Chapter 220

yudhiṣṭhira uvāca |
magnasya vyasane kṛcchre kiṃ śreyaḥ puruṣasya hi |
bandhunāśe mahīpāla rājyanāśe'pi vā punaḥ || 1 ||
[Analyze grammar]

tvaṃ hi naḥ paramo vaktā loke'sminbharatarṣabha |
etadbhavantaṃ pṛcchāmi tanme vaktumihārhasi || 2 ||
[Analyze grammar]

bhīṣma uvāca |
putradāraiḥ sukhaiścaiva viyuktasya dhanena ca |
magnasya vyasane kṛcchre dhṛtiḥ śreyaskarī nṛpa || 3 ||
[Analyze grammar]

dhairyeṇa yuktasya sataḥ śarīraṃ na viśīryate |
ārogyācca śarīrasya sa punarvindate śriyam || 4 ||
[Analyze grammar]

yasya rājño narāstāta sāttvikīṃ vṛttimāsthitāḥ |
tasya sthairyaṃ ca dhairyaṃ ca vyavasāyaśca karmasu || 5 ||
[Analyze grammar]

atraivodāharantīmamitihāsaṃ purātanam |
balivāsavasaṃvādaṃ punareva yudhiṣṭhira || 6 ||
[Analyze grammar]

vṛtte devāsure yuddhe daityadānavasaṃkṣaye |
viṣṇukrānteṣu lokeṣu devarāje śatakratau || 7 ||
[Analyze grammar]

ijyamāneṣu deveṣu cāturvarṇye vyavasthite |
samṛdhyamāne trailokye prītiyukte svayaṃbhuvi || 8 ||
[Analyze grammar]

rudrairvasubhirādityairaśvibhyāmapi carṣibhiḥ |
gandharvairbhujagendraiśca siddhaiścānyairvṛtaḥ prabhuḥ || 9 ||
[Analyze grammar]

caturdantaṃ sudāntaṃ ca vāraṇendraṃ śriyā vṛtam |
āruhyairāvataṃ śakrastrailokyamanusaṃyayau || 10 ||
[Analyze grammar]

sa kadācitsamudrānte kasmiṃścidgirigahvare |
baliṃ vairocaniṃ vajrī dadarśopasasarpa ca || 11 ||
[Analyze grammar]

tamairāvatamūrdhasthaṃ prekṣya devagaṇairvṛtam |
surendramindraṃ daityendro na śuśoca na vivyathe || 12 ||
[Analyze grammar]

dṛṣṭvā tamavikārasthaṃ tiṣṭhantaṃ nirbhayaṃ balim |
adhirūḍho dvipaśreṣṭhamityuvāca śatakratuḥ || 13 ||
[Analyze grammar]

daitya na vyathase śauryādatha vā vṛddhasevayā |
tapasā bhāvitatvādvā sarvathaitatsuduṣkaram || 14 ||
[Analyze grammar]

śatrubhirvaśamānīto hīnaḥ sthānādanuttamāt |
vairocane kimāśritya śocitavye na śocasi || 15 ||
[Analyze grammar]

śraiṣṭhyaṃ prāpya svajātīnāṃ bhuktvā bhogānanuttamān |
hṛtasvabalarājyastvaṃ brūhi kasmānna śocasi || 16 ||
[Analyze grammar]

īśvaro hi purā bhūtvā pitṛpaitāmahe pade |
tattvamadya hṛtaṃ dṛṣṭvā sapatnaiḥ kiṃ na śocasi || 17 ||
[Analyze grammar]

baddhaśca vāruṇaiḥ pāśairvajreṇa ca samāhataḥ |
hṛtadāro hṛtadhano brūhi kasmānna śocasi || 18 ||
[Analyze grammar]

bhraṣṭaśrīrvibhavabhraṣṭo yanna śocasi duṣkaram |
trailokyarājyanāśe hi ko'nyo jīvitumutsahet || 19 ||
[Analyze grammar]

etaccānyacca paruṣaṃ bruvantaṃ paribhūya tam |
śrutvā sukhamasaṃbhrānto balirvairocano'bravīt || 20 ||
[Analyze grammar]

nigṛhīte mayi bhṛśaṃ śakra kiṃ katthitena te |
vajramudyamya tiṣṭhantaṃ paśyāmi tvāṃ puraṃdara || 21 ||
[Analyze grammar]

aśaktaḥ pūrvamāsīstvaṃ kathaṃcicchaktatāṃ gataḥ |
kastvadanya imā vācaḥ sukrūrā vaktumarhati || 22 ||
[Analyze grammar]

yastu śatrorvaśasthasya śakto'pi kurute dayām |
hastaprāptasya vīrasya taṃ caiva puruṣaṃ viduḥ || 23 ||
[Analyze grammar]

aniścayo hi yuddheṣu dvayorvivadamānayoḥ |
ekaḥ prāpnoti vijayamekaścaiva parābhavam || 24 ||
[Analyze grammar]

mā ca te bhūtsvabhāvo'yaṃ mayā daivatapuṃgava |
īśvaraḥ sarvabhūtānāṃ vikrameṇa jito balāt || 25 ||
[Analyze grammar]

naitadasmatkṛtaṃ śakra naitacchakra tvayā kṛtam |
yattvamevaṃgato vajrinyadvāpyevaṃgatā vayam || 26 ||
[Analyze grammar]

ahamāsaṃ yathādya tvaṃ bhavitā tvaṃ yathā vayam |
māvamaṃsthā mayā karma duṣkṛtaṃ kṛtamityuta || 27 ||
[Analyze grammar]

sukhaduḥkhe hi puruṣaḥ paryāyeṇādhigacchati |
paryāyeṇāsi śakratvaṃ prāptaḥ śakra na karmaṇā || 28 ||
[Analyze grammar]

kālaḥ kāle nayati māṃ tvāṃ ca kālo nayatyayam |
tenāhaṃ tvaṃ yathā nādya tvaṃ cāpi na yathā vayam || 29 ||
[Analyze grammar]

na mātṛpitṛśuśrūṣā na ca daivatapūjanam |
nānyo guṇasamācāraḥ puruṣasya sukhāvahaḥ || 30 ||
[Analyze grammar]

na vidyā na tapo dānaṃ na mitrāṇi na bāndhavāḥ |
śaknuvanti paritrātuṃ naraṃ kālena pīḍitam || 31 ||
[Analyze grammar]

nāgāminamanarthaṃ hi pratighātaśatairapi |
śaknuvanti prativyoḍhumṛte buddhibalānnarāḥ || 32 ||
[Analyze grammar]

paryāyairhanyamānānāṃ paritrātā na vidyate |
idaṃ tu duḥkhaṃ yacchakra kartāhamiti manyate || 33 ||
[Analyze grammar]

yadi kartā bhavetkartā na kriyeta kadācana |
yasmāttu kriyate kartā tasmātkartāpyanīśvaraḥ || 34 ||
[Analyze grammar]

kālena tvāhamajayaṃ kālenāhaṃ jitastvayā |
gantā gatimatāṃ kālaḥ kālaḥ kalayati prajāḥ || 35 ||
[Analyze grammar]

indra prākṛtayā buddhyā pralapannāvabudhyase |
kecittvāṃ bahu manyante śraiṣṭhyaṃ prāptaṃ svakarmaṇā || 36 ||
[Analyze grammar]

kathamasmadvidho nāma jānaṃllokapravṛttayaḥ |
kālenābhyāhataḥ śocenmuhyedvāpyarthasaṃbhrame || 37 ||
[Analyze grammar]

nityaṃ kālaparītasya mama vā madvidhasya vā |
buddhirvyasanamāsādya bhinnā nauriva sīdati || 38 ||
[Analyze grammar]

ahaṃ ca tvaṃ ca ye cānye bhaviṣyanti surādhipāḥ |
te sarve śakra yāsyanti mārgamindraśatairgatam || 39 ||
[Analyze grammar]

tvāmapyevaṃ sudurdharṣaṃ jvalantaṃ parayā śriyā |
kāle pariṇate kālaḥ kālayiṣyati māmiva || 40 ||
[Analyze grammar]

bahūnīndrasahasrāṇi daiteyānāṃ yuge yuge |
abhyatītāni kālena kālo hi duratikramaḥ || 41 ||
[Analyze grammar]

idaṃ tu labdhvā tvaṃ sthānamātmānaṃ bahu manyase |
sarvabhūtabhavaṃ devaṃ brahmāṇamiva śāśvatam || 42 ||
[Analyze grammar]

na cedamacalaṃ sthānamanantaṃ vāpi kasyacit |
tvaṃ tu bāliśayā buddhyā mamedamiti manyase || 43 ||
[Analyze grammar]

aviśvāsye viśvasiṣi manyase cādhruvaṃ dhruvam |
mameyamiti mohāttvaṃ rājaśriyamabhīpsasi || 44 ||
[Analyze grammar]

neyaṃ tava na cāsmākaṃ na cānyeṣāṃ sthirā matā |
atikramya bahūnanyāṃstvayi tāvadiyaṃ sthitā || 45 ||
[Analyze grammar]

kaṃcitkālamiyaṃ sthitvā tvayi vāsava cañcalā |
gaurnipānamivotsṛjya punaranyaṃ gamiṣyati || 46 ||
[Analyze grammar]

rājalokā hyatikrāntā yānna saṃkhyātumutsahe |
tvatto bahutarāścānye bhaviṣyanti puraṃdara || 47 ||
[Analyze grammar]

savṛkṣauṣadhiratneyaṃ sasaritparvatākarā |
tānidānīṃ na paśyāmi yairbhukteyaṃ purā mahī || 48 ||
[Analyze grammar]

pṛthurailo mayo bhaumo narakaḥ śambarastathā |
aśvagrīvaḥ pulomā ca svarbhānuramitadhvajaḥ || 49 ||
[Analyze grammar]

prahrādo namucirdakṣo vipracittirvirocanaḥ |
hrīniṣedhaḥ suhotraśca bhūrihā puṣpavānvṛṣaḥ || 50 ||
[Analyze grammar]

satyeṣurṛṣabho rāhuḥ kapilāśvo virūpakaḥ |
bāṇaḥ kārtasvaro vahnirviśvadaṃṣṭro'tha nairṛtaḥ || 51 ||
[Analyze grammar]

ritthāhutthau vīratāmrau varāhāśvo ruciḥ prabhuḥ |
viśvajitpratiśauriśca vṛṣāṇḍo viṣkaro madhuḥ || 52 ||
[Analyze grammar]

hiraṇyakaśipuścaiva kaiṭabhaścaiva dānavaḥ |
daityāśca kālakhañjāśca sarve te nairṛtaiḥ saha || 53 ||
[Analyze grammar]

ete cānye ca bahavaḥ pūrve pūrvatarāśca ye |
daityendrā dānavendrāśca yāṃścānyānanuśuśruma || 54 ||
[Analyze grammar]

bahavaḥ pūrvadaityendrāḥ saṃtyajya pṛthivīṃ gatāḥ |
kālenābhyāhatāḥ sarve kālo hi balavattaraḥ || 55 ||
[Analyze grammar]

sarvaiḥ kratuśatairiṣṭaṃ na tvamekaḥ śatakratuḥ |
sarve dharmaparāścāsansarve satatasatriṇaḥ || 56 ||
[Analyze grammar]

antarikṣacarāḥ sarve sarve'bhimukhayodhinaḥ |
sarve saṃhananopetāḥ sarve parighabāhavaḥ || 57 ||
[Analyze grammar]

sarve māyāśatadharāḥ sarve te kāmacāriṇaḥ |
sarve samaramāsādya na śrūyante parājitāḥ || 58 ||
[Analyze grammar]

sarve satyavrataparāḥ sarve kāmavihāriṇaḥ |
sarve vedavrataparāḥ sarve cāsanbahuśrutāḥ || 59 ||
[Analyze grammar]

sarve saṃhatamaiśvaryamīśvarāḥ pratipedire |
na caiśvaryamadasteṣāṃ bhūtapūrvo mahātmanām || 60 ||
[Analyze grammar]

sarve yathārthadātāraḥ sarve vigatamatsarāḥ |
sarve sarveṣu bhūteṣu yathāvatpratipedire || 61 ||
[Analyze grammar]

sarve dākṣāyaṇīputrāḥ prājāpatyā mahābalāḥ |
jvalantaḥ pratapantaśca kālena pratisaṃhṛtāḥ || 62 ||
[Analyze grammar]

tvaṃ caivemāṃ yadā bhuktvā pṛthivīṃ tyakṣyase punaḥ |
na śakṣyasi tadā śakra niyantuṃ śokamātmanaḥ || 63 ||
[Analyze grammar]

muñcecchāṃ kāmabhogeṣu muñcemaṃ śrībhavaṃ madam |
evaṃ svarājyanāśe tvaṃ śokaṃ saṃprasahiṣyasi || 64 ||
[Analyze grammar]

śokakāle śuco mā tvaṃ harṣakāle ca mā hṛṣaḥ |
atītānāgate hitvā pratyutpannena vartaya || 65 ||
[Analyze grammar]

māṃ cedabhyāgataḥ kālaḥ sadāyuktamatandritam |
kṣamasva nacirādindra tvāmapyupagamiṣyati || 66 ||
[Analyze grammar]

trāsayanniva devendra vāgbhistakṣasi māmiha |
saṃyate mayi nūnaṃ tvamātmānaṃ bahu manyase || 67 ||
[Analyze grammar]

kālaḥ prathamamāyānmāṃ paścāttvāmanudhāvati |
tena garjasi devendra pūrvaṃ kālahate mayi || 68 ||
[Analyze grammar]

ko hi sthātumalaṃ loke kruddhasya mama saṃyuge |
kālastu balavānprāptastena tiṣṭhasi vāsava || 69 ||
[Analyze grammar]

yattadvarṣasahasrāntaṃ pūrṇaṃ bhavitumarhati |
yathā me sarvagātrāṇi nasvasthāni hataujasaḥ || 70 ||
[Analyze grammar]

ahamaindraccyutaḥ sthānāttvamindraḥ prakṛto divi |
sucitre jīvaloke'sminnupāsyaḥ kālaparyayāt || 71 ||
[Analyze grammar]

kiṃ hi kṛtvā tvamindro'dya kiṃ hi kṛtvā cyutā vayam |
kālaḥ kartā vikartā ca sarvamanyadakāraṇam || 72 ||
[Analyze grammar]

nāśaṃ vināśamaiśvaryaṃ sukhaduḥkhe bhavābhavau |
vidvānprāpyaivamatyarthaṃ na prahṛṣyenna ca vyathet || 73 ||
[Analyze grammar]

tvameva hīndra vetthāsmānvedāhaṃ tvāṃ ca vāsava |
vikatthase māṃ kiṃ baddhaṃ kālena nirapatrapa || 74 ||
[Analyze grammar]

tvameva hi purā vettha yattadā pauruṣaṃ mama |
samareṣu ca vikrāntaṃ paryāptaṃ tannidarśanam || 75 ||
[Analyze grammar]

ādityāścaiva rudrāśca sādhyāśca vasubhiḥ saha |
mayā vinirjitāḥ sarve marutaśca śacīpate || 76 ||
[Analyze grammar]

tvameva śakra jānāsi devāsurasamāgame |
sametā vibudhā bhagnāstarasā samare mayā || 77 ||
[Analyze grammar]

parvatāścāsakṛtkṣiptāḥ savanāḥ savanaukasaḥ |
saṭaṅkaśikharā ghorāḥ samare mūrdhni te mayā || 78 ||
[Analyze grammar]

kiṃ nu śakyaṃ mayā kartuṃ yatkālo duratikramaḥ |
na hi tvāṃ notsahe hantuṃ savajramapi muṣṭinā || 79 ||
[Analyze grammar]

na tu vikramakālo'yaṃ kṣamākālo'yamāgataḥ |
tena tvā marṣaye śakra durmarṣaṇatarastvayā || 80 ||
[Analyze grammar]

tvaṃ mā pariṇate kāle parītaṃ kālavahninā |
niyataṃ kālapāśena baddhaṃ śakra vikatthase || 81 ||
[Analyze grammar]

ayaṃ sa puruṣaḥ śyāmo lokasya duratikramaḥ |
baddhvā tiṣṭhati māṃ raudraḥ paśuṃ raśanayā yathā || 82 ||
[Analyze grammar]

lābhālābhau sukhaṃ duḥkhaṃ kāmakrodhau bhavābhavau |
vadho bandhaḥ pramokṣaśca sarvaṃ kālena labhyate || 83 ||
[Analyze grammar]

nāhaṃ kartā na kartā tvaṃ kartā yastu sadā prabhuḥ |
so'yaṃ pacati kālo māṃ vṛkṣe phalamivāgatam || 84 ||
[Analyze grammar]

yānyeva puruṣaḥ kurvansukhaiḥ kālena yujyate |
punastānyeva kurvāṇo duḥkhaiḥ kālena yujyate || 85 ||
[Analyze grammar]

na ca kālena kālajñaḥ spṛṣṭaḥ śocitumarhati |
tena śakra na śocāmi nāsti śoke sahāyatā || 86 ||
[Analyze grammar]

yadā hi śocatāṃ śoko vyasanaṃ nāpakarṣati |
sāmarthyaṃ śocato nāsti nādya śocāmyahaṃ tataḥ || 87 ||
[Analyze grammar]

evamuktaḥ sahasrākṣo bhagavānpākaśāsanaḥ |
pratisaṃhṛtya saṃrambhamityuvāca śatakratuḥ || 88 ||
[Analyze grammar]

savajramudyataṃ bāhuṃ dṛṣṭvā pāśāṃśca vāruṇān |
kasyeha na vyathedbuddhirmṛtyorapi jighāṃsataḥ || 89 ||
[Analyze grammar]

sā te na vyathate buddhiracalā tattvadarśinī |
bruvanna vyathase sa tvaṃ vākyaṃ satyaparākrama || 90 ||
[Analyze grammar]

ko hi viśvāsamartheṣu śarīre vā śarīrabhṛt |
kartumutsahate loke dṛṣṭvā saṃprasthitaṃ jagat || 91 ||
[Analyze grammar]

ahamapyevamevainaṃ lokaṃ jānāmyaśāśvatam |
kālāgnāvāhitaṃ ghore guhye satatage'kṣare || 92 ||
[Analyze grammar]

na cātra parihāro'sti kālaspṛṣṭasya kasyacit |
sūkṣmāṇāṃ mahatāṃ caiva bhūtānāṃ paripacyatām || 93 ||
[Analyze grammar]

anīśasyāpramattasya bhūtāni pacataḥ sadā |
anivṛttasya kālasya kṣayaṃ prāpto na mucyate || 94 ||
[Analyze grammar]

apramattaḥ pramatteṣu kālo jāgarti dehiṣu |
prayatnenāpyatikrānto dṛṣṭapūrvo na kenacit || 95 ||
[Analyze grammar]

purāṇaḥ śāśvato dharmaḥ sarvaprāṇabhṛtāṃ samaḥ |
kālo na parihāryaśca na cāsyāsti vyatikramaḥ || 96 ||
[Analyze grammar]

ahorātrāṃśca māsāṃśca kṣaṇānkāṣṭhāḥ kalā lavān |
saṃpiṇḍayati naḥ kālo vṛddhiṃ vārdhuṣiko yathā || 97 ||
[Analyze grammar]

idamadya kariṣyāmi śvaḥ kartāsmīti vādinam |
kālo harati saṃprāpto nadīvega ivoḍupam || 98 ||
[Analyze grammar]

idānīṃ tāvadevāsau mayā dṛṣṭaḥ kathaṃ mṛtaḥ |
iti kālena hriyatāṃ pralāpaḥ śrūyate nṛṇām || 99 ||
[Analyze grammar]

naśyantyarthāstathā bhogāḥ sthānamaiśvaryameva ca |
anityamadhruvaṃ sarvaṃ vyavasāyo hi duṣkaraḥ |
ucchrāyā vinipātāntā bhāvo'bhāvastha eva ca || 100 ||
[Analyze grammar]

sā te na vyathate buddhiracalā tattvadarśinī |
ahamāsaṃ purā ceti manasāpi na budhyase || 101 ||
[Analyze grammar]

kālenākramya loke'sminpacyamāne balīyasā |
ajyeṣṭhamakaniṣṭhaṃ ca kṣipyamāṇo na budhyase || 102 ||
[Analyze grammar]

īrṣyābhimānalobheṣu kāmakrodhabhayeṣu ca |
spṛhāmohābhimāneṣu lokaḥ sakto vimuhyati || 103 ||
[Analyze grammar]

bhavāṃstu bhāvatattvajño vidvāñjñānataponvitaḥ |
kālaṃ paśyati suvyaktaṃ pāṇāvāmalakaṃ yathā || 104 ||
[Analyze grammar]

kālacāritratattvajñaḥ sarvaśāstraviśāradaḥ |
vairocane kṛtātmāsi spṛhaṇīyo vijānatām || 105 ||
[Analyze grammar]

sarvaloko hyayaṃ manye buddhyā parigatastvayā |
viharansarvatomukto na kvacitpariṣajjase || 106 ||
[Analyze grammar]

rajaśca hi tamaśca tvā spṛśato na jitendriyam |
niṣprītiṃ naṣṭasaṃtāpaṃ tvamātmānamupāsase || 107 ||
[Analyze grammar]

suhṛdaṃ sarvabhūtānāṃ nirvairaṃ śāntamānasam |
dṛṣṭvā tvāṃ mama saṃjātā tvayyanukrośinī matiḥ || 108 ||
[Analyze grammar]

nāhametādṛśaṃ buddhaṃ hantumicchāmi bandhane |
ānṛśaṃsyaṃ paro dharmo anukrośastathā tvayi || 109 ||
[Analyze grammar]

mokṣyante vāruṇāḥ pāśāstaveme kālaparyayāt |
prajānāmapacāreṇa svasti te'stu mahāsura || 110 ||
[Analyze grammar]

yadā śvaśrūṃ snuṣā vṛddhāṃ paricāreṇa yokṣyate |
putraśca pitaraṃ mohātpreṣayiṣyati karmasu || 111 ||
[Analyze grammar]

brāhmaṇaiḥ kārayiṣyanti vṛṣalāḥ pādadhāvanam |
śūdrāśca brāhmaṇīṃ bhāryāmupayāsyanti nirbhayāḥ || 112 ||
[Analyze grammar]

viyoniṣu ca bījāni mokṣyante puruṣā yadā |
saṃkaraṃ kāṃsyabhāṇḍaiśca baliṃ cāpi kupātrakaiḥ || 113 ||
[Analyze grammar]

cāturvarṇyaṃ yadā kṛtsnamunmaryādaṃ bhaviṣyati |
ekaikaste tadā pāśaḥ kramaśaḥ pratimokṣyate || 114 ||
[Analyze grammar]

asmattaste bhayaṃ nāsti samayaṃ pratipālaya |
sukhī bhava nirābādhaḥ svasthacetā nirāmayaḥ || 115 ||
[Analyze grammar]

tamevamuktvā bhagavāñśatakratuḥ pratiprayāto gajarājavāhanaḥ |
vijitya sarvānasurānsurādhipo nananda harṣeṇa babhūva caikarāṭ || 116 ||
[Analyze grammar]

maharṣayastuṣṭuvurañjasā ca taṃ vṛṣākapiṃ sarvacarācareśvaram |
himāpaho havyamudāvahaṃstvaraṃstathāmṛtaṃ cārpitamīśvarāya ha || 117 ||
[Analyze grammar]

dvijottamaiḥ sarvagatairabhiṣṭuto vidīptatejā gatamanyurīśvaraḥ |
praśāntacetā muditaḥ svamālayaṃ triviṣṭapaṃ prāpya mumoda vāsavaḥ || 118 ||
[Analyze grammar]