviruddhācaraṇaṃ yadi dvija vilakṣayet |
harikeśastadā kāśyāṃ kva sthitiḥ kva ca nirvṛtiḥ || 67 ||
[Analyze grammar]

daṃḍapāṇimanārādhya kaḥ kāśyāṃ sukhamāpnuyāt |
pravivikṣurahaṃ kāśīṃ dūragopi bhajāmi tam || 68 ||
[Analyze grammar]

ratnabhadrāṃgajodbhūtaṃ pūrṇabhadrasuto ttama |
nirvighnaṃ kuru me yakṣa kāśīvāsaṃ śivāptaye || 69 ||
[Analyze grammar]

dhanyo yakṣaḥ pūrṇabhadro dhanyā kāṃcanakuṃḍalā |
yayorjaṭharapīṭhebhūrdaṃḍapāṇe mahāmate || 170 ||
[Analyze grammar]

jaya yakṣapate dhīra jaya piṃgalalocana |
jaya rpigajaṭābhāra jaya daṃḍa mahāyudha || 71 ||
[Analyze grammar]

avimukta mahākṣetra sūtradhārogratāpasa |
daṃḍanāyaka bhīmāsya jaya viśveśvarapriya || 72 ||
[Analyze grammar]

saumyānāṃ saumyavadana bhīṣaṇānāṃ bhayānaka |
kṣetrapāpadhiyāṃ kāla mahākālamahāpriya || 73 ||
[Analyze grammar]

jayaprāṇada yakṣeṃdra kāśīvāsānnamokṣada |
mahāratnasphuradraśmi cayacarcita vigraha || 74 ||
[Analyze grammar]

mahāsaṃbhrātijanaka mahodbhrāṃti pradāyaka |
abhaktānāṃ ca bhaktānāṃ saṃbhrātyudbhrāṃti nāśaka || 75 ||
[Analyze grammar]

prāṃtanepathyacatura jayajñānanidhiprada |
jayagaurīpadābjāle mokṣekṣaṇavicakṣaṇa || 76 ||
[Analyze grammar]

yakṣarājāṣṭakaṃ puṇyamidaṃ nityaṃ trikālataḥ |
japāmi maitrāvaruṇe vārāṇasyāptikāraṇam || 77 ||
[Analyze grammar]

daṃḍapāṇyaṣṭakaṃ dhīmāñjapanvighnairna jātucit |
śraddhayā paribhūyeta kāśīvāsaphalaṃ labheta || 78 ||
[Analyze grammar]

prādurbhāvaṃ daṃḍapāṇeḥ śṛṇvantotramidaṃ gṛṇan |
vipattimanyataḥ prāpya kāśīṃ janmāṃtare labhet || 79 ||
[Analyze grammar]

śrutvādhyāyamimaṃ puṇyaṃ daṃḍapāṇisamudbhavam |
paṭhitvā pāṭhayitvāpi na rvighrairabhibhūyatai || 80 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe daṃḍapāṇiprādurbhāvo nāma dvātriṃśo'dhyāyaḥ || 32 ||
[Analyze grammar]