Chapter 17

athārabhya vṛthāprāyaṃ dharitrīdhāvanaśramam |
surāḥ sarasvadullolalīlā jagmuryathāgatam || 1 ||
[Analyze grammar]

bhaimīṃ patye bhuvastasmai ciraṃ citte dhṛtāmapi |
vidyāmiva vinītāya na viṣeduḥ pradāya te || 2 ||
[Analyze grammar]

kāntimanti vimānāni bhejire bhāsurāḥ surāḥ |
sphaṭikādrestaṭānīva pratibimbā vivasvataḥ || 3 ||
[Analyze grammar]

javājjātena vātena balākṛṣṭabalāhakaiḥ |
śVasanātsvasya śīghratvaṃ rathaireṣāmivākathi || 4 ||
[Analyze grammar]

kamāddavīyasāṃ teṣāṃ tadānīṃ samadṛśyata |
spaṣṭamaṣṭaguṇaiśvaryātparyavasyannivāṇimā || 5 ||
[Analyze grammar]

tatāna vidyutā teṣāṃ rathe pītapatākatām |
labdhaketuśikhollekhā lekhā jalamucaḥ kvacit || 6 ||
[Analyze grammar]

punaḥpunarmilantīṣu pathi pāthodapaṅktiṣu |
nākanātharathālambi babhūvābharaṇaṃ dhanuḥ || 7 ||
[Analyze grammar]

jale jaladajālānāṃ vajritajrānubimbanaiḥ |
jāne tatkālajaisteṣāṃ jātāśanisanāthatā || 8 ||
[Analyze grammar]

sphuṭaṃ sāvarṇivaṃśyānāṃ kulacchatraṃ mahībhujām |
cakre daṇḍabhṛtaścumbandaṇḍaścaṇḍaruciṃ kvacit || 9 ||
[Analyze grammar]

nalabhīmabhuvoḥ premṇi vismitāyā dadhau divaḥ |
pāśipāśaḥ śiraḥkampasrastabhūṣaśravaḥśriyam || 10 ||
[Analyze grammar]

pavanaskandhamāruhya nṛtyattarakaraḥ śikhī |
anena prāpi bhaimīti bhramaṃ cakre nabhaḥsadām || 11 ||
[Analyze grammar]

tatkarṇau bhāratī dūnau virahādbhīmajāgirām |
adhvani dhvanibhirvaiṇiranukalpairvyanodayat || 12 ||
[Analyze grammar]

athāyāntamavaikṣanta te janaughamasitviṣam |
teṣāṃ pratyudgamaprītyā miladvyomeva mūrtimat || 13 ||
[Analyze grammar]

adrākṣurājihānaṃ te smaramagresaraṃ surāḥ |
akṣāvinayaśikṣārthaṃ kalineva puraskṛtam || 14 ||
[Analyze grammar]

agamyārthaṃ tṛṇaprāṇāḥ pṛṣṭhasthīkṛtabhīhriyaḥ |
śambhalībhuktasarvasvā janā yatpāripārśvikāḥ || 15 ||
[Analyze grammar]

bibharti lokajidbhāvaṃ buddhasya spardhayeva yaḥ |
yasyeśatulayevātra kartṛtvamaśarīriṇaḥ || 16 ||
[Analyze grammar]

īśvarasya jagatkṛtsnaṃ sṛṣṭimākulayannimām |
asti yo'strīkṛtastrīkastasya vairaṃ smaranniva || 17 ||
[Analyze grammar]

cakre śakrādinetrāṇāṃ smaraḥ pītanalaśriyām |
api daivatavaidyābhyāmacikitsyamarocakam || 18 ||
[Analyze grammar]

yattatkṣipantamutkampamutthāyukamathāruṇam |
bubudhurvibudhāḥ krodhamākrośākrośaghoṣaṇam || 19 ||
[Analyze grammar]

yamupāsanta dantauṣṭhakṣatāsṛkśiṣyacakṣuṣaḥ |
bhrukuṭīphaṇinīnādanibhaniśvāsaphūtkṛtaḥ || 20 ||
[Analyze grammar]

durgaṃ kāmāśugenāpi durlaṅghyamavalambya yaḥ |
durvāsohṛdayaṃ lokānsendrānapi didhakṣati || 21 ||
[Analyze grammar]

vairāgyaṃ yaḥ karotyuccai rañjanaṃ janayannapi |
sūte sarvendriyācchādi prajvalannapi yastamaḥ || 22 ||
[Analyze grammar]

pañceṣuvijayāśaktau bhavasya krudhyato jayāt |
yenānyavigṛhītārijayakālanayaḥ śritaḥ || 23 ||
[Analyze grammar]

hastau vistārayannibhye bibhyadardhapathasthavāk |
sūcayankākumākūtairlobhastatra vyaloki taiḥ || 24 ||
[Analyze grammar]

dainyastainyamayā nityamatyāhārāmayāvinaḥ |
bhuñjānajanasākūtapaśyā yasyānujīvinaḥ || 25 ||
[Analyze grammar]

dhanidānāmbuvṛṣṭeryaḥ pātrapāṇāvavagrahaḥ |
svāndāsāniva hā niḥsvādvikrīṇīte'rthavatsu yaḥ || 26 ||
[Analyze grammar]

ekadvikaraṇe hetū mahāpātakapañcake |
na tṛṇe manyate kopakāmau yaḥ pañca kārayan || 27 ||
[Analyze grammar]

yaḥ sarvendriyasadmāpi jihvāṃ bahvavalambate |
tasyāmācāryakaṃ yāñjābaṭave pāṭave'rjitum || 28 ||
[Analyze grammar]

pathyāṃ tathyāmagṛhṇantamandhaṃ bandhuprabodhanām |
śūnyamāśliṣya nojjhantaṃ mohamaikṣanta hanta te || 29 ||
[Analyze grammar]

śvaḥśvaḥ prāṇaprayāṇe'pi na smaranti smaradviṣāḥ |
magnāḥ kuṭumbajambāle bāliśā yadupāsinaḥ || 30 ||
[Analyze grammar]

puṃsāmalabdhanirvāṇajñānadīpamayātmanām |
antarmlāpayati vyaktaṃ yaḥ kajjalavadujjvalam || 31 ||
[Analyze grammar]

brahmacārivanasthāyiyatayo gṛhiṇaṃ yathā |
trayo yamupajīvanti krodhalobhamanobhavāḥ || 32 ||
[Analyze grammar]

jāgratāmapi nidrā yaḥ paśyatāmapi yo'ndhatā |
śṛute satyapi jāḍyaṃ yaḥ prakāśe'pi ca yastamaḥ || 33 ||
[Analyze grammar]

kurusainyaṃ hareṇeva prāgalajjata nāṛjunaḥ |
hataṃ yena jayankāmastamoguṇajuṣā jagat || 34 ||
[Analyze grammar]

cihnitāḥ katiciddevaiḥ prācaḥ paricayādamī |
anye na kecanācūḍamenaḥ kañcukamecakāḥ || 35 ||
[Analyze grammar]

tatrodgūrṇa ivārṇodhau sainye'bhyarṇamupeyuṣi |
kasyāpyākarṇayāmāsuste varṇānkarṇakarkaśān || 36 ||
[Analyze grammar]

grāvonmajjanavadyajñaphaleti śrutisatyatā |
kā śraddhā tatra dhīvṛddhāḥ kāmādhvā yatkhilīkṛtaḥ || 37 ||
[Analyze grammar]

kenāpi bodhisattvena jātaṃ sattvena hetunā |
yadvedamarmabhedāya jagade jagadasthiram || 38 ||
[Analyze grammar]

agnihotraṃ trayītantraṃ tridaṇḍaṃ bhasmapuṇḍrakam |
prajñāpauruṣāniḥsvānāṃ jīvo jalpati jīvikā || 39 ||
[Analyze grammar]

śuddhirvaṃśadvayīśuddhau pitroḥ pitroryadekaśaḥ |
tadānantakulādoṣādadoṣā jātirasti kā || 40 ||
[Analyze grammar]

kāminīvargasaṃsargairna kaḥ saṃkrāntapātakaḥ |
nāśnāti snāti hā mohātkāmakṣāmavrataṃ jagat || 41 ||
[Analyze grammar]

īrṣyayā rakṣato nārīrdhikkulasthitidāmbhikān |
smarāndhatvāviśeṣe'pi tathā naramarakṣataḥ || 42 ||
[Analyze grammar]

paradāranivṛttiryā so'yaṃ svayamanādṛtaḥ |
ahalyākelilolena dambho dambholipāṇinā || 43 ||
[Analyze grammar]

gurutalpagatau pāpakalpanāṃ tyajata dvijāḥ |
yeṣāṃ vaḥ patyuratyuccairgurudāragrahe grahaḥ || 44 ||
[Analyze grammar]

pāpāttāpā mudaḥ puṇyātparāsoḥ syuriti śrutiḥ |
vaiparītyaṃ drutaṃ sākṣāttadākhyāta balābale || 45 ||
[Analyze grammar]

saṃdehe'pyanyadehāptervivarjyaṃ vṛjinaṃ yadi |
tyajata śrotriyāḥ sattraṃ hiṃsādūṣaṇasaṃśayāt || 46 ||
[Analyze grammar]

yastrivedīvidāṃ vandyaḥ sa vyāso'pi jajalpa vaḥ |
rāmāyā jātakāmāyāḥ praśastā hastadhāraṇā || 47 ||
[Analyze grammar]

sukṛte vaḥ kathaṃ śraddhā surate ca kathaṃ na sā |
tatkarma puruṣaḥ kuryādyenānte sukhamedhate || 48 ||
[Analyze grammar]

bālātkuruta pāpāni santu tānyakṛtāni vaḥ |
sarvānbalakṛtāndoṣānakṛtānmanurabravīt || 49 ||
[Analyze grammar]

svāgamārthe'pi mā sthāsmiṃstīrthikā vicikitsavaḥ |
taṃ tamācaratānandaṃ svacchandaṃ yaṃ yamicchatha || 50 ||
[Analyze grammar]

śrutismṛtyarthabodheṣu kvaikamatyaṃ mahādhiyām |
vyākhyā buddhibalāpekṣā sā nopekṣya sukhonmukhī || 51 ||
[Analyze grammar]

yasminnasmīti dhīrdehe taddāhe vaḥ kimenasā |
kvāpi tatkiṃ phalaṃ na syādātmeti parasākṣike || 52 ||
[Analyze grammar]

mṛtaḥ smarati janmāni mṛte karmaphalormayaḥ |
anyabhuktairmṛte tṛptirityalaṃ dhūrtavārtayā || 53 ||
[Analyze grammar]

janena janatāsmīti kāyaṃ nāyaṃ tvamityasau |
tyājyate grāhyate cānyadaho śrutyātidhūrtayā || 54 ||
[Analyze grammar]

ekaṃ saṃdigdhayostāvadbhāvi tatreṣṭajanmani |
hetumāhuḥ svamantrādīnasaṅgānanyathā viṭāḥ || 55 ||
[Analyze grammar]

ekasya viśvapāpena tāpe'nante nimajjataḥ |
kaḥ śrautasyātmano bhīro bhāraḥ syādduritena te || 56 ||
[Analyze grammar]

kiṃ te vṛntahṛtātpuṣpāttanmātre hi phalatyadaḥ |
nyasya tanmūrdhnyananyasya nyāsyamevāśmano yadi || 57 ||
[Analyze grammar]

tṛṇānīva ghṛṇāvādānvidhūnaya vadhūranu |
tavāpi tādṛśasyaiva kā ciraṃ janavañcanā || 58 ||
[Analyze grammar]

kurudhvaṃ kāmadevājñāṃ brahmādyairapyalaṅghitām |
vedo'pi devakīyājñā tatrājñāḥ kādhikārhaṇā || 59 ||
[Analyze grammar]

pralāpamapi vedasya bhāgaṃ manyadhva eva cet |
kenābhagyena duḥkhānna vidhīnapi tathecchatha || 60 ||
[Analyze grammar]

śrutiṃ śraddhattha vikṣiptāḥ prakṣiptāṃ brūtha ca svayam |
mīmāṃsāmāṃsalaprajñāstāṃ yūpadvipadāpinīm || 61 ||
[Analyze grammar]

ko hi vedāstyamuṣminvā loka ityāha yā śrutiḥ |
tatprāmāṇyādamuṃ lokaṃ lokaḥ pratyetu vā katham || 62 ||
[Analyze grammar]

dharmādharmau manurjalpannaśakyārjanavarjanau |
vyājānmaṇḍaladaṇḍārthī śṛadadhāyi mudhā budhaiḥ || 63 ||
[Analyze grammar]

vyāsasyaiva girā tasmiñśraddhetyaddhā stha tāntrikāḥ |
matsyasyāpyupadeśyānvaḥ ko matsyānapi bhāṣatām || 64 ||
[Analyze grammar]

paṇḍitaḥ pāṇḍavānāṃ sa vyāsaścāṭupaṭuḥ kaviḥ |
nininda teṣu nindatsu stuvatsu stutavānna kim || 65 ||
[Analyze grammar]

na bhrātuḥ kila devyāṃ sa vyāsaḥ kāmātsamāsajat |
dāsīratastadāsīdyanmātrā tatrāpyadeśi kim || 66 ||
[Analyze grammar]

devairdvijaiḥ kṛtā granthāḥ panthā yeṣāṃ tadādṛtau |
gāṃ nataiḥ kiṃ na tairvyaktaṃ tato'pyātmādharīkṛtaḥ || 67 ||
[Analyze grammar]

sādhukāmukatāmuktā śāntasvāntairmakhonmukhaiḥ |
sāraṅgalocanāsārāṃ divaṃ pretyāpi lipsubhiḥ || 68 ||
[Analyze grammar]

kaḥ śamaḥ kriyatāṃ prājñāḥ priyāprītau pariśramaḥ |
bhasmībhūtasya bhūtasya punarāgamanaṃ kutaḥ || 69 ||
[Analyze grammar]

ubhayī prakṛtiḥ kāme sajjediti munermanaḥ |
apavarge tṛtīyeti bhaṇataḥ pāṇinerapi || 70 ||
[Analyze grammar]

bibhratyupariyānāya janā janitamajjanāḥ |
vigrahāyāgrataḥ paścādgatvarorabhravibhramam || 71 ||
[Analyze grammar]

enasānena tiryaksyādityādiḥ kā bibhīṣikā |
rājilo'pi hi rājeva svaiḥ sukhī sukhahetubhiḥ || 72 ||
[Analyze grammar]

hatāśceddivi dīvyanti daityā daityāriṇā raṇe |
tatrāpi tena yudhyantāṃ hatā api tathaiva te || 73 ||
[Analyze grammar]

svaṃ ca brahma ca saṃsāre muktau tu brahma kevalam |
iti svocchittimuktyuktivaidagdhī vedavādinām || 74 ||
[Analyze grammar]

muktaye yaḥ śilātvāya śāstramūce sacetasām |
gotamaṃ tamavekṣyaiva yathā vittha tathaiva saḥ || 75 ||
[Analyze grammar]

dārā hariharādīnāṃ tanmagnamanaso bhṛśam |
kiṃ na muktāḥkutaḥ santi kārāgāre manobhuvaḥ || 76 ||
[Analyze grammar]

devaścedasti sarvajñaḥ karuṇābhāgavandhyavāk |
tatkiṃ vāgvyayamātrānnaḥ kṛtārthayati nāṛthinaḥ || 77 ||
[Analyze grammar]

bhavināṃ bhāvayanduḥkhaṃ svakarmajamapīśvaraḥ |
syādakāraṇavairī naḥ kāraṇādapare pare || 78 ||
[Analyze grammar]

tarkāpratiṣṭhayā sāmyādanyonyasya vyatighnatām |
nāprāmāṇyaṃ matānāṃ syātkeṣāṃ satpratipakṣavat || 79 ||
[Analyze grammar]

akrodhaṃ śikṣayantyanyaiḥ krodhanā ye tapodhanāḥ |
nirdhanāste dhanāyaiva dhātuvādopadeśinaḥ || 80 ||
[Analyze grammar]

kiṃ vittaṃ datta tuṣṭeyamadātari haripriyā |
dattvā sarvaṃ dhanaṃ mugdho bandhanaṃ labdhavānbaliḥ || 81 ||
[Analyze grammar]

dogdhā drogdhā ca sarvo'yaṃ dhaninaścetasā janaḥ |
visṛjya lobhasaṃkṣobhamekadvā yadyudāsate || 82 ||
[Analyze grammar]

dainyasyāyuṣyamastainyamabhakṣyaṃ kukṣivañcanā |
svācchandyamṛcchatānandakandalīkandamekakam || 83 ||
[Analyze grammar]

itthamākarṇya durvarṇaṃ śakraḥ sakrodhatāṃ dadhe |
avocaduccaiḥ kaskoyaṃ dharmamarmāṇi kṛntati || 84 ||
[Analyze grammar]

lokatrayīṃ trayīnetrāṃ vajravīryasphuratkare |
ka itthaṃ bhāṣate pākaśāsane mayi śāsati || 85 ||
[Analyze grammar]

varṇāsaṃkīrṇatāyāṃ vā jātyalopo'nyathāpi vā |
brahmahādeḥ parīkṣāsu bhaṅgamaṅga pramāṇaya || 86 ||
[Analyze grammar]

brāhmaṇyādiprasiddhāyā gantā yannekṣate jayam |
tadviśuddhimaśeṣasya varṇavaṃśasya śaṃsati || 87 ||
[Analyze grammar]

jalānalaparīkṣādau saṃvādo vedavedite |
galahastitanāstikyāṃ dhigdhiyaṃ kurute'nate || 88 ||
[Analyze grammar]

satyeva patiyogādau garbhāderadhruvodayāt |
ākṣiptaṃ nāstikāḥ karma na kiṃ marma bhinatti vaḥ || 89 ||
[Analyze grammar]

yācataḥ svagayāśrāddhaṃ pretasyāviśya kaṃcana |
nānādeśajanopajñāḥ pratyeṣi na kathāḥ katham || 90 ||
[Analyze grammar]

nītānāṃ yamadūtena nāmabhrānterupāgatau |
śraddhatse saṃvadantīṃ na paralokakathāṃ katham || 91 ||
[Analyze grammar]

jajvāla jvalanaḥ krodhādācakhyau cākṣipannamum |
kimāttha re kimātthedamasmadagre nirargalam || 92 ||
[Analyze grammar]

mahāparākiṇaḥ śrautadharmaikabalajīvinaḥ |
kṣaṇābhakṣaṇamūrcchāla smaranvismayase na kim || 93 ||
[Analyze grammar]

putreṣṭiśyenakārīrīmukhā dṛṣṭaphalā makhāḥ |
na vaḥ kiṃ dharmasaṃdehamandehajayabhānavaḥ || 94 ||
[Analyze grammar]

daṇḍatāṇḍavanaiḥ kurvansphuliṅgāliṅgitaṃ nabhaḥ |
nirmame'tha girāmūrmīrbhinnamarmeva dharmarāṭ || 95 ||
[Analyze grammar]

tiṣṭha bhostiṣṭha kaṇṭhoṣṭhaṃ kuṇṭhayāmi haṭhādayam |
apaṣṭhu paṭhataḥ pāṭhyamadhigoṣṭhi śaṭhasya te || 96 ||
[Analyze grammar]

vedaistadveṣibhistadvatsthiraṃ mataśataiḥ kṛtam |
paraṃ kaste paraṃ vācā lokaṃ lokāyata tyajet || 97 ||
[Analyze grammar]

samajñānālpabhūyiṣṭhapānthavaimatyametya yam |
loke prayāsi panthānaṃ paraloke na taṃ kutaḥ || 98 ||
[Analyze grammar]

svakanyāmanyasātkartuṃ viśvānumatidṛśvanaḥ |
loke paratra lokasya kasya na syādṛḍhaṃ manaḥ || 99 ||
[Analyze grammar]

kasminnapi mate satye hatāḥ sarvamatatyajaḥ |
taddṛṣṭyā vyarthatāmātramanarthastu na dharmajaḥ || 10 ||
[Analyze grammar]

kvāpi sarvairavaimatyātpātityādanyathā kvacit |
sthātavyaṃ śrauta eva syāddharme śeṣe'pi tatkṛteḥ || 101 ||
[Analyze grammar]

babhāṇa varuṇaḥ krodhādaruṇaḥ karuṇojjhitam |
kiṃ na pracaṇḍātpākhaṇḍapāśa pāśādbibheṣi naḥ || 102 ||
[Analyze grammar]

mānavāśakyanirmāṇā kūrmādyaṅkabilā śilā |
na śraddhāpayate mugdhāstīrthikādhvani vaḥ katham || 103 ||
[Analyze grammar]

śatakratūrujādyākhyāvikhyātirnāstikāḥ katham |
śrutivṛttāntasaṃvādairna vaścamadacīkarat || 104 ||
[Analyze grammar]

tattajjanakṛtāveśāngayāśrāddhādiyācinaḥ |
bhūtānanubhavanto'pi kathaṃ śraddhattha na śrutīḥ || 105 ||
[Analyze grammar]

nāmabhramādyamaṃ nītānatha svatanumāgatān |
saṃvādavādino jīvānvīkṣya mā tyajata śrutīḥ || 106 ||
[Analyze grammar]

saṃrambhairjambhajaitrādestabhyamānādbalādvalan |
mūrdhabaddhāñjalirdevānathaivaṃ kaścidūcivān || 107 ||
[Analyze grammar]

nāparādhī parādhīno jano'yaṃ nākanāyakāḥ |
kālasyāhaṃ kalerbandī taccāṭucaṭulānanaḥ || 108 ||
[Analyze grammar]

iti tasminvadatyeva devāḥ syandanamandiram |
kalimākalayāṃcakrurdvāparaṃ cāparaṃ puraḥ || 109 ||
[Analyze grammar]

saṃdadarśonnamadgrīvaḥ śrībahutvakṛtādbhutān |
tattatpāpaparītastānnākīyānnārakīva saḥ || 110 ||
[Analyze grammar]

gururīḍhāvalīḍhaḥ prāgabhūnnamitamastakaḥ |
sa triśaṅkurivākrāntatejaseva biḍaujasaḥ || 111 ||
[Analyze grammar]

vimukhāndraṣṭumapyenaṃ janaṃgama iva dvijān |
eṣa mattaḥ sahelaṃ tānupetya samabhāṣata || 112 ||
[Analyze grammar]

svasti vāstoṣpate tubhyaṃ śikhinnasti na khinnatā |
sakhe kāla sukhenāsi pāśahasta mudastava || 113 ||
[Analyze grammar]

svayaṃvaramahe bhaimīvaraṇāya tvarāmahe |
tadasmānanumanyadhvamadhvane tatra dhāvine || 114 ||
[Analyze grammar]

te'vajñāya tamasyoccairahaṃkāramakāraṇam |
ūcire'ticireṇainaṃ smitvā dṛṣṭamukhā mithaḥ || 115 ||
[Analyze grammar]

punarvakṣyasi mā maivaṃ kathamudvakṣyase tu saḥ |
sṛṣṭavānparameṣṭhī yaṃ naiṣṭhikabrahmacāriṇam || 116 ||
[Analyze grammar]

drohiṇaṃ druhiṇo vettu tvāmākarṇyāvakīrṇinam |
tvajjanairapi vā dhātuḥ seturlaṅghyastvayā na kim || 117 ||
[Analyze grammar]

ativṛttaḥ sa vṛttāntastrijagadyuvagarvanut |
āgacchatāmapādānaṃ sa svayaṃvara eva naḥ || 118 ||
[Analyze grammar]

nāgeṣu sānurāgeṣu paśyatsu diviṣatsu ca |
bhūmipālaṃ naraṃ bhaimī varaṃ sā'vavaradvaram || 119 ||
[Analyze grammar]

bhujageśānasadveśānvānarānitarānnarān |
amarānpāmarānbhaimī nalaṃ veda guṇojjvalam || 120 ||
[Analyze grammar]

iti śrutvā sa roṣāndhaḥ paramaścaramaṃ yugam |
jagannāśaniśārudramudrastānuktavānadaḥ || 121 ||
[Analyze grammar]

kayāpi krīḍatu brahmā divyāḥ strīrdīvyata svayam |
kalistu caratu brahma praitu vātipriyāya vaḥ || 122 ||
[Analyze grammar]

caryeva katameyaṃ vaḥ parasmai dharmadeśinām |
svayaṃ tatkurvatāṃ sarvaṃ śrotuṃ yadbibhitaḥ śrutī || 123 ||
[Analyze grammar]

tatra svayaṃvare'lambhi bhuvaḥ śrīrnaiṣādhena sā |
jagato hrīstu yuṣmābhirlābhastulyābha eva vaḥ || 124 ||
[Analyze grammar]

dūrānnaḥ prekṣya yauṣmākī yukteyaṃ vaktravakraṇā |
lajjayaivāsamarthānāṃ mukhamāsmākamīkṣitum || 125 ||
[Analyze grammar]

sthitaṃ bhavadbhiḥ paśyadbhiḥ kathaṃ bhostadasāṃpratam |
nirdagdhā durvidagdhā kiṃ sā dṛśā na jvalatkrudhā || 126 ||
[Analyze grammar]

mahāvaṃśānanādṛtya mahāntamabhilāṣukā |
svīcakāra kathaṃkāramaho sā taralaṃ nalam || 127 ||
[Analyze grammar]

bhavādṛśairdiśāmīśairmṛgyamāṇāṃ mṛgekṣaṇām |
svīkurvāṇaḥ kathaṃ soḍhaḥ kṛtarīḍhastṛṇaṃ nalaḥ || 128 ||
[Analyze grammar]

dāruṇaḥ kūṭamāśritya śikhī sākṣībhavannapi |
nāvahatkiṃ tadudvāhe kūṭasākṣikriyāmayam || 129 ||
[Analyze grammar]

aho mahaḥsahāyānāṃ saṃbhūtā bhavatāmapi |
kṣamaivāsmai kalaṅkāya devasyevāmṛtadyuteḥ || 130 ||
[Analyze grammar]

sā vavre yaṃ tamutsṛjya mahyamīrṣyājuṣāḥ stha kim |
brūtāgaḥ sadmanastasmācchadmanādyācchinadmi tān || 131 ||
[Analyze grammar]

yatadhvaṃ sahakartuṃ māṃ pāñcālī pāṇḍavairiva |
sāpi pañcabhirasmābhiḥ saṃvibhajyaiva bhujyatām || 132 ||
[Analyze grammar]

athāparivṛḍhā soḍhuṃ mūrkhatāṃ mukharasya tām |
cakre girā śarāghātaṃ bhāratī sāratīvrayā || 133 ||
[Analyze grammar]

kīrtiṃ bhaimīṃ varaṃ cāsmai dātumevāgamannamī |
na līḍhe dhīravaidagdhīṃ dhīragambhīragāhinī || 134 ||
[Analyze grammar]

vāggminīṃ jaḍajihvastāṃ prativaktumaśaktimān |
līlāvahelitāṃ kṛtvā devānevāvadatkaliḥ || 135 ||
[Analyze grammar]

prauñchi vāñchitamasmābhirapi tāṃ prati saṃprati |
tasminnale na leśo'pi kāruṇyasyāsti naḥ punaḥ || 136 ||
[Analyze grammar]

vṛtte karmaṇi kurmaḥ kiṃ tadā nābhūma tatra yat |
kālocitamidānīṃ yaḥ śṛṇutālocitaṃ punaḥ || 137 ||
[Analyze grammar]

pratijñeyaṃ nale vijñāḥ kalervijñāyatāṃ mama |
tena bhaimīṃ ca bhūmiṃ ca tyājayāmi jayāmi tam || 138 ||
[Analyze grammar]

naiṣadhena virodhaṃ me caṇḍatāmaṇḍitaijasaḥ |
jaganti hanta gāyantu raveḥ kairavavairavat || 139 ||
[Analyze grammar]

dvāparaḥ sādhukāreṇa tadvikāramadīdipat |
praṇīya śravaṇe pāṇimavocannamuce ripuḥ || 140 ||
[Analyze grammar]

vismeyamatirasmāsu sādhu vailakṣyamīkṣase |
yaddatte'lpamanalpāya taddatte hriyamātmanaḥ || 141 ||
[Analyze grammar]

phalasīmāṃ caturvargaṃ yacchatāṃśo'pi yacchati |
nalasyāsmadupaghnā sā bhaktirbhūtāvakeśinī || 142 ||
[Analyze grammar]

bhavyo na vyavasāyaste nale sādhumatau kale |
lokapālaviśālo'yaṃ niṣādhānāṃ sudhākaraḥ || 143 ||
[Analyze grammar]

na paśyāmaḥ kalestasminnavakāśaṃ kṣāmābhṛti |
nicitākhiladharme ca dvāparasyodayaṃ vayam || 144 ||
[Analyze grammar]

sā vinītaatamā bhaimī vyarthānarthagrahairaho |
kathaṃ bhavadvidhairbādhyā pramitirvibhramairiva || 145 ||
[Analyze grammar]

taṃ nāsatyayugaṃ tāṃ vā tretā spardhitumarhati |
ekaprakāśadharmāṇaṃ na kalidvāparau yuvām || 146 ||
[Analyze grammar]

kariṣye'vaśyamityuktiḥ kariṣyannapi duṣyasi |
dṛṣṭādṛṣṭā hi nāyattāḥ kāryīyā hetavastava || 147 ||
[Analyze grammar]

drohaṃ mohena yastasminnācaredacireṇa saḥ |
tatpāpasaṃbhavaṃ tāpamāpnuyādanayāttataḥ || 148 ||
[Analyze grammar]

yugaśeṣa tava dveṣastasminneṣa na sāṃpratam |
bhavitā na hitāyaitadvairaṃ te vairaseninā || 149 ||
[Analyze grammar]

tatra yāmītyasajjñānaṃ rājasaṃ sadihāsyatām |
iti tara gato mā gā rājasaṃsadi hāsyatām || 150 ||
[Analyze grammar]

gatvāntarā nalaṃ bhaimīṃ nākasmāttvaṃ pravekṣyasi |
ṣaṇṇāṃ cakramasaṃyuktaṃ paṭhyamānaṃ ḍakāravat || 151 ||
[Analyze grammar]

apare'pi diśāmīśā vācametāṃ śacīpateḥ |
anvamanyanta kiṃtvenāṃ nādatta yugayoryugam || 152 ||
[Analyze grammar]

kaliṃ prati kaliṃ devā devānpratyekaśaḥ kaliḥ |
sopahāsaṃ samairvarṇairitthaṃ vyararacanmithaḥ || 153 ||
[Analyze grammar]

tavā'gamanamevārhaṃ vairasenau tayā vṛte |
udvegena vimānena kimanenāpi dhāvatā || 154 ||
[Analyze grammar]

purā yāsi varītuṃ yāmagra eva tayā vṛte |
anyasminbhavato hāsyaṃ vṛttametattrapākaram || 155 ||
[Analyze grammar]

patyau tayā vṛte'nyasminyadarthaṃ gatavānasi |
bhavataḥ koparodhastādakṣamasya vṛthāruṣaḥ || 156 ||
[Analyze grammar]

yāsi smarañjayankāntyā yojanaughaṃ mahārvatā |
samūḍhastaṃ vṛte'nyasminkiṃ na hīste'tra pāmara || 157 ||
[Analyze grammar]

nalaṃ pratyanapetārti tārtīyīkaturīyayoḥ |
yugayoryugalaṃ buddhvā divi devā dhiyaṃ dadhuḥ || 158 ||
[Analyze grammar]

dvāparaikaparīvāraḥ kalirmatsaramūrcchitaḥ |
nalanigrāhiṇīṃ yātrāṃ jagrāha grahilaḥ kila || 159 ||
[Analyze grammar]

naleṣṭāpūrtasaṃpūrterdūraṃ durgānamuṃ prati |
niṣedhanniṣadhāngantuṃ vighnaḥ saṃjaghaṭe ghanaḥ || 160 ||
[Analyze grammar]

maṇḍalaṃ niṣādhendrasya candrasyevāmalaṃ kaliḥ |
prāpa mlāpayituṃ pāpaḥ svarbhānuriva saṃgrahāt || 161 ||
[Analyze grammar]

kiyatāpi ca kālena kālaḥ kalirupeyivān |
bhaimībharturahaṃmānī rājadhānīṃ mahībhujaḥ || 162 ||
[Analyze grammar]

vedānuddharatāṃ tatra mukhādākarṇayanpadam |
na prasārayituṃ kālaḥ kaliḥ padamapārayat || 163 ||
[Analyze grammar]

śrutipāṭhakavaktrebhyastatrākarṇayataḥ kramam |
kramaḥ saṃkucitastasya pure dūramavartata || 164 ||
[Analyze grammar]

tāvadgatirdhṛtāṭopā pādayostena saṃhitā |
na vedapāṭhikaṇṭhebhyo yāvadaaśrāvi saṃhitā || 165 ||
[Analyze grammar]

tasya homājyagandhena nāsā nāśamivāgamat |
tathātata dṛśau nāsau kratudhūmakadarthitaḥ || 166 ||
[Analyze grammar]

atithīnāṃ padāmbhobhirimaṃ pratyatipicchile |
aṅgaṇe gṛhiṇāṃ tatra khalenānena caskhale || 167 ||
[Analyze grammar]

puṭapākamasau prāpa kratuśuṣmamahoṣmabhiḥ |
tatpratyaṅgamivākarti pūrtormivyajanānilaiḥ || 168 ||
[Analyze grammar]

pitṝṇāṃ tarpaṇe varṇaiḥ kīrṇādveśmani veśmani |
kālādiva tilātkālāddūramatrasadatra saḥ || 169 ||
[Analyze grammar]

snātṝṇāṃ tilakairmene svamantardīrṇameva saḥ |
kṛpāṇībhūya hṛdayaṃ praviṣṭairiva tatra taiḥ || 170 ||
[Analyze grammar]

pumāṃsaṃ mumude tatra vidanmithyāvadāvadam |
striyaṃ prati tathā vīkṣya tamatha mlānavānayam || 171 ||
[Analyze grammar]

yajñayūpaghanāṃ jajñau sa puraṃ śaṅkusaṃkulām |
janairdharmadhanaiḥ kīrṇāṃ vyālakroḍīkṛtāṃ ca tām || 172 ||
[Analyze grammar]

sa pārśvamaśakadgantuṃ na varākaḥ parākiṇām |
māsopavāsināṃ chāyālaṅghane ghanamaskhalat || 173 ||
[Analyze grammar]

āvāhitāṃ dvijaistatra gāyatrīmarkamaṇḍalāt |
sa saṃnidadhatīṃ paśyandṛṣṭanaṣṭo'bhavadbhiyā || 174 ||
[Analyze grammar]

sa gṛhe gṛhibhiḥ pūrṇe vane vaikhānasairghane |
yatyādhāre'marāgāre kvāpi na sthānamānaśe || 175 ||
[Analyze grammar]

kvāpi nāpaśyadanviṣyanhiṃsāmātmapriyāmasau |
svamittraṃ tatra na prāpnodapi mūrkhamukhe kalim || 176 ||
[Analyze grammar]

hiṃsāgavīṃ makhe vīkṣya riraṃsurdhāvati sma saḥ |
sā tu saumyavṛṣāsaktā kharaṃ dūrānnirāsa tam || 177 ||
[Analyze grammar]

maunena vrataniṣṭhānāṃ svākrośaṃ manyate sma saḥ |
vandyavandārubhirjajñau sva śiraśca padāhatam || 178 ||
[Analyze grammar]

ṛṣīṇāṃ sa bṛsīḥ pāṇau paśyannācāmatāmapaḥ |
mene ghanairamī hantuṃ śaptuṃ māmadbhirudyatāḥ || 179 ||
[Analyze grammar]

mauñjīdhṛto dhṛtāṣāḍhānāśaśaṅke sa varṇinaḥ |
rajjvāmī banddhumāyānti hantuṃ daṇḍena māṃ tataḥ || 180 ||
[Analyze grammar]

dṛṣṭvā puraḥ puroḍāśamāsīduttrāsadurmanāḥ |
manvānaḥ phaṇinīstatra sa mumocāsru ca srucaḥ || 181 ||
[Analyze grammar]

mumude madirādānaṃ vidanneṣa dvijanmanaḥ |
dṛṣṭvā sautrāmaṇīmiṣṭiṃ taṃ kurvantamadūyata || 182 ||
[Analyze grammar]

apaśyadyāvato vedavidāṃ brahmāñjalīnasau |
udaḍīyanta tāvantastasyāsrāñjalayo hṛdaḥ || 183 ||
[Analyze grammar]

snātakaṃ ghātakaṃ jajñe jajñau dāntaṃ kṛtāntavat |
vācaṃyamasya dṛṣṭyeva yamasyeva bibhāya saḥ || 184 ||
[Analyze grammar]

sa pākhaṇḍajanānveṣī prāpnuvanvedapaṇḍitān |
jalārthīvānalaṃ prāpya pāpastāpādapāsarat || 185 ||
[Analyze grammar]

tatra brahmahaṇaṃ paśyannatisaṃtoṣāmānaśe |
nirvarṇya sarvamedhasya yajvānaṃ jvarati sma saḥ || 186 ||
[Analyze grammar]

yatihastasthitaistasya rāmbhairārambhi tarjanā |
durjanasyājani kliṣṭirgṛhiṇāṃ vedayaṣṭibhiḥ || 187 ||
[Analyze grammar]

maṇḍalatyāgamevaicchadvīkṣya sthaṇḍilaśāyinaḥ |
pavitrālokanādeṣa pavitrāsamavindata || 188 ||
[Analyze grammar]

apaśyañjinamanviṣyannajinaṃ brahmacāriṇā |
kṣapaṇārthī sadīkṣasya sa cākṣapaṇamaikṣata || 189 ||
[Analyze grammar]

japatāmakṣamālāsu bījākarṣaṇadarśanāt |
sa jīvākṛṣṭikaṣṭāni viparītadṛganvabhūt || 190 ||
[Analyze grammar]

trisaṃdhyaṃ tatra viprāṇāṃ sa paśyannaghamarṣaṇam |
varamaicchaddṛśoreva nijayorapakarṣaṇam || 191 ||
[Analyze grammar]

adrākṣīttatra kiṃcinna kaliḥ paricitaṃ kvacit |
bhaimīnalavyalīkāṇupraśnakāmaḥ paribhraman || 192 ||
[Analyze grammar]

tapaḥ svādhyāyayajñānāmakāṇḍadviṣṭatāpasaḥ |
svavidviṣāṃ śriyaṃ tasminpaśyannupatatāpa saḥ || 193 ||
[Analyze grammar]

kamraṃ tatropanamrāyā viśvasyā vīkṣya tuṣṭavān |
sa mamlau taṃ vibhāvyātha vāmadevyābhyupāsakam || 194 ||
[Analyze grammar]

vairiṇī śucitā tasmai na praveśaṃ dadau bhuvi |
na vedadhvanirālambamambare vitatāra vā || 195 ||
[Analyze grammar]

darśasya darśanātkaṣṭamagniṣṭomasya cānaśe |
jughūrṇe paurṇamāsekṣī somaṃ so'manatāntakam || 196 ||
[Analyze grammar]

tenādṛśyanta vīraghnā na tu vīrahaṇo janāḥ |
nāpaśyatso'bhinirmuktāñjīvanmuktānavaikṣata || 197 ||
[Analyze grammar]

sa tutoṣāśnato viprāndṛṣṭvā spṛṣṭaparasparān |
homaśeṣībhavatsomabhujastānvīkṣya dūnavān || 198 ||
[Analyze grammar]

śrutvā janaṃ rajojuṣṭaṃ tuṣṭiṃ prāpnojjhaṭityasau |
taṃ paśyanpāvanasnānāvasthaṃ duḥsthastato'bhavat || 199 ||
[Analyze grammar]

adhāvatkvāpi gāṃ vīkṣya hanyamānāmayaṃ mudā |
atithibhyastathā buddhvā mando mandaṃ nyavartata || 20 ||
[Analyze grammar]

hṛṣṭavānsa dvijaṃ dṛṣṭvā nityanaimittikatyajam |
yajamānaṃ nirūpyainaṃ dūraṃ dīnamukho'dravat || 201 ||
[Analyze grammar]

ānananda nirīkṣyāyaṃ pure tarātmaghātinam |
sarvasvārasya yajvānamenaṃ dṛṣṭvātha vivyathe || 202 ||
[Analyze grammar]

kratau mahāvrate paśyanbrahmacārītvarīratam |
jajñe yajñakriyāmajñaḥ sa bhaṇḍākāṇḍatāṇḍavam || 203 ||
[Analyze grammar]

yajvabhāryāśvamedhāśvaliṅgāliṅgivarāṅgatām |
dṛṣṭvācaṣṭa sa kartāraṃ śṛuterbhaṇḍamapaṇḍitaḥ || 204 ||
[Analyze grammar]

atha bhīmajayā juṣṭaṃ vyalokata kalirnalam |
duṣṭadṛgbhirdurālokaṃ prabhayeva prabhāprabhum || 205 ||
[Analyze grammar]

tayoḥ sauhārdasāndratvaṃ paśyañśalyamivānaśe |
marmacchedamivānarccha sa tannarmormibhirmithaḥ || 206 ||
[Analyze grammar]

amarṣādātmano doṣāttayostejasvitāguṇāt |
spraṣṭuṃ dṛśāpyanīśastau tasmādapyacalatkaliḥ || 207 ||
[Analyze grammar]

agacchadāśrayānveṣī naladveṣī sa niḥśvasan |
abhirāmaṃ gṛhārāmaṃ tasya rāmasamaśriyaḥ || 208 ||
[Analyze grammar]

rakṣilakṣavṛtatvena bādhanaṃ na tapodhanaiḥ |
mene mānī manāktatra svānukūlaṃ kaliḥ kila || 209 ||
[Analyze grammar]

dalapuṣpaphalairdevadvijapūjābhisaṃdhinā |
sa nalenārjitānprāpa tatra nākramituṃ drumān || 210 ||
[Analyze grammar]

atha sarvodbhidāsattipūraṇāya sa ropitam |
bibhītakaṃ dadarśaikaṃ kuṭaṃ dharme'pyakarmaṭham || 211 ||
[Analyze grammar]

sa taṃ naiṣadhasaudhasya nikaṭaṃ niṣkuṭadhvajam |
bahu mene nijaṃ tasminkalirālambanaṃ vane || 212 ||
[Analyze grammar]

niṣpadasya kalestatra sthānadānādbibhītakam |
kalidrumaḥ paraṃ nāsīdāsītkalpadrumo'pi saḥ || 213 ||
[Analyze grammar]

dadau padena dharmasya sthātumekena yatkaliḥ |
ekaḥ so'pi tadā tasya padaṃ manye'milattataḥ || 214 ||
[Analyze grammar]

udbhidviracitāvāsaḥ kapotādiva tatra saḥ |
rājñaḥ sāgrerdvijādasmātsaṃtāpaṃ prāpa dīkṣitāt || 215 ||
[Analyze grammar]

bibhītakamadhiṣṭhāya tathābhūtena tiṣṭhatā |
tena bhīmabhuvo'bhīkaḥ sa rājarṣiradharṣi na || 216 ||
[Analyze grammar]

tamālambanamāsādya vaidarbhīniṣādheśayoḥ |
kaluṣaṃ kaliranviṣyannavātsīdvatsarānbahūn || 217 ||
[Analyze grammar]

yathāsītkānane tatra vinidrakalikā latā |
tathā nalacchalāsaktivinidrakalikālatā || 218 ||
[Analyze grammar]

doṣaṃ nalasya jijñāsurbabhrāma dvāparaḥ kṣitau |
adoṣaḥ ko'pi lokasya mukhe'stīti durāśayā || 219 ||
[Analyze grammar]

amuṣminnārāme satatanipataddohadatayā prasūnairunnidrairaniśamamṛtāṃśupratibhaṭe |
asau baddhālambaḥ kalirajani kādambavihagacchadacchāyābhyaṅgocitarucitayā lāñchanamṛgaḥ || 220 ||
[Analyze grammar]

sphāre tādṛśi vairaseninagare puṇyaiḥ prajānāṃ ghanaṃ vighnaṃ labdhavaaścirādupanatistasminkilābhūtkaleḥ |
etasminpunarantare'ntaramitānandaḥ sa bhaimīnalāvārāddhuṃ vyadhita smaraḥ śrutiśikhāvandārucūḍaṃ dhanuḥ || 221 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
yātaḥ saptadaśaḥ svasuḥ susadṛśi chindapraśastermahākāvye tadbhuvi naiṣadhīyacarite sargo nisargojjvalaḥ || 222 ||
[Analyze grammar]