Chapter 221

yudhiṣṭhira uvāca |
pūrvarūpāṇi me rājanpuruṣasya bhaviṣyataḥ |
parābhaviṣyataścaiva tvaṃ me brūhi pitāmaha || 1 ||
[Analyze grammar]

bhīṣma uvāca |
mana eva manuṣyasya pūrvarūpāṇi śaṃsati |
bhaviṣyataśca bhadraṃ te tathaiva nabhaviṣyataḥ || 2 ||
[Analyze grammar]

atrāpyudāharantīmamitihāsaṃ purātanam |
śriyā śakrasya saṃvādaṃ tannibodha yudhiṣṭhira || 3 ||
[Analyze grammar]

mahatastapaso vyuṣṭyā paśyaṃllokau parāvarau |
sāmānyamṛṣibhirgatvā brahmalokanivāsibhiḥ || 4 ||
[Analyze grammar]

brahmaivāmitadīptaujāḥ śāntapāpmā mahātapāḥ |
vicacāra yathākāmaṃ triṣu lokeṣu nāradaḥ || 5 ||
[Analyze grammar]

kadācitprātarutthāya pispṛkṣuḥ salilaṃ śuci |
dhruvadvārabhavāṃ gaṅgāṃ jagāmāvatatāra ca || 6 ||
[Analyze grammar]

sahasranayanaścāpi vajrī śambarapākahā |
tasyā devarṣijuṣṭāyāstīramabhyājagāma ha || 7 ||
[Analyze grammar]

tāvāplutya yatātmānau kṛtajapyau samāsatuḥ |
nadyāḥ pulinamāsādya sūkṣmakāñcanavālukam || 8 ||
[Analyze grammar]

puṇyakarmabhirākhyātā devarṣikathitāḥ kathāḥ |
cakratustau kathāśīlau śucisaṃhṛṣṭamānasau |
pūrvavṛttavyapetāni kathayantau samāhitau || 9 ||
[Analyze grammar]

atha bhāskaramudyantaṃ raśmijālapuraskṛtam |
pūrṇamaṇḍalamālokya tāvutthāyopatasthatuḥ || 10 ||
[Analyze grammar]

abhitastūdayantaṃ tamarkamarkamivāparam |
ākāśe dadṛśe jyotirudyatārciḥsamaprabham || 11 ||
[Analyze grammar]

tayoḥ samīpaṃ saṃprāptaṃ pratyadṛśyata bhārata |
tatsuparṇārkacaritamāsthitaṃ vaiṣṇavaṃ padam |
bhābhirapratimaṃ bhāti trailokyamavabhāsayat || 12 ||
[Analyze grammar]

divyābhirūpaśobhābhirapsarobhiḥ puraskṛtām |
bṛhatīmaṃśumatprakhyāṃ bṛhadbhānorivārciṣam || 13 ||
[Analyze grammar]

nakṣatrakalpābharaṇāṃ tārābhaktisamasrajam |
śriyaṃ dadṛśatuḥ padmāṃ sākṣātpadmatalasthitām || 14 ||
[Analyze grammar]

sāvaruhya vimānāgrādaṅganānāmanuttamā |
abhyagacchattrilokeśaṃ śakraṃ carṣiṃ ca nāradam || 15 ||
[Analyze grammar]

nāradānugataḥ sākṣānmaghavāṃstāmupāgamat |
kṛtāñjalipuṭo devīṃ nivedyātmānamātmanā || 16 ||
[Analyze grammar]

cakre cānupamāṃ pūjāṃ tasyāścāpi sa sarvavit |
devarājaḥ śriyaṃ rājanvākyaṃ cedamuvāca ha || 17 ||
[Analyze grammar]

kā tvaṃ kena ca kāryeṇa saṃprāptā cāruhāsini |
kutaścāgamyate subhru gantavyaṃ kva ca te śubhe || 18 ||
[Analyze grammar]

śrīruvāca |
puṇyeṣu triṣu lokeṣu sarve sthāvarajaṅgamāḥ |
mamātmabhāvamicchanto yatante paramātmanā || 19 ||
[Analyze grammar]

sāhaṃ vai paṅkaje jātā sūryaraśmivibodhite |
bhūtyarthaṃ sarvabhūtānāṃ padmā śrīḥ padmamālinī || 20 ||
[Analyze grammar]

ahaṃ lakṣmīrahaṃ bhūtiḥ śrīścāhaṃ balasūdana |
ahaṃ śraddhā ca medhā ca sannatirvijitiḥ sthitiḥ || 21 ||
[Analyze grammar]

ahaṃ dhṛtirahaṃ siddhirahaṃ tviḍbhūtireva ca |
ahaṃ svāhā svadhā caiva saṃstutirniyatiḥ kṛtiḥ || 22 ||
[Analyze grammar]

rājñāṃ vijayamānānāṃ senāgreṣu dhvajeṣu ca |
nivāse dharmaśīlānāṃ viṣayeṣu pureṣu ca || 23 ||
[Analyze grammar]

jitakāśini śūre ca saṃgrāmeṣvanivartini |
nivasāmi manuṣyendre sadaiva balasūdana || 24 ||
[Analyze grammar]

dharmanitye mahābuddhau brahmaṇye satyavādini |
praśrite dānaśīle ca sadaiva nivasāmyaham || 25 ||
[Analyze grammar]

asureṣvavasaṃ pūrvaṃ satyadharmanibandhanā |
viparītāṃstu tānbuddhvā tvayi vāsamarocayam || 26 ||
[Analyze grammar]

śakra uvāca |
kathaṃvṛtteṣu daityeṣu tvamavātsīrvarānane |
dṛṣṭvā ca kimihāgāstvaṃ hitvā daiteyadānavān || 27 ||
[Analyze grammar]

śrīruvāca |
svadharmamanutiṣṭhatsu dhairyādacaliteṣu ca |
svargamārgābhirāmeṣu sattveṣu niratā hyaham || 28 ||
[Analyze grammar]

dānādhyayanayajñejyā gurudaivatapūjanam |
viprāṇāmatithīnāṃ ca teṣāṃ nityamavartata || 29 ||
[Analyze grammar]

susaṃmṛṣṭagṛhāścāsañjitastrīkā hutāgnayaḥ |
guruśuśrūṣavo dāntā brahmaṇyāḥ satyavādinaḥ || 30 ||
[Analyze grammar]

śraddadhānā jitakrodhā dānaśīlānasūyakāḥ |
bhṛtaputrā bhṛtāmātyā bhṛtadārā hyanīrṣavaḥ || 31 ||
[Analyze grammar]

amarṣaṇā na cānyonyaṃ spṛhayanti kadācana |
na ca jātūpatapyante dhīrāḥ parasamṛddhibhiḥ || 32 ||
[Analyze grammar]

dātāraḥ saṃgṛhītāra āryāḥ karuṇavedinaḥ |
mahāprasādā ṛjavo dṛḍhabhaktā jitendriyāḥ || 33 ||
[Analyze grammar]

saṃtuṣṭabhṛtyasacivāḥ kṛtajñāḥ priyavādinaḥ |
yathārthamānārthakarā hrīniṣedhā yatavratāḥ || 34 ||
[Analyze grammar]

nityaṃ parvasu susnātāḥ svanuliptāḥ svalaṃkṛtāḥ |
upavāsatapaḥśīlāḥ pratītā brahmavādinaḥ || 35 ||
[Analyze grammar]

nainānabhyudiyātsūryo na cāpyāsanprageniśāḥ |
rātrau dadhi ca saktūṃśca nityameva vyavarjayan || 36 ||
[Analyze grammar]

kālyaṃ ghṛtaṃ cānvavekṣanprayatā brahmacāriṇaḥ |
maṅgalānapi cāpaśyanbrāhmaṇāṃścāpyapūjayan || 37 ||
[Analyze grammar]

sadā hi dadatāṃ dharmaḥ sadā cāpratigṛhṇatām |
ardhaṃ ca rātryāḥ svapatāṃ divā cāsvapatāṃ tathā || 38 ||
[Analyze grammar]

kṛpaṇānāthavṛddhānāṃ durbalāturayoṣitām |
dāyaṃ ca saṃvibhāgaṃ ca nityamevānumodatām || 39 ||
[Analyze grammar]

viṣaṇṇaṃ trastamudvignaṃ bhayārtaṃ vyādhipīḍitam |
hṛtasvaṃ vyasanārtaṃ ca nityamāśvāsayanti te || 40 ||
[Analyze grammar]

dharmamevānvavartanta na hiṃsanti parasparam |
anukūlāśca kāryeṣu guruvṛddhopasevinaḥ || 41 ||
[Analyze grammar]

pitṛdevātithīṃścaiva yathāvatte'bhyapūjayan |
avaśeṣāṇi cāśnanti nityaṃ satyataporatāḥ || 42 ||
[Analyze grammar]

naike'śnanti susaṃpannaṃ na gacchanti parastriyam |
sarvabhūteṣvavartanta yathātmani dayāṃ prati || 43 ||
[Analyze grammar]

naivākāśe na paśuṣu nāyonau na ca parvasu |
indriyasya visargaṃ te'rocayanta kadācana || 44 ||
[Analyze grammar]

nityaṃ dānaṃ tathā dākṣyamārjavaṃ caiva nityadā |
utsāhaścānahaṃkāraḥ paramaṃ sauhṛdaṃ kṣamā || 45 ||
[Analyze grammar]

satyaṃ dānaṃ tapaḥ śaucaṃ kāruṇyaṃ vāganiṣṭhurā |
mitreṣu cānabhidrohaḥ sarvaṃ teṣvabhavatprabho || 46 ||
[Analyze grammar]

nidrā tandrīrasaṃprītirasūyā cānavekṣitā |
aratiśca viṣādaśca na spṛhā cāviśanta tān || 47 ||
[Analyze grammar]

sāhamevaṃguṇeṣveva dānaveṣvavasaṃ purā |
prajāsargamupādāya naikaṃ yugaviparyayam || 48 ||
[Analyze grammar]

tataḥ kālaviparyāse teṣāṃ guṇaviparyayāt |
apaśyaṃ vigataṃ dharmaṃ kāmakrodhavaśātmanām || 49 ||
[Analyze grammar]

sabhāsadāṃ te vṛddhānāṃ satyāḥ kathayatāṃ kathāḥ |
prāhasannabhyasūyaṃśca sarvavṛddhānguṇāvarāḥ || 50 ||
[Analyze grammar]

yūnaḥ sahasamāsīnānvṛddhānabhigatānsataḥ |
nābhyutthānābhivādābhyāṃ yathāpūrvamapūjayan || 51 ||
[Analyze grammar]

vartayantyeva pitari putrāḥ prabhavatā''tmanaḥ |
amitrabhṛtyatāṃ prāpya khyāpayanto'napatrapāḥ || 52 ||
[Analyze grammar]

tathā dharmādapetena karmaṇā garhitena ye |
mahataḥ prāpnuvantyarthāṃsteṣveṣāmabhavatspṛhā || 53 ||
[Analyze grammar]

uccaiścāpyavadanrātrau nīcaistatrāgnirajvalat |
putrāḥ pitṝnabhyavadanbhāryāścābhyavadanpatīn || 54 ||
[Analyze grammar]

mātaraṃ pitaraṃ vṛddhamācāryamatithiṃ gurum |
guruvannābhyanandanta kumārānnānvapālayan || 55 ||
[Analyze grammar]

bhikṣāṃ balimadattvā ca svayamannāni bhuñjate |
aniṣṭvā saṃvibhajyātha pitṛdevātithīngurūn || 56 ||
[Analyze grammar]

na śaucamanurudhyanta teṣāṃ sūdajanāstathā |
manasā karmaṇā vācā bhaktamāsīdanāvṛtam || 57 ||
[Analyze grammar]

viprakīrṇāni dhānyāni kākamūṣakabhojanam |
apāvṛtaṃ payo'tiṣṭhaducchiṣṭāścāspṛśanghṛtam || 58 ||
[Analyze grammar]

kuddālapāṭīpiṭakaṃ prakīrṇaṃ kāṃsyabhājanam |
dravyopakaraṇaṃ sarvaṃ nānvavaikṣatkuṭumbinī || 59 ||
[Analyze grammar]

prākārāgāravidhvaṃsānna sma te pratikurvate |
nādriyante paśūnbaddhvā yavasenodakena ca || 60 ||
[Analyze grammar]

bālānāṃ prekṣamāṇānāṃ svayaṃ bhakṣānabhakṣayan |
tathā bhṛtyajanaṃ sarvaṃ paryaśnanti ca dānavāḥ || 61 ||
[Analyze grammar]

pāyasaṃ kṛsaraṃ māṃsamapūpānatha śaṣkulīḥ |
apācayannātmano'rthe vṛthāmāṃsānyabhakṣayan || 62 ||
[Analyze grammar]

utsūryaśāyinaścāsansarve cāsanprageniśāḥ |
avartankalahāścātra divārātraṃ gṛhe gṛhe || 63 ||
[Analyze grammar]

anāryāścāryamāsīnaṃ paryupāsanna tatra ha |
āśramasthānvikarmasthāḥ pradviṣanti parasparam |
saṃkarāścāpyavartanta na ca śaucamavartata || 64 ||
[Analyze grammar]

ye ca vedavido viprā vispaṣṭamanṛcaśca ye |
nirantaraviśeṣāste bahumānāvamānayoḥ || 65 ||
[Analyze grammar]

hāvamābharaṇaṃ veṣaṃ gatiṃ sthitimavekṣitum |
asevanta bhujiṣyā vai durjanācaritaṃ vidhim || 66 ||
[Analyze grammar]

striyaḥ puruṣaveṣeṇa puṃsaḥ strīveṣadhāriṇaḥ |
krīḍārativihāreṣu parāṃ mudamavāpnuvan || 67 ||
[Analyze grammar]

prabhavadbhiḥ purā dāyānarhebhyaḥ pratipāditān |
nābhyavartanta nāstikyādvartantaḥ saṃbhaveṣvapi || 68 ||
[Analyze grammar]

mitreṇābhyarthitaṃ mitramarthe saṃśayite kvacit |
vālakoṭyagramātreṇa svārthenāghnata tadvasu || 69 ||
[Analyze grammar]

parasvādānarucayo vipaṇyavyavahāriṇaḥ |
adṛśyantāryavarṇeṣu śūdrāścāpi tapodhanāḥ || 70 ||
[Analyze grammar]

adhīyante'vratāḥ kecidvṛthāvratamathāpare |
aśuśrūṣurguroḥ śiṣyaḥ kaścicchiṣyasakho guruḥ || 71 ||
[Analyze grammar]

pitā caiva janitrī ca śrāntau vṛttotsavāviva |
aprabhutve sthitau vṛddhāvannaṃ prārthayataḥ sutān || 72 ||
[Analyze grammar]

tatra vedavidaḥ prājñā gāmbhīrye sāgaropamāḥ |
kṛṣyādiṣvabhavansaktā mūrkhāḥ śrāddhānyabhuñjata || 73 ||
[Analyze grammar]

prātaḥ prātaśca supraśnaṃ kalpanaṃ preṣaṇakriyāḥ |
śiṣyānuprahitāstasminnakurvanguravaśca ha || 74 ||
[Analyze grammar]

śvaśrūśvaśurayoragre vadhūḥ preṣyānaśāsata |
anvaśāsacca bhartāraṃ samāhūyābhijalpatī || 75 ||
[Analyze grammar]

prayatnenāpi cārakṣaccittaṃ putrasya vai pitā |
vyabhajaṃścāpi saṃrambhādduḥkhavāsaṃ tathāvasan || 76 ||
[Analyze grammar]

agnidāhena corairvā rājabhirvā hṛtaṃ dhanam |
dṛṣṭvā dveṣātprāhasanta suhṛtsaṃbhāvitā hyapi || 77 ||
[Analyze grammar]

kṛtaghnā nāstikāḥ pāpā gurudārābhimarśinaḥ |
abhakṣyabhakṣaṇaratā nirmaryādā hatatviṣaḥ || 78 ||
[Analyze grammar]

teṣvevamādīnācārānācaratsu viparyaye |
nāhaṃ devendra vatsyāmi dānaveṣviti me matiḥ || 79 ||
[Analyze grammar]

tāṃ māṃ svayamanuprāptāmabhinanda śacīpate |
tvayārcitāṃ māṃ deveśa purodhāsyanti devatāḥ || 80 ||
[Analyze grammar]

yatrāhaṃ tatra matkāntā madviśiṣṭā madarpaṇāḥ |
sapta devyo mayāṣṭamyo vāsaṃ ceṣyanti me'ṣṭadhā || 81 ||
[Analyze grammar]

āśā śraddhā dhṛtiḥ kāntirvijitiḥ sannatiḥ kṣamā |
aṣṭamī vṛttiretāsāṃ purogā pākaśāsana || 82 ||
[Analyze grammar]

tāścāhaṃ cāsurāṃstyaktvā yuṣmadviṣayamāgatā |
tridaśeṣu nivatsyāmo dharmaniṣṭhāntarātmasu || 83 ||
[Analyze grammar]

bhīṣma uvāca |
ityuktavacanāṃ devīmatyarthaṃ tau nanandatuḥ |
nāradaśca trilokarṣirvṛtrahantā ca vāsavaḥ || 84 ||
[Analyze grammar]

tato'nalasakho vāyuḥ pravavau devaveśmasu |
iṣṭagandhaḥ sukhasparśaḥ sarvendriyasukhāvahaḥ || 85 ||
[Analyze grammar]

śucau cābhyarcite deśe tridaśāḥ prāyaśaḥ sthitāḥ |
lakṣmyā sahitamāsīnaṃ maghavantaṃ didṛkṣavaḥ || 86 ||
[Analyze grammar]

tato divaṃ prāpya sahasralocanaḥ śriyopapannaḥ suhṛdā surarṣiṇā |
rathena haryaśvayujā surarṣabhaḥ sadaḥ surāṇāmabhisatkṛto yayau || 87 ||
[Analyze grammar]

atheṅgitaṃ vajradharasya nāradaḥ śriyāśca devyā manasā vicārayan |
śriyai śaśaṃsāmaradṛṣṭapauruṣaḥ śivena tatrāgamanaṃ maharddhimat || 88 ||
[Analyze grammar]

tato'mṛtaṃ dyauḥ pravavarṣa bhāsvatī pitāmahasyāyatane svayaṃbhuvaḥ |
anāhatā dundubhayaśca nedire tathā prasannāśca diśaścakāśire || 89 ||
[Analyze grammar]

yathartu sasyeṣu vavarṣa vāsavo na dharmamārgādvicacāla kaścana |
anekaratnākarabhūṣaṇā ca bhūḥ sughoṣaghoṣā bhuvanaukasāṃ jaye || 90 ||
[Analyze grammar]

kriyābhirāmā manujā yaśasvino babhuḥ śubhe puṇyakṛtāṃ pathi sthitāḥ |
narāmarāḥ kiṃnarayakṣarākṣasāḥ samṛddhimantaḥ sukhino yaśasvinaḥ || 91 ||
[Analyze grammar]

na jātvakāle kusumaṃ kutaḥ phalaṃ papāta vṛkṣātpavaneritādapi |
rasapradāḥ kāmadughāśca dhenavo na dāruṇā vāgvicacāra kasyacit || 92 ||
[Analyze grammar]

imāṃ saparyāṃ saha sarvakāmadaiḥ śriyāśca śakrapramukhaiśca daivataiḥ |
paṭhanti ye viprasadaḥ samāgame samṛddhakāmāḥ śriyamāpnuvanti te || 93 ||
[Analyze grammar]

tvayā kurūṇāṃ vara yatpracoditaṃ bhavābhavasyeha paraṃ nidarśanam |
tadadya sarvaṃ parikīrtitaṃ mayā parīkṣya tattvaṃ parigantumarhasi || 94 ||
[Analyze grammar]