Chapter 1

[English text for this chapter is available]

namaḥ śivāya sāmbāya sagaṇāya sasūnave |
pradhānapuruṣeśāya sargasthitatyantahetave || 1 ||
[Analyze grammar]

ṛṣaya ūcuḥ |
śrutomāsaṃhitā ramyā nānākhyānasamanvitā |
kailāsasaṃhitāmbrūhi śivatattvavivarddhinīm || 2 ||
[Analyze grammar]

vyāsa uvāca |
śṛṇuta prītito vatsāḥ kailāsākhyāṃ hi saṃhitām |
śivatattvaparāndivyāṃ vakṣye vaḥ snehataḥ parām || 3 ||
[Analyze grammar]

himavacchikhare pūrvvaṃ tapasyanto mahaujasaḥ |
vārāṇasīṅgantukāmā munayaḥ kṛtasamvidaḥ || 4 ||
[Analyze grammar]

nirgatya tasmātsamprāpya gireḥ kāśīṃ samāhitāḥ |
snātavyameveti tadā dadṛśurmaṇikarṇikām || 5 ||
[Analyze grammar]

tatra snātvā susantapya devādīnatha jāhnavīm |
dṛṣṭvā snātvā munīśāste viśveśaṃ tridaśeśvaram || 6 ||
[Analyze grammar]

namaskṛtyātha sampūjya bhaktyā paramayānvitāḥ |
śatarudrādibhiḥ stutvā stutibhirvvedapāragāḥ || 7 ||
[Analyze grammar]

ātmānaṃ menire sarve kṛtārthā vayamityuta |
śivaprītyā supūrṇārthāśśivabhaktiratāssadā || 8 ||
[Analyze grammar]

tasminnavasare sūtaṃ pañcakrośadidṛkṣayā |
gatvā samāgataṃ vīkṣya mudā te taṃ vavandire|| |
sopi viśveśvaraṃ sākṣāddevadevamumāpatim |
namaskṛtyātha taissākammuktimaṇḍapamāviśat || 10 ||
[Analyze grammar]

tatrāsīnammahātmānaṃ sūtampaurāṇikottamam |
arghyādibhistadā sarvve munayassamupācaran || 11 ||
[Analyze grammar]

tataḥ sūtaḥ prasannātmā munīnālokya suvratān |
papraccha kuśalāntepi procuḥ kuśalamātmanaḥ || 12 ||
[Analyze grammar]

te tu saṃhṛṣṭahṛdayaṃ jñātvā taṃ vai munīśvarāḥ |
praṇavārthāvagatyarthamūcuḥ prāstāvikaṃ vacaḥ || 13 ||
[Analyze grammar]

munaya ūcuḥ |
vyāsaśiṣya mahābhāga sūta paurāṇikottama |
dhanyastvaṃ śivabhakto hi sarvavijñāna sāgaraḥ || 14 ||
[Analyze grammar]

bhavantameva bhagavānvyāsassarvajagadguruḥ |
abhiṣicya purāṇānāṃ gurutve samayojayat || 15 ||
[Analyze grammar]

tasmātpaurāṇikī vidyā bhavato hṛdi saṃsthitā |
purāṇāni ca sarvāṇi vedārthampravadanti hi || 16 ||
[Analyze grammar]

vedāḥ praṇavasambhūtāḥ praṇavārtho maheśvaraḥ |
ato maheśvarasthānaṃ tvayi dhiṣṇyampratiṣṭhitam || 17 ||
[Analyze grammar]

tvanmukhābjaparisyandanmakaraṃde manoharam |
praṇavārthāmṛtaṃ pītvā bhaviṣyāmo gatajvarāḥ || 18 ||
[Analyze grammar]

viśeṣato gurustvaṃ hi nānyo'smākaṃ mahāmate |
paraṃ bhāvaṃ maheśasya parayā kṛpayā vada || 19 ||
[Analyze grammar]

iti teṣāṃ vacaḥ śrutvā sūto vyāsapriyassudhīḥ |
gaṇeśaṃ ṣaṇmukhaṃ sākṣānmaheśānaṃ maheśvarīm || 20 ||
[Analyze grammar]

śilādatanayaṃ devaṃ nandīśaṃ suyaśāpatim |
sanatkumāraṃ vyāsaṃ ca praṇipatyedamabravīt || 21 ||
[Analyze grammar]

sūta uvāca |
sādhusādhu mahābhāgā munayaḥ kṣīṇakalmaṣāḥ |
matirdṛḍhatarā jātā durlabhā sāpi duṣkṛtām || 22 ||
[Analyze grammar]

pārāśaryeṇa guruṇā naimiṣāraṇyavāsinām |
munīnāmupadiṣṭaṃ yadvakṣye tanmunipuṃgavāḥ || 23 ||
[Analyze grammar]

yasya śravaṇamātreṇa śivabhaktirbhavennṛṇām |
sāvadhānā bhavantodya śṛṇvantu parayā mudā || 24 ||
[Analyze grammar]

svārociṣentare pūrvaṃ tapasyaṃto dṛḍhavratāḥ |
ṛṣayo naimiṣāraṇye sarvasiddhaniṣevite || 25 ||
[Analyze grammar]

dīrghasatraṃ vitanvanto rudramadhvaranāyakam |
prīṇayantaḥ paraṃ bhāvamaiśvaryyaṃ jñātumicchavaḥ || 26 ||
[Analyze grammar]

nivasanti sma te sarve vyāsadarśanakāṃkṣiṇaḥ |
śivabhaktiratā nityaṃ bhasmarudrākṣadhāriṇaḥ || 27 ||
[Analyze grammar]

teṣāṃ bhāvaṃ samālokya bhagavānbādarāyaṇaḥ |
prādurbabhūva sarvātmā parāśaratapaḥphalam || 28 ||
[Analyze grammar]

taṃ dṛṣṭvā munayassarve prahṛṣṭavadanekṣaṇāḥ |
abhyutthānādibhissarvairupacārairupācaran || 29 ||
[Analyze grammar]

satkṛtya pradadustasmai sauvarṇaṃ viṣṭaraṃ śubham |
sukhopaviṣṭaḥ sa tadā tasminsauvarṇaviṣṭare |
prāha gaṃbhīrayā vācā pārāśaryyo mahāmuniḥ || 30 ||
[Analyze grammar]

vyāsa uvāca |
kuśalaṃ kiṃ nu yuṣmākamprabrūtāsminmahāmakhe |
arcitaṃ kiṃ nu yuṣmābhissamyagadhvaranāyakaḥ || 31 ||
[Analyze grammar]

kimarthamatra yuṣmābhiradhvare parameśvaraḥ |
svarcito bhaktibhāvena sāmbassaṃsāramocakaḥ || 32 ||
[Analyze grammar]

yuṣmatpravṛttirme bhāti śuśrūṣā pūrvameva hi |
parabhāve maheśasya muktihetośśivasya ca || 33 ||
[Analyze grammar]

evamuktā munīndreṇa vyāsenāmitatejasā |
munayo naimiṣāraṇyavāsinaḥ paramaujasaḥ || 34 ||
[Analyze grammar]

praṇipatya mahātmānaṃ pārāśaśaryyaṃ mahāmunim |
śivānurāgasaṃhṛṣṭamānasaṃ ca tamabruvan || 35 ||
[Analyze grammar]

munaya ūcuḥ |
bhagavanmuniśārdūla sākṣānnārāyaṇāṃśaja |
kṛpānidhe mahāprājña sarvavidyādhipa prabho || 36 ||
[Analyze grammar]

tvaṃ hi sarvajagadbharturmahā devasya vedhasaḥ |
sāmbasya sagaṇasyāsya prasādānāṃ nidhissvayam || 37 ||
[Analyze grammar]

tvatpādābjarasāsvādamadhupāyitamānasāḥ |
kṛtārthā vayamadyaiva bhavatpādābjadarśanāt || 38 ||
[Analyze grammar]

tvadīyacaraṇāmbhojadarśanaṃ khalu pāpinām |
durlabhaṃ labdhamasmābhistvasmātsukṛtino vayam || 39 ||
[Analyze grammar]

asmindeśe mahābhāga naimiṣāraṇyasaṃjñake |
dīrghasatrānvitāssarve praṇavārthaprakāśakāḥ || 40 ||
[Analyze grammar]

śrotavyaḥ parameśāna iti kṛtvā viniścitāḥ |
parasparaṃ cintayantaḥ paraṃ bhāvaṃ maheśitu || 41 ||
[Analyze grammar]

ajñātavanta evaite vayaṃ tasmādbhavānprabho |
chettumarhati tānsarvānsaṃśayānalpacetasām || 42 ||
[Analyze grammar]

tvadanyaḥ saṃśayasyāsyacchettā na hi jagattraye |
tasmādapāragaṃbhīravyāmohābdhau nimajjataḥ || 43 ||
[Analyze grammar]

tārayasva śivajñānapotenāsmāndayānidhe |
śivasadbhaktitattvārthaṃ jñātuṃ śraddhālavo vayam || 44 ||
[Analyze grammar]

evamabhyarthitasta munibhirvedapāragaiḥ |
sarvavedārthavinmukhyaḥ śukatāto mahāmuniḥ |
vedāntasārasarvasvaṃ praṇavaṃ parameśvaram || 45 ||
[Analyze grammar]

dhyātvā hṛtkarṇikāmadhye sāmbaṃ saṃsāramocakam |
prahṛṣṭamānaso bhūtvā vyājahāra mahāmuni || 46 ||
[Analyze grammar]

iti śrīśivamahāpurāṇe ṣaṣṭhyāṃ kailāsasaṃhitāyāṃ vyāsaśaunakādisaṃvādo nāma prathamo'dhyāyaḥ || 1 ||
[Analyze grammar]