Chapter 20

aṣṭāvakra uvāca |
tathāstu sādhayiṣyāmi tatra yāsyāmyasaṃśayam |
yatra tvaṃ vadase sādho bhavānbhavatu satyavāk || 1 ||
[Analyze grammar]

bhīṣma uvāca |
tato'gacchatsa bhagavānuttarāmuttamāṃ diśam |
himavantaṃ giriśreṣṭhaṃ siddhacāraṇasevitam || 2 ||
[Analyze grammar]

sa gatvā dvijaśārdūlo himavantaṃ mahāgirim |
abhyagacchannadīṃ puṇyāṃ bāhudāṃ dharmadāyinīm || 3 ||
[Analyze grammar]

aśoke vimale tīrthe snātvā tarpya ca devatāḥ |
tatra vāsāya śayane kauśye sukhamuvāsa ha || 4 ||
[Analyze grammar]

tato rātryāṃ vyatītāyāṃ prātarutthāya sa dvijaḥ |
snātvā prāduścakārāgniṃ hutvā caiva vidhānataḥ || 5 ||
[Analyze grammar]

rudrāṇīkūpamāsādya hrade tatra samāśvasat |
viśrāntaśca samutthāya kailāsamabhito yayau || 6 ||
[Analyze grammar]

so'paśyatkāñcanadvāraṃ dīpyamānamiva śriyā |
mandākinīṃ ca nalinīṃ dhanadasya mahātmanaḥ || 7 ||
[Analyze grammar]

atha te rākṣasāḥ sarve ye'bhirakṣanti padminīm |
pratyutthitā bhagavantaṃ maṇibhadrapurogamāḥ || 8 ||
[Analyze grammar]

sa tānpratyarcayāmāsa rākṣasānbhīmavikramān |
nivedayata māṃ kṣipraṃ dhanadāyeti cābravīt || 9 ||
[Analyze grammar]

te rākṣasāstadā rājanbhagavantamathābruvan |
asau vaiśravaṇo rājā svayamāyāti te'ntikam || 10 ||
[Analyze grammar]

vidito bhagavānasya kāryamāgamane ca yat |
paśyainaṃ tvaṃ mahābhāgaṃ jvalantamiva tejasā || 11 ||
[Analyze grammar]

tato vaiśravaṇo'bhyetya aṣṭāvakramaninditam |
vidhivatkuśalaṃ pṛṣṭvā tato brahmarṣimabravīt || 12 ||
[Analyze grammar]

sukhaṃ prāpto bhavānkaccitkiṃ vā mattaścikīrṣasi |
brūhi sarvaṃ kariṣyāmi yanmāṃ tvaṃ vakṣyasi dvija || 13 ||
[Analyze grammar]

bhavanaṃ praviśa tvaṃ me yathākāmaṃ dvijottama |
satkṛtaḥ kṛtakāryaśca bhavānyāsyatyavighnataḥ || 14 ||
[Analyze grammar]

prāviśadbhavanaṃ svaṃ vai gṛhītvā taṃ dvijottamam |
āsanaṃ svaṃ dadau caiva pādyamarghyaṃ tathaiva ca || 15 ||
[Analyze grammar]

athopaviṣṭayostatra maṇibhadrapurogamāḥ |
niṣedustatra kauberā yakṣagandharvarākṣasāḥ || 16 ||
[Analyze grammar]

tatasteṣāṃ niṣaṇṇānāṃ dhanado vākyamabravīt |
bhavacchandaṃ samājñāya nṛtyerannapsarogaṇāḥ || 17 ||
[Analyze grammar]

ātithyaṃ paramaṃ kāryaṃ śuśrūṣā bhavatastathā |
saṃvartatāmityuvāca munirmadhurayā girā || 18 ||
[Analyze grammar]

athorvarā miśrakeśī rambhā caivorvaśī tathā |
alambusā ghṛtācī ca citrā citrāṅgadā ruciḥ || 19 ||
[Analyze grammar]

manoharā sukeśī ca sumukhī hāsinī prabhā |
vidyutā praśamā dāntā vidyotā ratireva ca || 20 ||
[Analyze grammar]

etāścānyāśca vai bahvyaḥ pranṛttāpsarasaḥ śubhāḥ |
avādayaṃśca gandharvā vādyāni vividhāni ca || 21 ||
[Analyze grammar]

atha pravṛtte gāndharve divye ṛṣirupāvasat |
divyaṃ saṃvatsaraṃ tatra ramanvai sumahātapāḥ || 22 ||
[Analyze grammar]

tato vaiśravaṇo rājā bhagavantamuvāca ha |
sāgraḥ saṃvatsaro yātastava vipreha paśyataḥ || 23 ||
[Analyze grammar]

hāryo'yaṃ viṣayo brahmangāndharvo nāma nāmataḥ |
chandato vartatāṃ vipra yathā vadati vā bhavān || 24 ||
[Analyze grammar]

atithiḥ pūjanīyastvamidaṃ ca bhavato gṛham |
sarvamājñāpyatāmāśu paravanto vayaṃ tvayi || 25 ||
[Analyze grammar]

atha vaiśravaṇaṃ prīto bhagavānpratyabhāṣata |
arcito'smi yathānyāyaṃ gamiṣyāmi dhaneśvara || 26 ||
[Analyze grammar]

prīto'smi sadṛśaṃ caiva tava sarvaṃ dhanādhipa |
tava prasādādbhagavanmaharṣeśca mahātmanaḥ |
niyogādadya yāsyāmi vṛddhimānṛddhimānbhava || 27 ||
[Analyze grammar]

atha niṣkramya bhagavānprayayāvuttarāmukhaḥ |
kailāsaṃ mandaraṃ haimaṃ sarvānanucacāra ha || 28 ||
[Analyze grammar]

tānatītya mahāśailānkairātaṃ sthānamuttamam |
pradakṣiṇaṃ tataścakre prayataḥ śirasā naman |
dharaṇīmavatīryātha pūtātmāsau tadābhavat || 29 ||
[Analyze grammar]

sa taṃ pradakṣiṇaṃ kṛtvā triḥ śailaṃ cottarāmukhaḥ |
samena bhūmibhāgena yayau prītipuraskṛtaḥ || 30 ||
[Analyze grammar]

tato'paraṃ vanoddeśaṃ ramaṇīyamapaśyata |
sarvartubhirmūlaphalaiḥ pakṣibhiśca samanvitam |
ramaṇīyairvanoddeśaistatra tatra vibhūṣitam || 31 ||
[Analyze grammar]

tatrāśramapadaṃ divyaṃ dadarśa bhagavānatha |
śailāṃśca vividhākārānkāñcanānratnabhūṣitān |
maṇibhūmau niviṣṭāśca puṣkariṇyastathaiva ca || 32 ||
[Analyze grammar]

anyānyapi suramyāṇi dadarśa subahūnyatha |
bhṛśaṃ tasya mano reme maharṣerbhāvitātmanaḥ || 33 ||
[Analyze grammar]

sa tatra kāñcanaṃ divyaṃ sarvaratnamayaṃ gṛham |
dadarśādbhutasaṃkāśaṃ dhanadasya gṛhādvaram || 34 ||
[Analyze grammar]

mahānto yatra vividhāḥ prāsādāḥ parvatopamāḥ |
vimānāni ca ramyāṇi ratnāni vividhāni ca || 35 ||
[Analyze grammar]

mandārapuṣpaiḥ saṃkīrṇā tathā mandākinī nadī |
svayaṃprabhāśca maṇayo vajrairbhūmiśca bhūṣitā || 36 ||
[Analyze grammar]

nānāvidhaiśca bhavanairvicitramaṇitoraṇaiḥ |
muktājālaparikṣiptairmaṇiratnavibhūṣitaiḥ |
manodṛṣṭiharai ramyaiḥ sarvataḥ saṃvṛtaṃ śubhaiḥ || 37 ||
[Analyze grammar]

ṛṣiḥ samantato'paśyattatra tatra manoramam |
tato'bhavattasya cintā kva me vāso bhavediti || 38 ||
[Analyze grammar]

atha dvāraṃ samabhito gatvā sthitvā tato'bravīt |
atithiṃ māmanuprāptamanujānantu ye'tra vai || 39 ||
[Analyze grammar]

atha kanyāparivṛtā gṛhāttasmādviniḥsṛtāḥ |
nānārūpāḥ sapta vibho kanyāḥ sarvā manoharāḥ || 40 ||
[Analyze grammar]

yāṃ yāmapaśyatkanyāṃ sa sā sā tasya mano'harat |
nāśaknuvaddhārayituṃ mano'thāsyāvasīdati || 41 ||
[Analyze grammar]

tato dhṛtiḥ samutpannā tasya viprasya dhīmataḥ |
atha taṃ pramadāḥ prāhurbhagavānpraviśatviti || 42 ||
[Analyze grammar]

sa ca tāsāṃ surūpāṇāṃ tasyaiva bhavanasya ca |
kautūhalasamāviṣṭaḥ praviveśa gṛhaṃ dvijaḥ || 43 ||
[Analyze grammar]

tatrāpaśyajjarāyuktāmarajombaradhāriṇīm |
vṛddhāṃ paryaṅkamāsīnāṃ sarvābharaṇabhūṣitām || 44 ||
[Analyze grammar]

svastīti cātha tenoktā sā strī pratyavadattadā |
pratyutthāya ca taṃ vipramāsyatāmityuvāca ha || 45 ||
[Analyze grammar]

aṣṭāvakra uvāca |
sarvāḥ svānālayānyāntu ekā māmupatiṣṭhatu |
suprajñātā supraśāntā śeṣā gacchantu cchandataḥ || 46 ||
[Analyze grammar]

tataḥ pradakṣiṇīkṛtya kanyāstāstamṛṣiṃ tadā |
nirākrāmangṛhāttasmātsā vṛddhātha vyatiṣṭhata || 47 ||
[Analyze grammar]

atha tāṃ saṃviśanprāha śayane bhāsvare tadā |
tvayāpi supyatāṃ bhadre rajanī hyativartate || 48 ||
[Analyze grammar]

saṃlāpāttena vipreṇa tathā sā tatra bhāṣitā |
dvitīye śayane divye saṃviveśa mahāprabhe || 49 ||
[Analyze grammar]

atha sā vepamānāṅgī nimittaṃ śītajaṃ tadā |
vyapadiśya maharṣervai śayanaṃ cādhyarohata || 50 ||
[Analyze grammar]

svāgataṃ svāgatenāstu bhagavāṃstāmabhāṣata |
sopāgūhadbhujābhyāṃ tu ṛṣiṃ prītyā nararṣabha || 51 ||
[Analyze grammar]

nirvikāramṛṣiṃ cāpi kāṣṭhakuḍyopamaṃ tadā |
duḥkhitā prekṣya saṃjalpamakārṣīdṛṣiṇā saha || 52 ||
[Analyze grammar]

brahmanna kāmakāro'sti strīṇāṃ puruṣato dhṛtiḥ |
kāmena mohitā cāhaṃ tvāṃ bhajantīṃ bhajasva mām || 53 ||
[Analyze grammar]

prahṛṣṭo bhava viprarṣe samāgaccha mayā saha |
upagūha ca māṃ vipra kāmārtāhaṃ bhṛśaṃ tvayi || 54 ||
[Analyze grammar]

etaddhi tava dharmātmaṃstapasaḥ pūjyate phalam |
prārthitaṃ darśanādeva bhajamānāṃ bhajasva mām || 55 ||
[Analyze grammar]

sadma cedaṃ vanaṃ cedaṃ yaccānyadapi paśyasi |
prabhutvaṃ tava sarvatra mayi caiva na saṃśayaḥ || 56 ||
[Analyze grammar]

sarvānkāmānvidhāsyāmi ramasva sahito mayā |
ramaṇīye vane vipra sarvakāmaphalaprade || 57 ||
[Analyze grammar]

tvadvaśāhaṃ bhaviṣyāmi raṃsyase ca mayā saha |
sarvānkāmānupāśnāno ye divyā ye ca mānuṣāḥ || 58 ||
[Analyze grammar]

nātaḥ paraṃ hi nārīṇāṃ kāryaṃ kiṃcana vidyate |
yathā puruṣasaṃsargaḥ parametaddhi naḥ phalam || 59 ||
[Analyze grammar]

ātmacchandena vartante nāryo manmathacoditāḥ |
na ca dahyanti gacchantyaḥ sutaptairapi pāṃsubhiḥ || 60 ||
[Analyze grammar]

aṣṭāvakra uvāca |
paradārānahaṃ bhadre na gaccheyaṃ kathaṃcana |
dūṣitaṃ dharmaśāstreṣu paradārābhimarśanam || 61 ||
[Analyze grammar]

bhadre niveṣṭukāmaṃ māṃ viddhi satyena vai śape |
viṣayeṣvanabhijño'haṃ dharmārthaṃ kila saṃtatiḥ || 62 ||
[Analyze grammar]

evaṃ lokāngamiṣyāmi putrairiti na saṃśayaḥ |
bhadre dharmaṃ vijānīṣva jñātvā coparamasva ha || 63 ||
[Analyze grammar]

stryuvāca |
nānilo'gnirna varuṇo na cānye tridaśā dvija |
priyāḥ strīṇāṃ yathā kāmo ratiśīlā hi yoṣitaḥ || 64 ||
[Analyze grammar]

sahasraikā yatā nārī prāpnotīha kadācana |
tathā śatasahasreṣu yadi kācitpativratā || 65 ||
[Analyze grammar]

naitā jānanti pitaraṃ na kulaṃ na ca mātaram |
na bhrātṝnna ca bhartāraṃ na putrānna ca devarān || 66 ||
[Analyze grammar]

līlāyantyaḥ kulaṃ ghnanti kūlānīva saridvarāḥ |
doṣāṃśca mandānmandāsu prajāpatirabhāṣata || 67 ||
[Analyze grammar]

bhīṣma uvāca |
tataḥ sa ṛṣirekāgrastāṃ striyaṃ pratyabhāṣata |
āsyatāṃ ruciraṃ chandaḥ kiṃ vā kāryaṃ bravīhi me || 68 ||
[Analyze grammar]

sā strī provāca bhagavandrakṣyase deśakālataḥ |
vasa tāvanmahāprājña kṛtakṛtyo gamiṣyasi || 69 ||
[Analyze grammar]

brahmarṣistāmathovāca sa tatheti yudhiṣṭhira |
vatsye'haṃ yāvadutsāho bhavatyā nātra saṃśayaḥ || 70 ||
[Analyze grammar]

atharṣirabhisaṃprekṣya striyaṃ tāṃ jarayānvitām |
cintāṃ paramikāṃ bheje saṃtapta iva cābhavat || 71 ||
[Analyze grammar]

yadyadaṅgaṃ hi so'paśyattasyā viprarṣabhastadā |
nāramattatra tatrāsya dṛṣṭī rūpaparājitā || 72 ||
[Analyze grammar]

devateyaṃ gṛhasyāsya śāpānnūnaṃ virūpitā |
asyāśca kāraṇaṃ vettuṃ na yuktaṃ sahasā mayā || 73 ||
[Analyze grammar]

iti cintāviṣaktasya tamarthaṃ jñātumicchataḥ |
vyagamattadahaḥśeṣaṃ manasā vyākulena tu || 74 ||
[Analyze grammar]

atha sā strī tadovāca bhagavanpaśya vai raveḥ |
rūpaṃ saṃdhyābhrasaṃyuktaṃ kimupasthāpyatāṃ tava || 75 ||
[Analyze grammar]

sa uvāca tadā tāṃ strīṃ snānodakamihānaya |
upāsiṣye tataḥ saṃdhyāṃ vāgyato niyatendriyaḥ || 76 ||
[Analyze grammar]