Chapter 33

[English text for this chapter is available]

agastya uvāca |
skaṃdajñānodatīrthasya māhātmyaṃ vada sāṃpratam |
jñānavāpīṃ praśaṃsaṃti yataḥ svargaukasopyalam || 1 ||
[Analyze grammar]

skaṃda uvāca |
ghaṭodbhava mahāprājña śṛṇu pāpapraṇodinīm |
jñānavāpyāḥ samutpattiṃ kathyamānāṃ mayādhunā || 2 ||
[Analyze grammar]

anādisiddhe saṃsāre purā devayuge mune |
prāptaḥ kutaścidīśānaścaransvairamitastataḥ || 3 ||
[Analyze grammar]

na varṣaṃti yadābhrāṇi na prāvartaṃta nimragāḥ |
jalābhilāṣo na yadā snānapānādi karmaṇi || 4 ||
[Analyze grammar]

kṣārasvādūdayoreva yadāsījjaladarśanam |
prathivyāṃ narasaṃcāre vatarmāne kvacitkvacit || 5 ||
[Analyze grammar]

nirvāṇakamalākṣetraṃ śrīmadānaṃdakānanam |
mahāśmaśānaṃ sarveṣāṃ bījānāṃ paramūṣaram || 6 ||
[Analyze grammar]

mahāśayanasuptānāṃ jaṃtūnāṃ pratibodhakam |
saṃsārasāgarāvarta patajjaṃtutaraṃḍakam || 7 ||
[Analyze grammar]

yātāyātātisaṃkhinna jaṃtuviśrāmamaṃḍapama |
anekajanmaguṇita karmasūtracchidākṣuram || 8 ||
[Analyze grammar]

saccidānaṃdanilayaṃ parabrahmarasāyanam |
sukhasaṃtānajanakaṃ mokṣasādhanasiddhidam || 9 ||
[Analyze grammar]

praviśya kṣetrametatsa īśāno jaṭilastadā |
lasattriśūlavimalaraśmijālasamākulaḥ || 10 ||
[Analyze grammar]

āluloke mahāliṃgaṃ vaikuṃṭhaparameṣṭhinoḥ |
mahāhamahamikāyāṃ prādurāsa yadāditaḥ || 11 ||
[Analyze grammar]

jyotirmayībhirmālābhiḥ paritaḥ pariveṣṭitam |
vṛṃdairvṛṃdārakarṣīṇāṃ gaṇānāṃ ca niraṃtaram || 12 ||
[Analyze grammar]

siddhānāṃ yogināṃ stomairarcyamānaṃ niraṃtaram |
gīyamānaṃ ca gaṃdharvaiḥ stūyamānaṃ ca cāraṇaiḥ || 13 ||
[Analyze grammar]

aṃgahārairapsarobhiḥ sevyamānamanekadhā |
nīrājyamānaṃ satataṃ nāgībhirmaṇidīpakaiḥ || 14 ||
[Analyze grammar]

vidyādharīkinnarībhistrikālaṃ kṛtamaṃḍanam |
amarīcamarīrāji vījyamānamitastataḥ || 15 ||
[Analyze grammar]

asyeśānasya talliṃgaṃ dṛṣṭvecchetyabhavattadā |
snapayāmi mahalliṃgaṃ kalaśaiḥ śītalairjalaiḥ || 16 ||
[Analyze grammar]

cakhāna ca triśūlena dakṣiṇāśopakaṃṭhataḥ |
kuṃḍaṃ pracaṃḍavegena rudrorudravapurdharaḥ || 17 ||
[Analyze grammar]

pṛthivyāvaraṇāṃbhāṃsi niṣkrāṃtāni tadā mune |
bhūpramāṇāddaśaguṇairyairiyaṃ vasudhāvṛtā || 18 ||
[Analyze grammar]

tairjalaiḥ snāpayāṃcakre tvatspṛṣṭairanyadehibhiḥ |
tuṣārairjāḍyavidhurairjaṃjapūkaughahāribhiḥ || 19 ||
[Analyze grammar]

sanmanobhirivātyacchairanacchairvyomavartmavat |
jyotsnāvadujjvalacchāyaiḥ pāvanaiḥ śaṃbhunāmavat || 20 ||
[Analyze grammar]

pīyūṣavatsvādutaraiḥ sukhasparśairgavāṃgavat |
niṣpāpadhīvadgaṃbhīraistaralaiḥ pāpiśarmavat || 21 ||
[Analyze grammar]

vijitābjamahāgaṃdhaiḥ pāṭalāmodamodibhiḥ |
adṛṣṭapūrvalokānāṃ manonayanahāribhiḥ || 22 ||
[Analyze grammar]

ajñānatāpasaṃtapta prāṇiprāṇaikarakṣibhiḥ |
paṃcāmṛtānāṃ kalaśaiḥ snapanātiphalapradaiḥ || 23 ||
[Analyze grammar]

śraddhopasparśi dṛdayaliṃga tritayahetubhiḥ |
ajñānatimirārkābhairjñānadāna nidāyakaiḥ || 24 ||
[Analyze grammar]

viśvabharturumāsparśasukhātisukhakāribhiḥ |
mahāvabhṛthasusnāna mahāśuddhividhāyibhiḥ || 25 ||
[Analyze grammar]

sahasradhāraiḥ kalaśaiḥ sa īśāno ghaṭodbhava |
sahasrakṛtvaḥ snapayāmāsa saṃhṛṣṭamānasaḥ || 26 ||
[Analyze grammar]

tataḥ prasanno bhagavānviśvātmā viśvalocanaḥ |
tamuvāca tadeśānaṃ rudraṃ rudravapurdharam || 27 ||
[Analyze grammar]

tava prasannosmīśāna karmaṇānena suvrata |
guruṇānanyapūrveṇa mamātiprītikāriṇā || 28 ||
[Analyze grammar]

tatastvaṃ jaṭileśāna varaṃ brūhi tapodhana |
adeyaṃ na tavāstyadya mahodyamaparāyaṇa || 29 ||
[Analyze grammar]

īśāna uvāca |
yadi prasanno deveśa varayogyosmyahaṃ yadi |
tadetadatulaṃ tīrthaṃ tava nāmnāstu śaṃkara || 30 ||
[Analyze grammar]

viśveśvara uvāca |
trilokyāṃ yāni tīrthāni bhūrbhuvaḥsvaḥ sthitānyapi |
tebhyokhilebhyastīrthebhyaḥ śivatīrthamidaṃ param || 31 ||
[Analyze grammar]

śivajñānamiti brūyuḥ śivaśabdārthaciṃtakāḥ |
tacca jñānaṃ dravībhūtamiha me mahimodayāt || 32 ||
[Analyze grammar]

ato jñānoda nāmaitattīrthaṃ trailokyaviśrutam |
asya darśanamātreṇa sarvapāpaiḥ pramucyate || 33 ||
[Analyze grammar]

jñānodatīrthasaṃsparśādaśvamedhaphalaṃ labhet |
sparśanācamanābhyāṃ ca rājasūyāśvamedhayoḥ || 34 ||
[Analyze grammar]

phalgutīrthe naraḥ snātvā saṃtarpya ca pitāmahān |
yatphalaṃ samavāpnoti tadatra śrāddhakarmaṇā || 35 ||
[Analyze grammar]

gurupuṣyāsitāṣṭamyāṃ vyatīpāto yadā bhavet |
tadātra śrāddhakaraṇādgayākoṭiguṇaṃ bhavet || 36 ||
[Analyze grammar]

yatphalaṃ samavāpnoti pitṝnsaṃtarpya puṣkare |
tatphalaṃ koṭiguṇitaṃ jñānatīrthe tilodakaiḥ || 37 ||
[Analyze grammar]

sannihatyāṃ kurukṣetre tamograste vivasvati |
yatphalaṃ piṃḍadānena tajjñānode dine dine || 38 ||
[Analyze grammar]

piṃḍanirvapaṇaṃ yeṣāṃ jñānatīrthe sutaiḥ kṛtam |
modaṃte śivaloke te yāvadābhūtasaṃplavam || 39 ||
[Analyze grammar]

aṣṭamyāṃ ca caturdaśyāmupavāsī narottamaḥ |
prātaḥ snātvātha pītāṃbhastvaṃtarliṃgamayo bhavet || 40 ||
[Analyze grammar]

ekādaśyāmupoṣyātra prāśnāti culukatrayam |
hṛdaye tasya jāyaṃte trīṇi liṃgānyasaṃśayam || 41 ||
[Analyze grammar]

īśānatīrthe yaḥ snātvā viśeṣātsomavāsare || |
saṃtarpya devarṣi pitṝndattvā dānama svaśaktitaḥ || 42 ||
[Analyze grammar]

tataḥ samarcya śrīliṃgaṃ mahāsaṃbhāravistaraiḥ |
atrāpi dattvā nānārthānkṛtakṛtyobhavennaraḥ || 43 ||
[Analyze grammar]

upāsya saṃdhyāṃ jñānode yatpāpaṃ kālalopajam |
kṣaṇena tadapākṛtya jñānavāñjāyate dvijaḥ || 44 ||
[Analyze grammar]

śivatīrthamidaṃ proktaṃ jñānatīrthamidaṃ śubham |
tārakākhyamidaṃ tīrthaṃ mokṣatīrthamidaṃ dhuvam || 45 ||
[Analyze grammar]

smaraṇādapi pāpaugho jñānodasya kṣayeddhruvam |
darśanātsparśanātsnānātpānāddharmādisaṃbhavaḥ || 46 ||
[Analyze grammar]

ḍākinīśākinī bhūtapretavetālarākṣasāḥ |
grahāḥ kūṣmāṃḍajhoṭiṃgāḥ kālakarṇī śiśugrahāḥ || 47 ||
[Analyze grammar]

jvarāpasmāravisphoṭadvitīyakacaturthakāḥ |
sarve praśamamāyāṃti śivartārthajalekṣaṇāt || 48 ||
[Analyze grammar]

jñānodatīrthapānīyairliṃgaṃ yaḥ snāpayetsudhīḥ |
sarvatīrthodakaistena dhruvaṃ saṃsnāpitaṃ bhavet || 49 ||
[Analyze grammar]

jñānarūpoha mevātra dravamūrtiṃ vidhāya ca |
jāḍyavidhvaṃsanaṃ kuryāṃ kuryāṃ jñānopadeśanam || 50 ||
[Analyze grammar]

iti dattvā varāñchaṃbhustatraivāṃtaradhīyata |
kṛtakṛtyamivātmānaṃ sopyamaṃstatriśūlabhṛt || 51 ||
[Analyze grammar]

īśāno jaṭilo rudrastatprāśya paramodakam |
avāptavānparaṃ jñānaṃ yena nirvṛtimāptavān || 52 ||
[Analyze grammar]

skaṃda uvāca |
kalaśodbhava citrārthamitihāsaṃ purātanam |
jñānavāpyāṃ hi yadvṛttaṃ tadākhyāmi niśāmaya || 53 ||
[Analyze grammar]

harisvāmīti vikhyātaḥ kāśyāmāsīdvijaḥ purā |
tasyaikā tanayā jātā rūpeṇā'pratimā bhuvi || 54 ||
[Analyze grammar]

na samā śīlasaṃpattyā tasyā kācana bhūtale |
kalākalāpakuśalā svareṇajitakokilā || 55 ||
[Analyze grammar]

na nārī tādṛgastīha nā bharī kinnarī na ca |
vidyādharī na no nāgī gaṃdharvī nāsurī na ca || 56 ||
[Analyze grammar]

sarvasauṃdaryanilayā sarvalakṣaṇasatkhaniḥ |
adhiśete dhruvaṃ dhvāṃtaṃ tanmauliṃ bradhna sādhvasāt || 97 ||
[Analyze grammar]

tadāsya śaraṇaṃ yāto manye darśabhayācchaśī |
divāpi na tyajettāṃ tu trastaścaṃḍamarīcitaḥ || 58 ||
[Analyze grammar]

tadbhrūrbhramararājīva gaṃḍapatralatāṃtare |
udaṃcannyaṃcaduḍḍīna gaterabhyāsabhājinī || 59 ||
[Analyze grammar]

taccārulocanakṣetre vicaraṃtau ca khaṃjanau |
sadaiva śāradīṃ prītiṃ nirviśete nijecchayā || 60 ||
[Analyze grammar]

sudatyā radanaśreṇī chedeṣu viṣameṣuṇā |
vihitā kāṃcanī rekhā kveṃdāvetāvatī kalā || 61 ||
[Analyze grammar]

prāyo madana bhūpāla harmya ratnāṃtare śubhe |
jitapravālasucchāye tasyā radanavāsasī || 62 ||
[Analyze grammar]

svarge martye ca pātāle naiṣā rekhā kvacitstriyām |
tatkaṃṭharekhātritaya vyājena śapate smaraḥ || 63 ||
[Analyze grammar]

śaṃke citta bhuvo rājño lasatpaṭakuṭīdvayam |
anarghyaratnakośāḍhyaṃ tamyā vakṣoruhadvayam || 64 ||
[Analyze grammar]

anaṃgabhū niyamato'dṛśye madhye natabhruvaḥ |
romālīlakṣikāmūrdhvāmiva yaṣṭiṃ vidhirvyadhāt || 65 ||
[Analyze grammar]

tasyā nābhīdarīṃ prāpya kaṃdarpo'naṃgatā gataḥ |
punaḥ prāptumivāṃgāni tapyate paramaṃ tapaḥ || 66 ||
[Analyze grammar]

guruṇaitannitaṃbena mahāmanmatha dīkṣayā |
bhuvi ke ke yuvāno na svādhīnā prāpitādṛśām || 67 ||
[Analyze grammar]

ūrustaṃbhena caitasyāḥ staṃbhavatkasyano manaḥ |
tastaṃbhena mune vāpi suvṛttena suvartanam || 68 ||
[Analyze grammar]

pādāṃguṣṭhanakhajyotiḥ prabhayā kasya na prabhā |
vivekajanitā'dhvaṃsi mune tasyā mṛgīdṛśaḥ || 69 ||
[Analyze grammar]

sā pratyahaṃ jñānavāpyāṃ snāyaṃ snāyaṃ śivālaye |
saṃmārjanādi karmāṇi kurute'nanyamānasā || 70 ||
[Analyze grammar]

tatpādapratibiṃbeṣu rekhā śaṣpāṃkuraṃ caran |
nānyadvanāṃtaraṃ yāti kāśyāṃ yūnāṃ manomṛgaḥ || 71 ||
[Analyze grammar]

tadāsya paṃkajaṃ hitvā yūnāṃ netrālimālayā |
na latāṃtaramāsevi apyāmodaprasūnayuk || 72 ||
[Analyze grammar]

sulocanāpi sā kanyā prekṣetāsyaṃ na kasyacit |
suśravā api sā bālā nādatte kasyacidvacaḥ || 73 ||
[Analyze grammar]

suśīlā śīlasaṃpannā rahastadvirahāturaiḥ |
prārthitāpi surūpāḍhyairnābhilāṣaṃ babaṃdha sā || 74 ||
[Analyze grammar]

dhanaistasyājanetāpi yuvabhiḥ prārthito bahu |
nāśakattāṃ sulīlāṃ sadātuṃ śīlorjitaśriyam || 75 ||
[Analyze grammar]

jñānodatīrthabhajanātsā suśīlā kumāgkiा |
bahiraṃtastadā'drākṣītsarvaliṃgamayaṃ jagata || 76 ||
[Analyze grammar]

kadācidekadā tāṃ tu prasuptāṃ sadanāṃgaṇe |
mohito rūpasaṃpattyā kaścidvidyādharo'harat || 77 ||
[Analyze grammar]

vyomavartmanitāṃ rātrau yāvanmalayaparvatam |
sa ninīṣati tāvacca vidyunmālī samāgataḥ || 78 ||
[Analyze grammar]

rākṣaso bhīṣaṇavapuḥ kapālakṛtakuṃḍalaḥ |
vasārudhiraliptāṃgaḥ śmaśrulaḥ piṃgalocanaḥ || 79 ||
[Analyze grammar]

rākṣasa uvāca |
mamadṛggocaraṃ yāto vidyādharakumāraka |
adya tvāmetayā sārdhaṃ preṣayāmi yamālayam || 80 ||
[Analyze grammar]

iti śrutvātha sā vākyaṃ vyāghrāghrātā mṛgī yathā |
cakaṃpe'tīva saṃbhītā kadalīdalavanmuhuḥ || 81 ||
[Analyze grammar]

nijaghāna triśūlena rakṣo vidyādharaṃ ca tam |
vidyādharakumāropi nitarāṃ madhurākṛtiḥ || 82 ||
[Analyze grammar]

tadbhīṣaṇatriśūlena bhinnosko mahābalaḥ |
jaghāna muṣṭighātena vajrapātopamena tam || 83 ||
[Analyze grammar]

naramāṃsavasāmattaṃ vidyunmālinamāhave |
cūrṇito muṣṭipātena so'patadvasudhātale || 84 ||
[Analyze grammar]

rākṣaso mṛtyuvaśago vajreṇeva mahīdharaḥ |
vidyādharopi tacchūlaghātena vikalīkṛtaḥ || 85 ||
[Analyze grammar]

uvāca gadgadaṃ vākyaṃ vighūrṇita vilocanaḥ |
priye mudhā samānītā suśityardhoktimuccaran || 86 ||
[Analyze grammar]

jahau prāṇānraṇe vīrastāṃ priyāṃ paritaḥ smaran || 87 ||
[Analyze grammar]

ananyapūrvasaṃsparśa sukhaṃ samanubhūya sā |
tameva ca patiṃ matvā cakre śokāgnisāttanum || 88 ||
[Analyze grammar]

liṃgatrayaśarīriṇyāstasyāḥ sānnidhyataḥ sa hi |
divyaṃ vapuḥ samāsādya rākṣasastridivaṃ yayau || 89 ||
[Analyze grammar]

raṇe paṇīkṛtaprāṇo vidyādharasutopi saḥ |
aṃte priyāṃ smaranprāpa janurmalayaketutaḥ || 90 ||
[Analyze grammar]

dhyāyaṃtī sāpi taṃ bālā vidyādharakumārakam |
virahāgnau visṛṣṭāsuḥ karṇāṭe janmabhāgabhūt || 91 ||
[Analyze grammar]

suto malayaketostāṃ kālena pariṇītavān |
mālyaketuranaṃgaśrīḥ pitrā dattāṃ kalāvatīm || 92 ||
[Analyze grammar]

sāpi prāgvāsanāyogālliṃgārcanaratā satī |
hitvā malayajakṣodaṃ vibhūtiṃ bahvamaṃsta vai || 93 ||
[Analyze grammar]

muktā vaidūrya māṇikya puṣparāgebhya eva sā |
mene rudrākṣanepadhyamanarghyaṃ garbhasuṃdarī || 94 ||
[Analyze grammar]

kalāvatī mālyaketuṃ patiṃ prāpya pativratā |
apatyatritayaṃ lebhe divyabhogasamṛddhibhāk || 95 ||
[Analyze grammar]

ekadā kaścidaudīcyo mālyaketuṃ nareśvaram |
citrakṛccitrapaṭikāṃ citrāṃ darśitavānatha || 96 ||
[Analyze grammar]

tāṃ tu citrapaṭīṃ rājā kalāvatyai samarpayat |
sātha citrapaṭīṃ ramyāṃ saṃprahṛṣṭatanūruhā || 97 ||
[Analyze grammar]

muhurmuhuḥ prapaśyaṃtī rahasi prāṇadevatām |
visasmāra svamapi ca samādhistheva yoginī || 98 ||
[Analyze grammar]

kṣaṇamunmīlya nayane kṛtvā netrātithiṃ paṭīm |
tarjanyagramathotkṣipya svātmānaṃ samabodhayat || 99 ||
[Analyze grammar]

saṃbhedoyamase ramya upalolārkamagrataḥ |
upaśrīkeśavapadaṃ varaṇaiṣā saridvarā || 100 ||
[Analyze grammar]

svageṃ prārthitasaṃsparśā saiṣā svargataraṃgiṇī |
udagvahābhilaṣyaṃti yāṃ divodyusadaḥ sadā || 1 ||
[Analyze grammar]

alakṣyāmokṣalakṣmī ryā vedāṃte paripaṭhyate |
vimuktaye satāṃ saiṣā śrīmatī maṇikarṇikā || 2 ||
[Analyze grammar]

maraṇaṃ maṃgalaṃ yatra saphalaṃ yatra jīvitam |
svargastṛṇāyate yatra saiṣā śrīmaṇikarṇikā || 3 ||
[Analyze grammar]

yatra saṃpattisaṃbhārānviśrāṇya nidhanecchayā |
yativrataṃ samālaṃbya tiṣṭhate mūlakaṃdabhuk || 4 ||
[Analyze grammar]

yatra trimārgaṃ gāṃgaṃ gāṃ mārgamāṇomṛtānharaḥ |
svamaulibālacaṃdreṇa muktimārgaṃ pradarśayan || 5 ||
[Analyze grammar]

saṃsāraṃ yatra durvāraṃ pratārayati śaṃkaraḥ |
mṛtā apyamṛtāyaṃte karṇadhārādyato narāḥ || 6 ||
[Analyze grammar]

saṃsārāsārapadavī yatra syādadavīyasī |
karṇe japānmaheśānātkaruṇā varuṇālayāt || 7 ||
[Analyze grammar]

aneka bhavasaṃbhūta prabhūta sukṛtairnarāḥ |
karṇe japaṃ bhavaṃ yatra labhaṃte te bhavāpaham || 8 ||
[Analyze grammar]

svīkṛtya kṣetrasaṃnyāsaṃ yadbalena mahādhiyaḥ |
tṛṇaṃ kṛtātaṃ manyaṃte seyaṃ śrīmaṇikarṇikā || 9 ||
[Analyze grammar]

tṛṇīkṛtya nijaṃ dehaṃ yatra rājarṣisattamaḥ |
hariścaṃdraḥ sapatnīko vyakrīṇādbhūrayaṃ hi sā || 110 ||
[Analyze grammar]

abhilaṣyaṃti yatratyamapi vaikuṇṭhavāsinaḥ |
saikataṃ mṛdulaṃ talpaṃ saiṣā śrīmaṇikarṇikā || 11 ||
[Analyze grammar]

aneka janma janita karmasūtraniyaṃtraṇam |
unmucya yatra muktāḥ syuḥ saiṣā śrīmaṇikarṇikā || 12 ||
[Analyze grammar]

satyaloke'pi ye lokāste'rthayaṃti niraṃtaram |
yāmaho dīrghanidrāyai seyaṃ śrīmaṇikarṇikā || 13 ||
[Analyze grammar]

ayaṃ hi sa kulastaṃbho yatra śrīkālabhairavaḥ |
kṣetrapāpakṛtaḥ śāsti darśayaṃstīvrayātanām || 14 ||
[Analyze grammar]

anyatra vihitaṃ pāpaṃ naśyetkāśīnirīkṣaṇāt |
kāśyāṃ kṛtānāṃ pāpānāṃ dāruṇeyaṃ tu yātanā || 15 ||
[Analyze grammar]

kapālamocanaṃ tīrthametattadapi pāvanam |
kapālaṃ patitaṃ yatra vidherbhairavapāṇitaḥ || 16 ||
[Analyze grammar]

ṛṇatrayādvimucyaṃte yatra snātā narotamāḥ |
tīrthaṃ viśuddhijanakaṃ tadetadṛṇamocanam || 17 ||
[Analyze grammar]

praṇavākhyaṃ paraṃbrahma yatra nityaṃ prakāśate |
sapaṃcāyatanopeta oṃkāreśoyamadbhutaḥ || 18 ||
[Analyze grammar]

aśca uśca makāraśca nādobiṃduśca paṃcamaḥ |
paṃcātmakaṃ paraṃbrahma yatra nityaṃ prakāśate || 19 ||
[Analyze grammar]

eṣā matsyodarī ramyā yatsnāto mānavottamaḥ |
māturjātūdaradarīṃ na viśedeṣa niścayaḥ || 120 ||
[Analyze grammar]

trilocanoyaṃ bhagavānkuryādeva trilocanam |
nijabhaktaṃ kṛpāyuktastvapi deśātaṃra sthitam || 21 ||
[Analyze grammar]

asau kāmeśvaro devo yaḥ kāmānpūrayetsatām |
durvāsā api yatrāpa nijakāmamahodayam || 22 ||
[Analyze grammar]

svayaṃ līno maheśotra bhaktakāmasamṛddhaye |
tasmātsvarlīnasaṃjñāsya devadevasya śūlinaḥ || 23 ||
[Analyze grammar]

vārāṇasyāṃ mahādevo yaḥ purāṇeṣu paṭhyate |
kṣetrābhimānī bhagavāṃstatprāsādoyamadbhutaḥ || 24 ||
[Analyze grammar]

asau skaṃdeśvaro devaḥ śraddhayā yadvilokanāt |
ājanmabrahmacaryasya phalamāpnoti mānavaḥ || 25 ||
[Analyze grammar]

vināyakeśvaraścāyaṃ sarvasiddhi pradāyakaḥ |
yatsevayā praṇaśyaṃti nṛṇāṃ sarve vināyakāḥ || 26 ||
[Analyze grammar]

iyaṃ vārāṇasī devī sākṣānmūrttimayī śubhā |
yasyā vilokanātpuṃsāṃ bhūyo no garbhasaṃbhavaḥ || 27 ||
[Analyze grammar]

pārvatīśvaraliṃgasya mahadāyatanaṃ tvidam |
yatra nityaṃ maheśāno gauryā saha vimuktidaḥ || 28 ||
[Analyze grammar]

eṣa bhṛṃgīśvaraḥ śrīmānmahāpātakanāśanaḥ |
jīvanmukto'bhavadbhṛṃgī yasya liṃgasya sevayā || 29 ||
[Analyze grammar]

caturvedeśvaraścaiṣa caturvedadharo vidhiḥ |
labhedyadvīkṣaṇādvipro vedādhyayanajaṃ phalam || 130 ||
[Analyze grammar]

yajñaiḥ saṃsthāpitaṃ caitalliṃgaṃ yajñeśvarābhidham |
yadarcanāllabhenmartyaḥ sarvayāgaphalaṃ mahat || 31 ||
[Analyze grammar]

purāṇeśvara nāmaitalliṃgamaṣṭādaśāṃgulam |
aṣṭādaśānāṃ vidyānāṃ syādādhāro yadīkṣaṇāt || 32 ||
[Analyze grammar]

dharmaśāstreśvaraścāyaṃ smṛtibhiśca pratiṣṭhitaḥ |
smṛtyadhyayanajaṃ puṇyaṃ yadvilokanato bhavet || 33 ||
[Analyze grammar]

sārasvatamidaṃ liṃgaṃ sarvajāḍyavināśakṛt |
sarvatīrtheśvaraṃ liṃgametatsadyo viśuddhidam || 34 ||
[Analyze grammar]

śaileśvarasya liṃgasya maṃḍapoyaṃ mahādbhutaḥ |
sarveṣāṃ ratnajātānāṃ yo bibharti parāṃ śriyam || 35 ||
[Analyze grammar]

saptasāgarasaṃjñaṃ vai liṃgametanmanoharam |
yadvīkṣaṇāllabhenmartyaḥ saptābdhisnānajaṃ phalam || 36 ||
[Analyze grammar]

asau maṃtreśvaraḥ śrīmānmaṃtrajāpyaphalapradaḥ |
saptakoṭimahāmaṃtraiḥ sthāpito yaḥ purā yuge || 37 ||
[Analyze grammar]

tripureśasya liṃgasya puraḥ kuṃḍamidaṃ mahat |
tripuraiḥ khānitaṃ pūrvaṃ tripurāripriyaṃ param || 38 ||
[Analyze grammar]

idaṃ vāṇeśvaraṃ liṃgaṃ sahasrabhujapūjitam |
dvibhujasyāpi bāṇasya sahasrabhujahetukam || 39 ||
[Analyze grammar]

vairocaneśvaraścaiṣa puraḥ prahlādakeśavāt |
balikeśavanāmāsāveṣa nāradakeśavaḥ || 140 ||
[Analyze grammar]

ādikeśava pūrveṇa tvayamādityakeśavaḥ |
bhīṣmakeśavanāmāsau dattātreyeśvarastvayam || 41 ||
[Analyze grammar]

dattātreyeśvarātpūrvameṣa ādi gadādharaḥ |
bhṛgukeśavanāmāsāveṣa vāmanakeśavaḥ || 42 ||
[Analyze grammar]

naranārāyaṇāvetau yajñavārāhakeśavaḥ |
vidāranārasiṃhoyaṃ gopīgoviṃda eṣa ha || 43 ||
[Analyze grammar]

eṣa lakṣmīnṛsiṃhasya prāsādo ratnaketanaḥ |
yasya prasādātprahlādaḥ padamaiṃdramavāptavān || 44 ||
[Analyze grammar]

akharvasiddhidaḥ puṃsāmeṣa kharvavināyakaḥ |
śeṣamādhavanāmāsau śeṣeṇa sthāpitaḥ purā || 45 ||
[Analyze grammar]

yasya bhaktā na dahyaṃte tvapi saṃvartavahninā |
śaṃkhamādhavanāmāsau śaṃkhaṃ hatvātra saṃsthitaḥ || 46 ||
[Analyze grammar]

idaṃ sārasvataṃ srotaḥ paraṃ brahmarasāyanam |
sarasvatyā mahānadyāḥ saṃgamo yatra gaṃgayā || 47 ||
[Analyze grammar]

yatrāplutā narā bhūyaḥ saṃbhavaṃti na bhūtale |
śrībiṃdumādhavastveṣa sākṣāllakṣmīpatiḥ paraḥ || 48 ||
[Analyze grammar]

śraddhayā yaṃ namanmartyo na vasedgarbhaveśmani |
na dāridryamavāpnoti vyādhibhirnābhibhūyate || 49 ||
[Analyze grammar]

biṃdumādhavabhakto yastaṃ yamopi namasyati |
praṇavātmā ya eko'sti nādabiṃdu svarūpadhṛk || 150 ||
[Analyze grammar]

amūrtaṃ yatparaṃ brahma biṃdumādhava eva saḥ |
etatpaṃcanadaṃ tīrthaṃ paṃcabrahmātmasaṃjñakam || 51 ||
[Analyze grammar]

yatra snāto na gṛhṇīyāccharīraṃ pāṃcabhautikam |
eṣā sā maṃgalāgaurī kāśyāṃ paramamaṃgalam || 52 ||
[Analyze grammar]

yatprasādādavāpnoti naro'tra ca paratra ca |
mayūkhādityasaṃjñoyaṃ raśmimālī tamopahaḥ || 53 ||
[Analyze grammar]

gabhastīśo mahāliṃgametaddivyamahaḥpradam |
mṛkaṃḍusūnunāpyatra tapastaptaṃ purā mahat || 54 ||
[Analyze grammar]

liṃgaṃ saṃsthāpya paramaṃ svanāmnāyuḥpradaṃ param |
kiraṇeśvaranāmaitalliṃgaṃ trailokyaviśrutam || 55 ||
[Analyze grammar]

sakṛnna tamidaṃ lokaṃ nayetkiraṇamālinaḥ |
dhautapāpeśvaraṃ liṃgametatpātakadhāvanam || 56 ||
[Analyze grammar]

nirvāṇanarasiṃhoyaṃ bhaktanirvāṇakāraṇam |
maṇipradīpanāgoyaṃ mahāmaṇivibhūṣaṇaḥ || 57 ||
[Analyze grammar]

yadarcanānnaro jātu na nāgaiḥ paribhūyate |
kapileśamidaṃ liṃgaṃ kapilena pratiṣṭhitam || 58 ||
[Analyze grammar]

mucyaṃte kapayopyasya darśanātkimu mānavāḥ |
priyavrateśvaraṃ liṃgaṃ mahadetatprakāśate || 59 ||
[Analyze grammar]

yasyārcanāllabhejjaṃtuḥ priyatvaṃ sarvajantuṣu |
idamāyatanaṃ śreṣṭhaṃ maṇimāṇikyanirmitam || 160 ||
[Analyze grammar]

śrīmataḥ kālarājasya kalikālārtihāriṇaḥ |
nijabhaktaṃ janaṃ pāti yaḥ pāpātpāpabhakṣaṇaḥ || 61 ||
[Analyze grammar]

kṣetravighnakarānpāpānyātayanyātanā śataiḥ |
iyaṃ maṃdākinī ramyā tapastaptumihāgatā || 62 ||
[Analyze grammar]

kāśīvāsasukhaṃ prāpya nādyāpi divamīhate |
snātvātra saṃtarpya pitṝñchrāddhaṃ kṛtvā vidhānataḥ || 63 ||
[Analyze grammar]

naro na narakaṃ paśyedapi duṣkṛtakarmakṛt |
yāni kāni ca liṃgāni kāśyāṃ saṃti sahasraśaḥ || 64 ||
[Analyze grammar]

ratnabhūtamidaṃ teṣu liṃgaṃ ratneśvarābhidham |
ratneśvaraprasādena bhuktvā ratnānyanekaśaḥ || 65 ||
[Analyze grammar]

puruṣārthamahāratnaṃ nirvāṇaṃ ko na labdhavān |
kṛttivāseśvarasyaiṣā mahāprāsādanirmitiḥ || 66 ||
[Analyze grammar]

yāṃ dṛṣṭvāpi naro dūrātkṛttivāsaḥ padaṃ labhet |
sarveṣāmapi liṃgānāṃ maulitvaṃ kṛttivāsasaḥ || 67 ||
[Analyze grammar]

oṃkāreśaḥ śikhā jñeyā locanāni trilocanaḥ |
gokarṇabhārabhūteśau tatkarṇau parikīrtitau || 68 ||
[Analyze grammar]

viśveśvarāvimuktau ca dvāvetau dakṣiṇau karau |
dharmeśamaṇikarṇeśau dvau karau dakṣiṇetarau || 69 ||
[Analyze grammar]

kāleśvarakapardīśau caraṇāvatinirmalau |
jyeṣṭheśvaro nitaṃbaśca nābhirvai madhyameśvaraḥ || 170 ||
[Analyze grammar]

kapardosya mahādevaḥ śirobhūṣā śrutīśvaraḥ |
caṃdreśo hṛdayaṃ tasya ātmā vīreśvaraḥ paraḥ || 71 ||
[Analyze grammar]

liṃgaṃ tasya tu kedāraḥ śukraṃ śukreśvaraṃ viduḥ |
anyāni yāni liṃgāni paraḥ koṭi śatāni ca || 72 ||
[Analyze grammar]

jñeyāni nakhalomāni vapuṣo bhūṣaṇānyapi |
yāvetau dakṣiṇau hastau nityanirvāṇadau hi tau || 73 ||
[Analyze grammar]

jaṃtūnāmabhayaṃ dattvā patatāṃ mohasāgare |
iyaṃ durgā bhagavatī pitṛliṃgamidaṃ param || 74 ||
[Analyze grammar]

iyaṃ hi citraghaṃṭeśī ghaṃṭākarṇa hradastvayam |
iyaṃ sā lalitā gaurī viśālākṣīyamadbhutā || 75 ||
[Analyze grammar]

āśāvināyakastveṣa dharmakūpoyamadbhutaḥ |
yatra piṃḍānnaro dattvā pitṝnbrahmapadaṃ nayet || 76 ||
[Analyze grammar]

eṣā viśvabhujā devī viśvaikajananī parā |
asau baṃdī mahādevī nityaṃ trailokyavaṃditā || 77 ||
[Analyze grammar]

nigaḍasthānapi janānpāśānmocayati smṛtā |
daśāśvamedhikaṃ tīrthametattrailokyavaṃditam || 78 ||
[Analyze grammar]

yatrāhutitrayeṇāpi agnihotraphalaṃ labhet |
prayāgākhyamidaṃ srotaḥ sarvatīrthottamottamam || 79 ||
[Analyze grammar]

aśokākhyamidaṃ tīrthaṃ gaṃgākeśava eṣa vai |
mokṣadvāramidaṃ śreṣṭhaṃ svarga dvāramidaṃ viduḥ || 180 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe jñānavāpīvarṇanaṃ nāma trayastriṃśattamo'dhyāyaḥ || 33 ||
[Analyze grammar]